အခန်း (၇၉) - စူးမင် အံ့အားသင့်သွားခြင်း၊ နင်းရုန်ရုန်နှင့် ကျူးကျူချင်တို့မှာ တစ်ခုခု မှားယွင်းနေသည်

စူးမင်က ကျူးကျူချင်နှင့် နင်းရုန်ရုန်တို့ ထွက်လာသည်ကို မြင်သောအခါ သူ၏မျက်လုံးများ အရောင်လက်သွားလေသည်။ သူတို့က တကယ်ကို လှပလွန်းလှသည်။ အထူးသဖြင့် ကျူးကျူချင်၏ ရင်ဘတ်ပေါ်ရှိ ဂုဏ်ယူဝင့်ကြွားဖွယ်ရာ မို့မောက်နေမှုကြီးက 'အောက်ကိုငုံ့ကြည့်လိုက်တဲ့အခါ ကိုယ့်ခြေချောင်းလေးတွေကို မမြင်ရဘူးဆိုရင် ပြိုင်ဘက်ကင်း အလှပိုင်ရှင်တစ်ယောက်ပဲ' ဟူသော စကားကို အပြည့်အဝ သက်သေပြနေလေသည်။

နင်းရုန်ရုန်မှာလည်း ချောမောလှပသော်လည်း တစ်ခုတည်းသော အားနည်းချက်မှာ ဤအရွယ်တွင် သူမ၏ ရင်ဘတ်မှာ ပြန့်ပြူးနေသေးပြီး အများဆုံး ပန်းသီးငယ် အရွယ်အစားခန့်သာ ရှိသေးခြင်းပင်။ သို့သော် လာမည့် ငါးနှစ်အကြာတွင် နင်းရုန်ရုန်၏ ခန္ဓာကိုယ်အချိုးအစားမှာ အတော်လေး ပြီးပြည့်စုံလာမည်ဖြစ်ရာ မျှော်လင့်စောင့်စားသင့်ပေသည်။

ချက်ချင်းပင် စူးမင်က သူ၏လက်ထဲရှိ သလင်းကျောက်လုံးကို နင်းရုန်ရုန်ထံသို့ ကမ်းပေးလိုက်ရာ နင်းရုန်ရုန်က သူ့ကို မျက်စိတစ်ဖက် မှိတ်ပြလိုက်လေသည်။

စူးမင် အနည်းငယ် ထူးဆန်းသွားသည်ဟု ခံစားလိုက်ရသည်။ နင်းရုန်ရုန်၌ မိန်းမဆိုးလေး စရိုက် ရှိသည်ဆိုသော်လည်း သူစိမ်းတစ်ယောက်ကို ဒီလိုမျိုး မျက်စိမှိတ်ပြပါ့မလား။

တစ်ခုခုတော့ မှားနေပြီ။ တကယ်ကို လွဲချော်နေပြီ။

ထို့နောက် နင်းရုန်ရုန်က သလင်းကျောက်လုံးထဲသို့ ဝိညာဉ်စွမ်းအားများကို ထည့်သွင်းလိုက်ရာ ထန်ဆန်းထက်ပင် ပိုမိုတောက်ပသော အလင်းရောင်များ ထွက်ပေါ်လာလေသည်။ နောက်ထပ် ပါရမီရှင် ဝိညာဉ်သခင် တစ်ယောက်ပါလား။ အဆင့် ၃၄ တဲ့။

ယခုအခါ လီယွီဆုန်းနှင့် ထန်ဆန်းတို့ တည်ငြိမ်မနေနိုင်တော့ချေ။

ယခုနှစ်တွင် အသက်အရွယ်နှင့် မလိုက်ဖက်အောင် မြင့်မားလှသော ဝိညာဉ်စွမ်းအားအဆင့်များ ပိုင်ဆိုင်ထားသည့် ပါရမီရှင် မကောင်းဆိုးဝါးများ အများအပြား ထွက်ပေါ်လာသောကြောင့် လီယွီဆုန်း အလွန်အမင်း အံ့အားသင့်သွားရလေသည်။

သူတို့၏ ရွှီးလိုင်ခဲ ကျောင်းတော်က တကယ်ပဲ တိုးတက်ကြီးပွားမည့်အချိန် ရောက်လာပြီထင်သည်။

ထန်ဆန်းကမူ မယုံကြည်နိုင်သော အမူအရာ ဖြစ်နေလေသည်။ ရှောင်ဝူနှင့် စူးမင်တို့က သူ့ထက် ပိုမိုအစွမ်းထက်နေခြင်းကို နားလည်ပေး၍ ရသော်လည်း အခုမှ ရောက်လာသည့် ဒီကောင်မလေးကကော ဘယ်လိုလုပ်ပြီး ဝိညာဉ်စွမ်းအားအဆင့် ပိုမြင့်နေရတာလဲ။

သိုင်းဝိညာဉ်နှစ်ခု ပိုင်ဆိုင်ထားသဖြင့် သူ၏ ကျင့်ကြံခြင်းအမြန်နှုန်းက သာမန် ဝိညာဉ်သခင်များထက် ပိုမြန်မည်ဟု ဆရာဖြစ်သူက ပြောခဲ့သည် မဟုတ်ပါလော။ ဘာကြောင့် ချွင်းချက်တွေ ထပ်ရှိနေရပြန်တာလဲ။

ထို့အပြင် လီယွီဆုန်း၏ အရိုးစမ်းသပ်မှုအရ သူ့ရှေ့ရှိ ကောင်မလေးက သူ့ထက်ပင် အသက်ငယ်နေသေးရာ ထန်ဆန်း၏ ရင်ထဲတွင် အနည်းငယ် မချိတင်ကဲ ဖြစ်သွားရလေသည်။

သေချာပေါက် အံ့အားအသင့်ဆုံးလူမှာ စူးမင်ပင် ဖြစ်လေသည်။ နင်းရုန်ရုန်က အဆင့် ၃၄ တဲ့လား။ ဘယ်လိုလုပ်ပြီး ဖြစ်နိုင်မှာလဲ။

နင်းရုန်ရုန်က စူးမင်၏ တုံ့ပြန်မှုကို တိတ်တဆိတ် အကဲခတ်နေခဲ့ပြီး သူ၏မျက်နှာပေါ်ရှိ မယုံကြည်နိုင်သော အမူအရာကို မြင်လိုက်ရသောအခါ သူမ၏ ရည်ရွယ်ချက် အောင်မြင်သွားပြီဟု ခံစားလိုက်ရလေသည်။

ဤကိစ္စ ပေါ်သွားမည်လား ဆိုသည်မှာ စနစ် က မည်သို့ ရှင်းပြမည်နည်း ဆိုသည့်အပေါ်တွင်သာ မူတည်ပြီး သူမနှင့် ဘာမှမဆိုင်တော့ချေ။

စူးမင်၏ အမူအရာကို မြင်သောအခါ ရှောင်ဝူကလည်း ရင်ထဲမှနေ၍ တိတ်တဆိတ် ရယ်မောလိုက်ပြီး နင်းရုန်ရုန်ကို လှမ်းကြည့်လိုက်လေသည်။ သူတို့နှစ်ဦးက အချင်းချင်း အဓိပ္ပာယ်ပါပါ အကြည့်ချင်း ဖလှယ်လိုက်ကြသည်။ သူတို့နှစ်ဦးစလုံးက သူတို့ရှေ့ရှိ ဒိုင်ယာရီကို မြင်နေရသည် မဟုတ်ပါလော။

ဤအချိန်တွင် စူးမင် လုံးဝ ဇဝေဇဝါ ဖြစ်နေလေသည်။ သူက အလွန်အမင်း အံ့အားသင့်နေသော်လည်း တည်ငြိမ်မှုကို ထိန်းထားပြီး ကျူးကျူချင်၏ ဝိညာဉ်စွမ်းအားအဆင့်က ဘယ်လောက်ရှိမည်ကို အရင်ကြည့်ရန် လိုအပ်လေသည်။

ကျူးကျူချင်ကလည်း သဘာဝကျကျပင် နင်းရုန်ရုန်၏ လက်ထဲမှ သလင်းကျောက်လုံးကို ယူလိုက်ပြီး အနည်းငယ် ပြုံးကာ ခေါင်းညိတ်ပြလိုက်လေသည်။

ဝိညာဉ်စွမ်းအား ထည့်သွင်းလိုက်သောအခါ အလင်းရောင်များ ဖြာထွက်လာလေသည်။ အဆင့် ၃၅ ပါလား။

ဤအချိန်တွင် တစ်ခုခုတော့ တကယ်ကို မှားယွင်းနေပြီဆိုတာကို စူးမင် အသေအချာ သိလိုက်လေပြီ။

နင်းရုန်ရုန်နှင့် ကျူးကျူချင်တို့၏ မွေးရာပါ ဝိညာဉ်စွမ်းအားဖြင့်ဆိုလျှင် မနားတမ်း ကျင့်ကြံနေပါကတောင်မှ ဤအသက်အရွယ်တွင် ဤမျှလောက် ဝိညာဉ်စွမ်းအားအဆင့်သို့ ရောက်ရှိရန် လုံးဝ မဖြစ်နိုင်ချေ။

နင်းရုန်ရုန်မှာလည်း မျက်လုံးများ အနည်းငယ် ပြူးကျယ်သွားပြီး ပန်းနုရောင် နှုတ်ခမ်းလေး အနည်းငယ် ဟဟလေး ဖြစ်သွားကာ ကျူးကျူချင်ကို လှမ်းကြည့်လိုက်လေသည်။ ဒါက ဘယ်လိုလုပ်ပြီး ဖြစ်နိုင်မှာလဲ။ ကျူးကျူချင်ရဲ့ ဝိညာဉ်စွမ်းအားအဆင့်က သူမထက် တစ်ဆင့်တောင် ပိုမြင့်နေတယ်တဲ့လား။

ဤအချိန်တွင် နင်းရုန်ရုန်မှာ အတော်လေး စိတ်ဓာတ်ကျသွားလေသည်။ မူရင်းဇာတ်လမ်းထဲတွင် ကျူးကျူချင်၏ မွေးရာပါ ဝိညာဉ်စွမ်းအားက အဆင့် ၇ သာရှိကြောင်း စူးမင် အရင်က ရေးခဲ့ဖူးသဖြင့် သူမ၏ ခန့်မှန်းချက်အရဆိုလျှင် ကျူးကျူချင်၏ မွေးရာပါ ဝိညာဉ်စွမ်းအားက အဆင့် ၉ လောက်သာ ရှိသင့်လေသည်။

ထိုကာလအတွင်း စနစ်မှ မြှင့်တင်ပေးလိုက်သော ဝိညာဉ်စွမ်းအားများကြောင့် သူမ၏ မွေးရာပါ ဝိညာဉ်စွမ်းအားမှာ အဆင့် ၉ သို့မဟုတ် အဆင့် ၁၀ အထိ တက်သွားနိုင်သော်လည်း သူမကိုယ်တိုင်၌ ကျင့်ကြံခြင်းအမြန်နှုန်းကို မြှင့်တင်ပေးနိုင်သော ကျောက်စိမ်းရောင် ဆွဲကြိုး ရှိနေပါလျက်နှင့် ရှုံးနိမ့်သွားခဲ့ရသည်။

မနေ့က သူမ၏ ကြီးမားသော မျှော်မှန်းချက် ကို ပြန်တွေးမိပြီး သူမ၏ မျက်နှာလေး အနည်းငယ် နီမြန်းသွားလေသည်။ ဤတစ်ကြိမ်တွင် သူမ၏ စွမ်းအားက ကျူးကျူချင်ထက် သေချာပေါက် ပိုမြင့်နေလိမ့်မည်ဟု သူမ ထင်ထားခဲ့ခြင်းပင်။

မမျှော်လင့်ဘဲ သူမ၏ ယုန်ဖြူကြီး က အခြားသူများကို မယှဉ်နိုင်ရုံသာမက သူမ၏ စွမ်းအားကပါ နိမ့်ကျနေသဖြင့် ၎င်းက ထပ်ဆင့် ထိုးနှက်ချက်တစ်ခုပင် ဖြစ်လေသည်။

ချက်ချင်းပင် နင်းရုန်ရုန်က ကျူးကျူချင်အပေါ် လေးစားအားကျသော အမူအရာကို ပြသလိုက်လေသည်။ ကျူးကျူချင်၏ ဝိညာဉ်စွမ်းအားအဆင့်က သူမထက် ပိုမြင့်နေသည်ဆိုမှတော့ ကျူးကျူချင်၏ ကြိုးစားအားထုတ်မှုများက သူမ ယှဉ်နိုင်သည့် အတိုင်းအတာထက် ကျော်လွန်နေကြောင်းကို ဆိုလိုနေခြင်းပင်။

မူလက သူမ၏ ကြိုးစားအားထုတ်မှုများက အတော်လေး ကြီးမားနေပြီဟု ထင်ထားခဲ့သော်လည်း တကယ်တမ်းတွင် ဘာမှမဟုတ်ကြောင်း သိလိုက်ရလေသည်။

အဲဒီအချိန်တုန်းက သူမ နေ့တိုင်း အချိန်အကြာကြီး ကျင့်ကြံနေတာကို ဖခင်ဖြစ်သူနဲ့ အဘိုးနှစ်ဦးက မြင်တော့ သူမရဲ့ အပြုအမူတွေက အနည်းငယ် ပုံမှန်မဟုတ်လို့ သူမရဲ့ ဦးနှောက်များ တစ်ခုခု ဖြစ်သွားသလားလို့တောင် တွေးခဲ့ကြသေးတယ်။ အခု ပြန်တွေးကြည့်တော့ သူမ ရယ်ချင်စိတ်ကို မနည်း ထိန်းထားရလေသည်။

သေချာတာပေါ့။ သူမရဲ့ ဖခင်နဲ့ အဘိုးနှစ်ဦးက သူမအပေါ် အရမ်းကို ကောင်းလွန်းနေတုန်းပါပဲ။

ဤအချိန်တွင် စူးမင်၏ မျက်နှာမှာ လေးနက်တည်ကြည်နေလေသည်။ "စနစ်... ဘာတွေ ဖြစ်နေတာလဲ ရှင်းပြစမ်း။ နင်းရုန်ရုန်နဲ့ ကျူးကျူချင်တို့ရဲ့ အဆင့်တွေက ဘာလို့ ငါ သိထားတာနဲ့ ကွာခြားနေရတာလဲ။ ဒီကွာခြားချက်က အရမ်း ကြီးမားလွန်းတယ် မဟုတ်ဘူးလား။ သူတို့ရဲ့ မွေးရာပါ ဝိညာဉ်စွမ်းအားတွေနဲ့ဆိုရင် ဒီလောက်မြန်မြန် ကျင့်ကြံနိုင်ဖို့ ဆိုတာ လုံးဝ မဖြစ်နိုင်ဘူး"

[ဒင်... ပိုင်ရှင်ကြောင့် လိပ်ပြာအာနိသင် ဖြစ်ပေါ်သွားတာ ဖြစ်နိုင်ပါတယ်]

စူးမင် - "..."

စူးမင်က စကားမပြောနိုင်တော့ဘဲ "စနစ်... ငါက အရူးနဲ့ တူနေလို့လား။ ငါနဲ့ ထိတွေ့မှု ရှိခဲ့လို့ ဇာတ်လမ်းပြောင်းသွားပြီး ရှောင်ဝူနဲ့ ထန်ဆန်းတို့ရဲ့ စွမ်းအားတွေ အရင်ကနဲ့ မတူတော့တာကို နားလည်ပေးလို့ ရပါတယ်။ ဒါပေမဲ့ နင်းရုန်ရုန်နဲ့ ကျူးကျူချင်တို့က ငါနဲ့ လုံးဝ ထိတွေ့မှု မရှိခဲ့ပါဘူး။ သူတို့အပေါ်ကို ငါက ဘယ်လိုလုပ်ပြီး သက်ရောက်မှု ရှိသွားမှာလဲ" ဟု မေးလိုက်လေသည်။

စနစ် - "..."

[ဒင်... ပိုင်ရှင်... ငါက ဖြစ်နိုင်ခြေ တစ်ခုကို ပြောပြရုံသက်သက်ပါ။ နောက်ထပ် ဖြစ်နိုင်ခြေ တစ်ခုကတော့ မင်း ရောက်နေတဲ့ ဒီကမ္ဘာက မင်း သိထားတဲ့ ကမ္ဘာနဲ့ မျဉ်းပြိုင်ကမ္ဘာ တစ်ခု ဖြစ်နေနိုင်တာပါပဲ။ ဇာတ်ကောင်တွေက အတူတူပဲ ဖြစ်နေရင်တောင်မှ သူတို့ရဲ့ စွမ်းအားတွေကတော့ ကွာခြားနေနိုင်ပါတယ်]

ထိုစကားကို ကြားသောအခါ စူးမင်က တစ်ဝက်သာ ယုံကြည်ဟန်ဖြင့် "တကယ်လား။ ငါ့ကို လှည့်စားနေတာတော့ မဟုတ်ပါဘူးနော်။ ဒီကမ္ဘာက မျဉ်းပြိုင်ကမ္ဘာ တစ်ခု ဟုတ်မဟုတ်ကို မင်း မသိဘူးလား" ဟု ပြန်မေးလိုက်လေသည်။

[ဒီအတွက် ပိုင်ရှင် ကိုယ်တိုင် ရှာဖွေစူးစမ်းဖို့ လိုအပ်ပါတယ်။ လောလောဆယ်မှာ ပိုင်ရှင်ဆီမှာ လိုအပ်တဲ့ ခွင့်ပြုချက် မရှိသေးပါဘူး]

စူးမင် - "..."

စနစ်က သူ့ကို လှည့်စားနေသည်ဟု စူးမင် ပို၍ပို၍ ခံစားလာရသော်လည်း ဘာတွေ မှားယွင်းနေသနည်း ဆိုသည်ကို သူ စဉ်းစား၍ မရနိုင်ချေ။

စနစ်က မပြောပြဘူးဆိုမှတော့ နင်းရုန်ရုန်နှင့် ကျူးကျူချင်တို့ကို သွယ်ဝိုက်သော နည်းလမ်းများဖြင့် စူးစမ်းရန် အခွင့်အရေး ရှာရုံသာ ရှိတော့သည်။ သို့သော် သူတို့၏ ဆက်ဆံရေး ပိုမို ကောင်းမွန်လာမည့် အချိန်အထိတော့ စောင့်ဆိုင်းရဦးမည် ဖြစ်လေသည်။

စူးမင်က အတွေးများထဲ နစ်မျောကာ စနစ်ကို မေးခွန်းထုတ်နေချိန်တွင် ရှောင်ဝူက နင်းရုန်ရုန်နှင့် ကျူးကျူချင်တို့ကို သူငယ်ချင်းအဖြစ် တိတ်တဆိတ် ထည့်သွင်းပြီးသွားခဲ့ပြီ ဖြစ်လေသည်။

တိုင်မုပိုင်သည်လည်း ကျူးကျူချင်၏ စွမ်းအားကြောင့် အတော်လေး အံ့အားသင့်သွားရလေသည်။ နှစ်အနည်းငယ်မျှ မတွေ့ရသည့်အချိန်အတွင်း သူမ၏ စွမ်းအားက ဘယ်လိုလုပ်ပြီး ဒီလောက်မြန်မြန် တိုးတက်လာရတာလဲ။ သူမ၏ မွေးရာပါ ဝိညာဉ်စွမ်းအားက သူ့ထက် တစ်ဆင့် ပိုမြင့်နေလျှင်တောင်မှ ဒီလောက် မြန်ဆန်မနေသင့်ပါဘူး။

သူက အခုမှ အဆင့် ၃၇ ပဲ ရှိသေးပြီး ကျူးကျူချင်က အဆင့် ၃၅ သို့ ရောက်နေပြီ ဖြစ်လေသည်။ သူတို့၏ အသက်က သုံးနှစ်ကျော်တောင် ကွာဟသေးသည်လေ။

ကျူးကျူချင်က ရွှီးလိုင်ခဲ ကျောင်းတော်သို့ ရောက်လာပြီဆိုမှတော့ သူ့ကို လာရှာခြင်းသာ ဖြစ်ရမည်ဖြစ်ပြီး မဟုတ်ပါက ဒီလောက်အထိ တိုက်ဆိုင်နေမည် မဟုတ်သဖြင့် နောက်မှ အခွင့်အရေးရှာ၍ မေးကြည့်မည်ဟု တိုင်မုပိုင် တွေးလိုက်လေသည်။

ဤနေရာသို့ ရောက်ရှိနေသည့် သုံးနှစ်တာ ကာလအတွင်း သူ၏ လုပ်ရပ်များကို ပြန်တွေးမိပြီး တိုင်မုပိုင် အနည်းငယ် ရှက်ရွံ့သွားလေသည်။ စိတ်ခံစားချက်ပိုင်းဆိုင်ရာ အခြေခံ အများကြီး မရှိဘဲ တွေ့ဆုံခဲ့သည့် အကြိမ်အရေအတွက်ကလည်း နည်းပါးလှသော်လည်း ကျူးကျူချင်က သူ၏ စေ့စပ်ထားသူ ဖြစ်နေသေးပြီး ဤနေရာသို့ ရောက်ရန်အတွက် ရှင်းလော့အင်ပါယာမှ ထျန်းတိုအင်ပါယာအထိ ခရီးရှည်ကြီးကို ဖြတ်သန်းလာခဲ့ရရာ သေချာပေါက် ဒုက္ခများစွာ ခံစားခဲ့ရပေလိမ့်မည်။

ဤအချိန်တွင် တိုင်မုပိုင် ပြန်လည် ဆင်ခြင်သုံးသပ်မိသွားပြီး ဤအတိုင်း ဆက်မသွားသင့်တော့ကြောင်း ခံစားလိုက်ရလေသည်။ ထို့အပြင် နှစ်အနည်းငယ်ကြာ မတွေ့ရပြီးနောက် ကျူးကျူချင်၏ ခန္ဓာကိုယ်အချိုးအစားမှာ တကယ်ပင် ပို၍ပို၍ ကောင်းမွန်လာခဲ့ပြီး မနေ့က အမြွှာညီအစ်မများနှင့် နှိုင်းယှဉ်၍မရနိုင်လောက်အောင် ပိုမို လှပလာခဲ့လေပြီ။

ကျူးကျူချင်ကတော့ ရင်ထဲမှနေ၍ 'ကျေးဇူးတင်ပါတယ်။ ငါက တိုင်ဝေ့စစ်နဲ့ ကျူးကျူယွင်တို့ကို ဆန့်ကျင်တိုက်ခိုက်ဖို့ နင်နဲ့ ပူးပေါင်းဖို့ တကယ်ပဲ ရည်ရွယ်ခဲ့ပေမယ့် အခုတော့ ငါ ငြင်းပယ်ပါရစေ' ဟု တွေးလိုက်မိလေသည်။

ရက်အနည်းငယ်ကြာ တိတ်တဆိတ် အကဲခတ်ပြီးနောက် တိုင်မုပိုင်အပေါ် ကျူးကျူချင် လုံးဝ စိတ်ပျက်သွားခဲ့ပြီ ဖြစ်လေသည်။ တိုင်မုပိုင်၏ ဘေးတွင် နေမည့်အစား စူးမင်၏ ဘေးတွင် နေခြင်းကမှ ပိုကောင်းပါသေးသည်။ စူးမင်၌ စနစ် ရှိနေပြီး သူ၏ အစွမ်းထက်လှသော စွမ်းအားများဖြင့် သူမ၏ ကံကြမ္မာကို သေချာပေါက် ပြောင်းလဲပေးနိုင်မည် ဖြစ်လေသည်။

ထို့အပြင် တိုင်မုပိုင်၏ တဏှာရူး တစ္ဆေ စရိုက်နှင့်ဆိုလျှင် သူမအတွက် အများကြီး ပြောင်းလဲပေးမည် မဟုတ်သည်မှာ သေချာလှပြီး အကယ်၍ သူ ပြောင်းလဲသွားလျှင်တောင်မှ စူးမင်ကဲ့သို့ သူမ၏ ခန္ဓာကိုယ် အချိုးအစားကို သဘောကျသောကြောင့် ဖြစ်နိုင်ရာ မည်သူ သိနိုင်မည်နည်း။

ထို့နောက် အခြားမည်သူမျှ ထွက်မလာတော့သည်ကို မြင်သောအခါ တိုင်မုပိုင်က စူးမင်တို့ကို စတုတ္ထအဆင့် စစ်ဆေးမှု ရှိရာဘက်သို့ ဦးဆောင် ခေါ်သွားလေသည်။

ယခုအခါ တိုင်မုပိုင်မှာ အလွန်အမင်း စိုးရိမ်ပူပန်နေလေသည်။ စတုတ္ထအဆင့် စစ်ဆေးမှု ဆိုသည်မှာ ဤလူများ ပူးပေါင်းပြီး သူ၏ တိုက်ခိုက်မှုများကို အမွှေးတိုင် တစ်တိုင်စာ အချိန်ကုန်သည်အထိ တောင့်ခံထားရမည် ဖြစ်သော်လည်း ယခုနှစ်၏ ပါရမီရှင်များက သူ မျှော်လင့်ထားသည်ထက် လုံးဝကို ကျော်လွန်နေလေသည်။

ဤလူများထဲတွင် အဆင့် သုံးဆယ် အောက် ရောက်နေသူ တစ်ယောက်မှ မရှိရာ သူက ဘယ်လိုလုပ်ပြီး တိုက်ခိုက်ရမှာလဲ။ သူတို့၏ ပူးပေါင်း တိုက်ခိုက်မှုများကို သူက အမွှေးတိုင် တစ်တိုင်စာ အချိန်ကုန်သည်အထိ တောင့်ခံထားနိုင်မလား ဆိုသည့် အခြေအနေသို့ တိုက်ရိုက် ပြောင်းလဲသွားခဲ့လေပြီ။ မိနစ်အနည်းငယ်ပင် မခံဘဲ သူ အရိုက်ခံရလောက်ပေသည်။

လွန်ခဲ့သော နှစ်ရက်အတွင်း သူ၏ အတွေ့အကြုံများကို ပြန်တွေးမိပြီး တိုင်မုပိုင် ကူကယ်ရာမဲ့သလို ခံစားလိုက်ရလေသည်။ မနေ့ကလည်း စူးမင်ရဲ့ အရိုက်ကို ခံခဲ့ရတယ်။ ဒီနေ့လည်း ရှောင်ဝူရဲ့ အရိုက်ကို ခံရပြန်ပြီ။ မကြာခင်မှာပဲ သူတို့အားလုံးရဲ့ ဝိုင်းရိုက်တာကို သူ ခံရတော့မယ်။

ထို့အပြင် လာမည့် စစ်ဆေးမှုအတွက် အကဲဖြတ်မည့်သူမှာ ဒုတိယကျောင်းအုပ်ကြီး ကျောက်ဝူကျိ ဖြစ်သဖြင့် သူတို့ကို တိုက်ရိုက် အောင်ခွင့် ပေးလိုက်၍လည်း မရနိုင်ရာ တကယ်ကို သနားစရာ ကောင်းလှပေသည်။

တိုင်မုပိုင် ခဏတာ စဉ်းစားလိုက်ပြီးနောက် စူးမင်ကို "စူးမင်... ခဏနေကျရင် ငါတို့အပေါ် သက်ညှာပေးပါဦး။ မင်းတို့ရဲ့ စတုတ္ထအဆင့် စစ်ဆေးမယ့်သူက ငါလေ။ မူလက ငါ တစ်ယောက်တည်းကို မင်းတို့အားလုံး ပူးပေါင်း တိုက်ခိုက်ရမှာ ဆိုပေမယ့် အခုက မင်းနဲ့ ရှောင်ဝူ နှစ်ယောက်တည်းကိုတောင် ငါက မနိုင်ဘူး။ မင်းတို့အားလုံး ပူးပေါင်းတာကိုတော့ ပြောမနေနဲ့တော့။ အဲဒါကြောင့်..." ဟု တိုးတိုးလေး ပြောလိုက်လေသည်။

ထိုစကားကို ကြားသောအခါ စူးမင်က ဘာကိုမှ တိတိကျကျ မဆိုလိုသော အပြုံးတစ်ခုဖြင့် "အခြေအနေကို ကြည့်ရတာပေါ့။ ငါက ထိန်းချုပ်ရေး အမျိုးအစား ဝိညာဉ်သခင် တစ်ယောက် သက်သက်ပါ။ ထိခိုက်မှု အများကြီး မပေးနိုင်ပါဘူး။ တခြားသူတွေ ဘယ်လိုတွေးလဲ ဆိုတာကိုတော့ ငါ ကြည့်ရဦးမယ်" ဟု ပြန်ပြောလိုက်လေသည်။

တိုင်မုပိုင် - ...

မင်းလို ထူးဆန်းတဲ့ကောင်က ထိန်းချုပ်ရေး အမျိုးအစား ဝိညာဉ်သခင် တဲ့လား။

မင်းက တိုက်ခိုက်ရေး အမျိုးအစား ဒါမှမဟုတ် ကာကွယ်ရေး အမျိုးအစား လို့ ပြောရင်တောင် ငါ ယုံဦးမယ်။

အော်... ဟုတ်သားပဲ။ စူးမင်က အခုလေးတင် သူ့ကို ကုသပေးဖို့ သိုင်းဝိညာဉ် ကို အသုံးပြုခဲ့သေးတယ် မဟုတ်လား။

မိုက်လိုက်တာ။

စူးမင်က အထောက်အကူပြု ကုသရေး ဝိညာဉ်စွမ်းရည် တွေကိုတောင် တတ်ကျွမ်းသေးတယ်။ သူက အရာအားလုံးကို စွမ်းဆောင်နိုင်တဲ့ သူတစ်ယောက်ပါပဲ။

စူးမင်က တိုင်မုပိုင်ကို ပြန်ဖြေပြီးနောက် သူနှင့် ဆက်ပြီး စကားမပြောချင်တော့ဘဲ ဤအချိန်ကို အသုံးပြုကာ ဒိုင်ယာရီ ရေးရန် စီစဉ်လိုက်လေသည်။ ယနေ့ ဖြစ်ပျက်ခဲ့သောအရာများက သူ့ကို တကယ်ပင် အံ့အားသင့်သွားစေခဲ့ပြီး ဤကျိန်စာသင့် စနစ်ကလည်း ပဟေဋ္ဌိတွေ ဖွက်နေဆဲ ဖြစ်ရာ အလွန် စိတ်ပျက်စရာ ကောင်းလှပေသည်။

[ဒီနေ့ ရှောင်ဝူ၊ ထန်ဆန်းနဲ့ ငါတို့ ရွှီးလိုင်ခဲ ကျောင်းတော် ကို ရောက်လာခဲ့တယ်။ ကျောင်းက တကယ်ကို စုတ်ပြတ်နေပြီး မူရင်းဇာတ်လမ်းထဲကလိုပဲ စာရင်းသွင်းခတွေကို ပြန်မအမ်းဘူး ဆိုတာက တကယ်ပဲ ဖြစ်လာခဲ့တယ်။]

[တစ်ယောက်ယောက်က ငွေပြန်အမ်းပေးဖို့ တောင်းဆိုတော့ ဝင်ပေါက်က လီယွီဆုန်း လို့ခေါ်တဲ့ အဘိုးအိုက တိုင်မုပိုင် ကို ဒီ 'ပြဿနာရှာတဲ့သူ' တွေကို ရှင်းခိုင်းလိုက်တယ်။ အကယ်၍ ဝိညာဉ်ဧကရာဇ် တစ်ယောက်ဖြစ်တဲ့ လီယွီဆုန်း သာ ကိုယ်တိုင် ဖြေရှင်းခဲ့မယ်ဆိုရင် ငါက ကူကယ်ရာမဲ့စွာနဲ့ပဲ ရပ်ကြည့်နေနိုင်မှာပါ။ ငါ့ရဲ့ လက်ရှိ စွမ်းအားနဲ့ဆိုရင် သူ့ကို အနိုင်ယူနိုင်မယ်လို့ ခန့်မှန်းရပေမယ့် အဲဒါက အရမ်းကို အံ့အားသင့်စရာ ကောင်းလွန်းနေလိမ့်မယ်။]

[အဆင့် ၄၃ ဝိညာဉ်သခင် တစ်ယောက်က အဆင့် ၆၂ ဝိညာဉ်ဧကရာဇ် တစ်ယောက်ကို ဘယ်လိုလုပ်ပြီး အနိုင်ယူနိုင်မှာလဲ။ အကယ်၍ သူ့ကိုသာ ငါ တကယ် အနိုင်ယူလိုက်မယ်ဆိုရင် မကောင်းတဲ့ ရည်ရွယ်ချက် ရှိသူတွေရဲ့ ခွဲစိတ်လေ့လာတာကို ငါ သေချာပေါက် ခံရမှာပဲ။ ငါ မကြောက်ဘူး ဆိုပေမယ့် အဲဒါက တော်တော်လေး ဒုက္ခများလိမ့်မယ်လေ။]

စူးမင်၏ လက်ရှိ စွမ်းအားဖြင့် ဝိညာဉ်ဧကရာဇ် တစ်ယောက်ဖြစ်သော လီယွီဆုန်း ကို ယှဉ်ပြိုင်နိုင်သည်ဟု ရေးထားသည်ကို မြင်သောအခါ မိန်းကလေးများ အားလုံး အလွန်အမင်း အံ့အားသင့်သွားကြလေသည်။ အဆင့်တွေကို ဒီလိုမျိုး ကျော်ဖြတ်ပြီး တိုက်ခိုက်လို့ မရသင့်ဘူးလေ။

လီယွီဆုန်း ၏ ပထမဆုံး ဝိညာဉ်ကွင်း မှာ အဖြူရောင်ဖြစ်ပြီး သူ၏ ဝိညာဉ်ကွင်း အစီအစဉ် ကိုယ်တိုင်က အကောင်းဆုံး မဟုတ်သော်လည်း သူက ဝိညာဉ်ဧကရာဇ် တစ်ယောက် ဖြစ်နေဆဲပင်။

သစ်သားစွမ်းအား ထုတ်လွှတ်မှု နည်းစနစ် က တကယ်ပဲ အဲဒီလောက် အစွမ်းထက်နေတာလား၊ သို့မဟုတ် စူးမင်၌ သူတို့ မသိရှိသော အခြား နည်းလမ်းများ ရှိနေသလား ဟု မိန်းကလေးများ အားလုံး တွေးတောနေမိကြလေသည်။

ရှောင်ဝူ၊ နင်းရုန်ရုန်နှင့် ကျူးကျူချင်တို့ အားလုံးက စူးမင်ကို တစ်ပြိုင်နက်တည်း လှမ်းကြည့်လိုက်ကြပြီးနောက် ဒိုင်ယာရီမှတစ်ဆင့် ချက်ချင်း စတင် ဆွေးနွေးလိုက်ကြလေသည်။

နင်းရုန်ရုန် - 'စူးမင် ပြောတာကို တကယ် ယုံလို့ ရမယ် ထင်လား'

ကျူးကျူချင် - 'စူးမင်က တခြား သစ်သားစွမ်းအား ထုတ်လွှတ်မှု နည်းစနစ် တွေကို အသုံးပြုတာ ငါ ကိုယ်တိုင် မမြင်ဖူးတော့ သေချာတော့ မပြောတတ်ဘူး။ ပြီးတော့ အခုအချိန်အထိ စူးမင် ပြသခဲ့တဲ့ နည်းစနစ်တွေ အရဆိုရင် ဆရာ လီယွီဆုန်း ကို အနိုင်ယူဖို့ ဆိုတာ လုံးဝ မဖြစ်နိုင်ဘူး'

သူတို့နှစ်ဦးစလုံး စကားပြောဆိုပြီးနောက် ရှောင်ဝူကို တစ်ပြိုင်နက်တည်း လှမ်းကြည့်လိုက်ကြလေသည်။ ရှောင်ဝူက စူးမင်နှင့် အနီးကပ်ဆုံး လူဖြစ်ရာ သီးသန့် အချိန်များတွင် အခြား နည်းစနစ်များကို သူမအား ပြသခဲ့ဖူးကောင်း ပြသခဲ့ဖူးပေလိမ့်မည်။

ရှောင်ဝူ - 'ငါ့ကို မကြည့်ကြနဲ့။ ငါလည်း မသိဘူး။ အစ်ကိုက ပုံမှန်အားဖြင့် တခြား နည်းစနစ်တွေကို ငါ့ကို မပြဖူးဘူး။ လွန်ခဲ့တဲ့ ရက်အနည်းငယ်က ဒိုင်ယာရီထဲမှာ သူ ရေးခဲ့တဲ့ သစ်သားစွမ်းအား ထုတ်လွှတ်မှု နည်းစနစ် - သစ်ပင်ကမ္ဘာ နံရံ ဆိုတာကိုတောင် ငါ ပထမဆုံးအကြိမ် မြင်ဖူးတာပဲ'

ရှောင်ဝူ - 'ဒါပေမဲ့ အစ်ကို့ အဆိုအရဆိုရင် အဲဒါက သူ့ရဲ့ နောက်ဆုံးအဆင့် အထက်နားလောက်မှာ ရှိတဲ့ ကာကွယ်ရေး ဝိညာဉ်စွမ်းရည် သက်သက်ပဲ ရှိသေးတာဆိုတော့ အဲဒီထက် ပိုအစွမ်းထက်တာတွေ သေချာပေါက် ရှိမှာပဲ။ တိုက်ခိုက်ရေး နည်းစနစ်တွေနဲ့ ပတ်သက်ပြီးတော့လည်း သူက အခုထိ သစ်သားဆူးချွန် တွေကိုပဲ ပြသရသေးတယ်လေ။ မကြာခင်မှာ တခြား အစွမ်းထက်တဲ့ နည်းစနစ်တွေကို ငါတို့ မြင်တွေ့ရနိုင်ပါတယ်'

နင်းရုန်ရုန် / ကျူးကျူချင် - 'ဒါလည်း ဟုတ်တာပဲ'

ထို့နောက် ရှောင်ဝူက နောက်ဆုံး စာကြောင်းတစ်ကြောင်း ထပ်ဖြည့်လိုက်လေသည်။ "ဒါ့အပြင် အစ်ကို စူးမင် မှာ ရှာရင်းဂန်း မျက်လုံး စွမ်းရည် ရှိသေးတယ် ဆိုတာကို မမေ့ကြနဲ့ဦး။ ဒီခြောက်နှစ်တာ ကာလအတွင်းမှာ သူ့ရဲ့ ရှာရင်းဂန်း ဆင့်ကဲပြောင်းလဲ သွားသလား ဆိုတာကို ငါ မသိပေမယ့် အဲဒီလို ဖြစ်ဖို့ အလားအလာ အရမ်းများတယ်လို့ ငါ ခန့်မှန်းမိတယ်"

နင်းရုန်ရုန်နှင့် ကျူးကျူချင်တို့ အချင်းချင်း ကြည့်လိုက်ကြလေသည်။ အော်... ဟုတ်သားပဲ။ သူတို့ အဲဒီအကြောင်းကို မေ့လုနီးပါး ဖြစ်သွားခဲ့ကြတာ။

အဓိက အကြောင်းရင်းမှာ စူးမင်က ရှာရင်းဂန်း ကို ခဲယဉ်းစွာသာ အသုံးပြုလေ့ရှိသဖြင့် ဤမျက်လုံး စွမ်းရည်၏ တည်ရှိမှုက အလွန် မှေးမှိန်နေခဲ့သောကြောင့်ပင်။

[အခုတော့ အဆင်ပြေသွားပါပြီ။ မူရင်းဇာတ်လမ်းထဲကလိုပဲ သူ့လို ဝိညာဉ်ဧကရာဇ် အစွမ်းထက်သူ တစ်ယောက်အနေနဲ့ ဒီလိုကိစ္စမျိုး လုပ်ဖို့ မသင့်တော်တာကြောင့် ပြဿနာကို ဖြေရှင်းဖို့ လီယွီဆုန်း က တိုင်မုပိုင် ကို လူမိုက်အဖြစ် သုံးခဲ့တယ်။]

[တိုင်မုပိုင် ကလည်း ကိုယ့်ကိုယ်ကိုယ် ယုံကြည်မှုတွေ အရမ်းလွန်ကဲနေပြီး သူ့ကို အနိုင်ယူနိုင်ရင် စာရင်းသွင်းခကို ပြန်အမ်းပေးမယ်လို့ အစပိုင်းက မာနတခွဲသားနဲ့ ပြောခဲ့တယ်။ သေချာတာပေါ့... သူ့ကို ငါ အလိုလိုက်ထားလို့ မရဘူးလေ။ စာရင်းသွင်းခကို ပြန်မအမ်းဘူး ဆိုတာက အစကတည်းက မှားယွင်းနေတာပဲ။]

[ရွှီးလိုင်ခဲ ရဲ့ စာရင်းသွင်းခက ရွှေပြား ဆယ်ပြား ဖြစ်ပြီး ဝိညာဉ်နန်းတော် ရဲ့ ဝိညာဉ်မဟာသခင် တွေအတွက် ထောက်ပံ့ကြေးက တစ်လကို ရွှေပြား ဆယ်ပြား ကွက်တိပဲ ဆိုတာကို သိထားသင့်တယ်။ သူတို့ရဲ့ ဝင်ခွင့် စံနှုန်းကလည်း အသက် ဆယ့်သုံးနှစ် အောက်ဖြစ်ပြီး အဆင့် နှစ်ဆယ် အထက်တဲ့။ တကယ်ကို ကောင်းမွန်တဲ့ အကြံအစည်ပဲ။]

[အခြေအနေတွေနဲ့ ကိုက်ညီတဲ့သူတွေက သဘာဝကျကျပဲ ကျောင်းဝင်ခွင့် ရသွားမှာဖြစ်ပြီး ဘယ်လိုပဲဖြစ်ဖြစ် တစ်လစာ ထောက်ပံ့ကြေး ဆိုတော့ လက်ခံနိုင်စရာ ရှိပါတယ်။ ဒါပေမဲ့ အခြေအနေတွေနဲ့ မကိုက်ညီတဲ့ သူတွေကျတော့ကော ဘယ်လိုလုပ်မလဲ။]

[တကယ်တမ်းကျတော့ ပါရမီရှင် ဆိုတာ အဲဒီလောက် အများကြီး မရှိပါဘူး။ အသက် ဆယ့်သုံးနှစ် အရွယ်မှာ လူအများစုက ဝိညာဉ်မဟာသခင် အဆင့်ကို မရောက်ကြဘဲ ဝိညာဉ်သခင် အဆင့်လောက်ပဲ ရှိကြတာပါ။ ဝိညာဉ်နန်းတော် ရဲ့ ဝိညာဉ်သခင် တွေအတွက် ထောက်ပံ့ကြေးက တစ်လကို ရွှေပြား တစ်ပြားပဲ ရှိတော့ ရွှေပြား ဆယ်ပြား ရဖို့ဆိုရင် မစားမသောက်ဘဲ ဆယ်လတိတိ စုဆောင်းရမှာ ဖြစ်ပြီး အဲဒီငွေတွေကို ရွှီးလိုင်ခဲ ကျောင်းတော် က တိုက်ရိုက် ယူသွားတာပဲလေ။]

[ဒါကြောင့် ဒီ ရွှေပြား ဆယ်ပြား ဆိုတာက လူအများစုရဲ့ ကြိုးစားပန်းစား စုဆောင်းထားတဲ့ ငွေတွေဖြစ်ပြီး ရွှီးလိုင်ခဲ ကျောင်းတော် ကို တခြားလူတွေရဲ့ စာရင်းသွင်းခတွေကို ဒီအတိုင်း ယူသွားခွင့်ကို ငါ သဘာဝကျကျပဲ ခွင့်မပြုနိုင်ဘူး။]

[ထို့အပြင် ဒီစည်းမျဉ်းကို လောဘကြီးပြီး ကောက်ကျစ်တဲ့ အဲဒီ ကပ်စေးနှဲ ဖလန်းဒါး သတ်မှတ်ထားတာ ဖြစ်ရမယ်ဆိုတာ ဘယ်သူမဆို သိသာထင်ရှားပါတယ်။ ငွေအတွက်ဆိုရင် သူက ဘာမဆို လုပ်မယ့်သူပဲ။]

[အဆင့် ၇၈ ဝိညာဉ်သူတော်စင် တစ်ယောက်ရဲ့ ကျင့်ကြံခြင်းအဆင့်နဲ့ဆိုရင် ငွေရှာဖို့ ဆိုတာ အရမ်း လွယ်ကူရမှာ ဖြစ်ပေမယ့် သူက ပုံမှန်မဟုတ်တဲ့ နည်းလမ်းတချို့ကိုပဲ အသုံးပြုချင်နေတာလေ။ စိုထိုမြို့ ထဲက သူ့ရဲ့ ဆိုင်မှာ သာမန်လူတွေ မဝယ်နိုင်တဲ့ ပစ္စည်းတွေ ရောင်းပြီး ဝိညာဉ်သခင် တွေကလည်း အဲဒါတွေကို ဂရုမစိုက်ကြဘူး။ အရင်က ထန်ဆန်း တစ်ယောက်တည်းပဲ သလင်းကျောက် ပြား တစ်ချပ်ကို တိုက်တိုက်ဆိုင်ဆိုင် တွေ့ခဲ့တာတောင်မှ ငွေကို တစ်ခါမှ မမြင်ဖူးတဲ့သူ တစ်ယောက်လို သူက အတင်းအကျပ် ခြိမ်းခြောက် တောင်းယူခဲ့သေးတယ်။]

[ပြီးတော့ နောက်ပိုင်းမှာ ထန်ဆန်းအတွက် ယွီရှောင်ကန်း ရဲ့ မျက်နှာကြောင့်သာ သူ ငွေမယူခဲ့တာလေ။ သူ့ရဲ့ စီးပွားရေး လုပ်တဲ့ ပုံစံမျိုးနဲ့ဆို ဘယ်သူကများ သူ့ဆီကနေ ပစ္စည်း ဝယ်မှာလဲ။]