အခန်း (၂၈) - ဝိညာဉ်အား စမ်းသပ်ခြင်း

"မင်း ဘာပြောလိုက်တယ်!" ချင်းမျိုးနွယ်စုခေါင်းဆောင်က ဒေါသတကြီး ဟိန်းဟောက်လိုက်သည်။ "ဒီလောက် သေးဖွဲတဲ့ကိစ္စလေးကိုတောင် မင်း မကိုင်တွယ်နိုင်ဘူးလား၊ မင်းကို ငါ့နားမှာထားတာ ဘာအသုံးကျလို့လဲ!"

"မျိုးနွယ်စုခေါင်းဆောင်၊ ဒီကိစ္စကို ကျွန်တော်တို့ လုပ်ခဲ့တာမှန်း လီမိသားစု သိသွားရင်တောင်မှ သူတို့က ကျွန်တော်တို့ မျိုးနွယ်စုကို ရင်ဆိုင်ရဲမှာ မဟုတ်ပါဘူး..."

ဒီစကားကို မပြောခဲ့ရင် ဘာမှဖြစ်မှာ မဟုတ်သော်လည်း ချင်းမန်နေဂျာက ပါးစပ်ဟလိုက်သည်နှင့် ချင်းမျိုးနွယ်စုခေါင်းဆောင်၏ ဒေါသမီးကို လောင်စာထည့်လိုက်သကဲ့သို့ ဖြစ်သွားလေသည်။ "မင်း ဒီလောက်တုံးရသလား! အခုအချိန်မှာ လီမိသားစုက လက်တုံ့ပြန်မှာလား၊ မပြန်ဘူးလားဆိုတာက အရေးကြီးလို့လား။ ဒီကိစ္စဖြစ်ပြီးရင် 'ကြိုဆိုပါ၏ဝိဉာဉ်စားသောက်ဆောင်' ကို လာမယ့် ဧည့်သည် ရှိဦးမယ်လို့ မင်းထင်နေသလား!"

ချင်းမျိုးနွယ်စုသည် ယွမ်မင်ဂိုဏ်းနှင့် ရင်းနှီးသော ဆက်ဆံရေးရှိသည်ကို လူတိုင်းသိကြသည်။ သို့သော် ဤဖြစ်ရပ်တွင် လီမိသားစုမှာ ခံရသူဖြစ်သည်။ အကယ်၍ ယွမ်မင်ဂိုဏ်းကသာ အတင်းအဓမ္မ ဝင်ရောက်စွက်ဖက်ပါက အခြားသော လက်အောက်ခံ မျိုးနွယ်စုများက မည်သို့ ထင်ကြမည်နည်း။

ထို့အပြင် လီမိသားစုသည်လည်း ချင်းမျိုးနွယ်စုနှင့် ယွမ်မင်ဂိုဏ်းတို့၏ ဆက်ဆံရေးကို သိရှိပုံရပြီး ကိုယ်တိုင် လက်တုံ့ပြန်ရန် အစီအစဉ်မရှိသော်လည်း ဤကဲ့သို့ သွေးအေးအေးနှင့် အကွက်ချသည့် နည်းလမ်းမှာ ပို၍ပင် ကြောက်စရာကောင်းလှသည်။

ယွမ်မင်ဂိုဏ်းမှ ရွှေအမြုတေအဆင့် ကျင့်ကြံသူနှင့် ပတ်သက်၍လည်း ချင်းမျိုးနွယ်စုသည် ဤကဲ့သို့သော ကိစ္စသေးသေးလေးအတွက် ရှိရင်းစွဲ ဆက်ဆံရေးကို အပျက်စီးမခံလိုကြပေ။

"မင်း အခုချက်ချင်း ဈေးကွက်ကိုသွား၊ 'ကြိုဆိုပါ၏ဝိဉာဉ်စားသောက်ဆောင်' ရဲ့ ဆိုင်းဘုတ်ကို ဖြုတ်ချလိုက်။ ပြီးရင် အခြေအနေ ငြိမ်သက်သွားတဲ့အထိ ပိတ်ထားလိုက်၊ အခြေအနေကောင်းမှ နာမည်အသစ်နဲ့ ပြန်ဖွင့်!" ချင်းမျိုးနွယ်စုခေါင်းဆောင်သည် ရှေ့တွင်ရှိနေသော အသုံးမကျသူကို ကြည့်ကာ စိတ်ပျက်အားလျော့နေတော့သည်။

"ပြီးရင်ရော ဘာလုပ်ရမလဲ" ဟု ချင်းမန်နေဂျာက အလွန်တုံးအသော မေးခွန်းတစ်ခုကို မေးလိုက်ပြန်သည်။

ချင်းမျိုးနွယ်စုခေါင်းဆောင်သည် ရင်ထဲမှ ဒေါသများကို အစွမ်းကုန် ထိန်းချုပ်လိုက်ရင်း ဟိန်းဟောက်လိုက်လေသည်။ "ပြီးရင် မင်း ဒီကို ပြန်လိမ့်လာခဲ့တော့! မျိုးနွယ်စုထဲမှာပဲ အေးအေးဆေးဆေး နေနေ!"

အကယ်၍ ထိုသူသည် သူနှင့် တကယ့်သွေးသားမတော်စပ်လျှင် ဓားနှင့်ခုတ်သတ်ပစ်ရန် သူ အလေးအနက် စဉ်းစားမိမည်မှာ အမှန်ပင်။

သို့သော် 'ကြိုဆိုပါ၏ဝိဉာဉ်စားသောက်ဆောင်' ကိစ္စ မပြေလည်သေးမီမှာပင် ချင်းမျိုးနွယ်စုခေါင်းဆောင်သည် အလွန်တုန်လှုပ်ဖွယ်ကောင်းသော သတင်းတစ်ခုကို ထပ်မံ ကြားလိုက်ရပြန်သည်။

ကျန့်၊ ကျန်း နှင့် ဟဲ အမည်ရှိ အဓိက မျိုးနွယ်စုကြီး သုံးခုစလုံးမှ အခြေတည်အဆင့် ကျင့်ကြံသူ တစ်ဦးစီ ဆုံးရှုံးသွားရသည်ဟူသော သတင်းပင် ဖြစ်သည်။

"ဒါက..." ထိုအခြေတည်အဆင့် ကျင့်ကြံသူ သုံးဦးသည် လီမိသားစု၏ လက်ချက်ဖြင့် သေဆုံးသွားခြင်းဖြစ်နိုင်ကြောင်း ချင်းမျိုးနွယ်စုခေါင်းဆောင်က ချက်ချင်း ရိပ်မိလိုက်သည်။

"ဘာတွေဖြစ်ခဲ့တာလဲ မင်းသိလား"

ချင်းမျိုးနွယ်စုမှ အကြီးအကဲဖြစ်သူက ခေါင်းခါပြကာ ပြောသည်။ "မသဲကွဲသေးပါဘူး၊ သတင်းက မပြည့်စုံဘူး ဖြစ်နေတယ်။ ထူးဆန်းတာက အဲဒီ မျိုးနွယ်စု သုံးခုစလုံးကလည်း ဘာမှ ထွက်မရှင်းကြဘူး။"

"ဒါဟာ သူတို့ကို ပစ်မှတ်ထားနေတဲ့ ကျွန်တော်တို့နဲ့ တခြား အင်အားစုတွေကို သတိပေးဖို့ လီမိသားစုက တမင်တကာ ထုတ်လွှင့်လိုက်တဲ့ သတင်းပဲ ဖြစ်ရမယ်" ဟု ချင်းမျိုးနွယ်စုခေါင်းဆောင်က ဆိုသည်။ သူက သက်ပြင်းချရင်း "တော်လောက်ပြီ၊ လီမိသားစုက ငါတို့ သွားထိရမယ့်သူတွေ မဟုတ်ဘူး။ ငါတို့ ဘာသာငါတို့ အေးအေးဆေးဆေးပဲ နေကြရအောင်။"

ပြင်ပလောကတွင် မည်မျှပင် လှုပ်ခတ်နေပါစေ ဒါရုံကျွန်းပေါ်တွင်မူ အေးချမ်းဆိတ်ငြိမ်လျက် ရှိနေသည်။ လီမိသားစုသည် ဘာမှမဖြစ်ခဲ့သလိုပင် ပုံမှန်အတိုင်း ရှိနေကြသည်။

သို့သော် ယနေ့တွင်မူ ကျင့်ကြံသူများရော၊ သာမန်မျိုးနွယ်စုဝင်များပါ အလွန် စိတ်လှုပ်ရှားကာ မျှော်လင့်ချက်များဖြင့် ပြည့်နှက်နေသောကြောင့် ဒါရုံကျွန်း တစ်ကျွန်းလုံး စည်ကားသက်ဝင်နေသည်။

အကြောင်းမှာ ယနေ့သည် မျိုးနွယ်စု၏ နှစ်စဉ်ကျင်းပမြဲဖြစ်သော 'ဝိညာဉ်အမြစ် စမ်းသပ်ပွဲတော်' နေ့ ဖြစ်သောကြောင့်ပင်။

ဝိညာဉ်အမြစ် စမ်းသပ်ခြင်းဆိုသည်မှာ အသက်ငါးနှစ်ပြည့်ပြီးသော ကလေးငယ်များတွင် 'ဝိညာဉ်အမြစ်' ပါမပါ စမ်းသပ်ခြင်း ဖြစ်သည်။ အကယ်၍ ပါရှိပါက ထာဝရရှင်သန်ခြင်း လမ်းစဉ်ကို လျှောက်လှမ်းမည့် ကျင့်ကြံသူများ ဖြစ်လာနိုင်ပြီး၊ မပါရှိပါက သာမန်လူသားများအဖြစ်သာ နေထိုင်သွားကြရမည်ဖြစ်သည်။

"ကျစ်‌ရွေ့၊ မင်း ဘာလို့ ရောက်လာတာလဲ" စမ်းသပ်ပွဲကို ကြီးကြပ်နေသူမှာ လီရှီရန် ဖြစ်သည်။ လီကျစ်‌ရွေ့ကို စမ်းသပ်ကွင်းတွင် ရုတ်တရက် မြင်လိုက်ရသဖြင့် သူ အံ့အားသင့်သွားသည်။

ပိုင်လန်ခရိုင်တွင် ရှိစဉ်က လီကျစ်‌ရွေ့သည် ဤကဲ့သို့သော ပွဲလမ်းသဘင်များတွင် ပါဝင်ခဲသည်။ ဒါရုံကျွန်းသို့ ရောက်ရှိပြီး ဆေးဖော်စပ်နည်းကို လေ့လာပြီးနောက်ပိုင်းတွင်မူ သူသည် အပြင်သို့ပင် ထွက်လေ့မရှိတော့သဖြင့် လီရှီရန်က သူ့ကို ဤနေရာတွင် မြင်တွေ့ရလိမ့်မည်ဟု မထင်ထားခြင်း ဖြစ်သည်။

"လေညင်းလေး ဘာလေး ခံမလားလို့ ထွက်လာတာပါ" ဟု လီကျစ်‌ရွေ့က ပြုံးကာ ပြန်ဖြေလိုက်သည်။

သူသည် လတ်တလောတွင် '‌အကြော သန်မာစေသော ဆေးလုံး' ဟုခေါ်သည့် အဆင့်မြင့်ဆေးလုံးတစ်မျိုးကို ဖော်စပ်ရန် ကြိုးစားနေသည်။ ထိုဆေးလုံးသည် အမည်အတိုင်းပင် ခန္ဓာကိုယ်အတွင်းရှိ ဝိညာဉ်လမ်းကြောင်းများကို ပိုမိုခိုင်မာ သန်စွမ်းစေသည်။

သို့သော် ယခုအချိန်အထိ အောင်မြင်မှုမရသေးသဖြင့် လီကျစ်‌ရွေ့မှာ အနည်းငယ် စိတ်တိုနေမိသည်။ ထို့ကြောင့် စိတ်အပန်းဖြေရန် အပြင်ထွက်လာစဉ် အရေးကြီးသော ဝိညာဉ်အမြစ် စမ်းသပ်ပွဲနှင့် တိုးခြင်း ဖြစ်သည်။

"ဦးလေးရန်၊ မနှစ်က ဝိညာဉ်အမြစ်ပါတဲ့ ကလေး သုံးယောက်ပဲ ရှိတယ်နော်။ ဒီနှစ်ဆိုရင် ပိုတောင် နည်းသွားဦးမလား မသိဘူး" လီကျစ်‌ရွေ့သည် လူစည်ကားသောနေရာများကို မနှစ်သက်သော်လည်း မျိုးနွယ်စု၏ ဝိညာဉ်အမြစ် စမ်းသပ်မှု ရလဒ်များကိုမူ အမြဲ အာရုံစိုက်လေ့ရှိသည်။

မျိုးနွယ်စုတစ်ခု ရေရှည်တည်တံ့နိုင်ခြင်း ရှိ၊ မရှိ ဆိုသည်မှာ မျိုးနွယ်စု၏ လုံခြုံရေးနှင့် အင်အားအပေါ်တွင်သာမက မျိုးနွယ်စု၏ အနာဂတ်မျိုးဆက်သစ်များအပေါ်တွင်လည်း မူတည်နေသည် မဟုတ်ပါလား။

ဝိညာဉ်အမြစ် စမ်းသပ်ပွဲသည် မျိုးနွယ်စု၏ အနာဂတ် မျှော်လင့်ချက်ကို တစ်စေ့တစ်စောင်း မြင်တွေ့ရနိုင်သော အခွင့်အရေးပင် ဖြစ်သည်။ ဝိညာဉ်အမြစ် ပါရှိသည့် ကလေးငယ်များမှာ နောင်တွင် မည်မျှအထိ အောင်မြင်မှု ရနိုင်မည်ကို မည်သူမှ အတတ်မပြောနိုင်သော်လည်း ၎င်းသည် အစပျိုးမှုတစ်ခုပင် ဖြစ်သည်။

"ဒါကတော့ တခြားနည်းလမ်း မရှိဘူးလေ။ ဒါရုံကျွန်းပေါ်မှာ သာမန်မျိုးနွယ်စုဝင်တွေက နည်းလွန်းသေးတယ်။ ဒီနှစ် စမ်းသပ်ခံမယ့်သူတောင် တစ်ထောင် မပြည့်ချင်ဘူး" လီရှီရန်သည်လည်း ယခုနှစ် စမ်းသပ်ပွဲအပေါ် မျှော်လင့်ချက် သိပ်မထားပေ။

ယခင်က ပိုင်လန်ခရိုင်တွင် ရှိစဉ်က ကလေးငယ် သောင်းနှင့်ချီ၍ စမ်းသပ်ခဲ့သော်လည်း ဝိညာဉ်အမြစ် ပါရှိသူ သုံးဦးသာ ထွက်ပေါ်ခဲ့သည်ကို သတိပြုရမည်။ 'လူတစ်သောင်းတွင် တစ်ယောက်' ဟု ဆိုရလောက်အောင်ပင် အချိုးအစားမှာ အလွန်နည်းပါးလှသည်။

ထို့ကြောင့် ယခုနှစ်တွင် ဝိညာဉ်အမြစ်ပါသော ကလေးတစ်ဦးတည်းကိုပင် တွေ့ရပါက သူတို့အတွက် အလွန်ကံကောင်းသည်ဟု လီရှီရန်က ခံစားနေရသည်။

"သာမန်မျိုးနွယ်စုဝင်တွေ နည်းနေတယ်ဆိုရင် သူတို့ကို ကလေးတွေ အများကြီး မွေးဖို့ ဘာလို့ တိုက်တွန်းမကြည့်တာလဲ"

အနည်းဆုံးတော့ ဒါရုံကျွန်းသည် လူဦးရေ တစ်သန်းခန့်ကို လက်ခံထားနိုင်သည်။ အခုအချိန်မှာတော့ ထိုပမာဏကို ရောက်ဖို့ အများကြီး လိုပါသေးသည်။

အကယ်၍ ဒါရုံကျွန်းတွင် လူဦးရေ ပြည့်နှက်သွားလျှင်တောင်မှ အနီးနားရှိ ကျွန်းများကို သာမန်လူသားများ နေထိုင်နိုင်ရန် ဖော်ဆောင်ပေး၍ ရနိုင်သည်။

"အရင်က မျိုးနွယ်စုက ဒါရုံကျွန်းကို သွေးသားမျိုးဆက် ဆက်ခံဖို့ နေရာတစ်ခုလောက်ပဲ သဘောထားခဲ့ပြီး ပိုင်လန်ခရိုင်ကိုပဲ အဓိက အာရုံစိုက်ခဲ့တာကိုး" အဖြူရောင်ကျောက်စိမ်းဂိုဏ်းတွင် နတ်ဘုရားသန္ဓေအဆင့် ကျင့်ကြံသူ ပေါ်ထွက်လာပြီး သားရဲထိန်းကျောင်းရေးဂိုဏ်း ပြိုလဲသွားလိမ့်မည်ဟု မည်သူက ခန့်မှန်းနိုင်ခဲ့ပါသနည်း။

"ဖြည်းဖြည်းချင်းပဲ သွားကြရမှာပေါ့၊ အခုဆိုရင် မျိုးနွယ်စုက ကောင်းမွန်တဲ့ ဦးတည်ချက်ဆီကို တိုးတက်နေပြီပဲ"

စမ်းသပ်ခံမည့် ကလေးများ အားလုံး ရောက်ရှိလာသဖြင့် လီရှီရန်သည် လီကျစ်‌ရွေ့နှင့် စကားဖြတ်ကာ 'ဝိညာဉ်စမ်းသပ် စီရင်ထုံး' ဆီသို့ အမြန်လျှောက်သွားပြီး စမ်းသပ်မှုကို စတင်ရန် ပြင်ဆင်လိုက်သည်။

ဝိညာဉ်စမ်းသပ် စီရင်ထုံးသည် တစ်ကြိမ်လျှင် လူတစ်ရာကို တစ်ပြိုင်နက် စမ်းသပ်နိုင်သည်။ တစ်ယောက်ချင်းစီ စမ်းသပ်ရသော 'ဝိညာဉ်စမ်းသပ် ကျောက်တုံး' ထက် ပို၍ မြန်ဆန်ထိရောက်သည်။

လီရှီရန်သည် ဒုတိယအဆင့် စီရင်ထုံးပညာရှင် ဖြစ်သောကြောင့်သာ ဤဒုတိယအဆင့် စီရင်ထုံးကို အသုံးပြုနိုင်ခြင်း ဖြစ်သည်။

"စီရင်ထုံးထဲကို ဝင်ကြ!" လီရှီရန် ပြောလိုက်သည်နှင့် ကြောင်တောင်တောင် ဖြစ်နေသော ကလေးငယ် တစ်ရာသည် မိဘများ၏ မျှော်လင့်တကြီး ကြည့်နေသည့် ကြားမှ စီရင်ထုံးအတွင်းသို့ ဝင်ရောက်သွားကြသည်။

လီရှီရန်က စီရင်ထုံးကို နှိုးဆော်လိုက်သည်နှင့် အရောင်ရှစ်မျိုးရှိသော ဝိညာဉ်အလင်းတန်းများ ပေါ်ထွက်လာပြီး စီရင်ထုံးအတွင်းသို့ ပျံ့နှံ့သွားသည်။

အချိန်အနည်းငယ်ကြာပြီးနောက် ကလေးငယ်တစ်ဦး၏ ခေါင်းပေါ်တွင် အလင်းတိုင် သုံးခု ထိုးထွက်လာသည်။ ထိုအလင်းတိုင်များမှာ သတ္တုဓာတ် ဝိညာဉ်အမြစ်ကို ကိုယ်စားပြုသော အဖြူရောင်၊ သစ်သားဓာတ် ဝိညာဉ်အမြစ်ကို ကိုယ်စားပြုသော အစိမ်းရောင်နှင့် မြေဓာတ် ဝိညာဉ်အမြစ်ကို ကိုယ်စားပြုသော အဝါရောင်တို့ ဖြစ်ကြသည်။

ဝိညာဉ်စမ်းသပ် စီရင်ထုံးသည် ဝိညာဉ်အမြစ် ပါရှိခြင်း ရှိ၊ မရှိကိုသာ စမ်းသပ်နိုင်ပြီး ဝိညာဉ်အမြစ်၏ သန့်စင်မှုကိုမူ သီးခြား ထပ်မံစမ်းသပ်ရမည်ဖြစ်သည်။ မည်သို့ပင်ဆိုစေ ယခုနှစ်တွင် လီမျိုးနွယ်စု၌ အဖွဲ့ဝင်သစ် တစ်ဦး ရရှိတော့မည်မှာ အသေအချာပင်။

"အစကောင်းတာပဲ!" လီကျစ်ဟောင်က ဝမ်းသာအားရ ပြောလိုက်သည်။ "ဒီနှစ် ဝိညာဉ်အမြစ် စမ်းသပ်ပွဲက ရလဒ်ကောင်းတွေ ထွက်လာမယ့်ပုံပဲ"

"ဟုတ်တယ်!" လီကျစ်‌ရွေ့ကလည်း အလွန် မျှော်လင့်နေမိသည်။

လီရှီရန်က စီရင်ထုံးကို ပိတ်လိုက်ပြီးနောက် အခြားအကြီးအကဲတစ်ဦးက ဝိညာဉ်အမြစ်ပါသော ကလေးကို ဘေးတစ်ဖက်သို့ ခေါ်သွားကာ စမ်းသပ်မှုအပြီးတွင် ဝိညာဉ်အမြစ် သန့်စင်မှု ထပ်မံစမ်းသပ်ရန် စောင့်ဆိုင်းစေသည်။

ကျန်ရှိသော ကလေးငယ်များမှာမူ ၎င်းတို့၏ အဓိပ္ပာယ်ကို နားလည်သွားကြပြီး ဝမ်းနည်းပက်လက် ငိုယိုကြတော့သည်။ တစ်ဦးငိုလျှင် အားလုံးလိုက်ငိုကြသဖြင့် တစ်ခဏအတွင်းမှာပင် ငိုယိုသံများဖြင့် ပြည့်နှက်သွားတော့သည်။

ဤမြင်ကွင်းကို ကြည့်ရင်း လီကျစ်‌ရွေ့သည် လွန်ခဲ့သော ၁၃ နှစ်က သူကိုယ်တိုင် ဝိညာဉ်စမ်းသပ် စီရင်ထုံးထဲတွင် ရပ်နေခဲ့သည့် နေ့ကို သတိရသွားသည်။

ထိုအချိန်က သူသည် ဤကျင့်ကြံခြင်းကမ္ဘာသို့ ရောက်ရှိလာသည်ကို သဘောပေါက်ခါစဖြစ်ပြီး ကောင်းမွန်သော ရလဒ်တစ်ခုရရန် မျှော်လင့်ချက်များဖြင့် ပြည့်နှက်နေခဲ့သည်။

ရလဒ်ထွက်ပေါ်လာချိန်တွင် လီကျစ်‌ရွေ့ ဘာမှ မလုပ်ရသေးမီမှာပင် သူ့အနားရှိ ကျင့်ကြံသူများက ပြုံးရွှင်စွာဖြင့် သူ့အနားသို့ ဝိုင်းအုံလာကြသည်။ ထိုစဉ်က သူသည် ဝိညာဉ်အမြစ် ပါရှိရုံသာမက သူ့၏ အရည်အချင်းမှာလည်း အတော်အတန် ကောင်းမွန်နေမည်ဟု သူ တွေးမိခဲ့သည်။

ထို့နောက် လီကျစ်‌ရွေ့ကို ထပ်မံစမ်းသပ်ကြပြီး ရလဒ်ထွက်လာချိန်တွင် လူအများက စိတ်ပျက်သွားကြသော်လည်း သူကမူ ဂရုမစိုက်ခဲ့ပေ။ သူ သိသည်မှာ သူ့တွင် ဝိညာဉ်အမြစ် ရှိပြီး လျှို့ဝှက်ဆန်းကြယ်လှသော ကျင့်ကြံခြင်းကမ္ဘာသို့ ဝင်ရောက်ခွင့်ရရှိသွားပြီ ဟူသော အချက်ပင် ဖြစ်သည်။