အခန်း ၄၉ - - ပိုင်ဆိုင်မှု တန်ဖိုး ဘီလီယံ ၁၅ ထက် ကျော်လွန်သွားခဲ့ပြီ ဖြစ်၏!
ထိုအတောအတွင်း ဥက္ကဋ္ဌ၏ ရုံးခန်းအတွင်းသို့ ယုံးထိုင် အိမ်ခြံမြေ လုပ်ငန်းစု၏ အခြားသော ရှယ်ယာရှင်ကြီးများ ရောက်ရှိနေကြပြီ ဖြစ်သည်။
ရှယ်ယာရှင်ကြီး အများအပြားသည် ဆိုဖာပေါ်တွင် ထိုင်ရင်း ရန်ရှင့်ဖိန်း ၏ ရှင်းပြချက်ကို နားထောင်နေကြ၏။
"လူကြီးမင်းတို့... မင်္ဂလာပါ၊ ကျွန်တော်တို့ ဝမ်ဟင်း ဆော့ဖ်ဝဲလ်လုပ်ငန်းစုရဲ့ ပရောဂျက်ကို သာ ရရှိခဲ့ရင် ဘီလီယံပေါင်းများစွာသော အမြတ်အစွန်းတွေကို ရရှိနိုင်မှာပါ။ ခင်ဗျားတို့လည်း ကုမ္ပဏီရဲ့ ရှယ်ယာရှင်တွေ ဖြစ်ကြတာမို့ အကျိုးအမြတ်ကို ဝေမျှရရှိကြမှာ ဖြစ်ပါတယ်။ စိတ်မလှုပ်ရှားကြဘူးလား"
အခြား ရှယ်ယာရှင်များ မေးမြန်းချင်သည့် မေးခွန်းအများစုကို သူက ရှင်းပြပြီးဖြစ်၏။
သို့သော်လည်း ကုမ္ပဏီ၏ ဒုတိယ အကြီးဆုံး ရှယ်ယာရှင် ဖြစ်သူ ဖန်းကျိယွမ် ရောက်ရှိလာသောအခါ အခြေအနေများ ပြောင်းလဲသွားခဲ့သည်။
ဖန်းကျိယွမ် ဆိုသည့် ထို အဘိုးအိုသည် တစ်သက်လုံး လွန်စွာ ရှေးရိုးစွဲဆန်ပြီး သတိကြီးစွာ ထားတတ်သူ ဖြစ်၏။ အမှန်အတိုင်း ပြောရလျှင် "အလွန်အမင်း သတ္တိနည်းသူ" ပင် ဖြစ်တော့သည်။ ဒီပရောဂျက်သည် နာမည်ကျော် ချန်မိသားစုနှင့် ယှဉ်ပြိုင်ရမည်ဟု ကြားလိုက်ရသည်နှင့် သူက ချက်ချင်းပင် သဘောမတူဘဲ ငြင်းပယ်ခဲ့၏။
"အမြတ်အစွန်းကတော့ အတော်လေး မြင့်တာ မှန်ပါတယ်။ ဒါပေမဲ့ ပြဿနာက ဒီပရောဂျက်က ချန်မိသားစုနဲ့ ယှဉ်ပြိုင်ရမှာပါ။ ထိပ်တန်း မျိုးရိုးကြီးတစ်ခုအနေနဲ့ ချန်မိသားစု ရဲ့ အင်အားက ဘယ်လောက်တောင် တောင့်တင်းသလဲ။ ချန်မိသားစု ရဲ့ ခေါင်းဆောင် ချန်ရှန်းဟိုင် စွမ်းအားကြီးပုံကိုတော့ စကားတွေ အများကြီး ပြောနေစရာတောင် လိုမယ် မထင်ဘူး"
ဖန်းကျိယွမ် က ရှေးရိုးစွဲ အမူအရာဖြင့် ပြောလိုက်၏။
"ဟုတ်တယ်"
"ဒါရိုက်တာဖန်း ပြောတာ သဘာဝကျပါတယ်"
"ချန်မိသားစု က ရန်စလို့ရတဲ့ အထဲမှာ မပါဘူး၊ ချန်ရှန်းဟိုင် ကတော့ ပိုလို့တောင် မရသေးတယ်"
ဖန်းကျိယွမ် ပြောပြီးသွားသောအခါ ရုံးခန်းအတွင်းရှိ လူအချို့က သူ၏ စကားကို ထောက်ခံလိုက်ကြ၏။
"ကိစ္စတိုင်းမှာ အမြဲတမ်း တွန့်ဆုတ်ပြီး သတ္တိနည်းနေရင် ကုမ္ပဏီက ဘယ်တော့မှ ကြီးပွားတိုးတက်လာမှာ မဟုတ်ဘူး။ အတိတ်မှာပဲ ပိတ်မိနေမယ်ဆိုရင် သေမှာကိုပဲ ထိုင်စောင့်နေတာနဲ့ အတူတူပဲ"
ရန်ရှင့်ဖိန်း က ပြန်လည် ချေပလိုက်သည်။
"ဒါက ဘီလီယံပေါင်းများစွာတန်တဲ့ အမြတ်အစွန်းလေ! ပရောဂျက်ကို ရရှိနေသမျှ ကာလပတ်လုံး ချန်မိသားစု ကို ပြစ်မှားမိရင်ရော ဘာဖြစ်သလဲ"
"ဥက္ကဋ္ဌရန် ပြောတာ သဘာဝကျပါတယ်။ ဒါပေမဲ့ ခင်ဗျား ပြောနေတာက အောင်မြင်မယ့် အခြေအနေကိုပဲ ပြောနေတာပါ။ အနိုင်ရလို့ ပရောဂျက် ရသွားရင်တော့ ပြဿနာမရှိဘူးပေါ့၊ ဒါပေမဲ့ အကယ်၍ ကျွန်တော်တို့ ရှုံးနိမ့်သွားခဲ့ရင်ကော... ပရောဂျက်ကို မရရှိရုံတင်မကဘဲ ချန်မိသားစု ကိုပါ ပြစ်မှားမိသွားရင် ကြက်တိုက်ရင်း ကြက်ပျောက်၊ တုတ်ပါ ပါသွားတဲ့ ကိန်း ဖြစ်မသွားဘူးလား"
"တစ်နေ့နေ့ ချန်ရှန်းဟိုင် သာ အချိန်ရသွားရင် သူ့စရိုက်အတိုင်း ကျွန်တော်တို့ကို သေချာပေါက် ကလဲ့စားချေ လက်စားချေလိမ့်မယ်"
"ခင်ဗျားတို့ မကြောက်ကြဘူးလား"
ဖန်းကျိယွမ် က မေးခွန်းထုတ်လိုက်၏။
ချက်ချင်းပင် အခင်းအကျင်းတစ်ခုလုံး တိတ်ဆိတ်သွားခဲ့ပြီး ရန်ရှင့်ဖိန်းပင်လျှင် ပြန်လည် မဖြေကြားနိုင်ခဲ့ပေ။
ထိုအချိန်မှာပင် ရုတ်တရက် အသံတစ်သံ ထွက်ပေါ်လာခဲ့သည်။
"ကြောက်ရမယ်ဟုတ်လား... ဘာလို့ ကြောက်ရမှာလဲ"
ထို့နောက် လူတိုင်း၏ အံ့အားသင့်သွားမှုနှင့်အတူ ချန်ဖန်း သည် ဖြည်းညင်းစွာ လမ်းလျှောက်ဝင်ရောက်လာခဲ့၏။
"ဒါရိုက်တာချန် ရောက်လာပြီပဲ... ကျွန်တော် မိတ်ဆက်ပေးပါရစေ။ ဒါကတော့ ကျွန်တော်တို့ လုပ်ငန်းစုရဲ့ တတိယ အကြီးဆုံး ရှယ်ယာရှင် ဖြစ်တဲ့ ဒါရိုက်တာ ချန်ဖန်း ပါ။ ဒါကတော့ ဒါရိုက်တာ ဖန်းကျိယွမ် ပါ။ ပြီးတော့ ဒါကတော့..."
ရန်ရှင့်ဖိန်း က အခြားသူများအား မိတ်ဆက်ပေးလိုက်သည်။
ရန်ရှင့်ဖိန်းက ချန်ဖန်း အား ထိုင်ရန် ဖိတ်ခေါ်လိုက်၏။
ဖန်းကျိယွမ် သည် ချန်ဖန်း အပေါ် လှိုက်လှိုက်လှဲလှဲ မရှိလှဘဲ တိုက်ရိုက်ပင် မေးမြန်းလိုက်သည်။
"ကျွန်တော် ကြားတာတော့ ဒါရိုက်တာချန် က ယခင်က ချန်မိသားစု ရဲ့ အဖွဲ့ဝင်တစ်ဦး ဖြစ်ခဲ့ပေမဲ့ အခုတော့ အဆက်အသွယ် ဖြတ်တောက်လိုက်ပြီလို့ သိရတယ်။ ဝမ်ဟင်း ဆော့ဖ်ဝဲလ်လုပ်ငန်းစုရဲ့ ပရောဂျက်အတွက် ချန်မိသားစု နဲ့ ယှဉ်ပြိုင်ဖို့ အဓိက တာဝန်ယူပြီး အကြံပြုခဲ့တာလည်း ဒါရိုက်တာချန် ပဲ မဟုတ်လား"
"ဟုတ်ပါတယ်... ပြဿနာ ရှိလို့လား"
ချန်ဖန်း ခေါင်းငြိမ့်လိုက်၏။
"ပြဿနာ ရှိသလား ဟုတ်လား... ဟဲဟဲ... ဒါရိုက်တာချန် အနေနဲ့ အကယ်၍ ရှုံးနိမ့်သွားခဲ့ရင် ဘာတွေ ဖြစ်လာမလဲဆိုတာ စဉ်းစားဖူးရဲ့လား။ ရှုံးနိမ့်သွားခဲ့ရင် ဒါရိုက်တာချန် အတွက်တော့ ကိစ္စမရှိပါဘူး၊ ဘာလို့လဲဆိုတော့ ချန်မိသားစု နဲ့ အဆက်အသွယ် ဖြတ်တောက်ထားပြီးသားမို့လို့ သူတို့နဲ့ ရန်သူတွေ ဖြစ်နေတာ ကြာပြီလေ"
ဖန်းကျိယွမ် က မေးခွန်းထုတ်လိုက်၏။
"ဒါပေမဲ့ ကျွန်တော်တို့ကော... အကယ်၍ ဒါရိုက်တာချန် သာ ရှုံးနိမ့်သွားခဲ့ရင် ခံရမှာက ကျွန်တော်တို့ ဖြစ်နေလိမ့်မယ်"
"ကျွန်တော်တို့ ရှုံးနိမ့်လိမ့်မယ်လို့ ခင်ဗျား ဘာလို့ ဒီလောက်တောင် သေချာနေရတာလဲ"
ချန်ဖန်း က မေးခွန်းထုတ်လျက် ပြန်လည် ချေပလိုက်သည်။
"ဘာလို့လဲ ဟုတ်လား... ရိုးရိုးလေးပါ။ ကျွန်တော် မစ္စတာချန် ရဲ့ စွမ်းဆောင်ရည်နဲ့ အရှိန်အဝါ အင်အားကို မယုံကြည်လို့ပဲ"
ဖန်းကျိယွမ် က ဟန်ဆောင်မနေဘဲ အမှန်အတိုင်း ပြောလိုက်ခြင်း ဖြစ်၏။
မည်သို့ပင်ဆိုစေကာမူ ချန်ဖန်း သည် ငယ်ရွယ်လွန်းလှပြီး သူ၏ မြေးဖြစ်သူနှင့် အသက်အရွယ် တူညီပေသည်။ ချန်ဖန်း တွင် ချန်မိသားစု အား တိုက်ခိုက်နိုင်သည့် အင်အား ရှိသည်ဟု သူ သံသယဝင်နေခြင်း ဖြစ်ပေ၏။
"ငါ့ရဲ့ အင်အားကတော့ သံသယဖြစ်စရာ လိုမယ် မထင်ပါဘူး..."
စကားပြောရင်း ချန်ဖန်း သည် ဘေးသို့ သွား၍ ရေတစ်ခွက် သောက်ရန် ထလိုက်သည်။သို့သော်လည်း ချန်ဖန်း က ရုတ်တရက် ထလိုက်သဖြင့် သူ၏ အိတ်ကပ်ထဲမှ ကတ်တစ်ခု ကျသွားခဲ့၏။
ဂျိန်း!
ထိုအရာကို မြင်သောအခါ ဘေးနားရှိ ရှယ်ယာရှင်တစ်ဦးက ကောက်ယူပေးလိုက်သည်။ထိုရှယ်ယာရှင်က အစက သာမန်ကတ်တစ်ခုမျှသာဟု ထင်မှတ်ထားပြီး ချန်ဖန်း ထံ ပြန်လည် ပေးအပ်တော့မည့် အချိန်တွင် ကဒ်နက်(black card)၏ ပုံသဏ္ဌာန် အပြည့်အဝကို မတော်တဆ မြင်တွေ့လိုက်ရသဖြင့် ချက်ချင်းပင် ဆွံ့အအံ့အားသင့်သွားခဲ့ရတော့၏!
"ဘုရားရေ... ဒါ... ဒါက..."
ထိုရှယ်ယာရှင်မှာ အတိုင်းထက်လွန် အံ့အားသင့်သွားခဲ့ရသည်။
ရှယ်ယာရှင်၏ ပုံမှန်မဟုတ်သော မူရာကို သတိပြုမိသဖြင့် အခြားသူများကလည်း စပ်စုချင်စိတ်ဖြင့် ကြည့်ရှုလိုက်ကြ၏။
"ဘာဖြစ်လို့လဲ"
"အဘိုးလျူ... ဒီကတ်မှာ ပြဿနာ ရှိလို့လား"
အခြားသူများက နားမလည်နိုင်စွာ မေးမြန်းလိုက်ကြသည်။
"ဒါ... ဒါက... ဒါက ရေနံထွက်နိုင်ငံတစ်ခုရဲ့ ပထမ ဘဏ် ကထုတ်ပေးတဲ့ မာစတာကတ် ကဒ်နက် ပဲ!"
ပထမ ရှယ်ယာရှင်က အံ့အားသင့်စွာဖြင့် အော်ဟစ်လိုက်၏!
ရောက်ရှိနေသူများ အားလုံးသည် အလွန် ကြွယ်ဝချမ်းသာသူများ ဖြစ်ကြသဖြင့် ရေနံထွက်နိုင်ငံ၏ ပထမ ရာဇဝင်ဘဏ် မှ မာစတာကတ် ကဒ်နက် ၏ ကြောက်မက်ဖွယ်ရာ စွမ်းအားအကြောင်းကို သဘာဝအတိုင်း ကြားဖူးကြပေသည်။
ခဏချင်းမှာပင် အခြားသော ရှယ်ယာရှင်များသည် ဘေးနားသို့ ဝိုင်းအုံလာကြပြီး စပ်စုချင်စိတ်ဖြင့် အခင်းအကျင်းကို ကြည့်ရှုလိုက်ကြတော့၏။
ထိုအချိန်တွင် ဖန်းကျိယွမ် ပင်လျှင် တည်ငြိမ်မနေနိုင်တော့ဘဲ စိတ်လှုပ်ရှားစွာဖြင့် အနီးသို့ ရောက်ရှိလာခဲ့သည်။
"မစ္စတာချန်... ဒီ ရေနံထွက်နိုင်ငံရဲ့ ပထမ ဘဏ် ကထုတ်ပေးတဲ့ မာစတာကဒ် ကဒ်နက် က မစ္စတာချန် ရဲ့ ပစ္စည်း ဟုတ်ပါသလား"
ပထမ ရှယ်ယာရှင်က ကဒ်နက်ကို ချန်ဖန်း ထံ ရိုသေစွာဖြင့် ပေးအပ်ရင်း မေးမြန်းလိုက်၏။
"ဟုတ်ပါတယ်... ခုနကတင် ငါ့အိတ်ကပ်ထဲက ကျသွားတာ ဖြစ်မယ်၊ ကျေးဇူးပါပဲ"
ချန်ဖန်း က ကတ်နက်ကို ယူလိုက်သည်။
"ဒါရိုက်တာချန်... ခင်ဗျားက ရေနံထွက်နိုင်ငံရဲ့ ဘဏ် ရဲ့ ကဒ်နက် ပိုင်ရှင်တစ်ဦး ဟုတ်ပါသလား"
ဖန်းကျိယွမ် က သူ၏ အသံများ အနည်းငယ် တုန်လှုပ်စွာဖြင့် မေးလိုက်၏။
"ဟုတ်ပါတယ်... ပြဿနာ ရှိလို့လား"
ချန်ဖန်း က အေးဆေးစွာပင် ခေါင်းငြိမ့်လိုက်သည်။အတည်ပြုချက် လက်ခံရရှိပြီးနောက် ရောက်ရှိနေသူ အားလုံးသည် အံ့အားသင့်စွာဖြင့် သက်ပြင်းချလိုက်ကြတော့၏။
ဘုရားရေ... ဒါရိုက်တာချန် က အမှန်တကယ်ပဲ ရေနံထွက်နိုင်ငံရဲ့ဘဏ် ကဒ်နက် ပိုင်ရှင် ဖြစ်နေတာပဲ။ ကျန်းကျိုး မြို့တစ်မြို့လုံးမှာ ဒါရိုက်တာချန် မှလွဲရင် ဒီလို အဆင့်မြင့် ကတ်နက်မျိုးကို ပိုင်ဆိုင်ထားတဲ့သူ မရှိဘူးလို့ ငါ ခန့်မှန်းရတယ်။
ဒါကြောင့်လည်း ဒါရိုက်တာချန် က ဒီလောက်တောင် ယုံကြည်မှု ရှိနေတာကိုး၊ ဒါကြောင့်လည်း သူက ချန်မိသားစု ကို တိုက်ခိုက်ဖို့ ရဲဝံ့နေတာကိုး... သူမှာ ဒီလို လုပ်နိုင်တဲ့ အင်အား ရှိနေတာပဲ!
"ဒါရိုက်တာချန်... ချန်မိသားစု ကို တိုက်ခိုက်မယ့် ခင်ဗျားရဲ့ အစီအစဉ်ကို ကျွန်တော် သဘောတူပါတယ်"
"ကျွန်တော်လည်း သဘောတူပါတယ်"
ရှယ်ယာရှင်များသည် တညီတညွတ်တည်း ကန့်ကွက်မှုကို ရပ်ဆိုင်းလိုက်ကြတော့၏။ဖန်းကျိယွမ် ပင်လျှင် ထိုအချိန်တွင် သက်ပြင်းမချဘဲ မနေနိုင်တော့ပေ။
"နောက်မျိုးဆက်တွေက တကယ်ကို ကြောက်စရာကောင်းတာပဲ... ငါ အမြင်တိုခဲ့မိတာပါ"
"ဒါရိုက်တာချန် ရဲ့ အစီအစဉ်ကို ကျွန်တော် သဘောတူပါတယ်"
ဖန်းကျိယွမ် သည် ချန်ဖန်း အား ထပ်မံ ကြည့်ရှုလိုက်သောအခါ သူ၏ မျက်လုံးများတွင် ယခင်ကကဲ့သို့ မထီမဲ့မြင်ပြုမှုနှင့် သံသယများ မရှိတော့ဘဲ လေးစားကြောက်ရွံ့မှု အရိပ်အယောင်များ ပါရှိနေခဲ့ပြီ ဖြစ်သည်။ဒီအချိန်တွင် ယုံးထိုင် အိမ်ခြံမြေ လုပ်ငန်းစု၏ ရှယ်ယာရှင်များ အားလုံးသည် ချန်ဖန်း ၏ တိုက်ခိုက်ရေး အစီအစဉ်ကို သဘောတူလိုက်ကြတော့၏။
စနစ်၏ အသံ ထွက်ပေါ်လာခဲ့သည်။
【ဒေါင်】
【ယုံးထိုင် အိမ်ခြံမြေ လုပ်ငန်းစုသို့ သွားရောက်၍ အခြားသော ရှယ်ယာရှင်များအား စည်းရုံးပါ - တာဝန် ပြီးမြောက်သည်】
【ဂုဏ်ယူပါသည်... အဆင့်မြင့် လူနေရပ်ကွက်တစ်ခုအတွင်းရှိ အဆင့်မြင့် လူနေတိုက်ခန်းကြီး နှစ်လုံး (ခန့်မှန်းတန်ဖိုး ယွမ် သန်း ၃၀၀ ဝန်းကျင်) အား ရရှိခဲ့ပါသည်】
【ဂုဏ်ယူပါသည်... အတွေ့အကြုံ ရမှတ် ၅၃ မှတ် ရရှိခဲ့ပါသည်】
တာဝန် ပြီးမြောက်သွားခဲ့ပြီ! ယွမ် သန်း ၃၀၀ တန်ကြေးရှိသော တိုက်ခန်းကြီး နှစ်လုံးကို ယခုအခါ သူ ပိုင်ဆိုင်လိုက်ရပြီ ဖြစ်၏။ ချက်ချင်းဆိုသလိုပင် ချန်ဖန်း ၏ ပိုင်ဆိုင်မှု တန်ဖိုးမှာ ယွမ် သန်း ၁၅,၀၀၀ (ဘီလီယံ ၁၅) ထက် ကျော်လွန်သွားခဲ့ပြီ ဖြစ်ပေသည်။
ထို့အပြင် ချန်ဖန်း သည် အတွေ့အကြုံ ရမှတ် ၅၃ မှတ် ရရှိခဲ့၏။
လက်ရှိအချိန်တွင် ချန်ဖန်း သည် အတွေ့အကြုံ ရမှတ် ၄၁၃ မှတ် စုဆောင်းရရှိထားပြီး ဖြစ်ရာ အဆင့်တက်ရန်အတွက် သုံးပုံတစ်ပုံနီးပါး ရောက်ရှိသွားခဲ့ပြီ ဖြစ်သည်။
ချန်ဖန်း အနေဖြင့် အတွေ့အကြုံ ရမှတ် ၁၅၀၀ စုဆောင်းမိပါက သူ၏ စနစ်သည် အဆင့်နှစ်သို့ အဆင့်မြှင့်တင်နိုင်မည် ဖြစ်၏။
ထိုအချိန်တွင် နေ့စဉ် ဆုလာဘ်များသည် သိသိသာသာ တိုးတက်လာမည်ဖြစ်ပြီး အနည်းဆုံး တွက်ချက်ကြည့်လျှင်ပင် တစ်နေ့လျှင် ဘီလီယံပေါင်းများစွာ ရရှိပေလိမ့်မည်!။နောက်ပိုင်းတွင် ချန်ဖန်း ၏ စနစ်သည် အဆင့်သုံး၊ အဆင့်လေး သို့မဟုတ် ပိုမို မြင့်မားသော အဆင့်များသို့ ရောက်ရှိသွားပါက နေ့စဉ် ဆုလာဘ်များသည် ဘီလီယံပေါင်း သောင်းနှင့်ချီ ရှိလာပေလိမ့်မည်။
ဒါကို စဉ်းစားရင်း ချန်ဖန်း ၏ ရင်ခုန်သံများ မြန်ဆန်လာခဲ့ရ၏။ ဖြစ်နိုင်သမျှ အမြန်ဆုံး အဆင့်မြှင့်တင်နိုင်ဖို့ နည်းလမ်း ရှာရမယ်။ချန်ဖန်း မစောင့်နိုင်တော့ဘဲ အစီအစဉ်များ စတင် ရေးဆွဲလိုက်တော့၏။
အခြား ရှယ်ယာရှင်များကို စည်းရုံးနိုင်ခဲ့ပြီ ဖြစ်သဖြင့် ယုံးထိုင် အိမ်ခြံမြေ လုပ်ငန်းစု၏ ကိစ္စရပ်များမှာ လုံးဝ ပြေလည်သွားခဲ့ပြီ ဖြစ်သည်။ဒီနေရာမှ ထွက်ခွာပြီးနောက် ချန်ဖန်း သည် အလွန် အထူးသီးသန့် ဆန်သော နေရာတစ်ခုသို့ တိတ်တဆိတ် ထွက်ခွာသွားခဲ့တော့၏!။