အခန်း (၃၂) - လေလံပွဲ
ရက်အနည်းငယ်အကြာတွင် ယွမ်မင်ဂိုဏ်းသည် လေလံပွဲသတင်းကို တရားဝင်ကြေညာလိုက်သည်။ လေလံပွဲကို နောက်ထပ်ဆယ်ရက်အကြာတွင် ယွမ်ချင်းဈေး၌ ကျင်းပမည်ဖြစ်ပြီး အခြေခံအုတ်မြစ်တည်ဆောက်ခြင်းဆေးလုံး သုံးလုံးမှာ ကြော်ငြာ၏ အဓိကဆွဲဆောင်မှုပင် ဖြစ်သည်။
သို့သော်လည်း လီကျစ်ရွေ့က ယွမ်မင်ဂိုဏ်း၏ ကြေညာချက်ထဲတွင် အခြေခံအုတ်မြစ်တည်ဆောက်ခြင်းဆေးလုံးများမှာ အဖိုးတန်ဆုံး နောက်ဆုံးပိတ်ပစ္စည်းများ မဟုတ်သည်ကို သတိပြုမိလိုက်သည်။ ၎င်းတို့နောက်တွင် လေလံတင်ရောင်းချမည့် အခြားပစ္စည်းအချို့ ကျန်ရှိနေသေးသည်။
"ယွမ်မင်ဂိုဏ်းက တတိယအဆင့် ဝိညာဉ်ပစ္စည်းတွေကိုပါ လေလံတင်ဖို့ စီစဉ်နေတာလား" မူလက လေလံပွဲကို သိပ်စိတ်မဝင်စားသည့် လီကျစ်ရွေ့သည် ရုတ်တရက် စူးစမ်းချင်စိတ် ဖြစ်ပေါ်လာမိသည်။
သို့သော် ထိုမျှသာဖြစ်သည်။ လက်ရှိတွင် လီကျစ်ရွေ့၏လက်ထဲ၌ ဝိညာဉ်ကျောက်တုံး သုံးလေးထောင်ခန့်သာ ရှိသည်။ ၎င်းမှာ 'ချီ ကျင့်ကြံခြင်းအဆင့် ကျင့်ကြံသူများအကြားတွင် များပြားသောပမာဏဟု ဆိုနိုင်သော်လည်း လေလံပွဲတစ်ခုတွင်မူ မပြောပလောက်ပေ။
ထို့ကြောင့် လီကျစ်ရွေ့သည် ထိုကိစ္စကို ခေါင်းထဲမှထုတ်ကာ ဆေးဖော်စပ်ခြင်းနှင့် ကျင့်ကြံခြင်းလုပ်ငန်းများကိုသာ ဆက်လက်လုပ်ဆောင်နေခဲ့သည်။
အချိန်သည် လျင်မြန်စွာ ကုန်ဆုံးသွားပြီး မျက်တောင်တစ်ခတ်အတွင်းမှာပင် လေလံပွဲကျင်းပမည့်နေ့သို့ ရောက်ရှိလာသည်။ နံနက်စောစောတွင် လီကျစ်ရွေ့သည် လူကြီးသူမနှစ်ဦးနောက်မှ လိုက်ပါကာ ဝိညာဉ်လှေကိုစီး၍ ယွမ်ချင်းဈေးသို့ ထွက်ခွာလာခဲ့သည်။
ဝင်ကြေးအဖြစ် ဝိညာဉ်ကျောက်တုံး သုံးဆယ် ပေးဆောင်ပြီးနောက် ၎င်းတို့သုံးဦးကို ဒုတိယထပ်ရှိ သီးသန့်အခန်းတစ်ခုသို့ ခေါ်ဆောင်သွားကြသည်။
သီးသန့်အခန်းမှာ အကျယ်အဝန်းအားဖြင့် မကြီးမားသော်လည်း လူအုပ်နှင့် ပြည့်နှက်နေသည့် ပထမထပ်ခန်းမဆောင်ထက်စာလျှင် များစွာသာလွန်သည်။ ၎င်းတို့ ယခုကဲ့သို့ အထူးအခွင့်အရေး ရရှိခြင်းမှာ အခြေခံအုတ်မြစ်တည်ဆောက်ခြင်းအဆင့် ကျင့်ကြံသူများဖြစ်သည့် လီရှီလျန့်နှင့် လီရှီရန်တို့၏ မျက်နှာကြောင့်ပင် ဖြစ်သည်။
"လေလံပွဲတောင် မစရသေးဘူး၊ ယွမ်မင်ဂိုဏ်းက ဝိညာဉ်ကျောက်တုံး ထောင်ချီပြီး မြတ်နေပြီပဲ" ဟု လီရှီရန်က တအံ့တဩ ပြောလိုက်သည်။
ဝင်ကြေးမှာ တစ်ဦးလျှင် ဝိညာဉ်ကျောက်တုံး ဆယ်တုံးဖြစ်ပြီး ပထမထပ်တွင် အနည်းဆုံး ကျင့်ကြံသူ ရာဂဏန်းခန့် ထိုင်နိုင်သည်။ ဒုတိယထပ်တွင်လည်း အခန်းပေါင်း ဒါဇင်ချီရှိပြီး အခြေခံအုတ်မြစ်တည်ဆောက်ခြင်းအဆင့် ကျင့်ကြံသူမဟုတ်သော်လည်း ဒုတိယထပ်သို့ တက်လိုပါက ဝိညာဉ်ကျောက်တုံး တစ်ရာပေး၍ အခွင့်အရေး ဝယ်ယူနိုင်သည်။
ထို့အပြင် 'ရွှေရောင်အမြုတေ' အဆင့် ကျင့်ကြံသူများအတွက် အခမဲ့ဖြစ်သော တတိယထပ်လည်း ရှိသေးသည်။ အဆင့်နိမ့်ကျင့်ကြံသူများ ထိုအထပ်သို့ တက်လိုပါက ဝိညာဉ်ကျောက်တုံး တစ်ထောင်အထိ အကုန်အကျခံရသည်ဟု ဆိုကြသည်။
"ဦးလေးရန်... ဦးလေးသာ ကြိုးကြိုးစားစား ကျင့်ကြံလို့ ရွှေရောင်အမြုတေအဆင့်ကို ရောက်သွားရင် ကျွန်တော်တို့ မိသားစုလည်း အခုလို လေလံပွဲလုပ်ပြီး ဝင်ကြေးတွေ တောင်းလို့ရတာပေါ့" ဟု လီကျစ်ရွေ့က ပြုံးလျက် ပြောလိုက်သည်။
လေလံပွဲကို ရွှေရောင်အမြုတေအဆင့်ရှိသော အင်အားစုများသာ ကျင်းပနိုင်သည်ဟု မဆိုလိုသော်လည်း အခြေခံအုတ်မြစ်တည်ဆောက်ခြင်းအဆင့် အင်အားစုများမှာ ဆွဲဆောင်မှုရှိသော ပစ္စည်းများကို မထုတ်နိုင်ကြပေ။ ပါဝင်ဆင်နွှဲမည့်သူ မရှိပါက လေလံပွဲမှာလည်း အောင်မြင်နိုင်မည် မဟုတ်ပေ။
"ငါ့ကို စောင့်နေမယ့်အစား မျိုးနွယ်စုခေါင်းဆောင် အမြန်ဆုံး အဆင့်တက်ပါစေလို့ပဲ ဆုတောင်းလိုက်ပါ" လီရှီရန်က ရုတ်တရက် စိတ်မကောင်းသလို ဖြစ်သွားပြီး "မျိုးနွယ်စုခေါင်းဆောင်က အလုပ်ရှုပ်လွန်းလို့ ကျင့်ကြံဖို့တောင် အချိန်မရရှာဘူး" ဟု ဆက်ပြောသည်။
လီရှီလျန်၏ မျက်ဝန်းထဲတွင် ခံစားချက်တစ်မျိုး ဖြတ်ပြေးသွားသည်။ ထို့နောက် ဘာမှမဖြစ်သလို ဟန်ဆောင်ကာ နက်နက်ရှိုင်းရှိုင်း စဉ်းစားနေသည့် လီကျစ်ရွေ့ကို လှမ်းကြည့်လိုက်သည်။ သူသည် ဤကိစ္စအပေါ် လီကျစ်ရွေ့၏ အမြင်ကို သိချင်နေမိသည်။
"ဦးလေးရန်... ဦးလေးက ဘာလို့ မျိုးနွယ်စုခေါင်းဆောင်ကို ရာထူးကနုတ်ထွက်ပြီး ကျင့်ကြံခြင်းကိုပဲ အာရုံစိုက်ဖို့ မတိုက်တွန်းတာလဲ။ ပြီးရင် မျိုးနွယ်စုခေါင်းဆောင်နေရာကို ဦးလေးပဲ လွှဲယူလိုက်လေ"
ထိုစကားကြောင့် လီရှီရန်မှာ ထိတ်လန့်သွားပြီး "ငါက မျိုးနွယ်စုခေါင်းဆောင်ရဲ့ ဝန်ထုပ်ဝန်ပိုးကို မမျှဝေချင်လို့ မဟုတ်ပါဘူး၊ ငါ့အရည်အချင်းက မျိုးနွယ်စုခေါင်းဆောင် လုပ်ဖို့ မသင့်တော်လို့ပါ" ဟု ကပျာကယာ ငြင်းဆိုလိုက်သည်။
"ဦးလေးက စိတ်မြန်လက်မြန်ရှိပြီး သိပ်မစဉ်းစားတတ်ဘူးဆိုပေမဲ့ လူကြီးသူမတွေ အများကြီး ရှိနေတာပဲ မဟုတ်လား။ အလုပ်တွေကို သူတို့ဆီ ခွဲဝေပေးလိုက်လို့ ရတာပဲ။ ဆုံးဖြတ်ရခက်တာမျိုး ရှိရင်လည်း အားလုံးတိုင်ပင်ပြီးမှ ဆုံးဖြတ်ကြပေါ့" ဟု လီကျစ်ရွေ့က ပြောလိုက်သည်။
မိသားစုအတွင်း အာဏာခွဲဝေမှုမှာ မမျှတဟု လီကျစ်ရွေ့ တကယ်ပင် ခံစားနေရသည်။
မိသားစုတွင် လူကြီးသူမအဖွဲ့ကို ဖွဲ့စည်းထားသော်လည်း လီရှီချင်း၏ ပုဂ္ဂိုလ်ရေးဩဇာနှင့် အစွမ်းထက်မှုကြောင့် မည်သည့်ကိစ္စမဆို လီရှီချင်းကသာ နောက်ဆုံး ဆုံးဖြတ်ချက်ချသူ ဖြစ်နေသည်။
ထို့ကြောင့် လီရှီချင်းသည် နေ့စဉ်နေ့တိုင်း အလွန်အလုပ်ရှုပ်နေပြီး ကျင့်ကြံရန် အချိန် လုံးဝမရှိသလောက် ဖြစ်နေရသည်။
သို့သော် ဤအတွေးများကို တိုက်ရိုက်ပြောရန်မှာ လီကျစ်ရွေ့အတွက် ခက်ခဲနေသည်။ လီရှီချင်းအပေါ် မကျေနပ်သလိုမျိုး အထင်မှားသွားနိုင်သောကြောင့် ဖြစ်သည်။
လီကျစ်ရွေ့သည် လီရှီရန်အား ပြောသည့်စကားမှတစ်ဆင့် သူ၏ဆန္ဒကို သွယ်ဝိုက်ဖော်ပြနေခြင်း ဖြစ်သည်။ သူသည် လီရှီရန်ကို ပြောနေခြင်းမဟုတ်ဘဲ လီရှီလျန်ကို စမ်းသပ်နေခြင်းသာ ဖြစ်သည်။
"ဒီကိစ္စကို ဒီမှာပဲ ရပ်ထားကြစို့၊ နောက်ခါ ထပ်မပြောနဲ့တော့" ဟု လီရှီလျန်က လီကျစ်
ရွေ့ကို စိုက်ကြည့်ရင်း ပြောလိုက်သည်။ ဒီကောင်လေးက သူ့ကို ကြားခံအဖြစ် သုံးချင်နေသည်ကို သူ သိသော်လည်း လီကျစ်ရွေ့ပြောသည်မှာ အမှန်ပင်ဖြစ်ကြောင်း သူ မငြင်းနိုင်ပေ။
"ဟုတ်ကဲ့ပါ" လီကျစ်ရွေ့က ပြုံးလိုက်သည်။ လီရှီလျန်သည် သူ၏စကားထဲမှ အဓိပ္ပာယ်ကို နားလည်သွားပြီဖြစ်ကြောင်းနှင့် လီရှီချင်းနှင့် ဆွေးနွေးရန် အခွင့်အရေးကို ရှာဖွေလိမ့်မည်ဟု သူ ယုံကြည်သည်။
လီကျစ်ရွေ့သည် ဤလူကြီးသူမနှစ်ဦးနှင့် ရင်းနှီးကျွမ်းဝင်မှုမရှိပါက သို့မဟုတ် ၎င်းတို့မှာ စိတ်တိုတတ်သူများဖြစ်ပါက ယခုကဲ့သို့ စကားမျိုးကို လုံးဝပြောထွက်မည် မဟုတ်ပေ။
"ဒေါက်... ဒေါက်..."
ထိုစဉ် အခန်းတံခါးခေါက်သံ ထွက်ပေါ်လာသည်။
"စီနီယာတို့ရှင့်... ဒါတွေကတော့ ဒီနေ့ လေလံတင်မယ့် ပစ္စည်းစာရင်းတွေပါ" ကျော့ရှင်းပြီး တည်ငြိမ်သော အသွင်အပြင်ရှိသည့် အမျိုးသမီးကျင့်ကြံသူတစ်ဦး တံခါးဖွင့်၍ ဝင်လာသည်။ သူမ၏အသံမှာလည်း နားဝင်ချိုလှသည်။
သူမသည် 'ကျောက်စိမ်းပေလွှာ' ကို စားပွဲပေါ်တွင် တင်လိုက်ပြီးနောက် ၎င်းတို့သုံးဦးအတွက် အနံ့မွှေးပျံ့သော ဝိညာဉ်လက်ဖက်ရည်ကို ငှဲ့ပေးသည်။ ထို့နောက် ဦးညွှတ်နှုတ်ဆက်ကာ "စီနီယာတို့ ခိုင်းစရာရှိရင် ခေါင်းလောင်းတီးပြီး ခေါ်နိုင်ပါတယ်ရှင်" ဟု ပြော၍ ပြန်ထွက်သွားသည်။
"ပထမဆုံး လေလံပစ္စည်းက ဒုတိယအဆင့် မှော်လက်နက်လား" လီရှီလျန်က စာရင်းကိုကြည့်ကာ စိတ်ဝင်တစားဖြင့် "ဝိညာဉ်စုဆောင်းတဲ့ ကျောက်စိမ်းဆွဲပြားပဲ။ ပတ်ဝန်းကျင်က ဝိညာဉ်စွမ်းအင်တွေကို စုစည်းပေးနိုင်တယ်ဆိုတော့ ဝိညာဉ်စုဆောင်းခြင်း အစီရင်ခံကို ကိုယ်နဲ့မကွာ သယ်သွားသလိုမျိုးပေါ့" ဟု မှတ်ချက်ပေးသည်။
ထို့နောက် အခြားလေလံပစ္စည်းများကို ဆက်ကြည့်ကာ "ယွမ်မင်ဂိုဏ်းက ဒီလေလံပွဲအတွက် တော်တော်လေး ပြင်ဆင်ထားတာပဲ" ဟု ပြောသည်။
"ဦးလေးရှီလျန်... တကယ့် ရွှေရောင်အမြုတေအဆင့် ကျင့်ကြံသူတွေများ တက်ရောက်လာနိုင်မလား"
ကျောက်စိမ်းပေလွှာထဲတွင် တိုက်ရိုက်ဖော်ပြထားခြင်း မရှိသော်လည်း တတိယအဆင့် ဝိညာဉ်ပစ္စည်းအချို့ ပါဝင်နေသည်။ အကယ်၍ ရွှေရောင်အမြုတေအဆင့် ကျင့်ကြံသူများ တက်ရောက်ခြင်းမရှိပါက အဆင့်နိမ့်ကျင့်ကြံသူများအတွက် ဈေးကြီးလွန်းပြီး အသုံးမပြုနိုင်သည့် ထိုပစ္စည်းများကို ယွမ်မင်ဂိုဏ်းက အဘယ်ကြောင့် လေလံတင်မည်နည်း။
"ရွှေရောင်အမြုတေအဆင့်တွေ လာသည်ဖြစ်စေ၊ မလာသည်ဖြစ်စေ... ငါတို့နဲ့တော့ မဆိုင်ပါဘူး"
"ဒုန်း... ဒုန်း... ဒုန်း..."
အောက်ဘက်ရှိ လေလံစင်မြင့်ပေါ်တွင် ဆွဲဆောင်မှုရှိသော ကိုယ်လုံးကိုယ်ပေါက်နှင့် အမျိုးသမီးကျင့်ကြံသူတစ်ဦး ရုတ်တရက် ပေါ်လာသည်။ သူမ ဝတ်ဆင်ထားသော ခရမ်းရောင်ဝတ်စုံမှာ သူမ၏ ကောက်ကြောင်းများကို အထင်းသား ပေါ်လွင်နေစေသည်။
သူမ၏ လှုပ်ရှားမှုတိုင်းမှာ ဆွဲဆောင်မှုအပြည့်ရှိနေပြီး စိတ်ဓာတ်မခိုင်ခံ့သော ကျင့်ကြံသူအချို့ကို မိန်းမောသွားစေသည်။
"ကျွန်မ ကျီယန်က မိတ်ဆွေအားလုံးကို နှုတ်ခွန်းဆက်သပါတယ်ရှင်" သူမ၏ နူးညံ့သိမ်မွေ့သော အသံမှာ လူတိုင်း၏ ရင်ထဲသို့ တိုးဝင်သွားသလို ခံစားရစေသည်။
သို့သော် ဒုတိယထပ်တွင်ရှိသော လီကျစ်ရွေ့ကမူ မသိမသာ မျက်မှောင်ကြုတ်လိုက်ပြီး "အဲဒီအမျိုးသမီးက ညှို့ဓာတ်အတတ်ကို သင်ထားတာလား" ဟု တိုးတိုးလေး မေးလိုက်သည်။
ညှို့ဓာတ်အတတ် (Bewitching Technique) ဆိုသည်မှာ ဆန့်ကျင်ဘက်လိင်ကို ဖြားယောင်းရန်သာမက ရန်သူကို တွေဝေသွားစေရန်၊ သတိလက်လွတ်ဖြစ်စေရန်နှင့် မိမိခိုင်းစေရာလုပ်မည့် အရုပ်များသဖွယ် ဖြစ်သွားစေရန် အသုံးပြုသော အတတ်ဖြစ်သည်။
ယခုခေတ်တွင် စနစ်တကျ ကျင့်ကြံထားသော ညှို့ဓာတ်အတတ်ကို တွေ့ရခဲသည်။ များသောအားဖြင့် လူသတ်အသက်စုပ်သည့် အတတ်များကို လေ့ကျင့်သော မိစ္ဆာကျင့်ကြံသူများကသာ ဆန့်ကျင်ဘက်လိင်ကို သားကောင်အဖြစ် ဖြားယောင်းရန် ဤအတတ်ကို အသုံးပြုတတ်ကြသည်။
ထို့ကြောင့် ညှို့ဓာတ်အတတ်၏ ဂုဏ်သတင်းမှာ သိပ်မကောင်းလှပေ။
"အင်း... ယွမ်မင်ဂိုဏ်းက သူမကို လေလံပွဲ ဦးစီးခိုင်းတာ မဆန်းပါဘူး" ညှို့ဓာတ်အတတ်ကိုသုံး၍ ကျင့်ကြံသူများ၏ စိတ်ကို လှုံ့ဆော်ခြင်းဖြင့် ပစ္စည်းများကို ပိုမိုဈေးပြိုင်ပေးစေရန် ရည်ရွယ်ခြင်း ဖြစ်သည်။
"ဒီလေလံပွဲမှာ လေလံပွဲဦးစီးသူအဖြစ် ဆောင်ရွက်ခွင့်ရတာ ကျွန်မအတွက် ဂုဏ်ယူစရာပါပဲ။ အားလုံးပဲ မိမိတို့ အလိုရှိတဲ့ ဝိညာဉ်ပစ္စည်းတွေကို ပိုင်ဆိုင်နိုင်ကြပါစေလို့ ဆုတောင်းပေးပါတယ်ရှင်"
ထိုသို့ပြောပြီးနောက် သူမသည် စားပွဲပေါ်ရှိ အနီရောင်ပိုးစကို ဖယ်ရှားလိုက်ရာ ဝိညာဉ်စုဆောင်းခြင်း ကျောက်စိမ်းဆွဲပြား ပေါ်ထွက်လာသည်။
ဆွဲပြားမှာ ယင်ယန်ငါးပုံသဏ္ဌာန်ဖြစ်ပြီး အလွန်လှပသည်။ သို့သော် ပထမထပ်ရှိ ကျင့်ကြံသူများတွင် ပစ္စည်းစာရင်း မရှိသောကြောင့် ကျီယန်၏ မိတ်ဆက်စကားကိုသာ စောင့်နားထောင်နေကြရသည်။
"ဒါကတော့ ဒုတိယအဆင့် ဝိညာဉ်စုဆောင်းခြင်း ကျောက်စိမ်းဆွဲပြား ဖြစ်ပါတယ်။ ဝိညာဉ်စွမ်းအင်တွေကို စုစည်းပေးပြီး ကျင့်ကြံခြင်းကို မြန်ဆန်စေရုံတင်မကပါဘူး... တိုက်ပွဲတွေမှာလည်း ဒီဆွဲပြားရှိနေရင် စွမ်းအင်ပြန်လည်ပြည့်ဖြိုးမှုကို မြန်ဆန်စေတဲ့အတွက် အောင်နိုင်ခြေ ပိုများစေမှာပါ"
ကျီယန်၏ မိတ်ဆက်စကားအပြီးတွင် ကျင့်ကြံသူအများအပြားမှာ ထိုပစ္စည်းကို ပိုင်ဆိုင်လိုစိတ် ပြင်းပြလာကြသည်။
"ဒီရတနာရဲ့ အရေးပါပုံကို မိတ်ဆွေတို့အားလုံး သိကြမှာမို့ ကျွန်မ အများကြီး မပြောတော့ပါဘူး။ ဒုတိယအဆင့် အောက်အတန်းအစား 'ငါးနှစ်ကောင် ဝိညာဉ်စုဆောင်းခြင်းဆွဲပြား' ရဲ့ အနိမ့်ဆုံးလေလံဈေးက ဝိညာဉ်ကျောက်တုံး သုံးထောင် ဖြစ်ပြီး တစ်ခါတိုးရင် အနည်းဆုံး တစ်ရာ တိုးပေးရမှာ ဖြစ်ပါတယ်ရှင်"
လေလံတူထုသံနှင့်အတူ လူတိုင်း စတင်ဈေးပြိုင်ပေးနိုင်သည့် အချိန်သို့ ရောက်ရှိလာလေတော့သည်။