ကုချင်း၀မ်သည် သူမ၏ စိတ်ထဲတွင် လုချန်အား "လူဆိုးကောင်" ဟု နောက်တစ်ကြိမ် ထပ်မံကျိန်ဆဲလိုက်ပြီးနောက် သူ့ကို ဆက်၍ အာရုံမစိုက်တော့ဘဲ ရှေ့သို့ လျှောက်လှမ်းလာသော ချင်းဟူ ဧကရီထံသို့သာ အကြည့်ပို့လိုက်တော့သည်။
သင်းပျံ့သော ရနံ့ဆန်းတစ်ခု လေထဲတွင် ဝေ့ဝဲလာ၏။ ကုချင်း၀မ်သည် ဝန်းရံလျက် ဒူးထောက်နေကြသော လူအုပ်ကြီးကို တည်ငြိမ်အေးစက်သော မျက်နှာပေးဖြင့် ကြည့်ကာ မိန့်တော်မူလိုက်သည်။
"ထကြလော့”
ထိုသို့မိန့်ဆိုပြီးနောက် ကုချင်း၀မ်သည် တည်ငြိမ်သော အမူအရာဖြင့်ပင် လုချန်ကို ခေါ်ဆောင်ကာ ချင်းဟူ ဧကရီ၏ ဘေးမှ ဖြတ်ကျော်၍ မဟာရင်ပြင်၏ အရှေ့ဘက်ဆီသို့ ဦးတည်လျှောက်လှမ်းသွားခဲ့သည်။
ချင်းဟူ ဧကရီသည် ကုချင်း၀မ်၏ ဒီလို သဘောထားအပေါ် အနည်းငယ်မျှပင် အံ့သြခြင်းမရှိပေ။ တကယ်လို့ ကုချင်း၀မ်ကသာ သူမကို နူးညံ့ချိုသာစွာ စကားဆိုလာမည်ဆိုပါက တကယ့်ကို ထူးဆန်းနေမည် ဖြစ်သည်။
ချင်းဟူ ဧကရီသည်လည်း ကုချင်း၀မ်ကို ပြန်လည်ကြည့်ရှုခြင်းမပြုဘဲ ကုချင်း၀မ်၏ ဘေးတွင် လိုက်ပါလာသော လုချန်ကိုသာ စိုက်ကြည့်နေမိသည်။
လွန်ခဲ့သော ရက်အနည်းငယ်က ယောင်ချီ သန့်စင်နယ်မြေအတွင်း တည်ငြိမ်အေးချမ်းနေခဲ့သော်လည်း ပြင်ပရှိ နန်ချင်းကျန့်ပြည်နယ်တစ်ခုလုံးမှာမူ ကြီးမားသော လှုပ်ခတ်မှုကြီးတစ်ခုကြောင့် ဆူညံပွက်လောရိုက်နေခဲ့ပြီ ဖြစ်သည်။
ယောင်ချီ သန့်စင်နယ်မြေတွင် သူတော်စင်အဆင့် ဆေးလုံးများကို ဖော်စပ်နိုင်သော ဆေးလုံးပညာရှင်အသစ်တစ်ဦး ပေါ်ထွန်းလာခဲ့သည်ဟူသော သတင်းကို နန်ချင်းကျန့်ပြည်နယ်တစ်ခုလုံး သိရှိသွားကြပြီ ဖြစ်၏။
ယခုအခါ နန်ချင်းကျန့်ပြည်နယ်ရှိ ထိပ်သီးဂိုဏ်းကြီးများအားလုံးသည် ထိုဆေးလုံးပညာရှင်၏ နောက်ကြောင်းကို စုံစမ်းစစ်ဆေးနေကြသည်။
သို့သော်လည်း စုံစမ်းရရှိသော ရလဒ်များအပေါ် မည်သူမျှ စိတ်ကျေနပ်မှု မရှိကြချေ။ အကြောင်းမှာ ထိုသတင်းအချက်အလက်များတွင် ထိုဆေးလုံးပညာရှင်သည် အလွန်တရာ ငယ်ရွယ်ပြီး လူ့လောကသို့ ဆင်းသက်လာသော နတ်မင်းတစ်ပါးပမာ နှိုင်းယှဉ်ဖွယ်မရှိ ချောမောလှပသူ ဖြစ်သည်ဟုသာ ဖော်ပြထားသောကြောင့် ဖြစ်သည်။
ထို့ပြင် သူသည် ယခင်က ယောင်ချီ သန့်စင်နယ်မြေတွင် ဆယ်စုနှစ်တစ်ခုကြာ အောင်မြင်မှုတစ်စုံတစ်ရာမရှိတဲ့ သာမန်လူသားတစ်ဦးသာ ဖြစ်သည်ဟု ဆိုသည်။
ထိုသတင်းကို မည်သူမျှ မယုံကြည်ကြဘဲ၊ ဒါက လွန်ခဲ့သော နှစ်ပေါင်းတစ်သောင်းကတည်းက ကုချင်း၀မ် ကြိုတင်ချမှတ်ထားခဲ့သော ထောင်ချောက်တစ်ခု ဖြစ်နိုင်မလားဟုသာ လူတိုင်းက တွေးတောနေကြသည်။
ချင်းဟူ ဧကရီသည် လုချန်ကို မြင်လိုက်ရသည့် ခဏမှာပင် ကုချင်း၀မ်၏ ဘေးတွင် ရပ်နေသော ထိုလူငယ်သည် ထိုပါရမီရှင် ဆေးလုံးပညာရှင် လုချန် ဖြစ်ရမည်ဟု အသေအချာ သိရှိသွားခဲ့သည်။
သူ၏ ထူးကဲလွန်းသော ရုပ်ရည်ရူပကာကို ကြည့်ရုံမျှဖြင့်ပင် ခန့်မှန်းရန် လုံလောက်လှပေသည်။ ထို့ပြင် ယောင်ချီ သန့်စင်နယ်မြေတွင် ယောက်ျားသား တပည့်တစ်ဦးတည်းသာ ရှိပြီး၊ အရိုးထဲအထိ အေးစက်လှသော ကုချင်း၀မ်သည် သာမန်လူတစ်ဦးကို သူမ၏ အနီးနားသို့ အနီးကပ် နေခွင့်ပြုမည် မဟုတ်ချေ။
ကုချင်း၀မ်၏ နောက်မှ လိုက်ပါလာရင်း လုချန်သည် ကုချင်း၀မ်၏ အေးစက်သော သဘောထားကို ထူးဆန်းသည်ဟု မထင်မှတ်မိပေ။
သူသည် ကုချင်း၀မ်နှင့် ချင်းဟူ ဧကရီတို့အကြားရှိ သမိုင်းကြောင်းကို အနည်းငယ် သိရှိထားသည် သူတို့နှစ်ဦးသည် တကယ့်ကို ပြိုင်ဘက်ဟောင်းကြီးများ၊ ကမ္ဘာမီးလောင်လည်း မတည့်နိုင်သော လူများ ဖြစ်ကြ၏။
လွန်ခဲ့သော နှစ်ပေါင်းတစ်သောင်းက ဝမ်တန့် ဂိုဏ်းသည် ယောင်ချီ သန့်စင်နယ်မြေကို အမြဲတစေ ဆန့်ကျင်နေခဲ့သော်လည်း ၎င်းက အသေးအဖွဲ လှည့်ကွက်များ သက်သက်သာ ဖြစ်သည်။
ယောင်ချီ သန့်စင်နယ်မြေရော ကုချင်း၀မ်ပါ ဝမ်တန့်ဂိုဏ်းကို စိတ်ထဲမထားခဲ့သလို၊ ကျိီးယန် သို့မဟုတ် ဝမ်တန့်ဂိုဏ်းကို သူတို့၏ ပြိုင်ဘက်အဖြစ် မသတ်မှတ်ခဲ့ကြချေ။ ကုချင်း၀မ်၏ ပြိုင်ဘက်အဖြစ် သတ်မှတ်ရန် ထိုက်တန်သော တစ်ဦးတည်းသော ပုဂ္ဂိုလ်မှာ ချင်းဟူ ဧကရီ ဆုလီယန် သာ ဖြစ်သည်။
ကြိုတင်ပြင်ဆင်ထားသော ရွှေနဂါးဧကရီပလ္လင်ထံသို့ လျှောက်လှမ်းသွားပြီးနောက် ကုချင်း၀မ်သည် သူမ၏ ဖြူလွလွ ဝတ်စုံလက်အင်္ကျီရှည်ကို ခါထုတ်ကာ လှပစွာ ထိုင်လိုက်တော့သည်။ လုချန်သည် လိမ္မာပါးနပ်စွာဖြင့်ပင် ဘေးတွင် ရပ်နေသော ယောင်ချီ ဂိုဏ်းချုပ်၏ အနီးသို့ တိုက်ရိုက် လျှောက်လှမ်းသွားခဲ့၏။
ကုချင်း၀မ် ထိုင်လိုက်ပြီးနောက် တစ်ဖက်ရှိ ဆုလီယန်၏ နောက်ကွယ်တွင်လည်း တောက်ပသော ရွှေရောင်အလင်းတန်းများ ဖြာထွက်လာပြီး ဧကရီပလ္လင်တစ်ခု ထွက်ပေါ်လာသည်။
ဧကရီနှစ်ပါးသည် တစ်ချိန်တည်း၌ပင် ထိုင်လိုက်ကြပြီး တည်ငြိမ်သော မျက်နှာပေးများဖြင့် တစ်ဦးကိုတစ်ဦး စိုက်ကြည့်နေကြတော့သည်။
အမှန်တော ကုချင်း၀မ်နှင့် ဆုလီယန်တို့သည် ဆန့်ကျင်ဘက် အစွန်းနှစ်ဖက်ပမာ ဖြစ်ကြသည်။
ကုချင်း၀မ်သည် ပန်းမန်များကြားရှိ ရိုးရှင်းသော ဝတ်စုံဖြင့် နတ်ဘုရားမတစ်ပါးကဲ့သို့ သန့်စင်မြင့်မြတ်သော အရှိန်အဝါ ရှိပြီး၊ ဆုလီယန်မှာမူ ဆွဲဆောင်မှုရှိသော ပြင်ဆင်မွမ်းမံမှုများနှင့် ဇိမ်ခံဝတ်စုံများဖြင့် ညှို့ဓာတ်ပြင်းကာ လှပဆန်းပြားလွန်းလှသည်။
အဝေးရှိ ဆုလီယန်ကို ကြည့်ရင်း ကုချင်း၀မ်က ယောင်ချီ သန့်စင်နယ်မြေ၏ ဧကရီပီပီ တည်ငြိမ်စွာ မေးလိုက်သည်။
"ဒီတစ်ခေါက် လာတာက လျှို့ဝှက်နယ်မြေကိစ္စကြောင့် မဟုတ်လား"
ကုချင်း၀မ်၏ စကားကို ကြားသောအခါ ဧကရီပလ္လင်ပေါ်တွင် ဘေးစောင်းမှီလျက် ထိုင်နေသော ဆုလီယန်က စွဲမက်ဖွယ်ကောင်းသော အပြုံးတစ်ခုကို ဖော်ပြကာ ပြောလိုက်သည်။
"နင်ကတော့ လုံးဝမပြောင်းလဲသေးဘူးပဲ... စကားစတာနဲ့ လိုရင်းကို တန်းပြောတာပဲ”
"အဲဒါဆိုရင်လည်း ငါ စကားတွေ အများကြီး ပြောမနေတော့ဘူး ဒီလျှို့ဝှက်နယ်မြေအတွက် အားအကောင်းဆုံး ဂိုဏ်းနှစ်ခုက ယောင်ချီ သန့်စင်နယ်မြေနဲ့ ချန်ရှန့်တောင်ပဲ… နင်နဲ့ငါ့အတွက်တော့ တစ်ယောက်က တစ်ယောက်ရဲ့ အားအကောင်းဆုံး ပြိုင်ဘက်ပဲလေ”
"ဒါပေမဲ့... ငါတို့က ရန်သူတွေလို ဆက်ဆံနေစရာ မလိုပါဘူး ငါတို့သာ ပူးပေါင်းမယ်ဆိုရင် ဒီလျှို့ဝှက်နယ်မြေထဲမှာ ဘယ်သူမှ တားဆီးနိုင်မှာ မဟုတ်သလို၊ အကြီးမားဆုံး အနိုင်ရရှိသူတွေ ဖြစ်လာမှာပဲ"
ဆုလီယန်၏ စကားကို ကြားပြီးနောက် ကုချင်း၀မ်က အေးစက်စွာ ပြန်လည်ပြောကြားလိုက်သည်။
"ကောင်းပြီ... ယောင်ချီ သန့်စင်နယ်မြေက ချန်ရှန့်တောင်နဲ့ ပူးပေါင်းမယ်”
ဆုလီယန် သူမ၏ လူများနှင့်အတူ ချန်ရှန့်တောင်မှ ထွက်ခွာလာခဲ့ကတည်းက ကုချင်း၀မ်သည် ဆုလီယန် ဘာလုပ်ချင်သည်ကို သိရှိထားပြီး ဖြစ်သည်။ ထို့ပြင် ကုချင်း၀မ်၏ စိတ်ထဲတွင်လည်း အဖြေရှိပြီးသား ဖြစ်၏။
ကုချင်း၀မ် သိချင်သည်မှာ... ယခုအခါ ဧကရာဇ်အဆင့်သို့ တက်လှမ်းအောင်မြင်ထားပြီး ယခင်က သူမအား ရန်သူဟောင်းကြီးအဖြစ် သတ်မှတ်ခဲ့သော ဆုလီယန်သည် လျှို့ဝှက်နယ်မြေအတွက် မဟာမိတ်ဖွဲ့ရန် ကိုယ်တိုင်ကိုယ်ကျ လာရောက်ဆွေးနွေးခြင်း ဖြစ်သည်။
ဒါက ထိုလျှို့ဝှက်နယ်မြေသည် သာမန်မဟုတ်ကြောင်း သက်သေပြရန် လုံလောက်လှပေသည် ဆုလီယန်သည် လျှို့ဝှက်နယ်မြေနှင့် ပတ်သက်၍ တစ်စုံတစ်ခုကို ကြိုတင်သိရှိထားခြင်း ဖြစ်ရမည်။
ကုချင်း၀မ်အနေဖြင့် ထိုလျှို့ဝှက်နယ်မြေအကြောင်းကို မသိရှိချေ။
လွန်ခဲ့သော နှစ်ပေါင်းတစ်သောင်းအတွင်း ယောင်ချီ သန့်စင်နယ်မြေသည် ဆုတ်ယုတ်လာခဲ့ပြီး အားအကောင်းဆုံး ဂိုဏ်းကြီးများစာရင်းမှ နှုတ်ထွက်ခဲ့ရသည်မှာ ကြာပြီဖြစ်ရာ၊ လက်ရှိ ယောင်ချီ သန့်စင်နယ်မြေအနေဖြင့် လက်လှမ်းမမီနိုင်သော အရာများစွာ ရှိနေခဲ့သည်။
သို့သော် ဆုလီယန်ကြောင့် ချန်ရှန့်တောင်သည် အမြဲတစေ အားအကောင်းဆုံး ဂိုဏ်းကြီးများထဲတွင် ပါဝင်နေခဲ့သဖြင့် သူမသည် အတွင်းပိုင်း လျှို့ဝှက်ချက်အချို့ကို သေချာပေါက် သိရှိထားပေလိမ့်မည်။
သို့ရာတွင် ဒီလို လူအများရှေ့ အခမ်းအနားတွင် ထိုအကြောင်းအရာကို ဆွေးနွေး၍ မရနိုင်ပေ ပြီးသွားမှ သူမ သေသေချာချာ မေးမြန်းရပေမည်။
ထို့ပြင် ယခုကိစ္စကလည်း မပြီးဆုံးသေးချေ။
ကုချင်း၀မ်က အလွန်လျင်မြန်စွာ သဘောတူလိုက်သဖြင့် ဆုလီယန်သည် အံ့သြခြင်းမရှိဘဲ ညှို့ဓာတ်ပြင်းစွာ ရယ်မောလိုက်ပြီးနောက် ကုချင်း၀မ်ကို စိုက်ကြည့်ကာ ပြောလိုက်သည်။
"ဒါပေမဲ့... ပူးပေါင်းဆောင်ရွက်တာဆိုပေမဲ့ ဘယ်သူက အဓိကလဲ၊ ဘယ်သူက အရန်လဲဆိုတာ ခွဲခြားဖို့ လိုသေးတယ်လေ။ လျှို့ဝှက်နယ်မြေကနေ ရလာတဲ့ ရတနာတွေကို ဘယ်လိုခွဲဝေမလဲ တကယ်လို့ လျှို့ဝှက်နယ်မြေထဲမှာ သဘောထားကွဲလွဲမှုတွေ ရှိလာရင် ဘယ်သူ့စကားကို နားထောင်ရမလဲ ဒါတွေကို ကြိုတင်ပြီး သဘောတူညီချက် ရယူထားရမယ်”
’လာပြီပဲ... ဒါက အရေးကြီးဆုံး အချက်ပဲ’
ကုချင်း၀မ်သည် တည်ငြိမ်စွာဖြင့်ပင် ကောက်ကျစ်စဉ်းလဲသော အမူအရာရှိလှသည့် ဆုလီယန်ကို ကြည့်ကာ ပြောလိုက်သည်။
"တည့်တည့်ပဲပြော နင် တကယ် စိတ်ဝင်စားနေတာက လွန်ခဲ့တဲ့ နှစ်ပေါင်းတစ်သောင်းက မပြီးဆုံးသေးတဲ့ ငါတို့ပြိုင်ပွဲ မဟုတ်လား"
ကုချင်း၀မ်၏ စကားကို ကြားသောအခါ ဆုလီယန်သည် သူမ၏ လှပသော မေးစေ့လေးကို အနည်းငယ် ပင့်တင်လိုက်ရင်း ကုချင်း၀မ်ကို စိုက်ကြည့်ကာ ပြောလိုက်သည်။
"မှန်တာပေါ့…ဒီနေ့တော့ အဲဒီမပြီးဆုံးသေးတဲ့ ပြိုင်ပွဲကို အဆုံးသတ်ကြစို့…ဘယ်သူနိုင်မလဲ... နိုင်တဲ့သူရဲ့ စကားကို နားထောင်ကြေး"
ကုချင်း၀မ်က မျက်မှောင်ကြုတ်လိုက်ပြီး ပြောလိုက်သည်။
"အခုအချိန်မှာ ငါတို့ ဘယ်လိုပြိုင်ကြမှာလဲ ငါတို့နှစ်ယောက်စလုံးက ဧကရာဇ်အဆင့်တွေပဲ တကယ်လို့ တကယ်သာ တိုက်ခိုက်ကြမယ်ဆိုရင် နန်ချင်းကျန့်ပြည်နယ်ရဲ့ တစ်ဝက်လောက်ဟာ ပျက်စီးသွားလိမ့်မယ်…ဒါ့အပြင် လျှို့ဝှက်နယ်မြေကလည်း မကြာခင် ပွင့်တော့မှာ... ဘယ်သူပဲ ဒဏ်ရာရရ ဆုံးရှုံးမှုပဲ မဟုတ်လား"
ကုချင်း၀မ်သည် မတိုက်ခိုက်လိုပေ။
လွန်ခဲ့သော နှစ်ပေါင်းတစ်သောင်းက ပြိုင်ပွဲသည် ဓားသိုင်းအတတ်ပညာနှင့် ပတ်သက်ခြင်း ဖြစ်ပြီး ဆုလီယန်မှာ ဓားသိုင်းရူးသွပ်သူတစ်ဦး ဖြစ်သည်။
လွန်ခဲ့သော နှစ်ပေါင်းတစ်သောင်းအတွင်း သူမ၏ ဓားသိုင်းစွမ်းရည်သည် စိတ်ကူးမယဉ်နိုင်လောက်သော အဆင့်သို့ ရောက်ရှိနေပြီ ဖြစ်ရမည်။
ကုချင်း၀မ်မှာမူ နှစ်ပေါင်းတစ်သောင်းလုံး တံခါးပိတ်ကျင့်ကြံနေခဲ့ပြီး နယ်ပယ်အဆင့်ကိုသာ တက်လှမ်းနိုင်ခဲ့ခြင်း ဖြစ်သည်။
ဓားသိုင်းနှင့် ပတ်သက်၍မူ ဧကရာဇ်အဆင့်သို့ တက်လှမ်းစဉ်က နားလည်သဘောပေါက်ခဲ့သော ဓားကွက်မှလွဲ၍ အခြား တိုးတက်မှု မရှိခဲ့ချေ။
ဆုလီယန်က ဒီလောက် ယုံကြည်မှုအပြည့်ဖြင့် ကမ်းလှမ်းလာခြင်း ဖြစ်သဖြင့် ဓားသိုင်းပညာတွင် သူမအား သာလွန်နိုင်သည်ဟု သေချာပေါက် ယုံကြည်ချက် ရှိနေ၍ ဖြစ်ရမည်။
ထို့ပြင်... ကုချင်း၀မ်သည် အစစ်အမှန် ဧကရီတစ်ပါး မဟုတ်သေးချေ။ တကယ်လို့ တိုက်ခိုက်မှု စတင်လိုက်သည်နှင့် သူမ၏ အားနည်းချက်က ပေါ်လွင်သွားပေလိမ့်မည်။ လုချန်က သူမ၏ မိစ္ဆာနှလုံးသားကို မကုသပေးနိုင်သေးသရွေ့ ကုချင်း၀မ်သည် တိုက်ခိုက်မည်မဟုတ်ပေ။
ဆုလီယန်သည် ကုချင်း၀မ်အနေဖြင့် ထိုအကြောင်းပြချက်ကို(ဧကရာဇ်အဆင့်နှစ်ယောက်တိုက်တာကိုဆိုလို) အသုံးပြုလိမ့်မည်ဟု ကြိုတင်ခန့်မှန်းထားပုံရသည်။
ကုချင်း၀မ်၏ စကားဆုံးသည်နှင့် ဆုလီယန်က တိုက်ရိုက်ပင် ပြောလိုက်သည်။
"ငါတို့ အသေအလဲ တိုက်ခိုက်နေစရာ မလိုပါဘူး နင်နဲ့ငါ တစ်ယောက်ကို တစ်ခုစီ အားအကောင်းဆုံး ဓားသိုင်းကွက်ကို ထုတ်ဖော်ပြကြမယ် ဘယ်သူက ပိုပြီး အားကောင်းလဲဆိုတာ တစ်ချက်ကြည့်ရုံနဲ့ သိနိုင်သလို၊ ဒီမှာရှိနေတဲ့ တပည့်တွေကိုလည်း အဲဒီထဲမှာရှိတဲ့ 'ဓားစိတ်ဆန္ဒ'ကို လေ့လာမှတ်သားခွင့် ရစေတာပေါ့... ဒါက ပိုပြီး မကောင်းဘူးလား"
ဆုလီယန် စကားပြောပြီးသောအခါ ကုချင်း၀မ်၏ မျက်ဝန်းထဲတွင် အလင်းတန်းတစ်ခု ဖြတ်သန်းသွားခဲ့သည်။ သူမ ခန့်မှန်းမိလိုက်ပြီ ဖြစ်၏။
ဒါက ကုချင်း၀မ်အနေဖြင့် လုချန်ကို ခေါ်ဆောင်လာခဲ့ရသည့် အဓိက အကြောင်းရင်းပင် ဖြစ်သည်။
ကုချင်း၀မ်သည် ဆုလီယန်က ဒီလိုနည်းလမ်းကို အသုံးပြုလိမ့်မည်ဟု ခန့်မှန်းထားခဲ့သဖြင့် လုချန်ကို လာရောက်ကြည့်ရှုရန် ခေါ်ဆောင်လာခဲ့ခြင်း ဖြစ်သည်။
တကယ်လို့ ဒီလို သိုင်းကွက်ပြိုင်ပွဲမျိုးသာ ဆိုပါက ကုချင်း၀မ်သည် သူမ ဧကရာဇ်အဆင့်သို့ တက်လှမ်းစဉ်က ဖန်တီးခဲ့သော ဓားသိုင်းကွက်အပေါ် အလွန်ပင် ယုံကြည်မှု ရှိလှပေသည်။
သိုင်းကွက်အလှနှင့် အစွမ်းကိုသာ ကြည့်မည်ဆိုပါက သူမ မည်သည့်အခါမျှ ရှုံးနိမ့်လိမ့်မည်မဟုတ်ဟု ကုချင်း၀မ် ခံစားမိသည်။
ထို့ကြောင့် ဆုလီယန် စကားပြောပြီးသည်နှင့် ကုချင်း၀မ်၏ နှုတ်ခမ်းထောင့်တွင် သတိမထားမိနိုင်သော အပြုံးရိပ်လေးတစ်ခု ပေါ်ထွက်လာပြီး ချက်ချင်းပင် ခေါင်းမော့ကာ ပြောလိုက်သည်။
"ကောင်းပြီလေ"
ဆုလီယန်သည် စောင့်ဆိုင်းရန် စိတ်မရှည်နိုင်တော့ချေ။ ကုချင်း၀မ်၏ သဘောတူညီချက်ကို ကြားလိုက်ရသည်နှင့် သူမသည် မဟာရင်ပြင်၏ ဗဟိုချက်ဆီသို့ ချက်ချင်းပင် ရောက်ရှိသွားတော့သည်။
သူမ၏ ခန္ဓာကိုယ်အတွင်းမှ မသန့်စင်သော လေထုကို သက်ပြင်းတစ်ချက်အဖြစ် မှုတ်ထုတ်လိုက်ပြီးနောက် ၎င်း၏ ဓားသိုင်းကွက်ကို စတင်ထုတ်ဖော်ပြသလိုက်တော့သည်။
ဆုလီယန်၏ ပထမဆုံး ဓားကွက် စတင်ထွက်ပေါ်လာသောအခါ ကုချင်း၀မ်၏ မျက်ဝန်းထဲရှိ သတိမထားမိနိုင်သော အလင်းတန်းများ ပျောက်ကွယ်သွားပြီး အံ့သြတုန်လှုပ်မှုများအဖြစ်သို့ ပြောင်းလဲသွားတော့သည်။
ဆုလီယန်... တကယ်ကို အားကောင်းလွန်းလှပေသည်။