အခန်း (၅၀) - တစ်နှစ်

လီရှီချင်း၏ ရည်ရွယ်ချက်ကို နားလည်သွားပြီးနောက် လီကျစ်ရွေ့သည်လည်း စိတ်ကို ပြန်လည်တည်ငြိမ်အောင် ထိန်းလိုက်ပြီး "ဘာဖြစ်လို့ ကျွန်တော့်ကို ရွေးချယ်ခဲ့တာလဲ" ဟု မေးလိုက်သည်။

"မင်းကလွဲလို့ တခြားရွေးချယ်စရာ မရှိလို့ပဲ" ဟု လီရှီချင်းက အစစ်အမှန် အကြောင်းပြချက်ကို ထုတ်မပြောဘဲ ဆိုသည်။ သူက လီကျစ်ရွေ့ကို ရွေးချယ်ခဲ့ခြင်း မဟုတ်ဘဲ၊ ရွေးချယ်စရာ မရှိ၍ လီကျစ်ရွေ့သာ ဖြစ်နေရခြင်း ဖြစ်သည်ဟု ပြောလိုက်ခြင်းပင်။

လီရှီလျန်မှာလည်း အသက်ကြီးရင့်နေပြီ ဖြစ်သလို၊ လီရှီထင်မှာမူ သဘာဝအရ အေးစက်လွန်းသူ ဖြစ်သည်။ လီရှီရန်မှာလည်း လုံလောက်အောင် ပါးနပ်မှု မရှိပေ။ အခြားမျိုးနွယ်စုဝင်များမှာမူ အခြေခံအုတ်မြစ်တည်ဆောက်ခြင်းအဆင့် (Foundation Establishment) သို့ တက်လှမ်းရန် မျှော်လင့်ချက် မရှိသူများ ဖြစ်ကြသည်၊ သို့မဟုတ်ပါကလည်း ထိုအဆင့်သို့ ရောက်ရန် အလှမ်းဝေးနေကြသူများသာ ဖြစ်သည်။ လီကျစ်ရွေ့ တစ်ဦးတည်းသာလျှင် အသင့်တော်ဆုံး ဖြစ်နေတော့သည်။

အမှန်စင်စစ် လီကျစ်ရွေ့မှာ သင့်တော်ရုံမျှသာ ဆိုလျှင် လီရှီချင်းက သူ့ကို ရွေးချယ်မည် မဟုတ်ပေ။ သို့သော် လီကျစ်ရွေ့ ဘဝင်မြင့်သွားမည် စိုးသဖြင့် သူက ထိုသို့သော ချီးမွမ်းစကားများကို ထုတ်မပြောခဲ့ပေ။

"ငါ အခုတလော အကြီးအကဲတွေဆီ အာဏာတချို့ လွှဲပြောင်းပေးနေတယ်။ ဒါကြောင့် မင်း မျိုးနွယ်စုခေါင်းဆောင် တာဝန်ယူတဲ့အခါ ငါ့တုန်းကလို အပင်ပန်းခံစရာ မလိုတော့ဘူး" ဟု သူက ရှင်းပြသည်။ တစ်ချိန်တည်းမှာပင် ၎င်းသည် ကန့်သတ်ချက်တစ်ခုဖြစ်သလို စမ်းသပ်မှုတစ်ခုလည်း ဖြစ်ပေသည်။

၎င်းမှာ လီကျစ်ရွေ့နှင့် နောင်လာမည့် မျိုးနွယ်စုခေါင်းဆောင်များကို မိမိတို့၏ အကြိုက်၊ မကြိုက်ပေါ် မူတည်ပြီး ဆုံးဖြတ်ချက်များ မချနိုင်ရန် ကန့်သတ်ထားခြင်း ဖြစ်သည်။ ထို့အပြင် လီကျစ်ရွေ့အနေဖြင့် အာဏာရှိသော အကြီးအကဲများ၏ လွှမ်းမိုးမှုကို မခံရဘဲ မျိုးနွယ်စုခေါင်းဆောင်တစ်ဦး၏ တာဝန်ကို မည်သို့ ထိန်းသိမ်းသွားမည်နည်း ဆိုသည်ကို ကြည့်ရန် စမ်းသပ်ခြင်းလည်း ဖြစ်သည်။

"ကျွန်တော် ငြင်းလို့ရမလား" ဟု လီကျစ်ရွေ့က မေးလိုက်သည်။

သူသည် မိသားစုတစ်ခုလုံးကို စီမံခန့်ခွဲရသည့် အလုပ်ကို သိပ်ပြီး စိတ်မဝင်စားပေ။ သူက ပိုကောင်းသော ဆေးလုံးများကို ဖော်စပ်ချင်သည်၊ မိမိ၏ ကျင့်ကြံခြင်းအဆင့်ကို မြှင့်တင်ချင်သည်၊ ပြင်ပလောကကြီးကို လှည့်လည်ကြည့်ရှုချင်သည်။ မိသားစု တိုးတက်ရေးအတွက် သူ ကူညီပေးလိုသော်လည်း ထိုကဲ့သို့သော တာဝန်ဝတ္တရားများဖြင့် အချုပ်အနှောင် မခံလိုပေ။

လီရှီချင်း ခဏတာ မှင်တက်သွားသည်။ သူသည် လီကျစ်ရွေ့ကို ဆက်ခံသူအဖြစ် အစောကတည်းက ဆုံးဖြတ်ထားခဲ့သော်လည်း လီကျစ်ရွေ့၏ သဘောထားကို တစ်ခါမျှ မမေးမြန်းခဲ့ဖူးသည်ကို သတိပြုမိသွားသည်။ လီကျစ်ရွေ့၏ အပြုအမူများကို ကြည့်ခြင်းအားဖြင့် သူသည် မိသားစုအပေါ် သံယောဇဉ်ကြီးသူဖြစ်ရာ ထိုတာဝန်ကို ယူလိမ့်မည်ဟု လီရှီချင်းက အပိုင်တွက်ထားခဲ့ခြင်း ဖြစ်သည်။

လီကျစ်ရွေ့သည် စိတ်ထဲမှ သက်ပြင်းတစ်ချက်ကို အသာအယာ ချလိုက်ပြီး "အခြေခံအုတ်မြစ်တည်ဆောက်ခြင်းအဆင့် ရောက်သွားပြီးတဲ့နောက် ဒီတာဝန်ကို ကျွန်တော် ယူပါ့မယ်။ ဒါပေမဲ့ မျိုးနွယ်စုခေါင်းဆောင် အနေနဲ့ မဟုတ်ဘဲ အဘိုး အမြုတေအဆင့်တက်လှမ်းဖို့ ကျင့်ကြံနေတဲ့အချိန်အတွင်းမှာ ဒါမှမဟုတ် ပိုသင့်တော်တဲ့သူ တစ်ယောက် ပေါ်မလာမချင်း ခေတ္တတာဝန်ခံ ခေါင်းဆောင်အဖြစ်ပဲ လုပ်ပါရစေ" ဟု ပြောလိုက်သည်။

သူ့အနေဖြင့် လုံးဝငြင်းဆို၍ မရမှန်း သိသဖြင့် မိမိ၏ သဘောထားကို ဖော်ပြရန်အတွက်သာ ရှေ့တွင် ငြင်းဆန်ခဲ့ခြင်း ဖြစ်သည်။

လီရှီချင်း ပြောသကဲ့သို့ပင်၊ သူသာ ကျင့်ကြံခြင်းကို လက်လွှတ်ပြီး ရွှေအမြုတေအဆင့် (Golden Core) တက်လှမ်းမည့် အခွင့်အရေးကို စွန့်လွှတ်လိုက်လျှင် မသိသော်လည်း၊ မဟုတ်ပါက လက်ရှိအချိန်တွင် မိသားစု၌ အခြားရွေးချယ်စရာ မရှိပေ။

သို့သော် လီရှီချင်းမှာလည်း မငယ်တော့ပေ။

သူသည် လီရှီလဲ့၊ လီရှီကျွယ်တို့ကဲ့သို့ အကြီးအကဲများနှင့် တစ်မျိုးဆက်တည်း ဖြစ်သော်လည်း၊ 'ရှီ' မျိုးဆက်၏ ဒုတိယမြောက် အကြီးဆုံးဖြစ်သောကြောင့် သူ့အသက်မှာ တစ်ရာကျော်ရုံသာ ရှိဦးမည်ဟု ထင်ရသည်။

သို့သော် အမှန်တကယ်မှာ ထိုသို့မဟုတ်ပေ။ ဒုတိယအကြီးဆုံး လီရှီချင်းနှင့် ပဉ္စမမြောက် လီရှီကျွယ်တို့ကြားတွင် လူပေါင်းများစွာ ရှိခဲ့သော်လည်း မတော်တဆမှုတစ်ခုကြောင့် သူတို့အားလုံး ဆုံးပါးသွားခဲ့ကြသည်။

ထိုမတော်တဆမှုကြောင့်ပင် လီမိသားစုမှာ သူတို့ကို ကိုးကွယ်ပူဇော်ရန်ပင် မဝံ့ရဲတော့ဘဲ သူတို့၏ အမည်များကို မိသားစုမှတ်တမ်းမှ ပယ်ဖျက်ခဲ့ရသည်။ လီမိသားစုတွင် သူတို့ တစ်ခါမှ မရှိခဲ့ဖူးသကဲ့သို့ပင်။

ထိုမတော်တဆမှုကြောင့် လီမိသားစုသည် ပျက်သုဉ်းလုနီးပါး အကျပ်အတည်းနှင့် ရင်ဆိုင်ခဲ့ရသည်။ လီရှီချင်း တာဝန်ယူပြီးနောက်မှသာ လီမိသားစု သွေးမျိုးဆက်ကို ထိန်းသိမ်းရန်အတွက် သီးခြားမျိုးနွယ်စုခွဲတစ်ခု တည်ထောင်ရန် သူက စဉ်းစားခဲ့ခြင်း ဖြစ်သည်။

ထို့ကြောင့် အမှန်တကယ်တွင် လီရှီချင်းသည် သူနှင့် ခေတ်ပြိုင်များထက် ဆယ်စုနှစ်ပေါင်းများစွာ ပို၍ အသက်ကြီးသည်။ ယခုဆိုလျှင် သူသည် အသက် ၁၇၀ သို့မဟုတ် ၁၈၀ ခန့် ရှိနေပြီ ဖြစ်သည်။

အခြေခံအုတ်မြစ်တည်ဆောက်ခြင်းအဆင့်၏ သက်တမ်းကန့်သတ်ချက်အထိ လီရှီချင်းမှာ ဆယ်စုနှစ် အနည်းငယ် ကျန်သေးသည်ဟု ထင်ရသော်လည်း၊ ရွှေအမြုတေအဆင့်သို့ တက်လှမ်းရန်မှာ မလွယ်ကူလှပေ။

ဤနောက်ဆုံးအခွင့်အရေးကို အရယူရန်အတွက် လီရှီချင်းသည် မိသားစုကို လီကျီရွေ့ထံ အပ်နှံရမည် ဖြစ်သည်။ လီရှီချင်း အမြုတေအဆင့် အောင်မြင်ရန်နှင့် လီမိသားစု ပိုမိုတိုးတက်လာစေရန်အတွက် လီကျီရွေ့သည် မျိုးနွယ်စုခေါင်းဆောင် တာဝန်ကို ပခုံးထမ်းရမည်သာ ဖြစ်သည်။

"ငါ့ဘက်က မစဉ်းစားမိတာပါ၊ မင်းရဲ့ ခံစားချက်ကို ငါမေ့သွားတယ်" ဟု လီရှီချင်းက သက်ပြင်းချရင်း ဆိုသည်။

သူ အဘယ်ကြောင့် မေ့သွားရသနည်း။ မိသားစု တာဝန်များက သူ့ကို နှစ်ပေါင်း တစ်ရာကျော်ကြာ ပိတ်လှောင်ထားခဲ့ပြီး ယခုအခါ သူက သူ့ထက်ပင် ရွှေအမြုတေအဆင့်သို့ တက်လှမ်းရန် အခွင့်အရေး ပိုရှိသူ တစ်ဦးကို ထပ်မံ ပိတ်လှောင်ရန် ကြိုးစားနေမိသောကြောင့် ဖြစ်သည်။

လီကျစ်ရွေ့က ပြုံးလျက် "ဒါဆိုရင် အဘိုးမျိုးနွယ်စုခေါင်းဆောင် အမြုတေအဆင့် တက်လှမ်းနိုင်အောင် မဖြစ်မနေ ကြိုးစားရမယ်နော်" ဟု ပြောလိုက်သည်။

လီရှီချင်းသည် ဘာမှပြန်မပြောဘဲ လေးလေးနက်နက်သာ ခေါင်းညိတ်ပြလိုက်သည်။

"တခြားကိစ္စ မရှိတော့ဘူးဆိုရင် ကျွန်တော် အရင်ပြန်ပါဦးမယ်" ဟု ဆိုကာ လီရှီချင်း သဘောတူသည်ကို မြင်ရပြီးနောက် လီကျစ်ရွေ့သည် ခန်းမဆောင်မှ ထွက်လာခဲ့သည်။

မိမိ၏ ကိုယ်ပိုင်ဝန်းထဲသို့ ပြန်ရောက်သောအခါ လီကျစ်ရွေ့က "မိသားစုတစ်ခုရဲ့ အစိတ်အပိုင်း ဖြစ်နေတဲ့အခါ တချို့တာဝန်ဝတ္တရားတွေက ရှောင်လွှဲလို့ မရဘူးပဲ" ဟု သက်ပြင်းရှည်ကြီး ချရင်း ရေရွတ်လိုက်သည်။

'တာချင်း' က ဘာဖြစ်သွားမှန်း မသိဘဲ နားမလည်နိုင်သလို ကြည့်နေသော်လည်း လီကျစ်ရွေ့ စိတ်အခြေအနေ မကောင်းသည်ကိုတော့ သိနေသည်။

"စကွီ!"

တာချင်းက လီကျစ်ရွေ့ကို သူ၏ ကိုယ်ပိုင်နည်းလမ်းဖြင့် နှစ်သိမ့်ပေးလိုက်သည်။ ၎င်းမှာ ပါးစပ်ထဲတွင် ရေငုံပြီး ပန်းထုတ်လိုက်ခြင်းပင်။ ထိုရေမှာ မှော်အတတ်ဖြင့် ဖန်တီးထားခြင်း မဟုတ်ဘဲ သူ၏ တံတွေးများသာ ဖြစ်သည်။

လီကျစ်ရွေ့မှာ ရယ်ရခက်၊ ငိုရခက် ဖြစ်သွားပြီး လက်ကို မြှောက်ကာ ရေကာအလွှာတစ်ခုဖြင့် ကာလိုက်ရသည်။ သို့သော် တာချင်း၏ လုပ်ရပ်ကြောင့် သူ၏ စိတ်ထဲမှ မွန်းကြပ်မှုများမှာ လွင့်စင်သွားခဲ့သည်။

"စကွီ!"

ဉာဏ်ရည် သိပ်မမြင့်လှသော တာချင်းမှာ ရှုပ်ထွေးသော အမူအရာများကို နားမလည်ပေ။ သူ မြင်လိုက်ရသည်မှာ လီကျစ်ရွေ့၏ မျက်နှာပေါ်မှ အပြုံးဖြစ်သဖြင့် သူ၏ နည်းလမ်း အောင်မြင်သည်ဟု ထင်မှတ်ကာ လီကျစ်ရွေ့ကို တံတွေးများဖြင့် ထပ်မံ ပက်ဖြန်းတော့သည်။

လီကျစ်ရွေ့သည် တာချင်းနှင့် ခဏတာ ကစားလိုက်ပြီးနောက် သူ့ကို ဝိညာဉ်အာကာသထဲသို့ ခေါ်ဆောင်သွားကာ "မင်းက ရေကစားရတာ ဝါသနာပါမှတော့ နောက်ဆို ဝိညာဉ်ဆေးပင်တွေကို ရေလောင်းတဲ့ အလုပ်ကို ကူလုပ်ပေးတော့" ဟု ပြောလိုက်သည်။

ယခင်က တာချင်းသည် သူ၏ မှော်စွမ်းအားကို ကောင်းကောင်း မထိန်းချုပ်နိုင်သေးသဖြင့် လီကျစ်ရွေ့က သူ့ကို ဤအလုပ် မခိုင်းရဲခဲ့ပေ။ သို့သော် အချိန်အတော်ကြာ လေ့ကျင့်ပေးပြီးနောက် တာချင်းမှာ အတော်လေး ကျွမ်းကျင်လာခဲ့ပြီ ဖြစ်သည်။

"စကွီ!"

တာချင်းက ဝမ်းသာအားရ အော်မြည်လိုက်ပြီး လီကျစ်ရွေ့ ညွှန်ပြသည့်ဘက်သို့ ဦးတည်ကာ 'ရွှေရွမ်' မြက်ပင်များ စိုက်ပျိုးထားသည့် ဝိညာဉ်လယ်ကွင်းအပေါ်တွင် ဝိညာဉ်တိမ်တိုက်တစ်ခုကို ဖန်တီးလိုက်သည်။ ထို့နောက် နူးညံ့သော ဝိညာဉ်မိုးစက်များ ရွာသွန်းစေပြီး ဝိညာဉ်ဆေးပင်များကို အာဟာရ ဖြည့်တင်းပေးလိုက်သည်။

"တော်လိုက်တာ" ဟု လီကျစ်ရွေ့က ရက်ရက်ရောရော ချီးမွမ်းလိုက်သည်။ တာချင်း ရေလောင်းပြီးသောအခါ သူ့ကို အခြားလယ်ကွင်းတစ်ခုသို့ ခေါ်သွားပြန်သည်။

တာချင်း၏ အကူအညီဖြင့် လီကျစ်ရွေ့ တစ်နာရီ၊ နှစ်နာရီခန့် အလုပ်ရှုပ်ရမည့် ဝေယျာဝစ္စများမှာ နာရီဝက်ခန့် စော၍ ပြီးစီးသွားခဲ့သည်။

"လိမ္မာတယ်" ဟု လီကျစ်ရွေ့က တာချင်း၏ ခေါင်းကို ပုတ်ပေးပြီး 'ကျောက်စိမ်းဝိညာဉ်ဆေးလုံး' (Jade Spirit Pills) နှစ်လုံး ကျွေးလိုက်သည်။ ထို့နောက် တာချင်းကို ထိုဆေးလုံးများ အာနိသင် စိမ့်ဝင်စေရန် ဝိညာဉ်အာကာသထဲတွင် ထားခဲ့ပြီး သူတစ်ဦးတည်း ပြန်ထွက်လာခဲ့သည်။

ထို့နောက်ပိုင်း အချိန်အတော်ကြာအောင် လီကျစ်ရွေ့သည် ဆေးဖော်စပ်ခြင်း၊ ကျင့်ကြံခြင်း၊ ဝိညာဉ်ဆေးပင်များကို ပြုစုခြင်းနှင့် တာချင်းနှင့် ကစားခြင်းတို့ဖြင့်သာ အချိန်ကုန်လွန်စေခဲ့သည်။

နေ့စဉ် အလုပ်ရှုပ်နေသော်လည်း လီကျီရွေ့သည် စိတ်ကျေနပ်မှု ရှိနေခဲ့သည်။ သူသည် မိမိ၏ ကျင့်ကြံခြင်းကိုလည်း လျစ်လျူမရှုခဲ့ပေ။ သူ၏ ဝိညာဉ်စွမ်းအားမှာ တဖြည်းဖြည်း တိုးတက်လာနေသော်လည်း 'ချီ' ကျင့်ကြံခြင်း ကိုးဆင့်မြောက် (Ninth Layer of Qi Cultivation) သို့ ရောက်ရှိရန်မှာမူ အချိန်အတန်ကြာ လိုဦးမည် ဖြစ်သည်။

ထို့အပြင် ဆေးဖော်စပ်ခြင်း အတတ်ပညာတွင်လည်း သူသည် သိသာသော တိုးတက်မှုများ ရှိခဲ့သည်။ ရေစင်စစ်ဆေး‌ဖောနည်း (Water Refinement) ဖြင့် ဆေးလုံးများစွာကို ဖော်စပ်တတ်နေပြီ ဖြစ်ကာ အကြိမ်ပေါင်းများစွာ လေ့ကျင့်ပြီးနောက် ကျောက်စိမ်းဝိညာဉ်ဆေးလုံး ဖော်စပ်ရာတွင် အောင်မြင်မှုနှုန်းမှာ ကိုးဆယ်ရာခိုင်နှုန်းအထိ ရှိလာခဲ့သည်။

လီဖော်ရွေ့သာမက လီမိသားစုမှာလည်း တစ်နှစ်အတွင်း ကဏ္ဍအသီးသီး၌ သိသိသာသာ တိုးတက်လာခဲ့သည်။

မိသားစုဝင် နောက်တစ်ဦးမှာလည်း ကျောက်စိမ်းဝိညာဉ်ဆေးလုံး ဖော်စပ်နည်းကို တတ်မြောက်သွားခဲ့သည်။ ယခုအခါ 'ယွမ်ချင်း' ဈေးကွက်တွင် အင်အားစု အများအပြားက ရေစင်စစ်ဆေး‌ဖော်နည်းဖြင့် ဖော်စပ်ထားသော ဆေးလုံးများကို ရောင်းချနေကြသော်လည်း ထိုဆေးလုံးများမှာ မိသားစု၏ လစဉ် ဝင်ငွေအကောင်းဆုံး အရင်းအမြစ်အဖြစ် ဆက်လက် တည်ရှိနေဆဲ ဖြစ်သည်။

'တိမ်တောင်ထိပ်စားသောက်ဆောင်' (Cloudtop Pavilion) ၏ စီးပွားရေးမှာလည်း တည်ငြိမ်စွာ လည်ပတ်နေပြီး မိသားစုအတွက် ဒုတိယ အကြီးဆုံး ဝင်ငွေလမ်းကြောင်း ဖြစ်လာခဲ့သည်။

'ပိုင်လန်' ခရိုင်မှ ထွက်ပြေးလာစဉ် လမ်းခရီး၌ တွေ့ရှိခဲ့သော 'တိမ်လွှာငါး' (Cloud Fish) များကို မွေးမြူခြင်းမှာလည်း အောင်မြင်လာသဖြင့် မိသားစုဝင်များအကြား လဲလှယ်ခြင်း သို့မဟုတ် ဆုလာဘ်အဖြစ် ပေးအပ်ခြင်းများ ပြုလုပ်နိုင်လာသည်။ သို့သော် တိမ်လွှာငါးများ၏ တန်ဖိုးကြီးမားမှုကြောင့် လီမိသားစုသည် ၎င်းတို့ကို ဈေးကွက်ထဲတွင် ထုတ်မရောင်းရဲသေးပေ။

လီကျစ်ရွေ့ထံတွင် တိမ်လွှာငါး နှစ်စုံ ရှိသော်လည်း မွေးမြူရေး အတိုင်းအတာ သေးငယ်နေသေးသဖြင့် သူသည် ၎င်းတို့၏ အရသာကို မြည်းစမ်းကြည့်ရန် အခွင့်အရေး မရသေးပေ။

ထို့ကြောင့် မိသားစုက တိမ်လွှာငါးများကို ရောင်းချရန် စာရင်းသွင်းလိုက်သောအခါ သူသည် ချက်ချင်းပင် နှစ်ကောင် မှာယူ၍ မြည်းစမ်းကြည့်လိုက်သည်။ အမှန်တကယ်ပင် တိမ်လွှာငါးမှာ နာမည်ကျော်ကြားသည့်အတိုင်း အရသာ ရှိလှသည်။ အသားမှာ နူးညံ့ပြီး ပါးစပ်ထဲတွင် အရည်ပျော်သွားသကဲ့သို့ ခံစားရကာ ၎င်းတွင် ပါဝင်သော ဝိညာဉ်စွမ်းအားမှာလည်း အလွန်စင်ကြယ်ပြီး စုပ်ယူရ လွယ်ကူလှသည်။

တိမ်လွှာငါး အရေအတွက် ကန့်သတ်ထားခြင်းနှင့် တစ်ဦးတည်းက အကုန်လုံး မဝယ်ရဟူသော မျိုးနွယ်စု၏ စည်းကမ်းသာ မရှိလျှင် လီကျစ်ရွေ့သည် သူ၏ ပံ့ပိုးမှုအမှတ် (Contribution Value) အားလုံးကို အသုံးပြုပြီး နေ့စဉ် တိမ်လွှာငါး နှစ်ကောင်စီ စားသုံးမိပေလိမ့်မည်။