[အခန်း ၂၉ မျိုးဗီဇပြောင်းလဲသူများကို သတ်ဖြတ်ခြင်း]

"သောက်ကျိုးနည်း ဒါက မျိုးဗီဇပြောင်းလဲသွားတာလား။" ရှောင်လီ လုံးဝ မှင်တက်သွားရသည်။ လူအရှင်လတ်လတ်ကြီးက မိစ္ဆာသားရဲတစ်ကောင်အဖြစ် ပြောင်းလဲသွားခြင်း ဖြစ်သည်။ သူက ထိတ်လန့်တကြား အော်ဟစ်လိုက်သည်"အစ်ကိုကြီး ဒီကောင်တွေ ဖူကူရှီးမား နျူကလီးယား စွန့်ပစ်ရေတွေကို သောက်ထားကြတာလား။ ဒီလို အခြေအနေအထိ ဖြစ်သွားရတာ။" "ဘာလဲ ကြောက်သွားပြီလား။" ဘရုစ်က ဂုဏ်ယူဝင့်ကြွားစွာ ပြုံးလိုက်သည် "ဒါက ငါတို့နိုင်ငံရဲ့ အဆင့်မြင့်ဆုံး ဇီဝလက်နက်ပဲ အဲ့ဒါက လူတစ်ယောက်ရဲ့ အလားအလာကို အချိန်တိုအတွင်းမှာ ဆယ်ဆအထိ တိုးမြှင့်ပေးနိုင်တယ်။" "ငါ ခင်ဗျားတို့ကို နောက်ဆုံး အခွင့်အရေး ပေးမယ်။ ငါ ခင်ဗျားတို့ရဲ့ ဘေးကင်းမှုကို အာမခံပေးနိုင်တယ်။ ခင်ဗျားတို့သာ ဆန့်ကျင်ရဲရင် ခင်ဗျားတို့ကို ဆိုးရွားစွာ သေဆုံးစေရမယ်။" "ဘယ်လိုမျိုး သောက်သုံးမကျတဲ့ ဇီဝလက်နက်လဲကွာ။" ရှောင်လီ ဤအရာကို လုံးဝ ဂရုမစိုက်ပေ။ သူ့၏ ခန္ဓာကိုယ် ကြံ့ခိုင်မှုက သာမန်လူသားထက် ဆယ်ဆမျှ သန်မာပြီးဖြစ်ကာ သူ့သံချပ်ကာ၏ အကာအကွယ်ပါ ထပ်တိုးထားသဖြင့် ဤလူများကို ကိုင်တွယ်ရခြင်းက သူ့အတွက် အလွန်အမင်း လွယ်ကူလှသည်။ "လာစမ်းပါ ငါ မင်းတို့ကို ငါတို့ နဂါးနိုင်ငံ (တရုတ်နိုင်ငံ)ရဲ့ ရိုးရာသိုင်းပညာကို ပြသရတာပေါ့။" လင်းဖန်က သူ့စီကရက်တိုကို ပစ်ချလိုက်ပြီး ခန္ဓာကိုယ်ကို အညောင်းဆန့်လိုက်သည်။ "ကောင်းပြီ ကောင်းပြီ မင်းက တကယ့်ကို သတ္တိရှိတာပဲ။" ဘရုစ် မျက်နှာ ပျက်သွားသည်။ လင်းဖန်  "ငါက အလွန်အမင်း သတ္တိရှိတာပေါ့ အိုကေ။" လင်းဖန် ရှောင်လီကို တစ်ချက် ကြည့်လိုက်သည် "မြန်မြန်လုပ် ငါတို့ ဒီနေ့ည ပြန်ပြီး အရက်သောက်ဖို့ အချိန်မနှောင့်နှေးစေနဲ့။" အိုကေ။ လင်းဖန်နှင့် သူ့အဖော်တို့က မိမိကို လုံးဝ ဂရုမစိုက်သည်ကို မြင်သောအခါ ဘရုစ်၏ မျက်နှာက ရုပ်ဆိုးသွားခဲ့ရသည်။ သူက လက်ကို ဝှေ့ယမ်းကာ အမိန့်ပေးလိုက်သည် "သွားကြစမ်း။ သူတို့ကို ဖမ်းဆီးကြစမ်း။" အမိန့်ရသည်နှင့် မျိုးဗီဇပြောင်း သားရဲ ဆယ်ဦးလုံးသည် ဟိန်းဟောက်ကာ လင်းဖန်နှင့် သူ့လူများရှိရာသို့ ပြေးဝင်သွားကြတော့သည်။

...

"သိပ်ကို သန်မာတဲ့ မျိုးဗီဇပြောင်းလဲသူတွေပဲ။" လုံကျန့်ထျန်း စောင့်ကြည့်ရေး ဗီဒီယိုကို ကြည့်ရင်း အံ့အားသင့်စွာ စိုက်ကြည့်နေမိသည်။ သူသည် ဖန်သားပြင်ကို ဖြတ်ကျော်၍ပင် ဤမျိုးဗီဇပြောင်းလဲသူများ၏ စွမ်းအားကို ခံစားနေရသည်။ သူတို့၏ ၂ မီတာကျော် အရပ်အမောင်း သန်မာလှသော ကြွက်သားများနှင့် လက်သီးတစ်ချက်တည်းဖြင့် သစ်ငုတ်တိုများကို ချိုးဖျက်နိုင်စွမ်းတို့က သူတို့၏ အင်အားကို လင်းဖန်နှင့် တန်းတူနီးပါး ဖြစ်စေသည်။ "လင်းဖန် မင်း ဤအကြိမ်မှာ အသက်ရှင်မလား သေမလားဆိုတာ ကြည့်ကြသေးတာပေါ့ ဟင်း။" လုံကျန့်ထျန်း၏ မျက်နှာတွင် အောင်နိုင်သူအလား အပြုံးတစ်ခု ဖြစ်ပေါ်လာခဲ့သည်။ မိမိ၏ ကလဲ့စားချေမှုကို တွေးမိသောအခါ သူသည် အလွန်အမင်း ဝမ်းသာပီတိ ဖြစ်ရသည်။ သို့သော်လည်း နှမြောစရာကောင်းသည်မှာ စုယွန်းဖေး၏ ကြားဝင်စွက်ဖက်မှုကြောင့် လင်းဖန်လက်ထဲက သံချပ်ကာက သူ့လက်လှမ်းမီရာတွင် မရှိတော့ခြင်းပင် ဖြစ်သည်။

...

ထိုအချိန်မှာပင် တိုက်ပွဲနယ်မြေနှင့် မလှမ်းမကမ်းရှိ တောင်ထိပ်တစ်ခုပေါ်၌ ဖြစ်သည်။ စုယွန်းဖေးသည် မှန်ပြောင်းမှတစ်ဆင့် ကွင်းပြင်ထဲက တိုက်ပွဲကို စောင့်ကြည့်နေခဲ့သည်။ မိမိ၏ မျိုးဗီဇပြောင်းလဲသူ ဆယ်ဦးလုံးက သူတို့၏ တိုက်ပွဲဝင် ပုံသဏ္ဌာန်များကို ပြသလာသည်ကို မြင်သောအခါ စုယွန်းဖေး စိတ်လှုပ်ရှားမှုကြောင့် သွေးများ ဆူပွက်လာခဲ့ရသည်။ ဤမျိုးဗီဇပြောင်းလဲသူ ဆယ်ဦးက သူ့၏ ဝှက်ဖဲများ ဖြစ်ကြပြီး သူသည် အကြိမ်ပေါင်း ဆယ်ကြိမ်ထက်မက အသုံးပြုခဲ့ဖူးသော်လည်း တစ်ကြိမ်မျှ ရှုံးနိမ့်ဖူးခြင်း မရှိပေ။ လင်းဖန် ဘယ်လောက်ပဲ သန်မာပါစေ သူက သာမန်လူသား သက်သက်သာ ဖြစ်သည်။ သူက မျိုးဗီဇပြောင်းလဲသူကို ဘယ်လိုလုပ် အနိုင်ယူနိုင်မှာလဲ။ ဤအကြိမ်မှာတော့ သူ အညံခံရုံမှတစ်ပါး အခြားရွေးချယ်စရာ မရှိတော့တာ သေချာသည်။ လင်းဖန် ဝတ်ဆင်ထားသည့် သံချပ်ကာက သူ့အပိုင်သာ ဖြစ်ရမယ်။

...

တိုက်ပွဲနယ်မြေတွင် ဖြစ်သည်။ လင်းဖန်သည် မိမိထံသို့ လျင်မြန်စွာ ပြေးဝင်လာနေသည့် မျိုးဗီဇပြောင်းလဲသူများကို လျစ်လျူရှုထားဆဲပင် ။ သူတို့၏ အရှိန်အဟုန်က အလွန်အမင်း လျင်မြန်လှပြီး လူသားတို့၏ ကန့်သတ်ချက်ကို သိသိသာသာ ကျော်လွန်နေသော်လည်း အဆဆယ်ဆမျှ မြန်ဆန်ခြင်း မရှိဘဲ အလွန်ဆုံး သုံးဆခန့်သာ မြန်ဆန်ခြင်း ဖြစ်သည်။ သို့သော်လည်း ဤအရာက အတော်လေး ထိတ်လန့်စရာ ကောင်းလှဆဲပင်။ နှစ်စက္ကန့်အတွင်းမှာပင် မျိုးဗီဇပြောင်းလဲသူ ဆယ်ဦးလုံး လင်းဖန်၏ ဘေးနားသို့ ရောက်ရှိလာခဲ့ကြသည်။ သူက ၂ မီတာကျော် မြင့်မားပြီး လူစွမ်းကောင်းကြီး ဟာ့ခ် ကဲ့သို့ သန်မာလှသော ခန္ဓာကိုယ် ရှိသည်။ မျိုးဗီဇပြောင်းလဲသူတစ်ဦးက လင်းဖန်၏ ခေါင်းထံသို့ တိုက်ရိုက် ရည်ရွယ်ကာ ဝှေ့ယမ်းကန်ချက်တစ်ခုဖြင့် လှမ်းကန်လိုက်သည်။ သူ့၏ အလွန်အမင်း မြန်ဆန်လှသော အရှိန်အဟုန်ကြောင့် သူ့လှုပ်ရှားမှုက လေခွဲသံကို ဖြစ်ပေါ်စေခဲ့ပြီး လင်းဖန်ပင် လေစီးကြောင်း၏ သက်ရောက်မှုကို ခံစားလိုက်ရသည်။ ပြင်းထန်သော တိုက်ခိုက်မှုနှင့် ရင်ဆိုင်ရသော်လည်း လင်းဖန် ရှောင်တိမ်းရန် မရွေးချယ်ဘဲ တစ်ဖက်လူ၏ တိုက်ခိုက်မှုကို ထိပ်တိုက် ရင်ဆိုင်လိုက်သည်။ လင်းဖန် မိမိ၏ တိုက်ခိုက်မှုကို ရှောင်တိမ်းခြင်း မရှိသည်ကို မြင်သောအခါ မျိုးဗီဇပြောင်းလဲသူက မဲ့ပြုံးပြုံးလိုက်သည်။ "မင်းက တကယ့်ကို ထောင်လွှားတဲ့ လူအပဲ သေစမ်း။" ကြောက်မက်ဖွယ်ကောင်းသော စွမ်းအားနှင့်အတူ ခြေသလုံးက လင်းဖန်၏ ခေါင်းနှင့် ၁၀ စင်တီမီတာအကွာအဝေးသို့ လျင်မြန်စွာ ရောက်ရှိလာခဲ့သည်။ မျိုးဗီဇပြောင်းလဲသူ အလွန်အမင်း ဝမ်းသာသွားသည် သူက တစ်ဖက်လူ၏ ခေါင်းကို ကန်ပစ်လိုက်သည့် ပုံရိပ်ကို စိတ်ကူးထဲတွင် မြင်ယောင်နေပြီး ဖြစ်သည်။ သူ့အပြုံးက ပိုမို ကျယ်ပြန့်လာခဲ့သည်။ ဒါပေမဲ့ နောက်တစ်စက္ကန့်မှာတော့ သူ့အပြုံးက ဖြည်းည်းစွာ ပျောက်ကွယ်သွားခဲ့ရသည်။ သူ့ခြေသလုံးက လင်းဖန်၏ ခေါင်းနှင့် ၁၀ စင်တီမီတာအကွာတွင် ရပ်တန့်သွားခဲ့ပြီး ရှေ့သို့ တစ်လက်မမျှပင် ဆက်လက် မရွေ့လျားနိုင်တော့ပေ ။ လင်းဖန်က သူ့ညာခြေကို ဘယ်လက်ဖြင့် ဖမ်းဆွဲထားရင်း အမူအရာက အေးအေးလူလူပင် ဖြစ်နေသည်။ "သူက လူကို ရိုက်နှက်ဖို့ အင်အားတောင် မရှိဘဲနဲ့ သူ့ကိုယ်သူ မျိုးဗီဇပြောင်းလဲသူလို့ ခေါ်နေသေးတယ်တ။" မျိုးဗီဇပြောင်းလဲသူ ကြောက်လန့်တကြား အမူအရာ ဖြစ်သွားသည် သူ့ခြေသလုံးက သံကြိုးဖြင့် သော့ခတ်ခံထားရသည့်အလား ဖြစ်နေပြီး တစ်လက်မမျှပင် မလှုပ်ရှားနိုင်တော့ပေ ။ "ကြည့်ကောင်းရုံပဲ ရှိပြီး အသုံးမကျတဲ့ကောင်။" လင်းဖန်က သာမန်ကာလျှံကာ ရယ်မောလိုက်သည်။ ထို့နောက် သူ လက်သီးတစ်ချက် ပစ်လိုက်သည်။ "ဒုန်း။" မျိုးဗီဇပြောင်းလဲသူ၏ ခေါင်းက ချက်ချင်း ပေါက်ကွဲထွက်သွားခဲ့ရပြီး သူသည် မိမိ၏ ရန်သူက ဘာဖြစ်လို့ ဤမျှ သန်မာနေရလဲဆိုတာကို လုံးဝ နားမလည်နိုင်ဘဲ သေဆုံးသွားခဲ့ရရှာသည်။

လင်းဖန် မျိုးဗီဇပြောင်းလဲသူတစ်ဦးကို သတ်ဖြတ်လိုက်သည့် အချိန်မှာပင်။ ရှောင်လီ၏ ဓားမြှောင်က မျိုးဗီဇပြောင်းလဲသူတစ်ဦး၏ လည်ပင်းကို အောင်မြင်စွာ ပိုင်းဖြတ်သွားခဲ့ရာ ဒဏ်ရာဆီကနေ အနက်ရောင် သွေးများ ပန်းထွက်လာခဲ့သည်။ နှစ်ဖက်စလုံး ထိပ်တိုက်တွေ့ဆုံလိုက်သည့် အခိုက်အတန့်မှာပင် မျိုးဗီဇပြောင်းလဲသူ နှစ်ဦး ကျဆုံးသွားခဲ့ရသည်။ နောက်ကနေ စောင့်ကြည့်နေသည့် ဘရုစ် မျက်မှောင် အနည်းငယ်ကျုံ့လိုက်သည် သူ အန္တရာယ်ရှိသော အငွေ့အသက်ကို ခံစားလိုက်ရသည်။ မျက်နှာချင်းဆိုင်ရှိ လူက သူစိတ်ကူးထားတာထက် ပိုမို သန်မာနေပုံရသည်။ သူ စဉ်းစားနေသည့် စက္ကန့်ပိုင်းအတွင်းမှာပင် ကွင်းပြင်ထဲက မျိုးဗီဇပြောင်းလဲသူ အရေအတွက်က နောက်ထပ် လေးဦး ထပ်မံ လျော့နည်းသွားခဲ့ပြန်သည်။ ဆန့်ကျင်ဘက်အနေဖြင့် လင်းဖန်နှင့် ရှောင်လီတို့သည် လူသတ်ရင်း စကားစမြည် ပြောဆိုနေကြသည်။ "ရှောင်လီ မင်း ကြားပြီးပြီလား။ ဆင်ဘာက ပြန်လည် နိုးထလာတော့မယ်တဲ့။" လင်းဖန် သူ့လက်ပေါ်က သွေးများကို ခါထုတ်လိုက်သည်။ "သူက အမြဲတမ်း ပြန်လည် နိုးထနေတာပဲ ဒါက သတင်းအထူးအဆန်းမှ မဟုတ်တာ။ သူက မြောက်ပိုင်းက အစ်မကြီးယုရဲ့ ဓာတ်ပုံအယ်လ်ဘမ်လောက် ကျွန်တော့်ရဲ့ အာရုံစိုက်မှုကို မဆွဲဆောင်နိုင်ပါဘူး။" ရှောင်လီက ပေါ့ပေါ့ပါးပါး လူတစ်ယောက်ကို သတ်ဖြတ်လိုက်ရင်း တည်ငြိမ်စွာ ပြောလိုက်သည်။ "မြောက်ပိုင်းက အစ်မကြီးယုရဲ့ ဓာတ်ပုံအယ်လ်ဘမ် ဟုတ်လား။" လင်းဖန်က မြေအောက်ရထားပေါ်က အဘိုးကြီးတစ်ယောက်လို အမူအရာမျိုးဖြင့် သူ့ကို ကြည့်လိုက်သည် "မင်းက တကယ်ကို ငတ်မွတ်နေတာပဲ ဘာမဆို စားနိုင်တယ်ပေါ့။" သူတို့နှစ်ဦး စကားပြောနေကြစဉ်မှာပင် ကျန်ရှိနေသည့် မျိုးဗီဇပြောင်းလဲသူ လေးဦးကိုလည်း ကိုင်တွယ်ဖြေရှင်းပြီး သွားကြပြီ ဖြစ်သည်။ သူတို့နှစ်ဦးသည် သူတို့၏ အကြည့်ကို ဘရုစ်ထံသို့ လှည့်လိုက်ကြသည်။ ဘရုစ် ချက်ချင်းပင် ကျောရိုးထဲကနေ စိမ့်တက်သွားသလို ခံစားလိုက်ရပြီး နဖူးကနေ ချွေးစေးများ စီးကျလာခဲ့ရသည်။ "မင်းတို့က... မင်းတို့က မိစ္ဆာတွေလား။" ဘရုစ် တံတွေး အမြုံ့မြုံ့မျိုလိုက်မိသည်။ လင်းဖန် မျက်စိတစ်မှိတ်အတွင်း သူ့ဘေးနားသို့ ပေါ်လာခဲ့ပြီး သူ့လည်ပင်းကို ဖမ်းဆွဲကာ သူ့ခန္ဓာကိုယ်ကို လေထဲသို့ မြှောက်တင်လိုက်သည်။ "စုယွန်းဖေး ဘယ်မှာလဲ။" ဘရုစ်၏ မျက်နှာ နီရဲလာခဲ့ပြီး သူ့ခြေထောက်များက လေထဲတွင် ယမ်းခါနေကာ မျက်လုံးများထဲတွင် ကြောက်လန့်ရိပ်များ ပြည့်နှက်နေသည်။ လင်းဖန်က သူ့ကို မြေပြင်ပေါ်သို့ ပေါ့ပေါ့ပါးပါး ပစ်ချလိုက်သည်။ "အဟွတ်... အဟွတ် ဟွတ်... ကျွန်တော်တို့ သူဌေးက အနီးနားမှာ ရှိပါတယ်။" ဘရုစ် အလွန်အမင်း ကြောက်လန့်သွားသဖြင့် ဘာမှ မဖုံးကွယ်ရဲတော့ပေ ။ သူက သူ့ဘေးနားရှိ တောင်ကုန်းအနိမ့်လေးကို ညွှန်ပြကာ တုန်ရင်စွာ ပြောလိုက်သည် "သူက ကျွန်တော်တို့ရဲ့ လှုပ်ရှားမှုတွေကို စောင့်ကြည့်ဖို့ အဲ့ဒီတောင်ထိပ်ပေါ်မှာ ရှိနေရပါမယ်။" လင်းဖန် ချက်ချင်းပင် သူညွှန်ပြသည့် ဘက်သို့ လှည့်ကြည့်လိုက်သည်။ သူတို့က ကီလိုမီတာဝက်ခန့် ကွာဝေးနေကြသော်လည်း သူ့၏ မယုံနိုင်လောက်အောင် ကောင်းမွန်လှသော အမြင်အာရုံကြောင့် တောင်ထိပ်ပေါ်က လူရိပ်အချို့ကို လျင်မြန်စွာ သတိပြုမိသွားသည်။ လင်းဖန်၏ နှုတ်ခမ်းများက ချက်ချင်းပင် အပြုံးတစ်ခုအဖြစ် တွန့်ကွေးသွားခဲ့သည်။

ထိုအချိန်မှာပင်။ မှန်ပြောင်းကို ကိုင်ဆောင်ထားသည့် စုယွန်းဖေးနှင့် လင်းဖန်တို့၏ မျက်လုံးများက ချက်ချင်း ဆုံတွေ့သွားခဲ့ကြသည်။ စုယွန်းဖေး လင်းဖန်၏ စူးရှလှသော အကြည့်အောက်တွင် ကျောရိုးထဲကနေ စိမ့်တက်သွားသလို ခံစားလိုက်ရသည် မသက်မသာ ဖြစ်ရသည့် ခံစားချက်က အဆိပ်ပြင်းမြွေတစ်ကောင်၏ စိုက်ကြည့်ခြင်းကို ခံရသလိုမျိုး ဖြစ်နေသည်။ သူသည် မိမိကိုင်ထားသည့် မှန်ပြောင်းကို ချက်ချင်းပင် အောက်သို့ ချလိုက်သည်။ "သောက်ကျိုးနည်း သူ ငါ့ကို သတိပြုမိသွားပြီ။" "ပြေးကြစမ်း။" သူ့ဘေးနားရှိ သက်တော်စောင့် တစ်ဒါဇင်ကျော်သည် စုယွန်းဖေးကို ခြံရံကာ တောင်အောက်သို့ လျင်မြန်စွာ ခေါ်ဆောင်သွားကြတော့သည်...

...

လင်းဖန် သူ့အကြည့်ကို ပြန်ရုပ်သိမ်းလိုက်ပြီး မြေပြင်ပေါ်က ဘရုစ်ကို ငုံ့ကြည့်လိုက်သည်။ "ကျေးဇူးပြုပြီး ကျွန်တော့်ကို မသတ်ပါနဲ့ ကျွန်တော် တောင်းပန်ပါတယ်။" ဘရုစ် မြေပြင်ပေါ်တွင် ဒူးထောက်ကာ တိုးလျှိုးရှာသည် "ကျွန်တော် ခင်ဗျားဆီကို လာပြီး ခင်ဗျားကို စုယွန်းဖေးကို သတ်ဖို့ ကူညီပေးနိုင်ပါတယ် ခင်ဗျားသာ..." "ဒုန်း။" လင်းဖန်က သူ့ကို စကားအပိုတွေ ပြောမနေတော့ဘဲ သူ့ခေါင်းကို ချက်ချင်း ခြေမှုန်းပစ်လိုက်သည်။ "နောက်ကျရင် ငါတို့ ဘာဆက်လုပ်မလဲ။" ရှောင်လီက လင်းဖန်ကို မေးမြန်းလိုက်သည်။ လင်းဖန် မြေပြင်ပေါ်တွင် ပြန့်ကျဲနေသော အလောင်းများကို ကြည့်လိုက်ပြီးနောက် စုတ်ပြတ်သတ်နေသည့် စက်ရုံကြီးထံသို့ သူ့အကြည့်ကို လှည့်လိုက်သည်။ "လောင်စာဆီတွေကို အရင်ဆုံး သွားသိမ်းဆည်းမယ် ပြီးမှ စုယွန်းဖေးနောက်ကို လိုက်မယ်။" လင်းဖန် မြေပြင်ပေါ်တွင် သေချင်ယောင်ဆောင်နေကြသည့် ဂျာကင်အရှည်နှင့်လူနှင့် နေကာမျက်မှန်နှင့်လူတို့၏ အနားသို့ လျှောက်သွားကာ သူတို့ကို စက်ရုံထဲသို့ သယ်ဆောင်သွားခဲ့သည်။ ဤအခိုက်အတန့်တွင် စောင့်ကြည့်ရေး ဗီဒီယိုမှတ်တမ်းကို ကြည့်နေသည့် လုံကျန့်ထျန်းမှာမူ လုံးဝ မှင်တက်သွားခဲ့ရပြီ ဖြစ်သည်...