အခန်း (၄၉) - မိန်းကလေးများ၏ စာနာမှု၊ ရှောင်ဝူမှာ တကယ်ကို သနားစရာ ကောင်းလွန်းလှသည်

[မူရင်းဇာတ်လမ်းထဲတွင် ရှောင်ဝူက သူမ၏ ကိုယ်ပေါ်တွင် ရှိနေသည့် နှစ်သက်ခြင်းမေတ္တာ ပန်း ကို အသုံးပြု၍ သူမ၏ ဝိညာဉ်သားရဲ အငွေ့အသက်ကို ဖုံးကွယ်ထားနိုင်ခဲ့သည်။ သူမက တကယ်တမ်းကျတော့ ထန်ဆန်းနှင့် သူ့အဖွဲ့နှင့်အတူ ဝိညာဉ်မြို့တော် သို့ နောက်ဆုံး ဝိညာဉ်သခင် ပြိုင်ပွဲ တွင် ပါဝင်ယှဉ်ပြိုင်ရန် သွားရောက်ခဲ့သည်။ ရလဒ်အနေဖြင့် ဗိုလ်လုပွဲ ပြီးဆုံးသွားပြီးနောက် သူမ၏ နှစ်တစ်သိန်းသက်တမ်းရှိ ဝိညာဉ်သားရဲ တစ်ကောင်ဖြစ်ကြောင်း ကိုယ်ပိုင်လက္ခဏာကို လူတိုင်းက သတိထားမိသွားကြတော့သည်။]

[နောက်ပိုင်းတွင် ယခင်က ရေးသားခဲ့သည့်အတိုင်း ဘီဘီတုန်းက ရှောင်ဝူကို သတ်ပစ်ချင်ခဲ့သော်လည်း ထန်ဆန်း၏ ဖခင် ထန်ဟောက် ရောက်ရှိလာပြီး ထန်ဆန်းနှင့် ရှောင်ဝူတို့ကို ကယ်တင်လိုက်သည်။ ထို့နောက် ရှောင်ဝူကို ရှင်းတိုသစ်တောကြီး သို့ ပြန်သွားစေပြီး အပြင်သို့ လုံးဝ မထွက်လာရန်နှင့် သူမကိုယ်သူမ ကာကွယ်ရန် ပြောလိုက်လေသည်။]

[သူ့အတွက်မူ ထန်ဆန်းကို သူ့ဘေးနားတွင် ထားရှိကာ ထန်ဆန်းကို ကိုယ်တိုင် သင်ကြားပြသပေးပြီး ထန်ဆန်း၏ ခန္ဓာကိုယ်ထဲရှိ ငွေပြာဧကရာဇ် သွေးဆက် ကို အသက်သွင်းရန် ခေါ်သွားခဲ့သည်။ ထိုအရာက ထန်ဆန်း၏ ဝိညာဉ်ကို ငွေပြာဧကရာဇ် အဖြစ် ဆင့်ကဲပြောင်းလဲသွားစေခဲ့သည်]

[ထန်ဟောက်က ရှောင်ဝူကို ရက်ရောစွာ လွှတ်ပေးလိုက်ပုံ ပေါက်နေသော်လည်း သူ၏ ရင်ထဲတွင် တွက်ချက်ထားသော အစီအစဉ်များ ရှိနေသည်။]

[မဟုတ်ရင် သူမက ရှောင်ဝူဟာ နှစ်တစ်သိန်းသက်တမ်းရှိ ဝိညာဉ်သားရဲ တစ်ကောင် ဖြစ်မှန်း ထင်ရှားသိရှိနေပြီး ရှောင်ဝူက ထန်ဆန်းကို သဘောကျကြောင်းကိုလည်း သိရှိနေပါလျက်နဲ့ ဘာလို့ ရှောင်ဝူကို ဝိညာဉ်မြို့တော် သို့ သွားခွင့်ပေးလိုက်ရတာလဲ။ သူက ရှောင်ဝူရဲ့ ကိုယ်ပိုင်လက္ခဏာ ပေါ်ပေါက်သွားတဲ့အထိ စောင့်နေမယ့်အစား ရှောင်ဝူကို ကြိုတင်ပြီး ကြားဖြတ် တားဆီးထားသင့်တာလေ]

ရှောင်ဝူ - "လူယုတ်မာကြီး၊ ငါက ထန်ဆန်းကို သဘောကျတယ်လို့ ဘယ်သူက ပြောလဲ။ ငါ သူ့ကို အခု လုံးဝ မကြိုက်တော့ဘူး"

အခြားသော အမျိုးသမီးဇာတ်ဆောင် အများစုမှာလည်း စူးမင်၏ အမြင်နှင့် သဘောတူကြလေသည်။ အကယ်၍ ထန်ဟောက်သာ ရှောင်ဝူကို ကြိုတင် ကြားဖြတ် တားဆီးထားနိုင်ခဲ့လျှင် ရှောင်ဝူ၏ ကိုယ်ပိုင်လက္ခဏာမှာ လူသိရှင်ကြား ဖြစ်လာမည် မဟုတ်ပေ။ မည်သို့ပင်ဆိုစေ နှစ်တစ်သိန်းသက်တမ်းရှိ ဝိညာဉ်ကွင်း တစ်ကွင်းနှင့် ဝိညာဉ်အရိုး တစ်ချောင်းမှာ အလွန်တရာမှ သွေးဆောင်မှု ရှိလွန်းလှသည် မဟုတ်ပါလော။

[ထန်ဆန်းက ငါးနှစ်ကြာ ကျင့်ကြံပြီးနောက် ရှောင်ဝူကို ရှာဖွေရန် ရှင်းတိုသစ်တောကြီး သို့ သွားရောက်ရန် ပြင်ဆင်ခဲ့သည်။ သူ့ရဲ့ ဝိညာဉ်စွမ်းအားက အဆင့် ၅၉ ဖြစ်နေခဲ့တယ်။ အဆင့် ၅၉ တဲ့လေ]

မိန်းကလေးများမှာလည်း ထန်ဆန်း၏ အဆင့်ကို သတိပြုမိသွားပြီး သူတို့၏ ရင်ထဲတွင် သံသယများ ဖြစ်ပေါ်လာကြလေသည်။ ဒါက အရမ်း တိုက်ဆိုင်လွန်းမနေဘူးလား။

ရှောင်ဝူ၏ မျက်နှာလေးမှာ အနည်းငယ် သွေးဆုတ်သွားလေသည်။ မဖြစ်နိုင်တာ၊ သူမက တကယ်ပဲ အဲဒီလောက်ထိ သနားစရာ ကောင်းနေတာလား။

[ထန်ဆန်းက ရှောင်ဝူရဲ့ အရိပ်အယောင်တွေကို ရှာဖွေဖို့ ရှင်းတိုသစ်တောကြီး ထဲကို ရောက်လာတဲ့ အချိန်မှာပဲ ဝိညာဉ်နန်းတော် အဖွဲ့ တစ်ဖွဲ့နဲ့ တိုက်တိုက်ဆိုင်ဆိုင် တွေ့ဆုံသွားခဲ့တယ်။ ဘာလို့များ ဒီအချိန်မှာပဲ တိုက်တိုက်ဆိုင်ဆိုင် ဖြစ်နေရတာလဲ]

[ထန်ဆန်းရဲ့ ဖခင် ထန်ဟောက် နဲ့ အာရင် တို့ ယဇ်ပူဇော်ခြင်း ခံလိုက်ရတဲ့ အခြေအနေကို ပြန်တွေးကြည့်ပါ။ ထိုအချိန်တုန်းက ထန်ဟောက်ရဲ့ ဝိညာဉ်စွမ်းအား အဆင့်ကလည်း တိုက်တိုက်ဆိုင်ဆိုင် အဆင့် ၉၀ ဖြစ်နေခဲ့တယ်။ ထို့နောက် သူတို့ နှစ်ယောက်စလုံးက ဝိညာဉ်နန်းတော် ရဲ့ နောက်ယောင်ခံ လိုက်ခြင်းကို ခံလိုက်ရပြီး အာရင်က ထန်ဟောက်အတွက် ယဇ်ပူဇော်ခြင်း ခံလိုက်ရတာပဲ]

[လက်ရှိ အခြေအနေမှာတော့ ထန်ဆန်းရဲ့ ဝိညာဉ်စွမ်းအားက အဆင့် ၆၀ ကို ချိုးဖောက်ဝင်ရောက်ခါနီး အဆင့် ၅၉ ဖြစ်နေတယ်။ ပြီးတော့ သူက ရှင်းတိုသစ်တောကြီး ထဲကို ရောက်လာပြီး ဝိညာဉ်နန်းတော် အဖွဲ့ နဲ့ တိုက်တိုက်ဆိုင်ဆိုင် တွေ့ဆုံသွားခဲ့ပြန်တယ်။ နောက်ပိုင်း ဖြစ်ပျက်လာမယ့် အရာတွေကို စိတ်ကူးကြည့်လို့ ရပါတယ်။ ထန်ဆန်းက ရှောင်ဝူကို ကာကွယ်ဖို့ အသည်းအသန် ကြိုးစားခဲ့ပေမယ့် ဝိညာဉ်နန်းတော် အဖွဲ့ ကို မနိုင်ခဲ့ပါဘူး။ ထန်ဆန်းကို ကာကွယ်ဖို့အတွက် ရှောင်ဝူက ယဇ်ပူဇော်ခြင်း ကို ရွေးချယ်လိုက်ရတယ်]

[ကြည့်လေ... သူတို့ရဲ့ အတွေ့အကြုံတွေက အရမ်းတူနေတယ်။ ဒါက တကယ်ပဲ တိုက်ဆိုင်မှု သက်သက်ပဲလား။ ဒါမှမဟုတ် တစ်ယောက်ယောက်က တမင်သက်သက် စီစဉ်ထားတာများလား။ တွေးကြည့်ရင်ကို ကြောက်စရာ ကောင်းတယ်]

ဂူထဲတွင် ရှိနေသော အာရင်၏ ငွေပြာဧကရာဇ် ခန္ဓာကိုယ်လေးမှာ ဆက်တိုက် ယိမ်းနွဲ့နေလေသည်။ သူမက ဤအချက်ကို မယုံကြည်ချင်သလို သူမ၏ ရင်ထဲတွင်လည်း ယုံကြည်ရန် ခက်ခဲနေသော်လည်း စူးမင်၏ ကောက်ချက်ချမှုမှာ အပြစ်ပြောစရာ မရှိလောက်အောင် ပြီးပြည့်စုံလွန်းနေလေသည်။

ထန်ဟောက်နှင့် ထန်ဆန်းတို့ နှစ်ဦးစလုံး၏ ဝိညာဉ်စွမ်းအား အဆင့်များမှာ ချိုးဖောက်ဝင်ရောက်ခါနီး အခြေအနေတွင် အဘယ်ကြောင့် တူညီနေကြရသနည်း။ အကယ်၍ သူတို့သာ ချိုးဖောက်ဝင်ရောက်ခါနီး အဆင့်တွင် မရှိခဲ့ပါက ယဇ်ပူဇော်ခြင်း ကို လက်ခံနိုင်မည် မဟုတ်ပေ။ ဘာလို့လဲဆိုတော့ ဝိညာဉ်သခင် တစ်ယောက်၏ ကိုယ်ပိုင် အဆင့်က လိုအပ်ချက်နှင့် မကိုက်ညီပါက ဝိညာဉ်ကွင်းကို ချိတ်ဆက်၍ မရနိုင်သောကြောင့် ဖြစ်လေသည်။

[ပြီးတော့ ထန်ဆန်းက ရှောင်ဝူရဲ့ နှစ်တစ်သိန်းသက်တမ်းရှိ ဝိညာဉ်ကွင်း နဲ့ ဝိညာဉ်အရိုး ကို ရရှိသွားတဲ့အတွက် 'ကံဆိုးမိုးမှောင်ကျခြင်းကြားမှ ကောင်းကျိုးရခြင်း' လို့တောင် ပြောလို့ရပါတယ်]

[ရှောင်ဝူ ရွေးချယ်ခဲ့တဲ့ ယဇ်ပူဇော်ခြင်း က ပိုပြီး အာဏာရှင်ဆန်တဲ့ အမျိုးအစား ဖြစ်တဲ့အတွက် သူမရဲ့ ဝိညာဉ် အပါအဝင် အရာအားလုံးကို ယဇ်ပူဇော်ခြင်း ဖြစ်ပါတယ်။ မည်သို့ပင်ဆိုစေ အဲဒီအချိန်တုန်းက ထန်ဆန်းရဲ့ ဝိညာဉ်စွမ်းအား အဆင့်က နှစ်တစ်သိန်းသက်တမ်းရှိ ဝိညာဉ်ကွင်း တစ်ကွင်းကို ခံနိုင်ရည် မရှိခဲ့ပါဘူး]

[ယဇ်ပူဇော်ခြင်း ခံလိုက်ရပြီးနောက်မှာ ရှောင်ဝူက သာမန် ယုန်တစ်ကောင် ဖြစ်သွားခဲ့ပြီး သူမရဲ့ ဝိညာဉ်စွမ်းအား အများစုက ဝိညာဉ်ကွင်း နဲ့ ဝိညာဉ်အရိုး တို့အပေါ်မှာ ကပ်ပါသွားခဲ့တယ်]

[အဲဒီအချိန်တုန်းက ရှောင်ဝူက ထန်ဆန်းကို သဘောကျနေခဲ့တာဆိုတော့ သူမ အသက်ကို စွန့်ပြီး ယဇ်ပူဇော်ခဲ့တာပဲ။ ဒါကြောင့် ရှောင်ဝူရဲ့ နှစ်တစ်သိန်းသက်တမ်းရှိ ဝိညာဉ်ကွင်း နဲ့ ဝိညာဉ်အရိုး တို့က ထန်ဆန်းရဲ့ ဝိညာဉ်စွမ်းအားကို ထိန်းချုပ်ရာမှာ ဘယ်လို အတားအဆီးမျိုးမှ မဖြစ်ပေါ်စေပါဘူး။ အရာအားလုံးက သဘာဝကျကျ ဖြစ်သွားခဲ့တာပါ။ ထို့အပြင် ထန်ဆန်း အန္တရာယ်နှင့် ကြုံတွေ့ရတိုင်း ရှောင်ဝူက ထန်ဆန်း၏ ဆဋ္ဌမ ဝိညာဉ်စွမ်းရည် ကို အသက်သွင်းပြီး ဝိညာဉ်ပုံစံဖြင့် ထန်ဆန်းအတွက် တိုက်ခိုက်ပေးခဲ့သေးတယ်]

[ဒီအရာတွေက တန်ဖိုးတစ်ခုတော့ ရှိပါတယ်။ ရှောင်ဝူရဲ့ ဝိညာဉ်ပုံစံ အခြေအနေကြောင့် ဝိညာဉ်ကွင်း နဲ့ ဝိညာဉ်အရိုး စွမ်းရည်တွေကို အသုံးပြုလေ သူမရဲ့ ဝိညာဉ်က ပိုပြီး ပျံ့လွင့်သွားလေ ဖြစ်ပြီး နောက်ဆုံးမှာတော့ အိပ်မောကျသွားတာ ဒါမှမဟုတ် ပျောက်ကွယ်သွားတာ ဖြစ်နိုင်တယ်]

[ထို့နောက် တခြား ဝိညာဉ်ကွင်းတွေလိုပဲ 'မသိစိတ်' အနည်းငယ်က ဝိညာဉ်ကွင်းထဲမှာ ပေါင်းစပ်သွားပြီး ထန်ဆန်းရဲ့ ဝိညာဉ်စွမ်းအား ထိန်းချုပ်မှုကို မသိစိတ်ကနေ ဟန့်တားနေလိမ့်မယ်။ သို့သော် ရှောင်ဝူရဲ့ ထူးခြားမှုကြောင့် ထန်ဆန်းအပေါ်မှာတော့ သက်ရောက်မှု ရှိမှာ မဟုတ်ပါဘူး]

ဤအရာကို ဖတ်ရှုပြီးနောက် ရှောင်ဝူ၏ မျက်နှာလေးမှာ ပို၍ပင် ဖြူဖျော့သွားလေသည်။ မူရင်းဇာတ်လမ်းထဲတွင် သူမက တကယ်ကို သနားစရာ ကောင်းလွန်းလှပေသည်။

သူမ၏ မိခင်က ဗဟိုချက်ဒေသမှ ရက်စက်သောသားရဲ တစ်ကောင်၏ ဒဏ်ကြောင့် ဘီဘီတုန်းဆီတွင် ယဇ်ပူဇော်ခြင်း ခံခဲ့ရသလို သူမကိုယ်တိုင်လည်း ထန်ဆန်းအတွက် ယဇ်ပူဇော်ခဲ့ရပြန်သည်။ နောက်ပိုင်းတွင် သူမ ပြန်လည် ရှင်သန်လာခဲ့သော်လည်း အသူရာနတ်ဘုရား ဓား အတွက် ဓားအိမ် အဖြစ်သာ အသုံးချခံခဲ့ရလေသည်။

တစ်ချိန်တည်းမှာပင် ရှောင်ဝူမှာလည်း အနည်းငယ် ဇဝေဇဝါ ဖြစ်နေလေသည်။ ထိုအချိန်တုန်းက သူမက ရှင်းတိုသစ်တောကြီး ထဲတွင် ရှိနေခဲ့ရာ တာ့မင် နဲ့ အာမင် တို့က သူမ၏ ဘေးနားတွင် ရှိနေသင့်သည်။ ဘာကြောင့် သူမက နောက်ဆုံးတွင် ယဇ်ပူဇော်ခြင်း ခံလိုက်ရရတာလဲ။

ဝိညာဉ်နန်းတော် အဖွဲ့ ကို ဦးဆောင်လာသည့် ဘွဲ့ရတုံလော် က တကယ်ပဲ အဲဒီလောက်ထိ အစွမ်းထက်တာလား။ သူတို့က တာ့မင် နဲ့ အာမင် တို့ကို တစ်ပြိုင်နက်တည်း ပိတ်လှောင်နိုင်ပါ့မလား။

တကယ်တမ်းကျတော့ ရှောင်ဝူ ခန့်မှန်းတာ တစ်ဝက်လောက် မှန်နေပါတယ်။ ထိုအချိန်က အဖွဲ့ကို ဦးဆောင်လာသူတွေက အဆင့် ၉၅ ဘွဲ့ရတုံလော် နှစ်ပါး ဖြစ်တဲ့ ခရိုင်ဆန် နဲ့ ဂွီမေ့ တို့ပဲ ဖြစ်ပါတယ်။ သို့သော် သူတို့၏ စုစုပေါင်း စွမ်းအားက အဲဒီလောက်ထိ မြင့်မားနေတာ မဟုတ်ဘဲ တစ်ဦးချင်း ယှဉ်ပြိုင်ရင် တာ့မင် နဲ့ အာမင် တို့ကို မယှဉ်နိုင်ပါဘူး။

ဒါပေမဲ့ သူတို့ရဲ့ သိုင်းဝိညာဉ် ပေါင်းစပ်ခြင်း နည်းစနစ် ဖြစ်တဲ့ တစ်ခုတည်းသော တည်ငြိမ်မှု နယ်ပယ် က အရမ်း ထူးခြားပါတယ်။ သူတို့က ရန်သူတွေကို အချိန်တစ်ခုအထိ အေးခဲသွားအောင် လုပ်နိုင်စွမ်း ရှိပါတယ်။

သေချာတာပေါ့။ ရန်သူတွေကို အေးခဲသွားအောင် လုပ်နေချိန်မှာ သူတို့ကိုယ်တိုင်လည်း လှုပ်ရှားလို့ မရပါဘူး။ ရန်သူက ပိုအစွမ်းထက်လေ အေးခဲနိုင်တဲ့ အချိန်က ပိုတိုလေပဲ။ ဒါပေမဲ့ ထိုအချိန်လေးကပင် ဝိညာဉ်နန်းတော် အဖွဲ့ ထဲက တခြားသူတွေ ထန်ဆန်းနဲ့ ရှောင်ဝူကို တိုက်ခိုက်ဖို့ လုံလောက်နေပါတယ်။

အခြားသော အမျိုးသမီးဇာတ်ဆောင်များမှာ ဤအကြောင်းကို ဖတ်ရှုပြီးနောက် အရာအားလုံးကို အပြည့်အဝ နားလည်သွားကြလေသည်။ ဒါဆိုရင် ကိုယ့်ကို သဘောကျတဲ့ ဝိညာဉ်သားရဲ တစ်ကောင်က ကိုယ့်အတွက် ယဇ်ပူဇော်လိုက်မယ်ဆိုရင် ကိုယ့်ရဲ့ ဝိညာဉ်စွမ်းအား ထိန်းချုပ်နိုင်စွမ်းအပေါ် သက်ရောက်မှု မရှိဘူးပေါ့လေ။

ထို့နောက် သူတို့က စူးမင် ယခင်က ရေးသားခဲ့သော ထန်မိသားစု နိယာမ များကို တစ်ပြိုင်နက်တည်း သတိရလိုက်ကြသည်။ ဒါဆိုရင် အဲဒီနှစ်တစ်သိန်းသက်တမ်းရှိ လူယောင်ဖန်ဆင်းထားတဲ့ ဝိညာဉ်သားရဲ တွေ အားလုံးက နောက်ဆုံးမှာ ယဇ်ပူဇော်လိုက်ကြတာလား။ အဲဒီလိုသာ ဆိုရင် တကယ်ကို ကြောက်စရာ ကောင်းလှသည်။ ခေတ်တိုင်းမှာ ဇနီးသည်က အနည်းဆုံး နှစ်တစ်သိန်းသက်တမ်းရှိ ဝိညာဉ်သားရဲ တစ်ကောင် ဖြစ်ပြီး ခေတ်တိုင်းမှာ နှစ်တစ်သိန်းသက်တမ်းရှိ ဝိညာဉ်သားရဲ က ယဇ်ပူဇော်လိုက်ကြတာ။ ဘယ်လိုပဲ တွေးတွေး တစ်ခုခု မှားယွင်းနေတယ်။ ဒါက တိုက်ဆိုင်မှု တစ်ခုတော့ လုံးဝ မဟုတ်နိုင်ပါဘူး။

တစ်ချိန်တည်းမှာပင် သူတို့က ရှောင်ဝူအပေါ် အနည်းငယ် စာနာမိသွားကြလေသည်။ မူရင်းလမ်းကြောင်းအတိုင်းသာ ဖြစ်ပေါ်လာခဲ့မည်ဆိုပါက ရှောင်ဝူက တကယ်ကို သနားစရာ ကောင်းလွန်းလှသည်။ သူမ၏ မိခင်က ယဇ်ပူဇော်ခြင်း ခံခဲ့ရတယ်၊ သူမကိုယ်တိုင်လည်း ယဇ်ပူဇော်ခဲ့ရတယ်၊ နောက်ပိုင်းတွင် သူမက ထန်ဆန်း၏ အသူရာနတ်ဘုရား ဓား အတွက် ဓားအိမ် အဖြစ်တောင် အသုံးချခံခဲ့ရသေးတယ်လေ။

ထို့နောက် သူတို့က ရှောင်ဝူဟာ နှစ်တစ်သိန်းသက်တမ်းရှိ ဝိညာဉ်သားရဲ တစ်ကောင် ဖြစ်မှန်း သိရှိသွားချိန်တွင် နော့တန်မြို့ ၌ သူမကို ဖမ်းဆီးပြီး မမွေးမြူခဲ့သည့် ထန်ဟောက်၏ ရွေးချယ်မှုမှာ ရှောင်ဝူက ထန်ဆန်းကို သဘောကျလာစေပြီး ထန်ဆန်းအတွက် တက်တက်ကြွကြွ ယဇ်ပူဇော်စေချင်သည့် ရည်ရွယ်ချက်ကြောင့် ဖြစ်နိုင်ကြောင်းကို သူတို့ ပို၍ပင် သေချာသွားကြလေသည်။

ပြီးတော့ ထန်ဆန်းကလည်း စွမ်းရည် တကယ် ရှိပါသည်။ သူက ထန်ဟောက်၏ 'မျှော်လင့်ချက်' ကို မပျက်စီးစေဘဲ ရှောင်ဝူကို တကယ်ပဲ သူ့အပေါ် သဘောကျလာအောင် လုပ်ဆောင်နိုင်ခဲ့လေသည်။

ထို့နောက် ဒိုင်ယာရီ ဆက်လက်၍ အသစ်ပေါ်လာသည်ကို သူတို့ မြင်လိုက်ရလေသည်။

[တောက်... ငါ ရေးလေလေ ပိုဒေါသထွက်လေပဲ။ နောက်ပိုင်းမှာ ထန်ဆန်းက ရှောင်ဝူ လုံးဝ ပျောက်ကွယ်သွားတာ မဟုတ်ဘဲ သူမရဲ့ ရုပ်ပိုင်းဆိုင်ရာ ခန္ဓာကိုယ်ကို ဆုံးရှုံးသွားခဲ့ပြီး သူမရဲ့ ဝိညာဉ်က ဝိညာဉ်ကွင်း ထဲမှာ နေထိုင်နေကြောင်း သိသွားခဲ့တယ်]

[အဲဒီအခါမှာ ထန်ဆန်း အလွန်အမင်း ပျော်ရွှင်သွားပြီး ရှောင်ဝူရဲ့ ဝိညာဉ် ပျံ့လွင့်သွားမှာကို စိုးရိမ်တဲ့အတွက် ရှောင်ဝူရဲ့ နှစ်တစ်သိန်းသက်တမ်းရှိ ဝိညာဉ်ကွင်း နဲ့ ဝိညာဉ်အရိုး တို့ကို လုံးဝ အသုံးမပြုတော့ဘူးလို့ ပြောခဲ့တယ်။ ဒါပေမဲ့ သူ ပြောတဲ့စကားကို သူကိုယ်တိုင်ပဲ ဖျက်ခဲ့တယ်။ နောက်ပိုင်းမှာ သူ အသုံးပြုခဲ့တာက ရှောင်ဝူရဲ့ ဝိညာဉ်အရိုး စွမ်းရည် နှစ်ခုဖြစ်တဲ့ ထူးချွန်သော ရွှေရောင်ခန္ဓာကိုယ် နဲ့ နေရာရွှေ့ပြောင်းခြင်း တို့ ဖြစ်ပြီး နှစ်တစ်သိန်းသက်တမ်းရှိ ဝိညာဉ်စွမ်းရည် ဖြစ်တဲ့ ကောင်းကင်ဘုံ အကြမ်းဖက်ရှစ်ဆင့်ချပစ်ခြင်း ကိုလည်း အကြိမ်ပေါင်းများစွာ အသုံးပြုခဲ့တာပဲ။ ရှောင်ဝူရဲ့ ဝိညာဉ်က ပိုပြီးတော့တောင် အားနည်းသွားလိမ့်မယ်လို့ သူ မပူပန်ခဲ့ဘူးလား]