အခန်း (၂) - စူးမင် - ခုနက ငါအသံ နည်းနည်းကျယ်သွားတာကို ဝန်ခံပါတယ်၊ ဝိညာဉ်ဆင့်ကဲပြောင်းလဲခြင်းနှင့် အဆုံးစွန်သစ်သားဓာတ်

"ဒင်... ပိုင်ရှင်၏ ဝိညာဉ်နိုးထလာမှုကို ထောက်လှမ်းမိပါသည်၊ ဒိုင်ယာရီစနစ်က ချိတ်ဆက်ရန် ရောက်ရှိလာပါပြီ။ ပိုင်ရှင် ချိတ်ဆက်လိုပါသလား"

စူးမင် ဤအသံကို ကြားလိုက်ရသောအခါ ချက်ချင်းပင် စိတ်လှုပ်ရှားသွားလေသည်။ "စနစ်... လွန်ခဲ့တဲ့ နှစ်နှစ်ခွဲလုံးလုံး ငါဘယ်လို ဖြတ်သန်းခဲ့ရလဲဆိုတာ မင်းသိရဲ့လား"

"ချိတ်ဆက်မယ်"

စူးမင်က သူ၏စိတ်ထဲမှနေ၍ "စနစ်... မင်းဆီမှာ ဘယ်လိုလုပ်ဆောင်ချက်တွေ ရှိလဲ" ဟု မေးလိုက်သည်။

"ဒင်... ဤစနစ်မှာ ဒိုင်ယာရီရေးသားခြင်း စနစ်ဖြစ်ပါသည်။ ပိုင်ရှင်အနေဖြင့် နေ့စဉ် ဒိုင်ယာရီရေးသားခြင်းကို ဇွဲလုံ့လရှိစွာဖြင့် လုပ်ဆောင်ပါက ဝိညာဉ်စွမ်းအား၊ ဝိညာဉ်ကွင်း သက်တမ်း၊ မသေမျိုးဆေးဖက်ဝင်အပင်၊ ကျင့်စဉ်များ၊ ဝိညာဉ်အရိုး၊ ပြန်လည်ရှင်သန်ထမြောက်ခြင်း စသည့် ဆုလာဘ်များကို ရရှိနိုင်မည် ဖြစ်ပါသည်"

"ပိုင်ရှင် တွေးတောလို့မရနိုင်တာတွေသာ ရှိကောင်းရှိနိုင်ပေမယ့် ကျွန်ုပ် မလုပ်ပေးနိုင်တာ ဘာမှမရှိပါဘူး"

"ပိုင်ရှင် နေ့စဉ်ရေးသားရမည့် ဒိုင်ယာရီ စာလုံးအရေအတွက်ကို ကန့်သတ်ထားခြင်း မရှိပါ။ သို့သော် များများရေးလေ ဆုလာဘ်များများ ရလေဖြစ်ပါသည်"

စနစ် စကားပြောဆိုအပြီးတွင် စူးမင်၏ စိတ်အာရုံထဲ၌ အနည်းငယ် မှုန်ဝါးဝါးဖြစ်နေသော အနက်ရောင် ဒိုင်ယာရီတစ်အုပ်ကို တွေ့လိုက်ရသည်။

စူးမင်က ကြားပြီးနောက် တိတ်တဆိတ် ခေါင်းညိတ်လိုက်၏။ သူ နေ့စဉ် ဒိုင်ယာရီရေးနေသရွေ့ ပိုမိုသန်မာလာနိုင်မည်ဆိုတော့ ဒါက လှဲနေရင်းနဲ့ကို အချောင်ရနေတာ မဟုတ်ပါလား။ နှစ်အနည်းငယ်လောက် အချိန်ယူပြီး စောင့်ဆိုင်းလိုက်ရုံဖြင့် ဤတိုက်ကြီးပေါ်တွင် သူ့ကို မည်သူက ယှဉ်ပြိုင်နိုင်တော့မည်နည်း။

စနစ် မရရှိခင်နှင့် ဝိညာဉ်မနိုးထခင်က စူးမင်၏ ဆန္ဒမှာ ဘဝကို အေးအေးချမ်းချမ်း ဖြတ်သန်းသွားရန်သာ ဖြစ်သည်။ ကံကောင်းလျှင် သင့်လျော်သော မိန်းကလေးတစ်ယောက်နှင့် လက်ထပ်လိုက်မည်ဟု တွေးထားခဲ့၏။

သို့သော် ယခုအခါတွင်မူ စူးမင် ထိုသို့ မတွေးတော့ပေ။ စနစ် ရရှိလာပြီဖြစ်၍ သူ့တွင် အခြားအတွေးအချို့ ရှိလာပြီဖြစ်သည်။ သူက တိုလော်တိုက်ကြီးမှ လှပသော အမျိုးသမီးဇာတ်ဆောင်များအားလုံးကို သူ၏ရင်ခွင်အောက်သို့ ခေါ်ဆောင်ထားချင်လေသည်။

ထို့နောက် စူးမင်က "စနစ်... ဒါဆို အခုကစပြီး ငါ့စိတ်ထဲမှာရှိနေတဲ့ ဒီအနက်ရောင် ဒိုင်ယာရီထဲမှာပဲ ဒိုင်ယာရီ ရေးရမှာပေါ့နော်" ဟု မေးလိုက်သည်။

"ဒင်... မှန်ပါသည် ပိုင်ရှင်။ ပိုင်ရှင်၏ အသိစိတ်ကို အသုံးပြု၍ ဒိုင်ယာရီ ရေးသားနိုင်ပါသည်"

ဤအချက်က အတော်လေး ကောင်းမွန်သည်ဟု စူးမင် ခံစားရသည်။ မဟုတ်လျှင် စာရွက်ပေါ်တွင် ရေးရသည်မှာ အလွန် အလုပ်ရှုပ်မည့်အပြင် အခြားသူများ မြင်တွေ့သွားနိုင်သည့် အန္တရာယ်လည်း ရှိနေသဖြင့် မကောင်းလှပေ။

စိတ်ထဲတွင် ဒိုင်ယာရီ ရေးနိုင်ခြင်းက သူ၏ စိတ်ကူးယဉ်မှုများကို လွတ်လပ်စွာ ပျံသန်းခွင့်ပေးလိုက်ခြင်းပင် ဖြစ်သည်။ တရားဝင်ဟန်ကြီးဖြင့် အကျအန ရေးနေရန် မလိုဘဲ သူရေးချင်သမျှကို လွတ်လပ်စွာ ရေးနိုင်ပြီ ဖြစ်သည်။

ယခု စူးမင်တွင် စနစ်ရှိနေပြီဖြစ်၍ မျက်မမြင် တုံလော် ဆူးယွင်ထောင်း၏ ဖိတ်ခေါ်မှုကို ချဉ်းကပ်ပုံ ပြောင်းလဲရန် လိုအပ်လာပြီ ဖြစ်သည်။

စနစ် မနိုးထခင်ကဆိုလျှင် ဝိညာဉ်နန်းတော်သို့ ဝင်ရောက်ရန် ဆူးယွင်ထောင်း၏ ဖိတ်ခေါ်မှုကို စူးမင် သေချာပေါက် လက်ခံမည် ဖြစ်သည်။ အကြောင်းမှာ ၎င်းက သူ့အတွက် ကျင့်ကြံရန် လုံလောက်သော အရင်းအမြစ်များကို ထောက်ပံ့ပေးနိုင်မည် ဖြစ်သောကြောင့်ပင်။ ထို့အပြင် ဝိညာဉ်နန်းတော်သည် သာမန်လူများအပေါ် အတော်လေး ဖော်ရွေသောကြောင့် ၎င်းအပေါ် သူ၏အမြင်က ကောင်းမွန်လေသည်။

သို့သော် ယခုအခါ စနစ်ပါရှိလာပြီဖြစ်၍ သူ ဝိညာဉ်နန်းတော်သို့ စောစောစီးစီး မသွားချင်တော့ပေ။ ပြင်ပကမ္ဘာကို အရင်ဆုံး လေ့လာကြည့်ချင်နေသည်။ မည်သို့ပင်ဆိုစေ ဤသည်မှာ စူးမင်အတွက် အစစ်အမှန် ကမ္ဘာကြီးဖြစ်ပြီး အတိတ်ဘဝက သူသိထားခဲ့သည်များနှင့် ကွာခြားမှုများ ရှိမရှိ သိချင်နေမိသည်။

ရိုးရိုးသားသား ပြောရလျှင် သူ အခု ဝိညာဉ်နန်းတော်သို့ သွားမည်ဆိုပါက ဝိညာဉ်နန်းတော်၏ အလှကညာ သုံးပါးအနက် တစ်ဦးနှင့်မျှပင် တွေ့ဆုံနိုင်မည် မဟုတ်ပေ။ အဆင့်ခုနစ် မွေးရာပါ ဝိညာဉ်စွမ်းအား ရှိနေသည့်တိုင်အောင် ဘီဘီတုန်းနှင့် အခြားသူများ သူ့ကို လာရောက်တွေ့ဆုံရလောက်သည်အထိ ဝိညာဉ်နန်းတော်တွင် သူ၏အဆင့်အတန်းက မြင့်မားနေမည် မဟုတ်သေးပေ။

ယခုအချိန်၌ အပြင်ဘက်ရှိ အမျိုးသမီးဇာတ်ဆောင်များနှင့် အရင်ဆုံး သိကျွမ်းအောင် လုပ်ထားသည်က ပိုကောင်းပေလိမ့်မည်။ သူတို့ ငယ်ရွယ်စဉ်အချိန်တွင် ဇနီးအဖြစ် သိမ်းပိုက်နိုင်ရန် တစ်ယောက်ယောက်ကိုပင် လှည့်စားနိုင်ကောင်း လှည့်စားနိုင်ပေမည်။

ရှောင်ဝူ၏ ခြေတံသွယ်သွယ်များ၊ ကျူးကျူချင်၏ ရင်သားထွားထွားနှင့် နင်းရုန်ရုန်၏ ချမ်းသာကြွယ်ဝမှု... သူတို့က သူ အစောဆုံး တွေ့ဆုံနိုင်မည့် အမျိုးသမီး ဇာတ်ဆောင်များပင် ဖြစ်သည်။

သူတို့အားလုံးကိုသာ သိမ်းသွင်းနိုင်မည်ဆိုလျှင် သူ၏ ဘဝကြီးတစ်ခုလုံး ပြည့်စုံသွားပြီ ဖြစ်သည်။

ထို့ကြောင့် ဆူးယွင်ထောင်း၏ ဖိတ်ခေါ်မှုကို ရင်ဆိုင်ရသောအခါ စူးမင်က တောင်းပန်သည့်အနေဖြင့် အနည်းငယ် ဦးညွှတ်လိုက်သည်။ "ဝိညာဉ်သခင်ကြီး... ကျွန်တော် တောင်းပန်ပါတယ်။ ဒါပေမဲ့ ကျွန်တော် တခြားနေရာတွေကို အရင်သွားကြည့်ချင်လို့ပါ။ နောက်ကျရင်တော့ ဝိညာဉ်နန်းတော်ကို သေချာပေါက် လာခဲ့ပါ့မယ်"

အနီးအနားတွင် ဝိညာဉ်နိုးထရန် စောင့်ဆိုင်းနေသော ထန်ဆန်းကမူ စူးမင်ကို တစ်ချက်မျှသာ ကြည့်ပြီးနောက် အကြည့်လွှဲသွားလေသည်။

ဆူးယွင်ထောင်းကမူ အနည်းငယ် အံ့အားသင့်သွားပြီး ဤကောင်လေးက သူ့ကို ငြင်းဆန်လိမ့်မည်ဟု ထင်မှတ်မထားခဲ့ပေ။

သူ၏ဘေးတွင်ရှိသော အဘိုးဂျက်က ချက်ချင်းပင် စိုးရိမ်တကြီးဖြစ်သွားသည်။ "စူးမင်... မင်းက ဝိညာဉ်သခင်ကြီးရဲ့ ဖိတ်ခေါ်မှုကို ဘယ်လိုလုပ် ငြင်းရက်တာတုန်း။ ဝိညာဉ်နန်းတော်ကို သွားခွင့်ရတာက မင်းအတွက် ဂုဏ်ယူစရာပဲကွ။ အဲဒီမှာမှ မင်းရဲ့ ပါရမီကို ပိုပြီး အသုံးချနိုင်မှာ"

စူးမင်က ထိုစကားများအပေါ် ခေါင်းသာခါယမ်းပြလိုက်သည်။

၎င်းကိုမြင်သောအခါ ဆူးယွင်ထောင်းက ဘာမျှဆက်မပြောတော့ပေ။ ကောင်လေးက ပြင်ပကမ္ဘာကို သိချင်စိတ်ပြင်းပြနေပြီး ဝိညာဉ်နန်းတော်သို့ မသွားမီ အရင်ဆုံး စူးစမ်းလေ့လာချင်နေသည်ဟုသာ သူ တွေးလိုက်သည်။ သို့သော် ပြင်ပကမ္ဘာကြီးမှာ လျှို့ဝှက်အန္တရာယ်များနှင့် ပြည့်နှက်နေလေရာ တစ်နေ့နေ့တွင် ဤကောင်လေး ကံမကောင်းစွာဖြင့် သေဆုံးသွားမည်ကိုသာ သူ စိုးရိမ်မိသည်။

ထို့နောက် သူ၏ အကြည့်များကို နောက်ဆုံးကျန်နေသည့် ထန်ဆန်းထံသို့ လွှဲပြောင်းလိုက်သည်။

"လာခဲ့... မင်း တစ်ယောက်ပဲ ကျန်တော့တယ်"

ထန်ဆန်းက ခပ်ဖွဖွသာ ခေါင်းညိတ်ပြလိုက်ပြီးနောက် ယခင်လုပ်ငန်းစဉ်များအတိုင်း အပြာရောင်သလင်းကျောက်လုံးပေါ်သို့ သူ၏ ညာဘက်လက်ကို တင်လိုက်လေသည်။

အခိုက်အတန့်အကြာတွင် သူ၏ ညာဘက်လက်ထဲ၌ ငွေပြာမြက်တစ်ပင် ထွက်ပေါ်လာ၏။

ထန်ဆန်းက သူ၏ ဘယ်ဘက်လက်ထဲမှ တစ်စုံတစ်ခု ထွက်ပေါ်လာရန် ကြိုးစားနေသည်ကို ရုတ်တရက် ခံစားလိုက်ရပြီး လျင်မြန်စွာ ဖုံးကွယ်လိုက်သည်။ သူက သိသာခြင်းမရှိအောင် ပြုလုပ်ခဲ့သော်လည်း သူ့ကို တိတ်တဆိတ် စောင့်ကြည့်နေသော စူးမင်ကတော့ သတိထားမိသွားခဲ့သည်။

'ထင်တဲ့အတိုင်းပဲ... သူ အမြွှာဝိညာဉ်တွေ နိုးထလာခဲ့တာကိုး'

နောက်ဆုံးကျန်နေသူကလည်း ငွေပြာမြက်ဝိညာဉ်သာ နိုးထလာသည်ကို မြင်လိုက်ရသောအခါ ဆူးယွင်ထောင်းက စိတ်ပျက်လက်ပျက်ဖြင့် ခေါင်းခါယမ်းလိုက်သည်။

"ငွေပြာမြက်... အသုံးမကျတဲ့ ဝိညာဉ်ပဲ"

ဆူးယွင်ထောင်းက သလင်းကျောက်လုံးကို သိမ်းဆည်းရန် ဟန်ပြင်လိုက်စဉ် ထန်ဆန်းက စကားပြောလာသည်။

"ဝိညာဉ်သခင်ကြီး... ကျွန်တော့်ရဲ့ ဝိညာဉ်စွမ်းအားကို စမ်းသပ်ခွင့် ပြုနိုင်မလား"

ထန်ဆန်းက ယခင် ငွေပြာမြက် နိုးထလာခဲ့သူများနှင့် သူ အနည်းငယ် ကွာခြားသင့်သည်ဟု ခံစားရသည်။ သူ့တွင် အခြားဝိညာဉ်တစ်ခု ရှိနေပုံရသော်လည်း အသက်သုံးဆယ်ကျော်အရွယ် ဝိညာဉ်တစ်ခု ပိုင်ဆိုင်ထားသူပီပီ ဤအရာကို ထုတ်ဖော်ပြသ၍ မဖြစ်ကြောင်း သူ ကောင်းကောင်းသိနေသည်။

ဆူးယွင်ထောင်းက ထန်ဆန်း၏ အနည်းငယ် ခေါင်းမာနေသော မျက်နှာထားကို ကြည့်ကာ နောက်ဆုံးတွင် ထန်ဆန်း လက်လျှော့သွားစေရန် ဝိညာဉ်စွမ်းအား စမ်းသပ်ခွင့်ပြုရန် ဆုံးဖြတ်လိုက်သည်။

"ကောင်းပြီလေ"

ထို့နောက် အပြာရောင်အလင်းတန်းတစ်ခု ပေါက်ကွဲထွက်လာပြီး စူးမင်၏ သစ်သားဓာတ်ဝိညာဉ် နိုးထစဉ်က ထွက်ပေါ်လာသည့် အလင်းရောင်ထက်ပင် ပို၍ တောက်ပနေလေသည်။

"မွေးရာပါ ဝိညာဉ်စွမ်းအား အပြည့်ပါလား"

ဆူးယွင်ထောင်းက အံ့သြတကြီး ရေရွတ်လိုက်မိသည်။ အသုံးမကျသော ဝိညာဉ်ဟု သတ်မှတ်ခံထားရသည့် ငွေပြာမြက်မှ မွေးရာပါ ဝိညာဉ်စွမ်းအား အပြည့်ကို နိုးထလာစေနိုင်လိမ့်မည်ဟု သူ လုံးဝ ထင်မှတ်မထားခဲ့ပေ။

သို့သော် မွေးရာပါ ဝိညာဉ်စွမ်းအား အပြည့်ဖြစ်နေလျှင်ရော ဘာထူးမည်နည်း။ သူ၏ဝိညာဉ်က ငွေပြာမြက် ဖြစ်နေသည်မှာ နှမြောစရာပင်။

ဆူးယွင်ထောင်းက ခေါင်းခါယမ်းလိုက်ပြီး သလင်းကျောက်လုံးကို သိမ်းဆည်းလိုက်သည်။ "ဒီလောက်ကောင်းတဲ့ ပါရမီကိုမှ... ကံမကောင်းစွာနဲ့ပဲ ဝိညာဉ်က ငွေပြာမြက် ဖြစ်နေရတယ်လို့"

ထိုသို့ပြောပြီးနောက် သူက လှည့်ထွက်သွားတော့သည်။

အဘိုးဂျက်ကမူ ဤအရာများအားလုံးကို ဂရုမစိုက်ပေ။ သူတို့၏ စိန့်ဝိညာဉ်ကျေးရွာတွင် နောက်ထပ် ဝိညာဉ်သခင် နှစ်ယောက် ပေါ်ထွက်လာတော့မည်ကိုသာ သူ သိထားပြီး ၎င်းမှာ ဝမ်းမြောက်စရာ ကိစ္စရပ်တစ်ခုပင် ဖြစ်သည်။

စူးမင်က တိတ်တဆိတ် လှောင်ပြောင်လိုက်သည်။ 'မျက်မမြင်တုံလော်ဆိုတဲ့ နာမည်နဲ့ လိုက်ဖက်ပါပေတယ်။ သာမန် ငွေပြာမြက်ကနေ မွေးရာပါ ဝိညာဉ်စွမ်းအား အပြည့် နိုးထလာနိုင်ပါ့မလား'

ထန်ဆန်း၏ မွေးရာပါ ဝိညာဉ်စွမ်းအား အပြည့်မှာ အနည်းငယ် ချဲ့ကားထားသလို ဖြစ်နေသော်လည်း ၎င်းမှာ သူ၏ လျှို့ဝှက်ကောင်းကင်ကျင့်စဉ်ကြောင့်သာ ဖြစ်လေသည်။

အိမ်ပြန်ရောက်သောအခါ။

စူးမင်က စနစ်ကို မေးလိုက်သည်။ "စနစ်... စောစောက ငါ မင်းကို မေးဖို့ အချိန်မရခဲ့လို့ပါ။ အစပြုသူအတွက် လက်ဆောင်ထုပ်တို့ ဘာတို့ညာတို့ပေါ့ မရှိဘူးလား"

"ဒင်... ရှိပါသည် ပိုင်ရှင်။ ယခု ဖြန့်ဝေပေးနေပါပြီ"

'ငါသာ မမေးရင် မင်းက ပေးမှာမဟုတ်ဘူးပေါ့လေ။ ဒီစနစ်ကတော့ လွန်ကိုလွန်လွန်းနေပြီ' ဟုတွေးလိုက်မိသည်။

"ဒင်... အစပြုသူ လက်ဆောင်ထုပ်ကို ရရှိသည့်အတွက် ပိုင်ရှင်ကို ဂုဏ်ပြုပါသည်။ ဖွင့်ကြည့်လိုပါသလား"

"ဖွင့်မယ်"

"ဒင်... ပိုင်ရှင်အား ဂုဏ်ပြုပါသည်။ ပိုင်ရှင်၏ သစ်သားဓာတ်ဝိညာဉ်မှာ အဆုံးစွန်သစ်သားဓာတ်အဖြစ် ဆင့်ကဲပြောင်းလဲသွားပြီး မွေးရာပါ ဝိညာဉ်စွမ်းအားမှာလည်း အဆင့်ဆယ်သို့ တိုးတက်သွားပါပြီ"

"ဒင်... သစ်သားစွမ်းအား ထုတ်လွှတ်မှု နည်းစနစ် (တုံလော်ဗားရှင်း) ကို ရရှိသည့်အတွက် ပိုင်ရှင်အား ဂုဏ်ပြုပါသည်"

"ဒင်... ကိုယ်ခံပညာ ကျွမ်းကျင်မှုအဆင့်ကို ရရှိသည့်အတွက် ပိုင်ရှင်အား ဂုဏ်ပြုပါသည်"

ဝိုး... ဒီဆုလာဘ်က အတော်လေး အစွမ်းထက်တာပဲ။

စနစ်... ခုနက ငါအသံ နည်းနည်းကျယ်သွားတာကို ဝန်ခံပါတယ်။

"သစ်သားစွမ်းအား ထုတ်လွှတ်မှု နည်းစနစ် (တုံလော်ဗားရှင်း) - နာရူတိုလောကမှ သစ်သားစွမ်းအားကို မှီငြမ်းထားပါသည်။ ဝိညာဉ်စွမ်းအားနှင့် စိတ်စွမ်းအား ပမာဏတစ်ခုကို အသုံးပြုကာ သစ်သားဒိုင်းလွှား၊၊ သစ်သားကိုယ်ပွား၊ သစ်သားနဂါး၊ သစ်သားဘီလူးနှင့် စစ်မှန်သော လက်တစ်ထောင် (မဟာဗုဒ္ဓ) အစရှိသည့် မျိုးစုံသော သစ်သားစွမ်းအား ထုတ်လွှတ်မှုများကို ဖော်ဆောင်နိုင်ပါသည်"

စနစ်မှ ပေးအပ်သော သစ်သားစွမ်းအားကို မြင်လိုက်ရသောအခါ စူးမင်က သူ မည်မျှ သဘောကျကြောင်း ထုတ်ဖော်ပြောဆိုလိုက်မိသည်။ မူလက နင်ဂျုဆုများ သုံးစွဲရန် စိတ်စွမ်းအားနှင့် ကိုယ်ကာယခွန်အား ပမာဏတစ်ခုကို အသုံးပြုရန် လိုအပ်သော်လည်း ဤနေရာတွင်မူ စနစ်က ၎င်းကို စိတ်စွမ်းအားနှင့် ဝိညာဉ်စွမ်းအား အသုံးပြုမှုအဖြစ် ပြောင်းလဲပေးထားလေသည်။

ဆိုလိုသည်မှာ သူ၏ ဝိညာဉ်စွမ်းအားနှင့် စိတ်စွမ်းအား လုံလောက်နေသရွေ့ အထူးသဖြင့် သစ်သားနဂါးနှင့် မဟာဗုဒ္ဓ ကဲ့သို့သော အထင်ကြီးလောက်စရာ သစ်သားစွမ်းအားများကို အပြည့်အဝ ထုတ်လွှတ်နိုင်မည် ဖြစ်သည်။ ထို့အပြင် ဤနည်းစနစ်များကို သူကိုယ်တိုင် ဖန်တီးထားသော ဝိညာဉ်စွမ်းရည်များအဖြစ်လည်း သတ်မှတ်နိုင်လေသည်။

ထို့အပြင် ဝိညာဉ်၏ သတ္တိမှာ အဆုံးစွန်သစ်သားဓာတ်အဖြစ် ဆင့်ကဲပြောင်းလဲသွားခြင်းက သူ၏ သစ်သားဓာတ်ဝိညာဉ်ကို ပိုမို အစွမ်းထက်လာစေပြီး အပင်အမျိုးအစား ဝိညာဉ်များအားလုံးကို ထိန်းချုပ်နိုင်စွမ်းရှိကာ အပင်အများစုအပေါ် ဖိနှိပ်နိုင်သည့် အကျိုးသက်ရောက်မှု ရှိနေပြီဖြစ်ကြောင်း ဖော်ပြနေလေသည်။