အခန်း (၇၃) - ရှောင်ဝူ - ငါက ဘာလို့ ထပ်ပြီး ဒဏ်ရာရရပြန်တာလဲ... စူးမင် အရမ်း ပျော်သွားတယ်... အဆောင်လက်ဖွဲ့တွေ ဖန်တီးဖို့အတွက် ပြီးပြည့်စုံတဲ့ လမ်းညွှန်ချက်

[နောက်ပိုင်းမှာ နင်းရုန်ရုန် ဒေါသထွက်သွားပြီးတော့ ထန်ဆန်းကို တိုင်မုပိုင် ကို သတ်ခိုင်းချင်နေခဲ့တယ်။ ဆုလာဘ် အနေနဲ့ ရတနာခုနစ်ပါး မှန်ကြွေအုတ်ချပ် ဂိုဏ်း ရဲ့ မိတ်ဆွေဖွဲ့မှုကို ပေးမယ်လို့ ပြောခဲ့တယ်။ ဒါကိုတော့ နင်းရုန်ရုန် က အများကြီး တွေးလွန်းနေတယ်လို့ပဲ ငါ ပြောနိုင်ပါတယ်။]

[ထန်ဆန်း က သူမကို သိတောင် မသိတာလေ။ ပြီးတော့ သူကိုယ်တိုင်ကလည်း အရမ်းကို မာနကြီးတဲ့သူ တစ်ယောက်ဆိုတော့ သူမအတွက် လူတစ်ယောက်ကို သူ ဘယ်လိုလုပ် သတ်ပေးမှာလဲ။]

[နောက်ဆုံးမှာတော့ ဒီကိစ္စက အဖြေမပေါ်ဘဲ ပြီးသွားခဲ့တယ်။ အဲဒီနောက်မှာ နင်းရုန်ရုန် က သူမ ကိုယ်သူမ တကယ်ပဲ ပြန်လည် ဆင်ခြင် သုံးသပ်မိသွားတာ ဖြစ်နိုင်ပါတယ်။ သူမရဲ့ ဂိုဏ်း ရဲ့ အားသာချက်သာ မရှိဘူးဆိုရင် ရွှီးလိုင်ခဲ မှာ ဂုဏ်ယူစရာ ဘာမှ မရှိဘူးဆိုတာကို သူမ သိသွားခဲ့တယ်။ ဒါနဲ့ သူမက သေလမ်းရှာတာတွေကို ရပ်တန်းက ရပ်လိုက်ပြီး တကယ်ကို စတင် ပြောင်းလဲလာခဲ့တယ်။]

ဒီအရာကို မြင်သောအခါ နင်းရုန်ရုန် လုံးဝ စိတ်သက်သာရာ ရသွားလေသည်။ ကံကောင်းထောက်မစွာဖြင့် သူမက ပြန်လည် ဆင်ခြင် သုံးသပ်တတ်ပြီး အဲဒီလမ်းကြောင်းပေါ်မှာ မျက်ကန်းတစ္ဆေလို ဆက်မလျှောက်ခဲ့တာ။ မဟုတ်ပါက သူမ၏ ဖခင်နှင့် အဘိုးနှစ်ဦးက သူမကို ကာကွယ်ပေးထားလျှင်တောင်မှ သူမ၏ အနာဂတ် အောင်မြင်မှုများက သေချာပေါက် မြင့်မားခဲ့မည် မဟုတ်ချေ။

ထို့အပြင် တိုင်မုပိုင် က ရှင်းလော့အင်ပါယာ ၏ မင်းသား တစ်ပါး ဖြစ်လေသည်။ သူက ထျန်းတိုအင်ပါယာ သို့ ထွက်ပြေးလာခဲ့သော်လည်း မင်းသား တစ်ပါးအနေဖြင့် အခြေခံ အခွင့်အရေး အချို့ ရှိနေသေးလေသည်။ သူမကို ကိုင်တွယ်ဖြေရှင်းရန် လှည့်ကွက်လေး အချို့ကို သူ အသုံးပြုရန် ဖြစ်နိုင်ခြေ ရှိလေသည်။

ထို့ပြင် ရတနာခုနစ်ပါး မှန်ကြွေအုတ်ချပ် ဂိုဏ်း ၏ ဂိုဏ်းချုပ် တစ်ယောက်အနေဖြင့် သူမ၏ ဖခင်က အကျပ်ရိုက်သွားမည် ဖြစ်လေသည်။ သူမ၏ ဒေါသကို ပြေပျောက်စေရန် တိုင်မုပိုင် ကို အရေးယူသင့်သလား သို့မဟုတ် ဂိုဏ်း အတွက် ဤကိစ္စကို အဆုံးသတ်လိုက်သင့်သလား။

အကယ်၍ သူမ၏ ဖခင်က သူမ၏ ဒေါသကို ပြေပျောက်စေချင်လျှင်တောင်မှ ဂိုဏ်း ၏ အနာဂတ်အတွက် သေချာပေါက် သူ ဆန္ဒမရှိဘဲ ဤကိစ္စကို အဆုံးသတ်လိုက်မည်ဟု နင်းရုန်ရုန် ခံစားလိုက်ရလေသည်။

သို့သော် သူမ၏ အဘိုးနှစ်ဦးကမူ သူမကို ပို၍ပင် အလိုလိုက်ထားကြလေသည်။ သူမ မတရားခံရသည်ဟု ခံစားလိုက်ရသည်နှင့် တပြိုင်နက် သူတို့၏ ဒေါသက အလွန်အမင်း ပေါက်ကွဲထွက်လာနိုင်ပြီး တိုင်မုပိုင် ကိုပင် သတ်ပစ်နိုင်လေရာ ၎င်းက ရတနာခုနစ်ပါး မှန်ကြွေအုတ်ချပ် ဂိုဏ်း ကို ဖျက်ဆီးခံရမည့် အန္တရာယ်ထဲသို့ ကျရောက်သွားစေနိုင်လေသည်။

မည်သို့ပင်ဆိုစေ တိုင်မုပိုင် က ဘယ်လောက်ပဲ ဆိုးရွားနေပါစေ သူက ရှင်းလော့အင်ပါယာ ၏ မင်းသား တစ်ပါး ဖြစ်နေသေးလေသည်။ အင်ပါယာ မိသားစုက အင်ပါယာ ၏ နာမည်ဂုဏ်သတင်း အတွက် ရတနာခုနစ်ပါး မှန်ကြွေအုတ်ချပ် ဂိုဏ်း ကို သေချာပေါက် အလွတ်ပေးမည် မဟုတ်ချေ။ ၎င်းက သူမ မမြင်တွေ့လိုသော အရာပင် ဖြစ်လေသည်။

လက်ရှိ နင်းရုန်ရုန် က ယခင်ကထက် များစွာ ပိုမို ရင့်ကျက် တည်ငြိမ်လာပြီဖြစ်ပြီး ယခုအခါ ပြဿနာ အချို့ကို သူမ တွေးတောနိုင်လာပြီ ဖြစ်လေသည်။

စူးမင်က နောက်ဆုံးတွင် ရေးသားထားသောအရာကို မြင်သောအခါ ကျူးကျူချင် နှင့် ရှောင်ဝူတို့လည်း သက်ပြင်းချလိုက်မိကြလေသည်။ နောက်ပိုင်းတွင် နင်းရုန်ရုန် စတင် ပြောင်းလဲလာခြင်းက ကံကောင်းခြင်းပင်။ မဟုတ်ပါက သူမတို့ အချင်းချင်း ပေါင်းသင်းဆက်ဆံရန် အလွန် ခက်ခဲလိမ့်မည် မဟုတ်ပါလော။

သို့သော် ဤ ခွေးစနစ် ၏ သဘာဝအရဆိုလျှင် နင်းရုန်ရုန် သည်လည်း သေချာပေါက် ဒိုင်ယာရီ ပိုင်ရှင် တစ်ယောက် ဖြစ်နေလိမ့်မည်ဟု တစ်ချိန်တည်းမှာပင် သူတို့ တွေးလိုက်မိကြလေသည်။ ယခု စူးမင် ဒိုင်ယာရီထဲတွင် ရေးသားထားသော အကြောင်းအရာများက ထပ်မံ၍ ဖြစ်လာမည် မဟုတ်လောက်တော့ချေ။

ထို့အပြင် စူးမင်၏ ဒိုင်ယာရီထဲမှ အကြောင်းအရာများ၏ လွှမ်းမိုးမှုကို နှစ်ပေါင်းများစွာ ခံခဲ့ရပြီးနောက် ရတနာခုနစ်ပါး မှန်ကြွေအုတ်ချပ် ဂိုဏ်း ကို ဖျက်ဆီးခံရခြင်း အပါအဝင် အနာဂတ်တွင် ဘာတွေ ဖြစ်လာမည်လဲ ဆိုသည်ကို နင်းရုန်ရုန် လည်း အများကြီး သိရှိထားခဲ့ပြီ ဖြစ်လေသည်။ ဂိုဏ်း ၏ အနာဂတ်ကို ပြောင်းလဲရန်အတွက် နင်းရုန်ရုန် ကိုယ်တိုင်လည်း ဖြေရှင်းနည်း အချို့ကို သေချာပေါက် စဉ်းစားထားပြီး ဖြစ်လိမ့်မည်ဖြစ်ရာ သူမ အများကြီး ရင့်ကျက်လာလောက်ပြီ ဖြစ်လေသည်။

ထို့ပြင် သူမတို့ အားလုံးက ဒိုင်ယာရီ ပိုင်ရှင်များ ဖြစ်ကြပြီး ဘုံလျှို့ဝှက်ချက်များနှင့် ဘုံခေါင်းစဉ်များကို မျှဝေခံစားနေကြသူများ ဖြစ်လေသည်။ ထိုအချိန်ကျလျှင် သူတို့ အချင်းချင်း ပေါင်းသင်းဆက်ဆံရန် ခက်ခဲမည် မဟုတ်သလို အချင်းချင်း အားပေးကူညီကာ အတူတူ တိုးတက်အောင်ပင် လုပ်ဆောင်နိုင်ကြလိမ့်မည်။

[ရွှီးလိုင်ခဲ ကို ဝင်ခါစ အစောပိုင်း ကာလတွေတုန်းက နင်းရုန်ရုန် အကြောင်းကို ဒီလောက် အများကြီး ရေးလိုက်တာက တကယ်ကို ခေါင်းစဉ်ကနေ နည်းနည်း သွေဖည်သွားတာပဲ။ ဘာလို့များ ငါ့ရဲ့ အတွေးတွေကို ဒီလိုမျိုး ထိန်းချုပ်လို့ မရဘဲ ခေါင်းထဲ ပေါ်လာတာ မှန်သမျှကို လျှောက်ရေးနေရတာလဲ။ ဒီအကျင့်ဆိုးကို ပြင်ဖို့ လိုနေပြီ။]

နင်းရုန်ရုန် - 'မလုပ်ပါနဲ့... ကျေးဇူးပြုပြီး ငါ့အကြောင်း ပိုရေးပေးပါ။ အနည်းငယ် အရှက်စရာ ကောင်းပေမယ့် ဒါက ငါ့ရဲ့ အားနည်းချက်တွေကို သိလာစေပြီး ဆုလာဘ်တွေလည်း ရနိုင်တယ်လေ။ တကယ် ကောင်းပါတယ်။ တကယ်ပါ'

[ရွှီးလိုင်ခဲ ရဲ့ ဝင်ခွင့် စာမေးပွဲ အကြောင်းကို ဆက်ရေးကြရအောင်။ မူရင်းဇာတ်လမ်းထဲမှာ ထန်ဆန်း နဲ့ တခြားသူတွေ အားလုံးက ဝိညာဉ်စွမ်းအား အဆင့် နှစ်ဆယ့်ငါး အထက်မှာ ရှိကြလို့ ဒုတိယအဆင့်နဲ့ တတိယအဆင့် ကနေ ကင်းလွတ်ခွင့် ရပြီး စတုတ္ထအဆင့်ကို တိုက်ရိုက် သွားခဲ့ရတယ်။ စတုတ္ထအဆင့်အတွက် အကဲဖြတ်တဲ့သူက မတုန်မလှုပ် ဘုရင် ကျောက်ဝူကျိ ပဲ။]

မတုန်မလှုပ် ဘုရင် ဆိုသော စကားလုံးများကို ကြားလိုက်သည်နှင့် တပြိုင်နက် ကျောက်ဝူကျိ ဆိုသည်မှာ မည်သူမည်ဝါ ဖြစ်ကြောင်း နင်းရုန်ရုန် ချက်ချင်း သတိရသွားလေသည်။ ဤ ကျောက်ဝူကျိ က ဝိညာဉ်နန်းတော် ၏ လိုက်လံ ဖမ်းဆီးခြင်းကို ခံနေရသူ မဟုတ်ပါလော။ သူက ဒီနေရာမှာ ပုန်းကွယ်ပြီး ဆရာ တစ်ယောက် ဖြစ်နေလိမ့်မည်ဟု သူမ ထင်မှတ်မထားခဲ့ချေ။

[မူလက စတုတ္ထအဆင့် စာမေးပွဲဆိုတာ ထန်ဆန်း နဲ့ တခြားသူတွေ အဖွဲ့ဖွဲ့ပြီး တိုင်မုပိုင် ရဲ့ တိုက်ခိုက်မှုအောက်မှာ အမွှေးတိုင် တစ်တိုင်စာ အချိန်ကုန်တဲ့အထိ တောင့်ခံထားနိုင်ရင် စာမေးပွဲ အောင်ပြီလေ။]

[မမျှော်လင့်ထားတာ ဘာမှ မဖြစ်ဘူးဆိုရင် သူတို့က ဒီစာမေးပွဲကို အလွယ်တကူ အောင်မြင်နိုင်ပါတယ်။ အကယ်၍ ထန်ဆန်း က သူ့ရဲ့ စွမ်းအား အပြည့်ကို အသုံးပြုမယ်ဆိုရင် တိုင်မုပိုင် က သူ့ရဲ့ ပြိုင်ဘက်အဆင့် မဟုတ်ဘူးလေ။ အဲဒါအပြင် ရှောင်ဝူနဲ့ ကျူချင် တို့က တိုက်ခိုက်မှုတွေမှာ ကူညီပေးမယ်၊ နင်းရုန်ရုန် ရဲ့ ရတနာခုနစ်ပါး မှန်ကြွေအုတ်ချပ် က စွမ်းအား မြှင့်တင်ပေးမယ် ဆိုရင် သူတို့ရဲ့ ယေဘုယျ တိုက်ခိုက်နိုင်စွမ်းက အဆင့် သုံးဆယ့်ခုနစ် ဝိညာဉ်အကြီးအကဲ တစ်ယောက်ဖြစ်တဲ့ တိုင်မုပိုင် ခံနိုင်ရည် ရှိမှာ မဟုတ်ဘူးဆိုတာ သေချာပါတယ်။]

[ဒါပေမဲ့ ကျောက်ဝူကျိ က စာမေးပွဲ သတ်မှတ်ချက်တွေကို ခွင့်ပြုချက် မရှိဘဲ ပြောင်းလဲပစ်လိုက်ပြီး ထန်ဆန်း တို့က သူ့ရဲ့ တိုက်ခိုက်မှုအောက်မှာ အမွှေးတိုင် တစ်တိုင်စာ အချိန်ကုန်တဲ့အထိ တောင့်ခံထားရအောင် လုပ်ပစ်လိုက်တယ်။ ကျောက်ဝူကျိ ဆိုတာက ခွန်အားကြီးမားတဲ့ စိန်သံမဏိ ဝက်ဝံ ကို သိုင်းဝိညာဉ် အဖြစ် ပိုင်ဆိုင်ထားတဲ့ အဆင့် ခုနစ်ဆယ့်ခြောက် ဝိညာဉ်သူတော်စင် တစ်ယောက် ဆိုတာကို သိထားသင့်ပါတယ်။ ထန်ဆန်း တို့ရဲ့ ပျမ်းမျှ စွမ်းအားက အဆင့် သုံးဆယ်တောင် မပြည့်သေးဘဲ ကျောက်ဝူကျိ ရဲ့ ကာကွယ်ရေးကို ထိုးဖောက်ဖို့တောင် သူတို့ မတတ်နိုင်လောက်ဘူး။ ဒါက နောက်ပြောင်နေတာ မဟုတ်ဘူးလား။]

[ရလဒ်ကတော့ သေချာပေါက် သူတို့လေးယောက်စလုံး စိန်ခေါ်မှုမှာ ကျရှုံးသွားတာပဲ။ ဒါပေမဲ့ ဒါက နားလည်ပေးနိုင်ပါတယ်။ ဘာလို့လဲဆိုတော့ ကျောက်ဝူကျိ က အားနည်းသူတွေကို အနိုင်ကျင့်နေတာလေ။]

[သေချာတာပေါ့။ ဒီနေရာမှာ မတော်တဆမှု အသေးစားလေး တစ်ခု ရှိနေသေးတယ်။ မဟုတ်ရင် ငါတို့ရဲ့ ကံကြမ္မာရဲ့သားတော် ထန်ဆန်း ရဲ့ စွမ်းအားတွေကို ဘယ်လိုလုပ်ပြီး ပေါ်လွင်အောင် လုပ်နိုင်မှာလဲ။]

စူးမင် ဤသို့ ရေးသားလိုက်သောအခါ မိန်းကလေးများ၏ ရင်ထဲတွင် ခန့်မှန်းချက် တစ်ခု ချက်ချင်း ထွက်ပေါ်လာလေသည်။ 'အရင်က စူးမင် ပြောခဲ့တဲ့ အရိပ်အမြွက် တွေနဲ့များ သက်ဆိုင်နေမလား'

[ကျောက်ဝူကျိ နဲ့ တိုက်ခိုက်နေတုန်းမှာ ရှောင်ဝူက သူမရဲ့ ဒုတိယ ဝိညာဉ်စွမ်းရည် ဖြစ်တဲ့ ညှို့ယူခြင်း ကို ကျောက်ဝူကျိ အပေါ်မှာ တကယ်ပဲ အသုံးပြုလိုက်တယ်။ ကျောက်ဝူကျိ ဆိုတာက မတုန်မလှုပ် ဘုရင် လို့ နာမည်ကြီးပြီး သူတို့နှစ်ယောက်ရဲ့ စိတ်စွမ်းအား အဆင့်တွေက အရမ်းကို ကွာဟလွန်းတယ် ဆိုတာကို သိထားသင့်ပါတယ်။ သဘာဝကျကျပဲ ရှောင်ဝူက အဲဒီဒဏ်ကို ပြန်ခံလိုက်ရပြီး တိုက်ရိုက် သတိလစ်သွားခဲ့တယ်။ မနက်ဖြန် မတိုက်ခိုက်ခင်မှာ ဒီကိစ္စနဲ့ ပတ်သက်ပြီး ရှောင်ဝူကို ငါ မဖြစ်မနေ သတိပေးရမယ်။ သူမ နောက်ထပ် အသိဉာဏ်မဲ့လို့ မဖြစ်ဘူး။ မဟုတ်ရင် ငါ ရင်နာရလိမ့်မယ်။]

ရှောင်ဝူ - 'ဘာလို့ ငါ့အကြောင်း ထပ်ဖြစ်ရပြန်တာလဲ။ ငါ့မှာ မကောင်းတဲ့ ခံစားချက် တစ်ခု ရှိနေတယ်။ ထန်ဆန်း အရမ်း အစွမ်းထက်လာဖို့အတွက် ငါက ကိုယ့်ကိုယ်ကိုယ် ပြန်ပြီး ယဇ်ပူဇော် ရတာမျိုးတော့ မဟုတ်လောက်ပါဘူးနော်'

[ရှောင်ဝူ ဒဏ်ရာရသွားတာနဲ့ တပြိုင်နက် ထန်ဆန်း က သူ့ရဲ့ စွမ်းအားတွေကို စတင် ထုတ်ဖော်တော့မယ် ဆိုတာကို အရင်က ငါ ရေးခဲ့ဖူးတယ်။ အကယ်၍ ရှောင်ဝူ ဒဏ်ရာ မရဘူးဆိုရင် အဲဒါက အလုပ်ဖြစ်မှာ မဟုတ်ဘူး။ သူမသာ ဒဏ်ရာ မရဘူးဆိုရင် ထန်ဆန်း က သူ့ရဲ့ စွမ်းအား အပြည့်ကို အသုံးပြုမှာ မဟုတ်ဘူးလေ။ သူ ဘာမှ လုပ်နိုင်မှာ မဟုတ်ဘူး။]

[ရှောင်ဝူ ဒဏ်ရာရသွားတာကို မြင်တော့ ထန်ဆန်း က ကျူချင် ကို ရှောင်ဝူကို စောင့်ရှောက်ပေးဖို့ တောင်းဆိုလိုက်ပြီး အဲဒီနောက်မှာ ကျောက်ဝူကျိ နဲ့ သူ တစ်ယောက်တည်း အမွှေးတိုင် တစ်တိုင်စာ အချိန်ကုန်တဲ့အထိ တိုက်ခိုက်ပြီး ပြန်လည် စစ်ဆေးပေးဖို့ တကယ်ပဲ တောင်းဆိုခဲ့တယ်။ အတော်လေး ရယ်ရပါတယ်။ မင်း ဘာလို့ စောစောကတည်းက အဲဒီလို မလုပ်ခဲ့တာလဲ။ မင်းမှာ ကျောက်ဝူကျိ ကို ကိုင်တွယ်ဖြေရှင်းဖို့ နည်းလမ်း ရှိနေတယ်လို့ တကယ်ကြီး ထင်နေမှတော့ မင်းရဲ့ စွမ်းအား အပြည့်ကို ဘာလို့ စောစောကတည်းက အသုံးမပြုခဲ့တာလဲ။ မင်းက ရှောင်ဝူ ဒဏ်ရာရမယ့် အချိန်ကိုပဲ စောင့်နေခဲ့တာ မဟုတ်လား။]

[ရှောင်ဝူရဲ့ ဒဏ်ရာရမှုက ထန်ဆန်း မျှော်လင့်ထားတဲ့အရာ မဟုတ်လောက်ဘူး ဆိုပေမယ့် ဒီလို ကိစ္စမျိုးတွေကိုတော့ သေချာပေါက် ရှောင်ရှားသင့်တယ်လို့ ငါ ထင်တယ်။ မင်းရဲ့ စွမ်းအား အပြည့်ကို အသုံးမပြုခင် ရှောင်ဝူ ဒဏ်ရာရမယ့် အချိန်ကိုပဲ အမြဲတမ်း စောင့်နေလို့ မရဘူးလေ။ တစ်နေ့နေ့ တစ်ချိန်ချိန်မှာ ရှောင်ဝူက ကံဆိုးစွာနဲ့ သေသွားခဲ့ရင် ဘယ်လိုလုပ်မလဲ။]

[ကျစ်... ဒီအကြောင်းကို ရေးလေလေ ငါ ဒေါသထွက်လေလေပဲ။ တိုက်ပွဲမှာ ဒဏ်ရာရဖို့ ဆိုတာက ရှောင်လွှဲလို့ မရနိုင်တဲ့ ကိစ္စဖြစ်လို့ ရှောင်ဝူ ထိခိုက်မှု မရှိအောင် ငါ တတ်နိုင်သမျှ လုပ်ဆောင်နိုင်ရုံပဲ ရှိတယ်။ အတိုက်ရိုက်ဆုံး နည်းလမ်းကတော့ အဖြစ်ဆိုးတွေကို ရှောင်ရှားဖို့ ပြိုင်ပွဲအတွင်းမှာ ငါ့ရဲ့ စွမ်းအား အပြည့်ကို တတ်နိုင်သမျှ အသုံးပြုဖို့ပဲ။]

[ကျောက်ဝူကျိ က ထန်ဆန်းရဲ့ လုပ်ရပ်ကြောင့် အနည်းငယ် အံ့အားသင့်သွားပေမယ့် ခေါင်းညိတ်ပြီး သဘောတူလိုက်တယ်။ ထန်ဆန်း တကယ်ပဲ ဘယ်လောက် စွမ်းဆောင်နိုင်လဲ ဆိုတာကို သူ ကြည့်ချင်လို့ နေမှာပါ။]

[ပြင်ဆင်မှုတွေ ပြီးသွားတဲ့အခါ ထန်ဆန်း က သူ့ရဲ့ ခရမ်းရောင် မိစ္ဆာမျက်လုံး ကို အသက်သွင်းလိုက်ပြီး သူ့ရဲ့ ဝိညာဉ်လက်နက် ပေါ်မှာ လက်ကို တင်ကာ အဆင်သင့် ပြင်ထားလိုက်တယ်။ အဲဒီနောက်မှာ လျှို့ဝှက်လက်နက် တွေကို အသုံးပြုဖို့ ရည်ရွယ်ချက်နဲ့ ကျောက်ဝူကျိ ကို အေးစက်စွာ ကြည့်လိုက်တယ်။]

[ထန်ဆန်းရဲ့ အေးစက်တဲ့ အကြည့်ကို ရင်ဆိုင်ရတဲ့အခါ ကျောက်ဝူကျိ လည်း ချမ်းစိမ့်စိမ့် ခံစားချက် တစ်ခုကို ခံစားလိုက်ရပြီးနောက် သူတို့ရဲ့ ယှဉ်ပြိုင်မှု စတင်ပါတော့တယ်။]

[ထန်ဆန်းရဲ့ ဝိညာဉ်စွမ်းအား အဆင့်က အရမ်း နိမ့်လွန်းနေလို့ ကျောက်ဝူကျိ ရဲ့ ကာကွယ်ရေးကို မထိုးဖောက်နိုင်တဲ့အတွက် နေရာတစ်ခုတည်း ကနေ ထိုးဖောက်ဖို့အတွက် လျှို့ဝှက်လက်နက် အများအပြားကိုပဲ သူ အသုံးပြုနိုင်ခဲ့တယ်။]

[အဲဒီနောက် တိုက်ပွဲအတွင်းမှာ တစ္ဆေအရိပ်ခြေလှမ်း နဲ့ ကျောက်စိမ်းလက်ဝါး လိုမျိုး သူ သင်ယူထားတဲ့ ထန်ဂိုဏ်း ရဲ့ သီးသန့် ကျင့်စဉ်တွေကိုလည်း သူ အသုံးပြုခဲ့ပြီး ကျောက်ဝူကျိ ရဲ့ ပဉ္စမမြောက် ဝိညာဉ်စွမ်းရည် ကို အသုံးပြုလာအောင် ဖိအားပေးနိုင်ခဲ့တယ်။ တကယ်ကို အထင်ကြီးစရာ ပါပဲ။]

ဤအရာကို မြင်သောအခါ မိန်းကလေးများလည်း အံ့အားသင့်သွားကြလေသည်။ ကျောက်ဝူကျိ ကို ပဉ္စမမြောက် ဝိညာဉ်စွမ်းရည် အသုံးပြုလာအောင် လုပ်နိုင်စွမ်း ရှိသည့် ထန်ဆန်း ၌ ဤမျှလောက် စွမ်းအားများ ရှိနေလိမ့်မည်ဟု သူတို့ ထင်မှတ်မထားခဲ့ကြချေ။ ဤအချိန်အတွင်း ကျောက်ဝူကျိ က အလေးအနက် ထားခဲ့မည် မဟုတ်သော်လည်း ၎င်းက အံ့အားသင့်စရာ ကောင်းလောက်အောင် လုံလောက်နေပြီ ဖြစ်လေသည်။

[နောက်ဆုံးမှာ ကျောက်ဝူကျိ ကို အခက်တွေ့သွားစေခဲ့တာက မကြာသေးခင်ကမှ ဖလန်းဒါး ဆီကနေ ထန်ဆန်း ရခဲ့တဲ့ နဂါးမုတ်ဆိတ်အပ် ပဲ။ အရင်က ပြောခဲ့သလိုပဲ နဂါးမုတ်ဆိတ်အပ် က ကျောက်ဝူကျိ လိုမျိုး ဝိညာဉ်သခင် တွေအပေါ်မှာ ကာကွယ်ရေးကို ထိုးဖောက်နိုင်စွမ်း အရမ်း သိသာထင်ရှားတယ်။]

[ဒါကြောင့် အလွန် အလွယ်တကူပဲ ထန်ဆန်း က အခွင့်အရေးကို ဆုပ်ကိုင်လိုက်ပြီး ကျောက်ဝူကျိ ရဲ့ ခန္ဓာကိုယ်ထဲကို နဂါးမုတ်ဆိတ်အပ် အများအပြား ပစ်သွင်းလိုက်တယ်။ နဂါးမုတ်ဆိတ်အပ် က အဲဒီလောက်ကြီးတော့ အံ့ဩစရာ မကောင်းနိုင်ဘဲ ကျောက်ဝူကျိ ရဲ့ ခန္ဓာကိုယ်ထဲက အသားစတွေကို တိုက်ရိုက် အပိုင်းပိုင်းအစစ မဖြစ်သွားစေနိုင်ပေမယ့် ကျောက်ဝူကျိ ကို အတော်လေး စိတ်မသက်မသာ ဖြစ်သွားစေခဲ့တယ်။]

[နောက်ဆုံးမှာတော့ ဒီတိုက်ပွဲမှာ ထန်ဆန်း နိုင်သွားတယ်လို့ သတ်မှတ်လိုက်တယ်။]

မိန်းကလေးများ အံ့အားသင့်သွားကြလေသည်။ ထန်ဆန်း က ဝိညာဉ်သူတော်စင် တစ်ယောက်ဖြစ်တဲ့ ကျောက်ဝူကျိ ကို တကယ်ကြီး အနိုင်ယူနိုင်လိမ့်မည်ဟု သူတို့ ထင်မှတ်မထားခဲ့ကြချေ။ အနည်းငယ် ချဲ့ကားထားမှုများ ရှိနေသော်လည်း ၎င်းက ဂုဏ်ယူစရာ ကောင်းလောက်အောင် လုံလောက်နေပြီ ဖြစ်လေသည်။

[ဒါကြောင့် ဒီနေ့ ထန်ဆန်း ကို ငါ အရိပ်အမြွက် ပေးခဲ့တယ်။ မနက်ဖြန် တိုက်ပွဲအတွင်းမှာ ငါ့ရဲ့ သစ်သားစွမ်းအား ထုတ်လွှတ်မှု နည်းစနစ် ရဲ့ အကူအညီနဲ့အတူ တိုက်ခိုက်ဖို့အတွက် သူ့ရဲ့ လျှို့ဝှက်လက်နက် တွေကို အသုံးပြုဖို့ အခွင့်အရေးကို သူ ဆုပ်ကိုင်နိုင်လိမ့်မယ်လို့ ငါ မျှော်လင့်တယ်။ အဲဒီအခါကျရင် ငါ့ရဲ့ စွမ်းအား နည်းနည်းလောက်ကို ထုတ်ဖော်ပြသပြီး အကွက်သစ် တစ်ခုကို အသုံးပြုလိုက်မယ် ဆိုရင် ကျောက်ဝူကျိ ကို သေချာပေါက် ငါ အနိုင်ယူနိုင်မှာပဲ။]

[ထန်ဆန်း က သူ့ရဲ့ စွမ်းအားတွေကို အရင် ထုတ်ဖော်ပြသမယ်ဆိုရင် ငါ့ရဲ့ စွမ်းအားတွေ ထုတ်ဖော်ပြသမှုက သေချာပေါက် အရမ်းကြီး ရုတ်တရက် ဆန်လွန်းနေမှာ မဟုတ်ဘူး။ ပြီးတော့ ထန်ဟောက် လည်း စိတ်အေးချမ်းသာစွာနဲ့ ထွက်သွားနိုင်မှာပဲ။]

[ထန်ဟောက် ရှိနေတဲ့အတွက် ငါက ထန်ဆန်း ထက် အများကြီး ပိုပြီး အစွမ်းထက်နေတယ်ဆိုတာကို ပြသဖို့က မကောင်းဘူးလေ။ အခု ငါက ထန်ဆန်း ထက် အတော်လေး ပိုပြီး အစွမ်းထက်နေပြီ ဆိုပေမယ့်လည်း ထိန်းချုပ်လို့ ရတဲ့ အတိုင်းအတာ အတွင်းမှာတော့ ရှိသင့်တယ်။ မည်သို့ပင်ဆိုစေ အခု ငါက ထန်ဆန်း ရဲ့ သူငယ်ချင်း တစ်ယောက်အဖြစ် သတ်မှတ်ခံထားရတာပဲလေ။]

[ထို့အပြင် ထန်ဆန်း က သိုင်းဝိညာဉ် နှစ်ခု ပိုင်ရှင်လေ။ နောက်ပိုင်းကျရင် ထန်ဆန်း က ငါ့ကို ကျော်တက်သွားလိမ့်မယ်လို့ ထန်ဟောက် သေချာပေါက် ယုံကြည်နေမှာပဲ။ မည်သို့ပင်ဆိုစေ ထန်ဆန်း က ဟောက်ထျန်းတူ ရဲ့ သီးသန့် ကျင့်စဉ်တွေကို မသင်ယူရသေးဘူးလေ။ ပြီးတော့ သူ့ရဲ့ ငွေပြာမြက် ကလည်း ပိုပြီး အစွမ်းထက်လာဖို့အတွက် အဆင့် ငါးဆယ်ကို ရောက်တဲ့အခါ သွေးသား နိုးထမှု လိုအပ်နေသေးတယ်။ ဒါက ထန်ဟောက် ရဲ့ ယုံကြည်ချက်လို့ သတ်မှတ်လို့ ရပါတယ်။]

[ထို့အပြင် ဝိညာဉ်နန်းတော် ကို တိုက်ခိုက်ဖို့အတွက် ထန်ဆန်း အနေနဲ့ အဖော်တွေ၊ ဒါမှမဟုတ် အသင်းဖော်တွေ လိုအပ်တယ်။ ဒါကလည်း ထန်ဟောက် ရဲ့ ရည်မှန်းချက်တွေထဲက တစ်ခုပဲ။ အနာဂတ်မှာ ထန်ဆန်း နဲ့အတူ ဝိညာဉ်နန်းတော် ကို တိုက်ခိုက်ဖို့အတွက် ပါရမီပါတဲ့ လူတချို့ကို သူ လိုချင်နေတယ်။ ပြီးတော့ သူ့ရဲ့ အစီအစဉ်က တကယ်ပဲ အကောင်အထည် ပေါ်လာခဲ့ပါတယ်။ အနာဂတ်မှာ ဝိညာဉ်နန်းတော် ကို တိုက်ခိုက်မယ့် အသင်းကို ထန်ဆန်း နဲ့ သူ့ရဲ့ အဖော် ခုနစ်ယောက် က ဦးဆောင်ကြမှာပဲ။]

ဤအရာကို မြင်သောအခါ ဘီဘီတုန်း နှင့် ချန်းရန်ရွှယ် တို့ မျက်မှောင်ကြုတ်သွားကြလေသည်။ ဤ ထန်ဟောက် က အတော်လေး ဂနာမငြိမ် ဖြစ်နေပြီး ထန်ဆန်းနှင့် သူ၏ အသင်းက အနာဂတ်တွင် ဝိညာဉ်နန်းတော် ကို ဆန့်ကျင်မည့် အဓိက အင်အားစုများ ဖြစ်နေကြသည်တဲ့လား။

ကြည့်ရတာ သူမက အရင် လှုပ်ရှားပြီး အစီအစဉ်တွေကို စောစောစီးစီး ရေးဆွဲဖို့ လိုအပ်နေပုံ ရလေသည်။ ယခုလောလောဆယ်တွင် ထန်ဆန်းကို သူမ မထိခိုက်နိုင်လျှင်တောင်မှ စီစဉ်မှုများကို တိတ်တဆိတ် စတင် လုပ်ဆောင်နိုင်လေသည်။

[ဒါပေမဲ့ ငါ နည်းနည်း ထူးဆန်းနေသေးတဲ့ အချက် တစ်ချက် ရှိတယ်။ ရှောင်ဝူနဲ့ ငါက ဒီလောက်တောင် ဆက်ဆံရေး ကောင်းနေတာကို ဘာလို့ ထန်ဟောက် က လုံးဝ မတုံ့ပြန်ရတာလဲ။ ထန်ဆန်း အပေါ် ရှောင်ဝူ သံယောဇဉ် တွယ်လာတာကို သူ မလိုချင်ဘူးလား။ အဲဒီနောက်မှာ ရှောင်ဝူ ကိုယ်တိုင် 'အတင်းအကျပ်' ယဇ်ပူဇော် ရအောင် မတော်တဆမှု တစ်ခုကို သူမဖန်တီးချင်ဘူးလား။]

ရှောင်ဝူ - 'အစ်ကို စူးမင် က ဘာလို့ ဒီလောက်တောင် သံသယများနေရတာလဲ။ ဘာမှတော့ သိသွားမှာ မဟုတ်ဘူး မဟုတ်လား။ စနစ်... သန်သန်မာမာ နေပြီး အစ်ကို စူးမင် ကို လှည့်စားဖို့ ကြိုးစားစမ်းပါ'

စူးမင်က စနစ်ကို ပေါ့ပေါ့ပါးပါး မေးလိုက်လေသည်။ "စနစ်... ဘာကြောင့်လဲဆိုတာ မင်း သိလား"

စနစ် - "..."

[ဒင်... ပိုင်ရှင်... ခံစားချက်တွေကို အတင်းအကျပ် လုပ်ယူလို့ မရဘူးဆိုတာကို ထန်ဟောက် သိနေလို့များ ဖြစ်နိုင်မလား။ ဒါကြောင့် သူက ထန်ဆန်း ဝိညာဉ်တုံလော် အဆင့်ကို ရောက်တဲ့အထိ စောင့်ပြီးတော့မှ ရှောင်ဝူကို သတ်ဖို့ အစီအစဉ်ဆွဲထားတာ နေမှာပေါ့။ အခု ထန်ဆန်း ရဲ့ စွမ်းအားက အဆင့် မမီသေးတော့ လောလောဆယ် ကိစ္စတွေကို ဒီအတိုင်းပဲ လွှတ်ထားလိုက်တာ နေမှာပါ။]

[သူ့ရဲ့ ခန့်မှန်းချက် အရဆိုရင် မင်းတို့နှစ်ယောက်က အချိန်အတော်ကြာတဲ့အထိ အတူတူ နေကြဦးမှာပဲ။ မည်သို့ပင်ဆိုစေ အခု မင်းတို့က သူငယ်ချင်းတွေ ဖြစ်နေပြီဆိုတော့ နောက်ပိုင်းမှာ ပြိုင်ပွဲတွေကိုတောင် အတူတူ ဝင်ပြိုင်ကြပြီး မင်းတို့ရဲ့ ဆက်ဆံရေးက ပိုပြီးတော့တောင် နီးကပ်လာနိုင်သေးတယ်။ ကျောင်းဆင်းပြီးတဲ့ နောက်မှာတောင်မှ သေချာပေါက် ဆက်သွယ်မှုတွေ ရှိနေဦးမှာပဲဆိုတော့ သူက လုံးဝ အလောတကြီး မဖြစ်နေတာပါ။]

စနစ် ၏ ရှင်းပြချက်က အလွန် ယုတ္တိတန်လွန်းသဖြင့် သူ ငြင်းဆန်၍ မရနိုင်ကြောင်းကို စူးမင် တွေ့လိုက်ရလေသည်။ ၎င်းက ယုတ္တိတန်ပုံ ရလေသည်။

ကြည့်ရတာ အခုကစပြီး ငါ နည်းနည်း ပိုပြီး ဂရုစိုက်ဖို့ လိုနေပြီ။ ရှောင်ဝူကို ငါ့ဆီကနေ အရမ်း အဝေးကို သွားခွင့်ပြုလို့ မဖြစ်ဘူး။ သူမ အဝေးကို သွားမယ်ဆိုရင်တောင်မှ ဘွဲ့ရတုံလော် တွေကို ကာကွယ်ဖို့အတွက် အဖိုးတန် ရတနာတချို့ သူမကို ငါ ပေးထားဖို့ လိုအပ်တယ်။

[ငါ အခုလေးတင် စနစ်ကို မေးကြည့်လိုက်တယ်။ ထန်ဆန်း ဝိညာဉ်တုံလော် အဆင့်ကို ရောက်တဲ့အထိ စောင့်ပြီးတော့မှ ရှောင်ဝူကို ထန်ဟောက် လှုပ်ရှားလောက်တယ်လို့ စနစ်က ခန့်မှန်းတယ်။ ဒါက တကယ်ကို ယုတ္တိတန်ပါတယ်။]

ရှောင်ဝူ - 'ကောင်းတယ် စနစ်ရေ'

စနစ် - 'ဟီးဟီး... ပိုင်ရှင် က လှည့်စားဖို့ သက်သက်ပါပဲ'

အာရင်ကတော့ သူမက ဒါကို လက်မခံနိုင်ကြောင်း ဖော်ပြလိုက်လေသည်။ သူမ မျက်စိဖြင့် ကိုယ်တိုင် မမြင်ရသရွေ့ သူမ၏ ဟောက် က ဤကဲ့သို့ လုပ်ရပ်မျိုးကို လုပ်လိမ့်မည်ဟု သူမ လုံးဝ မယုံကြည်သေးချေ။

အဘယ်ကြောင့်ဆိုသော် အာရင် ၏ နှလုံးသား ယိမ်းယိုင်နေခဲ့လျှင်တောင်မှ သူမက စိတ်ကူးယဉ်မှု တစ်ခု၊ သို့မဟုတ် မျှော်လင့်ချက် တစ်ခုကို ဆုပ်ကိုင်ထားဆဲ ဖြစ်သောကြောင့်ပင်။

မကြာမီ ယနေ့၏ အချိန်က တဖြည်းဖြည်း ကုန်ဆုံးသွားပြီး သန်းခေါင်ယံ အချိန်သို့ ထပ်မံ ရောက်ရှိလာလေသည်။

[ဒင်... ယနေ့အတွက် ဒိုင်ယာရီ ရေးသားခြင်း ပြီးစီးသွားတဲ့အတွက် ပိုင်ရှင်ကို ဂုဏ်ပြုပါတယ်။ အထူးဆုလာဘ် တစ်ခု ရရှိပါမယ်။]

[ရရှိသော ဆုလာဘ် - နတ်ဘုရားချီးမြှင့်တဲ့ ဝိညာဉ်ကွင်း တစ်ကွင်း။]

[စွမ်းရည် - အမှန်တရားကို မြင်နိုင်တဲ့ မီးတောက်မျက်လုံး။]

[အဆောင်လက်ဖွဲ့တွေ ဖန်တီးဖို့အတွက် ပြီးပြည့်စုံတဲ့ လမ်းညွှန်ချက်။]

မိုက်လိုက်တာ။

ယနေ့တွင် အထူးဆုလာဘ် တစ်ခုကို တကယ်ကြီး ရရှိခဲ့ပြီး ရလာသော ဆုလာဘ်များ အားလုံးကလည်း အလွန် ကောင်းမွန်လှပေသည်။

နတ်ဘုရားချီးမြှင့်တဲ့ ဝိညာဉ်ကွင်း အကြောင်းကိုတော့ ပြောစရာ မလိုတော့ချေ။ သို့သော် ၎င်းက သူ့အတွက် အသုံးမဝင်သဖြင့် လောလောဆယ် သိမ်းထားလိုက်မည် ဖြစ်လေသည်။

အမှန်တရားကို မြင်နိုင်တဲ့ မီးတောက်မျက်လုံး နှင့် ပတ်သက်၍မူ ၎င်းက လှည့်စားမှုများ အားလုံးကို ဖောက်ထွင်းမြင်နိုင်ပြီး အနှစ်သာရကို သိမြင်နိုင်စွမ်း ရှိလေသည်။ ဤစွမ်းရည်က ရှာရင်းဂန်း ၌ မရှိသော အရာတစ်ခု ဖြစ်နေပြီး ၎င်းကို အပြည့်အဝ ဖြည့်ဆည်းပေးလေသည်။

ဤဆုလာဘ် သုံးခုထဲတွင် တန်ဖိုးအရှိဆုံးမှာ "အဆောင်လက်ဖွဲ့တွေ ဖန်တီးဖို့အတွက် ပြီးပြည့်စုံတဲ့ လမ်းညွှန်ချက်" ဖြစ်သည်ဟု စူးမင် ယုံကြည်လေသည်။ ၎င်းတွင် အာကာသ အဆောင်လက်ဖွဲ့၊ နေရာရွှေ့ပြောင်းခြင်း အဆောင်လက်ဖွဲ့၊ ပေါက်ကွဲခြင်း အဆောင်လက်ဖွဲ့၊ လျှပ်စီး အဆောင်လက်ဖွဲ့ နှင့် အခြားသော အရာများ အပါအဝင် အဆောင်လက်ဖွဲ့ အမျိုးမျိုးကို ဖန်တီးရန် နည်းလမ်းများ ပါဝင်လေသည်။

သေချာတာပေါ့။ အဆောင်လက်ဖွဲ့ အမျိုးအစား တစ်ခုချင်းစီအတွက် ဖန်တီးမှု နည်းလမ်းများနှင့် ကုန်ကြမ်းများက သေချာပေါက် ကွဲပြားခြားနားလှပေသည်။ ဤစာအုပ်က အဆောင်လက်ဖွဲ့ များကို အဆင့်ကိုးဆင့် ခွဲခြားထားပြီး ဝိညာဉ်သခင် တစ်ယောက်၏ အဆင့်ကိုးဆင့်နှင့် ကိုက်ညီကာ ရိုးရှင်းပြီး နားလည်ရ လွယ်ကူလှပေသည်။

အကယ်၍ ဤကဲ့သို့သော အဆောင်လက်ဖွဲ့ များသာ တုံလော်တိုက်ကြီး တစ်လျှောက်လုံးတွင် ပျံ့နှံ့သွားပါက ကြီးမားသော တော်လှန်ရေး တစ်ခုကို သေချာပေါက် ဖြစ်ပေါ်စေမည်ဖြစ်ပြီး နည်းပညာ ပေါက်ကွဲမှု တစ်ခုကိုလည်း ဦးတည်သွားစေမည်ဟု စူးမင် ယုံကြည်လေသည်။

မည်သို့ပင်ဆိုစေ တင်းကျပ်စွာ ပြောရလျှင် အဆောင်လက်ဖွဲ့ များသည်လည်း ဝိညာဉ်လက်နက် အမျိုးအစား တစ်ခုအဖြစ် သတ်မှတ်၍ ရနိုင်လေသည်။ အဆောင်လက်ဖွဲ့ များ ပျံ့နှံ့သွားခြင်းက ဝိညာဉ်လက်နက် များတွင် တော်လှန်ရေး တစ်ခုကို ဖြစ်ပေါ်စေရန် အလွန် ဖြစ်နိုင်ခြေ များပြီး ကွင်းဆက် တုံ့ပြန်မှု အမျိုးမျိုးကို ဖြစ်ပေါ်စေမည် ဖြစ်လေသည်။ အတိုက်ရိုက်ဆုံး ရလဒ်မှာ သေချာပေါက် 'အဆောင်လက်ဖွဲ့ ဖန်တီးသူ' ဆိုသော အသက်မွေးဝမ်းကျောင်း တစ်ခု ထွက်ပေါ်လာနိုင်ခြင်းပင် ဖြစ်လေသည်။

သို့သော် စူးမင်၌ လက်ရှိတွင် အဆောင်လက်ဖွဲ့ ဖန်တီးနည်းကို ဖြန့်ဝေရန် ရည်ရွယ်ချက် မရှိသေးချေ။ မည်သို့ပင်ဆိုစေ ၎င်းက ယခုအခါ သူ၏ လျှို့ဝှက်လက်နက် များထဲမှ တစ်ခု ဖြစ်လေသည်။ တစ်ခုတည်းသော အားနည်းချက်မှာ သူ့၌ နည်းလမ်း ရှိနေသော်လည်း အစကနေ ပြန်လည် သင်ယူရန် လိုအပ်နေသေးသဖြင့် ကာလတိုအတွင်းတွင် ၎င်းကို အသုံးပြုနိုင်မည် မဟုတ်ဘဲ အချိန်နှင့် လုပ်အား အများအပြား ယူရမည် ဖြစ်လေသည်။

သို့သော် စူးမင်က ၎င်းက တန်ဖိုးရှိသည်ဟု ခံစားရလေသည်။ အဆောင်လက်ဖွဲ့ များက ထန်ဆန်း၏ လျှို့ဝှက်လက်နက် များထက် အဆပေါင်းများစွာ ပိုမို အစွမ်းထက်လှပေသည်။