အခန်း (၁၂)---ဝူယွိကို ကယ်တင်ခြင်းနှင့် အလောင်းကောင် ယင်ဂိုဏ်းသို့ ရောက်ရှိခြင်း

"အလောင်းကောင်ရုပ်သေးတစ်ရုပ်ကများ ဒီလောက်တောင် ရိုင်းစိုင်းရဲတယ်လား။ ဒီပုဂ္ဂိုလ်က မင်းကို အပြင်ထွက်လာဖို့ အမိန့်ပေးတယ်။ မင်း သေချင်နေတာလား။"

ကောင်းကင်ယံမှ ဆင်းသက်လာသော နတ်ဘုရားတစ်ပါးကဲ့သို့ လေဟာနယ်ထဲတွင် ချင်းဟောက် ပေါ်လာခဲ့ပြီး သူ၏ဝတ်ရုံစသည် လေထဲတွင် တဖျတ်ဖျတ် လွင့်ပျံနေသည်။ သူ၏ နက်မှောင်သောဆံနွယ်များသည် အသာအယာ လှုပ်ခတ်နေပြီး မျက်ဝန်းများသည် ကြယ်တာရာများကဲ့သို့ တောက်ပလျက်ရှိကာ လက်နှစ်ဖက်ကို နောက်ပစ်ရင်း တစ်ကိုယ်လုံးမှ ဝိညာဥ်သန္ဓေတည်ခြင်းအဆင့်နယ်ပယ် အလတ်ပိုင်း၏ ကျင့်ကြံခြင်းစွမ်းအားလှိုင်းများကို ထုတ်လွှတ်နေခဲ့သည်။

"ထောင်လွှားလှချည်လား!"

ဤစကားကို ကြားလိုက်ရသောအခါ အလောင်းခြောက်ကဲ့သို့ လူသည် ဒေါသတကြီး ဖြစ်သွားခဲ့သည်။ တစ်ဖက်လူသည် မိမိနှင့် အဆင့်တူညီသော ဝိညာဥ်သန္ဓေတည်ခြင်းအဆင့်နယ်ပယ် အလတ်ပိုင်းမျှသာ ရှိသေးသော်လည်း သူ့ကို အထင်သေးဝံ့သည် မဟုတ်ပါလား။ သူ မကျဆုံးခင်အချိန်က ကြီးမြတ်လှသော ဝိညာဥ်သန္ဓေတည်ခြင်းအဆင့် မဟာပြီးပြည့်စုံခြင်း နယ်ပယ်ရှိ ပညာရှင်တစ်ဦး ဖြစ်ခဲ့ဖူးသည်ကို သိထားသင့်ပေသည်။

"ဝုန်း!"

အလောင်းခြောက်ကဲ့သို့ လူသည် ခြောက်သွေ့နေသော လက်မောင်းတစ်ဖက်ကို ဆန့်ထုတ်လိုက်ရာ မှော်စွမ်းအင်များသည် သမုဒ္ဒရာကြီးတစ်ခုကဲ့သို့ လှိုင်းထလာပြီး ကြီးမားလှသော လက်ဝါးကြီးတစ်ခုအဖြစ် ကူးပြောင်းကာ ချင်းဟောက်ထံသို့ အရှိန်အဝါပြင်းစွာ ကုတ်ခြစ်တိုက်ခိုက်ခဲ့သည်။

"ကြေမွစမ်း!"

ချင်းဟောက်သည် နှစ်ကာလသစ်သားဓားကို ဆင့်ခေါ်လိုက်ပြီး လက်ညှိုးတစ်ချက် ထိုးလိုက်ရာ သစ်သားဓားသည် ထိုမှော်စွမ်းအင်လက်ဝါးကြီးကို သွားရောက်ရိုက်ခတ်ခဲ့သည်။ "ဘုန်း" ဟူသောအသံနှင့်အတူ မှော်စွမ်းအင်လက်ဝါးကြီးမှာ ပေါက်ကွဲသွားခဲ့ပြီး မှုန်ဝါးဝါးမြူမှုန်များအဖြစ် ပြောင်းလဲကာ ပျောက်ကွယ်သွားခဲ့သည်။

"ပိုင်းဖြတ်စမ်း!"

ချင်းဟောက်သည် လက်နှစ်ဖက်ဖြင့် တံဆိပ်တစ်ခုကို ဖန်တီးလိုက်ပြီး အလောင်းခြောက်ကဲ့သို့ လူထံသို့ ထပ်မံ၍ တိုက်ခိုက်လိုက်ပြန်သည်။

"ဟွန်း!"

အလောင်းခြောက်ကဲ့သို့ လူ၏ မျက်ဝန်းများတွင် မထောက်မညှာ အထင်သေးမှုများ ပေါ်လွင်လာခဲ့ပြီး သူ၏ ခြောက်သွေ့သော လက်ဝါးကို မြှောက်ကာ သစ်သားဓားကို တားဆီးရန် ရည်ရွယ်လိုက်သည်။ သူ၏ အမြင်အရ သူ၏ ယခုကိုယ်ခန္ဓာမှာ မှော်ရတနာတစ်ခုကဲ့သို့ မာကျောစေရန် သွန်းလုပ်ထားခြင်း ဖြစ်သဖြင့် ဝိညာဥ်သန္ဓေတည်ခြင်းအဆင့်နယ်ပယ်ရှိ ရတနာတစ်ခု၏ တိုက်ခိုက်မှုကို သဘာဝကျစွာပင် ခံနိုင်ရည်ရှိမည်ဟု ယူဆထားသည်။

"ဂြွတ်!"

သို့သော်လည်း နောက်တစ်စက္ကန့်တွင်ပင် သူ၏မျက်နှာအမူအရာ ချက်ချင်း ပြောင်းလဲသွားခဲ့သည်။ ဝိညာဥ်သန္ဓေတည်ခြင်းအဆင့်နယ်ပယ်ရှိ ရတနာတစ်ခုထက် မနိမ့်ကျသော သူ၏ ကိုယ်ခန္ဓာသည် သစ်သားဓားနှင့် ထိမိရုံမျှဖြင့် မည်သည့်ခုခံမှုမျှ မပြုလုပ်နိုင်ဘဲ အစိတ်စိတ်အမြွှာမြွှာ ပျက်စီးသွားခဲ့သည်။

"ဝိညာဉ်အသွင်ပြောင်းခြင်းအဆင့် ရတနာတစ်ပါးလား။"

အလောင်းခြောက်ကဲ့သို့ လူ၏ မျက်နှာတွင် တုန်လှုပ်မှုများဖြင့် ပြည့်နှက်သွားခဲ့ပြီး ထိတ်လန့်တကြား အော်ဟစ်လိုက်သည်။ ဝိညာဉ်အသွင်ပြောင်းခြင်းအဆင့် ရတနာကို ပိုင်ဆိုင်ထားသည့် ကျင့်ကြံသူတစ်ဦးကို သွားရောက်ဆွမိလိမ့်မည်ဟု သူ လုံးဝ မထင်မှတ်ထားခဲ့ပေ။ တစ်ဖက်လူ၏ နောက်ခံကို ထည့်မတွက်လျှင်ပင် ဤဝိညာဉ်အသွင်ပြောင်းခြင်းအဆင့် ရတနာတစ်ခုတည်းနှင့်ပင် သူ ခုခံနိုင်စွမ်းမရှိပေ။

"ဝူး!"

တစ်ချိန်တည်းမှာပင် အလောင်းခြောက်ကဲ့သို့ လူသည် ထူးဆန်းသော စွမ်းအားတစ်ခုက သူ၏ ကိုယ်ခန္ဓာကို တိုက်စားဖျက်ဆီးနေသည်ကို ခံစားလိုက်ရသည်။ သူ၏ ယခုခန္ဓာကိုယ်မှာ အလောင်းကောင်ရုပ်သေးတစ်ခု ဖြစ်သော်လည်း ဆွေးမြည့်ပျက်စီးခြင်းဘေးမှ မလွတ်မြောက်နိုင်သေးချေ။

"ဒါ... ဒါက သဘောတရားနယ်ပယ် စွမ်းအားလား။"

အလောင်းခြောက်ကဲ့သို့ လူသည် ကြောက်လန့်တကြား အော်ဟစ်လိုက်ပြီး သူ၏ ဝိညာဉ်ပုံရိပ်သည် ခန္ဓာကိုယ်ထဲမှ ချက်ချင်း ရုန်းထွက်ခဲ့သည်။ အကယ်၍ သူ၏ ဝိညာဉ်ပုံရိပ်သာ ခန္ဓာကိုယ်ထဲမှ ထွက်မလာခဲ့ပါက ထိုသဘောတရားနယ်ပယ် စွမ်းအား၏ တိုက်စားမှုကို ခံရပေလိမ့်မည်။

"ဝုန်း!"

သူ၏ ဝိညာဉ်ပုံရိပ် ခန္ဓာကိုယ်မှ ထွက်လာသည်နှင့်တစ်ပြိုင်နက် ချင်းဟောက် ဖန်တီးထားသော စွမ်းအင်လက်ဝါးကြီးက ၎င်းကို တင်းကျပ်စွာ ဖမ်းချုပ်လိုက်သည်။

"ကျင့်ကြံဖော်... ကျွန်တော့်အသက်ကို ချမ်းသာပေးပါ။" အလောင်းခြောက်ကဲ့သို့ လူ၏ ဝိညာဉ်ပုံရိပ်က ကရုဏာသက်ရန် အသနားခံလိုက်သည်။ "ကျွန်တော်က အဆင့် (၄) ကျင့်ကြံခြင်းနိုင်ငံက..."

သို့သော်လည်း သူ စကားမဆုံးခင်မှာပင် ချင်းဟောက်က သူ၏ ဝိညာဉ်ပုံရိပ်ကို ချိတ်ပိတ်လိုက်ပြီး ဖြစ်သည်။ သူက အဆင့် (၄) ကျင့်ကြံခြင်းနိုင်ငံက ဖြစ်နေပါစေဦးတော့၊ ချင်းဟောက်အနေဖြင့် သူက အဆင့် (၅) ကျင့်ကြံခြင်းနိုင်ငံက ဖြစ်နေလျှင်ပင် ကြောက်ရွံ့နေမည် မဟုတ်ပေ။ မည်သို့ပင်ဆိုစေကာမူ ချင်းဟောက်တွင် ဖရိုဖရဲပုတီးစေ့ ရှိနေသဖြင့် အကယ်၍ သူ မနိုင်ပါက ပုန်းအောင်းနေရုံသာ ရှိသည်။ ထို့ပြင် ကျင့်ကြံသူတစ်ဦး၏ ဝိညာဉ်ပုံရိပ်မှာ ရတနာတစ်ပါး ဖြစ်ရာ ချင်းဟောက်အနေဖြင့် ၎င်းကို သဘာဝကျစွာပင် အလဟဿ ဖြုန်းတီးပစ်မည် မဟုတ်ချေ။

"ရှူး!"

မလှမ်းမကမ်းနေရာ၌ အလောင်းခြောက်ကဲ့သို့ လူသည် ချင်းဟောက်၏ လက်ချက်ဖြင့် သေဆုံးသွားသည်ကို မြင်သောအခါ အလောင်းကောင်ကျိန်စာသည် မည်သည့်စကားမျှ မပြောဘဲ ဝေးရာသို့ အလျင်အမြန် ထွက်ပြေးသွားခဲ့သည်။

"ထွက်ပြေးဖို့ ကြိုးစားနေတုန်းပဲလား။"

သို့သော်လည်း ၎င်းဝေးဝေးသို့မရောက်ခင်မှာပင် စွမ်းအင်လက်ဝါးကြီးတစ်ခု၏ နှိပ်ကွပ်ခြင်းကို ခံလိုက်ရသည်။

ချင်းဟောက်သည် အလောင်းကောင်ကျိန်စာကို ကျောက်ရုပ်တုရှေ့သို့ ယူဆောင်လာပြီး တည်ငြိမ်စွာ ပြောလိုက်သည်။ "မင်းဘာသာမင်း ထွက်လာမလား၊ ဒါမှမဟုတ် ငါကပဲ မင်းကို ထွက်လာအောင် ဖိတ်ခေါ်ရမလား။"

"စီနီယာ... ကျေးဇူးပြုပြီး လက်ခလော့ပေးပါဦး။"

ကျောက်ရုပ်တုပေါ်တွင် ရုတ်တရက် ဝဲကရက်တစ်ခု ပေါ်လာခဲ့ပြီး တစ်ပေခန့်သာ မြင့်သော ပုံရိပ်သေးလေးတစ်ခုသည် ဝမ်လင်နှင့် အတိုင်တို့ကို သယ်ဆောင်လျက် ပြင်ပကမ္ဘာသို့ ထွက်ပေါ်လာခဲ့သည်။

"အလောင်းကောင်ယင်ဂိုဏ်းက မျိုးဆက်သစ် ဝူယွိက စီနီယာ့ကို အရိုအသေပြုပါတယ်!"

ထိုပုံရိပ်သေးလေးမှာ မှုန်ဝါးနေပြီး လွန်စွာ အားနည်းနေခဲ့သည်။ သူ ပေါ်လာသည်နှင့်တစ်ပြိုင်နက် ကြောက်ရွံ့ထိတ်လန့်စွာဖြင့် ဦးညွှတ်အရိုအသေပြုလိုက်သည်။ လွန်ခဲ့သော နှစ်ပေါင်းတစ်ရာက သူသည် ကိုယ်ခန္ဓာကို စွန့်လွှတ်ကာ အလောင်းကောင်ရုပ်သေးအတွင်းရှိ ဝိညာဉ်ကြောင့် ထွက်ပြေးခဲ့ရခြင်း ဖြစ်သည်။ နှစ်တစ်ရာ ကုန်လွန်သွားခဲ့ပြီး သူ၏ အလောင်းကောင်ရုပ်သေးမှာ ပိုမိုအစွမ်းထက်လာခဲ့သော်လည်း ယခုအခါတွင်မူ မိမိရှေ့ရှိ လူ၏ လက်ချက်ဖြင့် ဖျက်ဆီးခြင်း ခံလိုက်ရပြီး ၎င်း၏ ဝိညာဉ်ပါ ချိတ်ပိတ်ခြင်း ခံလိုက်ရသည်။ သူသည် မိမိ၏ အစွမ်းထက်ဆုံးအချိန်၌ပင် ထိုအလောင်းကောင်ရုပ်သေးကို မအနိုင်ယူနိုင်ခဲ့ရာ ယခုကဲ့သို့ အားနည်းနေသော အခြေအနေတွင် မိမိရှေ့ရှိ ပညာရှင်ကို ပို၍ပင် တော်လှန်နိုင်စွမ်း မရှိချေ။

"မျိုးဆက်သစ် ဝမ်လင်က စီနီယာ့ကို အရိုအသေပြုပါတယ်!"

ဘေးတွင် ရပ်နေသော ဝမ်လင်သည်လည်း ဦးညွှတ်နှုတ်ဆက်လိုက်သည်။ ချင်းဟောက်ကို ကြည့်သော သူ၏ အကြည့်မှာ အနည်းငယ် ရှုပ်ထွေးနေခဲ့သည်။ အကယ်၍ ဤလူသာ မရှိခဲ့ပါက သူသည် ယနေ့တွင် ဝူယွိ၏ တယ်လီပို့တေရှင်းအစီအရင်ကို အားကိုးပြီး ထွက်ပြေးရပေလိမ့်မည်။ ထိုအစီအရင်က ဘယ်နေရာကို ဦးတည်နေမှန်း သို့မဟုတ် အန္တရာယ်ရှိမရှိကို သူ မသိရှိပေ။ သို့သော် ဤလျှို့ဝှက်ဆန်းကြယ်သော စီနီယာနှင့် ထပ်မံတွေ့ဆုံရခြင်းမှာ တိုက်ဆိုင်မှုသက်သက်လား သို့မဟုတ် ထိုလူက တမင်တကာ ပြုလုပ်ခဲ့ခြင်းလားဆိုသည်ကို သူ ဝေခွဲမရနိုင်ဖြစ်နေသည်။

ချင်းဟောက်က ဝမ်လင်ကို ကြည့်ကာ ပြုံးလိုက်သည်။ "ညီငယ်လေးဝမ်... ငါတို့ ပြန်ဆုံကြပြန်ပြီနော်။"

"ကျင့်ကြံဖော်နဲ့ သူတို့က သိကြတာလား။" ဝူယွိ ဆွံ့အသွားခဲ့သည်။ သူ ကျပန်းရှာဖွေခဲ့သော လူငယ်လေးတွင် ဤမျှကြီးမားသော နောက်ခံနောက်ကြောင်း ရှိနေလိမ့်မည်ဟု သူ လုံးဝ ထင်မှတ်မထားခဲ့ပေ။

"သူနဲ့ငါက ဂိုဏ်းတူညီအစ်ကိုတွေလေ!" ချင်းဟောက်က အသာအယာ ရယ်မောလိုက်ပြီး ဝူယွိကို ပြောလိုက်သည်။ "မင်းရဲ့ ဝိညာဉ်သွေးကို အပ်စမ်း... ဒါဆိုရင် ဒီပုဂ္ဂိုလ်က မင်းရဲ့ ကိုယ်ခန္ဓာကို မင်းဆီ ပြန်ပေးမယ်။"

"အမိန့်အတိုင်းပါခင်ဗျာ!" ဝူယွိသည် သဘာဝကျစွာပင် မတော်လှန်ဝံ့ဘဲ သူ၏ ဝိညာဉ်သွေးကို ချက်ချင်း အပ်နှံလိုက်သည်။

ချင်းဟောက်သည် ဝိညာဉ်သွေးကို ယူပြီးနောက် အလောင်းကောင်ကျိန်စာ၏ ချိတ်ပိတ်ထားသော အသိဉာဏ်ကို အသာအယာ သုတ်သင်ပယ်ရှင်းလိုက်ပြီး ၎င်းကို ဝူယွိထံသို့ ပစ်ပေးလိုက်သည်။

"ရှူး!" ဝူယွိ၏ ဝိညာဉ်ပုံရိပ်သည် လျှပ်တပြတ်အတွင်း၌ပင် မိမိ၏ ခန္ဓာကိုယ်ထဲသို့ တိုးဝင်ကာ ၎င်းကို ပြန်လည်သိမ်းပိုက်ရန် စတင်လိုက်သည်။ မကြာမီ ဝူယွိ၏ ခန္ဓာကိုယ်မှ ဝိညာဥ်သန္ဓေတည်ခြင်းအဆင့်ရှိ စွမ်းအားလှိုင်းများ ဖြာထွက်လာခဲ့သည်။ သူသည် မျက်လုံးများကို ဖွင့်လိုက်ပြီး ချင်းဟောက်ကို ထပ်မံ၍ ဦးညွှတ်လိုက်သည်။ "စီနီယာ့ကို အထူးပဲ ကျေးဇူးတင်ရှိပါတယ်ခင်ဗျာ။"

ချင်းဟောက်က ညွှန်ကြားလိုက်သည်။ "ငါက အလောင်းကောင်ယင်ဂိုဏ်းဆီကို သွားဖို့ ဖြစ်နေတာမို့ မင်း လမ်းပြပေးရမယ်။"

"ဟုတ်ကဲ့ပါ!" ဝူယွိသည် မည်သည့်မေးခွန်းမျှ မမေးဘဲ ကျောက်ရုပ်တုဆီသို့ လက်ညှိုးထိုးပြကာ ဖိတ်ခေါ်လိုက်သည်။ "စီနီယာ... ကျွန်တော် ဒီနေရာမှာ အလောင်းကောင်ယင်ဂိုဏ်းဆီ တန်းတန်းမတ်မတ် ရောက်နိုင်တဲ့ တယ်လီပို့တေရှင်းအစီအရင်တစ်ခုကို ပြင်ဆင်ထားပါတယ်!"

ချင်းဟောက်က ခေါင်းကို အနည်းငယ် ငြိမ့်ပြလိုက်ပြီး ဝမ်လင်ကို ကြည့်လိုက်သည်။ "ညီငယ်လေးဝမ်... မင်းရော အတူတူ လိုက်ခဲ့မလား။"

ဝမ်လင်သည် ခဏမျှ တိတ်ဆိတ်သွားခဲ့ပြီးနောက် နောက်ဆုံးတွင် ခေါင်းငြိမ့်ပြလိုက်သည်။ "ကျွန်တော် လိုက်ခဲ့ပါ့မယ်။" ချင်းဟောက်၏ စကားများထဲတွင် သူ့ကို လိုက်ခဲ့စေလိုသော သဘောကို သူ ကြားသိနေရသဖြင့် သဘာဝကျစွာပင် မငြင်းပယ်ဝံ့ချေ။ ထို့ပြင် သူ ကျင့်ကြံထားသော ဝါးခါးရေပူစမ်း စွမ်းအင်ပေါက်ဖွင့်ကျင့်စဥ်မှာ တိုးတက်မှုရရှိရန်အတွက် အဆင့်မြင့် ယင်စွမ်းအားများ လိုအပ်သည်။ ဝူယွိ၏ ပြောပြချက်အရ အလောင်းကောင်ယင်ဂိုဏ်းတွင် မြေကမ္ဘာအဆင့်ရှိ အေးစက်သော စွမ်းအားများ ရှိနေသည်။

ဝူယွိသည် ကျောက်ရုပ်တုအတွင်းပိုင်းသို့ ဦးတည်သော လမ်းကြောင်းကို ဖွင့်လှစ်လိုက်ပြီး လက်နှစ်ဖက်ဖြင့် မန္တန်တံဆိပ်များကို ဖန်တီးကာ တရားဓမ္မအမှတ်အသားများကို ဆက်တိုက် ရိုက်နှိပ်လိုက်သည်။

"ဝုန်း!" အလင်းတန်းများ ပေါက်ကွဲထွက်ပေါ်လာခဲ့ပြီး သူ ရေးဆွဲထားသော တယ်လီပို့တေရှင်းအစီအရင်သည် ချက်ချင်းပင် အသက်ဝင်သွားခဲ့သည်။ ထိုလူလေးစုသည် အစီအရင်အတွင်းသို့ ခြေချလိုက်ပြီး ထိုနေရာမှ ကွယ်ပျောက်သွားခဲ့ကြသည်။

ကျောက်နိုင်ငံ၏ အနောက်ဘက် အလှမ်းဝေးသော နေရာတွင် ကျယ်ပြောလှသော လွင်ပြင်ကြီးတစ်ခု တည်ရှိသည်။ ဤနေရာသည် တစ်နှစ်ပတ်လုံး အေးစက်သော စွမ်းအားများ မြူဆိုင်းနေပြီး ဝိညာဥ်သန္ဓေတည်ခြင်းအဆင့်ရှိ ပညာရှင်များပင် အလွယ်တကူ မထိတွေ့ဝံ့သော မြေကိုးထပ်စွမ်းအားများ ရှိနေသောကြောင့် လူသူအရောက်အပေါက် နည်းပါးလှသည်။ အဖိုးကြီး အချို့သာလျှင် ဤနေရာသည် အမှန်တကယ်တော့ မာရ်နတ်လမ်းစဥ်ဂိုဏ်းတစ်ခုဖြစ်သော အလောင်းကောင်ယင်ဂိုဏ်း တည်ရှိရာနေရာဖြစ်ကြောင်း သိကြသည်။

ကျယ်ပြောလှသော ရွှံ့နွံတော၏ အောက်ခြေတွင် တစ်ခုနှင့်တစ်ခု ဆက်နွှယ်နေသော မြေအောက်လိုဏ်ဂူများ ရှိနေကြသည်။ အလောင်းကောင်ယင်ဂိုဏ်းကို ဤဝင်္ကပါကဲ့သို့ လိုဏ်ဂူများအတွင်းတွင် တည်ထောင်ထားခြင်း ဖြစ်သည်။

ဤနေ့တွင် အကြီးဆုံးသော ဗဟိုလိုဏ်ဂူကြီးအတွင်းရှိ တယ်လီပို့တေရှင်းအစီအရင်သည် ရုတ်တရက် ပြင်းထန်စွာ လင်းလက်လာခဲ့သည်။ ထိုနေရာကို စောင့်ကြပ်နေကြသော အလောင်းကောင်ယင်ဂိုဏ်း တပည့်များသည် တစ်ပြိုင်နက်တည်း မျက်လုံးများကို ဖွင့်လိုက်ကြသည်။ အစီအရင်ပေါ်တွင် လင်းထိန်နေသော အလင်းကွင်း ၄၃ ကွင်းကို မြင်လိုက်ရသောအခါ ၎င်းတို့၏ မျက်နှာအမူအရာများ ချက်ချင်း ပြောင်းလဲသွားခဲ့သည်။

"ဝိညာဥ်သန္ဓေတည်ခြင်းအဆင့် ပညာရှင်တစ်ယောက် ရောက်လာပြီ။ ချက်ချင်း ထပြီး ကြိုဆိုကြစမ်း!" ခေါင်းဆောင်ဖြစ်သူက အော်ဟစ်လိုက်ရာ လူတိုင်း ထရပ်လိုက်ကြပြီးနောက် မြေပြင်ပေါ်တွင် ဒူးထောက်လိုက်ကြသည်။ တစ်ချိန်တည်းမှာပင် ၎င်းတို့က ရိုသေစွာဖြင့် အော်ဟစ်လိုက်ကြသည်။ "မျိုးဆက်သစ်တို့က စီနီယာ့ကို ကြိုဆိုပါတယ်ခင်ဗျာ!"

အစီအရင်ပေါ်မှ အလင်းတန်းများ ပျောက်ကွယ်သွားခဲ့ပြီး ပုံရိပ်လေးခု ပေါ်လာခဲ့သည်။ ၎င်းတို့မှာ အရိုင်းတောတောင်ရိုင်းတောအုပ်မှ ရောက်ရှိလာကြသော ချင်းဟောက်၊ ဝမ်လင်၊ ဝူယွိနှင့် အတိုင်တို့ပင် ဖြစ်သည်။

ဝူယွိသည် လက်နှစ်ဖက်ကို နောက်ပစ်ရပ်နေပြီး သူ၏မျက်နှာတွင် ထောင်လွှားသောအမူအရာဖြင့် မေးလိုက်သည်။ "စီနီယာအစ်ကို ရဲ့ဇီစိုက် ဘယ်မှာလဲ။"

"ဝူး!" ရုတ်တရက် မလှမ်းမကမ်းရှိ လေဟာနယ်သည် တွန့်ကွေးသွားခဲ့ပြီး နက်မှောင်သော စွမ်းအားအမျှင်တန်းများသည် တစ်ခုနှင့်တစ်ခု ယှက်နွှယ်လျက် လူသားပုံသဏ္ဌာန်တစ်ခုအဖြစ် ကူးပြောင်းသွားခဲ့သည်။ ထိုပုံရိပ် ပေါ်လာသည်နှင့်တစ်ပြိုင်နက် ကြီးမားလှသော ဖိအားကြီးတစ်ခု ပေါက်ကွဲထွက်ပေါ်လာခဲ့သည်။

"မျိုးဆက်သစ်တို့က ဘိုးဘေးကြီးရဲ့ကို ကြိုဆိုပါတယ်ခင်ဗျာ!" အလောင်းကောင်ယင်ဂိုဏ်း တပည့်များသည် ထပ်မံ၍ ဝပ်စတွင်း အရိုအသေပြုလိုက်ကြပြန်သည်။

"ညီငယ်လေး ဝူယွိ... မင်း နောက်ဆုံးတော့ ပြန်လာနိုင်ခဲ့ပြီပဲ!" ကြောက်မက်ဖွယ်ကောင်းသော အသံကြီးတစ်ခုသည် ထိုပုံရိပ်ထံမှ ဖြည်းညှင်းစွာ ထွက်ပေါ်လာခဲ့သည်။ "ဟင်... မင်းရဲ့ အလောင်းကောင်ရုပ်သေးက ဘယ်ရောက်သွားတာလဲ။"