အပိုင်း (၁၄) ရော့ခ်ပင်လယ်ဓားပြအဖွဲ့ လှုပ်ရှားပြီ။

သင်္ဘောပေါ်ရှိ ပင်လယ်ဓားပြအားလုံး စုရုံးရောက်ရှိနေကြပြီးနောက် ရော့ခ်သည် ဘော့ဘ်၏ ဘေးတွင် မတ်တပ်ရပ်လိုက်သည်။ ထို့နောက် ရှေ့တွင်ရှိနေသော ပင်လယ်ဓားပြထုကြီးကို မျက်နှာမူကာ အသံကျယ်ကြီးဖြင့် ကြေညာလိုက်လေသည်။

"ဒါကတော့ ငါတို့ ရော့ခ်ပင်လယ်ဓားပြအဖွဲ့ရဲ့ တပ်ခွဲမှူးအသစ် ‘ဘော့ဘ်’ ပဲ။ မင်းတို့အားလုံးလည်း သူ့ကို အရင်က မြင်ဖူးကြမှာပါ"

"သူ့ကလွဲလို့ ကျန်တဲ့ တပ်ခွဲမှူးတွေကတော့ အပြောင်းအလဲမရှိဘူး"

ရော့ခ်၏ စကားလည်း ဆုံးရော အောက်တွင် ရှိနေသော လူအုပ်ကြီးမှာ ရုတ်ရုတ်သဲသဲ ဖြစ်သွားကြတော့သည်။

"ဒီကောင်လေးက ပါရမီရှင် ဘီလူးသတ္တဝါလေး ဘော့ဘ် ပေါ့လေ။ တကယ်ပဲ လူကိုယ်တိုင် မြင်ရတာက သတင်းကြားရတာထက် ပိုပြီး အရှိန်အဝါကြီးမားတာပဲ"

"လေ့ကျင့်ရေး သင်္ဘောသားဘဝကနေ တပ်ခွဲမှူးနေရာကို တန်းတက်သွားတာပဲ။ ဒါမျိုးက ရော့ခ်ပင်လယ်ဓားပြအဖွဲ့ သမိုင်းမှာ တစ်ခါမှမရှိဖူးဘူး"

"အစ်ကိုကြီး ဘော့ဘ်... ပြီးခဲ့တဲ့အပတ်က အစ်ကိုကြီး လေ့ကျင့်နေတုန်းက ကျွန်တော် ရေခပ်ပေးခဲ့သေးတယ်လေ။ ကျွန်တော့်ကို မှတ်မိလားဗျ"

ဘော့ဘ်မှာမူ ထိုလူများ ဘာတွေအော်ဟစ်ပြောဆိုနေကြသည်ကို တစ်လုံးမှ နားမလည်နိုင်ဘဲ ဆူညံပွက်လောရိုက်နေသည်ဟုသာ ခံစားနေရသည်။ ခေါင်းဆောင်ဖြစ်သူက သူ့ကို အဘယ်ကြောင့် ယခုလို မိတ်ဆက်ပေးနေရသနည်းဆိုသည်ကိုလည်း သူ တွေးမရချေ။ ထိုသူများအားလုံးသည် သူ့ကို မြင်ဖူးပြီးသား မဟုတ်ပါလော။

သူသည် ရှေ့တွင်ရှိသော လူအုပ်ကြီးကို ဝေ့ဝဲကြည့်ရှုလိုက်သည်။ တစ်ယောက်ချင်းစီမှာ ပျမ်းမျှအရပ် သုံးမီတာကျော်ကျော်ဖြင့် ထွားကြိုင်းလှပြီး ပုံသဏ္ဌာန်မျိုးစုံ ရှိကြသည်။ သူတို့ကြီးပြင်းလာစဉ်အတွင်း ဘာတွေစားသောက်ခဲ့ကြသည်ကို ဘော့ဘ် စဉ်းစား၍ပင်မရချေ။ အရပ် တစ်မီတာ ရှစ်ဆယ်သာရှိသော ဘော့ဘ်သည် သူတို့နှင့် ယှဉ်လိုက်သောအခါ လူပုလေးတစ်ယောက်ကဲ့သို့ ဖြစ်နေတော့သည်။

ဤလူများထဲတွင် သူ ရင်းနှီးနေသော မျက်နှာအချို့ကိုလည်း တွေ့ရသည်။ အများစုမှာ ဆုကြေးငွေ ဘီလီယံချီရှိသော နာမည်ကျော် လူဆိုးကြီးများ ဖြစ်ကြသည်။ ဥပမာအားဖြင့် သူ မကြာသေးမီကမှ အနိုင်ယူခဲ့သော ကိုင်ဒိုပင် ဖြစ်သည်။ ကိုင်ဒို၏ တရားဝင်ဆုကြေးငွေမှာ ဘယ်ရီသန်းပေါင်း ၅၀၀ ဖြစ်ပြီး မျိုးဆက်သစ်များထဲတွင် အမြင့်ဆုံး ဖြစ်သည်။

ဘော့ဘ်သည် ခေါင်းဆောင်နှင့် အခြားတပ်ခွဲမှူးများ၏ ဆုကြေးငွေများကိုလည်း အသေအချာ သိရှိထားသည်။ အကြောင်းမူကား ရော့ခ်ပင်လယ်ဓားပြအဖွဲ့တွင် ဆုကြေးငွေဟူသည် ဂုဏ်သိက္ခာ၏ ပြယုဂ်တစ်ခု ဖြစ်သောကြောင့်ပင်။ သူသိထားသလောက်ဆိုလျှင် -

* ရော့ခ် ဒီ ဇီဘက် (Rocks D. Xebec) - ဘယ်ရီ ၂.၄ ဘီလီယံ

* အက်ဒ်ဝါ့ဒ် နယူးဂိတ် (မုတ်ဆိတ်ဖြူ) - ဘယ်ရီ ၁.၂၅ ဘီလီယံ

* ရွှေခြေင်္သေ့ ရှီကီ - ဘယ်ရီ ၁.၁ ဘီလီယံ

* ရှာလော့ လင်လင် (မားမားကြီး) - ဘယ်ရီ ၁.၀၅ ဘီလီယံ

* ဝမ်ကျိ (Wang Zhi) ၊ ဆေးဗားအိတ်စ် နှင့် ဂျွန် (John) - ဘယ်ရီ သန်းရာချီ

ထိုအထဲတွင် ဘော့ဘ်တစ်ယောက်သာ တပ်ခွဲမှူးများထဲ၌ ဆုကြေးငွေ လုံးဝမရှိသေးသော ပင်လယ်ဓားပြ ဖြစ်နေသည်။ ဤသည်က လက်ရှိရှိနေသော ပင်လယ်ဓားပြအားလုံးနှင့် သက်ဆိုင်နေသည်။ သို့သော်လည်း သူ ဘာမှမတတ်နိုင်ချေ။ ရေတပ်ဘက်ကမူ ဘော့ဘ်ကဲ့သို့သော လူတစ်ယောက် ရှိနေသည်ကိုပင် မသိသေးပေ။ ဆုကြေးငွေ လျင်မြန်စွာ တက်လာစေရန်အတွက် သူသည် ရေတပ်က အာရုံစိုက်ရမည့် ကိစ္စတစ်ခုခုကို လုပ်ဆောင်ရပေလိမ့်မည်။

အချိန်များသည် လျင်မြန်စွာ ကုန်ဆုံးသွားပြီး ရော့ခ်ပင်လယ်ဓားပြအဖွဲ့ ရွက်လွှင့်ရမည့်နေ့သို့ ရောက်ရှိလာခဲ့သည်။

ထိုနေ့တွင် လူတိုင်းသည် ရော့ခ်သင်္ဘော၏ ကုန်းပတ်ပေါ်၌ စုဝေးနေကြသည်။ ခေါင်းဆောင်ဖြစ်သူက နောက်ဆုံး စိတ်ဓာတ်မြှင့်တင်ရေး စကားကို ပြောကြားနေသည်။ ခေါင်းဆောင် ရော့ခ်သည် သင်္ဘောဦးတွင် မတ်တပ်ရပ်ကာ ပင်လယ်ဓားပြစိတ်ဓာတ်၏ ပြယုဂ်ဖြစ်သော သူ၏ဓားရှည်ကြီးကို ဆွဲထုတ်ပြီး ပင်လယ်ပြင်ဘက်သို့ ချိန်ရွယ်ကာ အော်ဟစ်လိုက်သည်။

"အားလုံး နားထောင်စမ်း။ ရော့ခ်ပင်လယ်ဓားပြအဖွဲ့ဟာ ကမ္ဘာ့အထက်မှာ ရှိနေမှာဖြစ်ပြီး အားလုံးက ငါတို့ရှေ့မှာ ဒူးထောက်ရမယ်။ စည်းစိမ်ဥစ္စာတွေအားလုံးဟာ ငါတို့အတွက်ပဲ"

"လူတွေကို ကြောက်ရွံ့တုန်လှုပ်စေလိုက်စမ်း။ ကမ္ဘာကြီးကို တုန်လှုပ်သွားစေရမယ်။ ရော့ခ်ပင်လယ်ဓားပြအဖွဲ့ အဓွန့်ရှည်ပါစေ"

"..."

ထိုအခိုက်အတန့်တွင် လူတိုင်းသည် သွေးချင်းချင်းနီလျက် ရင်ထဲ၌ ဒီရေလှိုင်းများကဲ့သို့ ခံစားချက်များ ထကြွလာကြသည်။ မည်သည့် ပင်လယ်ဓားပြကများ နယ်မြေသိမ်းပိုက်လိုသော ရည်မှန်းချက် မရှိဘဲ နေပါမည်နည်း။ မည်သည့် ပင်လယ်ဓားပြကများ တစ်သက်လုံး ရှာဖွေခဲ့သော ကျော်ကြားမှုကို မက်မောခြင်း မရှိဘဲ နေပါမည်နည်း။ ရော့ခ်ပင်လယ်ဓားပြအဖွဲ့သည် သူတို့အတွက် အကန့်အသတ်မဲ့သော ဖြစ်နိုင်ခြေများကို ပေးစွမ်းနိုင်ခဲ့သည်။ ဤခေတ်ကာလတွင် ရော့ခ်တစ်ယောက်သာလျှင် သူတို့၏ ရည်မှန်းချက်များကို ဖြည့်ဆည်းပေးနိုင်စွမ်း ရှိသည်။

ဧရာမ ရော့ခ်သင်္ဘောကြီး ရွက်လွှင့်ထွက်ခွာလာသည်နှင့်အမျှ ဝေးကွာရာတွင် ဟာချီနိုစု ကျွန်းကြီးသည် သေးငယ်၍ ကျန်ရစ်ခဲ့သည်။ မူရင်းဇာတ်လမ်းအရ ဤပင်လယ်ဓားပြကျွန်းသည် ရော့ခ်ပင်လယ်ဓားပြအဖွဲ့ ထွက်ခွာသွားပြီးနောက် ရေတပ်၏ ပစ်မှတ်ဖြစ်လာခဲ့သည်။ ကျွန်းပေါ်တွင် ကျန်ရစ်ခဲ့သော ပင်လယ်ဓားပြအများစုမှာ အင်အားမရှိကြသဖြင့် လုံးဝနီးပါး သုတ်သင်ရှင်းလင်းခြင်း ခံခဲ့ရသည်။ ဤကျွန်းကို သူတို့၏မြင်ကွင်းတွင် ပြန်လည်တွေ့မြင်ရချိန်၌ ၎င်းသည် ပျက်စီးယိုယွင်းနေသော ကျွန်းပျက်ကြီးတစ်ခု ဖြစ်နေခဲ့ပြီဖြစ်ရာ နှမြောတသစရာ ကောင်းလှသည်။

ရော့ခ်သင်္ဘောအတွင်းရှိ အစည်းအဝေးခန်းမထဲတွင်...

တပ်ခွဲမှူးအားလုံး စုရုံးရောက်ရှိနေကြပြီး ရော့ခ်က အလယ်ဗဟိုတွင် ထိုင်နေသည်။

"ငါ သတင်းရထားတာကတော့ အရှေ့ဘက်ပင်လယ်မှာ ကမ္ဘာ့သူကောင်းမျိုးနွယ်ဝင်(ဦးနှောက်ထဲချီးတွေဘဲရှိတဲ့ကောင်တွေ)(celestial dragons)တွေနေတယ်တဲ့"အဲ့ဒီကမ္ဘာ့သူကောင်းမျိုးက ချားလ်မိန်း (Charlemagne) မိသားစုကဖြစ်ပြီး အရှေ့ပင်လယ် (East Blue) က တိုင်းပြည်တစ်ခုကို အပန်းဖြေဖို့ ရောက်နေတာ"

ရော့ခ်က ထိုကြီးလေးသော သတင်းကို တိုက်ရိုက် ထုတ်ဖော်ပြောကြားလိုက်သည်။

"ကမ္ဘာ့သူကောင်းမျိုးတွေလား။ ဟားဟားဟား... ရွက်လွှင့်တာနဲ့ ဒီလို သားကောင်အဝကြီးနဲ့ တိုးလိမ့်မယ်လို့ မထင်ထားဘူးဟေ့။ ငါကတော့ အဲ့ဒီ ကမ္ဘာ့သူကောင်းမျိုးဆိုတဲ့ ကောင်တွေကို သတ်ရတာ အကြိုက်ဆုံးပဲ"

နှုတ်ခမ်းတွင် ဆေးလိပ်ပြင်းကြီးကို ကိုက်ထားသော ရှီကီသည် ကမ္ဘာ့သူကောင်းမျိုးဟူသော စကားကို ကြားလိုက်ရုံဖြင့် မျက်လုံးများ တောက်ပလာတော့သည်။

"ကမ္ဘာ့သူကောင်းမျိုးတွေစီးတဲ့ သင်္ဘောပေါ်မှာ ရတနာတွေ အပြည့်ပါမှာ သေချာတယ်။ တွေးကြည့်ရုံနဲ့တင် ရင်ခုန်စရာပဲဗျာ"

ရတနာမက်သော အဖိုးကြီး ဂျွန်သည် ကမ္ဘာ့သူကောင်းမျိုးများအကြောင်း ကြားသည်နှင့် စည်းစိမ်ဥစ္စာများကို ချက်ချင်းတွေးမိကာ တံတွေးကို အငမ်းမရ မြိုချလိုက်မိသည်။

"ဂူရာရာရာ..."

"ဂျွန်... မင်း အဲ့ဒီလောက် လောဘတက်နေရင် တစ်နေ့ကျ လောဘနောက်မှာတင် အသက်ပျောက်လိမ့်မယ်"

မုတ်ဆိတ်ဖြူက ဂျွန်ကို ကြည့်ကာ သရော်လိုက်သည်။ သူသည် ဂျွန်ကို သိသိသာသာပင် အထင်သေးနေမိသည်။ စည်းစိမ်ဥစ္စာများကို ခွဲဝေသည့်အချိန်တိုင်း ဂျွန်သည် အမြဲတမ်း အလိုလောဘအကြီးဆုံး ဖြစ်သည်။ အချို့သော အချိန်များတွင် ရတနာအနည်းငယ်အတွက်နှင့် အခြားအဖွဲ့ဝင်များကို ဓားဖြင့်ခုတ်ကာ မိမိ၏ လက်အောက်ငယ်သား အများအပြားကိုပင် သတ်ပစ်ခဲ့ဖူးသည်။

ထိုစကားကို ကြားသောအခါ ဘော့ဘ်က စိတ်ထဲကနေ တိတ်တဆိတ် ထောက်ခံမိသည်။ အမှန်ပင် ဂျွန်သည် သူ၏ လောဘကြောင့်သာ သေဆုံးခဲ့ရပြီး ရတနာအားလုံးကို တစ်ယောက်တည်း သိမ်းပိုက်လိုသဖြင့် မိမိလူများ၏ ကျောပြင်ကို ဓားဖြင့် ထိုးခြင်းကို ခံခဲ့ရသည်။

"ခေါင်းဆောင်... ဒါဆို ကျွန်တော်တို့ အဲ့ဒီ ကမ္ဘာ့သူကောင်းမျိုးတွေကို သုတ်သင်ပစ်မှာလား"

ဘော့ဘ်က တိုက်ရိုက်ပင် မေးမြန်းလိုက်သည်။ ရော့ခ်က လူတိုင်းကို ခေါ်ယူပြီး ကမ္ဘာ့သူကောင်းမျိုးများအကြောင်း ပြောပြနေခြင်း၏ ရည်ရွယ်ချက်မှာ ထင်ရှားလှပေသည်။

"ဟားဟားဟား... မဟုတ်ဘူး"

ရော့ခ်က ကောက်ကျစ်စွာ ပြုံးလိုက်ရင်း -

"ဒီတစ်ကြိမ်မှာ ငါတို့ရဲ့ ပစ်မှတ်က ကမ္ဘာ့သူကောင်းမျိုးတွေ မဟုတ်ဘူး။ ငါတို့ အရင်ဆုံး ဟာချီနိုစု ဘေးက စိတ်အနှောင့်အယှက်ဖြစ်စရာ ယင်ကောင်ကို အရင် ရိုက်သတ်ရမယ်"

ယင်ကောင်ဟု ခေါ်ဆိုလိုက်ခြင်းမှာ ပင်လယ်ဓားပြကျွန်း ဟာချီနိုစု၏ ဘေးတွင်ရှိသော ကျွန်းငယ်လေးကို ဆိုလိုခြင်း ဖြစ်သည်။ ရေတပ်သည် ထိုကျွန်းပေါ်တွင် ပင်လယ်ဓားပြကျွန်း၏ လှုပ်ရှားမှုများကို စောင့်ကြည့်ရန် စခန်းတစ်ခု တည်ဆောက်ထားခဲ့သည်။ မည်သို့ပင်ဆိုစေ ရော့ခ်ပင်လယ်ဓားပြအဖွဲ့သည် ဤပင်လယ်ပြင်တွင် အကြီးမားဆုံး အရှင်သခင်ဖြစ်သဖြင့် ရေတပ်ဌာနချုပ်အနေဖြင့် လျစ်လျူရှုထား၍ မရချေ။

ထိုရေတပ်စခန်းသည် အလွန်အင်အားကြီးမားသည်။ ထိုနေရာတွင် ဒုတိယရေတပ်ဗိုလ်ချုပ်ကြီး ခြောက်ဦး၊ ရေတပ်ဗိုလ်ချုပ်လေး တစ်ဆယ့်နှစ်ဦးနှင့် ရေတပ်သားပေါင်း မြောက်မြားစွာ ရှိနေသည်။ ၎င်းတို့တွင် လက်နက်ခဲယမ်းမီးကျောက်များ အပြည့်အစုံ ရှိနေပြီး ရေတပ်သင်္ဘော အစင်းပေါင်းများစွာလည်း ရှိသည်။ ဤပင်လယ်ပြင်ရှိ မည်သည့် ပင်လယ်ဓားပြအဖွဲ့မဆို ထိုကဲ့သို့သော အင်အားကို မြင်လျှင် ထွက်ပြေးကြမည်သာ ဖြစ်သည်။ နှစ်ပေါင်းများစွာအတွင်း နှစ်ဖက်စလုံးသည် တစ်ဦးကိုတစ်ဦး မကျူးကျော်ဘဲ နေခဲ့ကြသည်။

"ကမ္ဘာ့သူကောင်းမျိုးတွေဘက်မှာတော့ ရေတပ်က သူတို့ကို ကာကွယ်ဖို့ စစ်တပ်အင်အား အမြောက်အမြား စီစဉ်ထားမှာ သေချာတယ်"

"သူတို့က ငါတို့တွေ ကမ္ဘာ့သူကောင်းမျိုးတွေကို ပစ်မှတ်ထားလိမ့်မယ်လို့ ဧကန်မုချ တွေးနေကြမှာပဲ"

"ဒါပေမဲ့ ဒီတစ်ကြိမ်မှာတော့ ငါတို့က မရိန်းဖို့ဒ် (Marineford) ကို အံ့အားသင့်စရာ လက်ဆောင်တစ်ခု ပေးရလိမ့်မယ်"

ရော့ခ်သည် မဲ့ပြုံးပြုံးလိုက်ရာ သူ၏ အမူအရာမှာ အလွန်ပင် မကောင်းဆိုးဝါး ဆန်လှတော့သည်။