အပိုင်း (၅) သင့်ကိုယ်သင် ပင်လယ်ဓားပြကြီးလို့ ခေါ်ပြီး ဒီလောက်တောင် လက်သီးမပြင်းဘူးလား
"ဟေ့... အက်ဒ်ဝါ့ဒ်။ မင်းအထင် ဒီဘော့ဘ်က နိုင်ခြေရှိရဲ့လား"
ခြောက်လှန့်လှောင်ပြောင်ချင်သောအပြုံးဖြင့် ရွှေခြင်္သေ့ ရှီကီက ပါးစပ်တွင် ဆေးပေါ့လိပ်ကို ကိုက်လျက် မေးလိုက်သည်။ ကလွန်ခဲ့သော နှစ်များအတွင်း သူသည် ကိုင်ဒို တိုက်ခိုက်သည်ကို အကြိမ်ကြိမ် မြင်တွေ့ခဲ့ဖူးသည်။ ကိုင်ဒိုသည် ပြိုင်ဘက်ကို ကွက်တိကွက်ကြား လှုပ်ရှားမှုအနည်းငယ်အတွင်း၌ပင် အမြဲတမ်း ခြေမှုန်းပစ်လေ့ရှိသည်။ ပြင်းထန်သော တိုက်ပွဲမျိုးနှင့် ကြုံရခဲလှသည်။ ကိုင်ဒိုတွင် အံ့ဩဖွယ်ကောင်းသော ခန္ဓာကိုယ်တည်ဆောက်ပုံနှင့်အတူ ကြောက်မက်ဖွယ်ကောင်းသော ပေါက်ကွဲအား ရှိသည်ဟု ဆိုနိုင်သဖြင့် ရှီကီက သံသယအချို့ဖြင့် မေးမြန်းခြင်း ဖြစ်သည်။
"ဂူရာရာရာရာ..."
"ငါ့မှာ ဘော့ဘ်အပေါ် ဒီလောက်နီးပါးတော့ ယုံကြည်ချက် ရှိတယ်ဟေ့"
မုတ်ဆိတ်ဖြူက သူ့မျက်နှာတွင် စိုးရိမ်ရိပ် အနည်းငယ်မျှ မပြဘဲ ပြန်လည်ဖြေကြားသည်။ ဤပင်လယ်ဓားပြကျွန်းပေါ်တွင် မုတ်ဆိတ်ဖြူမှလွဲ၍ ဘော့ဘ်၏ စွမ်းအား မည်မျှအတိုင်းအဆအထိ ကြောက်မက်ဖွယ်ကောင်းသည်ကို မည်သူမျှ မသိကြချေ။ အကယ်၍ ဘော့ဘ်၌ ဤမျှအဆင့်ရှိသော စွမ်းအားသာမရှိလျှင် မုတ်ဆိတ်ဖြူကိုယ်တိုင် ဘာ့ကြောင့် သူ့အဖွဲ့သို့ဝင်ရန် ဖိတ်ခေါ်သွားပါအံ့နည်း။
"အိုဟို..."
"မင်းက ဒီလိုပြောမှတော့ ငါ ဒီတိုက်ပွဲကို ပိုလို့တောင် မျှော်လင့်မိသွားပြီ"
ရွှေခြင်္သေ့၏ မျက်လုံးများထဲတွင် လောဘရိပ်အချို့ ဖြတ်ပြေးသွားပြီးနောက် ရင်ဘတ်ပေါ်တွင် လက်ပိုက်လျက် ပွဲကြည့်ရန် အဆင်သင့်ဖြစ်နေသော ပုံစံမျိုးဖြင့် ကြည့်နေသည်။
တိုက်ပွဲမြေပြင်သို့ ပြန်လည်ကြည့်ရှုသော် ယခုအချိန်တွင် ဘော့ဘ်သည် ကိုင်ဒို၏ ဆန့်ကျင်ဘက်တွင် မတ်တပ်ရပ်နေပြီ ဖြစ်သည်။ ပတ်ဝန်းကျင်ရှိ ပင်လယ်ဓားပြအားလုံး၏ မျက်လုံးများသည် စမ်းသပ်ကွင်းဆီသို့ အာရုံစိုက်နေကြသည်။ ၎င်းတို့သည် ခန္ဓာကိုယ် အရွယ်အစား အလွန်အမင်း ကွာခြားလှသော ထိုလူနှစ်ဦးကို ကြည့်ပြီး လူတိုင်း၏ စိတ်ထဲ၌ အတွေးတစ်ခုစီ ပေါ်လာကြသည်မှာ - 'ဒီကောင် ဒီနေ့တော့ သေပြီ' ဟူ၍ ဖြစ်သည်။ သို့သော် ၎င်းတို့၏ မျက်လုံးများထဲတွင် သနားဂရုဏာစိတ် မရှိဘဲ အထင်အမြင်သေးမှုများသာ ပြည့်နှက်နေသည်။
"ဟေ့... ကောင်လေး၊ မင်း ကြည့်ရတာ တော်တော် တည်ငြိမ်နေပါလား"
ကိုင်ဒိုက သူ့ပေါင်လောက်ပင် မမြင့်သော ရှေ့မှ လူကောင်သေးသေးလေးကို ငုံ့ကြည့်ကာ မှတ်ချက်ချသည်။ ယခုအချိန်အထိ ကိုင်ဒို၏ မျက်နှာထက်တွင် အပြုံးတစ်ခု ရှိနေဆဲပင်။
"ကိုင်ဒို။ သူ့ကို ဖြိုလဲပစ်လိုက်"
"ဒီကောင်လေးကို အလုပ်သင် သင်္ဘောသားတစ်ယောက်ရဲ့ တန်ဖိုးကို သိအောင် ပြလိုက်စမ်း"
"ကိုင်ဒို၊ ဒီ ပါရမီရှင်ဆိုတဲ့ ကောင်ကို ချေမှုန်းပစ်လိုက်"
အောက်ခြေမှ ပင်လယ်ဓားပြများက ဝိုင်းဝန်းအော်ဟစ် အားပေးကြသည်။ ၎င်းတို့သည် ဘော့ဘ်ကို ကိုင်ဒိုက ရိုက်နှက်ခြေမှုန်းသည်ကို မြင်ချင်ဇောဖြင့် စိတ်အားထက်သန်နေကြပုံရသည်။ စောစောပိုင်းက ကပ္ပတိန်များအကြား ထိပ်တိုက်တွေ့ဆုံမှုတွင် ၎င်းတို့အားလုံးသည် ဤလူသစ်ကို အလွန် မနာလိုဖြစ်ခဲ့ကြသည်။ ထို့ကြောင့် သူ့ကို ချက်ချင်း ရိုက်သတ်ခံရစေချင်နေကြသည်။
မိမိအတွက် အော်ဟစ်အားပေးသံများကို ကြားရသောအခါ ကိုင်ဒိုသည် သူ့ကြွက်သားများကို ဖြေလျော့လိုက်သည်။ ဆူးချွန်ပါသော တုတ်ကောက်ကြီးကို ဝှေ့ယမ်းရင်း ဘော့ဘ်ဆီသို့ လျှောက်လှမ်းသွားသည်။ ခြေလှမ်းတိုင်းသည် လေးလံလှသဖြင့် ခြေဖဝါးအောက်ရှိ ကျောက်စရစ်ခဲများ ကြေမွသွားရသည်။ သူ၏ ကြီးမားလှသော ခန္ဓာကိုယ်က ကြောက်ရွံ့မှုကို ဖြစ်ပေါ်စေသည်။ သို့သော် အပြုံးအပြည့်ဖြင့် ကြည့်နေသော ကိုင်ဒိုကို ဘော့ဘ်က လုံးဝ တည်ငြိမ်စွာ စိုက်ကြည့်နေသည်။ သူသည် မည်သည့်တုံ့ပြန်မှုမျှ မပြသချေ။
"ဒီကောင်(ဘောဘ့်)ကတော့ ကိုယ့်ကိုယ်ကိုယ် ယုံကြည်ချက် အပြည့်ရှိနေပုံပဲ"
ရွှေခြင်္သေ့က ဆေးပေါ့လိပ်ကို ကိုက်ရင်း ပြောလိုက်သည်။ ကိုင်ဒို၏ ရှေ့မှောက်တွင် ဤမျှ တည်ငြိမ်မှုကို ထိန်းထားနိုင်ခြင်းသည်... သူ့၌ တစ်ခုခုရှိနေသည်ကို ဖော်ပြနေခြင်းပင် ဖြစ်သည်။
အခြားသူများ သတိမထားမိနိုင်သော်လည်း ထိပ်တန်း အာရုံခံဟာကီဖြင့် ကွင်းထဲက အခြေအနေကို အနီးကပ် စောင့်ကြည့်နေသော ရော့ခ်ကမူ ယခုအချိန်တွင် ဘော့ဘ်၏ ထူးခြားမှုကို ရှင်းလင်းစွာ ခံစားမိသည်။ ဘော့ဘ်ထံမှ ယခုထွက်ပေါ်လာသော တိုက်ခိုက်လိုစိတ်မှာ ပြင်းထန်လှပြီး ယခင်က တည်ငြိမ်မှုနှင့် လုံးဝ ကွဲပြားခြားနားသည်။
ဘော့ဘ်၏ တုံ့ပြန်မှုကို မြင်သောအခါ ကိုင်ဒိုလည်း သံသယမဝင်ဘဲ မနေနိုင်တော့ပေ။ 'ဒီကောင်လေးက တကယ်ပဲ အနိုင်ရဖို့ သေချာနေတာလား၊ ဒါမှမဟုတ် ဟန်ဆောင်နေတာပဲလား'
ဤကျွန်းပေါ်တွင် အချိန်အတော်ကြာ ရှိနေခဲ့ပြီဖြစ်သော ကိုင်ဒိုသည် ဦးနှောက်မရှိဘဲ ကြွက်သားပဲရှိသည့် သတ္တဝါမျိုး မဟုတ်ပေ။ ဘော့ဘ်ကို ဖိအားပေးပြီးနောက်တွင်ပင် ဘော့ဘ်က ဤမျှ တည်ငြိမ်နေနိုင်ခြင်းက သူ့ကို အနည်းငယ် သံသယဝင်စေသည်။ သို့သော် ဤအရာများသည် သူ၏ စိတ်ထဲတွင် ခဏတာ ဖြတ်ပြေးသွားသော အတွေးများသာ ဖြစ်သည်။ သူ၏ မျက်လုံးများ ဝင်းလက်သွားပြီး နောက်ထပ် တုံ့ဆိုင်းမနေတော့ဘဲ ဦးအောင် စတင်တိုက်ခိုက်ရန် ကိုင်ဒို ဆုံးဖြတ်လိုက်သည်။ ဤကောင်လေး ဟန်ဆောင်နေခြင်း ရှိ၊ မရှိကို နောက်တစ်စက္ကန့်အတွင်း သိရတော့မည် ဖြစ်သည်။
ကွင်းထဲတွင် ကိုင်ဒိုသည် ရုတ်တရက် အရှိန်မြှင့်လိုက်သည်။ သူ၏ ဘယ်ခြေဖြင့် မြေပြင်ကို ပြင်းထန်စွာ နင်းလိုက်ရာ မာကျောသော မြေပြင်သည် ချက်ချင်းပင် ကျင်းကြီးတစ်ခု ဖြစ်သွားပြီး အုတ်ခဲနှင့် ကျောက်ခဲများ လွင့်စင်တက်သွားသည်။ တစ်ချိန်တည်းမှာပင် ကိုင်ဒိုသည် သူ့လက်နက်ကို မြှောက်လိုက်သည်။ လေထဲရှိ တုတ်ကောက်ကြီးသည် ချက်ချင်းပင် နီနက်ရောင်သို့ ပြောင်းလဲသွားသည်။သံမဏိခန္ဓာဟာကီ ဖုံးလွှမ်းထားသော တုတ်ကောက်ကြီးက လေထုကို ဆုတ်ဖြဲကာ ဝူးခနဲ မြည်ဟည်းသွားသည်။ ထို့နောက် ကိုင်ဒိုသည် ထိုဆူးချွန်ပါ တုတ်ကောက်ကြီးဖြင့် ဘော့ဘ်၏ ခေါင်းတည့်တည့်သို့ ရက်ရက်စက်စက် လွှဲရိုက်ချလိုက်သည်။
ဒိန်း...!!
မိုးကြိုးပစ်ချလိုက်သကဲ့သို့ ပြင်းထန်သော ပေါက်ကွဲသံကြီး ထွက်ပေါ်လာသည်။ ဘော့ဘ်၏ ခြေဖဝါးအောက်ရှိ ကျောက်ပြားများသည် လိပ်ခွံကဲ့သို့ အက်ကွဲသွားသည်။ အက်ကြောင်းများသည် အရပ်မျက်နှာအနှံ့သို့ ပျံ့နှံ့သွားပြီး ကြီးမားလှသော ဖုန်မှုန့်တိမ်တိုက်ကြီး တက်လာသည်။ လူရိပ်နှစ်ခုစလုံးသည် မီးခိုး မြူမှောင်များအတွင်း နစ်မြုပ်သွားကြသည်။
"ကြည့်စမ်း။ ဒါ ကိုင်ဒိုရဲ့ အမှတ်သညာ လှုပ်ရှားမှု 'မိုးကြိုးစကြာ' ပဲ"
"တုတ်ကောက်ရဲ့ အရောင်ကို ကြည့်ရတာ သူ သံမဏိခန္ဓာဟာကီကိုပါ သုံးထားပုံရတယ်"
"ကိုင်ဒိုက အစကတည်းက အစွမ်းကုန် ထုတ်သုံးလိမ့်မယ်လို့ မထင်ထားမိဘူး။ ပြိုင်ဘက်ကို ပြန်တိုက်ဖို့ အခွင့်အရေး လုံးဝမပေးဘူးပဲ"
"ငါက နည်းနည်းလောက် ပိုကြည့်ချင်သေးတာ၊ ဒါပေမဲ့ ပွဲက ပြီးသွားပြီနဲ့ တူတယ်"
"ငါလောင်းရဲတယ်၊ ဒီကောင် သေတာ တော်တော် ရုပ်ပျက်ဆင်းပျက် ဖြစ်မှာ။ အသားစိုင်တုံး ဖြစ်သွားလောက်ပြီ"
ကိုင်ဒို တိုက်ခိုက်လိုက်သည်နှင့် အလုပ်သင် သင်္ဘောသားအချို့နှင့် ဝါရင့် ပင်လယ်ဓားပြအချို့က လှောင်ပြောင် သရော်ကြသည်။
"ကိုင်ဒိုက ဒီလောက်အောက်တန်းကျကျ တိုက်လိမ့်မယ်လို့ ဘယ်သူထင်မှာလဲ။ လူသစ်တစ်ယောက်ကို အစကတည်းက သူ့ရဲ့ အစွမ်းကုန်လှုပ်ရှားမှုကို သုံးပစ်တယ်"
သို့သော်လည်း တိုက်ပွဲမြေပြင်မှ မီးခိုးများ လွင့်ပြယ်သွားသောအခါ အခြေအနေကို မြင်လိုက်ရသည့် လူတိုင်းမှာ အံ့အားသင့်လွန်းသဖြင့် အသက်ရှူပင် မှားမတတ် ဖြစ်သွားကြသည်။ ဘော့ဘ်သည် နေရာတွင်ပင် လုံးဝ မလှုပ်မယှက် ရပ်နေသည်။ သူ၏ ညာလက်ကို ခန္ဓာကိုယ်ရှေ့တွင် မြှောက်ထားပြီး ကိုင်ဒို၏ ဆူးချွန်ပါ တုတ်ကောက်ကြီးမှာမူ သူ၏ လက်မောင်းပေါ်သို့ ဖိကပ်လျက်သား ရှိနေသည်။
"တောက်... ခွေးမသားပဲ။ သူက ကိုင်ဒိုရဲ့ အပြင်းထန်ဆုံး တိုက်ကွက်ကို လက်တစ်ဖက်တည်းနဲ့ တားလိုက်တာလား"
"ဒီကောင်က ဘယ်လို အကောင်မျိုးလဲ"
"ဒါ တကယ်ပဲ လူသစ် ဟုတ်ရဲ့လား..."
အခြေအနေကို အနီးကပ် စောင့်ကြည့်နေသော ရော့ခ်သည်လည်း ဤမြင်ကွင်းကြောင့် မှင်တက်သွားရသည်။ ကိုင်ဒို၏ 'မိုးကြိုးစကြာ’ကိုမည်သည့် သံမဏိခန္ဓာဟာကီမျှ မသုံးဘဲ ဗလာခန္ဓာကိုယ်သက်သက်ဖြင့် တိုက်ရိုက်တားဆီးနိုင်ခြင်းက မယုံနိုင်စရာပင် ဖြစ်သည်။ ဤကောင်လေး၏ ခန္ဓာကိုယ် ကြံ့ခိုင်မှုက ဘယ်လောက်တောင် ကြောက်စရာကောင်းနေလို့လဲ။ သို့သော်လည်း ထို့နောက်တွင် ရော့ခ်က လောဘဇောမျက်လုံးများ ဝင်းလက်လျက် အော်ဟစ်ရယ်မောလိုက်သည်။ ယခုမှသာ စည်းရုံးသိမ်းသွင်းရန် ထိုက်တန်သော ပါရမီရှင်မျိုး ဖြစ်ပေသည်။
တစ်ချိန်တည်းမှာပင် တိုက်ပွဲမြေပြင်၌ မိမိ၏ တိုက်ကွက်ကို ဤမျှ လွယ်ကူစွာ ပယ်ဖျက်နိုင်သည်ကို မြင်လိုက်ရသော ကိုင်ဒိုသည် မျက်လုံးထဲတွင် ထိတ်လန့်ရိပ်အချို့ ဖြတ်ပြေးသွားရသည်။ သူ၏ နှလုံးသားက တုန်လှုပ်မှုကြောင့် ပြင်းထန်စွာ ခုန်လှုပ်နေသည်။ ဤတိုက်ခိုက်မှုတွင် သူသည် မည်သည့်အရာကိုမျှ ချန်မထားခဲ့ကြောင်း သတိပြုသင့်သည်။ တိုက်ခိုက်လိုက်သည့် အချိန်၌ သူသည် တစ်ကွက်တည်းဖြင့် တိုက်ပွဲကို အဆုံးသတ်ရန် ရည်ရွယ်ခဲ့ခြင်း ဖြစ်သည်။ သို့သော် ဤမျှ အားစိုက်ထုတ်စရာမလိုဘဲ တားဆီးခံရလိမ့်မည်ဟု သူ လုံးဝ မမျှော်လင့်ထားခဲ့ချေ။ လွန်ခဲ့သော အချိန်က သူ၏ တိုက်ခိုက်မှုကို ဤမျှ လွယ်ကူစွာ တားဆီးနိုင်ခဲ့သူဟူ၍ တပ်ခွဲမှူးများသာ ရှိခဲ့ဖူးသည်။ ဖြစ်နိုင်ပါ့မလား...
သို့သော် နှစ်ပေါင်းများစွာ တိုက်ပွဲအတွေ့အကြုံများကြောင့် ကိုင်ဒိုသည် သူ၏ အတွေးများကို အပြင်သို့ မပြသခဲ့ချေ။ သူသည် ဘော့ဘ်ကို ပိုမို တည်ကြည်လေးနက်သော မျက်လုံးများဖြင့်သာ စိုက်ကြည့်လိုက်သည်။
"သင်ကိုယ်သင် ပင်လယ်ဓားပြကြီးလို့ ခေါ်ပြီး ဒီလောက်တောင် လက်သီးမပြင်းဘူးလား"
ကိုင်ဒို၏ တုတ်ကောက်ကို လက်တစ်ဖက်တည်းဖြင့် ဖမ်းထားသော ဘော့ဘ်က လှောင်ပြောင်ခြင်း မပြုဘဲ မနေနိုင်တော့ပေ။ ကိုင်ဒို၏ တိုက်ခိုက်မှုကို တိုက်ရိုက် ကြံ့ကြံ့ခံနိုင်သည်ကို မြင်သောအခါ သူကိုယ်တိုင်လည်း အနည်းငယ် အံ့ဩသွားမိသည်။ ဤစိုင်တမ(ကိုကတုံး) ခန္ဓာကိုယ်တည်ဆောက်ပုံက တကယ်ပဲ ကြောက်စရာကောင်းလှသည်။ နှစ်လအတွင်းမှာတင် ဤမျှအဆင့်သို့ ရောက်ရှိလာနိုင်သည်...
"ကဲ... အခု ငါ့အလှည့် ရောက်ပြီ"
ကိုင်ဒိုကို ကြည့်ရင်း ဘော့ဘ်၏ မျက်လုံးများထဲတွင် တောက်ပသော အလင်းရောင်တစ်ခု ဝင်းလက်သွားသည်။ ထို့နောက် သူသည် ရပ်နေသော နေရာမှ ရုတ်တရက် ပျောက်ကွယ်သွားလေသည်။