အခန်း ၁ - လွင်ပြင်ပေါ်မှ ရှင်သန်ရေးဂိမ်း၊ သတင်းအချက်အလက် စွမ်းရည်ဖြင့် စတင်ခြင်း...
...
【လွင်ပြင် ရှင်သန်ရေး ဂိမ်းမှ ကြိုဆိုပါသည်။】
【ယနေ့မှစတင်၍ သင်တို့သည် ဤအန္တရာယ်များလှသော ကမ္ဘာကြီးတွင် ရှင်သန်ရေး ခရီးလမ်းကို စတင်လျှောက်လှမ်းရတော့မည်ဖြစ်သည်။】
【ဤသည်မှာ သွေးနှင့်မီးလျှံတို့၏ စစ်မြေပြင်ဖြစ်ပြီး အာဏာနှင့် စွမ်းအားဆီသို့ ဦးတည်သော ဘုရင်တစ်ပါး၏ လမ်းကြောင်းလည်း ဖြစ်ပါသည်။ သင်၏ သီးသန့် မော်တော်ယာဉ်ကို သင့်နှလုံးသား စေညွှန်ရာအတိုင်း မောင်းနှင်ပါ။ သင့်ပတ်ဝန်းကျင်ရှိ အရာအားလုံးကို အသုံးချပြီး ကြောက်မက်ဖွယ်ကောင်းသော ညတိုင်းကို ကျော်ဖြတ်လိုက်ပါ။】
မြက်ခင်းပြင်တစ်ခုပေါ်၌ ကျိကျန်းနိုးထလာစဥ် အေးစက်စက် စက်ယန္တရားဆန်သော အမျိုးသမီး အသံတစ်သံသည် သူ၏စိတ်ထဲတွင် ပဲ့တင်ထပ်သွားခဲ့၏။
စိမ်းသက်နေသော ပတ်ဝန်းကျင်ကို မြင်လိုက်ရသဖြင့် ခန့်ညားလှသော သူ၏ မျက်နှာပေါ်၌ ဇဝေဇဝါဖြစ်မှုများ အတိုင်းသား ပေါ်လွင်လာသည်။
"ငါ စာသင်ခန်းထဲမှာ မဟုတ်ဘူးလား... ဒါ ဘယ်နေရာကြီးလဲ…"
သူ၏ စာရေးခုံနှင့် အတန်းဖော်များ မရှိတော့ဘဲ အဆုံးမရှိ ကျယ်ပြောလှသော တောရိုင်းမြေကြီးကသာ သူ၏ရှေ့မှောက်၌ အစားထိုး၍ တည်ရှိနေတော့သည်။
ပြာလဲ့လဲ့ ကောင်းကင်များ၊ တိမ်ဖြူဖြူများနှင့် အထက်တွင် ထွန်းလင်းနေသော တောက်လောင်နေသည့် နေမင်းကြီး၊ မြက်ရိုင်းများနှင့် မြေဆီလွှာတို့၏ အနံ့သည် လေထုထဲတွင် ပြည့်နှက်နေပြီး အရိုင်းဆန်သော သဘာဝ၏ အငွေ့အသက်ကို ဆောင်ကြဉ်းပေးနေသည်။
ကျိကျန်းသည် မိန်းမောတွေဝေစွာဖြင့် ပတ်ဝန်းကျင်ကို လှည့်ပတ်ကြည့်ရှုလိုက်ရာ မလှမ်းမကမ်းတွင် တည်ရှိနေသော ပုံရိပ်တစ်ခုကို သတိပြုမိလိုက်သဖြင့် တစ်ကိုယ်လုံး တုန်တက်သွားခဲ့၏။
အကြောင်းမှာ ထိုပုံရိပ်ပိုင်ရှင်သည်... လူတစ်ယောက် လုံးဝမဟုတ်သောကြောင့် ဖြစ်သည်။
၎င်းသည် ခန္ဓာကိုယ်တစ်ခုလုံးတွင် ပုပ်ပွနေသော ဒဏ်ရာများ ပြည့်နှက်နေကာ ခြေလက်များ တောင့်တင်း၍ တွန့်လိမ်နေသော မကောင်းဆိုးဝါးတစ်ကောင်ပင် ဖြစ်၏။
ထိုအကောင်သည် မြက်ခင်းပြင်ပေါ်တွင် စက်ရုပ်တစ်ရုပ်ကဲ့သို့ လမ်းလျှောက်နေပြီး ပါးစပ်မှလည်း သားရဲကဲ့သို့ တိုးညှင်းသော မာန်ဖီသံများကို ထုတ်လွှတ်နေသည်။
“အဲ့ဒါက... ဖုတ်ကောင်လား…”
“ဟာ မဟုတ်သေးပါဘူး… ဒါ ဘယ်လိုနေရာစုတ်ကြီးလဲ…ငါ အဆိပ်မှိုတွေ မှားစားမိလိုက်တာလား…”
သို့သော် ကျိကျန်းတစ်ယောက် အခြေအနေကို သဘောမပေါက်သေးမီမှာပင် သူ၏ မျက်စိရှေ့၌ အလင်းမျက်နှာပြင်တစ်ခု ပေါ်ထွက်လာခဲ့သည်။
【လွင်ပြင် ရှင်သန်ရေး လမ်းညွှန်】
【၁။ လူတစ်ဦးစီသည် စတင်ချိန်၌ ကျပန်း မော်တော်ယာဉ်တစ်စီးနှင့် ကျပန်း စွမ်းရည်တစ်ခုစီ ရရှိမည်ဖြစ်ပါသည်။ သင်ရရှိသော ယာဉ်နှင့် စွမ်းရည်တို့အပေါ် မူတည်၍ သင့်တော်သော ရှင်သန်ရေး နည်းလမ်းကို ရွေးချယ်ပါ။】
【၂။ ညဘက်တွင် ကြောက်မက်ဖွယ်ကောင်းသော မကောင်းဆိုးဝါးများစွာသည် လွင်ပြင်ပေါ်၌ ပေါ်ထွက်လာမည်ဖြစ်ပါသည်။ ၎င်းတို့၏ တိုက်ခိုက်ခံမှုများမှ ရှောင်ရှားရန် သင်၏ မော်တော်ယာဉ်ထဲတွင် ကြိုးစား၍ ပုန်းအောင်းနေပါ။】
【၃။ မော်တော်ယာဉ်များသည် တစ်ခုတည်းသော ခိုလှုံရာဖြစ်သည်။ လုံးဝ ပျက်စီးသွားပါက ရှင်သန်သူများသည် ခိုလှုံရာ ဆုံးရှုံးမည်ဖြစ်ပြီး အခြားရှင်သန်သူများ၏ ယာဉ်များတွင်သာ ခိုလှုံခွင့် တောင်းခံနိုင်မည်ဖြစ်သည်။】
【၄။ ရှင်သန်သူများသည် တစ်ဦးထံမှတစ်ဦး လုယက်ခွင့်မရှိပါ။ တစ်ဦးတစ်ယောက်၏ ဆန္ဒမပါဘဲ အတင်းအဓမ္မ ပြုလုပ်သော အရောင်းအဝယ်မှန်သမျှကို တရားမဝင်ဟု သတ်မှတ်ပါမည်။】
【၅။ သင်မြင်တွေ့ရသော အရာအများစုကို အရင်းအမြစ်များမှတစ်ဆင့် အဆင့်မြှင့်တင်နိုင်သည်။ အနာဂတ်တွင် မထင်မှတ်ထားသော အခြေအနေများကို ရင်ဆိုင်နိုင်ရန် သင်၏ တိုးတက်မှုကို မျှတအောင် ထိန်းသိမ်းပါ။】
【၆။ လွင်ပြင်ထဲတွင် များပြားလှသော အရင်းအမြစ်များနှင့် အခွင့်အရေးများ ရှိပြီး ၎င်းတို့က်ို ရရှိပိုင်ဆိုင်နိုင်ရေးအတွက် ရှာဖွေစူးစမ်းရန် လိုအပ်သည်။ သို့သော် လုံလောက်အောင် အားမကောင်းပါက အချို့သော ကြောက်မက်ဖွယ် ဖြစ်တည်မှုများ၏ နယ်မြေထဲသို့ မတော်တဆ မဝင်ရောက်မိပါစေနှင့်။】
【၇။ နေ့စဉ် ညနေ ၆ နာရီသည် နေ့နှင့်ည၏ နယ်နိမိတ် ဖြစ်သည်။ ညမှောင်လာပါက မကောင်းဆိုးဝါး အားလုံးသည် ရူးသွပ်သော အခြေအနေသို့ ရောက်ရှိသွားမည်ဖြစ်၏။ အဖိုးတန်သော နေ့ဘက်အချိန်ကို တန်ဖိုးထားပြီး လိုအပ်သော အရင်းအမြစ်များကို မြန်မြန်ဆန်ဆန် စုဆောင်းပါ။】
【၈။ ပထမအကြိမ် ရှင်သန်ရေး ကာလသည် ၇ ရက် ကြာမြင့်မည်ဖြစ်ပြီး မကောင်းဆိုးဝါးများ၏ အရေအတွက်နှင့် အင်အားသည်လည်း နေ့စဉ် တိုးတက်လာမည်ဖြစ်သည်။ ၇ ရက် ကြာပြီးနောက် ထိတ်လန့်ဖွယ်ရာ ဖုတ်ကောင်အုပ်စုကြီး ရောက်ရှိလာမည် ဖြစ်ရာ ကြိုတင် ပြင်ဆင်မှုများ ပြုလုပ်ထားပါ။】
【၉။ ဤသည်မှာ စစ်မှန်သော ကမ္ဘာဖြစ်၏။ ဤနေရာ၌ သေဆုံးခြင်းသည် အစစ်အမှန် သေဆုံးခြင်း ဖြစ်ပါသည်။ ရှင်သန်နိုင်ရန် ဖြစ်နိုင်သမျှ နည်းလမ်းပေါင်းစုံ အသုံးပြု၍ ကြိုးစားပါ။】
——
“လွင်ပြင် ရှင်သန်ရေး...”
“မော်တော်ယာဉ်…”
ဤရှင်သန်ရေး လမ်းညွှန် ၉ ချက်ကို ဂရုတစိုက် ဖတ်ရှုပြီးနောက် ကျိကျန်း၏ ရင်ထဲတွင် လေးလံထိုင်းမှိုင်းသွားတော့၏။
သူသည် ဝတ္ထုများထဲမှာကဲ့သို့ အမှန်တကယ် ကူးပြောင်းလာခဲ့ပြီး ဆန်းကြယ်သော ရှင်သန်ရေးဂိမ်းတစ်ခုထဲသို့ ဆွဲခေါ်ခံလိုက်ရပုံပေါ်သည်။
ထို့ပြင် ကြည့်ရသလောက် ဤအခြေအနေကို ရင်ဆိုင်နေရသူမှာ သူတစ်ယောက်တည်း ဟုတ်ပုံမရပေ။
အလင်းမျက်နှာပြင်၏ ညာဘက်အပေါ်ထောင့်တွင် 【ဒေသဆိုင်ရာ စကားပြောခန်း】၊ 【ကိုယ်ရေးအချက်အလက်】၊ 【ကုန်သွယ်ရေး】 နှင့် 【ကျောပိုးအိတ်】 ကဲ့သို့သော ရွေးချယ်စရာများကို သူ သတိပြုမိလိုက်သည်။
ဒေသဆိုင်ရာ စကားပြောခန်းကို နှိပ်လိုက်သောအခါ အလင်းမျက်နှာပြင် ပြောင်းလဲသွား၏။
【ဒေသတွင်း လူဦးရေ】 - ၉၉၉၈၃ / ၁၀၀၀၀၀
"ဘုရားရေ... ငါ စနစ်တစ်ခု နိုးထလာပြီကွ… ဟားဟားဟား…"
"မင်းတို့လည်း စနစ်တွေ ရှိနေတာလား… ငါတစ်ယောက်ပဲ ရွေးချယ်ခံရသူလို့ ထင်နေတာ… ကျွတ်…"
"ဒီ သောက်လွင်ပြင် ရှင်သန်ရေးဆိုတာ ဘာကြီးလဲ…မင်းတို့လည်း အကြောင်းကြားစာတွေ မြင်လိုက်ကြလား…"
"ဝိုး… ဒီမှာ ဖုတ်ကောင်တွေရှိတယ်ဟ… သောက်ရမ်း ကြောက်ဖို့ကောင်းတယ်… ဒါ ဘယ်လိုနေရာကြီးလဲ…"
"မကောင်းဆိုးဝါး တစ်ကောင်ရှိတယ်… ငါ့နောက်ကို လိုက်နေပြီ… လခွမ်းပဲ… ကယ်ကြပါဦးဟ... တစ်ယောက်ယောက် ငါ့ကို လာကယ်ကြပါဦး…"
"အော်မနေကြနဲ့… ရှင်သန်ရေး လမ်းညွှန်ကို သေချာဖတ်ကြ… ဒီမှာရှိတဲ့ အရာအားလုံးက အစစ်အမှန်တွေ…"
"ဒါဆို အားလုံး အတူတူ ကူးပြောင်းလာကြတာပေါ့... ဒါက ကမ္ဘာပျက် ရှင်သန်ရေး ဂိမ်းတစ်ခုခုလားဟင်…"
"ငါလည်း ဖုတ်ကောင်တွေကို မြင်လိုက်တယ်... ဒီကမ္ဘာကြီးက တကယ်အန္တရာယ်များနေပြီ ထင်တယ်ဟေ့..."
"ဒါကို ရှင်သန်ရေးဂိမ်းလို့ ခေါ်တာ အကြောင်းမဲ့ မဟုတ်ဘူးကွ... အန္တရာယ်မရှိရင် ဘာလို့ ရှင်သန်ရေးလို့ ခေါ်မလဲ…မင်းတို့ကောင်တွေ လူဦးရေ ပြနေတာကို မမြင်ဘူးလား… စရောက်ရောက်ချင်းမှာတင် လူနှစ်ဆယ်နီးပါး သေသွားပြီ…"
"သောက်ကျိုးနည်း… ငါ အတွင်းခံတစ်ထည်ပဲ ဝတ်ထားတာကွ… ဒီကမ္ဘာမှာ ငါ ဘယ်လိုလုပ် ရှင်သန်ရမှာလဲ…ရှင်သန်ရေးလမ်းညွှန်ထဲမှာ ပါတဲ့ အစပြုယာဉ်နဲ့ စွမ်းရည်တွေက ဘယ်ရောက်နေတာလဲ…"
ဒေသဆိုင်ရာ စကားပြောချန်နယ်တွင် အပူတပြင်း ဆွေးနွေးမှုများဖြင့် ဆူညံနေခဲ့၏။
လူတိုင်းသည် ရှုပ်တွေးမှုများနှင့် တင်းမာနေသော အခြေအနေထဲသို့ ရောက်ရှိနေကြပုံရသည်။
ထိုအချိန်တွင် အသိပေးချက်အသစ်တစ်ခုက လူတိုင်း၏ အာရုံကို ဖမ်းစားလိုက်၏။
【ရှင်သန်သူများ အားလုံးအတွက် "မော်တော်ယာဉ်များ" စတင် မဲနှိုက်ပေးနေပါပြီ။】
ရောက်လာပြီ…။
ထိုစာကို မြင်လိုက်ရပြီးနောက် ကျိကျန်း၏ စိတ်ဓာတ်များ ချက်ချင်းပင် တက်ကြွလာတော့၏။
ရှင်သန်ရေးလမ်းညွှန်အရ "မော်တော်ယာဉ်" သည် ဤရှင်သန်ရေး ဂိမ်းတစ်ခုလုံး၏ အဓိက အကျဆုံး အုတ်မြစ်ပင်ဖြစ်သည်။ ကောင်းမွန်သော ယာဥ်တစ်စီး ရရှိခြင်းသည် တစ်ဖက်တွင် ဘေးကင်းရေးနှင့် ရှင်သန်ရေး နှုန်းထားများကို အာမခံပေးနိုင်သကဲ့သို့ အခြားတစ်ဖက်တွင်လည်း သူ့အား အစပြုချိန်၌ အခြားရှင်သန်သူများနှင့် ကွာဟချက်ကို ချက်ချင်း ဖန်တီးပေးနိုင်ပေသည်။
သူ၏ ကံကြမ္မာကို စမ်းသပ်ရမည့် အခိုက်အတန့် ရောက်ရှိလာချေပြီ။
သို့သော် ကျိကျန်းအနေဖြင့် စိတ်ပိုင်းဆိုင်ရာ ကြိုတင်ပြင်ဆင်ခွင့် မရလိုက်မီမှာပင် မဲနှိုက်သည့် ရလဒ် ပေါ်ထွက်လာလေသည်။
【ဒင်!】
【ဂုဏ်ယူပါသည်။ သင်သည် "ဟောင်းနွမ်းစုတ်ပြတ်နေသော မီနီဗန်"ကို ရရှိခဲ့သည်။】
၎င်းအသိပေးသံနှင့်အတူ—
ဆယ်နှစ်ကျော် သုံးစွဲမောင်းနှင်ထားသည့် ပုံစံပေါက်နေသည့် ဟောင်းနွမ်းနေသော မီနီဗန်တစ်စီးသည် မြက်ခင်းပြင်ပေါ်တွင် ရုတ်တရက် ပေါ်ထွက်လာခဲ့သည်။
ဆေးရောင်များ ကွာကျလျက် ကွက်တိကွက်ကြားဖြစ်နေသည့်အပြင် တံခါးချပ်များမှာလည်း ချိုင့်ဝင်နေ၏။ ကိုယ်ထည်အောက်ပိုင်းတွင် ဆီကွက်များနှင့် ဖုန်မှုန့်များ ပေကျံနေကာ တာယာများမှာလည်း ပြောင်ချောနေပြီ ဖြစ်သည်။
ကျိကျန်း တံခါးကို ဖွင့်လှစ်၍ ဝင်လိုက်သည်နှင့် ပြင်းထန်သော မှိုနံ့ဆိုးကြီးက ချက်ချင်း ရိုက်ခတ်လာတော့၏။
ထိုင်ခုံများမှာ ပြားကပ်နေပြီး ဒက်ရှ်ဘုတ် ပေါ်တွင်လည်း ဖုန်မှုန့်များ နေရာအနှံ့ ပြည့်နှက်နေခဲ့၏— မီဒီယာတီဗီ(multimedia)ကို အသာထား၊ လေအေးပေးစက် သို့မဟုတ် ရေဒီယိုတောင် မရှိပေ။
“တောက်…”
“လက်မှတ်ရ သံတိုသံစပုံကြီးပါလား…”
——
【ဟောင်းနွမ်းစုတ်ပြတ်နေသော မီနီဗန်】
အဆင့်အတန်း - အဆင့် ၁ မော်တော်ယာဉ်
အမြင့်ဆုံးအမြန်နှုန်း - တစ်နာရီလျှင် ၆၀ ကီလိုမီတာ
ကြံ့ခိုင်မှု - ၁၅% (ဖြည်းဖြည်းချင်း လျော့နည်းနေသည်။)
ကျန်ရှိသော လောင်စာ - ၁ ယူနစ် (ကီလိုမီတာ ၃၀၀ မောင်းနှင်နိုင်သည်။)
အဆင့်မြှင့်ထားသော အစိတ်အပိုင်းများ - မရှိပါ (အဆင့် ၀)
ယာဉ် အဆင့်မြှင့်တင်ရန် လိုအပ်ချက်များ - ရွှေဒင်္ဂါး x၅၀၊ အပိုပစ္စည်း x၃၀၊ သံမဏိပြား x၁၀၀၊ အဆင့် ၁ ချစ်ပ် x၁ (အစိတ်အပိုင်း ၁၀ ခုကို အဆင့် ၁၀ သို့မဟုတ် ထို့ထက်မြင့်အောင် အဆင့်မြှင့်ပြီးမှ သော့ပွင့်မည်။)
အကဲဖြတ်ချက် - ဒိုင်ခွက်တွင် ကီလိုမီတာ ၆၀၀,၀၀၀ ပြသနေသည့် အဘိုးကြီးအဆင့် ယာဉ်အိုကြီး။ ကြည့်လိုက်လျှင် တစ်စစီပြုတ်ထွက်တော့မည်ဟု ထင်ရသော်လည်း လျော့ရဲနေသော အစိတ်အပိုင်းတိုင်းနှင့် ဝက်အူတိုင်းသည် အံ့ဩဖွယ်ရာ မျှခြေကို ထိန်းသိမ်းထားသည်။ သင်သည် ၎င်းကို ပြုပြင်ခြင်း မပြုသမျှ ကာလပတ်လုံး လုံးဝ ပျက်စီးသွားလိမ့်မည် မဟုတ်ပါ။
——
သူ၏ရှေ့ရှိ ဖော်ပြချက်ကို ကြည့်ရှုရင်း ကျိကျန်းတစ်ယောက် ကောင်းကင်ကြီး ပြိုကျလာသကဲ့သို့ ခံစားလိုက်ရသည်။
သူသည် လမ်းကြမ်းမောင်းယာဥ် သို့မဟုတ် စခန်းချယာဉ်(Recreational Vehicle-RV) တစ်စီးကို မျှော်လင့်နေခဲ့သော်လည်း ရရှိလိုက်သည်က ထိခိုက်ပျက်စီးနေသော ဗန်ကားစုတ်ကြီးဖြစ်လေ၏။
ထိုကဲ့သို့ စုတ်ပြတ်နေသော်ငြားလည်း ကျိကျန်းသည် တံခါးကို ချက်ချင်း ပိတ်လိုက်၏— အနည်းဆုံးတော့ ၎င်းသည် ဖုတ်ကောင် တိုက်ခိုက်မှုများကို ကာကွယ်ပေးနိုင်သော သတ္တုခွံကြီးတစ်ခု ဖြစ်နေသေးပေသည်။
ထို့ပြင် ယခုမှစ၍ ဤသည်မှာ သူ၏ အိမ်ဖြစ်လာပေတော့မည်။
ကျိကျန်း သက်ပြင်းချရင်း ဒေသဆိုင်ရာ စကားပြောချန်နယ်သို့ ကြည့်လိုက်၏။
"ဟားဟားဟား…သံချပ်ကာကားတစ်စီး ရတယ်ကွ…ငါတော့ လွင့်နေပြီ…"
"ဝိုး.. ဆရာကြီး…ကျွန်တော့်ကို ခေါ်သွားပါဦး… ကျွန်တော်က အိမ်စီးကားအသေးလေးပဲ ရထားတာ..."
"အိမ်စီးကားလေး... +၁"
"လခွမ်း… ငါ့ကျ သက်ကြီးရွယ်အိုသုံး စကူတာကြီး ရတယ်ကွာ…"
"ငါတော့ လမ်းကြမ်းမောင်းကားကြီးရတာဟေ့... တကယ်မိုက်တယ်... ဟားဟားဟား…"
"နေကြပါအုံး… ငါတစ်ယောက်တည်း ဆိုင်ကယ်ရထားတာလား…"
"ဆိုင်ကယ်က တော်သေးတာပေါ့… ငါက စက်ဘီးကြီး ရတာဟေ့...သောက်တလွဲပါကွာ… ယာဉ်ထဲမှာ ဘယ်လိုလုပ် ဝင်ပုန်းရမှာလဲ... ရှေ့ခြင်းတောင်းထဲ ဝင်နေရမှာလား… ဒါက ငါ့ကို အခုချက်ချင်း သေခိုင်းတာနဲ့ ဘာကွာသွားလို့လဲ…"
"တော်တော် ဆိုးတာပဲ ညီကိုရာ… တစ်ခြားလူနဲ့ မြန်မြန် သွားပေါင်းလိုက်တာ ပိုကောင်းမယ်… စက်ဘီးကြီးကိုတော့ ထားလိုက်ပါတော့… မတ်တပ်ရပ်ပြီး အသားကုန် နင်းရင်တောင် ဖုတ်ကောင်တွေဆီကနေ လွတ်မှာမဟုတ်ဘူး…"
"......"
ဒေသဆိုင်ရာ စကားပြောချန်နယ်ရှိ အကြောင်းအရာမျိုးစုံကို ကြည့်ရှုရင်း ကျိကျန်း၏ စိတ်ထဲတွင် အနည်းငယ် သက်သာရာရသွားခဲ့၏။
သူ၏ ဗန်ကားသည် ထိုဆိုင်ကယ်များ၊ သုံးဘီးများနှင့် စက်ဘီးများထက်တော့ သေချာပေါက် သာလွန်ပေသည်။
မကြာမီမှာပင် ဒုတိယအကြိမ် မဲနှိုက်သည့် အသိပေးချက် ပေါ်ထွက်လာ၏။
【ရှင်သန်သူများ အားလုံးအတွက် "စွမ်းရည်များ" စတင် မဲနှိုက်ပေးနေပါပြီ။】
ပထမအကြိမ် ကျပန်း မဲနှိုက်မှု ပြုလုပ်ထားပြီးဖြစ်သဖြင့် လူတိုင်း၏ တင်းမာမှုသည် ရုတ်ချည်းပင် မြင့်တက်သွားခဲ့၏။
ကျိကျန်းသည်လည်း အသက်ကို အောင့်ထားရင်း သူ၏ရှေ့ရှိ အလင်းမျက်နှာပြင်ကို စိုက်ကြည့်နေခဲ့သည်။
သူသည် မီနီဗန်ကားကြောင့် အခြားသူများနှင့် နှိုင်းယှဉ်ပါက အားနည်းချက် ရှိနှင့်နေပြီဖြစ်ရာ… သူ၏ စွမ်းရည်သည် သေချာပေါက် မညံ့ဖျင်းမှ ရပေမည်။
ကျိကျန်းသည် စိတ်ထဲတွင် တိတ်တဆိတ် ဆုတောင်းနေမိ၏။
သို့သော် ၁၀ စက္ကန့်ကျော်ကြာအောင် စောင့်ဆိုင်းပြီးနောက်တွင်ပင် မည်သည့်တုံ့ပြန်မှုမျှ မရှိသေးပေ။
ထို့ကြောင့် သူသည် စကားပြောချန်နယ်ကို စစ်ဆေးကြည့်လိုက်ရာ ပေါက်ကွဲလုမတတ် ဆူညံနေပြီဖြစ်သည်။
"မိုက်ပြီဟေ့… ငါ B-အဆင့် ခွန်အားစွမ်းရည် ရလိုက်တယ်… အဆ ၁၀ ခွန်အား တိုးတက်မှုတဲ့.. ဒီဟာကြီးက တကယ် ရူးချင်စရာပဲ… ငါ အခု ဖုတ်ကောင်တွေကို လက်ဗလာနဲ့ ဆွဲဖြဲပစ်လို့ ရတယ်လို့တောင် ခံစားနေရတယ်…"
"ငါလည်း မီးဓာတ် စွမ်းအားရတယ်လေ… ဒါပေမယ့် ဘာလို့ D-အဆင့်ပဲ ရှိတာလဲ…"
"ငါတော့ C-အဆင့် တိုက်ခိုက်ရေး စွမ်းရည်ပဲ ရခဲ့တယ်…"
"မင်းတို့ကို တကယ် အားကျတယ်ကွာ… ငါက အထောက်အကူပြု စွမ်းရည်ကြီးရလာတာ.. သွားပြီထင်ပါတယ်..."
"ဒီဟာတွေကို အခုလို လျှောက်ပြောမနေတာ ကောင်းမယ်နော်.. စွမ်းရည်တွေဆိုတာ မင်းတို့ရဲ့ ဝှက်ဖဲတွေပဲ..."
"ဒီ အများသုံးစကားပြောခန်း တစ်ခုလုံးမှာ A-အဆင့် နဲ့ အထက် စွမ်းရည် ရထားတဲ့သူတွေ ဘာလို့ စာမရေးတာလဲ မင်းတို့ သတိမထားမိကြဘူးလား… တစ်ယောက်ယောက်တော့ ရမှာပဲ… ဆရာကြီးတွေက လျှို့ဝှက်ထားကြတာ..."
"......"
၎င်းမှတ်ချက်များကို ကြည့်ရှုရင်း ကျိကျန်းတစ်ယောက် သူ၏ရင်ထဲတွင် တဖြည်းဖြည်း အေးစက်လာသကဲ့သို့ ခံစားလိုက်ရသည်။
“ဘာတွေဖြစ်နေတာလဲ..”
“ဘာလို့ အခြားသူတွေကျ ရပြီး.. ငါမရသေးတာလဲ...”
“ချို့ယွင်းချက် တစ်ခုခုလား...”
ကျိကျန်း စိတ်ရူးပေါက်တော့မည့် အချိန်မှာပင် ထိုကောင်းကင်ဘုံတစ်မျှ သာယာသော အသိပေးသံသည် သူ၏ စိတ်ထဲတွင် နောက်ဆုံး၌ ပဲ့တင်ထပ်လာတော့သည်။
【ဒင်!】
【ဂုဏ်ယူပါသည်။ သင်သည် SSS-အဆင့် လျှို့ဝှက်စွမ်းရည် "နေ့စဉ် သတင်းအချက်အလက် (သီးသန့်)" ကို ရရှိခဲ့သည်။】
——
စွမ်းရည် - 【နေ့စဉ် သတင်းအချက်အလက်】
အဆင့် - SSS-အဆင့် (လျှို့ဝှက်စွမ်းရည်)
လုပ်ဆောင်ချက် - ပတ်ဝန်းကျင်မှ အထူး သတင်းအချက်အလက် တစ်ခုကို နေ့စဥ် ရရှိနိုင်သည်။ သတင်းအချက်အလက်ကို ရယူရန်【လက်ခံမည်】/【ငြင်းပယ်မည်】 ကို ရွေးချယ်နိုင်သည်။ ငြင်းပယ်လိုက်ပါက ၎င်းသတင်းအချက်အလက်သည် ထိုနေ့၏ ကျန်ရှိသော အချိန်အတွင်း ပေါ်ထွက်လာနိုင်သလို၊ နောက်တစ်ကြိမ် ထပ်မံ ပေါ်ထွက်မလာတော့သည်လည်း ဖြစ်နိုင်သည်။
အကဲဖြတ်ချက် - အမြင့်ဆုံး အလားအလာရှိသည့် စွမ်းရည်! ကံကောင်းသော ဘုရင်များ၊ ကံကြမ္မာ၏ သားသမီးများ အားလုံး ဖယ်ပေးကြပါ။ သင်တို့၏ သတင်းအချက်အလက် အရှင်သခင်ကြီး ရောက်ရှိလာပါပြီ။
…..