အခန်း (၁၁) - ယွီရှောင်ကန်း - "ပါရမီရှင်တစ်ယောက်ကို အောင်မြင်လာအောင် ပျိုးထောင်ပေးနိုင်သရွေ့ ငါ့ကိုယ်ငါ သက်သေပြနိုင်ပြီ"

မကြာမီမှာပင် အမျိုးသမီးဇာတ်ဆောင်များ၏ အာရုံစိုက်မှုက အခြားကိစ္စရပ်တစ်ခုဆီသို့ ပြောင်းလဲသွားလေသည်။ လက်ရှိ သာသနာပိုင် ပုပ် ဘီဘီတုန်းက တကယ်တော့ အချစ်အတွက်ဆို အသိဉာဏ်ကင်းမဲ့သွားတတ်သူတဲ့လား။

၎င်းမှာ အလွန်တုန်လှုပ်ဖွယ်ကောင်းသော အတင်းအဖျင်းစကားပင် ဖြစ်လေသည်။

ဤအချိန်တွင် အဝေးရှိ ဝိညာဉ်မြို့တော် ဝိညာဉ်နန်းတော်အတွင်း၌ ဘီဘီတုန်းက သူမ၏ရှေ့ရှိ ဒိုင်ယာရီကို အလွန်အေးစက်သော မျက်နှာထားဖြင့် စိုက်ကြည့်နေလေသည်။ သူမ၏ဘေးတွင် ဝိညာဉ်နန်းတော်၏ အနာဂတ် သူတော်စင်ကညာလေး ဟူလီနာ ရပ်နေ၏။

ဟူလီနာမှာ ကြောက်လန့်တကြား တုန်ယင်နေပြီး လှုပ်ပင်မလှုပ်ရဲချေ။

ဘီဘီတုန်းနှင့် ဟူလီနာ နှစ်ဦးစလုံးတွင် ဒိုင်ယာရီများ ရှိနေကြပြီး တစ်ဖက်လူတွင် ဒိုင်ယာရီရှိနေမှန်း နှစ်ဦးစလုံးက သိရှိထားကြလေသည်။ ဤအချက်ကို သူတို့ မတော်တဆ ရှာဖွေတွေ့ရှိခဲ့ခြင်း ဖြစ်သည်။

ဒိုင်ယာရီ ပိုင်ရှင်အချင်းချင်း ဖြစ်နေသရွေ့ ရှာဖွေတွေ့ရှိသွားလျှင်တောင်မှ ဘာပြဿနာမှ မရှိနိုင်ပုံပေါ်သည်။ တစ်ချိန်တည်းမှာပင် တစ်ဖက်လူ၏ရှေ့ရှိ ပုံရိပ်ယောင် အနက်ရောင်ဒိုင်ယာရီကိုလည်း နှစ်ဦးစလုံးက အပြန်အလှန် မြင်တွေ့နိုင်စွမ်း ရှိကြလေသည်။

ဤအချိန်တွင် ဘီဘီတုန်းက သူမ၏ သာသနာပိုင် ရာဇလှံတံကို လက်တစ်ဖက်ဖြင့် တင်းကျပ်စွာ ဆုပ်ကိုင်ထားပြီး ဒေါသကို အစွမ်းကုန် ထိန်းချုပ်နေဟန် ရှိလေသည်။

ဒိုင်ယာရီထဲတွင် ဘီဘီတုန်းအကြောင်း ပါလာသည်ကို မြင်သောအခါ လျိုအာလုံ၏ စိတ်အခြေအနေမှာ အလွန် ရှုပ်ထွေးသွားရသည်။ ဘီဘီတုန်းက ယွီရှောင်ကန်း၏ ပထမဆုံးအချစ် ဖြစ်ခဲ့သည် မဟုတ်ပါလော။ သူမ ဤအချက်ကို နောက်ပိုင်းမှ သိရှိခဲ့ရခြင်း ဖြစ်သည်။ ယခုအခါ သူတို့နှစ်ဦးကြားတွင် မည်သည့်ပတ်သက်မှုမျှ မရှိတော့သော်လည်း သူမ၏ ရင်ထဲတွင်မူ မနာလိုမှုများ ဖြစ်ပေါ်နေဆဲပင်။

ဘီဘီတုန်း မည်မျှ အချစ်ရူးရူးခဲ့ကြောင်းကို စူးမင်က အသေးစိတ် ရေးသားတော့မည်ဟု အမျိုးသမီးဇာတ်ဆောင်များက ထင်မှတ်နေစဉ်မှာပင် စူးမင်က ထိုအကြောင်းကို ဆက်ရေးမည့် အရိပ်အယောင် မပြဘဲ ယွီရှောင်ကန်းအကြောင်းကိုသာ ဆက်လက် ရေးသားနေလေသည်။

[ငါ့ရင်တွင်း အနက်ရှိုင်းဆုံးမှာတော့ ဒီသီအိုရီတွေကို ယွီရှောင်ကန်း လူသိရှင်ကြား ထုတ်ပြန်ခဲ့တဲ့ လုပ်ရပ်အပေါ် အတိုင်းအတာတစ်ခုအထိ သဘောတူမိသားပဲ။ အနည်းဆုံးတော့ သာမန်လူတွေအနေနဲ့ ဝိညာဉ်ကျင့်ကြံခြင်းနဲ့ ပတ်သက်တဲ့ သတင်းအချက်အလက်တွေကို ပိုသိလာရပြီး သူတို့ရဲ့ နောက်ပိုင်းကျင့်ကြံမှုတွေအတွက် အထောက်အကူ ဖြစ်စေတာပေါ့။ ဂိုဏ်းကြီးတွေရဲ့ ချုပ်ချယ်ကန့်သတ်မှုတွေခံရမယ့် ဖြစ်နိုင်ခြေလည်း လျော့ကျသွားတာပေါ့။]

[ဒါပေမဲ့ ဒီသီအိုရီတွေကို သူ့ကိုယ်ပိုင် သုတေသနတွေပါလို့ ကြွေးကြော်နေတဲ့ ယွီရှောင်ကန်းရဲ့ အပြုအမူကတော့ တကယ်ကို အရှက်မဲ့လွန်းတယ်လို့ ငါထင်တယ်။ ဒီသီအိုရီတွေကို သူက ဘီဘီတုန်းရဲ့ အချစ်ကို အသုံးချပြီး ဝိညာဉ်နန်းတော်ရဲ့ မှတ်တမ်းဟောင်းတွေဆီကနေ ကူးချထားခဲ့တာလေ။ အလွန်ဆုံးရှိလှ သူ့ရဲ့ ကိုယ်ပိုင် အတွေးအခေါ်လေး နည်းနည်းပါးပါး ထပ်ဖြည့်ထားရုံပါပဲ။ ကိုယ်ပိုင်ဉာဏ်နဲ့ ဖန်တီးမှုကတော့ တကယ်ကို နည်းပါးလွန်းပါတယ်။]

[ယွီရှောင်ကန်းရဲ့ စွမ်းအားနဲ့ဆိုရင် ငွေပြာမြက်ဝိညာဉ် ပိုင်ဆိုင်ထားတဲ့သူတွေမှာ ဝိညာဉ်စွမ်းအား ရှိမရှိနဲ့ ရှိရင်တောင် မွေးရာပါ ဝိညာဉ်စွမ်းအားက ယေဘုယျအားဖြင့် ဘယ်အဆင့်မှာ ရှိနိုင်လဲဆိုတာလောက်ကိုပဲ သုတေသန လုပ်နိုင်စွမ်းရှိတာပါ။ ပုံမှန်လူတစ်ယောက်ကရော ဒီလိုမျိုး အလုပ်မဖြစ်တဲ့ အရာတွေကို သုတေသနလုပ်ဖို့ အားနေပါ့မလား။]

[ပိုမြင့်တဲ့အဆင့်ရှိတဲ့ သီအိုရီတွေကိုကျတော့ သူက သုတေသန လုပ်နိုင်စွမ်းမှ မရှိတာ။ ဥပမာအနေနဲ့ နှစ်တစ်သောင်းသက်တမ်း ဝိညာဉ်ကွင်း စုပ်ယူတဲ့ကိစ္စကိုပဲ ကြည့်လေ။ ဝိညာဉ်သခင် တစ်ယောက်အနေနဲ့ စုပ်ယူနေစဉ်အတွင်းမှာ သေဆုံးသွားတဲ့ နှစ်တစ်သောင်းသက်တမ်း ဝိညာဉ်သားရဲဆီကနေ ထွက်ပေါ်လာတဲ့ အငြိုးတကြီး ရိုက်ခတ်မှုတွေကို ခုခံတွန်းလှန်နိုင်ဖို့ လိုအပ်တယ်။ ဒါကိုတောင် သူက မသိပါဘူး။]

[ပြီးတော့ ဝိညာဉ်နန်းတော်ကနေ သူစုစည်းလာခဲ့တဲ့ သီအိုရီတွေကို လူသိရှင်ကြား ထုတ်ပြန်ရဲမှတော့ တိုက်ကြီးပေါ်က ဂိုဏ်းအသီးသီးရဲ့ ပစ်မှတ်ထားခံရဖို့ကို သူ ကြိုတင်ပြင်ဆင်ထားသင့်တာပေါ့။]

[တကယ်တမ်းမှာလည်း အပြာရောင်လျှပ်စီး အာဏာရှင်နဂါး မျိုးနွယ်စုကသာ ယွီရှောင်ကန်းကို အစွမ်းကုန် မကာကွယ်ပေးခဲ့ဘူးဆိုရင် ယွီရှောင်ကန်းက အခုချိန်လောက်ဆို ဂိုဏ်းအသီးသီးက လူတွေရဲ့ ရိုက်သတ်တာကို ခံနေရလောက်ပြီ။]

[အထက်မှာ ပြောခဲ့တာတွေက ယွီရှောင်ကန်း အပြာရောင်လျှပ်စီး အာဏာရှင်နဂါး မျိုးနွယ်စုကနေ နှင်ထုတ်ခံရတဲ့ အကြောင်းရင်းနဲ့ ပတ်သက်ပြီး ငါ့ရဲ့ အတိတ်ဘဝက အင်တာနက် အသုံးပြုသူတွေ ခန့်မှန်းထားကြတာပဲ ဖြစ်တယ်။]

[မဟုတ်ရင် ယွီရှောင်ကန်းက အပြာရောင်လျှပ်စီး အာဏာရှင်နဂါး မျိုးနွယ်စု ခေါင်းဆောင် ယွီယွမ်ကျိန်းရဲ့ သားအရင်းလေ။ သူကိုယ်တိုင်က အဆင့် (၂၉) မှာ ရပ်တန့်နေတဲ့ မျိုးဗီဇပြောင်း ဝိညာဉ်ပိုင်ဆိုင်ထားတဲ့ အသုံးမကျသူ တစ်ယောက် ဖြစ်နေရင်တောင် မိသားစုထဲကနေ နှင်ထုတ်ခံရမှာ မဟုတ်ဘူး။]

[ဒါကြောင့် ယွီယွမ်ကျိန်းအနေနဲ့ တခြားသူတွေရဲ့ ဖိအားပေးမှုကြောင့် ယွီရှောင်ကန်းကို မိသားစုထဲကနေ မဖြစ်မနေ ထွက်ခွာခိုင်းခဲ့ရတာ ဖြစ်ဖို့ များတယ်။]

[ဒါပေမဲ့ ယွီရှောင်ကန်းက သူ မိသားစုထဲကနေ နှင်ထုတ်ခံရတဲ့ အကြောင်းရင်းကို မသိရှာဘူး။ အပြာရောင်လျှပ်စီး အာဏာရှင်နဂါး ဝိညာဉ် မနိုးထလာဘဲ ဝက်နဲ့တူတဲ့ 'လိုဆန်းဖောက်' လို့ခေါ်တဲ့ ပြင်ပဝိညာဉ်တစ်ခု နိုးထလာလို့ မိသားစုက သူ့ကို အသုံးမကျဘူးဆိုပြီး အသိအမှတ်မပြုတာကြောင့် နှင်ထုတ်ခံရတာလို့ပဲ သူ ထင်နေဆဲပဲ။]

[အဲဒါကြောင့်ပဲ သူ့ဆီမှာ တပည့်ခံပြီး သူ့ရဲ့ သီအိုရီတွေကို ဆက်ခံမယ့် ပါရမီရှင် တပည့်တစ်ယောက်ကို သူ ရှာဖွေချင်နေတာ။ အနာဂတ်မှာ သူ့တပည့်က ဘွဲ့ရတုံလော် အဆင့်ကို ရောက်ရှိသွားတဲ့အခါ သူက အသုံးမကျတဲ့သူ မဟုတ်ကြောင်းရယ်၊ သူ သင်ကြားပေးလိုက်တဲ့ တပည့်က သူတို့အများစုထက် ပိုပြီး အောင်မြင်မှုတွေ ရရှိခဲ့ကြောင်းရယ်ကို တစ်လောကလုံးနဲ့ မိသားစုကို သက်သေပြချင်နေတာပဲ။]

ဤအချိန်တွင် ဝိညာဉ်နန်းတော်၌ ဘီဘီတုန်းက စူးမင်အနေဖြင့် သူမ၏ အတိတ်အကြောင်းကို ဆက်လက်မပြောတော့သည်ကို မြင်သောအခါ ချက်ချင်းပင် သက်ပြင်းချလိုက်မိသည်။ သူမ၏ အတိတ်အကြောင်းများ ဒိုင်ယာရီထဲတွင် ထွက်ပေါ်လာမည်ကို သူမ တကယ်ပင် မလိုလားပေ။

ဟူလီနာမှာလည်း သူမကဲ့သို့ပင် ဒိုင်ယာရီ တစ်အုပ် ပိုင်ဆိုင်ထားကြောင်း ယခု သူမ သိရှိသွားလေပြီ။ ဆိုလိုသည်မှာ ဒိုင်ယာရီ ပိုင်ဆိုင်ထားသော အမျိုးသမီးဇာတ်ဆောင် အတော်များများ ရှိနေနိုင်သည်ဟု သဘောသက်ရောက်လေသည်။ ဒိုင်ယာရီထဲတွင် နာမည်ဖော်ပြခံရသော မိန်းကလေးများမှာ ဒိုင်ယာရီ ပိုင်ရှင်များ ဖြစ်ရန် အလွန်ပင် သေချာသလောက်ရှိပြီး သူမအနေဖြင့် လူပုံလယ်တွင် မျက်နှာပျက်ရမည့် အဖြစ်မျိုး လုံးဝ မကြုံတွေ့ချင်ပေ။

အကယ်၍ သူမ၏ အတိတ်အကြောင်းကိုသာ စူးမင်က တကယ် ဖော်ထုတ်ရေးသားခဲ့မည်ဆိုပါက ဘီဘီတုန်းအနေဖြင့် စူးမင်အား သတ်ဖြတ်ချင်လာမည့်စိတ်ကို မထိန်းချုပ်နိုင်တော့မည်ကို တကယ်ပင် စိုးရိမ်မိသည်။ သေချာသည်မှာ ၎င်းက အတွေးသက်သက်သာ ဖြစ်လေသည်။ ဤဒိုင်ယာရီ၏ စွမ်းအားကို သူမ ခုခံတွန်းလှန်နိုင်စွမ်း မရှိပေ။

ယနေ့တိုင်အောင် ဤဒိုင်ယာရီ ထွက်ပေါ်လာခြင်း၏ အဓိပ္ပာယ်ကား ဘာကြောင့်နည်း၊ ဘာကြောင့် သူမတွင် ဒိုင်ယာရီ ရှိနေရသနည်းဆိုသည်ကို သေချာ မသိရသေးပေ။ သို့သော် ဝန်ခံရမည်ဆိုလျှင် ခုနစ်ရက်လျှင် တစ်ကြိမ် သေချာပေါက် ရရှိသော ဒိုင်ယာရီ၏ ဝိညာဉ်စွမ်းအား ဆုလာဘ်ကတော့ တကယ်ကို ဆွဲဆောင်မှု ရှိလွန်းလှသည်။

ယခင်က ဘီဘီတုန်းသည် ဝိညာဉ်စွမ်းအား တိုးတက်မှု တစ်ထောင်ပုံ တစ်ပုံကိုသာ ရရှိခဲ့သော်လည်း သူမ၏ မူလအဆင့်က အလွန်မြင့်မားလေရာ ဝိညာဉ်စွမ်းအား တစ်ထောင်ပုံ တစ်ပုံဆိုသည်မှာ နည်းပါးလှသော ပမာဏ မဟုတ်ပေ။ ၎င်းက ရာက္ခသနတ်ဘုရား စမ်းသပ်မှုများတွင် ပါဝင်စဉ် ကျဆင်းသွားခဲ့သော သူမ၏ စွမ်းအားများကို အတော်အသင့် ပြန်လည် နာလန်ထူလာစေခဲ့သည်။

(ဘီဘီတုန်းမှာ နတ်ဘုရား စမ်းသပ်မှုများတွင် ပါဝင်နေပြီ ဖြစ်ပေမည်။ ရာက္ခသနတ်ဘုရား စမ်းသပ်မှုများ၏ ကြာမြင့်ချိန်မှာ တကယ်ကို ရှည်ကြာလွန်းပြီး ဘီဘီတုန်းတွင်လည်း အခြားပြင်ပအင်အားစုများ၏ အကူအညီ လုံးဝ မရှိသေးချေ။)

တစ်ချိန်တည်းမှာပင် ဘေးတွင် ရပ်နေသော ဟူလီနာကလည်း သက်ပြင်းချလိုက်မိသည်။ ယခုလေးတင် ထွက်ပေါ်လာသော ဘီဘီတုန်း၏ အငွေ့အသက်မှာ တကယ်ကို ကြောက်မက်ဖွယ် ကောင်းလွန်းလှသည်။

ထိုအချိန်မှာပင် ဒိုင်ယာရီက ဆက်လက်၍ အသစ်ပေါ်လာလေသည်။

[ဒီအချိန်မှာပဲ ထန်ဆန်း ပေါ်လာခဲ့တယ်။ ပြီးတော့ သူက အမြွှာဝိညာဉ် ပိုင်ရှင်လည်း ဖြစ်နေတော့ ယွီရှောင်ကန်း မျှော်လင့်ထားတာတွေနဲ့ အပြည့်အဝ ကိုက်ညီသွားပြီး မျှော်လင့်ထားတာထက်တောင် အများကြီး ပိုလွန်သွားခဲ့တယ်။]

[ဒါကြောင့် ယွီရှောင်ကန်းက ထန်ဆန်းကို တပည့်အဖြစ် လိုချင်နေပြီး အနာဂတ်မှာ ထန်ဆန်းက သူ့ကိုယ်သူ သက်သေပြပေးနိုင်ဖို့ မျှော်လင့်နေတဲ့ ဒီနေ့ ပြကွင်းပြကွက်ကြီး ဖြစ်လာခဲ့တာပဲ။]

[ဒါပေမဲ့ ဒီနေရာမှာတော့ ယွီရှောင်ကန်းကို ငါ ပြင်းပြင်းထန်ထန် ရှုတ်ချရလိမ့်မယ်။ ထန်ဆန်းမှာက အမြွှာဝိညာဉ်တွေ ရှိနေပြီး ကောင်းကင်ဘုံကို အံတုနိုင်လောက်တဲ့ ပါရမီကို ပိုင်ဆိုင်ထားတယ်။ သူ့အဖေကလည်း ထန်ဟောက်လေ။ ပြီးတော့ နှစ်တစ်သိန်းသက်တမ်းရှိ ဝိညာဉ်သားရဲရဲ့ သွေးဆက်တစ်ဝက်ကိုလည်း ပိုင်ဆိုင်ထားသေးတယ်။ ယွီရှောင်ကန်းရဲ့ လမ်းညွှန်မှု မပါရင်တောင် ငယ်ရွယ်စဉ်မှာသာ သေဆုံးမသွားဘူးဆိုရင် အနာဂတ်မှာ သူ့ရဲ့ အောင်မြင်မှုတွေက ဘွဲ့ရတုံလော်ကနေ စတင်မှာပဲ။ အဲဒါကို သူက ဘယ်နေရာကများ ဝင်ပြီး သင်ပေးစရာ လိုနေလို့လဲ။]

[ထန်ဆန်းကို သီအိုရီ ဗဟုသုတတွေ သင်ပေးဖို့ ကိစ္စမှာဆိုရင်လည်း ထန်ဟောက်အနေနဲ့ ထန်ဆန်းကို ဟောက်ထျန်းဂိုဏ်းဆီ စောစောစီးစီး ပြန်ခေါ်သွားဖို့သာ ဆန္ဒရှိခဲ့မယ်ဆိုရင် အမြွှာဝိညာဉ်တွေကို ထုတ်ပြပြီး ကိုယ့်အမှားကိုယ် ရိုးသားစွာ ဝန်ခံလိုက်ရုံပါပဲ။ ဒါဆို ဟောက်ထျန်းဂိုဏ်းက အကြီးအကဲတွေက အမြွှာဝိညာဉ် ပိုင်ဆိုင်ထားတဲ့ ဒီပါရမီရှင်လေးကို ပြုစုပျိုးထောင်ပေးဖို့ သေချာပေါက် အစွမ်းကုန် ကြိုးပမ်းကြမှာပဲ။ ဒါ့အပြင် ဟောက်ထျန်းဂိုဏ်းရဲ့ ဂိုဏ်းချုပ်က ထန်ဆန်းရဲ့ ဦးလေးလေ။]

[ဒါကြောင့် သီအိုရီ ဗဟုသုတဆိုတာ လုံးဝ ပြဿနာ မဟုတ်ဘူး။ အဆိုးဆုံး အခြေအနေမှာတောင် ထန်ဆန်းက ကျောင်းတော်တစ်ခုကနေတစ်ဆင့် တိုက်ကြီးနဲ့ ပတ်သက်တဲ့ သီအိုရီ ဗဟုသုတတွေကို ဖြည်းဖြည်းချင်း လေ့လာသင်ယူလို့ ရတာပဲလေ။ ယွီရှောင်ကန်း မရှိဘူးဆိုရင်တောင် ထန်ဆန်းရဲ့ အနာဂတ်အတွက် ထန်ဟောက်က သေချာပေါက် လှုပ်ရှားပေးမှာပဲ။]

ဒိုင်ယာရီထဲမှ စူးမင်၏ သုံးသပ်ချက်များကို ကြည့်ကာ အမျိုးသမီးဇာတ်ဆောင်များက အလွန် သဘာဝကျလှသည်ဟု ခံစားမိကြသည်။ အကယ်၍ ယွီရှောင်ကန်းအနေဖြင့် မိမိကိုယ်ကို တကယ် သက်သေပြချင်သည်ဆိုပါက ပါရမီရှင်တစ်ယောက်ကို အောင်မြင်လာအောင် ပြုစုပျိုးထောင်ပေးရန် မရှာဖွေသင့်ပေ။

အဘယ်ကြောင့်ဆိုသော် ဤပါရမီရှင်များမှာ သူ မပါလျှင်ပင် အနာဂတ်၌ အလွန်မြင့်မားသော အောင်မြင်မှုများကို ရရှိနိုင်စွမ်း ရှိကြသောကြောင့်ပင် ဖြစ်လေသည်။

[အမြွှာဝိညာဉ် ပိုင်ဆိုင်ထားတဲ့ ဘီဘီတုန်းလိုမျိုးပေါ့။ ဘီဘီတုန်းက ဝိညာဉ်နန်းတော်ရဲ့ အရင်းအမြစ်တွေ အားလုံးကို ချုပ်ကိုင်ထားပြီး ဘွဲ့ရတုံလော် အဆင့်ကိုလည်း ရောက်ရှိထားတဲ့အပြင် အမြွှာဝိညာဉ်တွေကြားက ပဋိပက္ခ ပြဿနာကို ဘယ်လိုဖြေရှင်းရမလဲဆိုတာ ကိုယ်တိုင် သုတေသန လုပ်ခဲ့တာပဲ။ နောက်ပိုင်းမှာ ထန်ဆန်းရဲ့ အမြွှာဝိညာဉ် ပဋိပက္ခ ပြဿနာကို ဖြေရှင်းနိုင်ဖို့ ယွီရှောင်ကန်းက ဝိညာဉ်နန်းတော်ကို ပြေးသွားပြီး ဘီဘီတုန်းနဲ့ တွေ့ခွင့်တောင်းခဲ့တာ မတွေ့ဘူးလား။]

[ယွီရှောင်ကန်းမှာ တကယ် အရည်အချင်းရှိတယ်ဆိုရင် အရှက်မရှိ ဘီဘီတုန်းဆီ သွားတောင်းဆိုနေမယ့်အစား ဒီပြဿနာကို ဖြေရှင်းဖို့ နည်းလမ်းကို ကိုယ်တိုင် ရှာဖွေသင့်တာပေါ့။]

အမျိုးသမီးဇာတ်ဆောင်များကလည်း တကယ်လို့ ယွီရှောင်ကန်းအနေဖြင့် ကိုယ်တိုင်ကိုယ်ကျ သက်သေပြချင်သည်ဆိုပါက သူ့လိုမျိုးတူတဲ့ ပါရမီနည်းပါးသော တပည့်တစ်ယောက်ကို လက်ခံပြီး အောင်မြင်လာအောင် ပြုစုပျိုးထောင်ပေးသင့်သည်၊ သို့မဟုတ် သူ၏ ကိုယ်ပိုင်စွမ်းအားကို အဆင့် (၂၉) မှ ကျော်လွန်အောင် ချိုးဖောက်ဝင်ရောက်ပြီး ကျင့်ကြံခြင်း၌ အသုံးမကျသူ ဟူသော နာမည်ဆိုးကို ဖယ်ရှားပစ်သင့်သည်ဟု ခံစားမိကြသည်။ ထိုသို့ လုပ်ဆောင်နိုင်မှသာ သူကိုယ်သူ တကယ် သက်သေပြနိုင်မည် မဟုတ်ပါလော။