အပိုင်း (၁) ဝမ်းပိစ့်ကမ္ဘာသို့ ရောက်ရှိခြင်းနှင့် မုတ်ဆိတ်ဖြူ၏ ကမ်းလှမ်းမှု

"ဟေ့! ဟို အရူးကို ကြည့်စမ်းပါဦး၊ ဒိုက်ထိုးပြန်ပြီ!"

"တကယ်ပါပဲ... အဲဒီငတုံး ခေါင်းထဲ ဘာတွေတွေးနေလဲမသိဘူး၊ ဒါမျိုးလုပ်နေရင် သန်မာလာမယ်လို့ ထင်နေတာလား?"

"ဟာသပဲဟေ့! ဒါလေးလုပ်ရုံနဲ့ သန်မာလာကြေးဆိုရင် တို့တွေလည်း အလုပ်နားပြီး အိမ်ပြန်အိပ်နေကြတာ ပေါ့ကွ!"

"..."

ကမ်းခြေ သဲသောင်ပြင်ပေါ်တွင် ဓားကြီးများကိုယ်စီ ကိုင်ဆောင်ထားသော လူအချို့သည် လူတစ်ယောက်ကို လက်ညှိုးထိုးကာ လှောင်ပြောင်နေကြသည်၊၊ ၎င်းတို့နှင့်မလှမ်းမကမ်းတွင်မူ အမျိုးသားတစ်ယောက်သည် စနစ်တကျနှင့် ပုံမှန်အတိုင်း ဒိုက်ထိုးနေလေသည်၊၊ ဘေးမှစောင့်ကြည့်နေသူများသည် ပါးစပ်များဖြဲကာ တစ်ခါတစ်ရံတွင် ရင့်ရင့်သီးသီး စနောက်တတ်ကြသေးသည်၊၊

"၉၃!"

"၉၄!"

"၉၅!"

"..."

"၁၀၀!"

ဘော့ဘ်သည် လေ့ကျင့်ခန်းလုပ်ရင်း ခပ်တိုးတိုး ရေတွက်နေခဲ့သည်၊၊ နောက်ဆုံးတစ်ကြိမ် ဒိုက်ထိုးပြီးနောက် သူသည် မတ်တတ်ထရပ်ကာ လက်မှသဲများကို ခါချလိုက်ပြီး ကမ်းခြေတွင် နေရာပြင်၍ ထိုင်လိုက်သည်၊၊ ဘော့ဘ်၏ အပေါ်ပိုင်းတွင် အဝတ်အစားမရှိဘဲ ဗလာဖြစ်နေသဖြင့် အချိုးအစားကျလွန်းသော ကြွက်သားအမြှောင်းမြှောင်းမှာ အထင်အသား ပေါ်လွင်နေသည်၊၊ ပင်လယ်လေကြောင့် လှိုင်းတံပိုးများ ထနေသည်ကို ငေးကြည့်ရင်း သူ၏ရင်ထဲတွင် ခံစားချက်များ လှိုင်းထလာရသည်၊၊

'ငါ ဒီကိုရောက်တာ နှစ်လနီးပါး ရှိသွားပြီပဲ၊ တစ်နေ့နေ့ကျရင် ပြန်နိုင်ပါ့မလား မသိဘူး...'

အန်နီမေး (Anime) ဝါသနာအိုးတစ်ယောက်ဖြစ်သည့်အလျောက် ဘော့ဘ်သည် အန်နီမေးကမ္ဘာထဲသို့ ရောက်သွားမည့်အကြောင်းကို မကြာခဏ စိတ်ကူးယဉ်ဖူးသည်၊၊ ဇာတ်ကောင်များနှင့်အတူ ပခုံးချင်းယှဉ် တိုက်ပွဲဝင်ကာ ရန်သူများကို နှိမ်နင်းပြီး ကမ္ဘာ့အထွတ်အထိပ်သို့ တက်လှမ်းမည့်အကြောင်းမျိုးပေါ့၊၊ သို့သော် ထိုအရာက တကယ်ဖြစ်လာလိမ့်မည်ဟု သူ တစ်ခါမျှ မတွေးခဲ့ဖူးချေ၊၊

လွန်ခဲ့သော နှစ်လက ဘော့ဘ်သည် အိမ်တွင် အက်ရှင်ခန်းများအပြည့်ပါဝင်သော "One Punch Man" အန်နီမေးကို ကြည့်နေခဲ့သည်၊၊ ထိုစဉ် ရုတ်တရက် ကမ္ဘာကြီးတစ်ခုလုံး ချာချာလည်သွားကာ မျက်စိရှေ့တွင် မှောင်အတိကျသွားခဲ့ပြီး မျက်လုံးပြန်ဖွင့်လိုက်သောအခါ မရင်းနှီးသော ကမ္ဘာသစ်တစ်ခုသို့ ရောက်ရှိနေတော့သည်၊၊

မဟုတ်သေး! မရင်းနှီးဘူးဆိုတာထက် ရင်းလည်းရင်းနှီးသလို စိမ်းလည်းစိမ်းနေသည်ဟု ပြောလျှင် ပိုမှန်လိမ့်မည်၊၊ အဘယ်ကြောင့်ဆိုသော် ဤကမ္ဘာသည် သူ၏အရင်ဘဝက မြင်တွေ့ခဲ့ရသည့် "One Piece" အန်နီမေးကမ္ဘာ ဖြစ်နေသောကြောင့်ပင်၊၊

သို့သော်လည်း ဘော့ဘ် ရောက်ရှိလာသည့်အချိန်မှာ အနည်းငယ် စောလွန်းနေခဲ့သည်၊၊ "One Piece" ဇာတ်လမ်း မစတင်မီ ဆယ်စုနှစ်ပေါင်းများစွာ ကြိုတင်ရောက်ရှိနေခြင်းဖြစ်သည်၊၊ ဇာတ်လိုက်ဖြစ်သူ လူဖီ မွေးဖွားဖို့ ဝေးစွ... သူ၏ဖခင်ဖြစ်သူ တော်လှန်ရေးတပ်မတော်မှ ဒရက်ဂွန်ပင် လူ့လောကထဲသို့ ရောက်မလာသေးချေ၊၊

ဤအချိန်တွင် ရော်ဂျာသည် ပင်လယ်ဓားပြဘုရင် မဖြစ်သေးသလို၊ မုတ်ဆိတ်ဖြူ (Whitebeard) သည်လည်း သားသမီးများမွေးစားသည့် ဝါသနာ မရှိသေးပေ၊၊ မားမားကြီး(Big Mom) မှာ နုပျိုလှပသောအရွယ်သာ ရှိသေးပြီး ကိုင်ဒို (Kaido) သည်လည်း နတ်ဆိုးသစ်သီး (Devil Fruit) ကို မစားရသေးပါ၊၊ ကျော်ကြားလှသည့် မရိန်းဖို့ဒ်တိုက်ပွဲ (Marineford War) ဖြစ်ပွားရန် လေးဆယ်နှစ်ပင် လိုပါသေးသည်၊၊

ဤခေတ်သည် ရော့ခ်ပင်လယ်ဓားပြအဖွဲ့(Rocks Pirates) က ပင်လယ်ပြင်ကို စိုးမိုးထားသည့် ဖရိုဖရဲ ခေတ်ကြီးဖြစ်သည်၊၊ ဘော့ဘ် ရောက်ရှိနေသည့်နေရာမှာ ရောခ့်ပင်လယ်ဓားပြဂိုဏ်း၏ အခြေစိုက်စခန်းဖြစ်သော ပင်လယ်ဓားပြကျွန်း 'ဟာချီနိုစု' (Hachinosu) ပင် ဖြစ်သည်၊၊

သူ ရောက်ရောက်ချင်း ရရှိခဲ့သည့် အဆင့်အတန်းမှာ ရောခ့်ပင်လယ်ဓားပြဂိုဏ်းမှ အတွေ့အကြုံမရှိသေးသည့် အဖွဲ့ဝင်သစ် ပင်လယ်ဓားပြတစ်ဦး အဖြစ်သာဖြစ်သည်၊၊ လှပအောင် ပြောရလျှင် ပင်လယ်ဓားပြအဖွဲ့ဟု ဆိုနိုင်သော်လည်း လက်တွေ့တွင်မူ ၎င်းတို့သည် ကိုယ့်ရည်မှန်းချက်နှင့်ကိုယ် စုဝေးနေကြသည့် ရည်မှန်းချက်ကြီးသူများသာ ဖြစ်ကြသည်၊၊ တစ်ယောက်ချင်းစီတွင် ကိုယ်ပိုင်အတွင်းအကြံများ ရှိကြပြီး အားလုံးမှာ ရက်စက်ကြမ်းကြုတ်ကြသူများချည်း ဖြစ်သည်၊၊ ထို့ကြောင့် အချင်းချင်း အုပ်စုဖွဲ့တိုက်ခိုက်ခြင်းနှင့် သစ္စာဖောက်ခြင်းများမှာ ခဏခဏ ဖြစ်ပွားလေ့ရှိသည်၊၊ ဤနေရာတွင် တရားမျှတမှုဟူသည် မရှိဘဲ အင်အားရှိခြင်းကသာ ရှင်သန်ခြင်း၏ အခြေခံအုတ်မြစ် ဖြစ်နေသည်၊၊

ထို့ကြောင့်ပင်... ဤနေရာသို့ ရောက်ကတည်းက ဘော့ဘ်သည် မိမိကိုယ်ကိုယ် ပိုမိုသန်မာလာစေရန် ကြိုးစားအားထုတ်နေခဲ့သည်၊၊ နေ့စဉ် ဒိုက်ထိုး ၁၀၀၊ အိပ်ထမတင် ၁၀၀၊ ထိုင်ထ ၁၀၀ နှင့် ၁၀ ကီလိုမီတာ အပြေးလေ့ကျင့်ခန်းများကို ပြုလုပ်ခဲ့သည်၊၊ အဘယ်ကြောင့်ဆိုသော် ဤကမ္ဘာသို့ ရောက်ရှိလာချိန်တွင် သူသည် စိုင်တမ(ကိုဂတုံး)(Saitama) ၏ ခန္ဓာကိုယ်ဖွဲ့စည်းပုံကို အမွေရရှိထားကြောင်း သိလိုက်ရသောကြောင့်ဖြစ်သည်၊၊

"One Piece" ကမ္ဘာထဲ ရောက်နေပါလျက်နှင့် စိုင်တမ၏ ခန္ဓာကိုယ်ဖွဲ့စည်းပုံကို အဘယ်ကြောင့် ရရှိခဲ့သနည်းဆိုသည်ကိုမူ သူ ဇဝေဇဝါ ဖြစ်ရသည်၊၊ "One Punch Man" ကို ကြည့်နေခဲ့မိ၍လားတော့မသိ၊၊ သို့သော် သူ ထိုအကြောင်းကို အများကြီး တွေးမနေတော့ပါ။ အဘယ်ကြောင့်ဆိုသော် စိုင်တမ၏ အင်အားသည် အကန့်အသတ်မဲ့ ဖြစ်နေသောကြောင့်ပင်၊၊

ထို့အပြင်... ဤနှစ်လတာ လေ့ကျင့်မှုအတွင်း ဘော့ဘ်သည် "One Piece" ကမ္ဘာ၏ ဟာကီ (Haki) သုံးမျိုးလုံးကိုပါ နှိုးဆွနိုင်ခဲ့သည်၊၊ ၎င်းတို့မှာ အာရုံခံဟာကီ (Observation Haki)၊ သံမဏိခန္ဓာဟာကီ (Armament Haki) နှင့် အရှားပါးဆုံးဖြစ်သော ဘုရင်အရှိန်အဝါဟာကီ (Conqueror's Haki) တို့ ဖြစ်ကြသည်၊၊

လူအများစုက ဤဟာကီသုံးမျိုးကို အမျိုးမျိုး အဓိပ္ပာယ်ဖွင့်ဆိုကြသော်လည်း ဘော့ဘ်ကမူ စကားလုံးသုံးလုံးတည်းဖြင့် အကျဉ်းချထားသည်၊၊ ၎င်းတို့မှာ 'အာရုံခံခြင်း'၊ 'အစွမ်းမြှင့်ခြင်း' နှင့် 'စိတ်ပိုင်းဆိုင်ရာ ခြိမ်းခြောက်ခြင်း' တို့ ဖြစ်သည်၊၊

အာရုံခံဟာကီမှတစ်ဆင့် သူသည် ဟိုပင်လယ်ဓားပြများ၏ စကားပြောသံများကို ကြားနေရသည်၊၊ အရာအားလုံးကို ဘော့ဘ် ရှင်းရှင်းလင်းလင်း သိမြင်နေရခြင်းဖြစ်သည်၊၊ လွန်ခဲ့သည့် နှစ်လအတွင်း ယခုကဲ့သို့ ဖြစ်ရပ်မျိုးမှာ ရေတွက်၍မရအောင် ကြုံခဲ့ရပြီးဖြစ်သဖြင့် ဘော့ဘ်သည် ၎င်းတို့ကို သိပ်ဂရုမစိုက်တော့ပါ၊၊ သူတို့ဘက်က ပြဿနာမရှာသရွေ့ သူကတော့ ဒီအတိုင်း ဆက်လက်လေ့ကျင့်နေရန် ဝန်မလေးပေ၊၊

ဘာပဲဖြစ်ဖြစ်... မူရင်း 'One Punch Man' မန်ဂါ (Manga) ထဲတွင် စိုင်တမသည် သူ၏အကန့်အသတ်ကို ကျော်ဖြတ်နိုင်ရန် သုံးနှစ်အချိန်ယူခဲ့ရသည်၊၊ သူကော ထိုကဲ့သို့ အောင်မြင်နိုင်ပါ့မလား...၊၊

ကဲ... ဆံပင်တော့ မကျွတ်ပါစေနဲ့လို့ ဆုတောင်းရမှာပဲ၊၊ သူ၏ သန်စွမ်းစိုပြေသော ဆံကေသာကို လက်ဖြင့်သပ်ရင်း ဘော့ဘ်သည် ဤအရေးကြီးသော ကိစ္စရပ်ကို တွေးတောနေမိသည်၊၊

ဘော့ဘ် တစ်ယောက် အတွေးနက်နေစဉ်မှာပင်... ဖြန့်ကြက်ထားသော အာရုံခံဟာကီမှတစ်ဆင့် တစ်စုံတစ်ယောက် ချဉ်းကပ်လာသည်ကို သတိပြုမိလိုက်သည်၊၊ ထိုသူက မည်သူမည်ဝါဖြစ်ကြောင်း သိလိုက်ရသည့်အခါ သူ၏မျက်နှာတွင် ချက်ချင်းပင် အပြုံးတစ်ခု ပေါ်လာခဲ့သည်၊၊

"ဟေ့! ဘော့ဘ်... မတွေ့တာ ကြာပြီနော်!"

အရပ် ခြောက်မီတာအပြည့် မြင့်မားပြီး၊ အရှိန်အဝါကြီးမားလှသော လှံရှည်ကြီးကို ကိုင်ဆောင်ထားကာ၊ ရွှေရောင်ဆံပင်နှင့် သူ၏ အမှတ်အသားဖြစ်လာမည့် နှုတ်ခမ်းမွှေးဖြူဖြူကြီး ရှိနေသော အမျိုးသားတစ်ဦး လျှောက်လာခဲ့သည်၊၊ သူကတော့ နောက်ပိုင်းတွင် ကမ္ဘာ့အသန်မာဆုံးလူသားအဖြစ် ကျော်ကြားလာမည့် 'မုတ်ဆိတ်ဖြူ' အက်ဒ်ဝါ့ဒ် နယူးဂိတ် (Edward Newgate) မှတစ်ပါး အခြားသူမဟုတ်ချေ၊၊ သို့သော် လက်ရှိတွင်မူ သူသည် လူပျိုလူလူအရွယ်သာ ရှိသေးပြီး 'မုတ်ဆိတ်ဖြူ' ဟူသောအမည်ကို မရရှိသေးပေ၊၊

ဘော့ဘ်က ရယ်မောလိုက်ပြီး "မင်း ဘာကိစ္စရှိလို့ ဒီကို ရောက်လာတာလဲ?" ဟု မေးလိုက်သည်၊၊

"ဂူရာရာရာရာ!" အက်ဒ်ဝါ့ဒ်သည် ကျယ်လောင်စွာ ရယ်မောရင်း "ငါ မင်းကို သီးသန့်လာတွေ့တာကွ!" ဟု ပြောသည်၊၊

ထိုသို့ပြောပြီးနောက် သူသည် ဘော့ဘ်၏ဘေးတွင် အဆင်ပြေမည့်နေရာတစ်ခုကို ရှာ၍ ထိုင်ချလိုက်ပြီး သူ၏ နာမည်ကျော်လှံ 'မူရာကူမိုဂီရီ'  ကို သဲထဲတွင် စိုက်ထူလိုက်သည်၊၊ သူတို့နှစ်ဦး ဆုံတွေ့ခဲ့ကြသည်မှာ တစ်လခန့် ရှိပြီဖြစ်သည်၊၊ တခါက ဘော့ဘ်သည် ကျွန်းပေါ်ရှိ လူမိုက်အချို့ကို ရှင်းလင်းနေသည်ကို အက်ဒ်ဝါ့ဒ်က တိုက်တိုက်ဆိုင်ဆိုင် မြင်တွေ့ခဲ့ရသည်၊၊ ဘော့ဘ်၏ အရည်အချင်းကို သဘောကျသွားကာ သွေးပူတက်ကြွသည့် အက်ဒ်ဝါ့ဒ်သည် သူနှင့် အကဲစမ်းတိုက်ခိုက်ရန် ဇွတ်အတင်း တောင်းဆိုခဲ့သည်၊၊ ထိုကြောင့်တိုက်ခိုက်ရင်းနှင့်ပင် သံယောဇဉ်ဖြစ်ကာ ၎င်းတို့၏ စရိုက်ချင်းကလည်း ကိုက်ညီနေသဖြင့် သူငယ်ချင်းများ ဖြစ်လာခဲ့ကြခြင်းဖြစ်သည်၊၊

"ဟားဟား! မင်း စိတ်ထဲမှာ တစ်ခုခုရှိနေလို့ ဖြစ်ရမယ်၊ ဟုတ်တယ်မလား?" ဘော့ဘ်က ပြုံး၍ပြောသည်၊၊ ဤနေရာတွင် ကြာမြင့်စွာ နေထိုင်ခဲ့ရသဖြင့် အက်ဒ်ဝါ့ဒ် ယနေ့ ရုတ်တရက် ရောက်လာခြင်းမှာ သာမန်အလည်လာခြင်းမျိုး မဟုတ်နိုင်ကြောင်း ဘော့ဘ် ခန့်မှန်းမိသည်၊၊

ထိုစကားကို ကြားသောအခါ မုတ်ဆိတ်ဖြူက ထပ်မံရယ်မောလိုက်ပြီး ဘော့ဘ်၏ အနားသို့ တိုးကပ်လာခဲ့သည်၊၊

"မင်းက ငါ့အကြောင်းကို သိပ်သိတာပဲ!"

"အမှန်အတိုင်း ပြောရရင်... တရားဝင် အဖွဲ့ဝင်သစ်တွေ ရွေးချယ်မယ့် စမ်းသပ်ပွဲက မနက်ဖြန် စတော့မယ်၊ အဲဒါကြောင့် မင်းကို ငါ့ရဲ့ တပ်ခွဲထဲ ဝင်စေချင်တယ်"

"မင်း ချက်ချင်း တရားဝင်အဖွဲ့ဝင် ဖြစ်လာမှာဖြစ်ပြီး ငါ့အဖွဲ့ထဲမှာ ခံစားခွင့်တွေ အများကြီးရှိတယ်"

ဘော့ဘ်သည် ပုံမှန်အားဖြင့် လူသိမခံဘဲ အေးအေးဆေးဆေး နေတတ်သော်လည်း သူ၏ အင်အားကိုမူ အက်ဒ်ဝါ့ဒ်က ကောင်းကောင်းသိသည်၊၊ လွန်ခဲ့သော တစ်လက ဘော့ဘ်၏ ပါရမီရှင်တစ်ဦးကဲ့သို့ ပြောင်မြောက်လှသော တိုက်ခိုက်ရေးပညာကို သူကိုယ်တိုင် ကိုယ်တွေ့ကြုံဖူးခဲ့သဖြင့် ဤကဲ့သို့ လူသားမျိုးမှာ ရှားမှရှားပေသည်၊၊

အက်ဒ်ဝါ့ဒ်၏ ကမ်းလှမ်းမှုကို ကြုံရသည့်အခါ ဘော့ဘ်သည် စိတ်ကူးထဲတွင် ဆုံးဖြတ်ချက်ချပြီးသား ဖြစ်နေသည်၊၊ အကယ်၍ သူသည် ရောခ့်ပင်လယ်ဓားပြဂိုဏ်း၏ တပ်ခွဲတစ်ခုခုထဲသို့ ဝင်ရမည်ဆိုပါက မုတ်ဆိတ်ဖြူ၏ အဖွဲ့သည် သံသယဖြစ်ဖွယ်မရှိဘဲ သူ၏ ပထမဆုံးရွေးချယ်မှု ဖြစ်လိမ့်မည်၊၊ အဘယ်ကြောင့်ဆိုသော် သူ၏ ကြီးမားလှသော အင်အားကြောင့်သာမက ရဲဘော်ရဲဘက်များအပေါ် သစ္စာရှိမှုနှင့် မိသားစုတစ်စုလိုအဖွဲ့ဖြစ်သောကြောင့်လည်း ဖြစ်သည်၊၊ ကောက်ကျစ်မှုနှင့် အကွက်ဆင်မှုများ ပြည့်နှက်နေသော ဤပင်လယ်ဓားပြအဖွဲ့ကြီးထဲတွင် သူသည် စိတ်အေးချမ်းရဆုံး ပတ်ဝန်းကျင်တစ်ခု ဖြစ်သည်၊၊ ပြီးတော့ အရေးကြီးဆုံးအချက်က သူသည် သားသမီးများ မွေးစားသည့် ဝါသနာကိုတော့အခုထိမရှိသေးပေ၊၊

"ဟားဟား! သေချာတာပေါ့... မင်းရဲ့ တပ်ခွဲထဲကို ဝင်ခွင့်ရတာ ငါ့အတွက် ဂုဏ်ယူစရာပါပဲ!" ဘော့ဘ်သည် ပြုံး၍ ခေါင်းညိတ်ကာ အက်ဒဝပ်၏ ဖိတ်ခေါ်မှုကို တိုက်ရိုက် လက်ခံလိုက်သည်၊၊

"ဂူရာရာရာရာ!" အက်ဒ်ဝါ့ဒ်သည် ဘော့ဘ်၏ လက်ခံမှုကို အလွန်အမင်း ကျေနပ်သွားသဖြင့် ကျယ်လောင်စွာ ရယ်မောလိုက်တော့သည်၊၊ သူသည် ဘော့ဘ်၏ ကျောကုန်းကို သာမန်လူဆိုလျှင် လွင့်ထွက်သွားလောက်မည့် အားပြင်းသော ရိုက်ချက်ဖြင့် ပုတ်လိုက်သော်လည်း ဘော့ဘ်မှာမူ မဆိုစလောက်မျှပင် တုန်လှုပ်ခြင်းမရှိပေ၊၊ ဒါကလည်း သူ၏ ထူးကဲလှသော အင်အားကို သက်သေပြနေခြင်းဖြစ်သည်၊၊

"ဒါဆို သဘောတူပြီနော်! မနက်ဖြန်ကျရင် တခြားတပ်ခွဲတွေက ကောင်တွေကို တကယ့် အင်အားအစစ်အမှန်က ဘယ်လိုလဲဆိုတာ ပြပေးကြတာပေါ့!" အက်ဒ့်ဝါ့ဒ်က လာမည့် စမ်းသပ်ပွဲအတွက် မျက်လုံးများ တောက်ပရင်း ကြေညာလိုက်သည်၊၊

နေမင်းကြီးသည် ဟာချီနိုစုကျွန်းပေါ်တွင် စတင်ဝင်ရောက်သွားပြီး ကမ်းခြေတစ်လျှောက် အရိပ်ရှည်ကြီးများ ကျဆင်းလာချိန်တွင်... တိုက်ခိုက်ရေးသမား နှစ်ဦးသည် ဘေးချင်းယှဉ် ထိုင်နေခဲ့ကြသည်၊၊ ၎င်းတို့၏ မဟာမိတ်ပြုမှုသည် တစ်နေ့တွင် ပင်လယ်ဓားပြကမ္ဘာ၏ အခြေခံအုတ်မြစ်ကြီးတစ်ခုလုံးကို လှုပ်ခါစေမည့် လက်တွဲဖော်ဖြစ်မှု၏ အစပျိုးခြင်းပင် ဖြစ်တော့သည်၊၊