အခန်း (၁၃) ငါတို့ကို တိုက်ခိုက်ရဲတဲ့သူက ဘယ်သူလဲ?

ကမ္ဘာသစ် ၊ ဒရက်စ်ရိုဆာ ဘုရင်နိုင်ငံ။

ဤနေရာကား စစ်ဘုရင် ခုနစ်ဦးထဲမှ တစ်ဦးဖြစ်သူ ဒိုဖလမင်ဂို အခြေစိုက်ရာ အရပ်ဖြစ်သည်။ လတ်တလောတွင် ဒိုဖလမင်ဂိုသည် ဒရက်စ်ရိုဆာ၏ ဘုရင်အဖြစ် စိုးစံနေပြီး ဒွန်ကီဟိုတေးမိသားစုက တစ်နိုင်ငံလုံးကို အကြွင်းမဲ့ ထိန်းချုပ်ထားလေသည်။

"ဖူးဖူးဖူးဖူး!"

"ဖူးဖူးဖူးဖူး!"

ဒရက်စ်ရိုဆာ နန်းတော်အတွင်းမှ ဒိုဖလမင်ဂို၏ ထူးခြားလှသော ရယ်မောသံကြီးက ဟိန်းထွက်နေသည်။

"အဲဒီ ဦးနှောက်မရှိတဲ့ ခရစ်စတယ် ဒရာဂွန် တွေ အသတ်ခံလိုက်ရတာကိုး!"

"ရေတပ်ဗိုလ်ချုပ်ကြီးတောင် ရှုံးသွားတယ်ဆိုတော့... ဒါက တကယ်ကို စိတ်လှုပ်ရှားဖို့ ကောင်းတာပဲ!"

ဒိုဖလမင်ဂိုသည် သတင်းစာကို ကိုင်ထားရင်း သတင်းပါ အကြောင်းအရာများကို ဖတ်ကာ ကျေနပ်အားရနေမိသည်။ မူလက ဒိုဖလမင်ဂိုကိုယ်တိုင်မှာ ခရစ်စတယ် ဒရာဂွန် မျိုးနွယ်စုဝင် တစ်ဦး ဖြစ်ခဲ့ဖူးသည်။ သို့သော် သူငယ်စဉ်က ဖခင်ဖြစ်သူသည် မိသားစုကို ခေါ်ဆောင်ကာ အထွတ်အမြတ်ထားရာ မာရီဂိုးလ် မှ ထွက်ခွာခဲ့သဖြင့် သူတို့၏ အဆင့်အတန်းမှာ ဆုံးရှုံးခဲ့ရသည်။

ခရစ်စတယ် ဒရာဂွန် အဆင့်အတန်းကို ပြန်လည်ရရှိရန်အတွက် သူသည် ကိုယ့်ဖခင်ကိုပင် ကိုယ်တိုင် သတ်ဖြတ်ခဲ့သော်လည်း မာရီဂိုးလ်ရှိ လူကုံထံများက သူ့ကို ငြင်းပယ်ခဲ့ကြသည်။ ထို့ကြောင့်ပင် သူသည် ခရစ်စတယ် ဒရာဂွန်များအပေါ် နာကျည်းမှုကို အမြဲတစေ ရင်ဝယ်ပိုက်ထားခဲ့ခြင်း ဖြစ်သည်။ ယခုအခါ ထိုသူသုံးဦး အသတ်ခံလိုက်ရသည်ကို မြင်ရသည်မှာ သူ့အတွက်တော့ အတိုင်းအထက်အလွန် ကျေနပ်စရာပင်။

"ဒါပေမဲ့ ဒီကောင်နှစ်ယောက်က တကယ်ကို သတ္တိရှိတာပဲ! ခရစ်စတယ် ဒရာဂွန်တွေကိုတောင် သတ်ရဲတယ်ဆိုတော့..."

"သူတို့ရဲ့ ခွန်အားကလည်း အတော်လေး တောင့်တင်းပုံရတယ်၊ ရေတပ်ဗိုလ်ချုပ်ကြီး ကိဇာရု တောင် သူတို့ကို မယှဉ်နိုင်ဘူးပဲ!"

သတင်းစာထဲတွင်ပါသော ကာနိဂျ် ကာဘူတို က ခရစ်စတယ် ဒရာဂွန်ကို သတ်ဖြတ်နေသည့် ဓာတ်ပုံကို ကြည့်ရင်း ဒိုဖလမင်ဂို အံ့အားသင့်သွားရသည်။ သူ၏ အထူးအခွင့်အရေး ရရှိထားသော အဆင့်အတန်းကြောင့် ခရစ်စတယ် ဒရာဂွန်များ၏ အရှိန်အဝါကို သူတစ်ပါးထက် ပိုသိသလို၊ သူတို့ကို သတ်ဖြတ်ခြင်း၏ နောက်ဆက်တွဲ အကျိုးဆက်မှာ မည်မျှ ကြီးမားမည်ကိုလည်း ကောင်းကောင်း နားလည်သည်။ ၎င်းအပြင် ကမ္ဘာ့အစိုးရ ဆိုသည်မှာလည်း အပြင်ပန်း မြင်တွေ့နေရသည်ထက် အဆပေါင်းများစွာ ပို၍ နက်နဲလှသည် မဟုတ်ပါလား။

"ကြည့်ရတာ ဒီကမ္ဘာကြီးကတော့ မကြာခင်မှာ ပရမ်းပတာတွေ ဖြစ်တော့မယ်ထက်တူတယ်!"

"ဖူးဖူးဖူးဖူး!"

"တကယ်ကို စိတ်ဝင်စားဖို့ ကောင်းလိုက်တာ! ဒီကမ္ဘာကြီးကို ဒီထက်မက ပိုပြီးတော့ ရှုပ်ထွေးသွားအောင် လုပ်လိုက်ကြစမ်း!"

ဒိုဖလမင်ဂိုသည် တဟားဟား ရယ်မောရင်း လက်ကို ဝှေ့ယမ်းကာ သတင်းစာကို လေထဲသို့ ပစ်တင်လိုက်တော့သည်။

...

ဂရန်းလိုင် ၏ ပထမပိုင်းတစ်ဝက်။

အဆုံးအစမရှိသော ပင်လယ်ပြင်ကြီးထဲတွင် ပင်လယ်ဓားပြသင်္ဘော နှစ်စင်း ခုတ်မောင်းနေသည်။ ထိုသင်္ဘောနှစ်စင်းမှာ တစ်စင်းနှင့်တစ်စင်း မျက်နှာချင်းဆိုင် ဦးတည်နေကြသော်လည်း အတော်လေး အလှမ်းဝေးကွာနေသဖြင့် တစ်ဖွဲ့တည်း မဟုတ်ကြောင်း ထင်ရှားလှသည်။

"ကပ္ပတိန်! ရှေ့မှာ ပင်လယ်ဓားပြသင်္ဘောတစ်စင်း တွေ့တယ်ဗျ!"

သင်္ဘောဦးပေါ်တွင် မှန်ပြောင်းဖြင့် အကဲခတ်နေသော ပင်လယ်ဓားပြတစ်ဦးက အခန်းတွင်းသို့ လှမ်း၍ အော်ပြောလိုက်သည်။

"ဘာ! ဘယ်အဖွဲ့လဲကွ!?"

အခန်းအတွင်းမှ အမြင့် နှစ်မီတာခွဲခန့်ရှိသော လူဝကြီးတစ်ဦး ထွက်လာသည်။ သူကား ဘယ်လီ ၂၅ သန်း ဆုငွေအထုတ်ခံထားရသည့် ဤသင်္ဘော၏ ကပ္ပတိန်ပင် ဖြစ်သည်။

"မသိရသေးဘူး ကပ္ပတိန်၊ သူတို့ဆီမှာ ပင်လယ်ဓားပြအလံ လွှင့်မထားဘူး။ ဒါပေမဲ့ ကြည့်ရတာတော့ ပင်လယ်ဓားပြသင်္ဘောဆိုတာ သေချာပါတယ်!"

မှန်ပြောင်းကိုင်ထားသူက ကြောက်ကြောက်ရွံ့ရွံ့နှင့် ပြန်တင်ပြလိုက်သည်။ သူ၏ ကပ္ပတိန်သည် ဒေါသကြီးသူဖြစ်ရာ တစ်ခုခု လွဲချော်သွားပါက ငါးစာအဖြစ် ပင်လယ်ထဲ ပစ်ချခံရမည်ကို သူကောင်းကောင်း သိနေသည်။

"အသုံးမကျတဲ့ကောင်! ဘယ်အဖွဲ့လဲဆိုတာတောင် မသိဘူးလား!"

လူဝကြီးက ထိုပင်လယ်ဓားပြကို ဝါးစားမတတ် စိုက်ကြည့်ရင်း ဟိန်းဟောက်လိုက်သည်။

"ဟုတ်... ဟုတ်ကဲ့ပါ ကပ္ပတိန်၊ ကျွန်တော် အသုံးမကျလို့ပါ..."

"အမြောက်တွေနဲ့ ပစ်ကြစမ်း! အခုချက်ချင်း ပစ်ကြ!"

"ဘယ်အဖွဲ့ပဲဖြစ်ဖြစ် ဂရုစိုက်နေမှာမဟုတ်ဘူး! ငါက ဆုငွေ ၂၅ သန်းတန်တဲ့ ပင်လယ်ဓားပြကြီး ဝစ်ခ် ကွ!"

ဝစ်ခ်သည် အော်ဟစ်ကာ ခါးကြားမှ ဓားကို ဆွဲထုတ်လျက် ဘေးပတ်ဝန်းကျင်ရှိ နောက်လိုက်များကို အမိန့်ပေးလိုက်သည်။ သူသည် ဓားကို ဝှေ့ယမ်းရင်း အားပါးတရ ဟိန်းဟောက်နေတော့သည်။

"ဟုတ်ကဲ့ ကပ္ပတိန်!"

"အားလုံး တိုက်ခိုက်ဖို့ ပြင်ကြ! အမြောက်တွေထဲ ယမ်းဖြည့်ပြီး အဲဒီသင်္ဘောကို နှစ်ပစ်လိုက်ကြစမ်း!"

"သူတို့ ထွက်မပြေးနိုင်ခင် အမြန်ပစ်! အဲဒီထဲမှာ ရတနာတွေ အများကြီး ပါချင်ပါနေမှာ!"

ဝစ်ခ်၏ အမိန့်ကို ရရချင်း ပင်လယ်ဓားပြအုပ်စုမှာ ပျာပျာသလဲ ဖြစ်သွားကြသည်။ သူတို့သည် အမြောက်ကျည်များကို အပြေးအလွှား ဖြည့်တင်းကာ တစ်ဖက်သင်္ဘောကို စတင် ဗုံးကြဲတိုက်ခိုက်ကြတော့သည်။

ဒိုင်း! ဒိုင်း! ဒိုင်း!

အမြောက်ဆန်များမှာ ပင်လယ်ရေပြင်ပေါ်သို့ ကျရောက်ကာ ရေမှုန်ရေမွှားများ တဖွားဖွား ထွက်ပေါ်လာသည်။ သင်္ဘောကို တိုက်ရိုက်မထိသေးသော်လည်း အနီးအနားတွင် ပေါက်ကွဲနေသော အရှိန်ကြောင့် သင်္ဘောမှာ ဘယ်ညာ ယိမ်းထိုးနေတော့သည်။

"ခရစ်စ်! ဘာတွေ ဖြစ်နေတာလဲ!? ဒီအမြောက်သံတွေက ဘယ်က ထွက်လာတာလဲ!"

သင်္ဘောအတွင်း၌ အိပ်ပျော်နေသော ကူချန်ထျန်း သည် ရုတ်တရက် ပေါက်ကွဲသံများကြောင့် လန့်နိုးလာပြီး သင်္ဘောတစ်စင်းလုံး တုန်ခါနေသည်ကို သတိထားမိလိုက်သည်။

"ခေါင်းဆောင်! တစ်စုံတစ်ယောက်က ကျွန်တော်တို့ကို တိုက်ခိုက်နေတာပါ။ ကျွန်တော်တို့ဆီကို အမြောက်တွေနဲ့ လှမ်းပစ်နေကြတယ်!"

ကူချန်ထျန်း၏ ဒေါသတကြီး အော်သံကြောင့် ခရစ်စ်သည် အခန်းတွင်းသို့ အပြေးအလွှား ဝင်လာသည်။ ခရစ်စ်မှာ အရပ် နှစ်မီတာ ခြောက်ဆယ်ခန့်ရှိသော လူငယ်တစ်ဦးဖြစ်ပြီး ခါးတွင် ဓားတစ်စင်း ချိတ်ထားသဖြင့် ဓားသမားတစ်ဦးဖြစ်ကြောင်း သိသာလှသည်။

ကူချန်ထျန်းသည် ဆာမိုနီ ကျွန်း မှ ထွက်ခွာလာစဉ် ဤသင်္ဘောကို တွေ့ရှိခဲ့ခြင်း ဖြစ်သည်။ သင်္ဘောပေါ်ရှိ အရာရှိအများစုကို ကူချန်ထျန်းက သတ်ဖြတ်ခဲ့ပြီး မူလကပ္ပတိန်အပေါ် သစ္စာမရှိသူများနှင့် သူထိန်းချုပ်ရ လွယ်ကူမည့်သူများကိုသာ အသက်ချမ်းသာပေးကာ ခေါ်ဆောင်လာခဲ့ခြင်း ဖြစ်သည်။ ပင်လယ်ပြင်တွင် ခရီးနှင်ရန်အတွက် လမ်းပြ၊ စားဖိုမှူးနှင့် ဆရာဝန် စသည့် နောက်လိုက်များ လိုအပ်သည် မဟုတ်ပါလား။

ခရစ်စ်သည် မူလအဖွဲ့၏ အရာရှိတစ်ဦး ဖြစ်သော်လည်း သူ၏ မိသားစုအတွက် ကလဲ့စားချေရန် ထိုအဖွဲ့ထဲတွင် ခိုအောင်းနေခဲ့သူ ဖြစ်သည်။ ကူချန်ထျန်းက ထိုကပ္ပတိန်ကို သတ်ဖြတ်ပေးလိုက်ခြင်းကြောင့် သူသည် ကူချန်ထျန်းကို ကျေးဇူးတင်ကာ သစ္စာရှိစွာ အမှုထမ်းနေခြင်း ဖြစ်သည်။

"ဘာ!"

"ဘယ်သူက ဒီလောက်အထိ သတ္တိကောင်းနေတာလဲ! ငါတို့ကို တိုက်ခိုက်ရဲတယ်ပေါ့... ဒါက ဂရန်းလိုင်ရဲ့ ပထမပိုင်း မဟုတ်ဘူးလား!"

တစ်စုံတစ်ယောက်က မိမိတို့ကို တိုက်ခိုက်နေသည်ဟု ကြားလျှင်ပင် ကူချန်ထျန်း ဒေါသထွက်သွားတော့သည်။ ဤနေရာတွင် ကာနိဂျ် ကာဘူတိုနှင့် သူ၏ အစွမ်းမှာ အနှိုင်းမဲ့ ဖြစ်နေပြီ မဟုတ်ပါလား။ ယခုကဲ့သို့ အသိဉာဏ်မရှိသည့် အကောင်လေးများက သူ့ကို ရန်စရဲလိမ့်မည်ဟု သူ လုံးဝ မထင်ထားခဲ့ပေ။

"ကာနိဂျ် ကာဘူတို! အိပ်မနေနဲ့တော့! ငါတို့ကို လာတိုက်နေကြပြီ!"

ကူချန်ထျန်းသည် အဝေးတွင် အိပ်မောကျနေသော ကာနိဂျ် ကာဘူတိုကို အော်နှိုးလိုက်သည်။ အမြောက်သံများ ဤမျှ ကျယ်လောင်ကာ သင်္ဘောတစ်စင်းလုံး တုန်ခါနေသော်လည်း ကာဘူတိုကမူ အိပ်ပျော်နေဆဲပင်။

ကံကောင်းထောက်မစွာပင် ကူချန်ထျန်း၏ အော်သံကြောင့် ကာဘူတိုသည် ချက်ချင်း နိုးလာတော့သည်။

"ဘယ်သူက ငါတို့ကို လာတိုက်တာလဲ?"

"ဘယ်က အကောင်တွေက ငါတို့ကို ချောင်းတိုက်ရဲတာလဲ! သူတို့ကို ကောင်းကောင်းကြီး သင်ခန်းစာ ပေးရမယ်...!"

ကာဘူတိုသည် မတ်တပ်ရပ်လိုက်ရင်း တစ်စုံတစ်ယောက်က လာရောက်တိုက်ခိုက်နေသည်ဟူသော သတင်းကြောင့် အလွန် စိတ်လှုပ်ရှားနေပုံရသည်။

"ဟေ့! ငါတို့ကို ဘယ်သူ တိုက်နေတာလဲဆိုတာ မင်း သိလား!?"

ကာဘူတိုက ဘေးတွင်ရှိသော ခရစ်စ်ကို ကြည့်ကာ မေးလိုက်သည်။

"သခင်ကြီး ကာနိဂျ် ကာဘူတို... ကျွန်တော်... ကျွန်တော်လည်း မသိသေးပါဘူး၊ သေသေချာချာ ကြည့်ဖို့ အချိန်မရလိုက်လို့ပါ..."

ခရစ်စ်သည် ကာဘူတို၏ ပုံရိပ်ကိုကြည့်ကာ အသံများတုန်ယင်လျက် ကြောက်ရွံ့စွာ ဖြေလိုက်ရသည်။ သတင်းစာထဲတွင် ပါလာသည့် ကာနိဂျ် ကာဘူတိုအကြောင်းကို သူကောင်းကောင်းသိသည်။

ခရစ်စတယ် ဒရာဂွန်ကို သတ်ခဲ့သူ!

ရေတပ်ဗိုလ်ချုပ်ကြီး ကိဇာရုကို အနိုင်ယူခဲ့ပြီး ဆုငွေ ၂.၅ ဘီလီယံ ထိုက်တန်သူ!

ဤအချက်များမှာ သာမန်လူတစ်ယောက်အတွက်တော့ စိတ်ကူးထဲမှာတောင် မမှန်းရဲသည့် အရာများ မဟုတ်ပါလား။