အခန်း (၇၇) - ရှောင်ဝူက တိုင်မုပိုင်ကို နောက်ပြောင်လိုက်ခြင်း၊ သူ လူတောမတိုးတော့ဘူး

စူးမင်က ထိုအရာကို မြင်လိုက်သောအခါ သူ၏ နှုတ်ခမ်းစွန်းများက အနည်းငယ် တွန့်ကွေးသွားလေသည်။ တစ်ချိန်တည်းမှာပင် စူးမင်၏ ဘေးနားရှိ ထန်ဆန်း အပါအဝင် အခြားသူများ အားလုံး အံ့အားသင့်သွားကြလေသည်။

ရှောင်ဝူ၏ တတိယ ဝိညာဉ်စွမ်းရည် မှာ နေရာရွှေ့ပြောင်းခြင်း ဖြစ်ကြောင်းကို ယခုမှသာ သူ သိရှိသွားလေသည်။ သူ၏ ဆရာဖြစ်သူ ပြောစကားအရ ဤ ဝိညာဉ်စွမ်းရည် က လျှပ်စီးယုန် ဟုခေါ်သော ဝိညာဉ်သားရဲ တစ်ကောင်ထံမှ ဆင်းသက်လာခြင်းဖြစ်ပြီး အလွန် ရှားပါးလှပေသည်။ အဘယ်ကြောင့်ဆိုသော် ထိုကဲ့သို့သော ဝိညာဉ်သားရဲ များက ယေဘုယျအားဖြင့် အလွန် လျင်မြန်ပြီး ရှာဖွေတွေ့ရှိရန် မဖြစ်နိုင်သလောက် နီးပါး ခက်ခဲသောကြောင့်ပင်။

လီယွီဆုန်း မှာမူ ရှောင်ဝူ၏ ဝိညာဉ်စွမ်းရည် တစ်ခုကို မြင်ရုံမျှဖြင့် ထန်ဆန်းကဲ့သို့ မည်သည့် ဝိညာဉ်သားရဲ ကို သူမ အမဲလိုက်ခဲ့သနည်း ဆိုသည်ကို မသိရှိနိုင်သော်လည်း သူ၏ အသိပညာအရဆိုလျှင် ရှောင်ဝူ၏ ဝိညာဉ်စွမ်းရည် က အလွန်တရာ အစွမ်းထက်ပြီး အသက်ကယ် နတ်ဘုရား စွမ်းရည် တစ်ခု ဖြစ်ကြောင်းကိုတော့ သူ သိရှိလေသည်။

ထို့အပြင် ဤ ဝိညာဉ်စွမ်းရည် က အခြား ဝိညာဉ်စွမ်းရည် များနှင့်လည်း ပေါင်းစပ်နိုင်သဖြင့် တိုက်ခိုက်ရေး နည်းလမ်းများကို ပိုမို မျိုးစုံလာစေနိုင်လေသည်။ ဤအချိန်တွင် လီယွီဆုန်း ၏ ရင်ထဲ၌ ချက်ချင်းပင် ဆုံးဖြတ်ချက် တစ်ခု ချလိုက်လေသည်။ ဘာတွေပဲ ပေးဆပ်ရပါစေ... ဒီကောင်မလေးကို သေချာပေါက် ကျောင်းဝင်ခွင့် ပေးရမယ်။

တိုင်မုပိုင် က သူ၏ တိုက်ခိုက်မှုများကို ဤမျှ လွယ်ကူစွာ ရှောင်တိမ်းသွားသည်ကို မြင်သောအခါ ဒေါသထွက်သွားလေသည်။ သူ၏ မိစ္ဆာမျက်လုံး များက ရှောင်ဝူကို အေးစက်စွာ စိုက်ကြည့်ကာ "ဒါက ဘယ်လို ဝိညာဉ်စွမ်းရည် မျိုးလဲ" ဟု မေးလိုက်လေသည်။

အချိန်အတော်ကြာ ဖိနှိပ်ခံထားရပြီးနောက် တိုင်မုပိုင် က သူ၏ ဂုဏ်သိက္ခာကို မကယ်တင်နိုင်ခဲ့သလို သူက ရှောင်ဝူထက်လည်း အသက်အများကြီး ပိုကြီးလေသည်။ ထို့ကြောင့် ယခုအခါ ရှောင်ဝူကို အနိုင်ယူရန် သူ သန္နိဋ္ဌာန် ချလိုက်လေပြီ။

ရှောင်ဝူက တိုင်မုပိုင် ၏ အေးစက်သော အကြည့်ကို အနည်းငယ်မျှပင် မကြောက်ရွံ့ဘဲ ရင်ဆိုင်လိုက်ပြီး နောက်ပြောင်သည့် လေသံဖြင့် "ဒါက ငါ့ရဲ့ တတိယ ဝိညာဉ်စွမ်းရည် ဖြစ်တဲ့ နေရာရွှေ့ပြောင်းခြင်း ပဲ။ ဘယ်လိုလဲ... နင် အံ့သြသွားပြီလား။ အခု အရှုံးပေးချင်ပြီလား" ဟု ပြန်ပြောလိုက်လေသည်။

တိုင်မုပိုင် က သူ၏ နှလုံးသားကို ခိုင်မာအောင် ထားလိုက်ပြီး "မပေးဘူး။ ငါ ဘယ်တော့မှ အရှုံးမပေးဘူး။ နေရာရွှေ့ပြောင်းခြင်း သက်သက်ပဲဟာ။ နင် ဒါကို အကြိမ်များများ အသုံးပြုနိုင်မယ်လို့ ငါ မယုံဘူး" ဟု ဟိန်းဟောက်လိုက်လေသည်။

ဤအချိန်တွင် တိုင်မုပိုင် ၌ အသုံးမကျသော သခင်လေး တစ်ယောက်၏ အသွင်အပြင်မျိုး မရှိတော့ချေ။ အစပိုင်းက ရှိနေခဲ့သော ပေါ့ပါးသည့် အမူအရာများလည်း ပျောက်ကွယ်သွားခဲ့လေပြီ။ သူက ဒေါသထွက်နေသော ကျားတစ်ကောင်လို အငွေ့အသက်များ အပြည့်အဝ ဖုံးလွှမ်းနေပြီး သူ၏ မိစ္ဆာမျက်လုံး များက သူ့ရှေ့ရှိ 'ယုန်ဖြူလေး' ကို စိုက်ကြည့်နေလေသည်။

ချက်ချင်းပင် တိုင်မုပိုင် ၏ ခန္ဓာကိုယ်မှ နှစ်တစ်ထောင်သက်တမ်း ဝိညာဉ်ကွင်း ဖြည်းညင်းစွာ ထွက်ပေါ်လာလေသည်။ "တတိယ ဝိညာဉ်စွမ်းရည် - ကျားဖြူ စိန်သံမဏိ အသွင်ပြောင်းခြင်း"

ဤ ဝိညာဉ်စွမ်းရည် ကို အသုံးပြုပြီးနောက် တိုင်မုပိုင် ၏ တိုက်ခိုက်ရေးနှင့် ကာကွယ်ရေး ဂုဏ်သတ္တိများ နှစ်ဆ မြင့်တက်သွားပြီး သူ၏ စွမ်းအားက အဆင့် လေးဆယ် သို့ တိုက်ရိုက် နီးကပ်သွားလေသည်။

သေချာတာပေါ့။ တိုင်မုပိုင် ၏ အစီအစဉ်ကို ရှောင်ဝူ နားလည်လေသည်။ အကယ်၍ သူက တိုက်ခိုက်မှုများကို မကြာခဏ ပြုလုပ်ပြီး သူမကို နေရာရွှေ့ပြောင်းခြင်း အကြိမ်ကြိမ် အသုံးပြုလာအောင် လုပ်နိုင်မည်ဆိုပါက သူမ၏ ဝိညာဉ်စွမ်းအား များ အလျင်အမြန် ကုန်ခမ်းသွားလိမ့်မည်ဟု တိုင်မုပိုင် ယုံကြည်နေလေသည်။

သို့သော် တိုင်မုပိုင် ၏ အစီအစဉ်က ကျရှုံးသွားဖွယ် ရှိလေသည်။ ရှောင်ဝူ၏ တတိယ ဝိညာဉ်ကွင်း မှာ နှစ်ခြောက်ထောင် သက်တမ်း ရှိပြီး နေရာရွှေ့ပြောင်းခြင်း ၏ အများဆုံး အကွာအဝေးက မီတာ သုံးရာအထိ ရောက်ရှိလေသည်။ ကုန်ကျသော ဝိညာဉ်စွမ်းအား ပမာဏက နေရာရွှေ့ပြောင်းခြင်း ပြုလုပ်သော အကွာအဝေးအပေါ်တွင် မူတည်လေသည်။

ထို့ကြောင့် တိုင်မုပိုင် ၏ တိုက်ခိုက်မှုများကို ရှောင်တိမ်းရန် သက်သက်သာဆိုလျှင် သူမ၏ ဝိညာဉ်စွမ်းအား များ မကုန်ခမ်းမီ တိုင်မုပိုင် ၏ တတိယ ဝိညာဉ်စွမ်းရည် က အရင်ဆုံး ပြီးဆုံးသွားရန် များလေသည်။ ထိုအခါ သူက အားနည်းသော အခြေအနေသို့ ရောက်ရှိသွားမည်ဖြစ်ပြီး သူတို့၏ ယှဉ်ပြိုင်မှုလည်း ပြီးဆုံးသွားမည် ဖြစ်လေသည်။

သို့သော် ရှောင်ဝူက ထိုမျှလောက် အချိန်ကြာမြင့်စွာ မစောင့်ဆိုင်းချင်ကြောင်း ထင်ရှားလှပေသည်။ ၎င်းက အလွန် ပျင်းစရာ ကောင်းလှပေသည်။ စောစောစီးစီး အဆုံးသတ်လိုက်ခြင်းက ပိုကောင်းလေသည်။

ထို့နောက် ရှောင်ဝူ၏ မျက်လုံးများက ဟိုဟိုဒီဒီ ရွေ့လျားသွားပြီး သူ့ကို နောက်ပြောင်ရန် နည်းလမ်းတစ်ခု စဉ်းစားမိသွားကာ သူမ၏ နှုတ်ခမ်းစွန်းများ အနည်းငယ် တွန့်ကွေးသွားလေသည်။ ဟီးဟီး။

မူလက သူမက တိုင်မုပိုင် ကို ချက်ချင်းသတ်ဖြတ်သောရှစ်ဆင့်ချပစ်ခြင်း တိုက်ရိုက် အသုံးပြုချင်ခဲ့သော်လည်း သူတို့က အချိန်မည်မျှကြာအောင် အတန်းဖော်များ ဖြစ်လာမည်ကို မသိနိုင်သေးသဖြင့် သူ့အပေါ် သက်ညှာပေးလိုက်ခြင်းက ပိုကောင်းမည်ဟု တွေးလိုက်မိလေသည်။ မဟုတ်ပါက သူမ၏ လက်ရှိ ခြေကန်အားဖြင့် ချက်ချင်းသတ်ဖြတ်သောရှစ်ဆင့်ချပစ်ခြင်း ကို အသုံးပြုလိုက်ပါက တိုင်မုပိုင် အနေဖြင့် အနည်းဆုံး ထက်ဝက်ခန့် သေလုမျောပါး ဖြစ်သွားနိုင်လေသည်။

ထို့အပြင် သူမက တိုင်မုပိုင် ကို အလွန်အကျွံ နောက်ပြောင်လိုက်ပါက သူမ၏ အစ်ကို စူးမင်အတွက် ပြဿနာ ဖြစ်သွားနိုင်လေသည်။ အစ်ကို စူးမင်၌ ဖြေရှင်းရန် နည်းလမ်း သေချာပေါက် ရှိလောက်သော်လည်း ယခုလောလောဆယ်တွင် တတ်နိုင်သမျှ ရှောင်ရှားလိုက်ခြင်းက ပိုကောင်းလေသည်။ တောင့်ခံထားရမယ်။

စူးမင်က ရှောင်ဝူကို အာရုံစိုက်နေခဲ့လေသည်။ ရှောင်ဝူ၏ မျက်နှာပေါ်ရှိ ထိုအမူအရာကို မြင်လိုက်ရသောအခါ ရှောင်ဝူ တစ်ခုခု ကြံစည်နေကြောင်း သူ သိလိုက်ပြီး ရှောင်ဝူ အလွန်အမင်း မရက်စက်ပါစေနဲ့ဟုသာ မျှော်လင့်နိုင်တော့လေသည်။

ရှောင်ဝူက ညာဘက်လက်ဖြင့် သူမ၏ နှုတ်ခမ်းကို ပုတ်လိုက်သည်ကို မြင်တွေ့လိုက်ကြရပြီး သူမ၏ မျက်လုံးများမှ ညှို့ယူနိုင်စွမ်းရှိသော ပန်းရောင် အလင်းတန်းများ ထွက်ပေါ်လာကာ တိုင်မုပိုင် ကို တိုက်ရိုက် ဝင်ရောက် တိုက်ခိုက်သွားလေသည်။

"ဒုတိယ ဝိညာဉ်စွမ်းရည် - ညှို့ယူခြင်း"

ရှောင်ဝူ၏ ညှို့ယူခြင်း စွမ်းရည်တွင် တိကျသော အံ့အားသင့် မိန်းမောသွားစေသည့် အကျိုးသက်ရောက်မှု တစ်ခု ပါဝင်သဖြင့် တိုက်ခိုက်ခံရပြီးနောက် တိုင်မုပိုင် ၏ မျက်လုံးများက အလိုအလျောက် ပိတ်သွားလေသည်။ သူ ပြန်ဖွင့်ကြည့်လိုက်သောအခါ သူ၏ ကမ္ဘာကြီးက ပန်းရောင်များဖြင့် ပြည့်နှက်နေသည်ကို တွေ့လိုက်ရလေသည်။

ဤအချိန်တွင် သူ ဇဝေဇဝါ ဖြစ်သွားလေသည်။ ရှောင်ဝူက ဘယ်မှာလဲ။ သူမက နေရာရွှေ့ပြောင်းခြင်း ကို အသုံးပြုပြီး ပုန်းနေတာများလား။

ချက်ချင်းပင် မနေ့က မြင်တွေ့ခဲ့ရသော အမြွှာညီအစ်မ နှစ်ဦးက ရေမြွေများကဲ့သို့ ခါးလေးကို လှုပ်ယမ်းကာ တိုင်မုပိုင် ကို ဘယ်ညာ ဖက်တွယ်လိုက်ကြပြီး သစ်ခွပန်းလေးများကဲ့သို့ သူ၏ နားထဲသို့ လေမှုတ်သွင်းကာ "သခင်လေး တိုင်... ကျွန်မတို့ရဲ့ ကျွမ်းကျင်မှုတွေကို သဘောကျရဲ့လား။ ဒီနေ့ရော ထပ်လာဦးမလား။ သခင်လေး တိုင် က ကျွန်မတို့ တွေ့ဖူးသမျှထဲမှာ အမိုက်ဆုံး ယောကျာ်း တစ်ယောက်ပဲ" ဟု ချိုသာစွာ ပြောလာသည်ကို သူ မြင်တွေ့လိုက်ရလေသည်။

တိုင်မုပိုင် အတော်လေး စိတ်လှုပ်ရှားသွားပြီး ယခုအခါ အမြွှာညီအစ်မများကြောင့် သူ၏ ခန္ဓာကိုယ် တစ်ခုလုံးကို ပုရွက်ဆိတ် အကောင်ရေများစွာ တွားသွားနေသကဲ့သို့ ခံစားလိုက်ရလေသည်။ သူ၏ အသက်ရှူနှုန်း အနည်းငယ် မြန်ဆန်လာပြီး ထိုနှစ်ဦးကြောင့် သူ အတော်လေး ဆန္ဒပြင်းပြလာခဲ့ရာ ယခုအခါ မဖြေဖျောက်ရပါက ခန္ဓာကိုယ် တစ်ခုလုံး မသက်မသာ ဖြစ်လာမည်ကို ခံစားလိုက်ရပြီး သူ၏ ခန္ဓာကိုယ် အောက်ပိုင်းမှာ ဖောင်းကြွလာခဲ့ပြီ ဖြစ်လေသည်။

တိုင်မုပိုင် က ရှောင်ဝူ၏ ညှို့ယူခြင်း စွမ်းရည်ကြောင့် အလွန်အမင်း ညှို့ယူခံလိုက်ရပြီး သူ လုံးဝ ဇဝေဇဝါ ဖြစ်သွားလေသည်။ သူက အသုံးမကျသော သခင်လေး တစ်ယောက်၏ အသွင်အပြင်သို့ ပြန်လည် ရောက်ရှိသွားပြီး အမြွှာညီအစ်မများကို ပြုံးဖြီးဖြီး ကြည့်ကာ "ကောင်းတယ်... ကောင်းတယ်... ကောင်းတယ်။ အခု သွားကြရအောင်။ ဒီနေ့တော့ မင်းတို့ နှစ်ယောက်လုံးကို သေချာပေါက် စိတ်တိုင်းကျအောင် လုပ်ပေးမယ်" ဟု ပြောလိုက်လေသည်။

ဤအချိန်တွင် အခြားသူများ အမြင်၌မူ တိုင်မုပိုင် က လေဟာနယ်ကို စကားပြောနေခြင်း ဖြစ်ပြီး သူ၏ မျက်နှာ တစ်ခုလုံးက အလွန် ညစ်ညမ်းသော အသွင်အပြင်မျိုး ပေါက်နေကာ မျက်နှာမှာလည်း နီမြန်းနေလေသည်။

ထိုအရာကို မြင်သောအခါ နင်းရုန်ရုန် နှင့် ကျူးကျူချင် တို့၏ မျက်နှာပေါ်တွင် ရွံရှာသော အမူအရာများ ထွက်ပေါ်လာလေသည်။ တိုင်မုပိုင် က ကျော့ကွင်းထဲ သက်ဆင်းသွားကြောင်းကို တစ်ချက်ကြည့်ရုံဖြင့် သိနိုင်ပြီး ဤကဲ့သို့သော ကိစ္စများတွင် သူ့ကိုယ်သူတောင် မထိန်းချုပ်နိုင်ဘဲ ရှောင်ဝူ၏ ထောင်ချောက်ထဲသို့ အလွယ်တကူ ကျဆင်းသွားခဲ့ခြင်း ဖြစ်လေသည်။

မနေ့က မြင်တွေ့ခဲ့ရသော အရာများအရ တိုင်မုပိုင် က မည်သို့သော လူမျိုးဖြစ်ကြောင်းကို ကျူးကျူချင် သိရှိထားသော်လည်း တိုင်မုပိုင် ၏ စရိုက်က ဤမျှလောက်အထိ ဆိုးရွားနေလိမ့်မည်ဟု သူမ ထင်မှတ်မထားခဲ့ချေ။

တစ်စက္ကန့်တုန်းက သူက တတိယ ဝိညာဉ်စွမ်းရည် ကို အသုံးပြုပြီး ရှောင်ဝူကို ပြင်းပြင်းထန်ထန် အနိုင်ယူရန် ရည်ရွယ်ထားခဲ့သော်လည်း နောက်တစ်စက္ကန့်တွင်မူ ဤကဲ့သို့သော တဏှာရူး တစ္ဆေ တစ်ကောင်အဖြစ် ပြောင်းလဲသွားလေပြီ။

တိုင်မုပိုင် ၏ အသွင်အပြင်ကြောင့် ရှောင်ဝူကိုယ်တိုင်လည်း အနည်းငယ် အံ့အားသင့်သွားရလေသည်။ မနေ့က တိုင်မုပိုင် အမြွှာညီအစ်မများကို နှင်းဆီဟိုတယ် သို့ ခေါ်သွားသည်ကို မြင်ခဲ့ရသဖြင့် တိုင်မုပိုင် ကျော့ကွင်းထဲ သက်ဆင်းမသက်ဆင်း ကြည့်ရန်အတွက် ညှို့ယူခြင်း စွမ်းရည်ကို သူမ အသုံးပြုကြည့်ရန် ရုတ်တရက် တွေးမိသွားခြင်း ဖြစ်လေသည်။ ဤမျှ လွယ်ကူစွာ အောင်မြင်သွားလိမ့်မည်ဟု သူမ ထင်မှတ်မထားခဲ့ချေ။

ထို 'ပုံရိပ်ယောင်' ထဲတွင် ဘာတွေ အတိအကျ ဖြစ်ပျက်နေသနည်း ဆိုသည်ကိုမူ သူမ မသိရှိချေ။ သူမက အနည်းငယ်သာ ပြောင်းလဲပေးလိုက်ခြင်းဖြစ်ပြီး တိုင်မုပိုင် ၏ မျက်လုံးထဲရှိ ကမ္ဘာကြီးက ဘယ်လို ပြောင်းလဲသွားသနည်း ဆိုသည်ကို သူမ အများကြီး ဝင်ရောက် စွက်ဖက်၍ မရနိုင်ချေ။ မည်သို့ပင်ဆိုစေ ဤ ဝိညာဉ်စွမ်းရည် က သူမ၏ ဒုတိယ ဝိညာဉ်စွမ်းရည် သက်သက်သာ ဖြစ်လေသည်။

ထို့နောက် တိုင်မုပိုင် ၏ ခန္ဓာကိုယ် အောက်ပိုင်းမှ ပုံမှန်မဟုတ်သော အခြေအနေကို ရှောင်ဝူလည်း သတိထားမိသွားပြီး တစ်ခုခုကို တွေးမိသွားကာ သူမ၏ မျက်နှာလေး နီရဲသွားလေသည်။ ထို့နောက် သူမက သူ့အပေါ် ရွံရှာသော အမူအရာကို ပြသလိုက်လေသည်။ ဒါက ဘယ်လို အခြေအနေမျိုးလဲ။ သူက ညစ်ညမ်းတဲ့ အတွေးတွေနဲ့ ပြည့်နေတုန်းပဲလား။

ဘေးပတ်ဝန်းကျင်ရှိ လူအုပ်ကြီးမှာလည်း စိတ်ဝင်တစား ပြောဆိုဆွေးနွေး နေကြလေသည်။ ဤမြင်ကွင်းကို မြင်သောအခါ စူးမင်လည်း ကူကယ်ရာမဲ့သလို ခံစားလိုက်ရလေသည်။ တိုင်မုပိုင် က ယခုအခါ လူတောမတိုးနိုင်အောင် ဖြစ်သွားပြီလေ။ ၎င်းက ခန္ဓာကိုယ် ပိုင်းဆိုင်ရာ ဒဏ်ရာရရှိခြင်းထက် ပိုမို ဆိုးရွားနေသည် မဟုတ်ပါလော။

စူးမင်က မနေနိုင်တော့ဘဲ "ရှောင်ဝူ... တော်လောက်ပြီ။ မြန်မြန် အဆုံးသတ်လိုက်တော့" ဟု အော်ပြောလိုက်လေသည်။

ထိုစကားကို ကြားသောအခါ ရှောင်ဝူ ခေါင်းညိတ်ပြလိုက်ပြီး တိုင်မုပိုင် ကို ညှို့ယူခြင်း စွမ်းရည် ထပ်မံ အသုံးပြုလိုက်ကာ သူ့ဘေးသို့ နေရာရွှေ့ပြောင်းခြင်း ဖြင့် ရောက်ရှိသွားပြီး လီယွီဆုန်း ရှိရာဘက်သို့ တိုက်ရိုက် ကန်ထုတ်လိုက်လေသည်။

တိုင်မုပိုင် မတ်တတ်ရပ်လိုက်ပြီး ခေါင်းကို ခါယမ်းကာ ဟိုဘက်ဒီဘက် ကြည့်လိုက်လေသည်။ စောစောက အမြွှာညီအစ်မတွေ ဘာလို့ ပျောက်သွားတာလဲ ဆိုတာကို သူ သိချင်နေမိလေသည်။ ထို့နောက် ရှောင်ဝူ၏ ညှို့ယူခြင်း စွမ်းရည်ကို သူ ခံလိုက်ရကြောင်း ရုတ်တရက် သတိရသွားလေသည်။