အခန်း ၃၅ - တရားစီရင်ခြင်းကို အကောင်အထည်ဖော်ခြင်း
ဒုန်း!
လမ်းမပေါ်မှ အလွန်ပြင်းထန်သော ပေါက်ကွဲသံကြီးတစ်ခု ထွက်ပေါ်လာသည်။
"မွန်းစတား... မွန်းစတားကြီး! အားလုံး ပြေးကြတော့!"
"မြန်မြန်... သူရဲကောင်းအသင်းကို အကြောင်းကြားလိုက်ကြ!"
လမ်းသွားလမ်းလာများသည် အော်ဟစ်ခြောက်ခြားကာ အရပ်မျက်နှာအနှံ့ ထွက်ပြေးကုန်ကြသည်။
"အလိုရမ္မက်တွေနဲ့ ပြည့်နှက်နေတဲ့ လူသားတွေ... တရားစီရင်ခြင်းကို ခံယူကြစမ်း!"
လမ်းမကြီးတစ်ခုလုံး တုန်ခါအက်ကွဲသွားသည်။ ရုတ်တရက် မှောင်မည်းနေသော မြေအောက်ထဲမှ လက်နှစ်ဖက် ထွက်ပေါ်လာပြီး လမ်းဘေးဝဲယာကို အားပြုကာ ဆုပ်ကိုင်လိုက်သည်။ ထို့နောက် မြေအောက်တွင် ပုန်းကွယ်နေသော မွန်းစတားသည် အားကန်၍ ခုန်တက်လာကာ လမ်းမပေါ်သို့ ဘုန်းခနဲ မြေခလျက် ကျရောက်လာသည်။
ထိုမွန်းစတားတွင် မျက်နှာလေးခုရှိပြီး နွားလားဥဿဘကဲ့သို့ သန်မာတောင့်တင်းသော ခန္ဓာကိုယ် ရှိသည်။ ၎င်းသည် ပေါ်လာသည်နှင့်တစ်ပြိုင်နက် "လောဘကြီးတဲ့ လူသားတွေ... အကုန် သေကြစမ်း!" ဟု အော်ဟစ်ကာ လမ်းမပေါ်တွင် စတင်သောင်းကျန်းပါတော့သည်။
ဂွပ်!
ကောင်းကင်ယံမှ အနက်ရောင်အရိပ်တစ်ခု ဆင်းသက်လာပြီး လက်သီးတစ်ချက်တည်းဖြင့် ထိုမွန်းစတားကို လွင့်ထွက်သွားစေသည်။
"ဒီနေရာက... လူသားတွေရဲ့ နယ်မြေပဲ။ မင်းကို ဒီမှာ လာသောင်းကျန်းခွင့် မပေးနိုင်ဘူး!"
အဆောက်အအုံ ခေါင်မိုးပေါ်တွင် မြင့်မားမတ်တောင့်သော အရွယ်အစား၊ လွင့်မျောနေသော ရွှေရောင်ဆံပင်နှင့် လေးထောင့်ကျကျ မျက်နှာပိုင်ရှင် အမျိုးသားတစ်ဦး ရပ်နေသည်။ သူ၏ ရင်ဘတ်တွင် ခြိမ်းခြောက်မှုအပြည့်ရှိသော ဆုတံဆိပ်ပုံစံ အမာရွတ်သုံးကြောင်းရှိနေပြီး ပြန်ထလာသော မွန်းစတားကို အေးစက်စွာ စိုက်ကြည့်နေသည်။
"မင်းက ‘King’ လား? ငါ မင်းကို သိတာပေါ့... လူသားတွေထဲမှာ အသန်မာဆုံး သူရဲကောင်းပဲ။" မွန်းစတားသည် ခုနစ်မီတာ၊ ရှစ်မီတာခန့် မြင့်မားလာသည်အထိ မတ်တတ်ရပ်လိုက်ပြီး ခေါင်မိုးပေါ်ရှိ ဝမ်ဖုန်းနှင့် မျက်လုံးချင်း ဆုံလိုက်သည်။ "ငါ ဘယ်သူလဲဆိုတာ မင်းသိလား? ဟဲဟဲ... ငါက ကမ္ဘာမြေရဲ့ စိတ်ဆန္ဒကနေ ငှားရမ်းထားတဲ့..."
"စကားတွေ အများကြီး ပြောမနေနဲ့။ မင်းရဲ့ နောက်ခံကို ငါ သိစရာမလိုဘူး။ လူသားတွေကို ရန်ပြုဖို့ ကြံစည်တဲ့သူမှန်သမျှ သေထိုက်တယ်ဆိုတာပဲ ငါသိတယ်!"
ဝမ်ဖုန်း၏ မျက်လုံးများ ပွင့်လာပြီး စူးရှသော အရောင်အဝါများ လက်ခနဲ ဖြစ်သွားသည်။ သူသည် အဆောက်အအုံ ပျက်စီးသွားသည်အထိ ခေါင်မိုးကို အားပြင်းပြင်း နင်းကန်ကာ ရှေ့သို့ ခုန်ဝင်လိုက်သည်။ သူ၏ လက်သီးကို မြှောက်လျက် မွန်းစတားဆီသို့ အားကုန် လွှဲရိုက်လိုက်တော့သည်။
"မောက်မာလှချည်လား!"
မွန်းစတားသည် ဒေါသတကြီး ဟိန်းဟောက်လိုက်ပြီး ရှောင်တိမ်းခြင်း လုံးဝမရှိဘဲ ဝမ်ဖုန်းနှင့် အပြန်အလှန် တိုက်ခိုက်ပါတော့သည်။ တစ်ယောက်က လက်သီးနှင့်ထိုး၊ တစ်ယောက်က ခြေထောက်နှင့်ကန်လျက် ပြင်းထန်သော တိုက်ခိုက်မှုများကို အပြန်အလှန် ပြုလုပ်နေကြပြီး မည်သူကမျှ အလျှော့ပေးမည့်ပုံမပေါ်ပေ။
ခဏအတွင်းမှာပင် နှစ်ယောက်စလုံး ဒဏ်ရာများဖြင့် ပြည့်နှက်သွားသည်။
ဒုန်း!
နောက်ဆုံးတွင် ဝမ်ဖုန်းသည် မွန်းစတား၏ အမာရွတ်များရှိသော ခေါင်းကို လက်သီးဖြင့် အားကုန်ထိုးကာ အလဲသိပ်လိုက်သည်။ ထို့နောက် နှလုံးသားကို ဖောက်ထွက်သွားသည်အထိ အားပါးတရ နင်းခြေပစ်လိုက်ရာ မွန်းစတားမှာ ချက်ချင်းပင် အသက်ပျောက်သွားတော့သည်။
"ဟွန်း!"
ဝမ်ဖုန်းက အေးစက်စွာ နှာခေါင်းရှုံ့လိုက်ပြီး နောက်ပြန်ဂျွမ်းထိုးကာ ခေါင်မိုးပေါ်သို့ တည်ငြိမ်စွာ ဆင်းသက်လိုက်သည်။ သူသည် သေဆုံးသွားသော မွန်းစတားကို ဧကရာဇ်တစ်ပါးကဲ့သို့ အထက်စီးမှ ငုံ့ကြည့်နေပြီး မျက်နှာမှာလည်း မထီမဲ့မြင်ပြုမှုများဖြင့် ပြည့်နှက်နေသည်။ သူက မွန်းစတား၏ အလောင်းပေါ်သို့ တံတွေးဖြင့် ထွေးလိုက်ရင်း - "ထွီ... အမှိုက်ကောင်!"
ဒါပေမဲ့ အဲဒီနောက်မှာတော့...
ဘုန်း!
သူ၏ တံတွေး မြေပြင်ပေါ်သို့ ကျသွားပြီးနောက် အဏုမြူဗုံး ပေါက်ကွဲသလိုမျိုး အကြီးအကျယ် ပေါက်ကွဲသွားပါတော့သည်။ ဝမ်ဖုန်း အပါအဝင် ပတ်ဝန်းကျင် တစ်ခုလုံး ပေါက်ကွဲမှုအတွင်း နစ်မြုပ်သွားခဲ့သည်။ ထိုကြီးမားသော ပေါက်ကွဲမှုကြီးအပြီးတွင် ပတ်ဝန်းကျင် မိုင်ပေါင်း ရာနှင့်ချီ၍ လုံးဝ ပျောက်ကွယ်သွားခဲ့ရသည်။
‘King’ သေဆုံးသွားပါပြီ!
နောက်ခံစကားပြော - "မြေပေါ်မှာ တံတွေးထွေးတာက သေးငယ်တဲ့ ကိစ္စလို့ ထင်ရပေမဲ့ အကျိုးဆက်ကတော့ အရမ်းပြင်းထန်ပါတယ်။ ကိုယ်ကျင့်တရားကောင်းတဲ့ သူရဲကောင်းတစ်ယောက်ဖြစ်ဖို့ဆိုတာ မင်းနဲ့ ငါကနေ စတင်ရမှာပါ။ ကျေးဇူးပြုပြီး ‘King’ ရဲ့ ‘ထွီ’ ခနဲ ထွေးတာကို အတုမယူကြပါနဲ့!"
...
ရက်အနည်းငယ် ကုန်လွန်သွားပြီးနောက် ဝမ်ဖုန်း ရိုက်ကူးထားသည့် သူရဲကောင်း ပြည်သူ့အကျိုးပြု ကြော်ငြာကို မြို့ကြီးများရှိ ရင်ပြင်များနှင့် ရုပ်မြင်သံကြားဌာနများတွင် တရားဝင် ထုတ်လွှင့်ပြသခဲ့သည်။
"ဝိုး... အဲဒါ ‘King’ ရဲ့ ‘သူရဲကောင်းရဲ့ ပါးစပ်အမြောက်’ လား? အရမ်းလန်းတာပဲ။" လမ်းမပေါ်ရှိ ကလေးအချို့သည် ဝမ်ဖုန်း၏ "ချဉ်ဖတ်" တံတွေးတစ်ချက်ဖြင့် မြို့တစ်ဝက်နီးပါး ပျက်စီးသွားသည်ကို အားကျတကြီး ကြည့်နေကြသည်။
"ဟေး... မင်းက မွန်းစတားပဲ၊ ငါ့ရဲ့ အစွမ်းထက်လှတဲ့ ‘သူရဲေကာင်းရဲ့ ပါးစပ်အမြောက်’ ကို ကြည့်စမ်း... အား... ထွီ!"
"မင်းတစ်ယောက်တည်း လုပ်တတ်တယ် မထင်နဲ့၊ ငါလည်း လုပ်တတ်တယ်။ ‘King’ စတိုင် ချီစွမ်းအား လျှို့ဝှက်ချက် — ‘သူရဲေကာင်းရဲ့ ပါးစပ်အမြောက်’... ထွီ... ထွီ...ထွီ!"
"..."
ဝမ်ဖုန်းသည် ထိုကလေးများ တစ်ယောက်ကိုတစ်ယောက် ပျော်ပျော်ပါးပါး တံတွေးနှင့် ထွေးနေကြသည်ကို ဖြတ်လျှောက်ရင်း မြင်လိုက်ရသောအခါ ပါးစပ်မှာ တုန်ခါသွားသည်။ ဒီကြော်ငြာရဲ့ ရည်ရွယ်ချက်က ဘာလဲ? လူတွေကို မြေပေါ်မှာ တံတွေးမထွေးဖို့ သင်ပေးရမှာ မဟုတ်ဘူးလား? ဘာလို့ ပြောင်းပြန်အကျိုးသက်ရောက်မှုတွေ ဖြစ်နေရတာလဲ?
ဒါက မစ္စတာ ဆစ်ချ် က သူ လူမိုက်တွေကို ပညာပေးလိုက်တာကို ကြည့်ပြီး စဉ်းစားမိတဲ့ ကိုယ်ကျင့်တရားဆိုင်ရာ ကြော်ငြာစိတ်ကူးတစ်ခုပါ။ အကြောင်းအရာက တကယ်တော့ အတော်လေး ကောင်းမွန်ပေမဲ့ ရလဒ်ကတော့... သူသည် တံတွေးနှင့် ဆော့ကစားနေသည့် ကလေးဆိုးလေးများကို တစ်ချက်ကြည့်ကာ ရယ်မောလိုက်မိသည်။
"ဟူး... ဒါက ငါနဲ့တော့ လုံးဝ မဆိုင်ဘူးနော်။ ငါက ယဉ်ကျေးတဲ့ ပြည်သူတစ်ယောက်ပါ၊ ဘယ်တော့မှ မြေပေါ်မှာ တံတွေးထွေးတာတို့၊ ဆီးသွားတာတို့ မလုပ်ဘူး။"
သူသည် လက်နှစ်ဖက်ကို အိတ်ကပ်ထဲထည့်ကာ တိတ်တဆိတ် ထွက်ခွာသွားခဲ့သည်။ သူ၏ ဗက်ဆင်းမင်း ကတ်ပြားမှာ နှစ်ရက်သာ သက်တမ်းကျန်ပါတော့သည်။ ထိုနှစ်ရက်အတွင်း ဗက်ဆင်းမင်း ကတ်ပြားကို အလဟဿ မဖြစ်စေရန်နှင့် အရန်ခွန်အားအဖြစ် နတ်ဆိုးအဆင့် မွန်းစတားကတ်ပြားတစ်ခုကို ပြန်လည်စုဆောင်းနိုင်ရန်အတွက် နတ်ဆိုးအဆင့် မွန်းစတားတစ်ကောင်ကို ရှာဖွေဖို့ သူ စီစဉ်လိုက်သည်။
တကယ်လို့ နတ်ဆိုးအဆင့် မွန်းစတားကို ရှာမတွေ့ခဲ့ရင်တောင် ဗက်ဆင်းမင်း ကတ်ပြားရဲ့ သက်တမ်းကို တိုးမြှင့်နိုင်ဖို့အတွက် ကျား အဆင့် (သို့မဟုတ်) ဝံပုလွေ အဆင့် မွန်းစတား အချို့ ပေါ်လာဖို့ သူ မျှော်လင့်နေမိသည်။
...
"အေ (A) မြို့မှာ နေထိုင်သူများ သတိပြုရန်၊ အေ မြို့မှာ နေထိုင်သူများ သတိပြုရန်။ သူရဲကောင်းအသင်းမှ အရေးပေါ် အသိပေးချက် - အမ် (M) မြို့သို့ သွားရာလမ်းရှိ ဓာတ်ဆီဆိုင်တွင် နတ်ဆိုးအဆင့် မွန်းစတားတစ်ကောင် ပေါ်ထွက်နေပါသည်။ လက်ရှိတွင် သူရဲကောင်းအသင်းမှ မွန်းစတားကို နှိမ်နင်းရန် သူရဲကောင်းများကို စေလွှတ်နေပြီ ဖြစ်ပါသည်။ မွန်းစတားကို မနှိမ်နင်းနိုင်မီအထိ ကျေးဇူးပြု၍ ဓာတ်ဆီဆိုင်နှင့် ဝေးရာတွင် နေထိုင်ကြပါရန်နှင့် ဘေးကင်းရာ ခိုလှုံရာနေရာများသို့ သွားရောက်ကြပါရန်..."
"အမ် (M) မြို့မှာ နေထိုင်သူများ သတိပြုရန်၊ အမ် မြို့မှာ နေထိုင်သူများ သတိပြုရန်။ သူရဲကောင်းအသင်းမှ အရေးပေါ် အသိပေးချက် - အေ (A) မြို့သို့ သွားရာလမ်းရှိ ဓာတ်ဆီဆိုင်တွင် နတ်ဆိုးအဆင့် မွန်းစတားတစ်ကောင် ပေါ်ထွက်နေပါသည်။ လက်ရှိတွင် သူရဲကောင်းအသင်းမှ မွန်းစတားကို နှိမ်နင်းရန် သူရဲကောင်းများကို စေလွှတ်နေပြီ ဖြစ်ပါသည်။ မွန်းစတားကို မနှိမ်နင်းနိုင်မီအထိ ကျေးဇူးပြု၍ ဓာတ်ဆီဆိုင်နှင့် ဝေးရာတွင် နေထိုင်ကြပါရန်နှင့် ဘေးကင်းရာ ခိုလှုံရာနေရာများသို့ သွားရောက်ကြပါရန်..."
အေ မြို့နှင့် အမ် မြို့၏ မြို့လယ်ခေါင်ရှိ အရေးပေါ်အချက်ပေးသံများက မွန်းစတားသတင်းကို တစ်ပြိုင်တည်း ထုတ်လွှင့်လိုက်ကြသည်။
"ဟိုး!" ထုတ်လွှင့်ချက် ထွက်လာသည်နှင့်တစ်ပြိုင်နက် မြို့နှစ်မြို့လုံးရှိ ပြည်သူများကြားတွင် ရုတ်ရုတ်သဲသဲ ဖြစ်သွားကြသည်။
"နတ်ဆိုးအဆင့် မွန်းစတား ဟုတ်လား?" ဝမ်ဖုန်း၏ နှုတ်ခမ်းများ အနည်းငယ် ကွေးညွှတ်သွားသည်။ ဟဲဟဲ... ငါ လိုချင်နေတာပဲ။
"တက္ကစီ!?" သူက လက်လှမ်းတားကာ တက္ကစီတစ်စီး ငှားလိုက်သည်။ ကားပေါ်တက်ပြီးနောက် တည်ငြိမ်စွာ ပြောလိုက်သည် - "အေ မြို့နဲ့ အမ် မြို့အကြားက ဓာတ်ဆီဆိုင်ကို သွားမယ်။"
"ဗျာ!?" တက္ကစီဒရိုင်ဘာက ထိတ်လန့်တကြား ပြောလိုက်သည် - "ခရီးသည်... အဲဒီဓာတ်ဆီဆိုင်နားမှာ မွန်းစတား ပေါ်နေတယ်ဆိုတာ မသိဘူးလား?"
သူ၏ ဘေ့စ်ဘောဦးထုပ်အောက်မှနေ၍ ဝမ်ဖုန်းက ခပ်ပြုံးပြုံးလေး ပြောလိုက်သည် - "အဲဒါကို သိလို့ပဲ ငါ သွားရမှာပေါ့။"
ဒရိုင်ဘာမှာ ကြောင်သွားပြီး ဝမ်ဖုန်းသည် သူရဲကောင်းတစ်ယောက် ဖြစ်နိုင်သည်ဟု ခန့်မှန်းလိုက်မိသည်။ သူက ဝေခွဲမရစွာဖြင့် မေးလိုက်သည် - "အဲဒီကို ဘာသွားလုပ်မလို့လဲ?"
ဝမ်ဖုန်းက ခေါင်းကို အနည်းငယ် မော့လိုက်ပြီး သူ၏ စူးရှသော မျက်လုံးများကို ပြသလိုက်ကာ အသံဩဩဖြင့် ပြောလိုက်သည် - "တရားစီရင်ခြင်းကို အကောင်အထည်ဖော်ဖို့!"
တက္ကစီဒရိုင်ဘာ၏ မျက်စိသူငယ်အိမ်များ ကျုံ့သွားပြီး တစ်ကိုယ်လုံးရှိ ဆဲလ်များပင် တက်ကြွလာသလို ခံစားလိုက်ရသည်။ ဝမ်ဖုန်း၏ "တရားစီရင်ခြင်းကို အကောင်အထည်ဖော်ဖို့" ဆိုသည့် ရိုးရှင်းသော စကားလုံးက သူ၏ သွေးများကို ချက်ချင်း ဆူပွက်သွားစေသည်။ "ခရီးသည်... မြဲမြဲကိုင်ထားနော်၊ ကျွန်တော် အရှိန် ၂၀၀ နဲ့ မောင်းတော့မယ်။"
ဝူး... !
တက္ကစီသည် အရှိန်အဟုန်ဖြင့် ပြေးထွက်သွားပြီး မကြာမီမှာပင် အရှိန် ၂၀၀ သို့ ရောက်ရှိသွားသည်။ လမ်းကြောင်းတစ်လျှောက် အရှိန်ပြင်းပြင်း မောင်းနှင်ကာ မီးနီ တစ်ဒါဇင်ကျော်ကို ဖြတ်ကျော်လျက် ဓာတ်ဆီဆိုင်ရှိရာသို့ တဟုန်ထိုး မောင်းနှင်သွားပါတော့သည်။
ကျိ... !
မိနစ်အနည်းငယ် ကြာပြီးနောက် တက္ကစီဒရိုင်ဘာက ဝမ်ဖုန်းကို စိတ်လှုပ်ရှားစွာ ပြောလိုက်သည် - "သူရဲကောင်းကြီး... ခင်ဗျားသွားမယ့် နေရာကို ရောက်ပါပြီ။"
"အင်း... သိပြီ။" ဝမ်ဖုန်းက ကားတံခါးကို တွန်းဖွင့်ကာ အပြင်သို့ ထွက်လိုက်ပြီး မလှမ်းမကမ်းရှိ ဓာတ်ဆီဆိုင်ကို စိုက်ကြည့်လိုက်သည်။ ထိုနေရာတွင် လိပ်ခွံနှင့်တူသော မွန်းစတားတစ်ကောင်သည် ကားတစ်စီးကို ကျောပေါ်တွင် ထမ်းထားပြီး ကားထဲသို့ ဓာတ်ဆီများ ဖြည့်သွင်းနေသည်။
"အားလုံးက ဒီမှာတင် အဆုံးသတ်သွားပြီ!" သူက မွန်းစတားဆီသို့ လက်နှစ်ဖက်ကို ဆန့်ထုတ်လိုက်သည်။ ခဏအတွင်းမှာပင် သူ၏ လက်နှစ်ဖက်မှ စွမ်းအင်များ စုစည်းလာပြီး တောက်ပသော အလင်းတန်းများ ထွက်ပေါ်လာသည်။
"ဒါက... ဒါက..." တက္ကစီဒရိုင်ဘာမှာ အံ့အားသင့်လွန်းသဖြင့် စကားပင် မပြောနိုင်တော့ပေ။
"ငရဲမီးလှိုင်းလျှပ်စစ်အမြောက်!"
ဝမ်ဖုန်းက အသံနိမ့်နိမ့်ဖြင့် ဟစ်အော်လိုက်ရာ သူ၏ လက်ထဲမှ အလင်းတန်းများထွက်သွားသည်။ ကင်မရာကို အဝေးသို့ ဆွဲထုတ်ကြည့်လျှင် ကောင်းကင်ယံမှနေ၍ မွန်းစတားဆီသို့ ပြေးဝင်သွားသော မီးလျှံတန်းကြီးကို တွေ့မြင်နိုင်သည်။
ဘုန်း!
မီးလျှံနှင့် မွန်းစတားတို့ ထိမိပြီးနောက် ချက်ချင်း ပေါက်ကွဲသွားပါတော့သည်။ မီးလျှံက မွန်းစတားကို ရှင်းလင်းလိုက်သော်လည်း ဓာတ်ဆီများနှင့် ထိတွေ့သွားသောကြောင့် ဓာတ်ဆီဆိုင်သည်လည်း ပျက်စီးကာ ပေါက်ကွဲသွားပြီး မှိုပွင့်ပုံစံ မီးခိုးလုံးကြီးတစ်ခု တက်လာပါတော့သည်။ မွန်းစတားမှာ ပြာပင်မကျန်အောင် သေဆုံးသွားခဲ့ရသည်။
အဲဒီအချိန်မှာပဲ တီဗီစကရင်က ဖြတ်တောက်သွားပြီး နောက်ခံစကားပြောသံ ထွက်လာပါသည် - "ဓာတ်ဆီဆိုင်အတွင်း ဆေးလိပ်သောက်ခြင်းနှင့် မီးအသုံးပြုခြင်း လုံးဝ ခွင့်မပြုပါ!"
နောက်တစ်နေ့တွင် တက္ကစီဒရိုင်ဘာမှာ ဒဏ်ငွေ သုံးထောင် ပေးဆောင်လိုက်ရသည့်အပြင် ယာဉ်မောင်းလိုင်စင်လည်း သိမ်းဆည်းခံလိုက်ရသည်။
နောက်ခံစကားပြော - "မင်းနဲ့ ငါ၊ ပြီးတော့ တခြားသူတွေရဲ့ ဘေးကင်းလုံခြုံမှုအတွက် ကျေးဇူးပြုပြီး မီးနီမဖြတ်ကြပါနဲ့!"
(အေးပါကွာ ကြော်ငြာရိုက်နေတာတဲ့လား)
...
ဇက် (Z) မြို့တော်၊ လူသူကင်းမဲ့သောဒေသ။ ဆိုင်းတာမသည် သူ၏ အိပ်ရာလိပ်ပေါ်တွင် စောင်းလျက် လဲလျောင်းနေရင်း ပေါင်ကြားကို မသိမသာ ကုတ်ကာ တီဗီကြော်ငြာကို စိုက်ကြည့်ရင်း ရေရွတ်လိုက်သည် - "တရားစီရင်ခြင်းကို အကောင်အထည်ဖော်ဖို့ ဟုတ်လား? အဲဒီစကားစုက တော်တော်လန်းတာပဲ၊ နောက်တစ်ခါ ငါ စမ်းသုံးကြည့်ဦးမယ်။"
ဟေး... ဟေး... ခဏလောက်ပါဦး၊ ဒါက ဓာတ်ဆီဆိုင်မှာ မီးမသုံးဖို့နဲ့ မီးနီမဖြတ်ဖို့ ပြည်သူ့အကျိုးပြု ကြော်ငြာလေဗျာ။ ခင်ဗျားရဲ့ အာရုံစိုက်မှုက မှားနေတယ် မဟုတ်လား? ဪ... ဟုတ်သားပဲ၊ ခင်ဗျားက စက်ဘီးတောင် မဝယ်နိုင်ဘဲ ခြေကျင်ပဲ သွားနေရတဲ့ ဆင်းရဲသားဆိုတော့ ဓာတ်ဆီဆိုင်တွေ၊ မီးနီဖြတ်တာတွေကို ဘယ်ဂရုစိုက်ပါ့မလဲ!