အခန်း (၃၆) - ရှောင်ဝူ - ဝိညာဉ်သားရဲတွေရဲ့ ပူးတွဲသခင်မ ကူးယွဲ့နာရဲ့ ယောက္ခမ တကယ်ကြီး ဖြစ်လာတော့မှာလား

တကယ်တော့ အမျိုးသမီးဇာတ်ဆောင်များ အားလုံး အတော်လေး သိချင်နေကြလေသည်။ မူရင်းအချိန်ကာလအတိုင်းသာ အရာအားလုံး တိုးတက်ဖြစ်ပေါ်လာခဲ့မည်ဆိုပါက ထန်မိသားစုနှင့် လက်ထပ်မည့် ထိုနှစ်တစ်သိန်းသက်တမ်းရှိ ဝိညာဉ်သားရဲများမှာ မည်သူများ ဖြစ်ကြမည်နည်း။

လက်ရှိတွင် သူတို့ သိထားသည်မှာ အာရင်နှင့် ရှောင်ဝူ နှစ်ဦးသာ ရှိသေးသည်။

ထိုအချိန်မှာပင် သူတို့ တွေးနေသည်များကို စူးမင်က သိနေသည့်အလား ဆက်လက် ရေးသားလိုက်လေသည်။

[ထန်မိသားစုရဲ့ မိသားစုနိယာမ အကြောင်းကို ပြောပြီးသွားမှတော့ ခေတ်တိုင်းမှာ နှစ်တစ်သိန်းသက်တမ်းရှိ ဝိညာဉ်သားရဲ တွေနဲ့ပဲ လက်ထပ်တဲ့ ဒီအစဉ်အလာ အကြောင်းကိုလည်း မပြောဘဲ မနေနိုင်တော့ဘူး။ တကယ်ကို အဓိပ္ပာယ် မရှိလွန်းပါဘူး။ သူတို့ ထန်မိသားစုကပဲ ခေတ်တိုင်းမှာ ဝိညာဉ်သားရဲ တစ်ကောင်နဲ့ လက်ထပ်နိုင်လောက်တဲ့အထိ ကံကောင်းနေတာ။ ပြီးတော့ သူတို့နဲ့လက်ထပ်ကျတဲ့ ဝိညာဉ်သားရဲအားလုံးက အနည်းဆုံး နှစ်တစ်သိန်းသက်တမ်း အဆင့်တွေကြီးပဲလေ။]

[ဒီနေရာမှာ တစ်ချက်လောက် စီစဉ်ကြည့်ရအောင်။ ထန်ဟောက်က နှစ်တစ်သိန်းသက်တမ်းရှိ ငွေပြာဧကရာဇ် အာရင်နဲ့ လက်ထပ်ခဲ့ပြီး သူ့ရဲ့သား ထန်ဆန်းက နှစ်တစ်သိန်းသက်တမ်းရှိ အရိုးပျော့ယုန်မလေး ရှောင်ဝူနဲ့ လက်ထပ်ခဲ့တယ်။ ဒါပေမဲ့ လက်ရှိ ထန်ဆန်းမှာတော့ ဘာအခွင့်အရေးမှ မရှိတော့ဘူးလေ။ ရှောင်ဝူက အခု ငါ့ရဲ့ ညီမလေး ဖြစ်နေပြီကို ဘယ်လိုလုပ်ပြီး ထန်ဆန်းရဲ့ ဇနီးလေး ဖြစ်နိုင်တော့မှာလဲ။]

[အဲဒီနောက်မှာ ထန်ဆန်းရဲ့သား ထန်ဝူလင်းက ဝိညာဉ်သားရဲ တွေရဲ့ ပူးတွဲသခင်မ ကူးယွဲ့နာနဲ့ လက်ထပ်ခဲ့တယ်။ ကူးယွဲ့နာက ငွေရောင်နဂါးဘုရင်လေ၊ သူမရဲ့ စွမ်းအားက နှစ်တစ်သိန်းသက်တမ်းရှိ ဝိညာဉ်သားရဲ တစ်ကောင်နဲ့ လုံးဝ နှိုင်းယှဉ်လို့ မရဘူး။ သူမက နတ်ဘုရားသားရဲ တစ်ကောင်ပါ။]

[ဝိညာဉ်သားရဲ တွေရဲ့ ပူးတွဲသခင်မ တစ်ဦးအနေနဲ့ လူသားတစ်ယောက်နဲ့ လက်ထပ်ရလိမ့်မယ်လို့ သူမကိုယ်တိုင်တောင် လုံးဝ ထင်မှတ်မထားခဲ့လောက်ဘူး။ ပြီးတော့ သူမရဲ့ ယောက္ခမက နှစ်တစ်သိန်းသက်တမ်းရှိ ဝိညာဉ်သားရဲ တစ်ကောင် ဖြစ်နေတာတဲ့လေ။ ဒီဝါစဉ် သတ်မှတ်ချက်က တကယ်ကို နည်းနည်း ရှုပ်ထွေးနေတာပဲ။]

[ဒါပေမဲ့ ဒီအချိန်မှာ ကူးယွဲ့နာက ရှင်းတိုသစ်တောကြီးရဲ့ ဗဟိုချက်ဒေသမှာ အိပ်ပျော်နေတုန်းပဲ ရှိသေးတယ်။]

ရှောင်ဝူမှာလည်း အလွန်အမင်း တုန်လှုပ်သွားရသည်။ ငွေရောင်နဂါးဘုရင် ကူးယွဲ့နာ အကြောင်းကို သူမ တစ်ခါမျှ မကြားဖူးခဲ့သော်လည်း ဝိညာဉ်သားရဲ များ၏ ပူးတွဲသခင်မ ဟူသော စူးမင်၏ ဖော်ပြချက်အရဆိုလျှင် သူမ၏ ဝါစဉ်က ရှောင်ဝူထက် အဆပေါင်းများစွာ ပို၍ မြင့်မားနေလိမ့်မည် ဖြစ်သည်။ သို့သော် သူမက ရှောင်ဝူ၏ ချွေးမ ဖြစ်လာခဲ့သည်တဲ့လား။

ဒီကိစ္စက တကယ်ကို မယုံနိုင်စရာ ကောင်းလွန်းသည်ဟု ရှောင်ဝူ ခံစားလိုက်ရသည်။

ကူးယွဲ့နာ အိပ်ပျော်နေဆဲ ဖြစ်ကြောင်း သိလိုက်ရသဖြင့် ဘီဘီတုန်းမှာလည်း အနည်းငယ် စိတ်သက်သာရာ ရသွားလေသည်။ တစ်ချိန်တည်းမှာပင် အနာဂတ်တွင် ရှင်းတိုသစ်တောကြီး၏ အနက်ရှိုင်းဆုံး အပိုင်းသို့ လုံးဝ မသွားရန် သူမကိုယ်သူမ သတိပေးလိုက်သည်။

အကယ်၍ ကူးယွဲ့နာသာ အမှတ်မထင် နိုးထလာခဲ့မည်ဆိုပါက သူမအနေဖြင့် လုံးဝ ယှဉ်နိုင်မည် မဟုတ်ချေ။

[ပြီးတော့ ထန်ဝူလင်းရဲ့သား ထန်ရွှမ်ယွီက နှစ်တစ်သိန်းသက်တမ်းရှိ မိစ္ဆာဝိညာဉ် ငါးမန်းဖြူကြီး ပိုင်ရှိုးရှိုးနဲ့ လက်ထပ်ခဲ့ပြန်တယ်။]

[ဒီလို ကံကြမ္မာမျိုးက တကယ်ကို ပြောစရာ မရှိတော့ပါဘူး။ ငါ သိချင်တာက တစ်ခုတည်းပါ။ ထန်မျိုးဆက်တွေ အားလုံးက ဝိညာဉ်သားရဲ တွေနဲ့ပဲ လက်ထပ်ကြမယ်ဆိုရင် သူတို့ရဲ့ မျိုးဆက်တွေထဲက လူသား သွေးဆက်က တစ်ဆက်ထက်တစ်ဆက် ပိုပိုပြီး နည်းပါးမလာနိုင်ဘူးလား။]

[ထန်ရွှမ်ယွီရဲ့ မျိုးဆက်ကို ရောက်တဲ့အခါကျရင် သူ့ဆီမှာ လူသား သွေးဆက်က သိပ်များများစားစား ကျန်တော့မှာ မဟုတ်ဘူး။ သူ့ကို လူသားလို့ သတ်မှတ်လို့ ရနိုင်ပါဦးမလား။]

[ဒါတွေ အကုန်ထားလိုက်ပါတော့။ ဘာပဲဖြစ်ဖြစ် အခုကစပြီး ငါ စူးမင် ရှိနေသရွေ့ အထက်မှာ ပြောခဲ့တာတွေက လုံးဝ ဖြစ်လာမှာ မဟုတ်ဘူး။ ရှောင်ဝူက ငါ့ရဲ့ ညီမလေး ဖြစ်လာခဲ့ပြီဆိုတော့ နောက်ကျရင် သေချာပေါက် ငါ့ရဲ့ ဇနီးလေး ဖြစ်လာတော့မှာပဲ။ ထန်မိသားစုရဲ့ ဘိုးဘေးတွေ ချမှတ်ထားတဲ့ မိသားစုနိယာမက ထန်ဆန်း လက်ထက်ကစပြီး ပျောက်ကွယ်သွားနိုင်ပါပြီ။]

မိန်းကလေးများက ရင်ထဲမှနေ၍ 'ဟားဟားဟား... စူးမင်က တကယ်ကို လူဆိုးလေးပါပဲ' ဟု တွေးလိုက်ကြသည်။

[အဲဒီအကြောင်းတွေ ပြောပြီးမှ ရုတ်တရက် သတိရလာတယ်။ အခု ရှောင်ဝူက မူရင်းဇာတ်လမ်းထဲကလို ထန်ဆန်းကို အစ်ကိုအဖြစ် အသိအမှတ် မပြုတော့ဘဲ ငါ့ကို အစ်ကိုအဖြစ် အသိအမှတ် ပြုလိုက်ပြီဆိုတော့ ငါတို့ရဲ့ ဆက်ဆံရေးက သေချာပေါက် ပိုပြီး ရင်းနှီးသွားပြီ။]

[ဒါဆို ပြဿနာက ပေါ်လာပြီလေ။ ထန်ဟောက်က ဘွဲ့ရတုံလော် တစ်ပါး ဖြစ်ပြီး စိန့်ဝိညာဉ်ကျေးရွာကနေ နော့တန်မြို့ကို လာတဲ့ လမ်းတစ်လျှောက်လုံး ထန်ဆန်းကို အမှောင်ထဲကနေ ကာကွယ်ပေးဖို့ တိတ်တဆိတ် နောက်ကနေ လိုက်လာခဲ့တာ။]

[ထန်ဟောက်ရဲ့ စွမ်းအားနဲ့ဆိုရင် ရှောင်ဝူဟာ နှစ်တစ်သိန်းသက်တမ်းရှိ ဝိညာဉ်သားရဲ တစ်ကောင်ဆိုတာကို သူ အစောကြီးကတည်းက သတိထားမိသင့်တယ်။ သို့တိုင်အောင် ထန်ဟောက်က ဘာလှုပ်ရှားမှုမှ မလုပ်ခဲ့ဘူးလေ။]

[မူရင်း အချိန်ကာလမှာတော့ ရှောင်ဝူနဲ့ ထန်ဆန်းက ဆက်ဆံရေး အတော်လေး ကောင်းမွန်ခဲ့ပြီး ကုတင်တစ်လုံးတည်းမှာတောင် အတူတူ အိပ်ခဲ့ကြတာလေ။ အဲဒီအချက်ကပဲ ရှောင်ဝူဟာ အနာဂတ်မှာ ထန်မိသားစုရဲ့ ချွေးမ ဖြစ်လာတော့မယ်ဆိုတာကို ထန်ဟောက်က သေချာပေါက် ယုံကြည်သွားစေခဲ့တယ်။]

[ဒါပေမဲ့ အခု ငါနဲ့ ရှောင်ဝူက ရင်းနှီးနေပြီဆိုတော့ ထန်ဟောက်က ရှောင်ဝူအပေါ် လှုပ်ရှားဖို့ မထိန်းချုပ်နိုင်တော့ဘဲ ဖြစ်သွားမလား။ ဒါမှမဟုတ် ထန်ဆန်းက နောက်ပိုင်းမှာ ရှောင်ဝူရဲ့ ဝိညာဉ်ကွင်းနဲ့ ဝိညာဉ်အရိုးကို စုပ်ယူနိုင်ဖို့အတွက် ရှောင်ဝူကို ဖမ်းဆီးပြီး သုံ့ပန်းအဖြစ် ထားရှိမလား။]

[ဒါက လုံးဝ မဖြစ်နိုင်တဲ့ ကိစ္စတော့ မဟုတ်ဘူး။ ထန်ဟောက်ရဲ့ ဇနီး အာရင် ကိုယ်တိုင်က နှစ်တစ်သိန်းသက်တမ်းရှိ ဝိညာဉ်သားရဲ တစ်ကောင်ဖြစ်ပြီး ရှောင်ဝူကလည်း နှစ်တစ်သိန်းသက်တမ်းရှိ ဝိညာဉ်သားရဲ တစ်ကောင် ဖြစ်နေလို့ သူမအပေါ် မတူညီတဲ့ ဆက်ဆံရေးမျိုး ထားရှိကောင်း ထားရှိနိုင်ပေမယ့် ဒီအချက်တွေ အားလုံးက ထန်ဆန်းနဲ့ ရှောင်ဝူကြားက ဆက်ဆံရေး ကောင်းမွန်မှုအပေါ်မှာပဲ အခြေခံထားတာလေ။]

[မဟုတ်ရင် သာမန် ဘွဲ့ရတုံလော် တစ်ပါးအနေနဲ့ နှစ်တစ်သိန်းသက်တမ်းရှိ ဝိညာဉ်သားရဲ တစ်ကောင်ကို မြင်တွေ့လိုက်ရချိန်မှာ တိုက်ခိုက်ချင်တဲ့ သွေးဆောင်မှုကို လုံးဝ ခုခံနိုင်မှာ မဟုတ်ဘူး။]

[ထို့အပြင် အရင်က ပြောခဲ့သလိုပဲ အာရင်က ကိုယ်ကျိုးစွန့် အနစ်နာခံဖို့ အတင်းအကျပ် ဖိအားပေးခံခဲ့ရတာ။ အဲဒါကို ထန်ဟောက်ရဲ့ အကြံအစည် ဖြစ်မယ်လို့ ငါ ထင်တယ်။ မဟုတ်ရင် အာရင်က နှစ်တစ်သိန်းသက်တမ်းရှိ ဝိညာဉ်သားရဲ ဆိုတာကို ချန်းရွှင်ကျိက ဘယ်လိုလုပ်ပြီး သိသွားရတာလဲ။ ထန်ဟောက်က အာရင်ကို ဘာလို့ လူသူကင်းမဲ့တဲ့ နေရာတစ်ခုဆီ ခေါ်မသွားခဲ့တာလဲ။]

[နောက်ပြီး ထန်ဟောက်က အာရင်ကို တကယ် ချစ်မြတ်နိုးပြီး မြန်မြန် ရှင်သန်ထမြောက်လာစေဖို့နဲ့ သူမရဲ့ ကျင့်ကြံခြင်း စွမ်းအား တိုးတက်လာစေဖို့ တကယ်ပဲ ဆန္ဒရှိတယ်ဆိုရင် အာရင်ကို စိန့်ဝိညာဉ်ကျေးရွာ အနောက်ဘက်က ဂူတစ်ခုထဲမှာ ဘာလို့များ သွားထားခဲ့ရတာလဲ။]

[အဲဒီနေရာက ပတ်ဝန်းကျင်က ငွေပြာမြက်တွေ ရှင်သန်ကြီးထွားဖို့ မသင့်တော်သလို ကျင့်ကြံဖို့အတွက်လည်း မသင့်တော်ဘူး။ အာရင်အနေနဲ့ အဲဒီဂူထဲမှာ ပြန်လည် နာလန်ထူလာဖို့ဆိုတာ ခဲယဉ်းလွန်းတယ်။ အာရင်ကို ရှင်းတိုသစ်တောကြီးထဲက ငွေပြာမြက်တွေရဲ့ ဘိုးဘေးဘီဘင် နယ်မြေမှာ ထားရှိမှသာ သူမ ကျင့်ကြံဖို့အတွက် အသင့်တော်ဆုံး ဖြစ်မှာလေ။]

[ထန်ဟောက်က ဒီအချက်ကို မသိနိုင်ဘူးဆိုတာ လုံးဝ မဖြစ်နိုင်ဘူး။ အဲဒါဆို သူ ဘာလို့ ဒီလို လုပ်ခဲ့ရတာလဲ။]

[ထန်ဟောက်က အာရင်ကို အချိန်တိုင်း မြင်တွေ့ချင်လို့ဆိုပြီး ကြီးကျယ်ခမ်းနားတဲ့ စကားတွေကိုတောင် ပြောခဲ့သေးတယ်။ ဒါပေမဲ့ သူက အာရင်ကို မြင်တွေ့ချင်တယ်ဆိုရင်တောင် အပြင်ဘက် ဒါမှမဟုတ် ကျင့်ကြံဖို့ ပိုသင့်တော်တဲ့ တခြား နေရာတစ်ခုခုမှာ ထားရှိလို့ ရတာပဲ။ ဘွဲ့ရတုံလော် တစ်ပါးဖြစ်တဲ့ သူ့ရဲ့ စွမ်းအားနဲ့ဆိုရင် အာရင်ရဲ့ လုံခြုံရေးကို ကာကွယ်ပေးဖို့ အလုံအလောက်ပါပဲ။]

စူးမင်၏ သုံးသပ်ချက် ထွက်ပေါ်လာသည်နှင့် တပြိုင်နက် အာရင်၏ ငွေပြာမြက် ခန္ဓာကိုယ်လေးမှာ စဉ်ဆက်မပြတ် ယိမ်းနွဲ့လာပြီး အနည်းငယ် ညှိုးနွမ်းသွားပုံ ရလေသည်။

ယခုအခါ အာရင်၏ ရင်ထဲတွင် ကြီးမားသော ကသောင်းကနင်း ဖြစ်မှုများဖြင့် ပြည့်နှက်နေလေပြီ။ စူးမင် ပြောသလိုပင် ဂူထဲရှိ ပတ်ဝန်းကျင်က သူမ ကျင့်ကြံရန် မသင့်တော်သော်လည်း ထန်ဟောက်က သူမ၏ အနားတွင် အချိန်တိုင်း ရှိနေချင်၍ ဟု ပြောခဲ့သဖြင့် သူမ သိပ်ပြီး ဂရုမစိုက်မိခဲ့ချေ။

သို့သော် ယခု ပြန်စဉ်းစားကြည့်မည်ဆိုပါက ထန်ဟောက်က သူမကို ကျင့်ကြံရန် သင့်တော်သော နေရာတစ်ခုသို့ အပြည့်အဝ ပြောင်းရွှေ့ပေးနိုင်ခဲ့သည်။ ဘာကြောင့် သူမကို ဒီမှာပဲ ထားခဲ့ရသနည်း။ သူမ ဘာကြောင့် ဒီအချက်ကို အရင်က မတွေးမိခဲ့သနည်း။

ထို့အပြင် စူးမင် ပြောသလိုပင် ထန်ဟောက်က ငွေပြာမြက်များ၏ ဘိုးဘေးဘီဘင် နယ်မြေ မည်သည့်နေရာတွင် ရှိကြောင်းကို အမှန်တကယ် သိရှိထားလေသည်။ မည်သို့ပင်ဆိုစေ အနာဂတ်တွင် ရှောင်ဆန်း၏ စွမ်းအား အဆင့်တစ်ခုသို့ ရောက်ရှိလာသောအခါ သူ၏ ခန္ဓာကိုယ်ထဲရှိ ငွေပြာဧကရာဇ် သွေးဆက်ကို အသက်သွင်းရန်နှင့် ငွေပြာဧကရာဇ် အသစ် ဖြစ်လာစေရန်အတွက် ထိုငွေပြာမြက် ဘိုးဘေးဘီဘင် နယ်မြေသို့ သွားရောက်ရမည် မဟုတ်ပါလော။

အာရင်က သူမအနေဖြင့် ထန်ဟောက်ကို တဖြည်းဖြည်း နားမလည်နိုင်အောင် ဖြစ်လာကြောင်း သဘောပေါက်သွားလေသည်။ သူမ သိထားသည်ဟု ထင်ခဲ့သော ယောကျာ်းနှင့် နှိုင်းယှဉ်ပါက ကွဲလွဲချက်များ ပိုပိုပြီး များပြားလာသည်ဟု ခံစားနေရလေသည်။

[အကယ်၍ ထန်ဟောက်ကများ အခုချိန်မှာ ရှောင်ဝူကို လှုပ်ရှားလာခဲ့ရင် ငါ ဘယ်လိုလုပ်ရမလဲ။ ငါ့မှာ ထန်ဟောက်ကို ရင်ဆိုင်နိုင်လောက်တဲ့ စွမ်းအား မရှိသေးပေမယ့် ရှောင်ဝူကို ဘာအထိခိုက်မှ အဖြစ်ခံမှာ မဟုတ်ဘူးလို့ ငါ ပြောထားပြီးပြီ။]

[ခြေတစ်လှမ်းပြီးမှ တစ်လှမ်း ဆက်လှမ်းဖို့ပဲ ငါ လုပ်နိုင်တော့မယ်။ အကယ်၍ ထန်ဟောက်က ရှောင်ဝူကို တကယ်ပဲ တိုက်ခိုက်လာခဲ့ရင် ငါ့အသက်ကို ရင်းရရင်တောင်မှ သူ့အတွက် အခက်အခဲ ဖြစ်အောင် လုပ်ပြီး ရှောင်ဝူအတွက် အချိန်နည်းနည်းလောက် ရအောင် ဆွဲထားပေးမယ်။ သူမသာ ရှင်းတိုသစ်တောကြီးထဲကို ထွက်ပြေးသွားနိုင်ပြီး တာ့မင်နဲ့ အာမင်တို့ကို ရှာတွေ့သွားမယ်ဆိုရင် သူမ လုံခြုံသွားပြီ။]

[ငါ့ရဲ့ လက်ရှိ စွမ်းအားက အားနည်းနေသေးပေမယ့် ငါသာ အစွမ်းကုန် ကြိုးစားပြီး ငါ့ရဲ့ အလားအလာတွေကို ကုန်စင်အောင် ထုတ်သုံးကာ ငါ့ရဲ့ သက်စောင့်စွမ်းအားတွေကို လောင်ကျွမ်းပစ်လိုက်မယ်ဆိုရင် ငါ့ရဲ့ ရှာရင်းဂန်းကို အတင်းအကျပ် မြှင့်တင်ပြီး အဆင့်မြင့် သစ်သားစွမ်းအား ထုတ်လွှတ်မှု တွေကို အချိန်တိုအတွင်း အသုံးပြုနိုင်လိမ့်မယ်။]

[သေချာတာပေါ့။ ဒါက နောက်ဆုံး ရွေးချယ်စရာ နည်းလမ်းပါပဲ။ စနစ်က ငါ့ကို ကူညီဖို့ ဘာနည်းလမ်းမှ မရှိဘူးဆိုရင်တော့ အဲဒါက တစ်ခုတည်းသော ရွေးချယ်စရာပဲ။]

စူးမင်၏ ရုတ်တရက် စကားများကြောင့် မိန်းကလေးများ အားလုံး အသံတိတ်သွားကြလေသည်။ စူးမင်က ရှောင်ဝူနှင့် ပတ်သက်၍ အတည်ပြောနေခြင်းဖြစ်ပြီး စကားသက်သက် မဟုတ်ကြောင်း ထင်ရှားလှပေသည်။ မည်သို့ပင်ဆိုစေ ဒိုင်ယာရီက လိမ်ညာမည် မဟုတ်သလို သူ့အနေဖြင့်လည်း တစ်စုံတစ်ယောက်က ခိုးဖတ်နေကြောင်းကို မသိရှိထားသဖြင့် ပို၍ ယုံကြည်ရပြီး စူးမင်၏ အစစ်အမှန် စိတ်နှလုံးကို ပြသနေခြင်းပင် ဖြစ်လေသည်။

ရှောင်ဝူ အလွန်အမင်း ကြည်နူးထိမိသွားပြီး သူမ၏ မျက်လုံးများ အနည်းငယ် နီရဲလာလေသည်။ 'လူဆိုးလေး စူးမင်... ဘာလို့ ဒီလို လေးနက်တဲ့ စကားမျိုးကို ရုတ်တရက်ကြီး ရေးလိုက်ရတာလဲ။'

'ထန်ဟောက်က ငါ့ရဲ့ ကိုယ်ပိုင်လက္ခဏာကို သိမှာ မဟုတ်ပါဘူး။ ငါ့ဆီမှာ ဒိုင်ယာရီ ဆုလာဘ်ကနေ ရထားတဲ့ အငွေ့အသက် ဖုံးကွယ်ခြင်း စွမ်းရည် ရှိတယ်။ အဲဒါက ငါ့ရဲ့ နှစ်တစ်သိန်းသက်တမ်းရှိ ဝိညာဉ်သားရဲ အငွေ့အသက်ကို ဖုံးကွယ်ပေးထားနိုင်တယ်။ ပြီးတော့ ငါက နင့်ကို အစ်ကိုအဖြစ် အသိအမှတ် ပြုထားပြီးပြီဆိုတော့ နင့်ကို တစ်ယောက်တည်း အန္တရာယ်နဲ့ ရင်ဆိုင်ရအောင် ငါက ဘယ်လိုလုပ် ထားခဲ့နိုင်မှာလဲ။'

'တကယ့် အရူးလေးပဲ'