အခန်း (၂၁)

အူချီဟာ မျိုးနွယ်စု ရပ်ကွက်အတွင်း၌။

တားမြစ်ထားသော နယ်မြေအတွင်းရှိ ဖယောင်းတိုင်များမှာ ထွန်းညှိထားပြီး စာတန်းများ ရေးထိုးထားသော ကျောက်စာတိုင်ပေါ်သို့ မှိန်ဖျော့ဖျော့ အလင်းရောင်များ ကျရောက်နေသည်။

တံခါးအပြင်ဘက်တွင် အူချီဟာ မျိုးနွယ်စုဝင် နှစ်ဦးက တစ်ဖက်တစ်ချက်စီတွင် ကင်းစောင့်နေကြသည်။

ဖူဂါကူသည် လက်နှစ်ဖက်ကို နောက်ပစ်ကာ ကျောက်စာတိုင်ရှေ့တွင် ရပ်နေသည်။

သူသည် ရှီဆူအီ သေဆုံးသွားသည့် သတင်းကို မကြာသေးမီကပင် ကြားသိခဲ့ရသော်လည်း မျိုးနွယ်စုအတွင်းသို့ သတင်းမှာ မပျံ့နှံ့သေးပေ။

သို့သော် မနက်ဖြန် မနက်တွင်မူ လူတိုင်း သိရှိသွားပေလိမ့်မည်။

ရှီဆူအီ သေဆုံးခြင်းသည် အာဏာသိမ်းရန် ကြံစည်ထားသူများ၏ ယုံကြည်ချက်ကို တုန်လှုပ်သွားစေမည်မှာ သေချာသည်။ အစီအစဉ်မှာလည်း နောက်ထပ် အချိန်ဆွဲရဖွယ် ရှိသည်။

ဖူဂါကူ ကျောက်စာတိုင်ရှေ့တွင် အတွေးလွန်နေစဉ် သူ့နောက်က တံခါးကြီးမှာ ရုတ်တရက် ပွင့်ဟသွားသည်။

လေတိုက်ခတ်မှုကြောင့် ဖယောင်းတိုင်များ ငြိမ်းသွားပြီး အခန်းမှာ မှောင်မည်းသွားတော့သည်။

တံခါးမှတစ်ဆင့် ဝင်ရောက်လာသော လရောင်မှာသာ ထိုနေရာကို အနည်းငယ် လင်းစေသည်။

တံခါးဝတွင် ကြောင်မျက်နှာဖုံး တပ်ထားသူ တစ်ဦး ရပ်နေသည်။

သူ့ခြေရင်းတွင် ကင်းစောင့်နေသူ နှစ်ဦးမှာ မြေပြင်ပေါ်၌ လဲကျနေသည်—သူတို့ သေဆုံးသွားသည်လား၊ သတိလစ်သွားသည်လား မသိရပေ။

ဖူဂါကူ၏ ရင်ထဲ ထိတ်ခနဲ ဖြစ်သွားသည်။ သူသည် ထိုလူထံသို့ ကူနိုင်ဓားတစ်လက် ပစ်ပေါက်လိုက်ပြီး ရှေ့သို့ တိုးဝင်ကာ ပြတ်သားစွာ အော်လိုက်သည်။

"မင်း ဘယ်သူလဲ?!"

မျက်နှာဖုံးနှင့် အနက်ရောင် ဝတ်စုံ—သူသည် ရွာ၏ အန်ဘူ  အဖွဲ့ဝင်တစ်ဦး ဖြစ်ပုံရသည်။

ဒီလို အချိန်မျိုးမှာ ဒီလိုလူမျိုးက ဒီကို ဘာလာလုပ်တာလဲ?

ဒါက အူချီဟာတို့ရဲ့ တားမြစ်နယ်မြေ ဖြစ်သည်။ သူ ဒီလူကို အမြန်ဆုံး မောင်းထုတ်ရမည်။

ဟာတာကေး ဆာတိုရူက ဘာမျှ ပြန်မဖြေချေ။ သူသည် တိတ်ဆိတ်စွာပင် ကိုယ်ကို ရွေ့လျားလိုက်ပြီး ကူနိုင်ဓားနှစ်လက်လုံးကို အလွယ်တကူ ရှောင်ရှားလိုက်သည်။

အတွင်းသို့ ဝင်ရောက်ပြီးမှသာ သူသည် အခန်းထဲရှိ အရာအားလုံးကို အပြည့်အဝ ခံစားမိတော့သည်။

တစ်ခဏအတွင်းမှာပင် တားမြစ်နယ်မြေအတွင်းရှိ အရာဝတ္ထု တိုင်း၏ တည်နေရာကို သူ အတိုင်းသား မြင်ယောင်နေရသည်။

ဖူဂါကူ တိုးဝင်လာသည့်အချိန်တွင် ထိုလူမှာ ပျောက်ကွယ်သွားပြီး ဖူဂါကူ၏ နောက်ကျောတွင် ပြန်ပေါ်လာသည်။

ရှာရင်းဂန် ရှိသော်လည်း ဖူဂါကူအနေဖြင့် သူ့လှုပ်ရှားမှုကို လိုက်မမှီပေ။

နောက်ကို လိုက်စရာ ချာကရာ စီးဆင်းမှုမျိုးလည်း မရှိချေ။

ဖူဂါကူတွင် အပြည့်အဝ လှည့်ကြည့်ရန် အချိန်မရှိပေ။ တိုက်ခိုက်သူ၏ လက်ကို ရအောင် ဖမ်းဆွဲလိုက်ပြီး အားပြင်းပြင်းနှင့် ဆွဲချလိုက်သည်။

အရှိန်ကြောင့် မျက်နှာဖုံးတပ်ထားသူမှာ ဖူဂါကူ၏ ရှေ့တည့်တည့်သို့ ရောက်သွားသည်။

သွယ်လျသော လက်ကောက်ဝတ်ကို ကြည့်ခြင်းအားဖြင့် ထိုသူမှာ ၁၈ နှစ်ထက် မကျော်လွန်နိုင်ကြောင်း သိသာသည်။

သွက်လက်မြန်ဆန်သည်မှာ မှန်သော်လည်း လက်ပန်းလုံး တိုက်ခိုက်ရေးတွင် ကျွမ်းကျင်သော ကလေးတစ်ဦးသာ ဖြစ်သည်။

"ငယ်လွန်းပါသေးတယ်။"

ဖူဂါကူက ရေရွတ်လိုက်ပြီး မျက်နှာဖုံးနောက်က မျက်လုံးကို ရှာရင်ဂန်ဖြင့် စိုက်ကြည့်လိုက်သည်။

သို့သော် မျက်နှာဖုံးနောက်က မျက်လုံးများကို အနက်ရောင် အဝတ်ဖြင့် စည်းထားသည်ကို မြင်လိုက်ရသည့်အခါ သူ အံ့အားသင့်သွားသည်။ သူ ဖူဂါကူနှင့် မျက်လုံးချင်း မဆုံနိုင်ချေ။

"ဖြစ်နိုင်ပါ့မလား!"

ဖူဂါကူ၏ မျက်လုံးများ ပြူးကျယ်သွားသည်။

အူချီဟာ နယ်မြေထဲကို ခိုးဝင်လာသူတိုင်း ရှာရင်းဂန်ကို ရင်ဆိုင်နိုင်မည့် နည်းလမ်း ရှိရမည်။

သို့သော် ဒီလူကတော့ သူ့ပတ်ဝန်းကျင်ကိုတောင် မမြင်ရဘဲနဲ့!!

ထိုသို့ တုံ့ဆိုင်းနေသည့် ခဏလေးအတွင်းမှာပင် ဟာတာကေး ဆာတိုရူက နောက်သို့ အနည်းငယ် လှည့်လိုက်ပြီး ဖူဂါကူကို အားပြင်းပြင်းနှင့် ကန်လိုက်ရာ သူ နောက်သို့ လွင့်စဉ်သွားသည်။

"အူး!"

ဖူဂါကူ အသံထွက်ကာ နောက်သို့ အနည်းငယ် ဆုတ်ယုတ်သွားသည်။

ဟာတကေး ဆာတိုရူမှာ တိုက်ခိုက်ရန် ရောက်လာခြင်း မဟုတ်ပေ။ အကွာအဝေး အနည်းငယ် ရသည်နှင့် သူသည် တားမြစ်နယ်မြေ၏ အနက်ရှိုင်းဆုံးနေရာသို့ တန်း၍ ပြေးဝင်သွားသည်။

ဖူဂါကူ သွားကို ကြိတ်လိုက်သည်။ အတွင်းဘက်ရှိ ကျဉ်းမြောင်းသော နေရာက သူ့ကို တိုက်ခိုက်ရ ခက်ခဲစေသည်။ အရာဝတ္ထုများ များပြားလွန်းနေသည်။

"ကျိန်ဆဲဖို့ကောင်းလိုက်တာ။"

ဒီလူကို ဝင်လာခိုင်းမိတာက သူ လုံးဝ မမျှော်လင့်ထားသည့် ကိစ္စဖြစ်သည်။

တားမြစ်နယ်မြေကို လုံခြုံရေး အထူးတင်းကြပ်စွာ ချထားခြင်း ဖြစ်သည်။ ပြင်ပလူ မည်သူမျှ မဝင်နိုင်ခဲ့ဖူးချေ။

သို့သော် ဒီလူကတော့ မျက်လုံးစည်းထားလျက်နဲ့ လုံခြုံရေးတွေကို ကျော်ဖြတ်ကာ ဝင်လာခဲ့သည်။

အတွင်းဘက်ကို ဦးတည်နေသော ဟာတာကေး ဆာတိုရူကို မြင်လိုက်ရသောအခါ ဖူဂါကူသည် လက်သင်္ကေတများကို အမြန် ပြုလုပ်လိုက်သည်။

မြွေ - ဆိတ် - မျောက် - ဝက် - မြင်း - ကျား။

"မီးစွမ်းအား: ကြီးမားသော မီးလုံးကျူဆု 

မီးလုံးကြီးက နေရာတစ်ခုလုံးကို ချက်ချင်း လင်းထိန်သွားစေပြီး လွင့်စဉ်သွားသော မီးတောက်များက ငြိမ်းသွားသည့် ဖယောင်းတိုင်များကို ပြန်လည် ထွန်းညှိပေးလိုက်သည်။

ဖူဂါကူသည် ဟာတာကေး ဆာတိုရူ ရှိရာသို့ ကူနိုင်ဓားလေးလက်ကို ပစ်ပေါက်လိုက်သည်။

တားမြစ်နယ်မြေက မကျယ်လှပေ—သူ ဘယ်မှ ပြေးစရာ မရှိဘူး!

ဓားသံအနည်းငယ် မြည်ပြီးနောက် ဖူဂါကူသည် ရှေ့မှ မီးခိုးနှင့် ဖုန်မှုန့်များကို ဝှေ့ယမ်း ဖယ်ရှားလိုက်သည်။

သူ၏ မျက်လုံးများ ကျဉ်းမြောင်းသွားသည်။

"သူ... သူ ပျောက်သွားပြီ?!"

မီးခိုးများ ပျောက်ကွယ်သွားပြီး ဖယောင်းတိုင်များ ပြန်လည် ထွန်းလင်းလာသည့်အခါ အခန်းထဲတွင် အလင်းပြန်ဝင်လာသည်။

ကူနိုင်ဓားများမှာ နံရံတွင် စိုက်ဝင်နေသော်လည်း ထိုလူ၏ အရိပ်အယောင်ပင် မတွေ့ရတော့ပေ။

မျက်နှာဖုံးတပ်ထားသူမှာ ထိုနေရာတွင် ဘယ်တုန်းကမှ မရှိခဲ့သလိုမျိုး လုံးဝ ပျောက်ကွယ်သွားသည်။

ခေါင်းဆောင်အနေဖြင့် သူကိုယ်တိုင် သိမ်းဆည်းထားသော ရှာရင်ဂန်များ ထည့်ထားသည့် ဖန်ပုလင်း အနည်းငယ်မှာ မြေပြင်ပေါ်၌ ပြုတ်ကျနေသည်။

တစ်ခုမှာမူ ပျောက်ဆုံးနေသည်။

မကြာမီပင် အူချီဟာ ရပ်ကွက်တစ်ခုလုံးရှိ မီးများ တစ်ပြိုင်နက်တည်း လင်းလာသည်။

ရုတ်တရက် ခိုးဝင်မှုကြောင့် မျိုးနွယ်စုဝင်များအားလုံး နိုးကြားသွားကြသည်။

ဥချီဟာ ဖူဂါကူသည် ထိုညတွင်ပင် အရေးပေါ် မျိုးနွယ်စု အစည်းအဝေး ခေါ်ယူလိုက်သည်။

ဟာတာကေး ဆာတိုရူက မျက်နှာဖုံးကို ချွတ်လိုက်ပြီး သက်ပြင်းရှည် တစ်ချက် ချလိုက်သည်။

သူ့လက်ထဲမှ ပုလင်းကို လေထဲသို့ ပစ်မြှောက်လိုက်သည်—အတွင်းမှ ရှာရင်ဂန် မျက်လုံးတစ်စုံမှာ လည်ပတ်နေသည်။

ဒီမျက်လုံးတွေက တကယ်ကို USB တွေလိုပါပဲ။ သေပြီးနောက်မှာတောင် ထုတ်ယူပြီး သိမ်းဆည်းထားလို့ ရနေသေးတယ်။

ဘာပဲဖြစ်ဖြစ်၊ ဒီလို ပစ္စည်းမျိုး ရှိနေတာ ကောင်းပါတယ်။

ဟာတာကေး ဆာတိုရူက ကိုယ်လက်ဆန့်ထုတ်လိုက်ပြီး ညဉ့်အမှောင်ကို အကာအကွယ်ယူကာ ဟာတာကေး အိမ်သို့ အမြန် ပြန်လာခဲ့သည်။

မှိန်ဖျော့ဖျော့ မီးရောင်မှာ တစ်ညလုံး လင်းနေခဲ့သည်။

...

မနက်စောစော။

"ဟေ့၊ ကြားပြီးပြီလား? ရှီဆူအီဆိုတဲ့ကောင် ညက ချောက်ကမ်းပါးကနေ ခုန်ချသွားတယ်တဲ့။"

"သူ့အတွက် ထိုက်တန်ပါတယ်၊ မဟုတ်ဘူးလား? အူချီဟာတွေက သူတို့ကိုယ်သူတို့ အတော် ထင်နေကြတာ—တစ်ယောက်လောက် သေသွားမှ သူတို့ မြေကြီးပေါ် ပြန်ကျလာလိမ့်မယ်။"

"ဒါပေမဲ့လည်း သူ သေသွားပြီလေ။ အဲ့ဒါက နည်းနည်းတော့ လွန်တာပေါ့။"

"ငါကြားတာတော့ မနေ့ညက အူချီဟာ တားမြစ်နယ်မြေထဲကို တစ်ယောက်ယောက် ခိုးဝင်သွားတယ်တဲ့။"

တစ်ညတည်းနဲ့ အူချီဟာ မျိုးနွယ်စုပတ်ဝန်းကျင်မှာ အဖြစ်အပျက်တွေ အများကြီး ဖြစ်သွားခဲ့သည်။

နင်ဂျာပဲ ဖြစ်ဖြစ်၊ သာမန်ရွာသူရွာသားပဲ ဖြစ်ဖြစ် လူတိုင်းက မျိုးနွယ်စုအကြောင်းကိုပဲ ပြောဆိုနေကြပြီး စိတ်မသက်မသာ ဖြစ်နေကြသည်။

ကိုနိုဟာ ရွာကြီးတစ်ခုလုံးမှာ တိုးတိုးတိတ်တိတ် စကားသံများနှင့် ကောလာဟလများ ပျံ့နှံ့နေတော့သည်။