အခန်း ၃ - စကားတစ်ခွန်းကြောင့် ရေတပ်အရာရှိကြီးများ ဒေါသထွက်သွားရခြင်း

ဂါနီကာသည် ဂျေးဂါစီယာ ရော့စ်ကို အကြာကြီး စောင့်ဆိုင်းခွင့် မပြုခဲ့ပေ။ သူက တစ်နာရီဟု ပြောခဲ့သော်လည်း မိနစ်နှစ်ဆယ်အတွင်းမှာတင် ပြန်လည်ရောက်ရှိလာသည်။ ရော့စ် လိုချင်သည့် အချက်အလက်များကို ကမ္ဘာ့အစိုးရက မှတ်တမ်းတင် သိမ်းဆည်းထားပြီးဖြစ်ရာ အချိန်ကုန်သွားသည့် တစ်ခုတည်းသော အပိုင်းမှာ သူ၏အဘိုးဖြစ်သူ အကြီးအကဲငါးပါးထံ အစီရင်ခံတင်ပြရခြင်းသာ ဖြစ်ပြီး ကျန်သည့်ဖိုင်တွဲများ ယူရခြင်းမှာ အချိန်မကြာလှကြောင်း ရော့စ် ရိပ်မိလိုက်သည်။

"သခင် ရော့စ် ဒါက သခင် တောင်းဆိုထားတဲ့ စာရင်းပါခင်ဗျာ။"

ဂါနီကာ့လက်ထဲမှ စာရင်းကို လှမ်းယူပြီးနောက် ရော့စ်သည် အင်ပဲလ်ဒေါင်းမှ စာရင်းကို အရင်ဆုံး ထုတ်ကြည့်လိုက်သည်။ ခရစ်စတယ် ဒရာဂွန်များတွင် အင်ပဲလ်ဒေါင်းမှ အကျဉ်းသားများကို ကျွန်အဖြစ် ဖမ်းဆီးအသုံးချတတ်သည့် အလေ့အထ အမြဲရှိခဲ့သည်။ သူကိုယ်တိုင်လည်း ယခင်က ဤသို့ အကြိမ်အနည်းငယ် ပြုလုပ်ဖူးသည်။ သို့သော် အတိတ်ကာလက သူ ရှာဖွေခဲ့သည်မှာ အပျော်ကစားစရာ အရုပ်များသာဖြစ်ပြီး ယခုအကြိမ်တွင်မူ အသုံးချရမည့် လက်နက်ကိရိယာများကို လိုအပ်နေခြင်း ဖြစ်သည်။

သူသည် အပေါ်ဘက် အကျဉ်းထောင်အဆင့်များကို အမြန်ပင် ကျော်ဖြတ်လိုက်ပြီး အဆင့်တစ်ခုချင်းစီမှ အကျဉ်းသားအချို့၏ နာမည်များကိုသာ လက်ညှိုးထိုးပြကာ ဂါနီကာ့ကို သူ၏ကျွန်အဖြစ် သွားရောက်ဖမ်းဆီးခိုင်းလိုက်သည်။ ဤသူများသည် သူ၏ အခြေခံအင်အားစုများ ဖြစ်လာကြမည်ဖြစ်ပြီး မတူညီသောအဆင့်ရှိ ပင်လယ်ဓားမြများက သူ့ကို မည်မျှလောက် အတွေ့အကြုံ ပေးနိုင်မလဲဆိုသည်ကို စမ်းသပ်ရန် အကောင်းဆုံးအချိန်လည်း ဖြစ်သည်။

သူ စာရင်းကို ဆက်လက်လှန်လှောကြည့်ရှုစဉ် ရော့စ်၏ အာရုံမှာ အောက်ဆုံးအဆင့်ရှိ အကျဉ်းသားစာရင်းဆီသို့ ချက်ချင်း ရောက်ရှိသွားသည်။ လောလောဆယ် သုံးစွဲရန် အင်အားစုများအပြင် သူသည် စွမ်းရည်ထက်မြက်သည့် လက်ထောက်များကိုလည်း လိုအပ်နေသည်။ ပင်လယ်ဓားမြလောကဆိုသည်မှာ တစ်ကိုယ်တော် တိုက်ခိုက်ရုံဖြင့် မပြီးမြောက်နိုင်ချေ။ ဤကမ္ဘာကြီးမှာ အလွန်ကျယ်ပြော လှသည်။ သူသည် ကမ္ဘာ့ဘုရင် ဖြစ်လာလျှင်ပင် ဤမျှကျယ်ပြောလှသော နေရာကြီးကို တစ်ဦးတည်း ထိန်းချုပ်နိုင်မည် မဟုတ်ပေ။

"ရွှေခြင်္သေ့ ရှီကီ၊ ဗာန်းဒီ ဝေါလ်ဒ်၊ ဒေါက်ဂလပ်စ် ဘူးလက်" ရော့စ် ထိုနာမည်များကို ကြည့်ရင်း မျက်ခုံးအနည်းငယ် ပင့်တက်သွားသည်။ ဤစာရင်းတွင် မျှော်လင့်မထားသော အံ့အားသင့်စရာများစွာ ပါဝင်နေသည်။ ဇာတ်လမ်းမစတင်မီ အနှစ် ၂၀ အလိုမှာပင် အင်ပဲလ်ဒေါင်း၌ ပါရမီရှင် အများအပြားကို ဖမ်းဆီးထားပြီး ဖြစ်သည်။ နောက်ထပ် နှစ်အနည်းငယ်ကြာလျှင် ဤစာရင်းဝင်လူဦးရေမှာ ပိုမိုတိုးပွားလာဦးမည်။

သူသည် စာရင်းကို တစ်ချက်မျှသာ ကြည့်ပြီးနောက် ပြန်ချထားလိုက်သည်။ လောလောဆယ်တွင် ဤမျှကြည့်ရုံဖြင့် လုံလောက်ပြီဖြစ်ပြီး မည်သူ့ကိုမျှ သွားရောက်ခေါ်ယူရန် အစီအစဉ်မရှိသေးပေ။ အင်ပဲလ်ဒေါင်း၏ အောက်ဆုံးအဆင့်တွင် ရှိနေသော အကျဉ်းသားများသည် အမှန်တကယ်ပင် သန်မာကြသော်လည်း မည်သူမျှ လွယ်လွယ်ကူကူ ကိုင်တွယ်နိုင်မည့်သူများ မဟုတ်ကြချေ။ ၎င်းတို့ထဲတွင် ခရစ်စတယ် ဒရာဂွန်များကိုပင် သတ်ဖြတ်ဝံ့သူများစွာ ရှိနေသည်။ မိမိကိုယ်ကိုယ် ကာကွယ်နိုင်မည့် ခွန်အားမရှိဘဲ ၎င်းတို့ကို ဆင့်ခေါ်လိုက်ပါက အန္တရာယ်ရှိနိုင်သည်။ သူ၏ စွမ်းအားများ ပိုမိုကြီးမားလာမည့် အချိန်အထိ စောင့်ဆိုင်းရမည်ဖြစ်ပြီး ထိုအချိန်ကျမှ ၎င်းတို့ကို နှိမ်နင်း သိမ်းပိုက်ရခြင်းမှာ ပိုမိုလွယ်ကူပေလိမ့်မည်။

ရော့စ်သည် ဘေးနားရှိ ရေတပ်စာရင်းကို ကောက်ကိုင်ကာ ပိုမိုသေချာစွာ ဖတ်ရှုလိုက်သည်။ မိမိကိုယ်မိမိ ကောင်းစွာသိတတ်သူ ဖြစ်သဖြင့် သူသည် ကနဦးကတည်းက ရေတပ်မှ လူများကို အရင်ဆုံး စည်းရုံးသိမ်းသွင်းရန် စီမံထားပြီးဖြစ်သည်။ လွတ်လပ်မှုကို မြတ်နိုးသည့် ပင်လယ်ဓားမြများနှင့် ယှဉ်လျှင် တရားမျှတမှုနှင့် စည်းစနစ်ကို လိုက်နာသည့် ရေတပ်မှာ အငြင်းပွားဖွယ်မရှိဘဲ ပိုမိုကောင်းမွန်သော ရွေးချယ်မှု ဖြစ်သည်။ ၎င်းတို့၏ တရားမျှတမှုမှာ ပုပ်သိုး ပျက်စီးနေသည်ဖြစ်စေ၊ အကြွင်းမဲ့ တရားမျှတမှု ဖြစ်စေကာမူ ရေတပ်အဖွဲ့ဝင်များသည် အနည်းဆုံးတော့ စည်းကမ်းလိုက်နာကြသဖြင့် ၎င်းတို့ကို စည်းရုံးရန် ပိုမိုလွယ်ကူပြီး မိမိနှင့်အတူ ပူးပေါင်းလုပ်ဆောင်ရန် အခွင့်အလမ်း ပိုများသည်။

ဆာကာဇူကိ၊ ကူဇန်၊ ဆုရု ၊ ဂါ့ပ် စသည့် သွားရည်ကျစရာ ကောင်းလှသော အထက်တန်းစား နာမည်ကြီးများကို ကျော်ဖြတ်ပြီးနောက် ရော့စ်၏ အကြည့်မှာ စာရင်း၏ အောက်ခြေနားတွင် ရပ်တန့်သွားသည်။

ရေတပ် အထူးလေ့ကျင့်ရေးစခန်း ကျောင်းဆင်းစာရင်း

ဂီအွန်၊ တိုကီကာကဲ၊ အိုနီဂုမို

‘ဒီလူအနည်းငယ်က အနာဂတ်မှာ ကြီးမားတဲ့ အလားအလာ ရှိပုံရတယ်။ နောင်မှာ အဓိက စစ်အင်အားတွေ ဖြစ်လာမယ့်သူတွေ အနေနဲ့ တော်တော်လေး ကောင်းမွန်တယ်။ ပြီးတော့ သူတို့က အခုမှ ကျောင်းဆင်းခါစ ဆိုတော့ သွန်သင်ရတာ ပိုပြီး လွယ်ကူလိမ့်မယ်။’ ရော့စ် မေးစေ့ကို ပွတ်သပ်ရင်း စဉ်းစားနေမိသည်။

‘‘ပန်းရောင်ယုန်’ ဂီအွန်နဲ့ ‘ဝက်ညို’ တိုကီကာကဲတို့ဟာ အနာဂတ်မှာ ရေတပ်ဗိုလ်ချုပ်ကြီး လျာထားခံရမယ့်သူတွေ ဖြစ်လာကြလိမ့်မယ်။ သူတို့ရဲ့ ခွန်အားက S အဆင့်အထိ မရောက်နိုင်ရင်တောင် အနည်းဆုံးတော့ A အဆင့် ရှိလိမ့်မယ်။’

‘အိုနီဂုမိုကတော့ နောက်ပိုင်းမှာ ထူးချွန်တဲ့ ဒုတိယဗိုလ်ချုပ်ကြီး ဖြစ်လာမှာဆိုတော့ သူ့ရဲ့ ခွန်အားက အနည်းဆုံး B+ အဆင့် ရှိမှာပဲ၊ ဒါက ဂါနီကာထက်တောင် ပိုပြီး သန်မာသေးတယ်။’

ခဏမျှ စဉ်းစားပြီးနောက် ရော့စ်၏ စိတ်ထဲတွင် အစီအစဉ်တစ်ခု ပေါ်လာခဲ့သည်။

"ဂါနီကာ၊ အထက်လူကြီးတွေကို ဆက်သွယ်လိုက်။ ငါ့ရဲ့ လက်ရှိကျွန်တွေက သိပ်ပြီး အားနည်းလွန်းတယ်လို့ ပြောလိုက်။ အင်ပဲလ်ဒေါင်းရဲ့ အဆင့် ၆ ထဲက လူအချို့ကို သွားခေါ်ပေးမလား၊ ဒါမှမဟုတ် ရေတပ်ဗိုလ်ချုပ်ကြီး တစ်ယောက်ယောက်ကို ငါ့ရဲ့ ကိုယ်ရံတော်အဖြစ် တာဝန်ပေးမလား ဆိုတာကို ရွေးခိုင်းလိုက်" ဟု ရော့စ်က ငြင်းပယ်ရန်မလိုသော လေသံဖြင့် ရဲရဲဝံ့ဝံ့ အမိန့်ပေးလိုက်သည်။

"ဗျာ? အမိန့်အတိုင်း ဆောင်ရွက်ပါ့မယ်!"

ဂါနီကာ အံ့ဩမှင်သက်သွားပြီးနောက် မတတ်သာဘဲ ပြန်လည်ဖြေကြားသည်ကို မြင်လိုက်ရသဖြင့် ရော့စ် စိတ်ထဲမှသာ ခေါင်းခါမိတော့သည်။

‘ဟဲဟဲ၊ သူက ငယ်သေးတာပဲ။ ခရစ်စတယ် ဒရာဂွန်တွေအကြောင်း ကောင်းကောင်း မသိသေးပုံရတယ်။’

အကယ်၍ သူသာ စာရင်းထဲမှ လူသစ်အချို့ကိုသာ အောက်ကျနောက်ကျ တောင်းဆိုခဲ့ပါက ဂျေးဂါစီယာ စေတန်သည် သူ ဉာဏ်ရည်ပြောင်းလဲသွားပြီဟု ထင်မှတ်ပေလိမ့်မည်။ အခြား ခရစ်စတယ် ဒရာဂွန်များကလည်း အသက်ကြီးလာလေ ဥာဏ်ဖျင်းလာလေဟု သရော်ကြပေလိမ့်မည်။ ခရစ်စတယ် ဒရာဂွန်များက ရေတပ်ဗိုလ်ချုပ်ကြီးများကို အမိန့်ပေး စေခိုင်းခြင်းမှာ ပုံမှန်လုပ်ရိုးလုပ်စဉ်သာ ဖြစ်သည်။ ဤပြဿနာများကို ရှောင်ရှားရန်အတွက် သူသည် စစ်မှန်သော ခရစ်စတယ် ဒရာဂွန်တစ်ဦး၏ လေသံဖြင့် ပြောဆိုရမည် ဖြစ်သည်။ ထို့ကြောင့်လည်း ကမ္ဘာ့အစိုးရသည် နှစ်ပေါင်း ၈၀၀ လုံးလုံး ခရစ်စတယ် ဒရာဂွန်တို့၏ အဆင့်အတန်းကို စဉ်ဆက်မပြတ် မြှင့်တင်ပေးခဲ့ပြီး ထိုကဲ့သို့သော ယုံကြည်မှုကို ပေးခဲ့ခြင်း ဖြစ်သည်။

ခရစ်စတယ် ဒရာဂွန်များကို နောက်ဆုံးအကြိမ် စိန်ခေါ်ဝံ့ခဲ့သူမှာ ရော့ခ်စ် ဖြစ်ပြီး သူသည် လွန်ခဲ့သော နှစ်ပေါင်းများစွာက ပင်လယ်ပြင်တွင် အသန်မာဆုံး ပုဂ္ဂိုလ်ဖြစ်ခဲ့သည်။ ယခုအချိန်တွင်မူ သူ၏ ဂူပေါ်က မြက်ပင်များပင် မီတာအတော်များများ မြင့်နေလောက်ပြီ ဖြစ်သည်။ လူဖီ ပင်လယ်ပြင်သို့ မထွက်ခွာမီအထိ ခရစ်စတယ် ဒရာဂွန်တို့၏ အုပ်ချုပ်မှုမှာ ကျောက်ဆောင်ကဲ့သို့ ခိုင်မာနေပြီး မည်သူမျှ စိန်ခေါ်ဝံ့ခြင်း မရှိကြချေ။

"မင်းက ဘယ်လို ပုံစံဖြစ်နေတာလဲ။ အူကြောင်ကြောင်နဲ့ ရပ်မနေနဲ့" ဂါနီကာ တွန့်ဆုတ်နေသည်ကို မြင်သဖြင့် ရော့စ် မျက်မှောင်ကုတ်လိုက်သည်။ ‘ငါ့ရဲ့ ကိုယ်ပိုင်အဘိုးဆီကို သတင်းစကား ပါးခိုင်းတာပဲကို။ ဘာလို့ ဒီလောက်တောင် ကြာနေရတာလဲ။’ ရော့စ်သည် ဂါနီကာ့နေရာတွင် အခြားသူတစ်ဦးကို အစားထိုးရန် စတင်စဉ်းစားနေပြီ ဖြစ်သည်။ မျှော်လင့်ထားသည့်အတိုင်းပင် မိမိကိုယ်တိုင် သင်ကြားမွေးမြူထားခြင်း မဟုတ်သော လူများသည် အနည်းငယ် လိုအပ်ချက် ရှိနေတတ်သည်။

"ဟာ! ဟုတ်ကဲ့ပါ! သခင် ရော့စ်၊ ကျွန်တော် အခုချက်ချင်း သွားရောက် ဆောင်ရွက်ပါ့မယ်!" ဂါနီကာ မဆိုင်းမတွဘဲ အလျင်အမြန် ပြန်လည်ဖြေကြားလိုက်သည်။

‘ဒီနေ့က ခရစ်စတယ် ဒရာဂွန်ရဲ့ အရေးကိစ္စတွေကို ငါ စတင်တာဝန်ယူရတဲ့ ပထမဆုံးနေ့ပဲ။ အခက်အခဲတွေ ရှိမယ်လို့ တွေးထားပေမဲ့ ဒီလောက်အထိ ဖြစ်လာလိမ့်မယ်လို့ မထင်ထားမိဘူး။’

‘အင်ပဲလ်ဒေါင်းရဲ့ အဆင့် ၆ က အကျဉ်းသားတွေကို ကျွန်အဖြစ် ထုတ်ပေးဖို့ အထက်လူကြီးတွေနဲ့ ညှိနှိုင်းရမှာဖြစ်သလို၊ ဒါမှမဟုတ် ရေတပ်ဗိုလ်ချုပ်ကြီး တစ်ယောက်ကို သခင် ရော့စ်ရဲ့ ကိုယ်ရံတော်အဖြစ် ခန့်အပ်ပေးဖို့ ဆိုတာတွေက ဘယ်လိုမှ မဖြစ်နိုင်တဲ့ ကိစ္စတွေပဲ။’

‘အကယ်လို့ ငါသာ ပျက်ကွက်ခဲ့ရင် သခင် ရော့စ်က ငါ့ကို ဧကန်မုချ သတ်ပစ်လိမ့်မယ်။’

‘ဒါက စီပီဇီးရိုး (ကမ္ဘာ့အစိုးရ၏ အမြင့်ဆုံးလျှို့ဝှက်ထောက်လှမ်းရေးအဖွဲ့) အေးဂျင့်တစ်ယောက်အနေနဲ့ ငါ့ရဲ့ ပထမဆုံး အလုပ်လုပ်တဲ့နေ့ပဲ။ အဆင်ပြေပါစေ’

သူ၏ စိတ်ထဲတွင် ရှုပ်ထွေးဆောက်တည်ရာမရ ဖြစ်နေရင်း ဂါနီကာသည် ရေတပ်ဌာနချုပ် ဦးစီးချုပ်၏ ဒန်ဒန်မူရှီ (တယ်လီဖုန်းခရု ) ကို ဆက်သွယ်လိုက်သည်။ လေ့ကျင့်ရေးကာလအတွင်း သူသည် နောင်လာမည့် မစ်ရှင်များအတွက် ရေတပ်ဌာနဆိုင်ရာ အကြီးအကဲများအားလုံး၏ ဆက်သွယ်ရန် အချက်အလက်များကို ရရှိထားပြီးဖြစ်သည်။ အနည်းဆုံးတော့ ကမ္ဘာ့အစိုးရ၏ အမြင်တွင် စီပီဇီးရိုးသည် ရေတပ်ထက် အဆင့်အတန်း ပိုမိုမြင့်မားသည်။

ရေတပ်ဌာနချုပ် မာရင်းဖို့ဒ်၊ အမြင့်ဆုံးအဆင့် အစည်းအဝေးခန်းမ

ထိုအချိန်တွင် အစည်းအဝေးခန်းမအတွင်း၌ ဘတ်စတာကော ဆင်နွှဲရန် ဖြစ်နိုင်ခြေ ရှိမရှိကို ဆွေးနွေးနေကြသော်လည်း ရုတ်တရက် ဒန်ဒန်မူရှီ (တယ်လီဖုန်းခရု ) မြည်လာသဖြင့် အစည်းအဝေး ရပ်တန့်သွားခဲ့သည်။

ရေတပ်ဦးစီးချုပ် ကွန်သည် ကတ်ကြေးကုတ်ကေစတိုင် ဆံပင်ပုံစံရှိပြီး ထွားကျိုင်း သန်မာသော အလယ်အလတ်အရွယ် အမျိုးသားတစ်ဦး ဖြစ်သည်။ သူသည် စီပီဇီးရိုး၏ အထူးလိုင်းမှ ဖုန်းခေါ်ဆိုမှုဖြစ်ကြောင်း သိလိုက်ရသောအခါ သူ၏မျက်နှာထက်မှ မကျေနပ်မှုများကို ချက်ချင်းဖျောက်ဖျက်လိုက်ပြီး နွေးထွေးသော အပြုံးတစ်ခုဖြင့် အစားထိုးလိုက်သည်။ သူသည် သူ၏လက်အောက်ငယ်သားများကို ကမ္ဘာ့အစိုးရထံမှ ဖုန်းခေါ်ဆိုမှုဖြစ်ကြောင်း မျက်ရိပ်ပြလိုက်ပြီးနောက် ဖုန်းကို ပြတ်ပြတ်သားသားပင် ကိုင်လိုက်သည်။ ကွန်သည် ဤဖုန်းခေါ်ဆိုမှုမှာ ဘတ်စတာကောနှင့် ပတ်သက်လိမ့်မည်ဟု ယူဆထားသဖြင့် အခြားသူများကို ဖုံးကွယ်ထားရန် မလိုဟု ထင်မှတ်ထားခြင်း ဖြစ်သည်။

"မိုရှီမိုရှီ၊ ဒါက ရေတပ်ဌာနချုပ် ဖြစ်ပါတယ်။ ငါကတော့ ရေတပ်ဦးစီးချုပ် ကွန် ဖြစ်ပါတယ်!"

အစည်းအဝေး တက်ရောက်နေကြသော ရေတပ်အရာရှိကြီးများသည် ကွန်၏ ထူးခြားသော မျက်နှာအမူအရာကို မြင်သောအခါ မတူညီသော တုံ့ပြန်မှုများ ရှိကြသည်။ ရေတပ်ဗိုလ်ချုပ်ကြီး ဆင်းဂိုကု နှင့် ဒုတိယဗိုလ်ချုပ်ကြီး ဆုရု တို့သည် မကျေမနပ်ဖြစ်ကာ မျက်မှောင်အနည်းငယ် ကုတ်လိုက်ကြသည်။ ရေတပ်သူရဲကောင်း ဂါ့ပ်ကမူ အစည်းအဝေးရော ဖုန်းခေါ်ဆိုမှုပါ သူ့နှင့်မသက်ဆိုင်သကဲ့သို့ မုန့်လုံးများကို အေးအေးလူလူ စားသောက်နေသည်။

ဒုတိယဗိုလ်ချုပ်ကြီး ဆာကာဇူကိ က ကွန်ကို တစ်ချက်ကြည့်လိုက်ပြီးနောက် စားပွဲပေါ်ရှိ ဘတ်စတာကော ဆိုင်ရာ စာရွက်စာတမ်းများဆီသို့ အကြည့်ကို ချက်ချင်း ပြန်လည်ရွှေ့ပြောင်းလိုက်သည်။ ဗိုလ်ချုပ်ကြီး ဘော်ဆာလီနို မှာမူ ဂရုမစိုက်ဟန်ဖြင့် သူ၏လက်သည်းများကို တိုက်ချွတ်နေသည်။ သို့သော် သူသည် ဖုန်းထဲမှ ပြောဆိုမည့်အကြောင်းအရာကို စိတ်ဝင်စားသည့်အလား ကိုယ်ကို အနည်းငယ် မတ်လိုက်သည်။ ကူဇန်၏ မျက်နှာမှာမူ အိုဟာရာကို တိုက်ခိုက်မည့် မစ်ရှင်ကြောင့်လော သို့မဟုတ် မျှော်လင့်မထားသော ဖုန်းခေါ်ဆိုမှုကြောင့်လော မသိရဘဲ တည်တင်းနေခဲ့သည်။

ကွန် စကားပြောပြီးနောက် ဒန်ဒန်မူရှီ (တယ်လီဖုန်းခရု ) ဆီမှ အေးစက်သော အသံတစ်သံ ထွက်ပေါ်လာခဲ့သည် ။

ဒါက ကမ္ဘာ့အစိုးရ စီပီဇီးရိုး ဖြစ်ပါတယ်။ အရှင်မင်းကြီး ရော့စ်ရဲ့ တောင်းဆိုချက်အရ ရေတပ်ဗိုလ်ချုပ်ကြီး ဆင်းဂိုကုကို အရှင်မင်းကြီးရဲ့ ကိုယ်ရံတော်အဖြစ် တာဝန်ထမ်းဆောင်ဖို့ ဒီနေရာကနေ အမိန့်ပေးလိုက်ပါတယ်!"

ထိုစကားလုံးများ ထွက်ပေါ်လာသည့် ခဏ၌ ရေတပ်ဌာနချုပ်ရှိ လူတိုင်း၏ မျက်နှာအမူအရာများ ချက်ချင်း ပြောင်းလဲသွားခဲ့သည်။

ရော့စ်ကိုယ်တိုင်ပင်လျှင် ဂါနီကာ့ကို ဒေါသတကြီးဖြင့် စိုက်ကြည့်လိုက်မိတော့သည်။

‘အမလေး... မင်းက သတ္တိရှိရုံတင် မဟုတ်ပါဘူးလား။ တကယ်ကို အူတူတူ အတတနိုင်လှချေကော!’

‘တောက်... စကားရဲ့ အနက်အဓိပ္ပာယ်ကိုတောင် နားမလည်ဘဲနဲ့ စီပီဇီးရိုးထဲကို ဘယ်လိုများ ဝင်လာနိုင်တာလဲ။’

‘စကားတစ်ခွန်းတည်းနဲ့ မင်းက ငါ့အတွက် ရေတပ်တစ်ခုလုံးကို ရန်သူဖြစ်အောင် လုပ်ပေးလိုက်တာပဲ။ မင်းကတော့ တကယ့်ကို ပညာရှင်ကြီးပါပဲ ရာ။’