အခန်း (၉၄) - ကြောက်လန့်ထွက်ပြေးသွားခြင်း

ရုတ်တရက် လူတိုင်းက သူတို့၏ ပါးစပ်များကို ပိတ်လိုက်ကြသည်။ ချူးဖုန်းအပေါ် ထားရှိသော သူတို့၏ အကြည့်များကလည်း ပြောင်းလဲသွားလေသည်။

ကနဦးက အထင်အမြင်သေးပြီး ဂရုမစိုက်သော အခြေအနေမှသည် ရိုသေလေးစားမှုအဖြစ်သို့ ကူးပြောင်းသွားခဲ့သည်။ မည်သည့်နေရာတွင်မဆို၊ စွမ်းအားကသာ အမြဲတမ်း ပထမနေရာတွင် ရှိနေသည် မဟုတ်ပါလော။

ချူးဖုန်းက လေလံပွဲအတွက် မည်သည့်ရတနာကို ယူဆောင်လာခဲ့သနည်းဆိုတာ သူတို့ မသိကြသော်လည်း၊ အကဲဖြတ်အဖိုးအို၏ တက်ကြွမှု၊ ယဉ်ကျေးပျူငှာမှုနှင့် မျက်နှာချိုသွေးလိုသည့် အမူအရာတို့က ချူးဖုန်းထံတွင် သာမန်မဟုတ်သော စွမ်းအားတစ်ခု သေချာပေါက် ရှိနေမည်ဖြစ်ကြောင်း ဖော်ပြနေလေသည်။

"သူက ဘာလို့ ကြားဖြတ်ဝင်ခွင့် ရရတာလဲ။ ကျွန်တော် သဘောမတူဘူး။"

မောက်မာသော မျက်နှာထားဖြင့် လူငယ်တစ်ဦးက အေးစက်စွာ ကန့်ကွက်လိုက်သည်။ "တခြားသူတွေက သူ့ကို မမှတ်မိရင်တောင်၊ ကျွန်တော်ကတော့ ကောင်းကောင်း မှတ်မိတယ်။ ဒီလူက ဘာအရေးပါတဲ့ ပုဂ္ဂိုလ်မှ မဟုတ်ဘူး၊ သူက ဓားဘုရင်စံအိမ်တော်က အသုံးအမကျဆုံး တတိယသခင်လေးပဲ။"

မြို့တော်တွင် ချူးဖုန်းသည် တစ်နည်းအားဖြင့် 'နာမည်ကြီး' တစ်ဦးဖြစ်ပြီး၊ လူအများအပြားက သူ့ကို မှတ်မိကြသည်။ သေချာသည်မှာ သူ၏ နာမည်ကြီးမှုက သူ အလွန်တရာ အသုံးမကျသောကြောင့် ရရှိလာခြင်းပင် ဖြစ်သည်။

"မင်း သဘောမတူဘူးဆိုရင်လည်း ထွက်သွားလို့ရတယ်၊ ဒါမှမဟုတ် တခြား အကဲဖြတ်သူကို သွားရှာလို့ရတယ်။" အကဲဖြတ်အဖိုးအိုက ထိုလူငယ်ကို ခပ်စိမ်းစိမ်း တစ်ချက်ကြည့်ကာ အေးစက်သော လေသံဖြင့် ပြောလိုက်သည်။

"ကျွန်တော်က အဂ္ဂိရတ်မိသားစုဖြစ်တဲ့ ဟုန်းမိသားစုကလာတာနော်၊ ခင်ဗျားက ကျွန်တော့်ကို ဒီလိုစကားမျိုး ပြောရဲတယ်ပေါ့လေ။" လူငယ်လေးမှာ ဒေါသပေါက်ကွဲသွားပြီး၊ အကဲဖြတ်အဖိုးအိုကို လက်ညှိုးထိုးကာ ခြိမ်းခြောက်သည့် ဟန်ပန်ဖြင့် ပြောဆိုလိုက်သည်။

"ဟွန့်... ဟုန်းမိသားစုက ဖြစ်တော့ရော ဘာလုပ်ရမှာလဲ။ ဒါက လေလံရုံပဲ၊ လူတိုင်းက လေလံရုံရဲ့ စည်းကမ်းတွေကို လိုက်နာရမယ်။"

"ဟုန်းဝမ်... မင်းက ဟုန်းမိသားစုအတွက် တောက်တိုမည်ရ လုပ်ပေးနေရုံနဲ့၊ ချူးဖုန်းရဲ့ စွမ်းဆောင်ရည်ကို မေးခွန်းထုတ်ပိုင်ခွင့် မရှိဘူးကွ။"

ထိုသို့ပြောပြီးနောက်၊ အဖိုးအိုသည် ဒေါသထွက်နေသော ဟုန်းမိသားစုမှ လူငယ်လေးကို ဒုတိယတစ်ချက် ထပ်မကြည့်တော့ဘဲ၊ ချူးဖုန်းကိုသာ နွေးထွေးစွာ နှုတ်ဆက်လိုက်သည်။ "လူငယ်လေး... သူ့ကို ဂရုစိုက်နေစရာ မလိုပါဘူး။ လာ... မင်းရဲ့ ဆေးလုံးတွေကို အကဲဖြတ်ဖို့ ထုတ်ပြလိုက်ပါဦး။"

ဆေးလုံး ဟုတ်လား။

ဟုန်းမိသားစုမှ လူငယ်လေး၏ မျက်နှာမှာ ထပ်မံ ပြောင်းလဲသွားပြန်သည်။ ဟုန်းမိသားစုသည် အဂ္ဂိရတ်မိသားစု တစ်ခုဖြစ်ရာ၊ ဓားဘုရင်စံအိမ်တော်မှ ထိုအသုံးမကျသူ ယူဆောင်လာသော ဆေးလုံးက ဟုန်းမိသားစုနှင့် ယှဉ်နိုင်ပါမည်လော။

"ဟွန့်... ဓားဘုရင်စံအိမ်တော်က ဒီအမှိုက်ကောင်က ဘယ်လို ထူးကဲတဲ့ ဆေးလုံးမျိုး ထုတ်ပြနိုင်မလဲဆိုတာ ငါ ကြည့်ချင်သေးတယ်။ အချိန်တန်ရင် ငါတို့ ဟုန်းမိသားစုက ဆေးလုံးတွေအတွက် အရံပန်းလေးအဖြစ်တောင် အရည်အချင်း မီမှာမဟုတ်ဘူးလို့ ငါ ထင်တယ်။"

ဤတစ်ကြိမ်တွင် ဟုန်းဝမ်သည် ဟုန်းမိသားစု ဘိုးဘေးကိုယ်တိုင် ဖော်စပ်ထားသော အဆင့်သုံး ဆေးလုံးတစ်သေတ္တာကို လေလံတင်ရန် ယူဆောင်လာခဲ့ခြင်း ဖြစ်သည်။

ကျန်းယွန်းမင်းဆက် တစ်ခုလုံးတွင်၊ အဆင့်သုံး ဆေးလုံးများကို ဖော်စပ်နိုင်စွမ်းရှိသော ဆေးပညာရှင်များမှာ လက်ချိုးရေတွက်၍ ရနိုင်လောက်အောင် နည်းပါးလှသည်။ အကယ်၍ ချူးဖုန်းက အခြားသော ရတနာအချို့ကို လေလံတင်ရန် ယူဆောင်လာခဲ့ပါက ဟုန်းဝမ် အနည်းငယ် တွန့်ဆုတ်နေကောင်း တွန့်ဆုတ်နေမည် ဖြစ်သည်။

သို့သော် ယခု ချူးဖုန်းသည်လည်း ဆေးလုံးကို လေလံတင်ရန် ယူဆောင်လာခဲ့ကြောင်း သိလိုက်ရသောအခါ၊ ဟုန်းဝမ်သည် ချူးဖုန်းကို အလွယ်တကူ အနိုင်ယူချေမှုန်းနိုင်မည်ဟု အပြည့်အဝ ယုံကြည်မှု ရှိသွားလေသည်။

"အရည်အချင်း မှီ၊ မမှီ ဆိုတာက မင်းပြောရမယ့် ကိစ္စမဟုတ်သလို၊ ငါပြောရမယ့် ကိစ္စလည်း မဟုတ်ဘူး။ စျေးကွက်ကပဲ ဆုံးဖြတ်သွားလိမ့်မယ်။"

ချူးဖုန်းက ကောင်တာပြတင်းပေါက်ဆီသို့ တည်ငြိမ်စွာ လျှောက်သွားပြီး၊ အကဲဖြတ်အဖိုးအိုထံသို့ ကြေးသေတ္တာ နှစ်လုံးကို ကမ်းပေးလိုက်သည်။ အခြားသူများက ဤအဖိုးအိုအား အကြီးအကဲဟွာဟု ခေါ်ကြသည်ကို သူ မှတ်မိနေလေသည်။

"အကြီးအကဲဟွာ... ဒါလေးတွေကို အကဲဖြတ်ပေးပါဦးခင်ဗျာ။" ချူးဖုန်းက အလွန် ယဉ်ကျေးစွာ ပြောလိုက်သည်။

ကြေးသေတ္တာများကို မြင်လိုက်ရသည်နှင့် တပြိုင်နက်၊ အကြီးအကဲဟွာ၏ မျက်လုံးများက အရောင်လက်သွားပြီး သူ၏ ရင်ထဲတွင် မျှော်လင့်ချက်များ ပြည့်နှက်သွားလေသည်။ ကြေးသေတ္တာများထဲတွင် သိမ်းဆည်းရန် လိုအပ်သော ဆေးလုံးများမှာ သိပ်မများလှဘဲ၊ ၎င်းတို့အားလုံးမှာ အလွန်တရာ ထူးကဲလှသော ဆေးလုံးများချည်းသာ ဖြစ်ကြသည်။

သို့သော် ဟုန်းဝမ်က အသံကျယ်ကျယ်ဖြင့် လှောင်ပြောင်ရယ်မောလိုက်လေသည်။ "ဟားဟား... အံ့မခန်းစရာ တစ်ခုခုများလားလို့ ထင်နေတာ။ ဆေးလုံးထည့်ဖို့ သေတ္တာကောင်းကောင်းလေး တစ်လုံးတောင် မဝယ်နိုင်ဘူးပဲ။ ကျောက်စိမ်းသေတ္တာ မဝယ်နိုင်ရင်တောင် အနည်းဆုံးတော့ စန္ဒကူးသစ်သား သေတ္တာလေးလောက်တော့ ဝယ်သင့်တာပေါ့။"

"ကောင်းမွန်တဲ့ သေတ္တာလေး တစ်လုံးတောင် မဝယ်နိုင်ဘူးဆိုတော့၊ အထဲက ဆေးလုံးတွေကို ထုတ်မပြရင်တောင် အမှိုက်ထဲက အမှိုက်တွေသာ ဖြစ်ရမယ်လို့ ငါ ရဲရဲကြီး ပြောရဲတယ်။ အပြင်မှာ လွှင့်ပစ်ထားရင်တောင် ဘယ်သူမှ ကုန်းကောက်မှာ မဟုတ်တဲ့ အဆင့်မျိုးတွေပဲ ဖြစ်ရမယ်။" ဟုန်းဝမ်က အပေါ်ယံမျှသာ ကြည့်ကာ ဆုံးဖြတ်ချက်ချလိုက်သည်။

ချူးဖုန်းက သရော်လှောင်ပြောင်သော အမူအရာဖြင့်၊ ခုန်ပေါက်ပြေးလွှားနေသော လူပြက်တစ်ယောက်ကို ကြည့်နေသကဲ့သို့သာ တုံ့ပြန်လိုက်သည်။

အကြီးအကဲဟွာမှာ ကြေးသေတ္တာအဖုံးကို ဖွင့်ရန်ပင် ဆက်မစောင့်နိုင်တော့ပေ။ သေတ္တာအဖုံး ပွင့်သွားသည်နှင့် ရုတ်တရက် မျက်စိကျိန်းလောက်အောင် တောက်ပသော ရွှေရောင်အလင်းတန်းများ သေတ္တာထဲမှ ယှက်သန်းထွက်ပေါ်လာရာ၊ ကြည့်ရှုနေသူများထံမှ အံ့အားသင့်ကာ လေရှိုက်သွင်းသံများ တပြိုင်နက် ထွက်ပေါ်လာလေသည်။

"ဝိုး... ဒါက ဘယ်လို ဆေးလုံးမျိုးလဲ။ ဒဏ္ဍာရီလာ ရွှေရောင်အမြုတေများ ဖြစ်နေမလား။" လူအများအပြားမှာ စူးစမ်းလိုစိတ်ဖြင့် လည်ပင်းကို ဆန့်ထုတ်ကာ၊ ကြေးသေတ္တာထဲတွင် မည်သို့သော နတ်ဆေးမျိုး ရှိနေသနည်းဆိုသည်ကို မြင်တွေ့နိုင်ရန် ခြေဖျားထောက်ကာ ကြည့်ရှုနေကြလေသည်။ ချူးဖုန်း၏ ဆေးလုံးက ဤကဲ့သို့ အံ့မခန်း ဝင်ရောက်မှုမျိုးဖြင့် ကြီးမားသော ဆူပူအုံကြွမှု ဖြစ်စေလိမ့်မည်ဟု ဟုန်းဝမ် မထင်ထားခဲ့ပေ။

သူက မနာလိုမှုဖြင့် အေးစက်စွာ နှာခေါင်းရှုံ့လိုက်သည်။ "ငါ့အမြင်ကို ပြောရရင်၊ အထဲက အသုံးမကျတဲ့ ဆေးလုံးတွေကို လှည့်ကွက်တချို့သုံးပြီး တမင်သက်သက် ထုပ်ပိုးထားတာပဲ။ လူတွေ အာရုံစိုက်လာအောင် လုပ်နေတာ သက်သက်ပဲ။"

ဤအချိန်တွင် အကြီးအကဲဟွာသည် သမင်ရေ လက်အိတ်များကို ကျွမ်းကျင်ပိုင်နိုင်စွာ စွပ်လိုက်ပြီး၊ ဆေးလုံးတစ်လုံးကို ထုတ်ယူကာ အကဲဖြတ်နေလေပြီ။

လူအုပ်ကြီးသည် နောက်ဆုံးတွင် ဆေးလုံး၏ ပုံပန်းသဏ္ဍာန်ကို မြင်တွေ့လိုက်ရလေပြီ။ ၎င်းမှာ ပုံမှန် ဆေးလုံးတစ်လုံးထက် သုံးဆခန့် ပိုမို ကြီးမားလေသည်။ ဆေးလုံး၏ မျက်နှာပြင်မှာ ရွှေရောင်အလင်းများဖြင့် တောက်ပနေပြီး၊ မန္တန်အက္ခရာများကိုလည်း ခပ်ရေးရေး မြင်တွေ့နေရလေသည်။

ဆက်လက်၍ ဝေဖန်ပြစ်တင်ရန် ပြင်နေသော ဟုန်းဝမ်မှာ အလိုအလျောက်ပင် ပါးစပ်ကို ပိတ်သွားလေတော့သည်။

ကြည့်ရှုနေသူများထဲတွင် အချို့က ဤဆေးလုံး၏ ဇာစ်မြစ်ကို မှတ်မိသွားကြလေပြီ။

"ဘုရားရေ... ဒါက ဒဏ္ဍာရီလာ ရွှေအက္ခရာ ကိုယ်ရံအကာအကွယ် ဆေးလုံးပဲ။ ကျန်းယွန်းမင်းဆက် တစ်ခုလုံးမှာ၊ ရတနာဆေးခန်းမမှာတောင် ဒီဆေးလုံးကို မရောင်းနိုင်ဘူး။ ရွှေအဆောင်ဂိုဏ်း ဆိုင်ခွဲမှာပဲ ဒါကို တွေ့နိုင်တာ။"

"ရွှေအဆောင်ဂိုဏ်း ဆိုင်ခွဲမှာတောင်၊ ဒါကို ဆိုင်ရဲ့ အဖိုးတန်ရတနာတစ်ခုအဖြစ် သတ်မှတ်ထားတာကွ။"

ချူးဖုန်း ယူဆောင်လာသော ဆေးလုံး၏ ဇာစ်မြစ်ကို ထိုသူက ထုတ်ဖော်ပြောဆိုလိုက်သည်ကို ကြားသောအခါ၊ လူအုပ်ကြီးထံမှ အံ့သြတုန်လှုပ်ဖွယ် ရေရွတ်သံများ အဆက်မပြတ် ထွက်ပေါ်လာလေတော့သည်။

နာရီဝက်နီးပါးခန့် ကြာပြီးနောက်၊ အကြီးအကဲဟွာက စိတ်လှုပ်ရှားစွာဖြင့် ခေါင်းမော့ကာ ချူးဖုန်းကို ပြောလိုက်သည်။ "အကဲဖြတ်ပြီးတဲ့နောက်မှာ၊ ဒီဆေးလုံးက အရည်အသွေး၊ အရောင်အသွေးနဲ့ ပါဝင်တဲ့ ဆေးစွမ်းအင်တွေအရ ထိပ်တန်းအဆင့်ရှိတဲ့ အဆင့်တစ် ရွှေအက္ခရာ ကိုယ်ရံအကာအကွယ် ဆေးလုံးဖြစ်ကြောင်း အတည်ပြုနိုင်ပါတယ်။ ဒီအဖိုးကြီးသာ အထင်မမှားဘူးဆိုရင်၊ ဒီဆေးကို သောက်သုံးပြီးတဲ့နောက်မှာ အခြေခံအဆင့် မဟာဓားသခင်တစ်ပါးရဲ့ အစွမ်းကုန် တိုက်ခိုက်မှုတစ်ချက်ကိုတောင် အထိအခိုက်မရှိဘဲ ခံနိုင်ရည်ရှိလိမ့်မယ်။"

"ကျစ်... ကျစ်... ဒီလောက် အရည်အသွေးမြင့်မားတဲ့ ရွှေအက္ခရာ ကိုယ်ရံအကာအကွယ် ဆေးလုံးက၊ ရွှေအဆောင်ဂိုဏ်း ဆိုင်ခွဲက အဖိုးတန်ရတနာ ဆေးလုံးထက်တောင် ပိုကောင်းနေသေးတယ်။"

"တစ်လုံးတည်းဆိုရင်တော့ တစ်မျိုးပေါ့၊ ဒါပေမဲ့ အခုက ကိုးလုံးတောင် ပါလာတာလေ။ ပြီးတော့ တစ်လုံးချင်းစီကလည်း ထိပ်တန်းအဆင့်တွေချည်းပဲ။ ဒါက တကယ်ကို မယုံနိုင်စရာပဲ။"

သာမန် ရွှေအက္ခရာ ကိုယ်ရံအကာအကွယ် ဆေးလုံးတစ်လုံးသည် အလွန်ဆုံး ဓားသခင်အဆင့်၏ အစွမ်းကုန် တိုက်ခိုက်မှုတစ်ချက်ကိုသာ ခံနိုင်ရည်ရှိလေသည်။

ထိုစကားကို ကြားသောအခါ၊ ကြည့်ရှုနေသူများမှာ မိုးကြိုးပစ်ခံလိုက်ရသကဲ့သို့ အံ့သြမှင်တက်သွားကြလေသည်။

ဤမျှ အရည်အသွေးမြင့်မားသော ရွှေအက္ခရာ ကိုယ်ရံအကာအကွယ် ဆေးလုံး အများအပြားကို၊ နောက်ကွယ်က ဘယ်လို ဆရာကြီးမျိုးကများ ဖော်စပ်ထားခဲ့သနည်း။

လူအုပ်ကြီးထဲမှ အများအပြားမှာ တပည့်အဖြစ် ခံယူချင်စိတ်များပင် ဖြစ်ပေါ်နေကြလေသည်။

"ဆေးလုံး တစ်လုံးစီအတွက် အခြေခံလေလံကြမ်းခင်းစျေးကို ငွေသုံးထောင် သတ်မှတ်ထားမယ်၊ အဆင်ပြေရဲ့လား။" အကြီးအကဲဟွာက ချူးဖုန်း၏ အမြင်ကို တောင်းခံလိုက်သည်။

ဤသည်က လေလံပွဲဖြစ်သဖြင့် စျေးနှုန်းမြင့်တက်လာရန် အခွင့်အလမ်းများစွာ ရှိပြီး၊ တကယ်တမ်း အရောင်းအဝယ်ဖြစ်မည့် စျေးနှုန်းမှာ ငွေသုံးထောင်ထက် များစွာ ပိုမို သေချာပေသည်။

ဤသတ်မှတ်ထားသော စျေးနှုန်းမှာ သာမန် ရွှေအက္ခရာ ကိုယ်ရံအကာအကွယ် ဆေးလုံးထက် ငွေတစ်ထောင်ခန့် ပို၍ မြင့်မားနေလေသည်။

"လုံးဝ ပြဿနာမရှိပါဘူး။ ခင်ဗျားတို့ လေလံရုံကိုပဲ အပြည့်အဝ ယုံကြည်အပ်နှံလိုက်ပါတယ်။" ချူးဖုန်းသည် ယခင်ကလည်း လေလံရုံနှင့် တစ်ကြိမ် ပူးပေါင်းလုပ်ဆောင်ခဲ့ဖူးပြီး အလွန် ကျေနပ်မှုရှိခဲ့သဖြင့် ချက်ချင်းပင် ပြုံး၍ သဘောတူလိုက်လေသည်။

အပြန်အလှန် သဘောတူစာချုပ် လက်မှတ်ရေးထိုးပြီးနောက်၊ ချူးဖုန်းက ငွေစက္ကူများ ရေတွက်ရန် စောင့်ဆိုင်းနေရုံသာ လိုတော့သည်။ လုပ်ထုံးလုပ်နည်းများအားလုံး ပြီးစီးသွားသောအခါ၊ သူက လှည့်ကာ အလွန်အမင်း တက်ကြွနေခဲ့သော ဟုန်းဝမ်ကို ကြည့်လိုက်သည်။

"ငါ့ရဲ့ 'အမှိုက်' ဆေးလုံးတွေကတော့ လေလံတင်ဖို့ အဆင်ပြေသွားပြီ၊ အခု မင်းရဲ့ အစွမ်းပြရမယ့် အလှည့်ရောက်ပြီလေ။ မင်းက ဒီလောက်တောင် ယုံကြည်မှုရှိနေမှတော့၊ ဆေးလုံးတွေက သေချာပေါက် ဆိုးမှာမဟုတ်ဘူးလို့ ထင်တယ်။" ချူးဖုန်းက လှောင်ပြောင်သရော်သည့် အကြည့်ဖြင့် ပြောလိုက်သည်။

ဟုန်းဝမ်မှာ နောက်သို့ တွန့်ဆုတ်သွားပြီး၊ သူ၏ မျက်နှာမှာ အလျင်အမြန် ပြောင်းလဲသွားကာ ရုတ်တရက် သူ့ခေါင်းကိုသူ ပြန်ရိုက်ရင်း အသံကျယ်ကျယ်ဖြင့် ပြောလိုက်သည်။ "ဒုက္ခပါပဲ... ငါ့ရဲ့ မှတ်ဉာဏ်ကတော့ကွာ၊ ဆေးလုံးတွေ ယူလာဖို့ မေ့နေခဲ့တာပဲ။"

"မဖြစ်ဘူး၊ ငါ အခုချက်ချင်း ပြန်သွားယူမှ ရမယ်။"

ထိုသို့ပြောရင်း၊ ဟုန်းဝမ်က ခေါင်းငုံ့ကာ အပြင်ဘက်သို့ အလျင်အမြန် ထွက်ခွာသွားလေသည်။

သူ အလွန်အမင်း လောကြီးပြီး ပျာယာခတ်နေသောကြောင့် ဖြစ်မည်၊ သူ၏ ရင်ဘတ်ထဲတွင် ဖွက်ထားသော ဆေးသေတ္တာလေးမှာ မြေကြီးပေါ်သို့ 'ခလောက်' ဟူသော အသံနှင့်အတူ ပြုတ်ကျသွားလေတော့သည်။

"ဟေး... အဲဒါ ဆေးသေတ္တာ မဟုတ်ဘူးလား။" လူတစ်ယောက်က အားရပါးရ ရယ်မောရင်း မေးလိုက်လေသည်။