အခန်း (၈) - ယွီရှောင်ကန်း၏ အမြွှာဝိညာဉ် သီအိုရီကြောင့် လူသတ်ချင်စိတ် ပေါ်လာသော ထန်ဆန်း

ယွီရှောင်ကန်းသည် အနည်းငယ် စိတ်လောနေသော်လည်း အဘိုးဂျက် ခပ်ဝေးဝေးသို့ ရောက်သွားသည်အထိ စောင့်ဆိုင်းလိုက်ပြီးမှ ထန်ဆန်းနှင့် စူးမင်တို့ကို "သွားကြမယ်၊ ကျောင်းအပ်တဲ့ ကိစ္စတွေကို အရင်ဆုံး သွားလုပ်ကြတာပေါ့" ဟု ပြောလိုက်လေသည်။

ကျောင်းအပ်နှံရေး ကိစ္စရပ်များ ပြီးစီး၍ ရုံးခန်းအဆောက်အအုံထဲမှ ထွက်လာပြီးနောက်တွင်မူ ယွီရှောင်ကန်း ဆက်လက်၍ သည်းမခံနိုင်တော့ပေ။

ယွီရှောင်ကန်းက မေးစေ့ကို အနည်းငယ် မော့ကာ ဂုဏ်ယူဝင့်ကြွားဟန်ဖြင့် ထန်ဆန်းအား "ထန်ဆန်း... ငါ့ကို ဆရာတစ်ယောက်အဖြစ် လက်ခံနိုင်မလား" ဟု မေးလိုက်သည်။

[လာပြီ လာပြီ။ ယွီရှောင်ကန်းက တကယ်ပဲ ထန်ဆန်းကို တပည့်အဖြစ် လက်ခံချင်နေတာပဲ။]

"အမ်"

ထန်ဆန်း အနည်းငယ် ဇဝေဇဝါ ဖြစ်သွားရသည်။ ဒီလောက်တောင် ရုတ်တရက်ဆန်လွန်းသလား။ သူ တစ်ခုခု ပြန်ပြောချင်သော်လည်း ဘယ်လို စကားစရမှန်း မသိဖြစ်နေသည်။

ထန်ဆန်း တွေဝေနေသည်ကို မြင်သောအခါ ယွီရှောင်ကန်းက စိတ်မဆိုးပေ။ မည်သို့ပင်ဆိုစေ အသက်ခြောက်နှစ်အရွယ် ကလေးတစ်ယောက်အနေဖြင့် သီအိုရီသခင်ကြီးဖြစ်သော သူ၏အကြောင်းကို မသိခြင်းမှာ သာမန်ကိစ္စရပ်တစ်ခုသာ ဖြစ်လေသည်။

ယခုအချိန်သည် သူ၏ အရည်အချင်းနှင့် ဗဟုသုတများကို ထုတ်ဖော်ပြသရန် အကောင်းဆုံးအချိန်ဖြစ်ပြီး ထန်ဆန်းက သူ့အား ဆရာတစ်ဆူအဖြစ် လက်ခံလာစေရန် လုပ်ဆောင်ရမည်ဟု သူ တွေးလိုက်သည်။

ယွီရှောင်ကန်းက ထန်ဆန်း၏ရှေ့တွင် ခေါက်တုံ့ခေါက်ပြန် လမ်းလျှောက်ရင်း အနည်းငယ် ဂုဏ်ယူဝင့်ကြွားသော လေသံဖြင့် သုံးသပ်ပြလေသည်။ "ငွေပြာမြက်ဝိညာဉ် ပိုင်ဆိုင်ထားတဲ့ ဝိညာဉ်သခင် အများအပြားကို ငါ လေ့လာစုံစမ်းခဲ့ဖူးတယ်။ ငွေပြာမြက်ဝိညာဉ် နိုးထလာတဲ့ ဝိညာဉ်သခင် အများစုရဲ့ ဝိညာဉ်စွမ်းအားက အများဆုံးမှ အဆင့် တစ် ထက် မပိုတတ်ကြဘူး။ ပြီးတော့ အများစုက ဝိညာဉ်စွမ်းအား လုံးဝကို မရှိကြတာ"

ထို့နောက် ယွီရှောင်ကန်းက ရပ်တန့်လိုက်ပြီး ထန်ဆန်းကို စိုက်ကြည့်ကာ "ဒါက ဘာကိုဆိုလိုတာလဲ သိလား" ဟု မေးလိုက်သည်။

ထန်ဆန်း၏ ရင်ထဲတွင် ဒိန်းခနဲ ဖြစ်သွားပြီး မကောင်းသော နိမိတ်တစ်ခုကို ခံစားလိုက်ရသော်လည်း သူက မသိကြောင်းသာ ခေါင်းခါပြလိုက်သည်။

"ဒါက မင်းရဲ့ မွေးရာပါ ဝိညာဉ်စွမ်းအား အပြည့်ဆိုတာ ပြဿနာ တစ်ခုခုရှိနေတယ်ဆိုတာကို ဆိုလိုတာပဲ။ ငွေပြာမြက်ကနေ နိုးထလာတဲ့ ဝိညာဉ်စွမ်းအားက မွေးရာပါ ဝိညာဉ်စွမ်းအား အပြည့်အထိ ရောက်နိုင်စရာ အကြောင်းကို မရှိတာ။ ငွေပြာမြက်က မျိုးဗီဇပြောင်းလဲသွားတယ်ဆိုရင်တောင် ဖြစ်နိုင်ခြေ အလွန်နည်းပါးတယ်။ ဒါပေမဲ့ မင်းက မွေးရာပါ ဝိညာဉ်စွမ်းအား အပြည့်ကို ပိုင်ဆိုင်ထားတယ်"

"ဆိုလိုတာက မင်းမှာ အမြွှာဝိညာဉ်တွေ ရှိနေရမယ်။ ပြီးတော့ မင်းရဲ့ နောက်ထပ်ဝိညာဉ်က အဆင့်အတော်လေး မြင့်မားပြီး ကျန်ရှိနေတဲ့ ဝိညာဉ်စွမ်းအားရဲ့ လိုအပ်ချက် ကွက်လပ်ကို ဖြည့်ဆည်းပေးနိုင်စွမ်း ရှိရမယ်"

စကားပြောဆိုပြီးနောက် ယွီရှောင်ကန်းက ထန်ဆန်းအား ယုံကြည်မှုအပြည့်ဖြင့် ကြည့်လိုက်သည်။ ဤကောင်လေးက သူ၏စကားများကြောင့် အံ့အားသင့်သွားမည်မှာ သေချာလှသည်။ သူ့ကိုသာ တပည့်အဖြစ် လက်ခံပြီး ဘွဲ့ရတုံလော်တစ်ပါးအဖြစ် ပြုစုပျိုးထောင်ပေးနိုင်မည်ဆိုပါက ဤတိုက်ကြီးပေါ်တွင် သူ့ကို မည်သူက အထင်သေးရဲတော့မည်နည်း။

ထိုစကားကို ကြားသောအခါ ထန်ဆန်း၏ နှလုံးသားမှာ တုန်ခါသွားရသည်။ သူက ညာဘက်လက်ကို ကျောဘက်တွင် ဖုံးကွယ်ထားလိုက်ပြီး မည်သို့ လုပ်ဆောင်ရမည်ကို တိတ်တဆိတ် စဉ်းစားနေလေသည်။

သူ၏ အမြွှာဝိညာဉ်များအကြောင်းကို အခြားသူများအား ထုတ်ဖော်မပြရန် ဖခင်ဖြစ်သူက မှာကြားထားခဲ့သော်လည်း ကျောင်းတက်ရမည့် ပထမဆုံးနေ့မှာပင် ပေါ်လွင်သွားလိမ့်မည်ဟု သူ ထင်မှတ်မထားခဲ့ပေ။ သူ ဘယ်လိုလုပ်ရမလဲ။ နှုတ်ပိတ်ဖို့အတွက် သတ်ပစ်ရမလား။

တစ်ချိန်တည်းမှာပင် သူက စူးမင်ကိုလည်း တိတ်တဆိတ် အကဲခတ်လိုက်လေသည်။

ထန်ဆန်း တွေဝေနေသည်ဟု ယွီရှောင်ကန်းက ခံစားလိုက်ရသည်။ အခြေအနေက အတော်လေး ဟန်ကျနေပြီဖြစ်ရာ နောက်ထပ် အနည်းငယ် တွန်းအားပေးရန် လိုအပ်သေးသည်ဟု တွေးလိုက်သည်။ "ငါ ဘယ်သူလဲဆိုတာ မင်းသိလား"

"ငါ့နာမည်က ယွီရှောင်ကန်း။ ဒီတိုက်ကြီးတစ်ခုလုံးရဲ့ သီအိုရီမဟာသခင်ကြီးပဲ။ ဝိညာဉ်ကျင့်ကြံတာနဲ့ ပတ်သက်တဲ့ ဗဟုသုတအများစုကို ငါ သိထားတယ်။ ငါ့နောက်ကိုသာ လိုက်ခဲ့ပါ၊ ငါသိထားသမျှ အရာအားလုံးကို မင်းဆီ သင်ပေးမယ်"

"မင်းရဲ့ ငွေပြာမြက်ဝိညာဉ်ကို အားလုံးက အသုံးမကျတဲ့ ဝိညာဉ်လို့ သတ်မှတ်ထားကြပေမယ့် ငါ့အတွက်ကတော့ အသုံးမကျတဲ့ ဝိညာဉ်ဆိုတာ မရှိဘူး၊ အသုံးမကျတဲ့ ဝိညာဉ်သခင်သာ ရှိတယ်လို့ ယုံကြည်တယ်။ မင်းသာ ကြိုးကြိုးစားစား ကျင့်ကြံမယ်ဆိုရင် ငွေပြာမြက်ကတောင် ကြီးကျယ်ခမ်းနားတဲ့ အောင်မြင်မှုတွေကို ရရှိနိုင်စွမ်း ရှိတယ်"

ထို အသုံးမကျတဲ့ ဝိညာဉ်ဆိုတာ မရှိဘူး၊ အသုံးမကျတဲ့ ဝိညာဉ်သခင်သာ ရှိတယ် ဟူသော စကားက ထန်ဆန်းကို နက်ရှိုင်းစွာ တုန်လှုပ်သွားစေခဲ့သည်။

ငွေပြာမြက်ဝိညာဉ် နိုးထလာချိန်မှစ၍ ဝိညာဉ်နန်းတော်မှ ဝိညာဉ်သခင်ဖြစ်စေ၊ သူ၏ဖခင်ဖြစ်စေ၊ အခြားသူများဖြစ်စေ မည်သူတစ်ဦးတစ်ယောက်ကမျှ ငွေပြာမြက်က အောင်မြင်မှု ကြီးကြီးမားမား ရရှိနိုင်လိမ့်မည်ဟု မယုံကြည်ခဲ့ကြပေ။

သူတို့၏ အမြင်တွင် ငွေပြာမြက်မှာ အသုံးမကျသော ဝိညာဉ်အဖြစ်သာ လူသိများလေသည်။ ဝိညာဉ်စွမ်းအားရှိ၍ ကျင့်ကြံနိုင်မည်ဆိုလျှင်ပင် အမြင့်ဆုံးရောက်နိုင်မည့် အတိုင်းအတာက သိပ်မမြင့်မားလှပေ။ သို့သော် သူ၏ရှေ့မှ သခင်ကြီးကတော့ ထိုသို့ တွေးထင်ထားပုံ မပေါ်ပေ။

ထို့အပြင် ယွီရှောင်ကန်းက သူ့ကိုယ်သူ သီအိုရီမဟာသခင်ကြီးဟု ပြောဆိုထားခဲ့သည်။ သူ၏ မွေးရာပါ ဝိညာဉ်စွမ်းအား အပြည့်နှင့် ငွေပြာမြက်ဝိညာဉ်တို့ကို ကြည့်ကာ သူ့တွင် နောက်ထပ်ဝိညာဉ်တစ်ခု ရှိနေကြောင်း ကောက်ချက်ချနိုင်စွမ်းရှိရာ ဤသူ့ထံတွင် အရည်အချင်း တစ်စုံတစ်ရာ သေချာပေါက် ရှိနေမည်မှာ သေချာလှသည်။

ထန်ဆန်းက သူ၏စိတ်ထဲတွင် အကျိုးအကြောင်းများကို ချိန်ဆနေစဉ်မှာပင် စူးမင်က ယခုဖြစ်ပျက်နေသည်များကို မှတ်တမ်းတင်ရန် ဒိုင်ယာရီထဲ၌ ဆက်လက်ရေးသားနေလေသည်။

[ကျွတ် ကျွတ် ကျွတ်... ယွီရှောင်ကန်းက သေမင်းရဲ့ နှုတ်ခမ်းဝကို လျှောက်သွားခဲ့မှန်း သူကိုယ်တိုင်တောင် မသိလိုက်ဘူး။]

ဤစာကြောင်း ထွက်ပေါ်လာသည်နှင့်တပြိုင်နက် အမျိုးသမီးဇာတ်ဆောင်များ၏ အာရုံစိုက်မှုကို ချက်ချင်းပင် ဖမ်းစားသွားလေသည်။

[ခုနကလေးတင် ယွီရှောင်ကန်းက သူ့ရဲ့ သီအိုရီ ဗဟုသုတတွေကို ထုတ်ကြွားဖို့အတွက် ထန်ဆန်းကို သုံးသပ်ပြနေတာလေ။ ငွေပြာမြက်ဝိညာဉ် ပိုင်ဆိုင်ထားတဲ့ ဝိညာဉ်သခင် အများအပြားကို သူ လေ့လာခဲ့ဖူးပြီး ဘယ်သူမှ ဝိညာဉ်စွမ်းအား အဆင့်တစ်ထက် မပိုဘူးတဲ့။ အဲဒါက ထန်ဆန်းဆီမှာ ကျန်နေတဲ့ ဝိညာဉ်စွမ်းအား ကွက်လပ်ကို ဖြည့်ပေးနိုင်တဲ့ နောက်ထပ်ဝိညာဉ်တစ်ခု သေချာပေါက် ရှိနေပြီး မွေးရာပါ ဝိညာဉ်စွမ်းအား အပြည့်ကို ပိုင်ဆိုင်သွားစေတာလို့ ဆိုလိုတယ်ဆိုပဲ။]

[တကယ်တော့ ယွီရှောင်ကန်းက တိုက်ဆိုင်စွာနဲ့ပဲ အဖြေမှန်ကို ခန့်မှန်းမိသွားတာ။ ထန်ဆန်းမှာ တကယ်ပဲ နောက်ထပ်ဝိညာဉ်တစ်ခု ရှိနေတာကိုး။ အဲဒါက ဟောက်ထျန်းတူပဲ။]

တစ်ချိန်တည်းမှာပင် အဝေးရှိ အပြာရောင်အာဏာရှင် ကျောင်းတော်မှ လျိုအာလုံက ဤအချက်အတွက် အလွန်ဂုဏ်ယူနေမိသည်။ မြင်လား၊ ရှောင်ကန်းရဲ့ သီအိုရီက တကယ်ကို ပြိုင်ဘက်ကင်းပါပဲ။ ထန်ဆန်းမှာ အမြွှာဝိညာဉ် နိုးထလာတာကို ချက်ချင်း ခန့်မှန်းနိုင်ခဲ့တယ်လေ။

ဒါပေမဲ့ စူးမင်က ဘာလို့ ရှောင်ကန်းကို တိုက်ဆိုင်စွာ ခန့်မှန်းမိတာ လို့ ပြောရတာလဲ။ ဒီသုံးသပ်ချက်က အပြစ်အနာအဆာကင်းနေတာ မဟုတ်ဘူးလား။

ဒိုင်ယာရီ ရရှိထားသော အခြားအမျိုးသမီးများမှာလည်း အလားတူ သံသယ ဝင်နေကြလေသည်။

ဒိုင်ယာရီက ဆက်လက်၍ ပေါ်လာသည်။

[ယွီရှောင်ကန်းက ထန်ဆန်းမှာ အမြွှာဝိညာဉ် ရှိနေတာကို ခန့်မှန်းမိသွားခဲ့ပေမယ့် အဲဒါက သူ့ကို ငရဲပြည်ရဲ့ အစွန်းနားကို ရောက်သွားစေခဲ့တာပဲ။]

[ထန်ဆန်းရဲ့ အမြွှာဝိညာဉ် လျှို့ဝှက်ချက်ကို ခန့်မှန်းမိသွားတာက ထန်ဆန်းအနေနဲ့ ယွီရှောင်ကန်းအပေါ် လူသတ်ချင်စိတ် ပေါ်လာစေခဲ့တာလေ။ ထန်ဆန်းက သူ့ရဲ့ ညာဘက်လက်ကို ကျောဘက်မှာ ချက်ချင်းဖုံးကွယ်လိုက်ပြီး ငါ့ကိုလည်း တိတ်တဆိတ် အကဲခတ်လိုက်တာ ငါ သတိထားမိတယ်။ နှုတ်ပိတ်ဖို့အတွက် သတ်ပစ်သင့်မသတ်ပစ်သင့် သူ စဉ်းစားနေပုံပဲ။ တကယ်ကို ကြောက်စရာကောင်းတယ်။]

[သဘောထား နည်းနည်းလေး တိုက်ဆိုင်မှုမရှိတာနဲ့ သတ်ပစ်ချင်နေတာက ထန်ဆန်းအတွက်တော့ သာမန်ကိစ္စတစ်ခုပါပဲ။ ဘာပဲဖြစ်ဖြစ် ထန်ဂိုဏ်းက လုပ်ကြံသတ်ဖြတ်သူတွေကနေ ဆင်းသက်လာတာလေ။ ကိုယ့်အတွက် အန္တရာယ် နည်းနည်းလေး ရှိနေရင်တောင် ဖယ်ရှားပစ်ရမယ်ဆိုတဲ့ စည်းမျဉ်းရှိတယ်။]

[ထန်ဂိုဏ်းရဲ့ လျှို့ဝှက်ကောင်းကင်ကျမ်းရဲ့ အခြေခံစည်းမျဉ်းတွေထဲမှာ စာကြောင်းတစ်ကြောင်း ရှိသေးတာ ငါ မှတ်မိတယ်။ အပြည့်အဝ မယုံကြည်ရတဲ့ ဘယ်သူ့ကိုမဆို ကိုယ့်ရဲ့ တကယ့်စွမ်းအား အစစ်အမှန် ဘယ်လောက်ရှိလဲဆိုတာ ပေးမသိစေနဲ့တဲ့။]

[နောက်ထပ် စာကြောင်းတစ်ကြောင်းကကျတော့ ပြိုင်ဘက်က ရန်သူလို့ သတ်မှတ်လိုက်ပြီဆိုတာနဲ့ သေလမ်းတစ်ခု ရှိနေသရွေ့ သနားညှာတာမှု မပြရဘူး၊ မဟုတ်ရင် ကိုယ့်အတွက် ပြဿနာတွေ ပိုများလာရုံပဲ ရှိမယ်တဲ့။]

[အခု ထန်ဆန်းဆီမှာ လူသတ်ချင်စိတ်တွေ ဖြစ်ပေါ်နေပြီ။ ဘာပဲဖြစ်ဖြစ် ယွီရှောင်ကန်းက ထန်ဆန်းရဲ့ လျှို့ဝှက်ချက်ကို ချက်ချင်းကြီး ခန့်မှန်းမိသွားတာဆိုတော့ သူ့အတွက် သေလမ်းကို ဖန်တီးပေးလိုက်သလို ဖြစ်သွားတာပေါ့။]

[ဒါပေမဲ့ ထန်ဆန်း မသိသေးတာက ယွီရှောင်ကန်းရဲ့ အမြွှာဝိညာဉ် သီအိုရီက တကယ်တော့ မှားယွင်းနေတယ်ဆိုတာပဲ။]

[နောက်ပိုင်းကျရင် ထန်ဆန်းက သူ့ရဲ့ ငွေပြာမြက်ဝိညာဉ်အပေါ် ယုံကြည်မှု ပျောက်ဆုံးသွားပြီး ဟောက်ထျန်းတူကိုပဲ ပြောင်းလဲကျင့်ကြံဖို့ ဆုံးဖြတ်လိုက်ပေမယ့် အဆိပ်ဒုံလော် တူးကူပေါ်က တားဆီးခဲ့တယ်။]

[တူးကူပေါ်က ရှေးဟောင်းစာအုပ်တစ်အုပ်မှာ ဖတ်ဖူးတဲ့အကြောင်း ပြောပြခဲ့တယ်။ အမြွှာဝိညာဉ်တွေ ဖြစ်ပေါ်လာဖို့အတွက် အခြေအနေ နှစ်ခု ရှိတယ်တဲ့။]

[တစ်ခုက မိဘနှစ်ပါးစလုံးရဲ့ ဝိညာဉ်အရည်အသွေးတွေက ဆင်တူနေရမယ်။ နောက်တစ်ခုက မိဘနှစ်ပါးစလုံးရဲ့ ဝိညာဉ်သတ္တိတွေက အရမ်း ကွာခြားနေရမယ်။]

[ငွေပြာမြက်နဲ့ ဟောက်ထျန်းတူကြားက ဝိညာဉ်သတ္တိ သိသိသာသာ ကွာခြားနေမှုကို မြင်တွေ့နိုင်ပြီး နောက်ထပ် အခြေအနေတစ်ခုဖြစ်တဲ့ ဝိညာဉ်အရည်အသွေး ဆင်တူမှုကလည်း တကယ်တော့ ကိုက်ညီနေတာပဲ။]

[ဘာလို့လဲဆိုတော့ ထန်ဆန်းရဲ့ ငွေပြာမြက်က သာမန် ငွေပြာမြက်မှ မဟုတ်တာ။ သူ့ရဲ့ ငွေပြာမြက်ဝိညာဉ်က ငွေပြာဧကရာဇ် သွေးဆက်ကို ပိုင်ဆိုင်ထားတယ်။ နိုးထမလာသေးလို့သာ ဖြစ်ရမယ်။ အဲဒီရဲ့ အရည်အသွေးက ဟောက်ထျန်းတူနဲ့ ယှဉ်နိုင်စွမ်းရှိလို့ သူ့ဆီမှာ အမြွှာဝိညာဉ်တွေ နိုးထလာခဲ့တာပဲ။]

[ဒါပေမဲ့ ခြွင်းချက်တွေတော့ ရှိသေးတယ်။ ဥပမာအနေနဲ့ လက်ရှိ သာသနာပိုင် ပုပ် ဘီဘီတုန်းရဲ့ အမြွှာဝိညာဉ်တွေဆိုရင် နှစ်ခုစလုံးက မိစ္ဆာပင့်ကူ အမျိုးအစား ဝိညာဉ်တွေပဲ။ အဲဒါက တူးကူပေါ်ပြောတဲ့ ဝိညာဉ်သတ္တိတွေ အရမ်းကွာခြားနေရမယ် ဆိုတဲ့ အခြေအနေနဲ့ မကိုက်ညီဘူးလေ။]

[ဒီနေရာမှာ ငါ ကိုယ်တိုင်ယုံကြည်တာက အမြွှာဝိညာဉ်တွေ ဖြစ်ပေါ်လာဖို့ဆိုရင် မိဘတွေရဲ့ ဝိညာဉ်အရည်အသွေးတွေ ဆင်တူဖို့ လိုအပ်တဲ့အပြင် သူတို့ရဲ့ ဝိညာဉ်သတ္တိတွေကလည်း အရမ်းကို ကွာခြားနေရမယ်၊ ဒါမှမဟုတ် အမြွှာဝိညာဉ် ဖြစ်ပေါ်လာနိုင်လောက်တဲ့အထိ အရမ်းကို ဆင်တူနေရမယ်။]

[အဟမ်း အဟမ်း... ငါ လမ်းနည်းနည်း လွဲသွားပြီပဲ။ အခု ထန်ဆန်းနဲ့ ယွီရှောင်ကန်းဆီ ပြန်သွားကြတာပေါ့။]

ကောင်မလေးများအားလုံးမှာ “ဟင့်အင်း လမ်းမလွဲပါဘူး၊ ဆက်ပြောပါ၊ ငါတို့ ဖတ်ရတာ အရမ်းသဘောကျလို့ပါ။” ဟု ညည်းတွားလိုက်မိတော့လေသည်။