အခန်း  ၄ အဆင့်မြင့်ဆေးရည်ကို အသုံးပြုခြင်း

[စနစ်တာဝန် - ကမ္ဘာပျက်ကပ် မတိုင်မီ ခိုလှုံရေးစခန်းတစ်ခု တည်ဆောက်ပါ။]

[တာဝန်အောင်မြင်မှု ဆုလာဘ် - ခိုလှုံရေးစခန်းရဲ့ ကာကွယ်ရေးစွမ်းအားကို အဆတစ်ရာ တိုးမြှင့်ပေးမည်။]

စိတ်ထဲတွင် စနစ်၏ အကြောင်းကြားစာကို ကြားလိုက်ရသောအခါ လင်းဖန် အံ့အားသင့်သွားရသည်။ သူသည် စနစ်၏ ဆုလာဘ်ကြောင့် နောက်တစ်ကြိမ် မှင်တက်သွားခဲ့ရပြန်သည်။ မူလဆုလာဘ်အပြင် အပိုဆုလာဘ်များပါ ရှိနေလိမ့်မည်ဟု သူ မမျှော်လင့်ထားခဲ့ပေ။

သူသည် လင်းလင်းအာနှင့် ဝမ်ဟူတို့၏ စွမ်းအားကို မည်သို့မြှင့်တင်ပေးရမည်ကို စိုးရိမ်နေခဲ့သော်လည်း ယခုအခါ စနစ်က ထိုပြဿနာကို တစ်ခါတည်း ရှင်းလင်းပေးလိုက်ပြီ ဖြစ်သည်။

အဆင့်မြင့် ခန္ဓာကိုယ်ကြံ့ခိုင်မှုဆေးရည် နှစ်ပုလင်းသည် ၎င်းတို့၏ ခန္ဓာကိုယ် ကြံ့ခိုင်မှုကို ဆယ်ဆ တိုးတက်စေနိုင်ပြီး အများဆုံး ဆေးမင်ကြောင် ငါးခုအထိ ထိုးနှံနိုင်စွမ်း ရှိစေမည် ဖြစ်သည်။ ဤမျှကြီးမားသော စွမ်းအားမျိုးသည် လူသားများထဲတွင် ယှဉ်ပြိုင်နိုင်သူ မရှိနိုင်ပေ။ အတိတ်ဘဝတုန်းက ဆေးမင်ကြောင် ငါးခုထက် ပို၍ ထိုးနှံနိုင်သူတစ်ဦးမျှ သူ မကြားဖူးခဲ့ပေ။

ကျန်ရှိသော သာမန် ခန္ဓာကိုယ်ကြံ့ခိုင်မှုဆေးရည် ဆယ်ပုလင်းသည်လည်း ခန္ဓာကိုယ် ကြံ့ခိုင်မှုကို ငါးဆအထိ တိုးမြှင့်ပေးနိုင်ပြီး ဆေးမင်ကြောင် သုံးခုအထိ ထိုးနှံနိုင်မည် ဖြစ်သည်။ ဤအရာများနှင့်ဆိုလျှင် သူသည် ပြိုင်ဘက်ကင်းသော အသွင်ပြောင်းလဲသူ အဖွဲ့တစ်ဖွဲ့ကို ဖွဲ့စည်းနိုင်မည် ဖြစ်သည်။ သူတို့သည် ကမ္ဘာပျက်ကပ်၏ အစောပိုင်းကာလတွင် ကြီးမားသော အားသာချက်ကို ရရှိကြပေလိမ့်မည်။

အိမ်သို့ ပြန်ရောက်ပြီးနောက် လင်းဖန်သည် အိပ်ခန်းတံခါးကို ချက်ချင်း ပိတ်လိုက်သည်။ သူသည် လင်းလင်းအာကို ဆိုဖာပေါ်သို့ ဆွဲခေါ်လာပြီး လေးနက်စွာ ပြောလိုက်သည်။

"အသည်းလေး... ငါ ဒီနေ့ မုန့်စားပွဲတုန်းက သေသေချာချာ ရှင်းမပြခဲ့ရဘူး။ ကမ္ဘာပျက်ကပ် ရောက်လာတဲ့အခါ ဒီကမ္ဘာပေါ်မှာ အသွင်ပြောင်းလဲသူတွေ ပေါ်လာလိမ့်မယ်။ သူတို့ဟာ ခန္ဓာကိုယ်ပေါ်က ဆေးမင်ကြောင်တွေကြောင့် ထူးခြားဆန်းပြားစွမ်းအားတွေကို နိုးထလာစေမှာ ဖြစ်တယ်။ အဆင့်တစ်ခုအထိ ကျင့်ကြံပြီးသွားရင် သူတို့ရဲ့ ခန္ဓာကိုယ်က နျူကလီးယားဗုံးဒဏ်ကိုတောင် ဘာပြဿနာမှမရှိဘဲ ခံနိုင်ရည်ရှိလာလိမ့်မယ်။"

လင်းလင်းအာက ခေါင်းညိတ်ပြရင်း "မင်းပြောတာကို ငါ ယုံပါတယ်။" ဟု ဆိုသည်။

"ငါ ပြောတာတွေက နည်းနည်း အံ့ဩစရာကောင်းမနေဘူးလား။ ဒါက တကယ်ပဲ မယုံနိုင်စရာကောင်းလွန်းလို့ပါ။" လင်းဖန်သည် ဆိုဖာနောက်မှီကို မှီလိုက်ရင်း မျက်နှာကို ပွတ်သပ်လိုက်သည်။

"အံ့ဩစရာကောင်းတာတော့ ဟုတ်တာပေါ့ ဒါပေမဲ့ ငါတို့ သိလာခဲ့တာ ဆယ်နှစ်ရှိပြီလေ ငါ မင်းကို အပြည့်အဝ ယုံကြည်ပါတယ်။" လင်းလင်းအာသည် လင်းဖန်၏ လည်ပင်းကို ဖက်လိုက်ရင်း "ငါ့မိဘတွေ ကားအက်ဆီးဒင့်နဲ့ ဆုံးပါးသွားကတည်းက ငါ မင်းကို ငါ့ရဲ့ မိသားစုဝင်တစ်ယောက်လို သတ်မှတ်ခဲ့တာ ဒါကြောင့် မင်းကို အမြဲယုံကြည်တယ်။"

လင်းဖန်၏ မျက်ဝန်းများတွင် မျက်ရည်များ ဝဲတက်လာခဲ့သည်။ ဇနီးသည်က သူ့ကို ဤမျှ နားလည်ပေးပြီး အကြွင်းမဲ့ ယုံကြည်ပေးနေသည် မဟုတ်ပါလား။

သူသည် စနစ်ဟင်းလင်းပြင်ထဲမှ စနစ်ဆုလာဘ်များဖြစ်သော ဖန်ဂူခန္ဓာကိုယ် အဆင့်မြှင့်တင်ဆေးရည် တစ်ပုလင်းနှင့် အဆင့်မြင့် ခန္ဓာကိုယ်ကြံ့ခိုင်မှုဆေးရည် တစ်ပုလင်းကို ချက်ချင်း ထုတ်ယူလိုက်သည်။ သူသည် အဆင့်မြင့် ခန္ဓာကိုယ်ကြံ့ခိုင်မှုဆေးရည်ကို လင်းလင်းအာ၏ လက်ထဲသို့ ထည့်ပေးလိုက်သည်။

လင်းလင်းအာသည် ဖန်ပုလင်းထဲရှိ အနီရောင်ဆေးရည်ကို စိုက်ကြည့်နေမိသည်။ အရောင်မှာ သွေးကဲ့သို့ နီမြန်းနေပြီး ပုလင်းမှ သင်းပျံ့သော ရနံ့တစ်ခု ထွက်ပေါ်နေကာ စိတ်ကို လန်းဆန်းစေသည်။

"ဒါက ဘာလဲဟင်။"

လင်းဖန်သည် ဖန်ဂူခန္ဓာကိုယ် အဆင့်မြှင့်တင်ဆေးရည် ပုလင်းကို ယူကာ အဖုံးကို ဖွင့်လိုက်သည်။

"ဒါကို ခန္ဓာကိုယ်ကြံ့ခိုင်မှုဆေးရည်လို့ ခေါ်တယ်။ ဒါက လူတစ်ယောက်ရဲ့ ခန္ဓာကိုယ်ကို မြှင့်တင်ပေးနိုင်ပြီး ငါတို့တွေကို ပိုပြီးကြီးမားတဲ့ ထူးခြားဆန်းပြားစွမ်းအားတွေကို ခံနိုင်ရည်ရှိအောင် လုပ်ပေးနိုင်တာ။ ငါ အရင် သောက်ပြမယ်။"

လင်းဖန် ပြောပြီးသည်နှင့် ပုလင်းထဲရှိ ဆေးရည်ကို တစ်ကျိုက်တည်းဖြင့် ကုန်အောင် သောက်ချလိုက်သည်။ လင်းဖန် ပါးစပ်ကို သပ်လိုက်မိသည်။ ဤဆေးရည်က အတော်လေး အရသာရှိလှသည်။

ချိုမြိန်သော ဆေးရည်သည် ခန္ဓာကိုယ်ထဲသို့ ရောက်ရှိသွားပြီးနောက် လင်းဖန်သည် သူ့ဗိုက်ထဲမှတစ်ဆင့် ခန္ဓာကိုယ်အနှံ့သို့ နွေးထွေးသော စွမ်းအားတစ်ခု စီးဆင်းသွားသည်ကို ချက်ချင်း ခံစားလိုက်ရသည်။ ထို့နောက် အပူရှိန်က တဖြည်းဖြည်း ပြင်းထန်လာပြီး တစ်ကိုယ်လုံး ပူလောင်လာကာ ခေါင်းပေါ်မှ ရေနွေးငွေ့များ ထွက်ပေါ်လာတော့သည်။ သူသည် ဆောင်းနားထဲ ရောက်နေသကဲ့သို့ တစ်ကိုယ်လုံး ပူပြင်းလှသည်။

လင်းဖန်၏ ပုံမှန်မဟုတ်သော အခြေအနေကို မြင်လိုက်ရသောအခါ လင်းလင်းအာသည် လက်ထဲမှ ဆေးရည်ပုလင်းကို ချက်ချင်းချကာ စိုးရိမ်တကြီးဖြင့် လင်းဖန်၏ ပါးကို ကိုင်လိုက်သည်။ လင်းဖန်၏ ခန္ဓာကိုယ်မှာ ပူလောင်နေသဖြင့် သူမ၏ လက်ကလေးများပင် နီမြန်းသွားရသည်။

"လင်းဖန်... ဘာဖြစ်လို့လဲ။" လင်းလင်းအာ မျက်မှောင်ကြုတ်လိုက်မိသည်။

လင်းဖန်သည် သွားကို တင်းတင်းကြိတ်ကာ ခေါင်းကို အသာအယာ မော့လိုက်ရာ မျက်ဝန်းများတွင် သွေးကြောများ ယှက်သန်းနေပြီး နဖူးတွင်လည်း အကြောများ ထောင်ထနေခဲ့သည်။

"ရပါတယ်... ဒါက ပုံမှန် ဖြစ်စဉ်တစ်ခုပဲ။"

လင်းဖန်သည် အသက်ကို ပြင်းပြင်းရှူရင်း စကားလုံးအနည်းငယ်ကို ခက်ခက်ခဲခဲ ပြောလိုက်ရသည်။ လင်းလင်းအာသည် စိုးရိမ်နေသော်လည်း ဇွတ်အတင်း မလှုပ်ရှားရဲပေ။ သူမသည် လင်းဖန်၏ ဘေးတွင်သာ နေထိုင်ရင်း တစ်ရှူးဖြင့် လင်းဖန်၏ နဖူးမှ ချွေးများကို အဆက်မပြတ် သုတ်ပေးနေခဲ့သည်။

နာရီဝက်ခန့် ကြာပြီးနောက် လင်းဖန်၏ ခန္ဓာကိုယ် အပူချိန်က တဖြည်းဖြည်း ကျဆင်းသွားခဲ့သည်။ ဆယ်မိနစ်ခန့် ကြာသောအခါ ခန္ဓာကိုယ်က ပုံမှန်အခြေအနေသို့ ပြန်လည်ရောက်ရှိသွားတော့သည်။

"အဆင်ပြေသွားပြီလား။" လင်းလင်းအာက လင်းဖန်၏ နဖူးမှ ချွေးများကို သုတ်ပေးရင်း မေးသည်။

လင်းဖန် ခေါင်းခါပြလိုက်သည်။ သူ ထရပ်လိုက်ပြီး သူ့ခန္ဓာကိုယ် အခြေအနေကို စစ်ဆေးကြည့်လိုက်သည်။ သူသည် လက်သီးကို ကျစ်ကျစ်ပါအောင် ဆုပ်လိုက်ရာ လက်မောင်း ကြွက်သားများမှ ကြီးမားသော စွမ်းအင်များ ထွက်ပေါ်လာသည်။ လင်းဖန်သည် သူ့ခန္ဓာကိုယ်ထဲတွင် နဂါးကြီးတစ်ကောင် ပုန်းအောင်းနေသကဲ့သို့ ခံစားရပြီး လက်သီးတစ်ချက်တည်းဖြင့် ကျားတစ်ကောင်ကို သတ်နိုင်စွမ်းရှိသည်ဟု ခံစားရသည်။ အသာအယာ ခုန်လိုက်ရုံဖြင့် ခေါင်းက မျက်နှာကျက်နှင့် ထိလုနီးပါး ဖြစ်သွားသည်။ ခြေထောက်များကလည်း ပေါ့ပါးသွက်လက်နေခဲ့သည်။

သူ့ခန္ဓာကိုယ်ကလည်း ပိုမိုသန်မာလာပြီး လက်မောင်းများ ကြီးထွားလာကာ ရင်ဘတ်ကြွက်သားများလည်း ထွက်ပေါ်လာသည်။ ထို့ထက်ပို၍ အရေးကြီးသည်မှာ ကြီးထွားသင့်သည့် နေရာများကလည်း ပိုမိုကြီးထွားလာခြင်း ဖြစ်သည်။

လင်းလင်းအာသည် လင်းဖန်၏ အနားသို့ လျှောက်လာပြီး သူ့မျက်နှာကို စိုက်ကြည့်နေမိရာ သူမ၏ မျက်ဝန်းများတွင် ထူးဆန်းသော အရောင်အဝါများနှင့် စိတ်လှုပ်ရှားမှုများ ပြည့်နှက်နေခဲ့သည်။

"လင်းဖန်... မင်း အခု ကြည့်ရတာ တစ်မျိုး ဖြစ်သွားပြီပဲ။"

"ဘာကွာသွားလို့လဲ။" လင်းဖန် သူ့မျက်နှာကို ကိုင်ကြည့်လိုက်သည်။

"ငါလည်း မပြောတတ်ဘူး ဒါပေမဲ့ ပိုပြီးတော့ ဆွဲဆောင်မှုရှိလာတာတော့ အမှန်ပဲ။" လင်းလင်းအာက ညှို့ဓာတ်ပြင်းစွာ ပြုံးပြလိုက်သည်။

လင်းဖန်သည် လင်းလင်းအာ၏ အကြည့်ကြောင့် စိတ်လှုပ်ရှားသွားရသော်လည်း သူ့စိတ်ဆန္ဒကို ထိန်းချုပ်လိုက်သည်။

"မင်းလည်း မင်းရဲ့ ခန္ဓာကိုယ်ကို မြှင့်တင်ဖို့အတွက် ဒီဆေးရည်ကို သောက်လိုက်ဦး။"

"အင်း။"

လင်းလင်းအာသည် စားပွဲပေါ်မှ ဆေးရည်ပုလင်းကို ကောက်ကိုင်ကာ တုံ့ဆိုင်းခြင်းမရှိဘဲ သောက်ချလိုက်သည်။ ပြင်းထန်သော ဆေးရည်ကို သောက်ပြီးနောက် စက္ကန့်ပိုင်းအတွင်း လင်းလင်းအာ၏ မျက်ဝန်းများ ဝေဝါးသွားပြီး ညည်းတွားသံ သဲ့သဲ့ ထွက်ပေါ်လာသည်။ လင်းဖန်ကဲ့သို့ပင် လင်းလင်းအာသည် သွားကိုကြိတ်ကာ မျက်မှောင်ကြုတ်ရင်း အံကြိတ်ခံစားနေခဲ့သည်။

သို့သော် လင်းလင်းအာ သောက်သုံးသော ဆေးရည်သည် အဆင့်မြင့်ဆေးရည်ဖြစ်ပြီး လင်းဖန် သောက်သုံးသော ဆေးရည်ထက် တစ်ဆင့်နိမ့်သဖြင့် လင်းဖန်ခံစားရသကဲ့သို့ ပြင်းထန်သော နာကျင်မှုကို မခံစားရပေ။

ဆယ်မိနစ်ခန့် ကြာပြီးနောက် လင်းလင်းအာသည် ပုံမှန်အခြေအနေသို့ ပြန်လည်ရောက်ရှိသွားသည်။

"တကယ် အံ့ဩစရာကောင်းတဲ့ အရာပဲ။" လင်းလင်းအာသည် သူမ၏ လက်ကလေးများကို မြှောက်ကာ ခန္ဓာကိုယ်ထဲရှိ ကြီးမားသော စွမ်းအားကို ခံစားရင်း စိတ်လှုပ်ရှားနေမိသည်။ သူမသည် အသာအယာ ရိုက်လိုက်ရုံဖြင့် သစ်သားကုလားထိုင်တစ်လုံးကို အပိုင်းပိုင်းခြေမွပစ်လိုက်နိုင်သည်။

လင်းဖန်က သူမ၏ ဆံနွယ်များကို အသာအယာ ပွတ်သပ်ပေးရင်း "မင်းရဲ့ စွမ်းအားတွေ နိုးထလာပြီးတဲ့နောက်မှာ အခုထက်မက ပိုပြီးတော့ သန်မာလာလိမ့်မယ်။" ဟု ပြောလိုက်သည်။

လင်းဖန်သည် ဆေးရည်သောက်ပြီးနောက် ပိုမိုလှပကျော့ရှင်းလာသော လင်းလင်းအာ၏ မျက်နှာကို စိုက်ကြည့်နေမိရာ သူမသည် အလွန်အမင်း ရင်သပ်ရှုမောဖွယ် ကောင်းလှသည်။ သူ့နှလုံးသားထဲတွင် စိတ်ဆန္ဒများ တောက်လောင်လာပြီး မျက်ဝန်းများတွင်လည်း မီးတောက်များ လှုပ်ခတ်နေခဲ့သည်။ သူသည် လင်းလင်းအာ၏ လက်ကို ဆွဲကိုင်ကာ လေးနက်သောအသံဖြင့် "မိုးချုပ်နေပြီပဲ... ငါတို့ အခန်းထဲသွားပြီး နိုင်ငံခြားဘာသာစကား အတူတူ လေ့လာကြရအောင်..." ဟု ဆိုလိုက်သည်။

လင်းလင်းအာ၏ မျက်နှာလေး နီမြန်းသွားပြီး သူ့ကို မျက်စောင်းထိုးလိုက်သည်။ လင်းဖန်သည် သူမကို ရုတ်တရက် ပွေ့ချီလိုက်ပြီး အိပ်ခန်းဆီသို့ လျှောက်လှမ်းသွားပါတော့သည်။

...

နေ့နှင့်ညသည် အလှည့်ကျ ကူးပြောင်းနေခဲ့သည်။ တစ်ညလုံး သူတို့ မအိပ်ဖြစ်ခဲ့ကြပေ။

မနက် ရှစ်နာရီတွင် လင်းဖန်သည် အိပ်မက်ချိုချိုမှ နိုးထလာခဲ့သည်။ ဘေးရှိ လင်းလင်းအာမှာ ထသွားခဲ့ပြီဖြစ်ပြီး မီးဖိုချောင်ထဲမှ ဟင်းချက်သံများ ထွက်ပေါ်နေသည်။

လင်းဖန် ကုတင်ပေါ်မှထကာ အဝတ်အစားများကို ဝတ်ဆင်ရင်း အနည်းငယ် နာကျင်နေသော ခါးကို ပွတ်သပ်လိုက်မိသည်။ မနေ့ညက အဖြစ်အပျက်များကို ပြန်တွေးမိရင်း ကျေနပ်စွာ ပြုံးလိုက်မိသည်။ 'နိုင်ငံခြားဘာသာစကား သင်ယူရတာ တကယ်ကောင်းတာပဲ ငါ အမြဲတမ်း လေ့လာရမယ်။'

လင်းဖန် သက်ပြင်းချလိုက်ပြီး အဝတ်အစားများကို သပ်ရပ်စွာ ဝတ်ဆင်ကာ အမြန်မျက်နှာသစ်လိုက်သည်။ သူသည် ဆိုဖာပေါ်တွင် ထိုင်ကာ စီးကရက်တစ်လိပ်ကို မီးညှိပြီး ယနေ့အတွက် အစီအစဉ်များကို စတင်တွေးတောတော့သည်။ ယခု သူ ပိုက်ဆံရှာဖွေပြီးပြီ ဖြစ်ရာ ပထမဆုံး လုပ်ဆောင်ရမည့်အချက်မှာ ဆင်ခြေဖုံးရှိ ထောင်ဟောင်းကို ဝယ်ယူပြီး ခိုလှုံရေးစခန်း တည်ဆောက်ရန် ဖြစ်သည်။ ဒုတိယအချက်မှာ လင်းလင်းအာနှင့် ဝမ်ဟူတို့ကို ခေါ်ကာ ဆေးမင်ကြောင် သွားရောက်ထိုးနှံရန် ဖြစ်သည်။

သေချာစွာ စဉ်းစားပြီးနောက် လင်းဖန်သည် သူထိုးနှံမည့် ဆေးမင်ကြောင် ပုံရိပ်များကို ဆုံးဖြတ်ချက် ချလိုက်သည်။ သူ အသက်ပြန်ရှင်လာပြီဖြစ်ရာ အစွမ်းထက်ဆုံးသော ဆေးမင်ကြောင်များကို ပြင်ဆင်ပြီး ကမ္ဘာပျက်ကပ် ရောက်သောအခါ ပြိုင်ဘက်ကင်း ဖြစ်လာစေရန်နှင့် လောကကြီးကို စိုးမိုးနိုင်ရန် ပြုလုပ်မည် ဖြစ်သည်။

သူ့တွင် အကြိုအစီအစဉ်တစ်ခု ရှိနေပြီ ဖြစ်သည်။