အပိုင်း (၄) ငါ ဘော့ဘ်ကို စိန်ခေါ်ချင်တယ်
လူတိုင်း လှည့်ကြည့်လိုက်ကြရာ ကြံ့ခိုင်တောင့်တင်းလွန်းသည့် ကိုယ်လုံးကိုယ်ထည်ရှိသော လူငယ်တစ်ဦးကို မြင်လိုက်ကြရသည်။ သူ၏ ကြွက်သားများမှာ ဖုထစ်ဖောင်းကြွနေပြီး ဦးခေါင်းပေါ်တွင် ဦးချိုတစ်စုံ ရှိနေကာ ဖရိုဖရဲဖြစ်နေသော ဆံပင်နက်များမှာ ကျောပြင်ပေါ်သို့ ဝဲကျနေသည်။ တစ်ကိုယ်လုံးမှ ပေါက်ကွဲထွက်လုမတတ် စွမ်းအင်အရှိန်အဝါများ ဖြာထွက်နေပြီး ပုခုံးပေါ်တွင် ဆူးချွန်ပါသည့် သံပတ်လက်နက်ကြီးကို ထမ်းထားရင်း လူအုပ်ထဲရှိ ဘော့ဘ်ထံသို့ စူးစိုက်ကြည့်နေသည်။ ထို့နောက် သူသည် စမ်းသပ်ကွင်း၏ အလယ်ဗဟိုသို့ မောက်မာဝင့်ဝါစွာ လျှောက်လှမ်းလာခဲ့သည်။ ရဲတင်းသော အမူအရာဖြင့် ကပ္ပတိန်ကို ကြည့်ကာ သူက ဆို၏။
“ကပ္ပတိန်... ဟို ဘော့ဘ်ဆိုတဲ့ ကောင်လေးကို ကျွန်တော်ပဲ စမ်းသပ်ပါရစေ”
ဒါသည် ရွှေလိုတန်ဖိုးရှိသည့် အခွင့်အရေးဖြစ်သဖြင့် သူ လက်လွှတ်ခံမည်မဟုတ်ပေ။ တပ်ခွဲမှူးများ လုနေကြပြီး စောစောကတင် လူအများ၏ အာရုံစိုက်မှုကို ခိုးယူသွားသည့် ထိုပါရမီရှင်ကိုသာ သူ အနိုင်ယူနိုင်ခဲ့လျှင် မည်သူကများ တကယ့် ဘီလူးသရဲစီးတဲ့ ပါရမီရှင်အစစ်က ဘယ်သူလဲဆိုတာ သံသယဝင်ရဲဦးမည်နည်း။
“ဟားဟားဟား... မင်းက အဲဒီကောင်လေးကို တော်တော် စိတ်ဝင်စားနေတာပဲကိုး”
ရော့ခ်သည် အကြည့်ကို ကိုင်ဒိုထံမှ ဘော့ဘ်ထံသို့ ရွှေ့လိုက်သည်။ ဘော့ဘ်ကမူ စောစောကတင် အကြည့်ကို လွှဲဖယ်လိုက်ပြီး ဖြစ်သည်။
“ကောင်းပြီလေ... မင်းကိုယ်တိုင်က တောင်းဆိုလာမှတော့ ဘော့ဘ်ကို မင်းတစ်ယောက်တည်း စမ်းသပ်ဖို့ ငါ ခွင့်ပြုတယ်”
ပြောပြောဆိုဆိုဖြင့် ရော့ခ်သည် သူ၏ ထိပ်တန်းအဆင့် အာရုံခံဟာကီကို အသက်သွင်းလိုက်ပြီး ကွင်းထဲရှိ ဘော့ဘ်ကို အာရုံစိုက်လိုက်သည်။ ထိုအခါ ဘော့ဘ်၏ ကိုယ်ပေါ်မှ ရှင်းမပြတတ်သည့် အရှိန်အဝါတစ်ခု ဖြာထွက်နေသည်ကို သူ သတိပြုမိသွား၏။ ၎င်းမှာ သူတစ်ခါမျှ မကြုံဖူးသည့် စွမ်းအင်မျိုး ဖြစ်သည်။ ထို့ကြောင့် ရော့ခ်၏ မျက်ခုံးများ မသိမသာ တွန့်ကွေးသွားရသည်။ ဤလူသည် အမှန်ပင် မရိုးရှင်းချေ။ ကိုင်ဒို၏ တောင်းဆိုချက်ကို သူ ချက်ချင်း သဘောတူလိုက်ခြင်းမှာ ဘော့ဘ်၏ စွမ်းရည်အစစ်အမှန်ကို သူကိုယ်တိုင်လည်း မြင်ချင်သောကြောင့် ဖြစ်သည်။
မုတ်ဆိတ်ဖြူက ဘော့ဘ်ကို ကိုယ်ခံပညာ ပါရမီရှင်တစ်ဦးအဖြစ် ချီးမွမ်းခဲ့သော်လည်း သူကိုယ်တိုင်မှာမူ ဘော့ဘ် တိုက်ခိုက်သည်ကို တစ်ခါမျှ မမြင်ဖူးသေးချေ။ သို့သော် ကိုင်ဒို၏ စွမ်းရည်ကိုမူ သူ အသေအချာ သိသည်။ ဤအလုပ်သင် သင်္ဘောသားများထဲတွင် ကိုင်ဒိုသည် သံသယဖြစ်ဖွယ်မရှိဘဲ အသန်မာဆုံး ဖြစ်၏။ ယခု ကိုင်ဒို၏ တောင်းဆိုချက်မှာ ဘော့ဘ်အတွက် အကောင်းဆုံး စမ်းသပ်ချက်တစ်ခု ဖြစ်လာပေလိမ့်မည်။
“ဟေ့... ဘာလို့ အဲလို ဖြစ်ရတာလဲ”
“ဘာလို့ ဘော့ဘ်ကျတော့ အလုပ်သင် သင်္ဘောသားတစ်ယောက်ရဲ့ စမ်းသပ်မှုကို ခံယူရပြီး ကျွန်တော်တို့ကျတော့ အဖွဲ့ဝင်အစစ်တွေနဲ့ ရင်ဆိုင်ရမှာလဲ”
“ဟုတ်တယ်... မတရားဘူး။ ကျွန်တော်တို့အားလုံးက လူသစ်တွေချည်းပဲကို သူကျတော့ ဘာလို့ အထူးအခွင့်အရေး ရနေတာလဲ”
“ဟွန်း... သေချာတယ်၊ ဒီကြားထဲမှာ ကွယ်ဝှက်ထားတဲ့ မရိုးသားတဲ့ သဘောတူညီချက်တစ်ခုခု ရှိနေရမယ်”
ရော့ခ် စကားဆုံးသည်နှင့် လူအုပ်ထဲမှ ကန့်ကွက်သံများ လှိုင်းလုံးတစ်ခုကဲ့သို့ ပေါက်ကွဲထွက်လာတော့သည်။ သူတို့မျက်လုံးထဲတွင် အလုပ်သင် သင်္ဘောသားဟူသည် ပုံမှန်အဖွဲ့ဝင်များထက် သဘာဝအတိုင်း အများကြီး ပို၍ အားနည်းသည်ဟု မြင်ကြသည်။ အကယ်၍ ဘော့ဘ်သာ အလုပ်သင် သင်္ဘောသားတစ်ဦးနှင့် ရင်ဆိုင်ရလျှင် စမ်းသပ်မှုအောင်မြင်ဖို့ အခွင့်အလမ်းမှာ သိသိသာသာ ပိုများသွားမည် ဖြစ်သည်။ ဤအခြေအနေသည် အဖွဲ့ဝင်အစစ်များ၏ စမ်းသပ်မှုကို ခံယူရမည့်သူများအတွက် သိသာထင်ရှားစွာ မတရားပေ။
ထိုအချိန်တွင် လူအုပ်ထဲ၌ မိမိကိုယ်ကိုယ် သန်မာလှပြီဟု ထင်နေကြသော လူအချို့က ကိုင်ဒို၏ ရှေ့တည့်တည့်မှာတင် သူ့ကို တိုက်ရိုက် လှောင်ပြောင် သရော်လာကြသည်။ ထိုမြင်ကွင်းကိုမူ အဖွဲ့ဝင်အစစ်များက အေးစက်စက် မျက်လုံးများဖြင့်သာ စောင့်ကြည့်နေကြ၏။ သူတို့သည် စိတ်ထဲမှ တဟားဟား ရယ်မောရင်း ထိုအလုပ်သင် သင်္ဘောသားအကြောင်းကို တွေးနေကြသည်။ ဤလူသစ်များသည် ဘာမှ နားမလည်ကြသေးချေ။ ကိုင်ဒို၏ စွမ်းရည်မှာ အဖွဲ့ဝင်အစစ်ဖြစ်သည့် သူတို့ကိုယ်တိုင်ပင်လျှင် သူ့ရှေ့တွင် ကွက်ကွက်လေးမျှသာ ခံနိုင်သည့် အဆင့်ရှိသည်။ သူ့ကို ရင်ဆိုင်ရသည့် မည်သူမဆို ရှုံးနိမ့်ဖို့ရာသာ ကံပါပြီးသား ဖြစ်၏။
ယခုအချိန်တွင် ကိုင်ဒိုသည် ကွင်းအလယ်၌ ရပ်နေရင်း သူ့ကို လှောင်ပြောင်နေသည့် လူသစ်များကို ကြည့်နေသည်။ သူ စကားတစ်ခွန်းမှ မဆိုချေ။ ငြိမ်သက်စွာ ရပ်နေသော သူ၏ ခန္ဓာကိုယ်သည် ရှေ့သို့ ခြေတစ်လှမ်း တိုးလိုက်သည်။ ချက်ချင်းဆိုသလိုပင် မြေပြင်ပေါ်၌ တွင်းကြီးတစ်ခု ဖြစ်သွားပြီး ဖုန်မှုန့်များနှင့် ကျောက်ခဲများ ဘေးဘီသို့ လွင့်စင်သွားတော့သည်။ သူ၏ အကြည့်များက ထိုလူများထံသို့ စူးစိုက်သွား၏။
ကွင်းထဲရှိ ပင်လယ်ဓားပြများသည် အခြေအနေတစ်ခုခု မှားယွင်းနေပြီဆိုသည်ကို ချက်ချင်း ခံစားလိုက်ရသည်။ ဤခံစားချက်မှာ... ရှေးဦးကမ္ဘာဦးက သားရဲကြီးတစ်ကောင်၏ စိုက်ကြည့်ခြင်းကို ခံနေရသကဲ့သို့ပင် ဖြစ်သည်။ ချွေးစေးများ တဖြာဖြာ ကျလာပြီး သူတို့ ချက်ချင်း နောက်ဆုတ်ဖို့ ပြင်ကြတော့သည်။ သို့သော် ကိုင်ဒိုက သူတို့ကို စိတ်ကြိုက် လာချင်တိုင်းလာ၊ ပြန်ချင်တိုင်းပြန်ဖို့ ခွင့်ပြုမည်မဟုတ်ပေ။ သူတို့အနေဖြင့် တစ်ခုခု ထားခဲ့ရမည်ဖြစ်ပြီး၊ ၎င်းမှာ သူတို့၏ အသက်များပင် ဖြစ်သည်။
ကိုင်ဒို၏ မျက်နှာမှာ ရက်စက်ကြမ်းကြုတ်မှုများဖြင့် ပြည့်နှက်သွားပြီး ကြီးမားလှသော ဆူးချွန်သံပတ်လက်နက်ကြီးကို ထိုပင်လယ်ဓားပြများ၏ မျက်နှာဆီသို့ လွှဲရိုက်လိုက်တော့သည်။ ၎င်းကို မြင်သောအခါ ထိုပင်လယ်ဓားပြများသည်လည်း အတိုင်းအတာတစ်ခုအထိ သန်မာကြောင်း ပြသကြသည်။ သူတို့ ချက်ချင်း တုံ့ပြန်သည့်အနေဖြင့် ဝင်လာသော တိုက်ခိုက်မှုကို ကာကွယ်ရန် သူတို့၏ ဓားရှည်များကို မြှောက်လိုက်ကြ၏။
လက်နက်များ အချင်းချင်း ထိမှန်သွားသည့် နေရာမှ ကျယ်လောင်လှသော ပွတ်တိုက်သံကြီး ထွက်ပေါ်လာပြီး အသံများပဲ့တင်ထပ်သွားသည်။ ပင်လယ်ဓားပြများ၏ ခန္ဓာကိုယ်များသည် လွင့်ထွက်သွားကြပြီး သူတို့၏ ဦးခေါင်းများမှာ ရိုက်ခွဲခံလိုက်ရသည့် ဖရဲသီးများကဲ့သို့ ပေါက်ကွဲထွက်သွားတော့သည်။ ထိုနေရာတွင် သွေးကွက်ကြီးတစ်ခုအပြင် ပုံပျက်ပန်းပျက် ဖြစ်နေသော ဓားရှည်အချို့သာ ကျန်ရစ်ခဲ့၏။
ဤမြင်ကွင်းကို မြင်လိုက်ရသဖြင့် လူတိုင်း အသက်ရှူပင် မှားမတတ် တုန်လှုပ်ခြောက်ခြားသွားကြသည်။ တစ်ကွင်းလုံး တိတ်ဆိတ်ငြိမ်သက်သွားရ၏။ စောစောက ကန့်ကွက်ခဲ့ကြသူအချို့မှာ ချက်ချင်းပင် ချွေးစေးများ တကိုယ်လုံး စိုရွှဲသွားကြသည်။
ဒါ... တစ်ကွက်တည်းနဲ့ အသေ သတ်လိုက်တာလား။
ဒါက အားပြင်းလွန်းတယ်၊ တကယ်ပဲလား။ သူက တကယ်ပဲ အလုပ်သင် သင်္ဘောသားတစ်ယောက် ဟုတ်ရဲ့လား။
“ဟားဟားဟား... ထင်တဲ့အတိုင်းပဲ၊ တစ်ကွက်တည်းနဲ့ အသတ်ခံလိုက်ရတာပဲ”
“နေရာမသိတဲ့ ဒီလူသစ်တွေကို တစ်ယောက်ယောက်က သင်ခန်းစာကောင်းကောင်း ပေးဖို့ လိုနေတာ”
“ဟိုလူသစ်တွေကို ကြည့်ဦး၊ အားလုံး ကြောက်လန့်တုန်လှုပ်ပြီး ကျောက်ရုပ်လို ဖြစ်နေကြပြီ”
“အရူးတစ်စုပဲ၊ ကိုင်ဒိုကို တကယ် နိုင်စားရလွယ်တယ် အောက်မေ့နေကြတာကိုး။ သူက ငါတို့ အလုပ်သင် သင်္ဘောသားတွေထဲမှာ အဆင့်တစ် လို့ အသိအမှတ်ပြုခံထားရတာ၊ သူ့ရဲ့ ခွန်အားက ကြောက်စရာကောင်းလွန်းတယ်”
“ဒါနဲ့ ပြောရဦးမယ်၊ ဒီနှစ်တွေထဲမှာ ကိုင်ဒိုလက်ချက်နဲ့ သေခဲ့ရတဲ့သူတွေဟာ တစ်ထောင်မရှိရင်တောင် အနည်းဆုံး ရှစ်ရာလောက်တော့ ရှိလိမ့်မယ်”
“ဟားဟားဟား... ဆုကြေးငွေ ဘီလီယံချီတဲ့ ကောင်တွေတောင် မနည်းဘူးပါတယ်”
“ဒီ ဘော့ဘ် ဆိုတဲ့ကောင်တော့ တကယ့်ကို သနားစရာပဲ၊ ကိုင်ဒိုရဲ့ ပစ်မှတ် ဖြစ်သွားရတာ။ ဒီနေ့ထက် ပိုပြီး အသက်ရှင်ရတော့မယ် မထင်ဘူး”
ကိုင်ဒို၏ စွမ်းရည်ကို သိရှိပြီးသားသူများက ချက်ချင်း တဟားဟား ရယ်မောပြောဆိုကြတော့သည်။ ဤကဲ့သို့ သွေးသံရဲရဲ မြင်ကွင်းမျိုးမှာ သူတို့ အမှန်တကယ် မြင်ချင်နေသည့် အရာပင် ဖြစ်သည်။ အသံကျယ်ကျယ်ဖြင့် အော်ဟစ်နေကြခြင်းက ဘာအသုံးကျသနည်း။
ကိုင်ဒိုကမူ ယခုအချိန်တွင် မောက်မာဝင့်ဝါသော အမူအရာဖြင့် လူတိုင်းကို ဝေ့ဝဲကြည့်ကာ အသံကျယ်ကြီးဖြင့် အော်ပြောလိုက်သည်။
“ဘယ်သူ ရှိသေးလဲ”
ယခုတစ်ကြိမ်တွင်မူ လူသစ်များသည် ခြောက်ခြားဖွယ်ကောင်းလောက်အောင် ငြိမ်သက်သွားကြသည်။ မည်သူတစ်ဦးတစ်ယောက်မျှ အသံမထွက်ရဲကြသလို၊ ကန့်ကွက်စကား ဆိုဖို့ရာလည်း ဝေးစွတကား။
သူတို့၏ တုံ့ပြန်မှုကို မြင်သောအခါ ကိုင်ဒိုက အားရပါးရ ရယ်မောလိုက်ပြီး မည်သူမျှ ပြန်မဖြေသည်ကို မြင်သဖြင့် နာမည်ကို တိုက်ရိုက် ခေါ်လိုက်တော့သည်။
“ဘော့ဘ် ဆိုတဲ့ ကောင်လေး... မင်း ဘယ်လောက်အထိ ပုန်းနေဦးမှာလဲ”
“တက်လာခဲ့စမ်း”
ထိုစကားကို ကြားသောအခါ ဘော့ဘ်သည် လူအုပ်ထဲမှ ခြေလှမ်းစတင် ထွက်လာခဲ့ပြီး စမ်းသပ်ကွင်း၏ အလယ်ဗဟိုဆီသို့ ဖြည်းညှင်းစွာ လျှောက်လှမ်းလာခဲ့သည်။ သူ၏ မျက်နှာပေါ်တွင် ခပ်ဖျော့ဖျော့ အပြုံးတစ်ခု ပေါ်လာပြီး စိတ်ထဲမှ တွေးလိုက်မိ၏။
ကိုင်ဒို... အနာဂတ်ရဲ့ ပင်လယ်ဧကရာဇ် ၊ ကမ္ဘာပေါ်မှာ အသန်မာဆုံး သတ္တဝါကြီး၊ သားရဲပင်လယ်ဓားပြအဖွဲ့ရဲ့ ကပ္ပတိန်ပေါ့။
ကိုင်ဒိုက သူ့ကို ဦးအောင် စိန်ခေါ်လိမ့်မည်ဟု သူ တစ်ခါမျှ မတွေးခဲ့ဖူးချေ။
အခုအချိန်မှာ ကိုင်ဒိုရဲ့ စွမ်းရည်က ဘယ်အဆင့်အထိ ရောက်နေပြီလဲဆိုတာ ငါ သိချင်မိသား။
ဘော့ဘ်အနေဖြင့် အနည်းငယ်တော့ စိတ်ဝင်စားမိသည်မှာ အမှန်ပင်။
ဒါပေမဲ့ ရပါတယ်။ ငါလည်း နှစ်လလောက် လေ့ကျင့်ထားတာဆိုတော့ လေ့ကျင့်ဖော်တစ်ယောက် လိုနေတာပဲ။ ပြီးတော့ ဒီလောက် လူတွေအများကြီးရှေ့မှာ ကိုင်ဒိုကို ငါသာ ရိုက်နှက်လိုက်ရင် သူ ပင်လယ်အကရာဇ်ဖြစ်လာတဲ့အခါ ဒါဟာသူ့သမိုင်းကြောင်းမှာ ဖျက်မရတဲ့ အမည်းစက်ကြီးတစ်ခု ဖြစ်နေမှာ သေချာတယ်
တော်တော် စိတ်ဝင်စားဖို့ကောင်းမယ့်ပုံပဲ...
ထိုသို့တွေးရင်း ဘော့ဘ်၏ မျက်နှာထက်မှ အပြုံးမှာ ပိုမိုကျယ်ပြန့်လာပြီး ရှေ့သို့ ဆက်လျှောက်လာခဲ့သည်။ ယခုအခါ ဘော့ဘ်သည် စမ်းသပ်ကွင်း၏ အလယ်ဗဟိုသို့ ရောက်ရှိလာခဲ့ပြီ ဖြစ်သည်။