အပိုင်း (၁၁) ရော့ခ်၏ သင်ကြားပြသမှု။

လူတစ်စု စည်းကမ်းမရှိ တန်းစီတိုးဝင်လာသည်ကို မြင်သောအခါ ရော့ခ်၏ မျက်နှာအမူအရာမှာ ခက်ထန်တည်တင်းသွားတော့သည်။

"မင်းတို့မှာ ယဉ်ကျေးမှု မရှိကြဘူးလား။ ငါ့အခန်းထဲကို ခွင့်ပြုချက်မရှိဘဲ ဘယ်လိုတောင် သတ္တိရှိရှိ ဝင်ရဲကြတာလဲ"

ထိုစကားကို ကြားရသောအခါ လူစုမှာ ချွေးစေးများပင် ပြန်လာကြတော့သည်။

"ကျွန်တော်တို့ စားသောက်ပွဲလုပ်နေတုန်း ခေါင်းဆောင်တို့ဘက်က တိုက်ပွဲဖြစ်တဲ့ အရိပ်အယောင်တွေကို အာရုံခံမိလို့ပါဗျာ"

"ဒါကြောင့်... နည်းနည်းစိုးရိမ်သွားပြီး တန်းဝင်လာမိတာပါ"

ဝမ်ကျီက စကားထစ်ထစ်ငေါ့ငေါ့ဖြင့် ရှင်းပြရှာသည်။ သို့သော်လည်း သူ၏ ရင်ထဲတွင်မူ 'ငါတို့ပင်လယ်ဓားပြအဖွဲ့မှာ ဘယ်တုန်းက ဒီလိုစည်းကမ်းတွေ ရှိသွားတာလဲ' ဟု တိတ်တဆိတ် ဗျစ်တောက်ဗျစ်တောက် ပြောနေမိသည်။

"ဒါ နောက်ဆုံးအကြိမ် ဖြစ်ပါစေ"

"ဘာမှ အရေးကြီးတဲ့ကိစ္စ မဟုတ်ပါဘူး။ ငါ ဘော့ဘ်နဲ့ နည်းနည်း အပြန်အလှန် ဆွေးနွေးနေတာပဲ ရှိတယ်။ ဒါပေမဲ့ မင်းတို့အားလုံး ရောက်နေမှတော့ ငါ မင်းတို့တစ်တွေကို သင်ခန်းစာတစ်ခု သင်ပေးတာပေါ့"

ရော့ခ်သည် သူတို့ကို ဆက်ပြီး အကျပ်မကိုင်တော့ပေ။ သူတို့အားလုံး ရောက်ရှိနေသည့်အတွက် တစ်ခုခု သင်ကြားပြသပေးရန် ဆုံးဖြတ်လိုက်သည်။ တစ်ချိန်တည်းမှာပင် သူ၌ အမှန်တကယ် သင်ကြားပေးနိုင်စွမ်း ရှိကြောင်းကိုလည်း ဘော့ဘ်အား သက်သေပြချင်နေမိသည်။

ထို့နောက် ရော့ခ်သည် အခန်းထဲမှ ထွက်လာခဲ့ရာ ကျန်တဲ့လူများလည်း ချက်ချင်းပင် နောက်က လိုက်လာကြတော့သည်။ အပြင်ဘက် ကွင်းပြင်ကျယ်တစ်ခုတွင် ရော့ခ်သည် အမြင့်နှစ်မီတာနီးပါးရှိသော ကျောက်တုံးကြီးတစ်တုံးကို ကွင်းပြင်အလယ်သို့ မ လာခဲ့သည်။ ကျန်ရှိနေသူများကလည်း ပတ်ပတ်လည်တွင် ဝိုင်းအုံလာကြတော့သည်။

ထိုအချိန်တွင် ကိုင်ဒိုလည်း ရောက်ရှိလာခဲ့သည်။ သူသည် အမှန်တကယ်တော့ ပြန်အပို့ခံရပြီး မကြာမီမှာပင် နိုးလာခဲ့ခြင်း ဖြစ်သည်။ သို့သော်လည်း စားသောက်ပွဲခန်းမသို့ သွားရန် အလွန်အရှက်ရနေသဖြင့် ဤနေရာသို့ တန်းလာခဲ့ခြင်း ဖြစ်သည်။

"ဟာကီ သုံးမျိုးစလုံးက သံမဏိခန္ဓာဟာကီ၊ အာရုံခံဟာကီနဲ့ ဘုရင်အရှိန်အဝါဟာကီ ဆိုတာ အားလုံး သိကြပြီးသားပဲ"

ယခုအချိန်တွင် ရော့ခ်၏ မျက်နှာမှာ အလွန်တည်ကြည်လေးနက်ပြီး ခက်ထန်နေသည်။ အနီးအနားရှိ တပ်ခွဲမှူးများနှင့် အဖွဲ့ဝင်များအားလုံး ငြိမ်သက်သွားကြပြီး ရော့ခ်၏ စကားကို စူးစိုက်နားထောင်နေကြတော့သည်။

ရော့ခ်ကိုယ်တိုင် လူကိုယ်တိုင် လာရောက်သင်ကြားပေးခြင်းမှာ အလွန်တရာ ရှားပါးလှသော အခွင့်အရေးတစ်ခု ဖြစ်ကြောင်း သတိပြုသင့်သည်။ ဝါရင့်အဖွဲ့ဝင် အများအပြားပင် ဤမြင်ကွင်းကို ပထမဆုံးအကြိမ် မြင်ဖူးကြခြင်း ဖြစ်သည်။ အကယ်၍ ဤနေရာမှ အသုံးဝင်သောအရာတစ်ခုခုကို သူတို့ သဘောပေါက်နားလည်သွားနိုင်ပါက နောင်တွင် သူတို့၏ လေ့ကျင့်မှုများသည် ပိုမိုထိရောက်လာမည့်အပြင် အချိန်များစွာကိုလည်း သက်သာစေမည် ဖြစ်သည်။

"သံမဏိခန္ဓာဟာကီကို သံမဏိချပ်ဝတ်တန်ဆာအမည်းရောင်လို့ သတ်မှတ်နိုင်တယ်။ ဒါကို ကိုယ့်ခန္ဓာကိုယ်မှာတင်မကဘဲ ပြင်ပပစ္စည်းတွေဖြစ်တဲ့ လက်နက်တွေပေါ်မှာပါ အသုံးချလို့ရတယ်"

ရော့ခ်က လက်ညှိုးတစ်ချောင်းကို မြှောက်ပြလိုက်ရာ သံမဏိခန္ဓာဟာကီ ဖုံးလွှမ်းသွားမှုကြောင့် ထိုလက်ညှိုးမှာ မည်းနက်သွားတော့သည်။

"အခြေခံအကျဆုံး မာကျောစေတဲ့အဆင့်အပြင်၊ သံမဏိခန္ဓာဟာကီကို ပိုမိုဖွံ့ဖြိုးအောင် လုပ်ဆောင်တာနဲ့ အသုံးချတဲ့နေရာမှာ ပိုပြီးနက်နဲတဲ့ အဆင့်တွေ ရှိသေးတယ်၊ ဥပမာ- ရစ်ပတ်တာနဲ့ အပြင်ကို ထုတ်လွှတ်တာမျိုးပေါ့"

"နောက်တစ်ဆင့်ကတော့ အတွင်းပိုင်းကို ဖျက်ဆီးတဲ့အဆင့်ပဲ။ ဒါကို ဝါနိုနိုင်ငံမှာတော့ အဆင့်မြင့် စီးဆင်းခြင်းဟာကီ (Ryuou) အဆင့်လို့လည်း ခေါ်ကြတယ်"

သူက ရှင်းပြနေစဉ်မှာပင် ရော့ခ်၏ မည်းနက်နေသော လက်ညှိုးဘေးတွင် ရဲရဲနီနေသော ဟာကီများ စတင်လှည့်ပတ်စီးဆင်းလာတော့သည်။

ဘော့ဘ်သည် ရော့ခ် ဘာလုပ်ရန် ကြိုးစားနေသည်ကို ချက်ချင်း သဘောပေါက်သွားသည်။ သူသည် အဖွဲ့ဝင်များကို သံမဏိခန္ဓာဟာကီအကြောင်း အသိပညာများ မျှဝေပေးနေခြင်း ဖြစ်သည်။ ရော့ခ်နှင့်အတူ အချိန်အတော်ကြာ လက်တွဲခဲ့သော ဝါရင့်အဖွဲ့ဝင် အချို့ကမူ ဤအကြောင်းကို ကောင်းကောင်းသိထားကြသော်လည်း အလေးအနက် နားထောင်နေကြဆဲ ဖြစ်သည်။ အဖွဲ့ဝင်အသစ်များကမူ မည်သည့်အရာကိုမျှ လွတ်သွားမည် စိုးရိမ်သဖြင့် နားစွင့်နေကြပြီး အလွန်လည်း ရင်ခုန်စိတ်လှုပ်ရှားနေကြသည်။ ထိုသူများထဲမှ အများစုမှာ သံမဏိခန္ဓာဟာကီကို မနိုးထနိုင်ကြသေးပေ။ ထို့ကြောင့် ၎င်း၏ လျှို့ဝှက်ချက်များကို နောင်တွင် နားလည်သဘောပေါက်နိုင်ရန်အတွက် ယခုအချိန်တွင် တစ်ခုခုကို သိရှိနားလည်သွားရန် အားလုံးက မျှော်လင့်နေကြသည်။

ရော့ခ်သည် ရဲရဲနီနေသော ဟာကီများ ရစ်ပတ်နေသည့် လက်ညှိုးဖြင့် ရှေ့ရှိ ကျောက်တုံးကြီးကို ညင်သာစွာ တောက်လိုက်သည်။ ကျောက်တုံး အက်ကွဲသံကို ကြားလိုက်ရသော်လည်း ကျောက်တုံး၏ မျက်နှာပြင်မှာမူ မပျက်မစီးဘဲ နဂိုအတိုင်း ရှိနေဆဲ ဖြစ်သည်။

ရှိနေသူအားလုံး မျက်လုံးများ ပြူးသွားကြတော့သည်။ ထို့နောက်တွင်မူ ရော့ခ်၏ လက်ညှိုးက လျင်မြန်စွာ လှုပ်ရှားသွားသည်။ ထိုနှစ်မီတာခန့်မြင့်သော ကျောက်တုံးကြီးမှာ ဖရဲသီးတစ်လုံးကို အလယ်ကနေ ခွဲလိုက်သကဲ့သို့ နှစ်ခြမ်း ကွဲထွက်သွားတော့သည်။ ကျောက်တုံး၏ အတွင်းပိုင်းမှာမူ ဟာကီကြောင့် လုံးဝပျက်စီးသွားပြီး မှုန့်မှုန့်ညက်ညက် အမှုန့်ပုံဖြစ်သွားခဲ့လေသည်။

"ဒါ... ဒါက ခေါင်းဆောင်ပြောတဲ့ အဆင့်မြင့်အဆင့်ပေါ့လေ"

"ဒါက တကယ် ကြောက်စရာကောင်းလွန်းတယ်"

အတွင်းပိုင်းကနေ ဖျက်ဆီးပစ်သည့် ရော့ခ်၏ လှုပ်ရှားမှုက ရှိနေသူအားလုံးကို ငေးမောသွားစေကာ အလွန်တရာ တုန်လှုပ်ခြောက်ခြားသွားစေခဲ့သည်။ ဘုရင်အရှိန်အဝါဟာကီကို ဤသို့ သုံးနိုင်သည်ကို သူတို့ သိလိုက်ရသည်။ အကယ်၍ ဤအတတ်ပညာကို ကျွမ်းကျင်ပြီး တစ်စုံတစ်ဦးကို ခပ်ဖွဖွလေး တောက်လိုက်ရုံမျှဖြင့် ထိုသူ၏ အတွင်းကလီစာများအားလုံး ကြေမွသွားမည် မဟုတ်ပါလော။

ဤမြင်ကွင်းကို မြင်လိုက်ရသောအခါ အချို့သော တပ်ခွဲမှူးများပင် ကြောင်အမ်းသွားကြတော့သည်။ သူတို့သည် ထိုအတတ်ပညာ၏ အစိတ်အပိုင်း အနည်းငယ်မျှကိုသာ နားလည်ထားကြသေးခြင်း ဖြစ်သည်။ ခေါင်းဆောင်၏ အဆင့်အတန်းသို့ ရောက်ရန် လမ်းခရီးက အလွန်ဝေးကွာနေဆဲ ဖြစ်သည်။

မုတ်ဆိတ်ဖြူနှင့် ရွှေခြေင်္သေ့တို့ နှစ်ယောက်သာ အနည်းငယ် တည်ငြိမ်နေပုံရသော်လည်း ၎င်းတို့၏ မျက်နှာအမူအရာများမှာလည်း လေးနက်နေကြသည်။ ဤအချက်ကို ကြည့်ခြင်းဖြင့် ရော့ခ်နှင့် ယှဉ်လျှင် အင်အားကွာဟချက် မည်မျှကြီးမားကြောင်း သိသာထင်ရှားလှသည်။

"ဒါ့အပြင် နောက်ထပ် အတတ်ပညာတစ်ခု ရှိသေးတယ်၊ အဲဒါကလည်း ဟာကီပုံစံတစ်မျိုးပဲ၊ ဘုရင်အရှိန်အဝါဟာကီရဲ့ အဆင့်မြင့် အသုံးချမှုပေါ့"

ထိုစကားကို ပြောလိုက်သည်နှင့် တစ်ပြိုင်နက် ကွင်းပြင်တစ်ခုလုံး တိတ်ဆိတ်သွားတော့သည်။

ဘုရင်အရှိန်အဝါဟာကီ ဆိုသည်မှာ လူဦးရေ သန်းပေါင်းများစွာထဲတွင်မှ တစ်ယောက်သာ နိုးထနိုင်သော ဟာကီမျိုး ဖြစ်သည်။ ၎င်းကို လေ့ကျင့်ရုံမျှဖြင့် မရရှိနိုင်ပေ။ ရောက်ရှိနေသော အရာရှိများလည်း အံ့အားသင့်သွားကြသည်။ သူတို့အနေဖြင့် ဤအကြောင်းကို သိထားကြပြီး အချို့က သုံးနိုင်ကြသော်လည်း၊ ရော့ခ်က ဤအတတ်ပညာကို တိုက်ရိုက်သင်ကြားပေးလိမ့်မည်ဟု မမျှော်လင့်ထားခဲ့ကြပေ။ ဤသည်မှာ ထိပ်တန်းအင်အားကြီးပုဂ္ဂိုလ်တစ်ဦး ဖြစ်လာရန်အတွက် မရှိမဖြစ်လိုအပ်သော နယ်ပယ်တစ်ခု မဟုတ်ပါလော။

သံမဏိခန္ဓာဟာကီကို သင်ကြားပေးမှုနှင့် ပေါင်းစပ်လိုက်သောအခါ လူတိုင်းက ရော့ခ်၏ စိတ်သဘောထားကြီးမြတ်မှုကို မချီးကျူးဘဲ မနေနိုင်ကြတော့ပေ။

"သေချာ အာရုံစိုက်ထားကြ။ ဘုရင်အရှိန်အဝါဟာကီက သံမဏိခန္ဓာဟာကီနဲ့ မတူဘူး။ သူက ခြိမ်းခြောက်နိုင်တဲ့ စွမ်းအားတစ်ခု ဖြစ်သလို၊ တိုက်ခိုက်မှုတွေမှာလည်း ထည့်သွင်းအသုံးပြုလို့ရတယ်"

ထိုသို့ပြောပြီး ရော့ခ်သည် သူ၏လက်သီးကို မြှောက်လိုက်ရာ ဘုရင်အရှိန်အဝါဟာကီများ လှိုင်းလုံးကြီးသဖွယ် အလုံးအရင်းနှင့် ထွက်ပေါ်လာတော့သည်။ အင်အားနည်းသော ပင်လယ်ဓားပြအချို့မှာ ထိုနေရာတင်ပင် သတိလစ် မေ့လဲသွားကြသည်။

ဘော့ဘ်၏ မျက်လုံးများထဲတွင် အလင်းတစ်ခု ဖြတ်ပြေးသွားသည်။ စောစောက အခန်းထဲတွင် ရော့ခ်သည် သူ၏အင်အားကို သိသိသာသာ ထိန်းထားခဲ့ခြင်း ဖြစ်သည်။

ရော့ခ်သည် တည်ကြည်သော မျက်နှာအမူအရာဖြင့် ဝေးလံသော တောင်ထိပ်ငယ်တစ်ခုဆီသို့ လေဟာနယ်ကို ဖြတ်၍ လက်သီးဖြင့် ထိုးချလိုက်သည်။

ဝုန်း

ကျယ်လောင်လှသော ပေါက်ကွဲသံကြီးက ဟိန်းထွက်သွားတော့သည်။ လေပြင်းများက အရပ်မျက်နှာအနှံ့သို့ လွင့်စင်သွားပြီး ကျောက်တုံးကျောက်ခဲများ ဘေးဘီသို့ ပျံဝဲကုန်ကြသည်။ ထိုတောင်ထိပ်ငယ်လေးမှာမူ လုံးဝ ဥဿုံ ပျောက်ကွယ်သွားခဲ့လေပြီ။

"ဒါ... ဒါက ဘယ်လို စွမ်းအားမျိုးလဲ"

ဤမြင်ကွင်းကို မျက်ဝါးထင်ထင် မြင်လိုက်ရသော ပင်လယ်ဓားပြများမှာ ထိတ်လန့်တုန်လှုပ်ခြင်းများဖြင့် ပြည့်နှက်သွားကြတော့သည်။ အချို့သော ခေါင်းဆောင်များသည် ထိုလက်သီးချက်၏ နောက်ကွယ်မှ ကြောက်မက်ဖွယ် စွမ်းအားကို ခံစားမိနေကြသည်။ အကယ်၍ ဤလက်သီးချက်က သူတို့ဆီသို့ ဦးတည်လာခဲ့လျှင် သူတို့သည် သေဆုံးခြင်း သို့မဟုတ် ပြင်းထန်စွာ ဒဏ်ရာရခြင်းတို့နှင့် ရင်ဆိုင်ရမည် သေချာသည်။

ဘော့ဘ်ကမူ ဘေးတွင် ရပ်နေရင်း လေးနက်စွာ တွေးတောနေမိသည်။

ထို့နောက်တွင်မူ ရော့ခ်က ဘော့ဘ်ရှိရာဘက်သို့ လှည့်ကြည့်လာသည်။ သူက ဖြဲပြုံးကြီးဖြင့်...

"ဘော့ဘ်... မင်း အားလုံးအတွက် နောက်တစ်ကြိမ် ပြန်ပြီး သရုပ်ပြပေးလိုက်စမ်းပါဦး" ဟု ပြောလိုက်တော့သည်။