အခန်း (၃၂) - စိတ်နှလုံးသန့်စင် ပုလဲလုံး၊ ကပ်စေးနှဲတဲ့ ရာက္ခသနတ်ဘုရားလား

[ဒါက အရမ်း နာကျင်ရမယ့်ပုံ ပေါက်နေပေမယ့် စိတ်စွမ်းအားကို မြှင့်တင်ပြီး ရှာရင်းဂန်းကို ဆင့်ကဲပြောင်းလဲဖို့အတွက် ဒီလောက်တော့ ဂရုစိုက်နေလို့ မရဘူးလေ။ ဘာပဲဖြစ်ဖြစ် ဇနီးလေး ရှောင်ဝူရဲ့ ရင်ထဲက အပူမီးကို ငြိမ်းသတ်ပေးဖို့အတွက် သူမရဲ့ အမေကို ရှင်သန်ထမြောက်အောင် လုပ်ပေးရဦးမယ်။]

ဒါကို မြင်လိုက်ရတဲ့ ရှောင်ဝူမှာ အလွန် ကြည်နူးထိမိသွားရသည်။ သူမ၏ မိခင်ကို ရှင်သန်ထမြောက်စေရန်အတွက်သာ စူးမင်က ဤကျင့်စဉ်ကို အသုံးပြုနေသည်ဟု ခံစားလိုက်ရသည်။ ထို့ကြောင့် သူမ ဘာလုပ်ရမှန်း ပို၍ပင် ဝေခွဲမရ ဖြစ်သွားလေသည်။

[နောက်တစ်ခုကတော့ ကံဆိုးမိုးမှောင်ကျခြင်း အဆောင်လက်ဖွဲ့ ဆုလာဘ်ပဲ။ လူတစ်ယောက်ကို သတ်မှတ်လိုက်ရင် မကြာခင် အချိန်အတွင်းမှာ အဲဒီလူအတွက် ဆိုးရွားတဲ့ အရာတစ်ခုခု ကြုံတွေ့လာစေနိုင်တယ်လို့ ဆိုတယ်။ ဒီလို အဆောင်လက်ဖွဲ့မျိုးကို ပထမဆုံး အသုံးပြုဖူးတာဆိုတော့ အတိအကျ ဘယ်လို အကျိုးသက်ရောက်မှု ရှိမလဲဆိုတာ မသိသေးဘူး။ အဲဒီ မဟာသခင်ကြီး ယွီရှောင်ကန်းအပေါ် စမ်းသုံးကြည့်လိုက်ရင် မကောင်းဘူးလား။ ဘာပဲဖြစ်ဖြစ် သူက ကောင်းတဲ့ကောင်မှ မဟုတ်တာ။]

ဤအချက်ကြောင့် ဘီဘီတုန်းနှင့် လျိုအာလုံ နှစ်ဦးစလုံး၏ ရင်ထဲတွင် အနည်းငယ် တင်းကျပ်သွားရသည်။ ယခုအခါ ယွီရှောင်ကန်းကို သူတို့ ထိုမျှလောက် သဘောမကျတော့သော်လည်း မည်သို့ပင်ဆိုစေ တစ်ချိန်က သူတို့ ချစ်ခဲ့ရသူ ဖြစ်နေသေးသည် မဟုတ်ပါလော။

ထိုအထဲတွင် ယွီရှောင်ကန်းအတွက် အများဆုံး စိုးရိမ်ပူပန်နေသူမှာ ဘီဘီတုန်း မဟုတ်ဘဲ လျိုအာလုံ ဖြစ်နေလေသည်။

စူးမင် ရေးသားထားသော ဒိုင်ယာရီ အကြောင်းအရာများကို ဆင်ခြင်သုံးသပ်ပြီးနောက် ဘီဘီတုန်းမှာ အရာအားလုံးကို လက်ခံနိုင်သွားပြီ ဖြစ်သည်။ ယွီရှောင်ကန်း ဝိညာဉ်နန်းတော်မှ ထွက်ခွာသွားချိန်ကတည်းက သူတို့နှစ်ဦး၏ ရေစက်မှာ တကယ်တမ်း ကုန်ဆုံးသွားခဲ့ပြီ ဖြစ်လေသည်။

ထို့အပြင် ဒိုင်ယာရီမှတစ်ဆင့် ယွီရှောင်ကန်း မည်သို့သောသူ ဖြစ်ကြောင်းကိုလည်း တဖြည်းဖြည်း သဘောပေါက် နားလည်လာခဲ့သည်။

မူရင်းဇာတ်လမ်းထဲတွင် လျှို့ဝှက်ခန်း အဖြစ်အပျက် ပြီးနောက် ယွီရှောင်ကန်း ဝိညာဉ်နန်းတော်မှ ထွက်ခွာကာ လျိုအာလုံကို သွားရောက် ရှာဖွေချိန်၌ ဘီဘီတုန်း၏ သူ့အပေါ် စွဲလမ်းမှုမှာ တကယ်တော့ အချစ်မဟုတ်ဘဲ အမုန်းတရားသာ ဖြစ်လေသည်။

အချစ်မှတစ်ဆင့် ပေါက်ဖွားလာသော အမုန်းတရားပင် ဖြစ်လေသည်။

ယွီရှောင်ကန်းအတွက်နဲ့ ချန်းရွှင်ကျိရဲ့ လျှို့ဝှက်ခန်းထဲမှာ သူမ ဘာကြောင့် အကျဉ်းချခံခဲ့ရတာလဲ။ သူကျတော့ ဝိညာဉ်နန်းတော်ကနေ ထွက်သွားပြီး လျိုအာလုံကို သွားရှာတယ်တဲ့လား။ ဘာလို့လဲ။

ထို့ကြောင့်ပင် မူရင်းဇာတ်လမ်းထဲတွင် ဘီဘီတုန်းက ယွီရှောင်ကန်းအပေါ် အလွန်အမင်း စွဲလမ်းနေခဲ့ခြင်း ဖြစ်လေသည်။

သို့သော် ယခုအခါ အခြေအနေများ ပြောင်းလဲသွားခဲ့လေပြီ။ ဒိုင်ယာရီကြောင့် မိမိကိုယ်ကိုယ် ဆင်ခြင်သုံးသပ်နိုင်ခဲ့ပြီးနောက် သူမ၏ စိတ်အခြေအနေမှာ တစ်စိတ်တစ်ပိုင်း ပြည့်စုံသွားခဲ့ကာ ရာက္ခသနတ်ဘုရား၏ မကောင်းဆိုးဝါး အငွေ့အသက်များကို ခုခံနိုင်စွမ်းလည်း သိသိသာသာ မြင့်တက်လာခဲ့သည်။ ယွီရှောင်ကန်းအပေါ် ထိုသို့သော စွဲလမ်းမှုများ သို့မဟုတ် အချစ်များ သူမ၌ ရှိမနေတော့ချေ။

သို့သော် စူးမင်က ယွီရှောင်ကန်းအပေါ် ကံဆိုးမိုးမှောင်ကျခြင်း အဆောင်လက်ဖွဲ့ အသုံးပြုမည့် ကိစ္စနှင့် ပတ်သက်၍ သူမ၏ ရင်ထဲတွင် အနည်းငယ် ပဋိပက္ခ ဖြစ်နေဆဲပင်။ ဇာတ်လမ်းဟောင်းများကို ကျောခိုင်းနိုင်ခဲ့ပြီ ဆိုသော်လည်း ထိုမျှ မြန်မြန်ဆန်ဆန်နှင့် လုံးဝ ဥဿုံ လွှတ်ချနိုင်မည့် အရာမျိုးတော့ မဟုတ်သေးပေ။

လျိုအာလုံနှင့် ပတ်သက်၍မူ သူမက ယွီရှောင်ကန်း၏ သစ္စာဖောက်မှုကို မကြုံတွေ့ခဲ့ရဖူးသေးချေ။ ထို့ကြောင့် စူးမင်၏ ဒိုင်ယာရီကို ဖတ်ပြီးသည့်တိုင် ယခင်ကလောက် မနက်ရှိုင်းတော့သော်လည်း သူ့အပေါ် အချစ်အချို့ ရှိနေဆဲပင် ဖြစ်လေသည်။ အတိုချုပ်ဆိုရလျှင် သူမ၏ ရင်ထဲတွင်လည်း ရှုပ်ထွေးမှုများစွာဖြင့် ပြည့်နှက်နေလေသည်။

[နောက်ဆုံး ဆုလာဘ်ကတော့ အတော်လေး သာမန်ပါပဲ။ ဒါပေမဲ့ ငါ့အကြိုက်နဲ့တော့ အတိအကျ ကိုက်ညီတယ်။ ပျော်ရွှင်စရာ အချိုရည်ဆိုတဲ့ ကာဗွန်နိတ် အချိုရည် တစ်မျိုးလေ။ ဒီအချိုရည်က ဒီကမ္ဘာမှာ မရှိဘူး၊ ငါ့ရဲ့ အတိတ်ဘဝမှာပဲ ရှိခဲ့တာ။ ဒီနေ့မှ ဒါကို မဲနှိုက်ရရှိလိမ့်မယ်လို့ မထင်ထားခဲ့ဘူး။ မသောက်ရတာ တောင် တော်တော် ကြာနေပြီ။]

စူးမင် ပြောသော ပျော်ရွှင်စရာ အချိုရည် ဆိုသည့်အရာကို သူတို့လည်း အလွန် သိချင်နေကြသည်။ စူးမင်ကို ဒီလောက်တောင် ပျော်ရွှင်သွားစေနိုင်သည့် အချိုရည်က ဘယ်လိုမျိုးလဲ။ သူတို့ တကယ် မြည်းစမ်းကြည့်ချင်မိသည်။

ထို့နောက် အခြားသော အမျိုးသမီးဇာတ်ဆောင်များမှာ ရှောင်ဝူကို အနည်းငယ် အားကျသွားကြသည်။ အဘယ်ကြောင့်ဆိုသော် ဤအချိုရည်ကို မြည်းစမ်းခွင့်ရရန် သူမက အလားအလာ အများဆုံး ဖြစ်နေသောကြောင့်ပင်။

ဒိုင်ယာရီ ရေးသားပြီးနောက် စူးမင်က အိပ်ရာဝင်ရန် လှဲလျောင်းလိုက်သည်။ မည်သို့ပင်ဆိုစေ အချိန်လည်း အတော်လေး လင့်နေပြီ ဖြစ်လေသည်။

သို့သော် အခြားသော အမျိုးသမီးဇာတ်ဆောင်များမှာမူ အိပ်မပျော်နိုင်ကြပေ။ သူတို့ထဲမှ တစ်ဦးတည်းသာ ဆုလာဘ် ရရှိနိုင်မည် ဆိုသော်လည်း လုပ်ငန်းစဉ် အဆုံးသတ်သည်အထိ စောင့်ကြည့်ရမည် ဖြစ်လေသည်။

[ဒင်... ယနေ့ စူးမင်၏ ဒိုင်ယာရီတွင် ဖော်ပြခံရသော အမျိုးသမီးဇာတ်ဆောင်များမှာ ရှောင်ဝူ ၁၈ ကြိမ်၊ ဘီဘီတုန်း ၆၅ ကြိမ်နှင့် ချန်းရန်ရွှယ် ၂ ကြိမ်တို့ ဖြစ်ပါသည်။]

[ယနေ့ ဒိုင်ယာရီတွင် နာမည် အများဆုံး ဖော်ပြခံရသူမှာ ဘီဘီတုန်း ဖြစ်ပါသည်။]

ဤအရာကို မြင်လိုက်ရသောအခါ မိန်းကလေးများမှာ တကယ်တော့ အံ့အားသင့်မသွားကြပေ။ ယနေ့ စူးမင်က ဘီဘီတုန်းအကြောင်း အများအပြား ရေးသားထားခဲ့ရာ သူမထံတွင် ဒိုင်ယာရီ ရှိမနေဘူးဆိုလျှင်ပင် သူတို့ ယုံကြည်ကြမည် မဟုတ်ချေ။

အခြားသော အမျိုးသမီးဇာတ်ဆောင်များနှင့် မတွေ့ဆုံဖူးကြသေးသော်လည်း ဒိုင်ယာရီ ပိုင်ဆိုင်ထားသူတိုင်း အလွန် လှပကြမည်ဟု သူတို့ ခန့်မှန်းမိကြသည်။ မည်သို့ပင်ဆိုစေ သူတို့ကိုယ်တိုင်ကလည်း ရုပ်ရည် မဆိုးလှကြောင်း ယုံကြည်ထားကြသည် မဟုတ်ပါလော။

ယခုအခါ ဘီဘီတုန်း၏ နာမည် ဒိုင်ယာရီတွင် ဖော်ပြခံရပြီး ဆုလာဘ် ရရှိသွားကြောင်း သိလိုက်ရသောအခါ ဤဒိုင်ယာရီက လှပသော အမျိုးသမီးများကိုသာ လက်ခံသည်ဟု သူတို့ ပို၍ပင် ယုံကြည်သွားကြလေသည်။ တကယ်ကို မတော်မတရားပါပဲ။

ဒိုင်ယာရီ၏ ပထမဆုံး စာကြောင်းကို မြင်လိုက်ရသောအခါ ဒိုင်ယာရီ ပိုင်ရှင်များ ဖြစ်ကြသော ဘီဘီတုန်းနှင့် ချန်းရန်ရွှယ် နှစ်ဦးစလုံးမှာ သိရှိသွားကြလေသည်။ ချန်းရန်ရွှယ် လာရောက် ရှာဖွေမည့် ကိစ္စအတွက် ဘီဘီတုန်းက ကြိုတင် ပြင်ဆင်ထားပြီး ဖြစ်လေသည်။

သူမက ပုံမှန်အားဖြင့် အနည်းငယ် အေးစက်စက် နိုင်သော်လည်း ချန်းရန်ရွှယ်က အကြောင်းအရာ များစွာကို သိရှိနေပြီဖြစ်ကာ ဒိုင်ယာရီလည်း ပိုင်ဆိုင်ထားကြောင်း သိလိုက်ရမှုက သူမ၏ ရင်ထဲတွင် လှိုင်းထန်သွားစေပြီး သွေးခုန်နှုန်းများပင် မြန်ဆန်လာစေခဲ့သည်။

ချန်းရန်ရွှယ်သည်လည်း ဘီဘီတုန်းကို သေချာစွာ မေးမြန်းရန် အချိန်တစ်ခု ရှာရမည်ဟု ခံစားနေမိသည်။ ဤကိစ္စကို အချိန်ဆွဲထား၍ မရတော့ပေ။

[ဘီဘီတုန်းအတွက် ဂုဏ်ပြုပါတယ်။ စိတ်နှလုံးသန့်စင် ပုလဲလုံး ဆုလာဘ်ကို ရရှိပါတယ်။]

[စိတ်နှလုံးသန့်စင် ပုလဲလုံး - ကိုယ်နှင့်မကွာ ဆောင်ထားပါက စိတ်နှလုံးကို သန့်စင်ပေးပြီး ဆင်ခြင်တုံတရားကို အမြဲတမ်း ထိန်းသိမ်းထားနိုင်စေပါသည်။ ခန္ဓာကိုယ် အတွင်းရှိ မကောင်းဆိုးဝါး အငွေ့အသက်များကို ဖယ်ရှားပေးနိုင်စွမ်း ရှိပြီး ပြင်ပမှ မကောင်းဆိုးဝါး အငွေ့အသက်များ၏ စိမ့်ဝင်လာမှုကို လုံးဝ အပြည့်အဝ ကာကွယ်ပေးကာ မကောင်းဆိုးဝါး အငွေ့အသက် အားလုံးကို ပုလဲလုံး အတွင်းသို့ စုပ်ယူပေးနိုင်ပါသည်။]

[သင် ရရှိလာသော ဆုလာဘ်ကို ကြေညာလိုပါသလား။]

"မကြေညာပါဘူး"

ဒုတိယအကြိမ် တွေးတောနေစရာ မလိုဘဲ ဘီဘီတုန်းက မကြေညာပါဘူး ကိုသာ ရွေးချယ်လိုက်သည်။ ဤကဲ့သို့သော ဆုလာဘ်အကြောင်း သူမ တစ်ယောက်တည်း သိထားရုံဖြင့် လုံလောက်ပြီး လူသိရှင်ကြား ကြေညာနေရန် မလိုအပ်ပေ။

[ဘီဘီတုန်း ရရှိသော ဆုလာဘ် - [လျှို့ဝှက်ထားပါသည်]]

ထင်ထားသည့်အတိုင်းပင် ဘီဘီတုန်းက သူမ ရရှိသော ဆုလာဘ်ကို အမှန်တကယ် ကြေညာခဲ့ခြင်း မရှိပေ။

တစ်ချိန်တည်းမှာပင် ဝိညာဉ်နန်းတော် အတွင်း၌။

ဘီဘီတုန်း၏ ရှေ့တွင် လေဟာနယ်ထဲမှနေ၍ အပြာရောင် ပုလဲလုံး တစ်လုံး ထွက်ပေါ်လာလေသည်။ ၎င်းက မည်သည့်နေရာမှ ရောက်လာမှန်း လုံးဝ မသိနိုင်လောက်အောင် ရုတ်တရက် ထွက်ပေါ်လာခြင်းဖြစ်ရာ အတော်လေး အံ့ဖွယ်ကောင်းလှသည်ဟု သူမ ခံစားလိုက်ရသည်။

သူမ ရရှိလာသော ပုလဲလုံးကို ချက်ချင်းပင် စတင် စစ်ဆေးကြည့်လိုက်သည်။ အကယ်၍ ၎င်း၏ အကျိုးသက်ရောက်မှုများသာ အမှန်တကယ် ဖြစ်ပါက သူမအတွက် အသင့်တော်ဆုံးပင် ဖြစ်လေသည်။

ဤပုလဲလုံးက သူမ၏ ကျင့်ကြံခြင်း စွမ်းအားကို တိုးမြှင့်ပေးနိုင်မည် မဟုတ်သော်လည်း သူမကို စိမ့်ဝင်ဖျက်ဆီးနေသော မကောင်းဆိုးဝါး အငွေ့အသက်များကို အပြည့်အဝ ဖယ်ရှားပေးနိုင်ပြီး ထပ်မံ စိမ့်ဝင်လာခြင်းမှလည်း လုံးဝ ကာကွယ်ပေးနိုင်စွမ်း ရှိလေသည်။

ဤပုလဲလုံးကြောင့် သူမက ဆင်ခြင်တုံတရားကို အချိန်တိုင်း ထိန်းသိမ်းထားနိုင်မည်ဖြစ်ပြီး မကောင်းဆိုးဝါး အငွေ့အသက်များကို ခုခံနိုင်မည်ဖြစ်ရာ ရာက္ခသနတ်ဘုရား၏ စမ်းသပ်မှုများကို ပိုမို မြန်ဆန်စွာ အောင်မြင်နိုင်စေမည် ဖြစ်လေသည်။

မည်သို့ပင်ဆိုစေ နတ်ဘုရား စမ်းသပ်မှုများကို ဖြတ်သန်းနေရစဉ် လုပ်ငန်းစဉ်အတွင်း စိတ်နှလုံး မည်မျှပင် ခိုင်မာစေကာမူ ရာက္ခသနတ်ဘုရား၏ မကောင်းဆိုးဝါး အငွေ့အသက်များ၏ စိမ့်ဝင်ဖျက်ဆီးမှုကို ရှောင်လွှဲ၍ မရနိုင်ပေ။ သူမကိုယ်တိုင် ယခင်က ဤအရာ၏ သားကောင် ဖြစ်ခဲ့ရပြီး ၎င်းကပင် သူမကို ပိုပိုပြီး အေးစက်စက် နိုင်လာကာ သံသယ လွန်ကဲသူ တစ်ယောက် ဖြစ်လာစေခဲ့သည်။

ဤစိတ်နှလုံးသန့်စင် ပုလဲလုံးက သူမ၏ စွမ်းအားကို တိုက်ရိုက် မြှင့်တင် မပေးနိုင်သော်လည်း သွယ်ဝိုက်သော နည်းလမ်းဖြင့် နတ်ဘုရား စမ်းသပ်မှုများကို ပိုမို မြန်ဆန်စွာ အောင်မြင်စေနိုင်လေသည်။ ထို့အပြင် စိတ်နှလုံးသန့်စင် ပုလဲလုံး အတွင်း သိုလှောင်ထားသော မကောင်းဆိုးဝါး အငွေ့အသက်များကို တိုက်ခိုက်ရေး နည်းလမ်းတစ်ခုအနေဖြင့်ပင် အသုံးပြုနိုင်သေးသည်။ တကယ်ကို ထိပ်တန်းအဆင့် ဆုလာဘ်ပါပဲ။

ချက်ချင်းပင် ဘီဘီတုန်းက စိတ်နှလုံးသန့်စင် ပုလဲလုံးကို ကိုယ်နှင့်မကွာ ဆောင်ထားလိုက်သည်။ မကောင်းဆိုးဝါး အငွေ့အသက်များက ပုလဲလုံးဆီသို့ စဉ်ဆက်မပြတ် စီးဝင်သွားနေကြောင်းကို သူမ ခံစားသိရှိနိုင်လေသည်။ သူမ၏ ခန္ဓာကိုယ် တစ်ခုလုံး သန့်စင်သွားရန် အချိန်အကြာကြီး လိုတော့မည် မဟုတ်ဟု သူမ ယုံကြည်လိုက်သည်။

တစ်ချိန်တည်းမှာပင် ဘီဘီတုန်း၏ ရင်ထဲ၌ သံသယ အနည်းငယ် ဖြစ်ပေါ်လာသည်။ အခြားသော နတ်ဘုရား စမ်းသပ်မှုများက မည်သို့ ရှိမည်ကို သူမ မသိသော်လည်း သူမလိုမျိုးပဲ ဖြစ်ရမှာလား။

မကောင်းဆိုးဝါး အငွေ့အသက်တွေရဲ့ စိမ့်ဝင်ဖျက်ဆီးမှုကို ခံရတယ်။ ဝိညာဉ်စွမ်းအား အဆင့် ဖိနှိပ်ခံထားရလို့ အဆင့် ၉၅ ရဲ့ စွမ်းအားကိုပဲ ထုတ်သုံးနိုင်တယ်။ ပြီးတော့ စမ်းသပ်မှုတွေကို အောင်မြင်သွားတဲ့ အခါကျတော့လည်း ဘာဆုလာဘ်မှ မရဘူးတဲ့လေ။

ကံဆိုးစွာဖြင့် သူမက နတ်ဘုရား စမ်းသပ်မှုများ၏ အလယ်သို့ ရောက်ရှိနေပြီဖြစ်ရာ လမ်းတစ်ဝက်တွင် ပြောင်းလဲပစ်ရန် သို့မဟုတ် လက်လျှော့ရန် မဖြစ်နိုင်တော့ချေ။ မဟုတ်ပါက နောက်အသစ်တစ်ခုကို သူမ တကယ် ရှာဖွေချင်နေမိသည်။

ပင်လယ်နတ်ဘုရား - "မဟုတ်ပါဘူး၊ လုံးဝ မဟုတ်ရပါဘူး။ အဲဒါက ရာက္ခသနတ်ဘုရား ကပ်စေးနှဲလွန်းလို့ပါ။ ငါနဲ့ မတူဘူးလေ။ ငါ့ရဲ့ စမ်းသပ်မှုတွေကို အောင်မြင်သွားရင် နတ်ဘုရားချီးမြှင့်တဲ့ ဝိညာဉ်ကွင်းတွေ ဆုချတယ်။ ဝိညာဉ်ကွင်းတွေရဲ့ သက်တမ်းကို သိသိသာသာ မြှင့်တင်ပေးတယ်။ သီးသန့်စွမ်းရည်ဖြစ်တဲ့ ပင်လယ်နတ်ဘုရားရဲ့ အလင်းရောင် ကို ပေးအပ်တဲ့အပြင် နတ်ဘုရားလက်နက် ဖြစ်တဲ့ ပင်လယ်နတ်ဘုရား ခက်ရင်းခွ ကိုတောင် ပေးသေးတာ၊ ဟားဟားဟား။"

အသူရာနတ်ဘုရား - "ငါ့ဘက်မှာတော့ စမ်းသပ်မှုတွေကို အောင်မြင်သွားရင် အနည်းဆုံးတော့ သတ်ဖြတ်ခြင်း နတ်ဘုရား နယ်ပယ် နဲ့ အသူရာနတ်ဘုရား ဓား ကို ရရှိနိုင်တယ်လေ၊ ဟီးဟီး။"