အခန်း ၄၃ - ဝိညာဉ်အသွင်ပြောင်းလဲခြင်း (အစောပိုင်းအဆင့်) တပည့်ငယ်... မင်း ငါ့အတွက် လမ်းပြပေးစမ်း

"ငါ မြေဓာတ်တံခါးစမ်းသပ်ချက်နေရာမှာ စနစ်ကို လှုံ့ဆော်မိသွားပြီး ငါ့ရဲ့ ကျင့်ကြံခြင်းအဆင့် မြင့်တက်လာခဲ့တာပဲ။"

ချင်းဟောက်သည် မိစ္ဆာသားရဲဘုရင်၏ မှော်ဝိညာဉ်နှင့် မိစ္ဆာသားရဲအမြုတေကို သိမ်းဆည်းလိုက်ရင်း သူ၏ စိတ်ထဲမှနေ၍ တွေးတောလိုက်မိသည်....

'ဒါပေမဲ့ အရင်တုန်းက ဟင်းလင်းပြင်ထဲမှာတော့ ယခုလိုမျိုး ဖြစ်မလာခဲ့ဘူး။ ပြင်ပဟင်းလင်းပြင်ထဲက သားရဲကြီးတွေက သဘာဝအတိုင်း မွေးဖွားလာတာမျိုး မဟုတ်လို့များလား။' သူသည် ထော့စန်း၏ အတင်းအဓမ္မကျွန်ပြုခြင်းကို ခံထားရသော ကျင့်ကြံသူများကို တွေးမိသွားသည်။ ချင်းဟောက်က ခန့်မှန်းလိုက်မိသည်..... 'ပြင်ပက မှော်သားရဲကြီးတွေအားလုံးက အဲဒီကျင့်ကြံသူတွေရဲ့ စီးတော်ယာဉ်တွေ ဖြစ်နေမလား။ သူတို့အားလုံးက ပြင်ပလူတွေများလား။'

'ပြီးတော့ ဒီမြေဓာတ်နယ်မြေကိုတော့ ထို့စန်း မကျဆုံးခင်ကာလတုန်းက ဖန်တီးခဲ့တာဖြစ်ရကား... ဒီနေရာမှာရှိတဲ့ ပျံသန်းနိုင်တဲ့ သားရဲကြီးတွေက ရှေးဟောင်းနတ်ဘုရား နယ်မြေရဲ့ ပိုင်ဆိုင်မှုတွေ ဖြစ်နေမလား။'

သူသည် ခေါင်းကို ခါယမ်းလိုက်ပြီး အဝေးတစ်နေရာသို့ လှမ်းကြည့်လိုက်ကာ... လွင့်ပျံနေသောအလင်းတန်းတစ်ခုအဖြစ်သို့ ပြောင်းလဲလျက် နေရာမှာတင် မျက်စိတစ်မှိတ်အတွင်း ကွယ်ပျောက်သွားခဲ့တော့သည်။

"ရှူး... ရှူး... ရှူး..."

သူ ထွက်ခွာသွားပြီးသည့်နောက်တွင်... အဝေးမှနေ၍ လေဆင်နှာမောင်းငယ်လေးတစ်ခု ပျံသန်းရောက်ရှိလာခဲ့သည်။ အကယ်၍ ထိုလေဆင်နှာမောင်းငယ်လေး၏ အတွင်းပိုင်းကို ဖောက်ထွင်းကြည့်ရှုနိုင်မည်ဆိုပါက အတွင်း၌ ဝမ်လင် ရှိနေသည်ကို မြင်တွေ့ရပေလိမ့်မည်။ ဝမ်လင်သည် ချင်းဟောက်ကို ဦးစွာ သွားရောက်ရှာဖွေခြင်း မပြုခဲ့ချေ၊ အကြောင်းမူကား သူကိုယ်တိုင် တစ်ဦးတည်း ရှိနေခြင်းက ပိုမိုဘေးကင်းလုံခြုံသည်ဟု ခံစားနေရသောကြောင့် ဖြစ်သည်။

ချင်းဟောက်သည်လည်း ဝမ်မာဇီ၏ အတွေးကို ကောင်းစွာခန့်မှန်းမိထားသူဖြစ်ရကား သူ့ကို လိုက်လံရှာဖွေခြင်း မပြုခဲ့ပါချေ။ သူသည် ရှေ့တည့်တည့်သို့ ဆက်လက်လှောက်လှမ်းခဲ့ပြီး... သူ့ကို လာရောက်တိုက်ခိုက်ဝံ့သော ပျံသန်းနိုင်သည့် သားရဲလေဆင်နှာမောင်းမှန်သမျှကို တိုက်ရိုက် အမှုန့်ချေပစ်ခဲ့သည်။ ဝိညာဉ်သန္ဓေအသွင်ပြောင်းလဲခြင်းအဆင့် ရှိ ကျင့်ကြံခြင်းအခြေခံဖြင့် ဤမြေဓာတ်တံခါးစမ်းသပ်ချက်ကို ဖြတ်ကျော်ရန်မှာ ချင်းဟောက်အတွက်မူ သဘာဝကျစွာပင် ဘာမှမခက်ခဲဘဲ အလွန်လွယ်ကူလှပေသည်။

မြေဓာတ်တံခါးစမ်းသပ်ချက်၏ ဝဲဂယက်ကြီးကို ဖြတ်ကျော်ပြီးသည့်နောက်တွင်... ချင်းဟောက်သည် မီးခိုးရောင်သန်းပြီး ဝေဝါးနေသော ကမ္ဘာကြီးတစ်ခုကို မြင်တွေ့လိုက်ရသည်။ ထိုနေရာတွင် ရှည်လျားလှပြီး ကတ္တရာစေးကဲ့သို့ နက်မှောင်နေသော ခုံးတံတားကြီးတစ်ခု မတ်တတ်ရပ် တည်ရှိနေခဲ့သည်။ တံတား၏ ထိပ်ဝတွင်မူ... မဟာဆန်လှသော ကျောက်စာတိုင်ကြီးတစ်ခု ရှိနေပြီး ၎င်း၏ မျက်နှာပြင်ပေါ်၌ "နောက်ပြန်မလှည့်ရမည့်လမ်း" ဟူသော စာသားကို ထုဆစ်ပုံဖော်ထားသည်။ ချင်းဟောက်သည် ဤတံတားကို ဖြတ်ကျော်ရန်မှာ အလွန်ပင် ရိုးရှင်းကြောင်း သိရှိထားသည်၊ လူတစ်ဦးအနေဖြင့် ထွက်ပေါ်လာသမျှသော စိတ်ကူးယဉ်ထင်ယောင်ထင်မှား မှန်သမျှကို လစ်လျူရှုထားလိုက်ရုံမျှသာ ဖြစ်သည်။

ချင်းဟောက်သည် နက်မှောင်သော ကျောက်ခုံးတံတားကြီးပေါ်သို့ လှမ်းတက်လိုက်သည်နှင့်တစ်ပြိုင်နက်... ပုံရိပ်တစ်ခုပြီးတစ်ခု ရုတ်တရက် ပေါ်ထွက်လာခဲ့ကြသည်။ ၎င်းတို့အနက်တွင် ကမ္ဘာမြေပေါ်ရှိ သူ၏ အတိတ်ဘဝတုန်းက လူများပင် ပါဝင်နေခဲ့ကြသည်။ သို့သော်လည်း ချင်းဟောက်သည် ၎င်းတို့အားလုံးကို လုံးဝဥဿုံ လစ်လျူရှုထားလိုက်သည်။ ဤအရာများအားလုံးမှာ စိတ်ကူးယဉ်ထင်ယောင်ထင်မှားများသာဖြစ်ကြောင်း သူ ကောင်းစွာသိရှိထားသည်၊ အကယ်၍ သူသာ ၎င်းတို့၏ လှည့်စားမှုကို ခံလိုက်ရပြီး နောက်ကြောင်းပြန်လှည့်မိပါက...သူကိုယ်တိုင်ပင်လျှင် မျက်စိတစ်မှိတ်အတွင်း ချက်ချင်း ပြာကျပျက်စီးသွားရပေလိမ့်မည်။

ခုံးတံတားကြီးကို ဖြတ်ကျော်ပြီးသည့်နောက်တွင် ချင်းဟောက်သည် ဝဲဂယက်တစ်ခုအတွင်းသို့ လှမ်းဝင်လိုက်ပြီး ရှေးဟောင်းနတ်ဘုရား နယ်မြေ၏ ဒုတိယမြောက် စမ်းသပ်ချက်နေရာသို့ ရောက်ရှိသွားခဲ့တော့သည်။ သူ၏ ရှေ့တည့်တည့်တွင်မူ... တိမ်တိုက်များအတွင်းသို့ ထိုးဖောက်ဝင်ရောက်နေပြီး မြူခိုးများဖြင့် လွှမ်းခြုံထားကာ အဆုံးအစမရှိလှသော တောင်ထိပ်ကြီးတစ်ခု ရှိနေခဲ့သည်။

"တားမြစ်ချက်တောင်တန်း !"

ချင်းဟောက်သည် ထိုတောင်ထိပ်ကြီးကို စိုက်ကြည့်လိုက်ရာ... သူ၏ ကျင့်ကြံခြင်းအဆင့်ဖြင့်ဆိုလျှင် ဤတောင်တစ်ခုလုံးကို မရေမတွက်နိုင်သော တားမြစ်ချက်ကန့်သတ်ချက်များဖြင့် ဖွဲ့စည်းထားခြင်းဖြစ်ကြောင်း သဘာဝကျစွာ မြင်တွေ့နိုင်ပေသည်။ ရှေးဟောင်းနတ်ဘုရား ထော့စန်းအနေဖြင့် ဤစမ်းသပ်ချက်များကို တည်ဆောက်ခဲ့ခြင်း၏ ရည်ရွယ်ချက်မှာ ဆက်ခံသူတစ်ဦးကို ရှာဖွေရန်အတွက်သာဖြစ်ပြီး သတ်ဖြတ်ရန်မဟုတ်သဖြင့်... ဤနေရာရှိ တားမြစ်ချက်များ၏ စွမ်းအားမှာ အလွန်တရာ ပြင်းထန်မနေခဲ့ပါချေ။

တောင်ခြေတွင်ရှိသော တားမြစ်ချက်များမှာ အမြုတေဖွဲ့စည်းခြင်းအဆင့် တိုက်ခိုက်မှုအဆင့်မျှသာ ရှိကြပြီး... တောင်ထိပ်သို့ ရောက်ရှိသွားချိန်တွင်မူ ဝိညာဉ်အသွင်ပြောင်းလဲခြင်းအဆင့် တိုက်ခိုက်မှုအဆင့်မျှသာ ရှိကြသည်။ စွမ်းအားကြီးမားလှသော ကြယ်ရှစ်ပွင့်အထွတ်အထိပ် တော်ဝင်ရှေးဟောင်းနတ်ဘုရား ဖြစ်သော ထို့စန်း၏ ခွန်အားဖြင့်ဆိုလျှင်... လက်တစ်ချက် ဝှေ့ယမ်းလိုက်ရုံမျှဖြင့် ဂြိုဟ်ကမ္ဘာတစ်ခုကို အမှုန့်ချေပစ်နိုင်စွမ်း ရှိပေရာ၊ အကယ်၍ သူသာ အစစ်အမှန် သတ်ဖြတ်လိုခဲ့ပါက ဤလူများအားလုံး မည်သည့်အခါမျှ ဖြတ်ကျော်နိုင်ကြလိမ့်မည် မဟုတ်ချေ။

သူသည် လမ်းကြောင်းတစ်ခုကို ရွေးချယ်လိုက်ပြီး တားမြစ်ချက်များကို အတင်းအဓမ္မ ဖျက်ဆီးလျက် တောင်ထိပ်ဆီသို့ ဦးတည်ထွက်ခွာခဲ့တော့သည်။ ဤနေရာရှိ တားမြစ်ချက်များ၏ ဆန်းပြားမှုကို နားလည်သဘောပေါက်သွားပါက "မဟာပညာရှိအလင်းဆောင်သူ" ဟူသော ဘွဲ့ထူးကို ရရှိနိုင်မည်ဖြစ်သော်လည်း... သူ့အတွက်မူ ယင်းအရာကို မလိုအပ်ပါချေ။ တားမြစ်ချက်အတတ်ပညာများကို သင်ယူရန်အတွက်မူ... ဝမ်မာဇီအနေဖြင့် ၎င်းတို့ကို လုံးဝဥဿုံ နားလည်သဘောပေါက်ပြီးသွားချိန်တွင် သူသည် စနစ်ထံမှနေ၍ တိုက်ရိုက် ရယူလိုက်ရုံမျှသာ ဖြစ်သည်။

ပေရာဂဏန်းအချို့ခန့် ခရီးနှင်ပြီးသည့်နောက်တွင် ချင်းဟောက်သည် ရာဂဆန္ဒခြောက်ပါး အရှင်သခင်နှင့် လမ်းခရီးတွင် ဆုံတွေ့လိုက်ရသည်။

"မင်းကိုး!"

ရာဂဆန္ဒခြောက်ပါး အရှင်သခင်သည် ချင်းဟောက်ကို တစ်ချက်ကြည့်လိုက်ပြီး သူ၏ နှုတ်ခမ်းထောင့်တွင် အပြုံးတစ်ခု ထွက်ပေါ်လာခဲ့ကာ ဖိတ်ခေါ်လိုက်သည်— "ကျင့်ကြံဖော်... တို့နှစ်ယောက် ပူးပေါင်းပြီးတော့ ဒီတားမြစ်ချက်တွေကို ဖျက်ဆီးကြရင် ဘယ်လိုလဲဟင်။"

သူက ပူးပေါင်းဆောင်ရွက်ကြစို့ဟု ဆိုသော်လည်း အမှန်စင်စစ်တွင်မူ ချင်းဟောက်ကို သူ၏ ရှေ့မှနေ၍ လမ်းခင်းပေးစေလိုခြင်းသာ ဖြစ်သည်။ ရာဂဆန္ဒခြောက်ပါး အရှင်သခင်သည် တစ်ဖက်လူအနေဖြင့် ငြင်းဆန်လိမ့်မည်ကို မစိုးရိမ်ပါချေ။ ဝိညာဉ်အသွင်ပြောင်းလဲခြင်းအဆင့် ၏ အစောပိုင်းအဆင့် အထွတ်အထိပ်မျှသာ ရှိသေးသော ကျင့်ကြံသူတစ်ဦးအနေဖြင့်... ဝိညာဉ်အသွင်ပြောင်းလဲခြင်း အလယ်အလတ်အဆင့်ရှိ မိမိကို အစစ်အမှန် အနိုင်ယူနိုင်စွမ်း ရှိပါ့မလား။

"ဝိညာဉ်အသွင်ပြောင်းလဲခြင်း အစောပိုင်းအဆင့် တပည့်ငယ်မျှသာ ရှိတဲ့ကောင်က တခြားလူကို ဒုက္ခပေးချင်တယ် ဟုတ်လား? ငါ့ရဲ့ ရှေ့မှောက်မှာ ဒူးထောက်စမ်း!"......ချင်းဟောက်က ဟိန်းဟောက်လိုက်သည်နှင့်တစ်ပြိုင်နက်... သူ၏ တစ်ကိုယ်လုံးရှိ ကျင့်ကြံခြင်းအခြေခံအားလုံး အရူးအမူး တိုးထွက်လာခဲ့ပြီး မဟာဆန်လှသော ဖိအားကြီးတစ်ခုအဖြစ်သို့ ပြောင်းလဲလျက် ရာဂဆန္ဒခြောက်ပါး အရှင်သခင်၏ ခန္ဓာကိုယ်ပေါ်သို့ ပြင်းထန်စွာ ဖိနှိပ်ပစ်လိုက်တော့သည်။ သူသည် ဝိညာဉ်အသွင်ပြောင်းလဲခြင်းအဆင့်သို့ အောင်မြင်စွာ တက်လှမ်းထားပြီးသူဖြစ်ပြီး သူ၏ ခန္ဓာကိုယ်အတွင်း၌ နတ်ဘုရားစွမ်းအားများဖြင့် ပြည့်နှက်နေခဲ့ပြီ ဖြစ်ရကား... သူ ထုတ်လွှတ်လိုက်သော ဖိအားကြီးသည် သာမန်မှော်စွမ်းအင်အဆင့်မှသည် နတ်ဘုရားစွမ်းပကားကြီး အဖြစ်သို့ ကူးပြောင်းသွားခဲ့ပြီ ဖြစ်သည်။

"ဒုန်း..."

ယခုကဲ့သို့ အတားအဆီးမဲ့လှသော နတ်ဘုရားစွမ်းပကားကြီး၏ ရှေ့မှောက်တွင် ရာဂခြောက်ပါး အရှင်သခင်သည် မည်သည့်ခုခံနိုင်စွမ်းမျှ မရှိတော့ဘဲ... မြေပြင်ပေါ်သို့ တိုက်ရိုက် ဒူးထောက်လဲကျသွားခဲ့ရတော့သည်။

"ဝိ... ဝိညာဉ်သန္ဓေအသွင်ပြောင်းလဲခြင်းအဆင့်လား..."

ရာဂခြောက်ပါး အရှင်သခင်၏ မျက်နှာအမူအရာမှာ အကြီးအကျယ် ပျက်ယွင်းသွားခဲ့ရပြီး သူ၏ မျက်ဝန်းများအတွင်း၌လည်း မယုံကြည်နိုင်စွမ်းရှိသော အရိပ်အယောင်များဖြင့် ပြည့်နှက်သွားခဲ့ရတော့သည်။ တစ်ဖက်လူသည် မိမိကိုယ်ကို ဖုံးကွယ်ထားသော ဝိညာဉ်အသွင်ပြောင်းလဲခြင်းအဆင့်ရှိ သေလို့မရသည့် ဘီလူးအိုကြီးတစ်ကောင် ဖြစ်နေလိမ့်မည်ဟု သူ မည်သည့်အခါမျှ ထင်မှတ်မထားခဲ့မိချေ။

ကျူးချွဲ့ကြယ်တာရာဂြိုလ်ပေါ်တွင်မူ... ကောင်းကင်ဘုံတက်လှမ်းခြင်းအဆင့် ရှိ ပညာရှင်များသည် ကောင်းကင်ဘုံလမ်းစဉ်ကို နားလည်သဘောပေါက်နိုင်ရန်အတွက် တစ်နှစ်ပတ်လုံး တံခါးပိတ်ကျင့်ကြံနေလေ့ရှိကြသဖြင့်၊ လူအများရှေ့မှောက်တွင် ဝိညာဉ်အသွင်ပြောင်းလဲခြင်းအဆင့် ပညာရှင်များသည် အသန်မာဆုံးသော အထွတ်အထိပ်ပုဂ္ဂိုလ်ကြီးများ ဖြစ်ကြပေသည်။ ကျူးချွဲ့နိုင်ငံအတွင်း၌ပင်လျှင် လောကီရေးရာကိစ္စရပ်များကို ကိုင်တွယ်ဖြေရှင်းကြသူများမှာ ပုံမှန်အားဖြင့် ဝိညာဉ်အသွင်ပြောင်းလဲခြင်းအဆင့် ကျင့်ကြံသူများသာ ဖြစ်ကြသည်။ ဝိညာဉ်အသွင်ပြောင်းလဲခြင်းအဆင့် ကျွမ်းကျင်သူတစ်ဦးတည်းဖြင့်တင် အဆင့် ၅ ကျင့်ကြံခြင်းနိုင်ငံတစ်ခုကို တည်ထောင်ရန်အတွက် လုံလောက်လှပေသည်။

"အကြီးအကဲ.. ကျွန်တော့်အသက်ကို ချမ်းသာပေးပါ! .. ကျွန်တော့်အသက်ကို ချမ်းသာပေးပါဗျာ!"

ရာဂဆန္ဒခြောက်ပါး အရှင်သခင်သည် သူ၏ မာန်မာနများကို ချက်ချင်း ဘေးဖယ်လိုက်ပြီး မြေပြင်ပေါ်သို့ ဦးတိုက်လျက် အသနားခံ ကရုဏာသက်အောင် တောင်းပန်လိုက်တော့သည်။ ဝိညာဉ်အသွင်ပြောင်းလဲခြင်းအဆင့် ပညာရှင်တစ်ဦးကို ထားလိုက်ပါဦး... နတ်ဘုရားအသွင်ပြောင်းလဲခြင်းအဆင့်၏ မဟာပြီးပြည့်စုံခြင်းအဆင့်ရှိ ကျင့်ကြံသူတစ်ဦးပင်လျှင် သူတို့အနေဖြင့် သွားရောက်ရန်စဝံ့သော အရာမဟုတ်ပါချေ။

ပထမဆုံး စမ်းသပ်ချက်မတိုင်မီ ဟင်းလင်းပြင်အတွင်းတုန်းက... ဝိညာဉ်အသွင်ပြောင်းလဲခြင်းအဆင့်ရှိ သူတို့ငါးဦးအုပ်စုသည် နတ်ဘုရားအသွင်ပြောင်းလဲခြင်းအဆင့် မဟာပြီးပြည့်စုံခြင်းအဆင့်ရှိ ဟောင်းနွမ်းဆွေးမြည့်သော သားရဲကြီးတစ်ကောင်နှင့် ရင်ဆိုင်ခဲ့ရစဉ်ကပင်၊ သူတို့ထဲမှ တစ်ဦး ကျဆုံးသွားခဲ့ရပြီးမှသာ ကျန်ရှိနေသူများ ဘေးကင်းစွာ ထွက်ပြေးနိုင်ခဲ့ကြခြင်း ဖြစ်သည်။ ဝိညာဉ်အသွင်ပြောင်းလဲခြင်းအဆင့် ပညာရှင်တစ်ဦးနှင့် ရင်ဆိုင်ရသည့်အခါတွင်မူ... သူတို့ငါးဦးစလုံး ပူးပေါင်း၍ တိုက်ခိုက်ပါစေကာမူ ရလဒ်မှာ သေဆုံးခြင်းမှတစ်ပါး အခြားမရှိနိုင်ချေ။

ချင်းဟောက်က အမိန့်ပေးလိုက်သည်— "မင်းရဲ့ ဝိညာဉ်သွေးကို လွှဲအပ်စမ်း၊ ဒါမှမဟုတ်ရင် သေစမ်း!"

"အကြီးအကဲ... ဒီမျိုးဆက်သစ်တပည့်သည် ဝိညာဉ်သွေးကို ဆက်သရန် အဆင်သင့်ရှိပါတယ်ဗျာ!" ရာဂခြောက်ပါး အရှင်သခင်သည် နည်းနည်းလောက်တောင်မှ တုံ့ဆိုင်းခြင်းမရှိဘဲ သူ၏ ဝိညာဉ်သွေးကို ဦးညွှတ်ဆက်သလိုက်တော့သည်။

ချင်းဟောက်သည် ဝိညာဉ်သွေးကို သိမ်းဆည်းလိုက်ပြီး အမိန့်ပေးလိုက်သည် "မင်း လမ်းခရီးမှာ ဝမ်လင် နဲ့ ဆုံတွေ့ခဲ့မယ်ဆိုရင်... သူ့ကို သွားပြီး မတိုက်ခိုက်ရဲစေနဲ့။ အကယ်၍ သူ့မှာ တစ်စုံတစ်ရာ ထိခိုက်ပျက်စီးမှု ရှိခဲ့မယ်ဆိုရင်... ငါ မင်းရဲ့ ဝိညာဉ်သွေးကို မျက်စိတစ်မှိတ်အတွင်း ချက်ချင်း ခြေမှုန်းပစ်မယ်!" သူသည် သူ၏ ဝတ်ရုံစကို ခါထုတ်လိုက်ပြီး ထိုလူကို တောင်ခြေအောက်သို့ လှမ်း၍ ပစ်ချလိုက်တော့သည်။

အမှန်စင်စစ်အားဖြင့် ဆိုရသော်... အကယ်၍ ရှေးဟောင်းနတ်ဘုရားအမွေအနှစ်ကျောက်စိမ်းရတနာကို သွားရောက်ယူဆောင်ရန်အတွက် ရာဂခြောက်ပါး အရှင်သခင်၏ အသက်ကို အသုံးချရန် လိုအပ်ချက်သာ မရှိခဲ့ပါက၊ ချင်းဟောက်သည် သူ့ကို ယခုကဲ့သို့ အသက်ချမ်းသာပေးမည့်အစား သေတွင်းထဲသို့ တိုက်ရိုက် ပို့ဆောင်ပစ်ခဲ့မှာ သေချာလှပေသည်။

တောင်ခြေအောက်တွင်မူ... ရာဂခြောက်ပါး အရှင်သခင်သည် အလွန်တရာ စိတ်ပျက်အားလျော့လှသောအမူအရာကို ဆင်မြန်းထားရသည်။ သူသည် ဤမျှလောက်သော အကွာအဝေးသို့ ရောက်ရှိနိုင်ရန်အတွက် လပေါင်းများစွာကြာ တားမြစ်ချက်များကို ဖျက်ဆီးခဲ့ရခြင်း ဖြစ်သည်။ ယခုမူ... သူ၏ ကြိုးပမ်းအားထုတ်မှုအားလုံးသည် သဲထဲရေသွန် ဖြစ်သွားခဲ့ရပြီ မဟုတ်ပါလား။

'လူယုတ်မာကြီး... မင်း တတိယမြောက် စမ်းသပ်ချက်ထဲမှာတင် ပွဲချင်းပြီး သေဆုံးသွားပါစေလို့ ငါ ဆုတောင်းတယ်!' ရာဂခြောက်ပါး အရှင်သခင်သည် သူ၏ စိတ်ထဲမှနေ၍သာ ကျိန်ဆဲဝံ့ပြီး ကျယ်လောင်စွာ ထုတ်ဖော်ပြောဆိုရန်မူ မဝံ့ရဲပါချေ။ တစ်ဖက်လူ ကြားသွားပြီး မိမိ၏ အသက်ကို လုံးဝဥဿုံ ရုပ်သိမ်းပစ်လိုက်မည်ကို သူ အလွန်ပင် ထိတ်လန့်တုန်လှုပ်နေမိသောကြောင့် ဖြစ်သည်။ချင်းဟောက်သည် တားမြစ်ချက်တောင်တန်း၏ တားမြစ်ချက်အားလုံးကို ဖျက်ဆီးလျက် တောင်ထိပ်သို့ တောက်လျှောက် တက်လှမ်းခဲ့သည်။ ဤနေရာတွင်လည်း ဝဲဂယက်ကြီးတစ်ခု တည်ရှိနေခဲ့သည်။

"ရှူး..."

သူ၏ ပုံရိပ်သည် လျှပ်ကနဲ လှုပ်ရှားသွားခဲ့ပြီး ၎င်း၏ အတွင်းသို့ ဝင်ရောက်ကာ ပျောက်ကွယ်သွားခဲ့တော့သည်။

ချင်းဟောက် နောက်တစ်ကြိမ် ပြန်လည်ပေါ်ထွက်လာသည့် အချိန်တွင်မူ... နတ်သမီးများ ကပြဖျော်ဖြေနေသည့် နတ်ဘုရားတို့၏ နယ်မြေတစ်ခုကဲ့သို့ ဆန်းပြားလှသော နေရာတစ်ခုသို့ ရောက်ရှိနေခဲ့ပြီ ဖြစ်သည်။ ဤနေရာရှိ ဝိညာဉ်စွမ်းအင်များသည် အလွန်တရာ သိပ်သည်းဆန်းပြားလှပြီး... သူ၏ ရှေ့တည့်တည့်တွင် စက်ဝိုင်းပုံစံ ရေကန်ကြီးတစ်ခု ရှိနေကာ၊ ၎င်း၏ အတွင်း၌ ခုနစ်ရောင်ခြယ်အလင်းတန်းများ ဖြာထွက်နေသည့် သုံးထပ်မျှော်စင်နန်းတော် ကြီးတစ်ခု မတ်တတ်ရပ် တည်ရှိနေခဲ့သည်။ ချင်းဟောက်သည် ထိုမျှော်စင်နန်းတော်အတွင်းသို့ ဝင်ရောက်ခြင်းမပြုခဲ့ချေ။ အတွင်းပိုင်း၌ ပါရှိသမျှသော ရတနာအားလုံးမှာ အခြားသော ပုဂ္ဂိုလ်တစ်ဦး၏ ယူဆောင်ခြင်းကို ခံလိုက်ရပြီဖြစ်ကြောင်း သူ ကောင်းစွာသိရှိထားသောကြောင့် ဖြစ်သည်။ချင်းဟောက်သည် အခြားသော ဝဲကရက်တစ်ခုကို ဖြတ်ကျော်လိုက်ပြီး တတိယမြောက် အဆင့်အတွင်းသို့ လှမ်းဝင်လိုက်တော့သည်။

"ဇိ..."

ချင်းဟောက် ဝင်ရောက်သွားသည့် အခိုက်အတန့်တွင်ပင်... သူ၏ သိစိတ်ပင်လယ်အတွင်း၌ ပြင်းထန်လှသော လှိုင်းလုံးကြီးများ ရုတ်တရက် ထွက်ပေါ်လာခဲ့သည်။ သူ၏ အစွန်းရောက်နယ်ပယ် နတ်ဘုရားအာရုံမှာ မသိစိတ်မှနေ၍ ထိန်းချုပ်မှုမဲ့စွာ ထွက်ပေါ်လာနေသည်ကို သူ ရှာဖွေတွေ့ရှိလိုက်ရသည်။

"ပျက်သုဉ်းခြင်းနယ်ပယ် !"

ချင်းဟောက်သည် သူ၏ ရှေ့မှောက်ရှိ အဆုံးအစမရှိ ကျယ်ပြောလှသော ဟင်းလင်းပြင်ကြီးကို စိုက်ကြည့်လိုက်သည်။ ဤနေရာသည် ပြင်ပနယ်ပယ်စစ်တလင်း၏ ဟင်းလင်းပြင်အက်ကွဲကြောင်းများအတွင်းရှိ နယ်မြေနှင့် လုံးဝဥဿုံ တစ်ပုံစံတည်း ဖြစ်ပေသည်။ သူသည် အစွန်းရောက်နယ်ပယ် နတ်ဘုရားအာရုံကို ပိုင်ဆိုင်ထားရုံမျှမက... သူ၏ ဝိညာဉ်သည်လည်း ကြီးပြင်းရင့်ကျက်ပြီးသားဖြစ်သော ဝိညာဉ်ဝါးမြိုသူ တစ်ကောင်အဖြစ်သို့ ပြောင်းလဲထားပြီးဖြစ်ရကား၊ ဤပျက်သုဉ်းခြင်းနယ်ပယ်အတွင်း၌ သွားလာလှုပ်ရှားရခြင်းမှာ သူ့အတွက်မူ ရေကူးနေသည့် ငါးတစ်ကောင်ကဲ့သို့ အလွန်တရာ လွတ်လပ်ပေါ့ပါးလှပေသည်။

"ရှူး..."

ရုတ်တရက်ပင်... ဦးခေါင်းပေါ်၌ ဂျိုနှစ်ချောင်း ပါရှိနေသော အတုအယောင်ဝိညာဉ်ခန္ဓာ တစ်ခုသည် အဝေးမှနေ၍ တစ်ရှိန်ထိုး တိုးကပ်လာခဲ့ပြီး ချင်းဟောက်ကို ဗဟိုပြု၍ ဝါးမြိုရန် ကြိုးစားလိုက်တော့သည်။

"လစ်စမ်း!"

ချင်းဟောက်က အေးစက်စွာ နှာခေါင်းရှုံ့လိုက်သည်နှင့်တစ်ပြိုင်နက်... ထိုလွင့်မျောနေသော ဝိညာဉ်ဆိုး သည် တကယ့်ကို ကြောက်မက်ဖွယ်ကောင်းလှသောအရာတစ်ခုနှင့် ရင်ဆိုင်လိုက်ရသကဲ့သို့ ချက်ချင်းပင် ထိတ်လန့်တုန်လှုပ်သွားခဲ့ရပြီး အဝေးတစ်နေရာသို့ ကပျာကယာ ထွက်ပြေးသွားခဲ့တော့သည်။

"ရပ်စမ်း!"

ချင်းဟောက်၏ စကားသံ ဆုံးသွားသည်နှင့်တစ်ပြိုင်နက်... ထိုလွင့်မျောနေသော ဝိညာဉ်ဆိုးမှာ နေရာတင် ဆတ်ကနဲ ရပ်တန့်သွားခဲ့ရတော့သည်။

"ဒီနယ်မြေကနေ ထွက်ခွာနိုင်မယ့် ထွက်ပေါက်နေရာဆီကို ငါ့ကို လမ်းပြပေးစမ်း!"

ချင်းဟောက်သည် ထိုဝိညာဥ်ဆိုး၏ ခန္ဓာကိုယ်ပေါ်တွင် ပုတီးစေ့ ကို တိတ်တဆိတ် ဖုံးကွယ်လိုက်ပြီး... သူ၏ ပုံရိပ်သည် လျှပ်ကနဲ လှုပ်ရှားသွားခဲ့ကာ ပုတီးစေ့၏ ဟင်းလင်းပြင်အတွင်းသို့ ဝင်ရောက် ပျောက်ကွယ်သွားခဲ့တော့သည်။ သူသည် ထိုလွင့်မျောနေသော ဝိညာဉ်ဆိုးကို အသုံးချ၍ မိမိကို ထွက်ပေါက်ဆီသို့ လမ်းပြခိုင်းရန် ရည်ရွယ်လိုက်ခြင်း ဖြစ်သည်။