အခန်း (၈၄) - ကျောက်ဝူကျိ - စူးမင်က အထောက်အကူပြု အမျိုးအစား ဝိညာဉ်သခင် မဟုတ်ဘူးလား

ကျောက်ဝူကျိ - "..."

ကျောက်ဝူကျိ က အဲဒီအရာတွေကို ဂရုမစိုက်ချေ။ သူ ယခု သိထားသည်မှာ ရွှီးလိုင်ခဲ ကျောင်းတော် က တိုးတက်ကြီးပွားတော့မည် ဆိုသည်ကိုပင်။ ဘာပဲဖြစ်ဖြစ် ဒီမကောင်းဆိုးဝါးလေးတွေကို သူ ဒီမှာ ဆက်နေအောင် သေချာပေါက် လုပ်ရမယ်။

သို့သော် လောလောဆယ်တွင် သူ အနည်းငယ် ပျော်ရွှင်စွာ ကစားနိုင်ပြီး ဆရာ တစ်ယောက်၏ ဩဇာအာဏာကို တည်ဆောက်နိုင်သေးလေသည်။

သူတို့အားလုံး သိုင်းဝိညာဉ် များ ထုတ်ဖော်လိုက်ကြသည်ကို မြင်သောအခါ ကျောက်ဝူကျိ ကလည်း စတင် လှုပ်ရှားလိုက်လေသည်။ သူက ခန္ဓာကိုယ်ကို ဆောင့်ကြောင့်ထိုင်ချလိုက်ပြီး လက်သီးနှစ်ဖက်ဖြင့် မြေပြင်ကို တစ်ပြိုင်နက်တည်း ထိုးချလိုက်လေသည်။

"ဒုက္ခပဲ။ စူးမင်... နင်းရုန်ရုန် ကို ကာကွယ်ထား"

ထန်ဆန်း က အလန့်တကြား အော်ပြောလိုက်လေသည်။

ကျောက်ဝူကျိ ဘာလုပ်ချင်သည်ကို စူးမင်က သဘာဝကျကျပင် သိရှိထားလေသည်။ ရတနာခုနစ်ပါး မှန်ကြွေကျောင်းဆောင် ၏ အထောက်အကူပြု အကျိုးသက်ရောက်မှုများကို နှောင့်ယှက်ရန်အတွက် သူက နင်းရုန်ရုန် ကို အရင်ဆုံး ဖယ်ရှားချင်နေခြင်း ဖြစ်လေသည်။ အိပ်မက်သာ မက်နေလိုက်။

ချက်ချင်းပင် စူးမင်က နင်းရုန်ရုန် ၏ ခါးကို သစ်ကိုင်းများဖြင့် ရစ်ပတ်လိုက်ပြီးနောက် အပေါ်သို့ ခုန်တက်လိုက်ကာ ကျောက်ဝူကျိ ၏ တိုက်ခိုက်မှုကို ရှောင်တိမ်းရန် သူမကို လေထဲသို့ ဆွဲတင်လိုက်လေသည်။

စူးမင်က နင်းရုန်ရုန် ကို ကောင်းစွာ ကာကွယ်ပေးထားနိုင်သည်ကို မြင်သောအခါ ထန်ဆန်း စိတ်သက်သာရာ ရသွားလေသည်။ နင်းရုန်ရုန် ၏ အခြေအနေအတွက် စိတ်ပူစရာ မလိုတော့သဖြင့် သူ၏ တိုက်ခိုက်မှုများကို ပိုမို ထိရောက်စွာ ပြုလုပ်နိုင်လေသည်။

ထို့နောက် သူက "ရှောင်ဝူ... ကျူးကျူချင်... လှုပ်ရှားတော့" ဟု အော်ပြောလိုက်လေသည်။

တိုက်ခိုက်ခြင်းက အကောင်းဆုံး ကာကွယ်ခြင်းပင် ဖြစ်လေသည်။ ဆရာ ကျောက် က သူ၏ စွမ်းအား အပြည့်ကို မထုတ်ဖော်နိုင်စေရန် သူတို့ အတတ်နိုင်ဆုံး တိုက်ခိုက်ပြီး သူ့ကို ကာကွယ်နေရအောင် အလုပ်ရှုပ်နေစေရမည်။

သူ၏ တိုက်ခိုက်မှု ရှောင်တိမ်းခံလိုက်ရသည်ကို မြင်သောအခါ ကျောက်ဝူကျိ ၏ မျက်နှာပေါ်တွင် အပြုံးတစ်ခု ထွက်ပေါ်လာလေသည်။ သူတို့၏ တုံ့ပြန်နိုင်စွမ်းက တကယ်ကို ကောင်းမွန်လှသည်။ ကြည့်ရတာ သူတို့က ဟန်ပြသက်သက်လေးတွေ မဟုတ်ဘူးပဲ။

ရှောင်ဝူနှင့် ကျူးကျူချင် တို့က သူ့ထံသို့ ပြေးဝင်လာသောအခါ ကျောက်ဝူကျိ က အနည်းငယ်မျှပင် အလန့်တကြား မဖြစ်သွားချေ။ ထို့အစား သူတို့ကို လွတ်လွတ်လပ်လပ် တိုက်ခိုက်ခွင့် ပြုထားသကဲ့သို့ လက်ကို နောက်ပစ်ကာ ရပ်နေလေသည်။

ရှောင်ဝူနှင့် ကျူးကျူချင် တို့က သဘာဝကျကျပင် ဤကဲ့သို့သော အခွင့်အရေးကို လက်လွတ်မခံနိုင်ချေ။ မည်သည့် ဝိညာဉ်စွမ်းရည် ကိုမျှ အသုံးမပြုဘဲ ကျောက်ဝူကျိ ၏ လက်ရှိ ကာကွယ်ရေး သက်သက်ဖြင့် သူတို့၏ တိုက်ခိုက်မှုများကို တောင့်ခံထားနိုင်လိမ့်မည်ဟု သူတို့ တကယ် မယုံကြည်ကြချေ။

ရှောင်ဝူက ချက်ချင်းပင် နေရာရွှေ့ပြောင်းခြင်း ကို အသုံးပြုကာ ကျောက်ဝူကျိ ၏ အနောက်သို့ ရောက်ရှိသွားပြီး သူမ၏ ခြေထောက်များက ကျောက်ဝူကျိ ၏ ပခုံးများပေါ်သို့ တိကျစွာ နင်းချလိုက်ကာ သူ၏ လည်ပင်း နှစ်ဖက်စလုံးကို ဆက်တိုက် တိုက်ခိုက်တော့လေသည်။

"ပထမဆုံး ဝိညာဉ်စွမ်းရည် - ငရဲ အပြေးထိုးနှက်ချက်။ ဒုတိယ ဝိညာဉ်စွမ်းရည် - ငရဲလက်သည်းတစ်ရာ"

ကျူးကျူချင် က ကျောက်ဝူကျိ ၏ ဘေးဘက်မှနေ၍ ခါးဆီသို့ ပြေးဝင်သွားပြီး နေရာတစ်ခုတည်း ကို အချက်တစ်ရာခန့် ဆက်တိုက် တိုက်ခိုက်လိုက်လေသည်။

သို့သော် သူတို့နှစ်ဦး၏ တိုက်ခိုက်မှုများကို ရင်ဆိုင်ရသော်လည်း ကျောက်ဝူကျိ မှာ အနည်းငယ်မျှပင် လှုပ်ရှားမသွားချေ။ သူက ပြုံးဖြီးဖြီးဖြင့် "ကောင်မလေး နှစ်ယောက်... ကြည့်ရတာ မင်းတို့မှာ ခွန်အား သိပ်မရှိဘူး ထင်တယ်" ဟု ပြောလိုက်လေသည်။

ကျောက်ဝူကျိ ထိုသို့ ပြောလိုက်သော်လည်း ရှောင်ဝူ၏ တိုက်ခိုက်မှုများက သူ့ကို တစ်ခုခု ခံစားရစေသည်တော့ အမှန်ပင်။ သူမ၏ နောက်ဆက်တွဲ ခြေကန်ချက်များက တကယ်ကို ပို၍ပို၍ ပြင်းထန်လာလေသည်။ မဆိုးဘူးပဲ။

ကျူးကျူချင် ၏ တိုက်ခိုက်မှုများနှင့် ပတ်သက်၍မူ ၎င်းတို့က တကယ်ပင် အားနည်းလွန်းလှပေသည်။ သူမက အနည်းငယ် မြန်ဆန်ရုံသာဖြစ်ပြီး တိုက်ခိုက်မှုများတွင် ခွန်အား မပါသဖြင့် ယားနေသည့် နေရာကို ကုတ်ပေးနေသကဲ့သို့သာ ခံစားရလေသည်။

ဒါပေမဲ့ ပြန်တွေးကြည့်မယ်ဆိုရင် ကျူးကျူချင် က လျင်မြန်တိုက်ခိုက်ရေး အမျိုးအစား တစ်ယောက် ဖြစ်ပြီး သူတို့ရဲ့ စွမ်းအား ကွာဟချက်ကလည်း အရမ်း ကြီးမားလွန်းနေတာဆိုတော့ ဒါက နားလည်ပေးလို့ ရပါတယ်။

ရှောင်ဝူက အေးစက်စွာ နှာခေါင်းရှုံ့လိုက်လေသည်။ ခွန်အား မရှိဘူးလား။ ဒါဆို ခွန်အား ဆိုတာ ဘာလဲ ငါ ပြရသေးတာပေါ့။

"အစ်ကို"

စူးမင်ကလည်း အနည်းငယ် ပြုံးလိုက်ပြီး သူ၏ စတုတ္ထမြောက် ဝိညာဉ်ကွင်း လင်းလက်လာလေသည်။ "စတုတ္ထမြောက် ဝိညာဉ်စွမ်းရည် - သေဆုံးနေသောသစ်ပင် ပြန်လည်ရှင်သန်ခြင်း"

ချက်ချင်းပင် အလင်းတန်း နှစ်ခုက ရှောင်ဝူနှင့် ကျူးကျူချင် တို့ကို ဖုံးလွှမ်းသွားလေသည်။

သူတို့၏ ခန္ဓာကိုယ်များ အတွင်းတွင် အသက်ရှင်သန်ခြင်း သဘာဝ များ ဆူပွက်လာသည်ကို ခံစားလိုက်ရပြီး ရှောင်ဝူနှင့် ကျူးကျူချင် တို့၏ မျက်လုံးများ အရောင်လက်သွားကြလေသည်။ ဤခံစားချက်က... သူတို့ရဲ့ ခွန်အားတွေ ငါးဆယ်ရာခိုင်နှုန်း လောက် တိုးလာသလိုပဲ။

အသက်ရှင်သန်ခြင်း သဘာဝ က ကုသခြင်းနဲ့သာ သက်ဆိုင်တာ မဟုတ်ဘဲ ခန္ဓာကိုယ်ကို စိတ်လှုပ်ရှား တက်ကြွအောင်လည်း လုပ်ပေးနိုင်တယ်။ ၎င်းက နောက်ပိုင်းမှာ အော်စကာ ရဲ့ ပန်းရောင် စိတ်ကြွဝက်အူချောင်း နဲ့ အတော်လေး ဆင်တူပေမယ့် စူးမင်ရဲ့ ဝိညာဉ်စွမ်းရည် က အများကြီး ပိုပြီး အစွမ်းထက်တယ်လေ။

ရှောင်ဝူနှင့် ကျူးကျူချင် တို့က အချင်းချင်း တစ်ချက်ကြည့်လိုက်ကြပြီး တိုက်ခိုက်မှုများကို ထပ်မံ စတင်လိုက်ကြလေသည်။

ဤအချိန်တွင် ကျောက်ဝူကျိ လည်း သိချင်စိတ် ပြင်းပြနေလေသည်။ စူးမင်ရဲ့ စတုတ္ထမြောက် ဝိညာဉ်စွမ်းရည် ရဲ့ အကျိုးသက်ရောက်မှုက ဘာလဲ။ စူးမင်က အထောက်အကူပြု အမျိုးအစား ဝိညာဉ်သခင် တစ်ယောက် ဖြစ်လိမ့်မယ်လို့ သူ ထင်မထားခဲ့ဘူး။

ရှောင်ဝူက လေထဲသို့ ထပ်မံ ခုန်တက်လိုက်လေသည်။ ဤတစ်ကြိမ်တွင် သူမ၏ ပစ်မှတ်မှာ ကျောက်ဝူကျိ ၏ လည်ပင်း မဟုတ်ဘဲ နောက်စေ့ပင် ဖြစ်လေသည်။

ကျူးကျူချင် လည်း ရှောင်ဝူ၏ လှုပ်ရှားမှုများကို နားလည်ပြီး သူမ၏ ပထမဆုံး ဝိညာဉ်စွမ်းရည် ကို ထပ်မံ အသုံးပြုကာ ကျောက်ဝူကျိ ၏ နားထင်များကို တိုက်ခိုက်လိုက်လေသည်။

ကျောက်ဝူကျိ ရှောင်တိမ်းမည်လား ဆိုသည်မှာ ထန်ဆန်း၏ ထိန်းချုပ်မှုအပေါ်တွင် မူတည်လေသည်။

ရှောင်ဝူနှင့် ကျူးကျူချင် တို့၏ တိုက်ခိုက်ရေး ပစ်မှတ်များက အလွန် အစွန်းရောက်နေသည်ကို မြင်သောအခါ ကျောက်ဝူကျိ က အရင်တစ်ခေါက်ကလိုပဲ ဒီအတိုင်း ရပ်ပြီး သူတို့ကို အတိုက်ခိုက်ခံနေမည် မဟုတ်ဟု ထန်ဆန်း စိုးရိမ်သွားလေသည်။

ထန်ဆန်း က "စူးမင်... ဆရာ ကျောက် ကို ငါတို့ အတူတူ ထိန်းချုပ်ထားကြမယ်။ ပထမဆုံး ဝိညာဉ်စွမ်းရည် - ငွေပြာမြက် နှောင်ကြိုး" ဟု အော်ပြောလိုက်လေသည်။

ထန်ဆန်း၏ ငွေပြာမြက် တစ်ခုတည်းဖြင့် ကျောက်ဝူကျိ ကို မထိန်းချုပ်ထားနိုင်ကြောင်း စူးမင် သိထားသဖြင့် သူကလည်း စတင် လှုပ်ရှားလိုက်လေသည်။

"သစ်သားစွမ်းအား ထုတ်လွှတ်မှု နည်းစနစ် - မဟာသစ်ပင်"

သူတို့၏ တိုက်ခိုက်မှုများက ဤတစ်ကြိမ်တွင် အလွန် အစွန်းရောက်နေကြောင်းကို ကျောက်ဝူကျိ သတိထားမိလိုက်သဖြင့် သူက အရူးတစ်ယောက်လို ဒီအတိုင်း ရပ်နေမည် မဟုတ်ချေ။

သို့သော် သူ ရှောင်တိမ်းရန် ပြင်လိုက်စဉ်မှာပင် သူ၏ ခန္ဓာကိုယ် တစ်ခုလုံး တင်းကျပ်သွားသည်ကို ရုတ်တရက် ခံစားလိုက်ရလေသည်။ ဆူးများ ပြည့်နှက်နေသော ငွေပြာမြက် များက သူ့ကို အရူးအမူး ရစ်ပတ်လာပြီး သစ်နွယ်ပင်များက အလွန်အမင်း တင်းကျပ်လာကာ အကြောသေစေသော အဆိပ်များကိုလည်း တိတ်တဆိတ် ထုတ်လွှတ်လိုက်လေသည်။

ထို့အပြင် စူးမင်က ထိန်းချုပ်ရေး ဝိညာဉ်စွမ်းရည် ကို အသုံးပြုနေသည်ကို သူ တကယ်ကြီး မြင်တွေ့လိုက်ရလေသည်။ စူးမင်က အထောက်အကူပြု အမျိုးအစား ဝိညာဉ်သခင် တစ်ယောက် မဟုတ်ဘူးလား။

ထို့နောက် ငွေပြာမြက် များ၏ အပြင်ဘက်မှနေ၍ တင်းကျပ်စွာ ရစ်ပတ်နေသော ထူထဲပြီး ခိုင်မာသည့် နောက်ထပ် သစ်နွယ်ပင် တစ်လွှာကို သူ မြင်တွေ့လိုက်ရလေသည်။

ထိုအချိန်မှာပင် ရှောင်ဝူနှင့် ကျူးကျူချင် တို့၏ တိုက်ခိုက်မှုများက အချိန်ကိုက် ရောက်ရှိလာလေသည်။

သူ ရှောင်တိမ်း၍ မရတော့ကြောင်းကို မြင်သောအခါ ကျောက်ဝူကျိ လည်း သည်းခံရန်သာ ရွေးချယ်နိုင်တော့လေသည်။ ဝိညာဉ်စွမ်းအား အကာအကွယ် တစ်ခုက တိတ်တဆိတ် ထွက်ပေါ်လာလေသည်။ ကောင်မလေး နှစ်ယောက်ရဲ့ တိုက်ခိုက်မှုတွေကို သူ မတားဆီးနိုင်ဘူးဆိုတာကို သူ မယုံကြည်ဘူး။

ဘုန်း။

ရှောင်ဝူနှင့် ကျူးကျူချင် တို့၏ တိုက်ခိုက်မှုများကို ကျောက်ဝူကျိ ခံလိုက်ရလေသည်။ သူ၏ ကာကွယ်ရေးက နောက်ပြောင်နေခြင်း မဟုတ်သဖြင့် ၎င်းက သူ့ကို ကြီးမားသော ထိခိုက်မှုတော့ မဖြစ်စေခဲ့ချေ။

သို့သော် သူ မအံ့ဩဘဲ မနေနိုင်ခဲ့ချေ။ အရင် တိုက်ခိုက်မှုနဲ့ နှိုင်းယှဉ်ရင် ဒီတစ်ခါ သူတို့ရဲ့ တိုက်ခိုက်မှု စွမ်းအားတွေက အဲဒီလောက်တောင် မြင့်တက်လာခဲ့တာလား။

စူးမင်ရဲ့ အထောက်အကူပြု ဝိညာဉ်စွမ်းရည် က ရတနာခုနစ်ပါး မှန်ကြွေကျောင်းဆောင် ထက်တောင် သာလွန်နေတာလား။

ကျောက်ဝူကျိ က စူးမင်ကို လေးနက်စွာ တစ်ချက် ကြည့်လိုက်လေသည်။ ဒါက ဘယ်လို မကောင်းဆိုးဝါးလေးလဲ။ သူ့ကို သေချာပေါက် ကျောင်းဝင်ခွင့် ပေးရမယ်။

သူတို့၏ တိုက်ခိုက်မှုများက ကျောက်ဝူကျိ ကို ကြီးမားသော ထိခိုက်မှု မဖြစ်စေနိုင်သည်ကို မြင်သောအခါ ရှောင်ဝူ မျက်မှောင်ကြုတ်သွားလေသည်။ ဒီ ကာကွယ်ရေးက ဖောက်ထွင်းဖို့ အရမ်း ခက်လွန်းတယ်။

သူမ တကယ် မယုံကြည်ဘူး။

"အစ်ကို... အစ်ကို့ရဲ့ သစ်နွယ်ပင်တွေက ပိုရှည်လာနိုင်မလား။ သမီးရဲ့ အဆုံးစွန် အကွက်ကို သုံးတော့မယ်"

စူးမင် သဘောပေါက်သွားလေသည်။ ကြည့်ရတာ ရှောင်ဝူက ချက်ချင်းသတ်ဖြတ်သောရှစ်ဆင့်ချပစ်ခြင်း ကို အသုံးပြုချင်နေပုံရတယ်။

"သေချာတာပေါ့။ အသုံးပြုလိုက်"

ထို့နောက် စူးမင်က ထန်ဆန်းကို "ထန်ဆန်း... လောလောဆယ် ငါတို့ နှစ်ယောက် ဆရာ ကျောက် ကို ထိန်းချုပ်ထားမယ်။ ငါက 'လွှတ်' လို့ အမိန့်ပေးတာနဲ့ တစ်ပြိုင်နက် ငါတို့ရဲ့ ဝိညာဉ်စွမ်းရည် တွေကို ပြန်ရုပ်သိမ်းပြီး ရှောင်ဝူကို သူမရဲ့ အပြင်းထန်ဆုံး တိုက်ခိုက်မှု လုပ်ခွင့်ပေးလိုက်မယ်" ဟု ပြောလိုက်လေသည်။

ရှောင်ဝူ မည်သည့် အကွက်ကို အသုံးပြုတော့မည် ဆိုသည်ကို ထန်ဆန်း သဘာဝကျကျပင် သိရှိထားလေသည်။ သူ အသေအချာ မှတ်မိနေသေးပြီး ချက်ချင်းသတ်ဖြတ်သောရှစ်ဆင့်ချပစ်ခြင်း အပြည့်အစုံကို သူ မခံစားချင်တော့ချေ။

"ဒီတစ်ခါလည်း ရှင် အဆင်ပြေနိုင်ဦးမလား ဆိုတာကို ငါ မယုံဘူး။ ပထမဆုံး ဝိညာဉ်စွမ်းရည် - ခါးကိုင်းညွတ်ခြင်း"

ရှောင်ဝူက သူမ၏ ခါးကို ကိုင်းညွတ်လိုက်ပြီး ကျောက်ဝူကျိ ကို လေထဲသို့ ကန်တင်လိုက်လေသည်။

"တတိယ ဝိညာဉ်စွမ်းရည် - နေရာရွှေ့ပြောင်းခြင်း"

ချက်ချင်းပင် ရှောင်ဝူက ကျောက်ဝူကျိ ၏ ရှေ့သို့ နေရာရွှေ့ပြောင်းခြင်း ဖြင့် ရောက်ရှိသွားပြီး သူမ၏ ချက်ချင်းသတ်ဖြတ်သောရှစ်ဆင့်ချပစ်ခြင်း ကို စတင် အသုံးပြုတော့လေသည်။

ကျောက်ဝူကျိ ၏ ခန္ဓာကိုယ်ကို ထန်ဆန်း၏ ငွေပြာမြက် နှင့် စူးမင်၏ သစ်နွယ်ပင်များက ရစ်ပတ်ထားသဖြင့် သူမ၏ အဓိက တိုက်ခိုက်ရေး ပစ်မှတ်မှာ ကျောက်ဝူကျိ ၏ ခေါင်းပင် ဖြစ်လေသည်။ သူ့ကို အသေသတ်ဖို့ သူမ သန္နိဋ္ဌာန် ချထားလိုက်လေပြီ။

ထိုအချိန်တွင် ရှောင်ဝူ၏ ချက်ချင်းသတ်ဖြတ်သောရှစ်ဆင့်ချပစ်ခြင်း အောက်၌ ကျောက်ဝူကျိ မှာ လေထဲတွင် ဆက်တိုက် လည်ထွက်သွားလေသည်။ အစပိုင်းတွင် ဘာမှမဟုတ်သော်လည်း နောက်ပိုင်းသို့ ရောက်လာလေလေ ခြေကန်ချက် တစ်ချက်စီတိုင်းက ပိုမို ပြင်းထန်လာလေလေ ဖြစ်လေသည်။