အခန်း (၃၇) - ကံဆိုးမိုးမှောင်ကျခြင်း အဆောင်လက်ဖွဲ့၏ အကျိုးသက်ရောက်မှု (နှစ်ပိုင်းတစ်ပိုင်း)

ရှောင်ဝူ၏ မျက်လုံးများ နီရဲနေသည်ကို စူးမင် ရုတ်တရက် သတိပြုမိသွားပြီး "ရှောင်ဝူ... ဘာဖြစ်လို့လဲ။ နင့်မျက်လုံးတွေ ဘာလို့ ဒီလောက်တောင် နီရဲနေရတာလဲ" ဟု စိုးရိမ်တကြီး မေးလိုက်သည်။

"ဟင်"

ရှောင်ဝူ လန့်ဖျပ်သွားရသည်။ 'ဒါ အားလုံး နင့်ကြောင့်လေ' ဟု ရင်ထဲမှ ကျိတ်၍ တွေးလိုက်သည်။

"ဘာ... ဘာမှမဖြစ်ပါဘူး။ ထမင်းစားရင်း လျှာကို မတော်တဆ ကိုက်မိသွားလို့ နည်းနည်း နာသွားတာပါ"

စူးမင်က ညင်သာစွာဖြင့် "ဖြည်းဖြည်းစားပါ။ ဘယ်သူမှ နင့်ဆီက လုမစားပါဘူး" ဟု ပြောလိုက်သည်။

"အင်း"

ထမင်းစားပြီးနောက် သူတို့နှစ်ဦး ကိုယ်စီ ကျင့်ကြံရန် လမ်းခွဲခဲ့ကြသည်။

သူတို့က မောင်နှမတွေ ဖြစ်သွားကြပြီဆိုသော်လည်း အချိန်တိုင်း အတူတကွ ရှိနေ၍ မရနိုင်ပေ။ ထို့အပြင် ဤအဆင့်တွင် သူတို့က မောင်နှမတွေ သက်သက်သာ ရှိသေးသည် မဟုတ်ပါလော။

ရှောင်ဝူကို နေ့စဉ် ခန္ဓာကိုယ် သန့်စင်ဆေးရည် တစ်ပုလင်းစီ ပေးရန် စူးမင် ရည်ရွယ်ထားသည်။ သူမက အားလုံးကို အသုံးပြုပြီးသွားသောအခါ သူမ၏ ရုပ်ပိုင်းဆိုင်ရာ ကြံ့ခိုင်မှုက ကြီးမားသော တိုးတက်မှုကို မြင်တွေ့ရမည် ဖြစ်လေသည်။

လက်ရှိတွင် စူးမင်၌ ကျင့်စဉ်တစ်ခုနှင့် စိတ်စွမ်းအား ကျင့်စဉ်တစ်ခု ရှိနေပြီဖြစ်ပြီး ခန္ဓာကိုယ် သန့်စင်ခြင်း ကျင့်စဉ်တစ်ခုသာ လိုအပ်တော့သည်။ မည်သည့်အချိန်တွင် ၎င်းကို မဲနှိုက်ရရှိလောက်အောင် ကံကောင်းလာမည်ကို သူ တွေးတောနေမိသည်။

မကြာမီ အချိန်များ တရွေ့ရွေ့ ကုန်ဆုံးသွားပြီး သန်းခေါင်ယံ အချိန်သို့ ထပ်မံ ရောက်ရှိလာခဲ့သည်။

စူးမင်က သူ၏ရှေ့ရှိ ဒိုင်ယာရီကို စိတ်လှုပ်ရှားစွာဖြင့် ကြည့်ကာ အံ့မခန်း ဆုလာဘ်တစ်ခု ရရှိရန် မျှော်လင့်နေမိသည်။

[ဒင်... ယနေ့အတွက် ဒိုင်ယာရီ ရေးသားခြင်း ပြီးစီးသွားတဲ့အတွက် ပိုင်ရှင်ကို ဂုဏ်ပြုပါတယ်။ ရရှိလာတဲ့ ဆုလာဘ်တွေကတော့ အလိုအလျောက် ရေခဲသေတ္တာကြီး တစ်လုံး၊ ပျော်ရွှင်စရာ အာလူးကြော် ဆယ်ထုပ်နဲ့ အချက်အပြုတ် ကျွမ်းကျင်မှု တို့ပဲ ဖြစ်ပါတယ်။]

စူးမင် - ဝိုး... စနစ် မင်းက တကယ်ကို မလွယ်ဘူးပဲ။

စူးမင် မှင်သက်သွားရသည်။ လွန်ခဲ့သည့် ရက်အနည်းငယ်က သူ မဲနှိုက်ရရှိခဲ့သော ပစ္စည်းများက အရမ်း ကောင်းမွန်လွန်းနေခဲ့သဖြင့် သူ၏ ကံကြမ္မာ အားလုံးကို အသုံးပြုပြီးသွားပြီလား။ ဒီနေ့ ဆုလာဘ်တွေက ဘာကြီးလဲ။

ဆုလာဘ်သုံးခုအနက် အချက်အပြတ် ကျွမ်းကျင်မှုကသာ တောထဲတောင်ထဲ ရောက်နေချိန်အတွက် အနည်းငယ် အသုံးဝင်ပေသည်။ ကျန်သည့် နှစ်ခုမှာမူ သာမန် ပစ္စည်းများသာ ဖြစ်လေသည်။

သူတို့က အသုံးဝင်သော်လည်း များများစားစားတော့ မဟုတ်ပေ။ (စနစ်က ပေးသော ပစ္စည်းများမှာ နေ့တိုင်း ထိပ်တန်းအဆင့်ချည်း ဖြစ်နေ၍ မရနိုင်ပေ။ သာမန် ပစ္စည်းအချို့လည်း အမြဲတမ်း ရှိနေမည် ဖြစ်သည်။)

စူးမင်က 'ရပါတယ်၊ ရပါတယ်။ ဒါက မတော်တဆမှု တစ်ခုပါ' ဟု သူ့ကိုယ်သူ ဆက်လက် နှစ်သိမ့်နေမိသည်။

ချက်ချင်းပင် ယနေ့ သူရရှိခဲ့သော ဆုလာဘ်များကို ဒိုင်ယာရီထဲတွင် စတင် မှတ်တမ်းတင်လိုက်သည်။

[ဒီနေ့ ဆုလာဘ်တွေကတော့ တကယ်ကို ဖော်ပြရခက်တာပါပဲ။ လွန်ခဲ့တဲ့ ရက်အနည်းငယ်က အဲဒီကျင့်စဉ်တွေကို မဲနှိုက်ရရှိဖို့ ငါ့ရဲ့ ကံကြမ္မာ အားလုံးကို အသုံးပြုခဲ့မိလို့လားတော့ မသိဘူး။ ဒီနေ့တော့ ရေခဲသေတ္တာကြီး တစ်လုံး၊ အာလူးကြော် ဆယ်ထုပ်နဲ့ အချက်အပြုတ် ကျွမ်းကျင်မှု တို့ကို တကယ်ကြီး ဆုချခဲ့တယ်။ ဒီသုံးခုထဲမှာ အချက်အပြုတ် ကျွမ်းကျင်မှု တစ်ခုတည်းကသာ အနည်းငယ် အသုံးဝင်တာ။]

[ကျန်တဲ့ နှစ်ခုကတော့ သာမန်လို့ပဲ ခေါ်လို့ရမယ်။ ဒါပေမဲ့ ငါ အာလူးကြော် မစားရတာ အတော်ကြာနေပြီဆိုတော့ တကယ်တမ်းကျတော့ အနည်းငယ် လွမ်းနေမိတယ်။]

[ရေခဲသေတ္တာနဲ့ ပတ်သက်ပြီး ပြောရရင် ဒီခေတ် တုံလော် လောကမှာ ရေခဲသေတ္တာတွေ မရှိသေးဘူး ထင်တယ်။ အချိုရည်တွေနဲ့ အစားအစာ တချို့ကို သိမ်းဆည်းဖို့ပဲ အသုံးဝင်တော့မှာပေါ့။]

[မသောက်ရသေးတဲ့ ပျော်ရွှင်စရာ အချိုရည်ကို အဲဒီထဲ ထည့်ထားလို့ရတယ်။ အဲဒါက မအေးတော့ဘူးလေ။ အနာဂတ်မှာ စနစ်ကနေ အစားအစာတွေ ငါ သေချာပေါက် ထပ်ပြီး မဲနှိုက်ရရှိလာလိမ့်ဦးမယ်လို့ ခံစားနေရတယ်။]

[အဲဒီ ကံဆိုးမိုးမှောင်ကျခြင်း အဆောင်လက်ဖွဲ့ကို ငါ့ကိုယ်ငါ မတော်တဆ အသုံးပြုမိသွားတာများလားလို့ အခု ငါ တကယ်ကို သံသယ ဝင်နေပြီ။ မဟုတ်ရင် ငါ့ကံက ဘာလို့ ဒီလောက်တောင် ဆိုးနေရမှာလဲ။]

မိန်းကလေးများမှာလည်း အနည်းငယ် မှင်သက်သွားကြသည်။ ဒိုင်ယာရီ ဆုလာဘ်များ အားလုံးက အစွမ်းထက်သော ပစ္စည်းချည်း ဖြစ်နေမည်မဟုတ်ဘဲ သာမန် ပစ္စည်းများလည်း ပါဝင်လာနိုင်လိမ့်မည်ဟု သူတို့ ထင်မှတ်မထားခဲ့ကြပေ။ သို့သော် ဤကဲ့သို့ ဖြစ်နေခြင်းက တကယ်တော့ ပိုပြီး သဘာဝကျသည်ဟု သူတို့ ခံစားမိကြသည်။

[ဒင်... ယနေ့ စူးမင်၏ ဒိုင်ယာရီတွင် ဖော်ပြခံရသော အမျိုးသမီးဇာတ်ဆောင်များမှာ ရှောင်ဝူ ၂၄ ကြိမ်နှင့် အာရင် ၁၄ ကြိမ်တို့ ဖြစ်ပါသည်။]

[ယနေ့ ဒိုင်ယာရီတွင် နာမည် အများဆုံး ဖော်ပြခံရသူမှာ ရှောင်ဝူ ဖြစ်ပါသည်။ ရရှိသော ဆုလာဘ် - ဖုန်းရှန်း ခြေကန်ချက်များ သုံးရက်တာ အခြေခံအဆင့် ကတ်ပြား။]

ယနေ့တွင်လည်း ရှောင်ဝူကပင် နာမည် အများဆုံး ဖော်ပြခံရသူ ဖြစ်နေပြန်သည်ကို မြင်သောအခါ အခြားသူများမှာ ထုံကျဉ်နေကြလေပြီ။ သူတို့ လုပ်နိုင်တာ ဘာမှမရှိပေ။ ရှောင်ဝူက ဤမျှ စောစောစီးစီး ပေါ်လာအောင် ဘယ်သူကများ လုပ်ခဲ့သနည်း။ ထို့အပြင် ယနေ့ ဆုလာဘ်က အတော်လေး ကောင်းမွန်လေသည်။

ရှောင်ဝူ၏ ရင်ထဲတွင် အလွန် ပျော်ရွှင်နေမိသည်။ အရမ်းကောင်းတာပဲ။ ဤနည်းဖြင့် ဖုန်းရှန်း ခြေကန်ချက်များ ၏ အခြေခံအဆင့်ကို သူမ မကြာမီ ရောက်ရှိနိုင်တော့မည် ဖြစ်သည်။ အချိန်တန်လျှင် သူမ၏ ချက်ချင်းသတ်ဖြတ်သောရှစ်ဆင့်ချပစ်ခြင်း နှင့် ပေါင်းစပ်ကာ ပို၍ပင် အစွမ်းထက်လာအောင် လုပ်နိုင်မလားဆိုတာ သူမ ကြည့်ရှုရမည် ဖြစ်လေသည်။

မကြာမီ ခြောက်ရက်တာ အချိန် ကုန်ဆုံးသွားခဲ့လေသည်။

ဤခြောက်ရက်အတွင်း စူးမင်က ရှောင်ဝူကို နေ့စဉ် ဟိုတယ်သို့ ခေါ်သွားခဲ့သည်။

လွဲမှားစွာ မတွေးလိုက်ပါနှင့်။ သူတို့က ခန္ဓာကိုယ် သန့်စင်ဆေးရည် ကို အသုံးပြု၍ ကျင့်ကြံရန်အတွက်သာ သွားရောက်ခဲ့ခြင်း ဖြစ်လေသည်။

စူးမင်လည်း အလကား မနေခဲ့ပေ။ ရှောင်ဝူ ခန္ဓာကိုယ် သန့်စင်နေစဉ်အတွင်း သူက သစ်သားသုတ်တော် ကို ကျင့်ကြံကာ သူ၏ ဝိညာဉ်စွမ်းအားကို စဉ်ဆက်မပြတ် ဖိသိပ်နေခဲ့သည်။ သူ၏ စိတ်စွမ်းအား ကျင့်ကြံမှုနှင့် ပတ်သက်၍မူ ယခင် စိတ်စွမ်းအားများကို ပိုမို ခိုင်မာလာစေရန် ငါးရက်ခန့် လုပ်ဆောင်ပြီးနောက် ၎င်းကလည်း အတော်လေး အားကောင်းလာခဲ့လေပြီ။

စိတ်စွမ်းအား ကျင့်ကြံခြင်းက အတော်လေး နာကျင်ရသော်လည်း ရလဒ်များကတော့ ကောင်းမွန်လှပေသည်။

ဤခြောက်ရက်အတွင်း ဒိုင်ယာရီကို နေ့စဉ် ရေးသားခဲ့သော်လည်း မည်သည့် ပစ္စည်းကောင်းမျှ မရရှိခဲ့သဖြင့် စူးမင် အလွန် စိတ်ပျက်ခဲ့ရသည်။ အစားအစာများ၊ အချိုရည်များနှင့် ရွှေဒင်္ဂါးများသာ ဖြစ်လေသည်။ တကယ်ကို ရယ်စရာကောင်းလွန်းလှသည်။

ဒိုင်ယာရီထဲတွင် အမျိုးသမီးဇာတ်ဆောင်များ၏ နာမည်များကိုလည်း အကြိမ်ပေါင်းများစွာ ဖော်ပြခဲ့ခြင်း မရှိပေ။ ရှောင်ဝူကို အကြိမ်အနည်းငယ် ဖော်ပြခဲ့သော်လည်း ဆုလာဘ်များက သိပ်ပြီး ကြီးကြီးမားမား မဟုတ်ခဲ့ချေ။

ဤအချက်က အမျိုးသမီးဇာတ်ဆောင်များကို ခန့်မှန်းချက် တစ်ခု ပြုလုပ်သွားစေခဲ့သည်။ စူးမင်က သူတို့၏ နာမည်များကို ပိုမို ဖော်ပြလေလေ ထိပ်တန်းအဆင့် ဆုလာဘ်များ ရရှိနိုင်ခြေ ပိုများလေလေ ဖြစ်နိုင်သည်။ ထို့အပြင် သူတို့အတွက်လည်း ပထမနေရာ ရရုံဖြင့် မလုံလောက်ဘဲ နာမည် ဖော်ပြခံရသည့် အကြိမ်အရေအတွက် ပိုများလေလေ ရရှိလာမည့် ဆုလာဘ်၏ အရည်အသွေးက ပိုမို မြင့်မားလေလေ ဖြစ်နိုင်ပေသည်။

ဤနေ့တွင် ထန်ဆန်းနှင့် ယွီရှောင်ကန်းတို့ ဝိညာဉ်အမဲလိုက် သစ်တောမှ ပြန်ရောက်လာသည်ကို စူးမင် သတိပြုမိလိုက်သည်။ ထန်ဆန်းက သူ၏ ပထမဆုံး ဝိညာဉ်ကွင်းကို ရရှိခဲ့ပြီဖြစ်မည်ဟု သူ ခန့်မှန်းမိသည်။

သို့သော် ထူးဆန်းသောအရာမှာ ယွီရှောင်ကန်း၏ တစ်ကိုယ်လုံး သွေးများဖြင့် ပြည့်နှက်နေပြီး အခြားသူများက သူ့ကို ထမ်း၍ ပြန်ခေါ်လာရခြင်းပင်။ ဒါက အဲဒီ ကံဆိုးမိုးမှောင်ကျခြင်း အဆောင်လက်ဖွဲ့ရဲ့ အကျိုးသက်ရောက်မှုများ ဖြစ်နေမလား။ ဒါက တကယ်ပဲ အဲဒီလောက်တောင် အစွမ်းထက်တာလား။

ကံဆိုးမှုအချို့လောက်ကိုသာ ကြုံတွေ့ရမည်ဟု သူ ထင်မှတ်ထားခဲ့သည်။ အခွင့်အရေးတစ်ခု ရှာပြီး ထန်ဆန်းကို မေးကြည့်ရန် သူ ဆုံးဖြတ်လိုက်သည်။ ကံဆိုးမိုးမှောင်ကျခြင်း အဆောင်လက်ဖွဲ့က တကယ်ကို ကြောက်မက်ဖွယ် ကောင်းလွန်းလှပေသည်။

စူးမင်က အလျင်အမြန် ရှေ့ထွက်သွားပြီး ဘာတွေဖြစ်ခဲ့တာလဲ၊ ယွီရှောင်ကန်းကို ဘာလို့ ထမ်းပြီး ပြန်ခေါ်လာရတာလဲဟု ထန်ဆန်းကို မေးလိုက်သည်။

ထန်ဆန်းက မျက်မှောင်ကြုတ်ကာ "ဆရာနဲ့ ငါက ဝိညာဉ်အမဲလိုက် သစ်တောထဲမှာ ရက်အတော်ကြာ ရှာဖွေခဲ့ပြီးနောက် ငါ့အတွက် သင့်တော်မယ့် ဝိညာဉ်သားရဲ တစ်ကောင်ကို နောက်ဆုံးတော့ ရှာတွေ့ခဲ့တယ်။ နှစ်လေးရာသက်တမ်းရှိ မန်ဒါရာမြွေ တစ်ကောင်လေ" ဟု ရှင်းပြလိုက်သည်။

"ဒါပေမဲ့ ဆရာ့ရဲ့ ဝိညာဉ်က ဒီမန်ဒါရာမြွေရဲ့ ပြိုင်ဘက် မဟုတ်တော့ ငါတို့ ထွက်ပြေးဖို့ပဲ လုပ်နိုင်ခဲ့တယ်။ မန်ဒါရာမြွေက အရမ်း မြန်လွန်းတယ်။ ဆရာက သူ့ရဲ့ ဝိညာဉ် လိုဆန်းဖောက် ကို ငါတို့ ဆုတ်ခွာဖို့အတွက် အကာအကွယ် ပေးခိုင်းခဲ့ပေမယ့် လိုဆန်းဖောက် က ရှုံးနိမ့်သွားပြီး မန်ဒါရာမြွေရဲ့ အကိုက်ကို ခံလိုက်ရတယ်"

"လိုဆန်းဖောက် နဲ့ ဆရာက တစ်သားတည်း ဖြစ်နေတော့ ဆရာပါ အဆိပ်မိသွားတာပေါ့။ နောက်ဆုံးကျတော့ သူ့ရဲ့ ရုပ်ပိုင်းဆိုင်ရာ ခွန်အားတွေ ကုန်ခမ်းသွားပြီး ငါတို့ တဖြည်းဖြည်း အမီခံလိုက်ရတယ်။ နောက်ပိုင်းကျတော့ ဆရာ သတိလစ်သွားတယ်လေ"

ဤနေရာတွင် ထန်ဆန်းက စကားပြော ရပ်တန့်သွားပြီးနောက် "မင်းသိတဲ့အတိုင်း ငါ့ရဲ့ ကိုယ်ခံပညာက အတော်လေး ကောင်းမွန်ပြီး ငါ့ကိုယ်ပိုင် ဝိညာဉ်စွမ်းရည်တွေကိုလည်း ငါ ဖန်တီးထားတယ်လေ။ နောက်ပိုင်းမှာ ငါက မန်ဒါရာမြွေ သေသွားတဲ့အထိ တဖြည်းဖြည်း အချိန်ဆွဲပြီး တိုက်ခိုက်ခဲ့တာ" ဟု တိုးတိုးလေး ဆက်ပြောလိုက်သည်။

'မင်းက အချိန်ဆွဲပြီး တိုက်ခိုက်ခဲ့တာ မဟုတ်ပါဘူး။ လျှို့ဝှက်လက်နက် တွေကို အသုံးပြုပြီး မန်ဒါရာမြွေကို သတ်ပစ်ခဲ့တာ ဖြစ်ဖို့များပါတယ်' ဟု စူးမင်က ရင်ထဲမှ တွေးလိုက်သည်။

ထို့နောက် ထန်ဆန်းက ရှက်ရွံ့နေသော မျက်နှာဖြင့် "ငါ မန်ဒါရာမြွေနဲ့ တိုက်ခိုက်နေတုန်း ဆရာက ကြားညပ်သွားတာ။ မန်ဒါရာမြွေက အဆိပ်ရည်တွေ ထွေးထုတ်လိုက်တော့ ငါက ရှောင်လိုက်နိုင်ပေမယ့် သတိလစ်နေတဲ့ ဆရာကတော့ တည့်တည့်ကို အထိခံလိုက်ရတယ်။ ပြီးတော့ သူ အထိခံလိုက်ရတဲ့ နေရာက...ဟိုနေရာဆိုတော့ အရမ်း အနေရခက်တယ်ကွ" ဟု ဆက်ပြောလိုက်သည်။

ထိုသို့ပြောရင်း ထန်ဆန်းက စူးမင်၏ ဗိုက်အောက်ပိုင်း နေရာကို လက်ဖြင့် ညွှန်ပြကာ "သူက ဒီနေရာကို အဆိပ်ရည် အထိခံလိုက်ရတာ။ ကယ်လို့ ရနိုင်တော့မယ် မထင်ဘူး" ဟု ပြောလိုက်သည်။

စူးမင်က ရင်ထဲမှနေ၍ 'ကြည့်ရတာ ကံဆိုးမိုးမှောင်ကျခြင်း အဆောင်လက်ဖွဲ့က အလုပ်လုပ်သွားပုံပဲ။ ယွီရှောင်ကန်းရဲ့ အောက်ပိုင်းကို တိုက်ရိုက် သုံးစားမရအောင် လုပ်ပစ်လိုက်လိမ့်မယ်လို့ ငါ တကယ် မထင်ထားခဲ့ဘူး။ မူရင်းဇာတ်လမ်းထဲမှာ ယွီရှောင်ကန်းက သတိလစ်သွားပေမယ့် တိုက်ပွဲကြားထဲမှာ အထိမခံခဲ့ရဘူးလေ။ ဒီတစ်ကြိမ်တော့ တိုက်တိုက်ဆိုင်ဆိုင် အဲဒီနေရာကို အတိုက်ခံလိုက်ရလိမ့်မယ်လို့ တကယ် မထင်ထားခဲ့မိဘူး။ ကျွတ် ကျွတ်...' ဟု တွေးလိုက်သည်။

ထို့နောက် စူးမင်က "ဒါဆို မဟာသခင်ကြီးကို ထမ်းလာတဲ့ လူတွေက ဘယ်သူတွေလဲ" ဟု မေးလိုက်သည်။

ထန်ဆန်းက "ဒီလူတွေကလည်း ဝိညာဉ်ကွင်းတွေ ရယူဖို့ ဝိညာဉ်အမဲလိုက် သစ်တောကို ရောက်နေကြတာ။ သူတို့ကို ဦးဆောင်လာတဲ့သူက တိုက်တိုက်ဆိုင်ဆိုင် ငါတို့ ကျောင်းတော်က ဆရာတစ်ယောက် ဖြစ်နေတာပဲ။ ငါတို့ သူတို့နဲ့ အမှတ်မထင် ဆုံခဲ့ကြတာလေ။ အဲဒီဆရာက ငါတို့ဆရာဟာ ကျောင်းအုပ်ကြီးရဲ့ သူငယ်ချင်းဆိုတာ သိလို့ ပြန်ခေါ်လာပေးခဲ့တာ" ဟု ပြန်ဖြေလိုက်သည်။

စူးမင်က ဆက်လက်၍ "ဒါဆို မင်းရဲ့ ဝိညာဉ်ကွင်းကို စုပ်ယူပြီးသွားပြီလား" ဟု မေးလိုက်သည်။

ထန်ဆန်းက ခေါင်းညိတ်ပြကာ "ငါ ဝိညာဉ်ကွင်း စုပ်ယူဖို့အတွက် ဆရာတစ်ယောက်ကို ချန်ထားခဲ့ပြီး ကျန်တဲ့သူတွေက ဆရာ့ကို ကုသပေးဖို့ ကျောင်းအုပ်ကြီးများ တစ်ယောက်ယောက်ကို ရှာတွေ့နိုင်မလားဆိုပြီး အရင်ဆုံး ပြန်ခေါ်လာခဲ့ကြတာ" ဟု ရှင်းပြလိုက်သည်။

"ငါ့ရဲ့ ပထမဆုံး ဝိညာဉ်ကွင်းအတွက် နှစ်လေးရာသက်တမ်းရှိ မန်ဒါရာမြွေကို စုပ်ယူချင်တယ်လို့ သူတို့ မြင်တဲ့အခါ အားလုံးက ငါ့ကို တားကြတယ်။ မည်သို့ပင်ဆိုစေ ငါ့ရဲ့ ဝိညာဉ်က အပင်အမျိုးအစား ငွေပြာမြက် ဖြစ်နေတော့ ပဋိပက္ခ ဖြစ်လာမှာကို သူတို့ စိုးရိမ်ကြတာလေ။ ဒါပေမဲ့ ငါက ဆရာ့ရဲ့ သီအိုရီကို ယုံကြည်တော့ ဘာပဲဖြစ်ဖြစ် စုပ်ယူလိုက်တာပဲ"

စူးမင်က အနည်းငယ် ဇဝေဇဝါဖြင့် "မင်းက ဝိညာဉ်ကွင်း စုပ်ယူဖို့ ကျန်ခဲ့တာဆိုတော့ သူတို့နဲ့အတူ ဘယ်လိုလုပ် ပြန်ပါလာတာလဲ" ဟု မေးလိုက်သည်။

ထန်ဆန်းမှာလည်း အနည်းငယ် ရှက်သွားပြီး "မူလက ဝိညာဉ်ကွင်း စုပ်ယူဖို့ အချိန်အတော်ကြာမယ်လို့ ငါ ထင်ထားခဲ့တာ။ ဒါပေမဲ့ မမျှော်လင့်ဘဲ တစ်မိနစ်အတွင်းမှာပဲ စုပ်ယူလို့ ပြီးသွားတယ်။ အဲဒါနဲ့ ငါလည်း အရှိန်မြှင့်ပြီး လျှောက်လာခဲ့တော့ သူတို့ကို ပြန်မီသွားတာပဲ" ဟု ပြန်ဖြေလိုက်သည်။

စကားပြောပြီးနောက် ထန်ဆန်းက သူ၏ ဆရာဖြစ်သူ၏ 'ပဲမြစ်' ကို ကယ်တင်နိုင်မည့် နည်းလမ်း ရှိမရှိ သိနိုင်ရန် ကျောင်းအုပ်ကြီးကို ရှာဖွေရန်အတွက် ထိုဆရာ၏ နောက်သို့ လိုက်သွားလေတော့သည်။ သူ၏ အမြင်အရဆိုလျှင် ကြီးမားသော အခွင့်အရေး တစ်ခုခု မရှိပါက ထိုနေရာကို ကယ်တင်နိုင်ခဲ့လျှင်တောင်မှ အသုံးဝင်တော့မည် မဟုတ်ပေ။

စူးမင်က ခေါင်းခါယမ်းလိုက်သည်။ စနစ်၏ မှတ်ချက်တွင် ရေးသားထားသလိုပင် ဤကံဆိုးမိုးမှောင်ကျခြင်း အဆောင်လက်ဖွဲ့ကို တကယ်ပဲ သတိထား အသုံးပြုရန် လိုအပ်ပုံရလေသည်။ အမှားတစ်ချက် လုပ်မိသည်နှင့် 'ဂျိုးဂျိုး' လေး ပျောက်ကွယ်သွားနိုင်ပေသည်။ ဟူး... ဟီးဟီး။

ဤမျှ ကြီးမားသော အဖြစ်အပျက်မျိုး ဖြစ်ပေါ်ခဲ့ပြီဖြစ်ရာ သဘာဝကျကျပင် သူက ၎င်းကို မှတ်တမ်းတင်ရန် ဒိုင်ယာရီ ရေးသားရမည် ဖြစ်လေသည်။ လွန်ခဲ့သည့် ရက်အနည်းငယ်က သူ၏ ဆုလာဘ်များမှာ သိပ်မကောင်းခဲ့ရာ ယနေ့ ဆုလာဘ်က ပိုကောင်းလာမည်ဟု မျှော်လင့်မိသည်။

[ဒီနေ့ ထန်ဆန်းနဲ့ ယွီရှောင်ကန်းတို့ ဝိညာဉ်အမဲလိုက် သစ်တောကနေ ပြန်ရောက်လာကြတယ်။ ထန်ဆန်းက သူ့ရဲ့ ဝိညာဉ်ကွင်းကို အောင်မြင်စွာ ရယူနိုင်ခဲ့ပေမယ့် ယွီရှောင်ကန်းကတော့ မတော်တဆမှု အနည်းငယ်နဲ့ ကြုံတွေ့ခဲ့ရတယ်။]

ဒိုင်ယာရီ၏ ပထမဆုံး စာကြောင်းက မိန်းကလေးများ၏ သိချင်စိတ်ကို ချက်ချင်း လှုံ့ဆော်ပေးလိုက်သည်။ ယွီရှောင်ကန်း ဘာဖြစ်သွားတာလဲ။ အစောပိုင်းက ယွီရှောင်ကန်းအပေါ် စူးမင် အသုံးပြုခဲ့သော ကံဆိုးမိုးမှောင်ကျခြင်း အဆောင်လက်ဖွဲ့ကြောင့်များလား။

[အရင်ဆုံး ထန်ဆန်းအကြောင်း ပြောကြရအောင်။ ထင်ထားတဲ့အတိုင်းပဲ သူ့ရဲ့ ပထမဆုံး ဝိညာဉ်ကွင်းက နှစ်လေးရာသက်တမ်းရှိ မန်ဒါရာမြွေ ဝိညာဉ်ကွင်း ဖြစ်နေပြီး တစ်မိနစ်အတွင်းမှာပဲ စုပ်ယူလို့ ပြီးသွားခဲ့တယ်။ ဒါက ထန်ဆန်းရဲ့ ရုပ်ပိုင်းဆိုင်ရာ ကြံ့ခိုင်မှု ဘယ်လောက် အစွမ်းထက်လဲဆိုတာကို သက်သေပြနေတာပဲ။ တကယ်တော့ သူ့ရဲ့ ပထမဆုံး ဝိညာဉ်ကွင်းက ၄၂၃ နှစ် အကန့်အသတ်ကို အပြည့်အဝ ချိုးဖောက်နိုင်စွမ်း ရှိပါတယ်။]

[မည်သို့ပင်ဆိုစေ ထန်ဆန်းက ကလေးဘဝကတည်းက ခန္ဓာကိုယ်ကို လေ့ကျင့်နေခဲ့တာလေ။ လျှို့ဝှက်ကောင်းကင်ကျင့်စဉ် နဲ့ ထန်ဂိုဏ်း ရဲ့ ကိုယ်ခံပညာတွေကို ကျင့်ကြံနေခဲ့တာဆိုတော့ သူ့ရဲ့ ရုပ်ပိုင်းဆိုင်ရာ ကြံ့ခိုင်မှုက သာမန်လူတွေထက် အများကြီး ပိုမြင့်မားနေမှာ သေချာတယ်။ နှစ်ခြောက်ရာ ဝန်းကျင်ရှိ ဝိညာဉ်ကွင်း တစ်ကွင်းကို စုပ်ယူဖို့ သူ အပြည့်အဝ ကြိုးစားကြည့်လို့ ရပါတယ်။ ဒါပေမဲ့ ယွီရှောင်ကန်းကတော့ ဝိညာဉ်သခင် တစ်ယောက်ရဲ့ ပထမဆုံး ဝိညာဉ်ကွင်း အကန့်အသတ်က ၄၂၃ နှစ်ကို ဘယ်တော့မှ မကျော်လွန်နိုင်ဘူးလို့ ယုံကြည်ထားတာကြောင့် နှစ်လေးရာ ဝန်းကျင်ကိုပဲ သူ ရွေးချယ်ခဲ့တာပေါ့။]

[ယွီရှောင်ကန်းသာ ထန်ဆန်းရဲ့ ရုပ်ပိုင်းဆိုင်ရာ ကြံ့ခိုင်မှုကို အရင်ဆုံး စမ်းသပ်ခဲ့မယ်ဆိုရင် ထန်ဆန်းရဲ့ ခန္ဓာကိုယ်က ဘယ်လောက်တောင် ကွာခြားနေလဲဆိုတာကို သူ ရှာတွေ့နိုင်ကောင်း ရှာတွေ့နိုင်လိမ့်မယ်။ ဒါပေမဲ့ သူက ကိုယ့်ရဲ့ သီအိုရီတွေအပေါ် အရမ်းကို ယုံကြည်မှု လွန်ကဲနေခဲ့တာလေ။]

[ပြီးတော့ ယွီရှောင်ကန်းက အဆင့် ၂၉ ဝိညာဉ်မဟာသခင် တစ်ယောက်ပဲ ရှိသေးတာ။ သူ့ရဲ့ ဝိညာဉ် လိုဆန်းဖောက် ရဲ့ ဝိညာဉ်စွမ်းရည် နှစ်ခုစလုံးက အသံမြည်အောင် လေလည်တဲ့ စွမ်းရည်တွေဖြစ်ပြီး တိုက်ခိုက်ရေး စွမ်းအား လုံးဝနီးပါး မရှိဘူး။ သူက ဝိညာဉ်ကွင်း အမဲလိုက်ဖို့ ထန်ဆန်းကို တကယ်ကြီး ခေါ်သွားရဲပြီး နှစ်လေးရာသက်တမ်းရှိ မန်ဒါရာမြွေကိုတောင် သတ်ချင်နေသေးတယ်။ သူ့ကို အရမ်း မာနကြီးလွန်းတယ်လို့ပဲ ပြောလို့ရမယ်။]

[နောက်ဆုံးမှာတော့ ထန်ဆန်းကိုယ်တိုင်ရဲ့ ထူးခြားတဲ့ သဘာဝသာ မရှိခဲ့ရင် သူတို့နှစ်ယောက်စလုံး အဲဒီမန်ဒါရာမြွေရဲ့ စားသောက်တာကို ခံခဲ့ရလောက်ပြီ။]

ဘီဘီတုန်းနှင့် လျိုအာလုံမှလွဲ၍ အခြားသော အမျိုးသမီးဇာတ်ဆောင်များ အားလုံး အလွန်အမင်း တုန်လှုပ်သွားကြလေသည်။ ယွီရှောင်ကန်း၏ ဝိညာဉ်က လေလည်ဖို့ပဲ တကယ် သိတာလား။ တကယ်ကို ရယ်စရာကောင်းလွန်းလှသည်။