အခန်း (၂၀) စူပါနတ်ဆိုးသတ်မိန့်ပြန်တမ်း

"သတင်းစာတွေထဲမှာ ပထမတပ်မဟာအကြောင်း ပါနေပြီ။ အခုတော့ တစ်ကမ္ဘာလုံးက ပထမတပ်မဟာ ဘာတွေလုပ်ခဲ့သလဲဆိုတာ သိကုန်ကြပြီ!"

"ငါတို့ တစ်ခုခုလုပ်မှဖြစ်မယ်။ မဟုတ်ရင် ကမ္ဘာ့အစိုးရရဲ့ အရှိန်အဝါတွေ အကုန်ပျက်စီးကုန်တော့မှာ!"

ဝတ်စုံနက်ကို ဆင်မြန်းထားပြီး မုတ်ဆိတ်ရှည်၊ ဆံပင်ရှည်များနှင့် ခန့်ညားလှသော ဂိုရိုဆေး တစ်ဦးက သတင်းစာပါ အကြောင်းအရာကို စူးစိုက်ကြည့်ရင်း ဆိုလိုက်သည်။

"မှန်တယ်။ ပထမတပ်မဟာရဲ့ သဘောသဘာဝက ဟိုပင်လယ်ဓားပြအဖွဲ့တွေနဲ့ လုံးဝမတူဘူး!"

"အခု သူတို့လုပ်ရပ်က ငါတို့ ကမ္ဘာ့အစိုးရကို စစ်ကြေညာလိုက်တာနဲ့ အတူတူပဲ!"

"သူတို့ကို အမြစ်ပြတ်ချေမှုန်းပစ်ရမယ်။ ငါတို့ ကမ္ဘာ့အစိုးရကို လာပြီး စိန်ခေါ်စော်ကားရင် ဘယ်လိုအကျိုးဆက်မျိုး ရင်ဆိုင်ရမလဲဆိုတာ ကမ္ဘာသူကမ္ဘာသားတွေ သိသွားစေရမယ်!"

နဖူးတွင် မှဲ့ပါပြီး လက်ကိုင်ဒုတ်သဏ္ဌာန် နှုတ်ခမ်းမွေးရှည်ကြီးနှင့် ထိပ်ပြောင်ဗိုက်ရွှဲ အဖိုးအိုကလည်း သူ၏ သဘောထားကို ထုတ်ဖော်ပြောကြားလိုက်သည်။

"ဘာစတာကော ကို ဆင့်ခေါ်လိုက်စမ်း။ ပထမတပ်မဟာ လုပ်ခဲ့သမျှအတွက် သူတို့ ထိုက်တန်တဲ့ တန်ဖိုးကို ပြန်ပေးဆပ်စေရမယ်!"

တစ်ချိန်လုံး တိတ်ဆိတ်နေသည့် ရွှေရောင်ဆံပင်နှင့် အသားညိုညို ဂိုရိုဆေးက ယခုမှ ဝင်ပြောတော့သည်။

"ဘာစတာကော ဟုတ်လား! တကယ်လို့သာ ဘာစတာကောကို သုံးလိုက်ရင် ပထမတပ်မဟာကို အမှုန့်ချေနိုင်မှာ မှန်ပေမဲ့ အဲဒီမဟာမိတ်နိုင်ငံလေးလည်း တပါတည်း ပျက်စီးသွားလိမ့်မယ်!"

ရွှေရောင်ဆံပင်နှင့် ဂိုရိုဆေး၏ စကားကြောင့် ခန်းမတစ်ခုလုံး ရုတ်ရုတ်သဲသဲ ဖြစ်သွားသည်။ အကြောင်းမှာ ပထမတပ်မဟာ၏ အခြေစိုက်စခန်းမှာ မဟာမိတ်နိုင်ငံတစ်ခုအတွင်းတွင် တည်ရှိနေသောကြောင့် ဖြစ်သည်။

အကယ်၍ ဘာစတာကောကိုသာ အဆင်ခြင်မဲ့ အမိန့်ပေးလိုက်ပါက ထိုမဟာမိတ်နိုင်ငံလေးသည်လည်း မြေပုံပေါ်မှ အပြီးတိုင် ပျောက်ကွယ်သွားပေတော့မည်။

"ဟွန့်! မဟာမိတ်နိုင်ငံလေး တစ်ခုတည်းပါ။ ဒီကိစ္စအပေါ် ငါတို့ ကမ္ဘာ့အစိုးရရဲ့ ပြတ်သားတဲ့ သဘောထားကို ကမ္ဘာကြီးကို ပြသဖို့က ပိုအရေးကြီးတယ်။"

"ဟုတ်တယ်။ မကြာသေးခင်ကမှ ဆာမိုနီကျွန်းမှာ ခရစ်စတယ် ဒရာဂွန် တစ်ယောက်ကို သတ်ခဲ့တဲ့အပြင် အခုတော့ တပ်မဟာဖွဲ့စည်းကြောင်း လူသိရှင်ကြား ကြေညာနေပြန်ပြီ! ဒါဟာ ငါတို့ ကမ္ဘာ့အစိုးရကို လုံးဝမျက်ကွယ်ပြု စော်ကားလိုက်တာပဲ။ သူတို့ကို အမြစ်ပြတ် သုတ်သင်ပစ်ရမယ်!"

"ကျုပ်လည်း ဘာစတာကော အမိန့်ထုတ်ဖို့ သဘောတူတယ်။ ဒါပေမဲ့ ဒီတစ်ခေါက် ဘာစတာကောက အရင်ခေါက်တွေနဲ့ မတူစေရဘူး။ ရေတပ်ဗိုလ်ချုပ် ကိုယ်တိုင် ဦးဆောင်စေရမယ်!"

ဂိုရိုဆေး အသီးသီးက သူတို့၏ ဆုံးဖြတ်ချက်များကို ဆက်တိုက်ဆိုသလို ပြောကြားလာကြသည်။

နောက်ဆုံးတွင် အားလုံးက ဘာစတာကော အမိန့်ထုတ်ရန် တညီတညွတ်တည်း သဘောတူလိုက်ကြလေပြီ။

အားဘတ်စ် ဘုရင့်နိုင်ငံအတွင်းရှိ သာမန်အရပ်သားများ၏ အသက်အန္တရာယ်ကိုမူ ဂိုရိုဆေးတို့က အမှုပင်မထားကြချေ။

ဆုံးဖြတ်ချက်ချပြီးသည်နှင့် ထိပ်ပြောင်အဖိုးအိုသည် ရွှေရောင်ခရုဖုန်း ကို ထုတ်ယူ၍ နံပါတ်တစ်ခုသို့ ဆက်သွယ်လိုက်တော့သည်။

... ဂရန်းလိုင် ၏ ပထမပိုင်း တစ်နေရာ။

မရင်းဖို့ဒ် ။

ရေတပ်ဦးစီးချုပ်ရုံးခန်းအတွင်းတွင် ရေတပ်အဆင့်မြင့်အရာရှိကြီးများစွာ ရောက်ရှိနေကြပြီး လေထုမှာ အလွန်ပင် လေးလံထိုင်းမှိုင်းနေသည်။

"ကမ္ဘာ့အစိုးရက အားဘတ်စ်နိုင်ငံအပေါ် ဘာစတာကော အမိန့်ထုတ်ဖို့ ဆုံးဖြတ်လိုက်ပြီ။ ဒါပေမဲ့ ဒီတစ်ခေါက်က အရင်တုန်းက ဘာစတာကောတွေနဲ့ မတူဘူး..."

"ဒါကို စူပါဘာစတာကော လို့ ခေါ်တယ်။ ဒီစစ်ဆင်ရေးမှာ စစ်သင်္ဘော အစင်း ၂၀ အသုံးပြုမှာဖြစ်ပြီး ပထမတပ်မဟာကို အမြစ်ပြတ်ချေမှုန်းဖို့ ရေတပ်ဗိုလ်ချုပ်တစ်ယောက်ကိုယ်တိုင် သွားရောက်ကွပ်ကဲရမယ်!"

ဆင်းဂိုကူ က တည်ကြည်လေးနက်သော မျက်နှာပေးဖြင့် ပြောလိုက်သည်။ ဤအချိန်၌ ဆင်းဂိုကူ၏ ရင်ထဲတွင်လည်း အံ့အားသင့်မှုနှင့် မယုံကြည်နိုင်မှုများ ပြည့်နှက်နေသည်။

ဂိုရိုဆေးများက ဤကဲ့သို့ ကြောက်မက်ဖွယ်ကောင်းသော အမိန့်မျိုး ထုတ်ပြန်လိမ့်မည်ဟု သူ လုံးဝမထင်ထားခဲ့ပေ။

"ဘာ! ဆင်းဂိုကူ... ကမ္ဘာ့အစိုးရက တကယ်ပဲ ဘာစတာကော အမိန့်ထုတ်လိုက်တာလား။ ပထမတပ်မဟာက အားဘတ်စ်နိုင်ငံထဲမှာ ရှိနေတာလေ။ အဲဒီမှာ အရပ်သားတွေ အများကြီးရှိတယ်!"

"ဘာစတာကောကိုသာ သုံးလိုက်ရင် အရပ်သားတွေလည်း လွတ်မှာမဟုတ်ဘူး။ သူတို့တွေ ရူးကုန်ကြပြီလား!"

စစ်ဗျူဟာမှူး ဆူရု သည် ဆင်းဂိုကူ၏ စကားကို ကြားကြားချင်း မယုံကြည်နိုင်ဟန်ဖြင့် အော်ဟစ်လိုက်မိသည်။

ကူချန်ထျန်း သည် ပထမတပ်မဟာကို ဗြောင်ကျကျ တည်ထောင်ခဲ့သည်။

ထို့အပြင် အားဘတ်စ်နိုင်ငံကို တိုက်ခိုက်သိမ်းပိုက်ပြီး သူ၏ အခြေစိုက်စခန်းအဖြစ် ပြုလုပ်ခဲ့သည်။

ထိုသို့သော လုပ်ရပ်များကြောင့် ကမ္ဘာ့အစိုးရအနေဖြင့် နှိမ်နင်းရန် ကြိုးစားမည်မှာ သေချာသော်လည်း ယခုကဲ့သို့ ဘာစတာကောကို အသုံးပြု၍ တစ်နိုင်ငံလုံးကို အမှုန့်ချေပစ်မည့် နည်းလမ်းကို သုံးလိမ့်မည်ဟု သူမ လုံးဝမမျှော်လင့်ထားခဲ့မိပေ။

"ဦးစီးချုပ်ဆင်းဂိုကူ... ကမ္ဘာ့အစိုးရက တကယ်ပဲ ဒီလိုလုပ်ဖို့ ဆုံးဖြတ်လိုက်တာလား?"

ဤအချိန်တွင် ရုံးခန်းအတွင်း တိတ်ဆိတ်စွာ ထိုင်နေသော အိုကီဂျီ က မနေနိုင်ဘဲ မေးလိုက်သည်။

အိုဟာရာ ကျွန်းကို ဘာစတာကောဖြင့် ချေမှုန်းစဉ်က သူကိုယ်တိုင် ပါဝင်ခဲ့သူဖြစ်၍ ဤအမိန့်၏ ကြောက်မက်ဖွယ်ကောင်းမှုနှင့် ရက်စက်ကြမ်းကြုတ်မှုကို သူ အသိဆုံးဖြစ်သည်။

ထို့အပြင် ဤအခြေအနေသည် အင်းနီးစ်လော့ဘီ တွင် ဘာစတာကော အမိန့်ထုတ်ခဲ့သည်နှင့် လုံးဝမတူပေ။

အင်းနီးစ်လော့ဘီတွင် အရပ်သားမရှိဘဲ အများစုမှာ ပင်လယ်ဓားပြများသာ ဖြစ်သဖြင့် အိုကီဂျီအနေဖြင့် ထိုစဉ်က စိတ်အနှောင့်အယှက် မဖြစ်ခဲ့သော်လည်း ယခုမူ အားဘတ်စ်နိုင်ငံတွင် နေထိုင်သူ အများစုမှာ အပြစ်မဲ့ အရပ်သားများ ဖြစ်နေသည်။

"ကြောက်စရာကြီးပဲနော်..."

ကိဇာရု ပင်လျှင် ကမ္ဘာ့အစိုးရ၏ အမိန့်ကို ကြားလိုက်ရသောအခါ နှုတ်ခမ်းကို မဲ့လိုက်ပြီး ကြောက်လန့်ဟန် အသံပြုလိုက်သည်။

သို့သော်ငြား ကိဇာရု၏ မျက်နှာပေးမှာမူ အမြဲတမ်းလိုလိုပင် ပြောင်ချော်ချော် မျက်နှာပေးနှင့် ဖြစ်နေလေသည်။

"ဒါဟာ ဂိုရိုဆေးတွေရဲ့ အမိန့်ပဲ။ ဒီတစ်ခေါက်မှာတော့ သူတို့တွေက ပထမတပ်မဟာကို အမြတ်ပြတ်သုတ်သင်ဖို့ အရမ်းကို ပြတ်သားနေကြတယ်!"

"ပြီးခဲ့တဲ့တစ်ခေါက်က ပထမတပ်မဟာဟာ ခရစ်စတယ် ဒရာဂွန်တစ်ယောက်ကို သတ်ခဲ့သလို ကိဇာရုကိုလည်း အနိုင်ယူခဲ့တဲ့အတွက် ကမ္ဘာ့အစိုးရရဲ့ ဂုဏ်သိက္ခာတွေ မြေကျခဲ့ရတယ်..."

"ဒါကြောင့် ဂိုရိုဆေးတွေက ဒီတစ်ခေါက်မှာ ဘာစတာကော အမိန့်ကို သုံးဖို့ ဆုံးဖြတ်လိုက်တာပဲ..."

ဆင်းဂိုကူသည် လက်သီးကို ကျစ်ကျစ်ပါအောင် ဆုပ်ထားမိသည်။ သူကိုယ်တိုင်လည်း ဂိုရိုဆေး၏ ဤအမိန့်အပေါ် မကျေမနပ် ဖြစ်နေမိသည်။

ဘာစတာကောကို သုံးလိုက်ပါက ပထမတပ်မဟာကို အမြစ်ပြတ် ချေမှုန်းနိုင်မည်မှာ အမှန်ပင်။ အကြောင်းမှာ ပထမတပ်မဟာတွင် နတ်ဆိုးသီးစွမ်းအားရှင် နှစ်ဦးသာ အထူးအင်အားကြီးမားခြင်းကြောင့် ဖြစ်သည်။

ကာနိဂျ် ကာဘူတို ဟုခေါ်သော ထိုနတ်ဆိုးကြီးမှာ အလွန်စွမ်းအားကြီးသော်လည်း ပင်လယ်ပြင်မှနေ၍ စစ်သင်္ဘောများစွာ၏ တစ်ပြိုင်နက်တည်း ဗုံးကြဲတိုက်ခိုက်မှုကို ရင်ဆိုင်ရပါက ကျွန်းပေါ်ရှိ သက်ရှိမှန်သမျှ ပြာဖြစ်သွားရပေမည်။

ထို့အပြင် သူတို့အနေဖြင့် သင်္ဘောဖြင့် ထွက်ပြေးရန်မှာလည်း မဖြစ်နိုင်သလောက်ပင်။

ကာနိဂျ် ကာဘူတိုသည်လည်း နတ်ဆိုးသီး စွမ်းအားရှင်တစ်ဦး ဖြစ်နေသဖြင့် ပထမတပ်မဟာသည် ပျက်စီးကံကြမ္မာနှင့် မလွဲမသွေ ရင်ဆိုင်ရတော့မည် ဖြစ်သည်။

"ဟွန့်! ပင်လယ်ဓားပြဆိုတာ အကုန်သေသင့်တာပဲ..."

"သူတို့ကိုယ်သူတို့ တပ်မဟာလို့ပဲ ခေါ်ခေါ်၊ ပင်လယ်ဓားပြဆိုတဲ့ အနှစ်သာရကတော့ ပြောင်းလဲသွားမှာမဟုတ်ဘူး... ပင်လယ်ပြင်ပေါ်က ဒီလို မကောင်းဆိုးဝါးတွေကို အမြစ်ပြတ် သုတ်သင်ပစ်ရမယ်..."

"ဒီတစ်ခေါက် ကျွန်တော့်ကို သွားခွင့်ပြုပါ။ ဒီတာဝန်ကို အပြတ်အသတ် အောင်မြင်အောင် လုပ်ဆောင်ခဲ့ပါ့မယ်!"

ဤအချိန်တွင် အာကိန်နု က ဒေါသမျက်နှာဖြင့် မတ်တပ်ရပ်လိုက်သည်။

တကယ်လို့သာ ဆာမိုနီကျွန်းက ကိစ္စကို သူသာသွားရောက် ကိုင်တွယ်ခဲ့လျှင် ထိုနှစ်ယောက် လွတ်မြောက်သွားစရာ အကြောင်းမရှိဟု သူ ယုံကြည်နေသည်။

"ကျွန်တော့်ကိုပဲ သွားခွင့်ပြုပါ။ ဒီဘာစတာကောကို ကျွန်တော်ပဲ ကွပ်ကဲပါ့မယ်..."

ထိုအချိန်တွင် အိုကီဂျီကလည်း ပြတ်သားသော မျက်နှာထားဖြင့် မတ်တပ်ရပ်လာသည်။

သူသည် အာကိန်နု၏ စရိုက်ကို ကောင်းကောင်းသိသည်။ အာကိန်နုသာ သွားပါက မည်သူ့ကိုမျှ ကရုဏာထားလိမ့်မည် မဟုတ်ပေ။

အကယ်၍ အာကိန်နုသာ ဤစစ်ဆင်ရေးကို ကွပ်ကဲပါက အားဘတ်စ်နိုင်ငံရှိ မည်သူတစ်ဦးတစ်ယောက်မျှ အသက်ရှင်ကျန်ရစ်တော့မည် မဟုတ်ပေ။

အိုဟာရာတွင် လုပ်ဆောင်ခဲ့သကဲ့သို့ပင် အာကိန်နုသည် မည်သည့် အခွင့်အရေးကိုမျှ လက်လွှတ်ခံမည့်သူ မဟုတ်ချေ။

"ဒီဘာစတာကောကို အိုကီဂျီပဲ ကွပ်ကဲပါ။ ပထမတပ်မဟာကို အမြစ်ပြတ် ချေမှုန်းရမယ်!"

ဆင်းဂိုကူသည် အာကိန်နုနှင့် အိုကီဂျီကို ကြည့်ပြီး နောက်ဆုံးတွင် အိုကီဂျီကိုသာ ရွေးချယ်လိုက်သည်။

ရေတပ်ဦးစီးချုပ်တစ်ဦးအနေဖြင့် အာကိန်နု၏ အစွန်းရောက်သော လုပ်ရပ်များကို သူ ကောင်းကောင်းနားလည်သည်။

ထို့ကြောင့် ဤစစ်ဆင်ရေးကို အိုကီဂျီအား ကွပ်ကဲစေခြင်းကသာ ပို၍ သင့်တော်ပေလိမ့်မည်။

ထိုအတောအတွင်း ရေတပ်သူရဲကောင်း ဂတ်ပ် မှာမူ တစ်ချိန်လုံး တိတ်ဆိတ်စွာ ထိုင်နေပြီး စိတ်ဓာတ်များ အလွန်ကျဆင်းနေဟန်ရှိသည်။

အဘယ်ကြောင့်ဆိုသော် မီးလက်သီး အေ့စ် နှင့် ပတ်သက်သည့် နောက်ဆုံးရ သတင်းကို သူ ရရှိထားသောကြောင့် ဖြစ်သည်။ ကမ္ဘာ့အစိုးရက မီးလက်သီး အေ့စ်ကို မရင်းဖို့ဒ်တွင် လူသိရှင်ကြား ကွပ်မျက်ရန် ဆုံးဖြတ်လိုက်လေပြီ!

အေ့စ်မှာ သူ၏ မြေးအရင်းပင် ဖြစ်သည်။

သို့သော်လည်း သူ၏ ရာထူးနှင့် တာဝန်အရ မည်သည့်အရာကိုမျှ ဝင်ရောက်စွက်ဖက်ခွင့်မရှိပေ။

ရေတပ်သူရဲကောင်း ဂတ်ပ်၏ စိတ်အစဉ်မှာ ဤအချိန်၌ အလွန်ပင် ရှုပ်ထွေးနောက်ကျိနေပြီး ဝေဒနာများစွာ ခံစားနေရရှာသည်။

"စိတ်မပူပါနဲ့ ဦးစီးချုပ်ဆင်းဂိုကူ... ဒီတစ်ခေါက် အားဘတ်စ်မှာရှိတဲ့ ပထမတပ်မဟာကို ကျွန်တော် အပြတ်အသတ် ရှင်းလင်းခဲ့ပါ့မယ်..."

အိုကီဂျီသည် နေရာမှ ဖြည်းညှင်းစွာ ထိုင်ရာမှ ထလိုက်သည်။ သူ၏ အရပ်အမောင်းမှာ အလွန်မြင့်မားလှပြီး သူ၏ ကျောဘက်ရှိ "တရားမျှတမှု" ဟု ရေးထိုးထားသော ဝတ်ရုံကြီးမှာ သိသိသာသာပင် ဝင်းလက်နေတော့သည်။