အပိုင်း (၃၃) ကမ္ဘာ့သူကောင်းမျိုးနွယ်ဝင်တို့၏ဒိုင်းကာ CP0

စီတီ၏ အော်ဟစ်သတိပေးသံကို ကြားလိုက်ရသောအခါ ချားလ်မိန်း၏ မျက်နှာသည် ပျက်ယွင်းသွားတော့သည်။

"မင်းက ကိုယ့်ကိုယ်ကိုယ် ဘာကောင်မှတ်နေလဲ။ နောက်တစ်လုံး ထပ်ပြောကြည့်စမ်း၊ မင်းကို ငါ သေနတ်နဲ့ ပစ်သတ်ပစ်မယ်"

သူ၏ လေသံသည် အလွန်အမင်း ရိုင်းစိုင်းရော်ရမ်းလှပြီး ရေတပ်ဗိုလ်ချုပ်ဒုတိယအဆင့်ဖြစ်သူကို နည်းနည်းမျှပင်ဂရုမစိုက်ကြောင်းပြသနေသည်။ အကြောင်းမူကား သူသည် ကမ္ဘာ့သူကောင်းမျိုးနွယ်ဝင်တစ်ဦး ဖြစ်နေသောကြောင့်ပင်။ ဒေသန္တရခွဲတစ်ခုမှ ဗိုလ်ချုပ်ဒုတိယအဆင့်မဆိုထားနှင့်၊ ရေတပ်ဗိုလ်ချုပ်ကြီးတစ်ဦးနှင့် ကြုံရပါစေဦးတော့ သူ့အတွက်မူ အတူတူပင် ဖြစ်သည်။ သူတို့သည် ကမ္ဘာ့သူကောင်းမျိုးနွယ်ဝင်တို့ မွေးမြူထားသည့် အစောင့်ခွေးများမျှသာ ဖြစ်ကြ၏။

ရေတပ်စစ်သားများကလည်း ဤအမှန်တရားကို ကောင်းစွာ သိရှိထားကြသည်မှာ ထင်ရှားသည်။ ထို့ကြောင့် သူတို့သည် ဗိုလ်ချုပ်ဒုတိယအဆင့် စီတီ၏ အမိန့်ကို လုံးဝဥပေက္ခာပြုကာ ရှေ့သို့ ဆက်လက်အရှိန်မြှင့် မောင်းနှင်သွားကြတော့သည်။

ဤသည်ကို မြင်လျှင် စီတီ၏ မျက်နှာအမူအရာသည် အလွန်အမင်း အိုမင်းသွားပြီး ပျာယာခတ်သွားရချေပြီ။ တစ်ဖက်လူများသည် သာမန်လူများသာ ဖြစ်ပါက တစ်မျိုး ဖြစ်ပေလိမ့်မည်။ ကမ္ဘာ့သူကောင်းမျိုးနွယ်ဝင်နှင့် တိုးမိသည့် သူတို့၏ ကံကြမ္မာကိုသာ အပြစ်တင်ရုံ ရှိသည်။ သို့သော်လည်း ယခုလူနှစ်ဦးမှာမူ ရေတပ်မှ အလိုရှိနေသည့် ဝရမ်းပြေးပင်လယ်ဓားပြများ ဖြစ်ကြ၏။

ကိုင်ဒို - ဆုကြေးငွေ ဘယ်ရီ သန်း ၅၀၀။

ဘော့ဘ် - ဆုကြေးငွေ ဘယ်ရီ သန်း ၇၀၀။

နှစ်ဦးစလုံးသည် ရော့ခ်ပင်လယ်ဓားပြအဖွဲ့ဝင်များ ဖြစ်ကြသည်။ ထိုပင်လယ်ဓားပြအဖွဲ့သည် အခြားသော အင်အားစုများနှင့် မတူညီကြောင်း သတိပြုသင့်ပေသည်။ သူတို့သည် ကမ္ဘာ့သူကောင်းမျိုးနွယ်ဝင်များနှင့် တွေ့ဆုံသည့်အခါ ကြောက်ရွံ့ထိတ်လန့်ခြင်း မရှိသည့်အပြင် သွေးအေးအေးဖြင့်ပင် သတ်ဖြတ်ပစ်မည့်သူများ ဖြစ်ကြ၏။

ယခုအချိန်တွင် စီတီသည် အရှေ့တိုးရန်လည်း ခက်၊ အနောက်ဆုတ်ရန်လည်း မရဘဲ လွန်စွာ စိတ်ပျက်အားငယ်မှုများဖြင့် ပြည့်နှက်နေရတော့သည်။

စီတီ၏ မျက်နှာအမူအရာကို မြင်သော် ချားလ်မိန်းသည် မိမိအောက်ရှိ ကျွန်၏ခေါင်းကို ပုတ်ကာ အနားသို့ တိုးလာခဲ့သည်။ ပြီးနောက် မထီမဲ့မြင်ပြုသော လေသံဖြင့် ပြောလိုက်၏။

"လူနှစ်ယောက်တည်းကို ဘာကြောက်နေတာလဲ။ သုံးစားမရတဲ့ အမှိုက်ကောင်။ မင်းက ငါ့ကို ကာကွယ်ပေးဖို့ အရည်အချင်း ရှိလို့လား"

ပြောပြီးသည်နှင့် ချားလ်မိန်းသည် ထရပ်ကာ စီတီကို ကန်ပစ်လိုက်သည်။ ဗိုလ်ချုပ်ဒုတိယအဆင့်သည်ကား ရှောင်တိမ်းရန် မဝံ့ရဲရှာပေ။ ရေတပ်ဗိုလ်ချုပ်ဒုတိယအဆင့်တစ်ဦးသည် လူအများရှေ့တွင် ဤမျှ အရှက်ခွဲခံနေရသော်လည်း အနားရှိ မည်သူတစ်ဦးမျှ တုံ့ပြန်ခြင်း မရှိကြချေ။ ရေတပ်ရဲဘော်ငယ်များအနေဖြင့် အရှက်ရသည်ဟု ခံစားရသော်လည်း အောင့်အည်းသည်းခံရုံမှတစ်ပါး အခြားမရှိပြီ။ အခြားနည်းလမ်း မရှိတော့ပေ။ သူတို့ရှေ့မှ လူသည် ကမ္ဘာ့အထက်တန်းလွှာ၊ ကမ္ဘာ့သူကောင်းမျိုးနွယ်ဝင်တစ်ဦး ဖြစ်နေသည်။ ရေတပ်၏ တာဝန်မှာ မိမိကိုယ်ကိုယ် နတ်ဘုရားတို့၏ အနွယ်အတော်များ(စောက်ရူးတွေ)ဟု ခံယူထားကြသော ထိုသူများကို ကာကွယ်စောင့်ရှောက်ရန်သာ ဖြစ်ပေသည်။

ထိုစဉ် ကန်ကျောက်ခံလိုက်ရသော စီတီသည် ဦးနှောက်တစ်ခုလုံး ဗလာကျင်းသွားသလို ခံစားလိုက်ရသည်။ ထို့နောက် ထူးဆန်းသော မျက်နှာဖုံးများ စွပ်ထားသည့် လူတစ်စုသည် ရုတ်ခြည်း ပေါ်ပေါက်လာကြတော့သည်။ သူတို့၏ ပုံပန်းသဏ္ဌာန်သည် လွန်စွာ ဆန်းကြယ်လှ၏။

"CP0!?"

စီတီ၏ မျက်နှာတွင် ထိတ်လန့်တုန်လှုပ်မှုများ ဖြတ်ပြေးသွားသည်။ ဤသင်္ဘောပေါ်တွင် ကမ္ဘာ့သူကောင်းမျိုးနွယ်ဝင်ကို စောင့်ရှောက်လာခဲ့သည်မှာ ကြာမြင့်ပြီ ဖြစ်သော်လည်း CP0 အဖွဲ့ဝင်များ ရှိနေသည်ကို သူ တစ်ကြိမ်တစ်ခါမျှ သတိမပြုမိခဲ့ချေ။ ထို့အပြင် သုံးဦးတောင်မှ ဖြစ်သည်။

CP0! ကမ္ဘာ့သူကောင်းမျိုးနွယ်ဝင်များအတွက်သာ သီးသန့်တည်ရှိသော ဖွဲ့စည်းပုံ ဖြစ်သည်။ ၎င်း၏ အဖွဲ့ဝင်များသည် အလွန်အမင်း စွမ်းအားကြီးမားကြ၏။ အားအနည်းဆုံး အဖွဲ့ဝင်သည်ပင် ဗိုလ်ချုပ်ဒုတိယအဆင့်နှင့် ယှဉ်နိုင်ပြီး ခေါင်းဆောင်များမှာမူ ရေတပ်ဗိုလ်ချုပ်ကြီးများနှင့်ပင် ယှဉ်ပြိုင်နိုင်စွမ်း ရှိကြသည်။ "ကမ္ဘာ့သူကောင်းမျိုးနွယ်ဝင်တို့၏ အတောင့်တင်းဆုံး ဒိုင်းကာ" နှင့် "ကမ္ဘာ့အစွမ်းထက်ဆုံး ထောက်လှမ်းရေးအဖွဲ့" ဟု လူသိများကြ၏။ သူတို့သည် ကမ္ဘာ့သူကောင်းမျိုးနွယ်ဝင်တို့၏ ကိုယ်ရံတော် သက်တော်စောင့်များ ဖြစ်ကြသည်။

သူတို့သည် ရှေ့ရှိ စီတီကို စူးစိုက်ကြည့်နေကြသည်။ ထို CP0 အဖွဲ့ဝင် သုံးဦး၏ မျက်ဝန်းများသည် စကားတစ်ခွန်းမျှ မဆိုဘဲ အေးစက်သွားကြတော့သည်။

နောက်တစ်စက္ကန့်တွင်...

သူတို့၏ ပုံရိပ်များသည် မူလနေရာမှ ပျောက်ကွယ်သွားကြ၏။ ပြင်းထန်သော လေပြင်းအချို့ ဝေ့ဝဲဖြတ်သန်းသွားသည်။ ထို့နောက် စီတီ၏ ဘေးတွင် ပုံရိပ်သုံးခုသည် တစ်ပြိုင်နက်တည်း ပေါ်လာခဲ့တော့သည်။

သူတို့ထဲမှ နှစ်ဦးက စီတီ၏ လက်မောင်းများကို မြဲမြံစွာ ချုပ်ကိုင်လိုက်ပြီး ကျန်တစ်ဦး၏ လက်သီးသည်ကား စီတီ၏ ရင်ဘတ်ကို တိုက်ရိုက် ထိုးဖောက်သွားခဲ့သည်။ ယူနီဖောင်းပေါ်သို့ သွေးများ တောက်တောက်ကျလာတော့သည်။

စီတီသည် အထိုးခံလိုက်ရသော မိမိ၏ ရင်ဘတ်ကို ဖိထားရင်း သွေးတစ်လုပ် အန်ချလိုက်သည်။ ပြီးနောက် ရွံရှာစက်ဆုပ်မှုများ ပြည့်နှက်နေသော မျက်ဝန်းများဖြင့် ကြည့်နေသည့် ချားလ်မိန်းကို မင်သက်စွာ ကြည့်လိုက်မိ၏။

"ဘာ... ဘာလို့လဲ..."

သူသည် ဘာကြောင့်လဲဟု မေးမြန်းချင်ခဲ့သည်။ သို့သော်လည်း သူ၏ စကားမဆုံးမီမှာပင် သူ၏ မြင့်မားသော ခန္ဓာကိုယ်ကြီးသည် ကြမ်းပြင်ထက်သို့ တန်းတန်းမတ်မတ် လဲပြိုသွားခဲ့လေပြီ။

ဘုန်း!!

ရုပ်အလောင်းသည် သင်္ဘောပတ်လမ်းကြမ်းပြင်ပေါ်သို့ အသံတုံးတုံးဖြင့် ကျရောက်သွားသည်။ ဤမြင်ကွင်းကို မျက်ဝါးထင်ထင် မြင်လိုက်ရသော ဘေးနားရှိ ရေတပ်သားများ၏ မျက်နှာများသည် ချက်ချင်းပင် ဖြူလျော်သွားကြပြီး ထိုဆန်းကြယ်သော လူသုံးဦးထံသို့ မျက်လုံးများ စိုက်ကြည့်နေမိကြတော့သည်။ သူတို့၏ ခန္ဓာကိုယ်များသည်လည်း မထိန်းချုပ်နိုင်ဘဲ တုန်ရင်နေကြ၏။

CP0 အဖွဲ့ဝင် သုံးဦးမှာမူ ရေတပ်သားများ၏ အကြည့်များကို လုံးဝ ဂရုမစိုက်ကြချေ။ သူတို့၏ အေးစက်သော အမူအရာကို ကြည့်ခြင်းအားဖြင့် ရေတပ်ဗိုလ်ချုပ်ဒုတိယအဆင့်တစ်ဦးကို သတ်ဖြတ်ရခြင်းသည် ယင်ကောင်တစ်ကောင်ကို ရိုက်သတ်လိုက်ရသကဲ့သို့ မပြောပလောက်သော ကိစ္စမျှသာ ဖြစ်ပေလိမ့်မည်။ စိတ်လှုပ်ရှားမှု အတက်အကျ အနည်းငယ်မျှပင် မရှိကြချေ။

ဤသည်မှာ CP0—ကမ္ဘာ့သူကောင်းမျိုးနွယ်ဝင်တို့၏ ဒိုင်းကာများပင် ဖြစ်သည်။ သူတို့၏ တစ်ခုတည်းသော တာဝန်မှာ ကမ္ဘာ့သူကောင်းမျိုးနွယ်ဝင်တို့၏ ဘေးကင်းလုံခြုံရေးကို ကာကွယ်ရန်သာ ဖြစ်၏။ မည်မျှပင် မတရားသော လုပ်ရပ်များကို လုပ်ဆောင်ရပါစေ၊ သူတို့သည် ထိုသူတို့၏ ဘေးတွင် အမြဲ ရှိနေမည် ဖြစ်သည်။ တစ်ဖက်လူ၏ အဆင့်အတန်းသည် မည်သူပင်ဖြစ်စေကာမူ—မှူးမတ်မျိုးနွယ်များ၊ ရေတပ်သားများ၊ သို့မဟုတ် အခြားနိုင်ငံများမှ ဘုရင်များပင် ဖြစ်ပါစေဦးတော့—ကမ္ဘာ့သူကောင်းမျိုးနွယ်ဝင်တို့၏ အလိုဆန္ဒကို ဆန့်ကျင်ပါက ညှာတာမှုမရှိဘဲ ခုတ်ထစ်သတ်ဖြတ်ပစ်ကြမည် ဖြစ်သည်။

"ဟွန့်။ အောက်တန်းစား အမှိုက်ကောင်"

"ဒါကို ရှင်းလင်းပစ်လိုက်စမ်း"

ချားလ်မိန်းသည် သွေးညှီနံ့ကို စက်ဆုပ်ရွံရှာဟန်ဖြင့် နှာခေါင်းကို ပိတ်လိုက်သည်။ ဤသည်ကို ကြားလျှင် CP0 အဖွဲ့ဝင် သုံးဦးသည် ပတ်ဝန်းကျင်ရှိ ရေတပ်သားများကို ဝေ့ဝဲကြည့်ရှုလိုက်ကြ၏။ ဆိုလိုရင်းမှာ ရှင်းလင်းလှပေသည်။

သူတို့၏ အကြည့်အောက်သို့ ရောက်သွားသော ရေတပ်သားများသည် ခြေထောက်များ မတုန်ဘဲ မနေနိုင်ကြတော့ပေ။ ယခင်က ရှိခဲ့ဖူးသမျှ ဒေါသတရားများသည်လည်း အရည်ပျော် ပျောက်ကွယ်သွားခဲ့ရချေပြီ။ ထိုသုံးဦးထံမှ ထွက်ပေါ်လာသော ဖိအားသည် အလွန်ပင် ပြင်းထန်လွန်းလှသည်။ ရေတပ်ဗိုလ်ချုပ်ဒုတိယအဆင့်တစ်ဦးကိုပင် မျက်စိတစ်မှိတ်အတွင်း သတ်ဖြတ်နိုင်ခဲ့ချေပြီ။ အကယ်၍ မိမိတို့ကို သတ်မည်ဆိုပါက ပုရွက်ဆိတ်များကို ဖိသတ်သကဲ့သို့ လွယ်ကူပေလိမ့်မည်။

မကြာမီပင် အကြည့်ခံလိုက်ရသူများထဲမှ ရေတပ်သားများသည် အလောင်းရှိရာသို့ ကမန်းကတန်း ပြေးသွားကြပြီး မိမိတို့ အရာရှိ၏ ရုပ်အလောင်းကို ဆွဲခေါ်သွားကြတော့သည်။ သွေးစွန်းနေသောတရားမျှတမှုအပေါ်ခြုံထည်ကြီးမှာလည်း ဝတ်လံစုတ်တစ်ခုကဲ့သို့ကြမ်းပြင်ထက်တွင် တရွတ်တိုက် ပါသွားရှာတော့သည်။ရေတပ်သားအချို့သည် သင်္ဘောပတ်လမ်းကြမ်းပြင်ပေါ်မှ သွေးကွက်များကို ပျာယာခတ်ကာ သုတ်သင်ကြတော့သည်။

ဤသည်ကို မြင်သော် ချားလ်မိန်းသည် တဟားဟား အော်ရယ်တော့သည်။ ထို့နောက် သူ၏ အကြည့်ကို ပင်လယ်ပြင်ဆီသို့ လွှဲပြောင်းလိုက်၏။ သားနားလှသော အပျော်စီးသင်္ဘောကြီးနှင့် လှေငယ်လေးတို့၏ အကွာအဝေးသည် တဖြည်းဖြည်း နီးကပ်လာနေပြီ ဖြစ်သည်။

"မြန်မြန်။ အရှိန်ထပ်မြှင့်စမ်း"

"သူတို့ကို တိုက်ပစ်လိုက်စမ်း"

"..."