အခန်း (၈၀) - စူးမင် ညည်းညူခြင်း၊ ခွေးစနစ် က ပဟေဋ္ဌိတွေ ဖွက်ထားဆဲပဲ

အခြေအနေကို သိရှိသွားပြီးနောက် ရှောင်ဝူက အပြည့်အဝ သဘောတူလိုက်လေသည်။ ဖလန်းဒါး ၏ ဆိုင်တွင် ရောင်းချသော ပစ္စည်းများနှင့် ၎င်းတို့၏ ဈေးနှုန်းများ အကြောင်းကို ကျူးကျူချင် နှင့် နင်းရုန်ရုန် တို့အား သူမက ပြောပြလိုက်လေသည်။

နင်းရုန်ရုန် - "ရွှီးလိုင်ခဲ ကျောင်းတော် ရဲ့ ကျောင်းအုပ်ကြီး က ဒီလောက်တောင် အမြတ်ကြီးစား ဖြစ်နေလိမ့်မယ်လို့ ငါ ထင်မထားခဲ့ဘူး။ ရွှေပြား အနည်းငယ်လေး အတွက်နဲ့ လိမ်လည်လှည့်စားတဲ့ နည်းလမ်းတွေကို အသုံးပြုရတယ်တဲ့လား။ ဒီငွေက ငါ့ရဲ့ မုန့်ဖိုးရဲ့ အစိတ်အပိုင်း သေးသေးလေးတောင် မရှိပါဘူး"

ရှောင်ဝူ - ...

ကျူးကျူချင် - "ဒါက နင်မို့လို့ပါ။ နင်တို့ရဲ့ ရတနာခုနစ်ပါး မှန်ကြွေကျောင်းဆောင် ဂိုဏ်း က ကမ္ဘာပေါ်မှာ အချမ်းသာဆုံး ဂိုဏ်းအဖြစ် နာမည်ကြီးတယ်လေ။ ဒါက နင့်ရဲ့ ရတနာခုနစ်ပါး မှန်ကြွေကျောင်းဆောင် သိုင်းဝိညာဉ် နဲ့ သက်ဆိုင်နေတယ်လို့ ငါ ကြားဖူးတယ်"

နင်းရုန်ရုန် - "ဟီးဟီး... ဒါက အမှန်ပဲ။ ငါတို့ရဲ့ ရတနာခုနစ်ပါး မှန်ကြွေကျောင်းဆောင် မှာ ရတနာရှာဖွေနိုင်တဲ့ လုပ်ဆောင်ချက် တစ်ခု မွေးရာပါ ပါဝင်တယ်။ ဝိညာဉ်သခင် ရဲ့ ပါရမီ ပိုကောင်းလေလေ အဲဒီ လုပ်ဆောင်ချက်က ပိုပြီး အစွမ်းထက်လေလေပဲ။ အခု စနစ် ဆီကနေ ရတဲ့ အကျိုးကျေးဇူးတွေကြောင့် ငါ့ရဲ့ ဝိညာဉ်စွမ်းအား က မူလ မွေးရာပါ အဆင့် ၉ ကနေ မွေးရာပါ ဝိညာဉ်စွမ်းအား အပြည့် သို့ ပြောင်းလဲသွားခဲ့ပြီလေ။ ငါက ရတနာခုနစ်ပါး မှန်ကြွေကျောင်းဆောင် ဂိုဏ်း မှာ ပါရမီ အကောင်းဆုံးသူ ဖြစ်လာပြီး အဖေက ငါ့ကို ဂိုဏ်းဆက်ခံသူ အဖြစ်တောင် သတ်မှတ်လိုက်ပြီ"

ရှောင်ဝူက မနာလိုစွာဖြင့် "ဝိုး... အစ်ကို ပြောခဲ့သလိုပဲ ရုန်ရုန် နင်က တကယ့် သူဌေးမလေးပဲ" ဟု ပြောလိုက်လေသည်။

နင်းရုန်ရုန် - "အဲဒီလောက်လည်း မဟုတ်ပါဘူး။ အော်... ဒါနဲ့ ကျူချင်... ငါ မေးမလို့။ နင့်ရဲ့ မွေးရာပါ ဝိညာဉ်စွမ်းအား က ဘယ်လောက်လဲ။ ဒီတစ်ခါတော့ ငါ့ရဲ့ ဝိညာဉ်စွမ်းအား အဆင့်က နင့်ထက် ပိုမြင့်လိမ့်မယ်လို့ ငါ ထင်ထားခဲ့တာ"

ကျူးကျူချင် - "မွေးရာပါ အဆင့် ၉ ဖြစ်သွားတယ်"

နင်းရုန်ရုန် ရင်ထဲမှနေ၍ ခေါင်းညိတ်လိုက်လေသည်။ သူမ၏ ခန့်မှန်းချက်နှင့် နီးစပ်လှပေသည်။ ကြည့်ရတာ ကျူချင် က သူမထက် အများကြီး ပိုပြီး ကြိုးစားပန်းစား ကျင့်ကြံခဲ့ပုံ ရလေသည်။

[နောက်ပိုင်းမှာ ငွေရှာဖို့ ဖလန်းဒါး မှာ တခြား အကြံဉာဏ်တွေ ရှိသေးပေမယ့် အဲဒါတွေက ရိုးသားတဲ့ နည်းလမ်းတွေတော့ မဟုတ်ဘူး။ နောက်မှ အဲဒါတွေနဲ့ ကြုံတဲ့အခါကျရင် ငါ ဆက်ရေးတော့မယ်။]

[အော်... ဒါနဲ့... ဒီနေ့ ရွှီးလိုင်ခဲ ဝင်ခွင့် စာမေးပွဲရဲ့ ပထမအဆင့် ဝိညာဉ်စွမ်းအား စစ်ဆေးမှုမှာ နင်းရုန်ရုန် နဲ့ ကျူးကျူချင် တို့ရဲ့ ဝိညာဉ်စွမ်းအား အဆင့်တွေက ငါ မျှော်လင့်ထားတာထက်ကို လုံးဝ ကျော်လွန်နေခဲ့တယ်။]

စူးမင်က သူတို့အကြောင်း ရေးသားလိုက်သည်ကို မြင်သောအခါ နင်းရုန်ရုန် နှင့် ကျူးကျူချင် တို့က သူ့ကို ဂရုတစိုက် တစ်ချက် ကြည့်လိုက်ကြပြီး ရင်ထဲမှနေ၍ တိတ်တဆိတ် ရယ်မောလိုက်ကြလေသည်။ အံ့အားသင့်ဖို့သာ ဆက်ပြီး ပြင်ထားလိုက်တော့လေ။

[နင်းရုန်ရုန် နဲ့ ကျူးကျူချင် တို့ရဲ့ ဝိညာဉ်စွမ်းအား အဆင့်တွေက အဆင့် ၂၆ နဲ့ အဆင့် ၂၇ ပဲ ဖြစ်သင့်ပေမယ့် ဒီနေ့ ပြသခဲ့တဲ့ အဆင့်တွေက အဆင့် ၃၄ နဲ့ အဆင့် ၃၅ ဖြစ်နေတယ်။ တစ်ခုခုတော့ မှားနေပြီ။ လုံးဝကို မှားယွင်းနေပြီ။]

[နင်းရုန်ရုန် နဲ့ ကျူးကျူချင် တို့ရဲ့ မွေးရာပါ ဝိညာဉ်စွမ်းအား နဲ့ဆိုရင် ဒီအသက်အရွယ်မှာ ဒီလောက် အဆင့်အထိ ရောက်ဖို့ဆိုတာ မဖြစ်နိုင်ဘူး။ အကယ်၍ သူတို့မှာ မွေးရာပါ ဝိညာဉ်စွမ်းအား အပြည့် သာ ရှိမယ်ဆိုရင်တော့ ဖြစ်နိုင်ခြေ ရှိပါတယ်။]

[ငါ ကျောင်းဝင်ခွင့် ရပြီး သူတို့နဲ့ ပိုရင်းနှီးလာတဲ့ အခါကျရင် သူတို့ရဲ့ မွေးရာပါ ဝိညာဉ်စွမ်းအား တွေက ဘယ်လောက်လဲ ဆိုတာကို သေချာပေါက် မေးကြည့်ရမယ်။ စနစ် ပြောခဲ့သလိုပဲ ငါ့ရဲ့ ဝင်ရောက် စွက်ဖက်မှုကြောင့် ဒီကမ္ဘာမှာ လိပ်ပြာအာနိသင် တစ်ခု ဖြစ်ပေါ်သွားတာများလား။]

[ဒါမှမဟုတ် ဒီကမ္ဘာက ငါ သိထားတဲ့ ကမ္ဘာရဲ့ မျဉ်းပြိုင်ကမ္ဘာ တစ်ခုများလား။]

[ဒါပေမဲ့ ရိုးရိုးသားသား ပြောရရင် အဲဒီ အကြောင်းပြချက် နှစ်ခုစလုံးကို ငါ မယုံဘူး။ စနစ် က ငါ့ကို လှည့်စားနေတယ်လို့ပဲ ငါ ခံစားရတယ်။]

[အကယ်၍ ငါ ရှိနေလို့ ရှောင်ဝူနဲ့ ထန်ဆန်း တို့ ပြောင်းလဲသွားတယ် ဆိုရင် ဒါက နားလည်ပေးလို့ ရပါတယ်။ ဒါပေမဲ့ နင်းရုန်ရုန် နဲ့ ကျူးကျူချင် တို့အပေါ် သက်ရောက်မှု ရှိလောက်အောင် ငါ့မှာ အခွင့်အရေးမှ မရခဲ့တာ။ ဘယ်လိုလုပ်ပြီး လိပ်ပြာအာနိသင် ဖြစ်လာနိုင်မှာလဲ။]

[မျဉ်းပြိုင်ကမ္ဘာ နဲ့ ပတ်သက်ပြီးတော့လည်း ဖြစ်နိုင်ခြေ အတော်လေး နည်းတယ်လို့ ငါ ထင်တယ်။]

[ကျစ်... ဒီ ခွေးစနစ် က ပဟေဋ္ဌိတွေပဲ ဆက်ဖွက်နေပြီး ငါ့ကို အမှန်တရား မပြောဘဲ ငါ့ဘာသာငါပဲ ခန့်မှန်းခိုင်းနေတာ။]

စနစ် - ...

ပိုင်ရှင်... မင်းရဲ့ ဒိုင်ယာရီထဲမှာ ငါ့အကြောင်း မကောင်းပြောနေတာ တကယ်ပဲ အဆင်ပြေရဲ့လား။ ငါ မင်းကို မြင်နေရတယ်နော်။

နင်းရုန်ရုန် က ရင်ထဲမှနေ၍ တိတ်တဆိတ် ရယ်မောလိုက်လေသည်။ "နင်က ငါတို့အပေါ် တကယ်ပဲ သက်ရောက်မှု မရှိခဲ့ပါဘူး။ ဒါပေမဲ့ နင့်ရဲ့ စနစ် က နင့်အတွက် လုပ်ပေးခဲ့တာလေ။ စနစ် ရဲ့ ရည်ရွယ်ချက်ကို ကြည့်ရရင် နင့်ရဲ့ ကောင်းကျိုးအတွက် လုပ်ပေးနေတာပဲ"

ရှောင်ဝူက ဒိုင်ယာရီမှတစ်ဆင့် ထိုမိန်းကလေး နှစ်ဦးကို ဆက်လက် မေးမြန်းလိုက်လေသည်။ "အကယ်၍ အစ်ကိုက နင်တို့ရဲ့ မွေးရာပါ ဝိညာဉ်စွမ်းအား က ဘယ်လောက်လဲလို့ မေးလာရင် နင်တို့ ဘယ်လို ဖြေကြမလဲ"

နင်းရုန်ရုန် - "အမှန်တိုင်းပဲ ဖြေလိုက်မယ်။ ဘာပဲဖြစ်ဖြစ် ဒါက စနစ် ရဲ့ အမှားပဲလေ။ ပြီးတော့ စူးမင်ကသာ တကယ် စစ်ဆေးချင်ရင် သူ ရှာတွေ့နိုင်လောက်တယ်။ လိမ်ပြောတာက ပိုဆိုးသွားလိမ့်မယ်"

ကျူးကျူချင် - "ငါလည်း အဲဒီလို ထင်တယ်။ နောက်ပိုင်း စူးမင် ဘယ်လိုတွေးမလဲ ဆိုတာကိုတော့ ငါတို့ ထိန်းချုပ်လို့ မရဘူးလေ။ ငါတို့ရဲ့ မွေးရာပါ ဝိညာဉ်စွမ်းအား တွေက သူ သိထားတာနဲ့ မတူရုံလေးနဲ့ ငါတို့ အားလုံးဆီမှာ စနစ် ရှိနေတယ်လို့ သူ လုံးဝ သံသယဝင်နိုင်မှာ မဟုတ်ဘူး။ အဲဒါက လက်တွေ့ မဆန်ဘူးလေ"

ရှောင်ဝူ - "ဒါဆိုရင် အရာအားလုံးကို စနစ် ဆီ လွှဲထားလိုက်ပြီး စူးမင်ကို သူ ဘယ်လို လှည့်စားမလဲ ဆိုတာကိုပဲ ကြည့်ကြတာပေါ့"