အပိုင်း (၁၃) ရွက်လွှင့်ခြင်း

"ဂူရာရာရာ! ဘော့ဘ်... မင်းကတော့ ငါ့ကို အမြဲတမ်း အံ့ဩအောင် လုပ်နိုင်တာပဲ!"

"ဒီအဆင့်အထိ လှမ်းတက်နိုင်တဲ့သူ ဘယ်နှစ်ယောက်ရှိလဲ မင်း သိရဲ့လား"

"ဘုရင်အရှိန်အဝါဟာကီ အစစ်အမှန် နိုးထလာတဲ့သူတွေပဲ ဂရန်းလိုင်း (Grand Line) ကို စိုးမိုးဖို့ အရည်အချင်းရှိကြတာ!"

မုတ်ဆိတ်ဖြူသည် ကျေနပ်အားရသည့် မျက်နှာပေးဖြင့် ဘော့ဘ်ကို ကြည့်ကာ သဘောကျစွာ ဟားဟားတိုက် ရယ်မောလိုက်သည်။ ဘော့ဘ် တိုးတက်လာပြီး ပိုမို သန်မာလာသည်ကို ရင်ထဲကနေ အစစ်အမှန်ဆုံး ဆန္ဒပြုပေးမည့်သူ ရှိလျှင် ထိုသူမှာ မုတ်ဆိတ်ဖြူမှတစ်ပါး အခြားသူ မရှိနိုင်ချေ။

"ဟာသဟဟ! ငါကတော့ ဘော့ဘ်ကို အစကတည်းက မျှော်လင့်ချက်အပြည့် ထားခဲ့တာ... အခုတော့ ငါ့အထင် မလွဲခဲ့ဘူးပဲ!"

"မကြာခင်မှာ ဘော့ဘ်ရဲ့ ခွန်အားက ငါ့ကိုတောင် မှီလာလိမ့်မယ်လို့ ငါ ယုံကြည်တယ်!"

ရွှေခြေင်္သေ့ ရှီကီကလည်း စီးကရက်လိပ်ကို ခဲကာ အားရပါးရ ပြုံးလျက် ဘော့ဘ်ကို ချီးမွမ်းခန်းဖွင့်နေသည်။ အခြားသော တပ်ခွဲမှုးများကလည်း ဘော့ဘ်အပေါ် သူတို့၏ ရင်းနှီးပျူငှာမှုကို ပြသလာကြ၏။ ပြီးခဲ့သည့်အကြိမ်နှင့်မတူဘဲ ယခုအကြိမ်တွင်မူ သူတို့သည် ဘော့ဘ်ရဲ့ တည်ရှိမှုကို အမှန်တကယ် အသိအမှတ်ပြုလိုက်ကြပြီ ဖြစ်သည်။

အထူးသဖြင့် မားမားကြီး ရှားလော့လင်လင် ဆိုလျှင် ဘော့ဘ်ကို ကြည့်နေသော သူမ၏ မျက်ဝန်းများမှာ အရောင်တောက်ပနေသည်။

"..."

ဒါက ဘော့ဘ်ကို အနည်းငယ် စိတ်မသက်မသာ ဖြစ်သွားစေသည်။ လက်ရှိအချိန်တွင် မားမားကြီးရဲ့ ကိုယ်လုံးကိုယ်ပေါက်နှင့် ရုပ်ရည်က အတော်လေး ထိပ်တန်းကျသည်ဟု ဆိုရမည် ဖြစ်သော်လည်း... နောင်နှစ်ပေါင်းများစွာ ကြာသည့်အခါ သူမ ဖြစ်ပျက်သွားမည့် ရုပ်ရည်သွင်ပြင်နှင့် မျိုးနွယ်စုပေါင်းစုံက လင်ဟောင်းများကို တွေးမိတိုင်း ဘော့ဘ် တစ်ယောက် တံတွေးကို ဂလုခနဲ မျိုချမိသည်။

ကျေးဇူးပြုပြီး ကျွန်တော့်အပေါ် မဟုတ်တာတွေ လျှောက်မတွေးပါနဲ့ဗျာ။

သူတို့အပြင် လူသစ်ပင်လယ်ဓားပြများကလည်း ဘော့ဘ်ကို ဖားကြယားကြတော့သည်။ တပ်ခွဲမှုးတစ်ယောက်အနေဖြင့် မိမိ၏ ကိုယ်ပိုင်အဖွဲ့သားများကို ဖွဲ့စည်းရန် လိုအပ်သည် မဟုတ်ပါလား။ အကယ်၍ ယခုအချိန်တွင် ဘော့ဘ်ကို မျက်နှာလိုမျက်နှာရ လုပ်ပြီး မျက်စိထဲဝင်အောင် နေနိုင်ခဲ့လျှင် နောင်ကျလျှင် တရားဝင် အဖွဲ့ဝင်များအဖြစ် သူနှင့်အတူ ပင်လယ်ပြင်သို့ လိုက်ပါခွင့် ရရှိနိုင်ပေလိမ့်မည်။

ရော့ခ်ပင်လယ်ဓားပြအဖွဲ့တွင် တရားဝင်အဖွဲ့ဝင်များသာ သင်္ဘောဖြင့် ရွက်လွှင့်ခွင့်ရှိပြီး အဖွဲ့တစ်ခုလုံးရဲ့ ကာကွယ်စောင့်ရှောက်မှုကို ရရှိကြသည်။

လူအများရဲ့ ရုတ်တရက် ပြောင်းလဲသွားသော သဘောထားအပေါ် ဘော့ဘ် သိပ်ပြီး အာရုံမထားမိချေ။ အဓိကကတော့ သူက ဤလူများကို ကောင်းကောင်းမသိခြင်းကြောင့် ဖြစ်သည်။ သူသည် မိမိကို အဖားဆုံး ပင်လယ်ဓားပြ တစ်ဒါဇင်ကျော်လောက်ကို အလွယ်တကူပဲ ရွေးချယ်လိုက်ပြီး အကြမ်းဖျင်း ညွှန်ကြားချက်အချို့ ပေးကာ ထိုနေရာမှ ထွက်ခွာလာခဲ့တော့သည်။

ရွက်လွှင့်ရန် တစ်လသာ လိုပါတော့သည်။ ဤအချိန်အတောအတွင်း ဘော့ဘ်အနေဖြင့် ပိုမို သန်မာလာစေရန် စက္ကန့်တိုင်းကို အမိအရ ဆုပ်ကိုင်ရမည် ဖြစ်သည်။ ကျယ်ပြောလှသော ပင်လယ်ပြင်ကြီးထဲတွင် မည်သည့် အန္တရာယ်မျိုးမဆို ပေါ်ပေါက်လာနိုင်သည်။ အခြားသော ပင်လယ်ဓားပြအဖွဲ့များ၊ မရိန်းများ၊ ပင်လယ်မကောင်းဆိုးဝါးများ (Sea Kings) နှင့် ခန့်မှန်းရခက်သော သဘာဝဘေးအန္တရာယ်များ... ဤအရာအားလုံးကို အေးဆေးသက်သာ ရင်ဆိုင်နိုင်ရန်အတွက် သူ ပိုမို သန်မာလာဖို့ လိုအပ်သည်။

ထို့အပြင် ပြီးခဲ့သည့်ရက်က ရော့ခ်နှင့် ထိပ်တိုက်တွေ့ဆုံမှုကြောင့် ဘော့ဘ်သည် မိမိ၏ လိုအပ်ချက်များကို သဘောပေါက်သွားခဲ့ရသည်။ သူသည် အဆင့်မြင့် ထိပ်သီးအင်အားကြီးပုဂ္ဂိုလ်များရဲ့ အဆင့်အတန်းသို့ ရောက်ရှိရန် အလှမ်းဝေးနေသေးသည်။ တစ်လဆိုသော အချိန်က သိပ်မရှည်လျားသော်လည်း တိုတောင်းလှသည်တော့ မဟုတ်ချေ။ ဘော့ဘ်အတွက်မူ ဒါက အသွင်ကူးပြောင်းရေး ကာလတစ်ခုပင်။

သူသည် တပ်ခွဲမှုးတစ်ယောက် ဖြစ်လာခဲ့ပြီမို့ ဘော့ဘ်ရဲ့ နေအိမ်သည် ပင်လယ်ဓားပြကျွန်းရဲ့ အစွန်အဖျားမှသည် ဧရာမ ဦးခေါင်းခွံကျောက်တုံးကြီးအတွင်းရှိ တပ်ခွဲမှုးအခန်းဆီသို့ ပြောင်းရွှေ့သွားခဲ့သည်။

သို့သော်လည်း ဘော့ဘ်ရဲ့ လေ့ကျင့်ခန်းများကတော့ ထိုအချက်ကြောင့် ရပ်တန့်မသွားခဲ့ချေ။ နေ့စဉ်ရက်ဆက် ဒိုက်ထိုး ၁၀၀၊ အိပ်ထမတင် ၁၀၀၊ ထိုင်ထ ၁၀၀ နှင့် ၁၀ ကီလိုမီတာ အပြေးလေ့ကျင့်ခန်းကို ပျက်ကွက်မှုမရှိဘဲ လုပ်ဆောင်သည်။

ယခင်က ဘော့ဘ်ကို အရူးဟု ထင်မှတ်ခဲ့ကြသော အချို့သော ပင်လယ်ဓားပြများသည် ယခုအခါတွင်မူ သူ လေ့ကျင့်နေသည်ကို ကြည့်ရင်း လေးစားအားကျတဲ့ အကြည့်များဖြင့် ကြည့်လာကြတော့သည်။ အမှန်တော့ ယခုရက်ပိုင်းအတွင်း ပင်လယ်ဓားပြ အမြောက်အမြားသည် ပိုမို သန်မာလာမည့် လျှို့ဝှက်ချက်ကို ရှာဖွေတွေ့ရှိရန် မျှော်လင့်ချက်ဖြင့် ဘော့ဘ်ရဲ့ လေ့ကျင့်ခန်း အစီအစဉ်များကို လိုက်လံ အတုယူလာကြသည်။

အတန်ကြာသည်အထိ ဟာချီနိုစုကျွန်းပေါ်တွင် မနက်ခင်းတိုင်း၌ ပင်လယ်ဓားပြအုပ်စုကြီးများ ကျွန်းကို ပတ်ပြီး စစ်တပ်ကဲ့သို့ အပြေးလေ့ကျင့်နေကြသည်ကို မြင်တွေ့ရတတ်သည်။ ဒါက ကြည့်ရသည်မှာ ရယ်လည်းရယ်ရသလို အံ့ဩဖို့လည်း ကောင်းလှသည်။

ဤအချိန်အတောအတွင်း ဘော့ဘ်သည် ရော့ခ်ပင်လယ်ဓားပြအဖွဲ့ရှိ လူအားလုံးနီးပါးနှင့် ဆုံတွေ့ခဲ့ပြီး ဖြစ်သည်။ သို့သော် မုတ်ဆိတ်ဖြူမှတစ်ပါး နက်နက်ရှိုင်းရှိုင်း ရင်းနှီးမှု ထူထောင်ရန် ထိုက်တန်သူဟူ၍ အနည်းငယ်မျှသာ ရှိသည်။ ကျန်တဲ့လူတွေကတော့ အလွန်အမင်း ရက်စက်ကြမ်းကြုတ်သူများ၊ အတိုင်းအဆမရှိ လောဘကြီးသူများ သို့မဟုတ် စိတ်ထဲတွင် တစ်ခုခု ပုံမှန်မဟုတ်ဘဲ ထူးဆန်းနေသူများသာ ဖြစ်ကြ၏။

ရော့ခ်ရဲ့ လမ်းညွှန်ပြသမှုအောက်တွင် ဘော့ဘ်ရဲ့ ဟာကီသုံးမျိုး စွမ်းရည်သည် သိသိသာသာ တိုးတက်လာခဲ့သည်။ အကယ်၍ ဤဟာကီစွမ်းရည်များကို အဆင့်ခွဲခြားရမည်ဆိုလျှင်... အခြေခံ၊ အလယ်အလတ်၊ အဆင့်မြင့်နှင့် ထိပ်တန်းအဆင့် ဟူ၍ ရှိရာတွင် ဘော့ဘ်သည် ခန့်မှန်းခြေအားဖြင့် အဆင့်မြင့်အဆင့်သို့ ရောက်ရှိနေပြီ ဖြစ်သည်။ သူ၏ သံမဏိခန္ဓာဟာကီသည် အတွင်းပိုင်း ဖျက်ဆီးခြင်းရဲ့ အလင်းတန်းကို စတင် မြင်တွေ့နေရပြီ ဖြစ်သည်။

ထို့ကြောင့်ပင် ထပ်တလဲလဲ ဖြစ်နေသော လေ့ကျင့်ခန်းရက်များ... လက်အောက်ငယ်သားများကို လေ့ကျင့်ရန် တိုက်တွန်းခြင်းနှင့် အခြားသော တပ်ခွဲမှုးများနှင့်အတူ အရက်သောက်ရင်း စနောက်ကျီစယ်ခြင်းများဖြင့် တစ်လဆိုသော အချိန်က လျင်မြန်စွာ ကုန်ဆုံးသွားခဲ့သည်။

ရွက်လွှင့်မည့်နေ့ မနက်ခင်းတွင် ဘော့ဘ်သည် အဝတ်အစား သပ်သပ်ရပ်ရပ် လဲလှယ်ကာ ကိုယ့်ကိုယ်ကိုယ် အကြမ်းဖျင်း ပြင်ဆင်ပြီး အခန်းထဲကနေ အမြန် ထွက်လာခဲ့သည်။ သူ၏ အာရုံခံဟာကီဖြင့် အာရုံခံကြည့်လိုက်ရာ တပ်ခွဲမှုးအများစု စုဝေးရောက်ရှိနေကြပြီ ဖြစ်ကြောင်း သတိပြုမိလိုက်သည်။ မိမိ၏ အဖွဲ့သားများက သူ့နာမည်ကို လှမ်းခေါ်သံကို ကြားရသဖြင့် ဘော့ဘ်သည် အဖွဲ့ကို လျင်မြန်စွာ စီစဉ်လိုက်သည်။ ထို့နောက် ဆိပ်ကမ်းဆီသို့ ခပ်သွက်သွက် လျှောက်လှမ်းခဲ့တော့သည်။

ဟာချီနိုစု ဆိပ်ကမ်းသို့ ရောက်ရှိလာသောအခါ ရော့ခ်ရဲ့ အမှတ်အသား စာလုံးများ ပါရှိပြီး ထိုစာလုံးများကြားတွင် ကြောက်မက်ဖွယ်ရာ အရှိန်အဝါများ ထွက်ပေါ်နေသည့် အနီရောင် ဦးခေါင်းခွံ ပါရှိသော သင်္ဘောကြီးကို မြင်တွေ့လိုက်ရသည်။

ဘော့ဘ်အနေဖြင့် ထိုသင်္ဘောကြီးကို 'အလွန်အမင်း ခမ်းနားထည်ဝါလွန်းသည်' ဟုသာ ဖော်ပြနိုင်ပေလိမ့်မည်။ တကယ့်ကို ဧရာမ သင်္ဘောကြီးပါပဲ။ ပင်လယ်ပြင်ရဲ့ အရှင်သခင်ဆိုတဲ့ ဘွဲ့ထူးနှင့် ညီမျှစွာပင် ၎င်း၏ ခန့်ညားထည်ဝါမှုက လူကို လွှမ်းမိုးချုပ်ကိုင်ထားနိုင်သည်။

သင်္ဘောအနားတွင် ဘီလူးလူသားအချို့ (Giants) က ကုန်ပစ္စည်းများကို သယ်ယူပို့ဆောင်နေကြသည်။ ဘော့ဘ်သည် သင်္ဘောပေါ်သို့ ချက်ချင်း မတက်သေးဘဲ ခေတ္တမျှ စောင့်ကြည့်နေမိသည်။ ဘီလူးလူသားများကို သူ ပထမဆုံးအကြိမ် မြင်ဖူးခြင်း ဖြစ်သဖြင့် သဘာဝအတိုင်း စူးစမ်းလိုစိတ် ဖြစ်ပေါ်နေခြင်းပင်။

အတန်ကြာအောင် ကြည့်ရှုပြီးနောက် သူ ကောက်ချက်ချလိုက်သည်မှာ... ကိုယ်လုံးကိုယ်ပေါက် အရမ်းကြီးလွန်းခြင်းကလည်း ကောင်းတဲ့အချက်တော့ မဟုတ်ချေ၊ အဆုံးသတ်တွင်မူ ပင်ပန်းတဲ့ အလုပ်ကြမ်းတွေကိုသာ လုပ်ကိုင်ရတတ်သည်။

သင်္ဘောပေါ်သို့ တက်ရောက်ပြီးနောက် ဘော့ဘ်သည် မိမိ၏ အဖွဲ့သားများကို နေရာချပေးကာ ထိုင်စရာ နေရာတစ်ခု ရှာဖွေပြီး ထိုင်လိုက်သည်။

"ဂူရာရာရာ! ဘော့ဘ်... မင်း နောက်ဆုံးတော့ ရောက်လာပြီပဲ။ ငါဖြင့် မင်းကို စောင့်နေရတာ အတော်ကြာလှပြီ!"

ရင်းနှီးနေသော ရယ်မောသံကို ကြားလိုက်ရသဖြင့် ဘော့ဘ်က လက်လှမ်းပြလိုက်သည်။

ယနေ့တွင် မုတ်ဆိတ်ဖြူသည် အနက်ရောင် ဦးထုပ်ကို ဆောင်းထားပြီး သူ၏ ဝါကျင်ကျင် ဆံပင်ကောက်ကောက်များက ကျောပြင်ထက်တွင် သပ်ရပ်စွာ ဝဲကျနေကာ အော်ဒါချုပ်လုပ်ထားသည့် အဖြူရောင် တိုက်ပွဲဝင် ဝတ်ရုံကို ဆင်မြန်းထားသဖြင့် ထူးထူးခြားခြားကို ကြည့်ကောင်းနေသည်။ သူသည် ခန့်ညားလှသော မူရာကူမိုဂီရီ ကို ကိုင်ဆောင်ထားရင်း သူရဲကောင်းဆန်ပြီး အလွန်အမင်း ခန့်ညားချောမွေ့သော အရှိန်အဝါများကို ထုတ်လွှတ်နေကာ လူအများရဲ့ အာရုံကို ဖမ်းစားထားသည်။

အိမ်ကနေ မထွက်ခင် သေသေချာချာ ပြင်ဆင်မလာခဲ့သည့် ဘော့ဘ်သည် ဤမြင်ကွင်းကို ကြည့်ရင်း အတော်လေး စိတ်အနှောင့်အယှက် ဖြစ်သွားရသည်။ ပျမ်းမျှ ရုပ်ရည်က ၁၀ မှတ်မှာ ၃ မှတ်လောက်သာ ရှိကြသည့် ပင်လယ်ဓားပြအဖွဲ့ထဲတွင် ဤမျှလောက် ကြည့်ကောင်းအောင် ဝတ်ဆင်ထားခြင်းက တမင်တကာ ရိုက်ခံချင်နေတာ မဟုတ်ပါလား။

"အက်ဒ်ဝါ့ဒ်... ခင်ဗျား ဒီနေ့ တော်တော် ကြည့်ကောင်းနေတာပဲ။ အဲဒီဝတ်စုံကို ကျွန်တော့်ကို ခဏလောက် ငှားမလား။ ကျွန်တော့်အတွက်လည်း တစ်စုံလောက် လုပ်ပေးပါဦး!"

"ဒါက သာမန် အခမ်းအနား ဝတ်ရုံတစ်ခုပါကွာ။ တပ်ခွဲမှုးတွေ အားလုံး အလကား ရနိုင်တာပဲ!"

အက်ဒ်ဝါ့ဒ် နယူးဂိတ်က အေးအေးလူလူပဲ ပြန်ပြောလိုက်သည်။

သူတို့နှစ်ဦး အားရပါးရ စကားလက်ဆုံကျနေကြစဉ်မှာပင် ရော့ခ်က လျှောက်လှမ်းလာခဲ့သည်။ သူသည် ဘော့ဘ်ရဲ့ လက်မောင်းကို ဆွဲကိုင်ကာ သင်္ဘောဦးပိုင်းဆီသို့ ခေါ်ဆောင်သွားခဲ့တော့သည်။