အခန်း (၅၃) - မင်းမှာ အရည်အချင်းရှိရင် မင်းပဲ ဖော်စပ်လိုက်လေ

ချူးဖုန်းအနေဖြင့် သူ၏ 'ယန်ကိုးပါး ထူးခြားသောမီးတောက်' ကို အဆင့်မြှင့်တင်ချင်နေသည်မှာ အတန်ကြာပြီဖြစ်သည်။ အဆင့်အနည်းငယ် တက်သွားရန် မဆိုထားနှင့်၊ အနည်းဆုံးတော့ သတ်ဖြတ်ခြင်းနှင့် ဆေးဖော်စပ်ခြင်းတို့အတွက် အခြေခံလိုအပ်ချက်များကိုတော့ ပြည့်မီရမည် မဟုတ်ပါလား။

"ဝန်ကြီးဝူရဲ့ ဆေးပင်တွေကို ဆေးဖော်စပ်ရင်းနဲ့ မဖျက်ဆီးပစ်ရသေးဘူးလား"

ကျောက်ဒူစီ၏ နဖူးကြောများ အနည်းငယ် တွန့်ကွေးသွားပြီး သူ၏မျက်လုံးများမှ မြွေတစ်ကောင်ကဲ့သို့ အေးစက်စက် အလင်းရောင်တစ်ခု ထွက်ပေါ်လာသည်။

"နျူးပေါ့ထျန်း... ခင်ဗျားက တကယ်ကို မောက်မာလွန်းတာပဲ။ ဝန်ကြီးဝူလို ဂုဏ်သရေရှိတဲ့လူက ခင်ဗျားကို အများကြီး ယုံကြည်ပြီး ဆေးဖော်စပ်ခိုင်းတာကို ခင်ဗျားက ဆင်ခြေတွေပေးပြီး အချိန်ဆွဲနေတယ်။ ဒါဟာ ဝန်ကြီးဝူကို လုံးဝ အလေးမထားတာ အသိသာကြီးပဲ"

"ပြီးတော့ ဒီဆေးဖော်စပ်ခန်းထဲကို အလေအလွင့်ကောင်တွေကို ခေါ်လာပြီး ခင်ဗျားရဲ့ ဆေးမီးဖိုနဲ့ မြေမီးတောက်ကို ကလိခိုင်းထားသေးတယ်။ အထဲမှာ ဟောက်သံပေးပြီး အိပ်နေတာကိုတောင် ခွင့်ပြုထားသေးတယ်။ ဒီဆေးဖော်စပ်ခန်းကို ဘာလို့ မှတ်နေလဲ"

"ခင်ဗျားရဲ့ ကိုယ်ပိုင်အိမ်များ မှတ်နေလား။ ဒီကိစ္စကို ဂိုဏ်းချုပ်ဆီ သေချာပေါက် သတင်းပို့မယ်။ ခင်ဗျားရဲ့ ထင်ရာစိုင်းနေတဲ့လုပ်ရပ်တွေကို ဆက်ပြီး ခွင့်လွှတ်ပေးနေလို့ မဖြစ်တော့ဘူး"

ကျောက်ဒူစီ၏ အသံက မိုးခြိမ်းသံကဲ့သို့ ကျယ်လောင်လှသဖြင့် ထိုအော်သံကြောင့် ပွဲကြည့်ချင်နေသော လူများစွာ ချက်ချင်း ရောက်ချလာကြသည်။

အခြားသော အဂ္ဂိရတ်ပညာရှင်များမှာလည်း နျူးပေါ့ထျန်း၏ ဆေးဖော်စပ်ခန်းအတွင်း လူစိမ်းတစ်ယောက်ဖြစ်သည့် ချူးဖုန်း ဝင်ရောက်နေသည်ကို တွေ့လိုက်ရသောအခါ အချင်းချင်း တီးတိုးပြောဆိုလာကြပြီး ချူးဖုန်းကို မကျေမနပ်အကြည့်များဖြင့် ကြည့်လိုက်ကြသည်။

"အဂ္ဂိရတ်ပညာရှင်နျူး... ကျွန်တော် ပွင့်ပွင့်လင်းလင်း ပြောတာကို ခွင့်လွှတ်ပါ။ ကျွန်တော်တို့ရဲ့ ဆေးဖော်စပ်ခန်းဆိုတာ အလွန်မွန်မြတ်ပြီး သန့်စင်တဲ့ နေရာပါ။ ဘယ်သူ့ကိုမဆို ဒီလို ပေါ့ပေါ့ဆဆ ခေါ်သွင်းလာလို့ မရပါဘူး။ ဒါဟာ စည်းမျဉ်းကို ဖောက်ဖျက်တာပါပဲ"

"အဂ္ဂိရတ်ပညာရှင်ထန် ပြောတာကို ကျွန်တော်လည်း ထောက်ခံတယ်။ ဒီကောင်လေးက ဘယ်သူမို့လို့လဲ။ သူက စာပေရော၊ သိုင်းပညာမှာပါ အရည်အချင်းမရှိလို့ နာမည်ကြီးနေတဲ့ ဓားဘုရင်အိမ်တော်က အသုံးမကျတဲ့ တတိယမင်းသားပဲလေ။ သူ့ကို အထဲဝင်ခွင့်ပေးလိုက်တာက ကျွန်တော်တို့ ဆေးဂိုဏ်းရဲ့ ဆေးဖော်စပ်ခန်းကို ညစ်ညမ်းသွားစေတာပဲ"

...

ပြဿနာကို စောင့်ကြည့်ရန် စုရုံးလာကြသည့် အဂ္ဂိရတ်ပညာရှင်အချို့မှာ နျူးပေါ့ထျန်းအပေါ် မကျေနပ်မှုများ ကိန်းအောင်းနေသည်မှာ ကြာပြီဖြစ်သည်။

ပွင့်ပွင့်လင်းလင်း ပြောရလျှင်တော့ မနာလိုဝန်တိုဖြစ်နေကြခြင်းပင်။

ယခုအခွင့်အရေးကို အသုံးချကာ ဒုတိယခေါင်းဆောင်ဖြစ်သည့် ကျောက်ဒူစီက ဦးဆောင်လိုက်သည်နှင့် တစ်ပြိုင်နက်တည်း ဝိုင်းဝန်းတိုက်ခိုက်ကြတော့သည်။

ဤသည်မှာ 'နံရံပြိုချိန် လူတိုင်းဝိုင်းတွန်းသည်' ဆိုသည့် ရှေးစကားနှင့် ကွက်တိပင် ဖြစ်နေတော့သည်။

"မင်း... မင်းတို့အားလုံး..." နျူးပေါ့ထျန်းမှာ ဒေါသကြောင့် တစ်ကိုယ်လုံး တုန်ယင်လာသည်။

ဝန်ကြီးဝူ၏ ဒေါသများလည်း ပေါက်ကွဲလာပြီး နျူးပေါ့ထျန်းအပေါ် စူးစိုက်ကြည့်နေသော အကြည့်များမှာ အလွန်တရာ ရန်လိုမုန်းတီးလာသည်။

"အဓိပ္ပာယ်မရှိတာတွေ ပြောမနေနဲ့။ ခင်ဗျား ဒီဆေးကို ဖော်စပ်နိုင်မှာလား၊ မဖော်စပ်နိုင်ဘူးလား" ဝန်ကြီးဝူက အေးစက်စက်လေသံဖြင့် မေးလိုက်သည်။

"ဒီကိစ္စက သံသယဖြစ်စရာပါပဲ" ကျောက်ဒူစီက ခေါင်းခါရင်း လှောင်ပြောင်သည့်လေသံဖြင့် ပြောလိုက်သည်။ "စရိုက်တူသူတွေပဲ ပေါင်းကြတာဆိုတော့ အဂ္ဂိရတ်ပညာရှင်နျူးက ဘယ်လိုလူမျိုးတွေနဲ့ ပေါင်းသင်းနေသလဲဆိုတာ ကြည့်လိုက်တာနဲ့ အားလုံး ရှင်းသွားတာပဲ"

"ဓားဘုရင်အိမ်တော်က အသုံးမကျတဲ့ကောင်နဲ့ ပေါင်းနေမှတော့ သူကိုယ်တိုင်လည်း အသုံးမကျတဲ့သူ ဖြစ်ဖို့ သေချာနေပြီလေ"

ကျောက်ဒူစီ၏ ဤသို့သော သွေးထိုးလှုံ့ဆော်မှုကြောင့် လူတိုင်းက ချူးဖုန်းကို ပို၍ပင် အထင်အမြင်သေးစွာ ကြည့်လာကြသည်။ ငါ့ကို အသုံးမကျတဲ့ကောင်တဲ့လား...။

ချူးဖုန်းသည် ဤလူ၏ ထပ်တလဲလဲ စော်ကားခြင်းကို ခံနေရသည်။ အလေအလွင့်ကောင်ဟု ခိုင်းနှိုင်းခံရသလို၊ အသုံးမကျသူဟုလည်း အခေါ်ခံနေရသည်။ သူ မည်မျှပင် သည်းခံနိုင်စွမ်းရှိစေကာမူ ယခုတော့ ဒေါသအထွတ်အထိပ်သို့ ရောက်သွားလေပြီ။

"ပထမဆုံးအနေနဲ့ ကျွန်တော့်ကိုယ်ကျွန်တော် တရားဝင် မိတ်ဆက်ပါရစေ။ ကျွန်တော်က အဂ္ဂိရတ်ပညာရှင်နျူး မကြာသေးခင်ကမှ လက်ခံထားတဲ့ တပည့်အသစ်ဖြစ်ပြီး ကျွန်တော့်နာမည်က ချူးဖုန်းပါ"

အစကတော့ ချူးဖုန်းအနေဖြင့် ပြန်လည်ငြင်းခုံရန်ပင် စိတ်ကူးမရှိခဲ့ပေ။

သို့သော် တစ်ဖက်လူက ဤမျှအထိ ဖိအားပေးလာမှတော့ သူကလည်း သူရဲဘောကြောင်စွာ ခေါင်းငုံ့ခံနေမည့်သူ မဟုတ်ပေ။

နျူးပေါ့ထျန်း၏ မျက်နှာ အနည်းငယ် ပျက်ယွင်းသွားပြီး ရင်ထဲတွင် ကြောက်လန့်သွားသည်။ အဘယ်ကြောင့်ဆိုသော် သူသည် ချူးဖုန်း၏ ဆရာဖြစ်ရန် လုံးဝ အရည်အချင်း မပြည့်မီသောကြောင့်ပင်။ တကယ်တမ်းဆိုရလျှင် ပြောင်းပြန်ဖြစ်ဖို့ပင် ပိုများနေသေးသည်။

"ကျောက်ဒူစီ... ခင်ဗျားကတော့ ကိုယ့်ကိုယ်ကိုယ် တော်တော် အထင်ကြီးနေပုံရတယ်။ ကောင်းပြီလေ... ဒါဆိုလည်း ဒီအလုပ်ကို ခင်ဗျားပဲ ယူလိုက်တော့။ ခင်ဗျားမှာ အရည်အချင်းရှိတယ်ဆိုရင် လူတိုင်းရှေ့မှာ ဒီဆေးကို အခုပဲ ဖော်စပ်ပြလိုက်စမ်းပါ"

ချူးဖုန်းက လှောင်ပြုံးပြုံးလိုက်ပြီး တန်ဖိုးကြီးဆေးပင်နှစ်ပင် ပါဝင်သော ဆေးသေတ္တာကို ကျောက်ဒူစီရှေ့သို့ ထိုးပေးလိုက်သည်။

"အာ... ဒါ... ဒါက..."

ချူးဖုန်းက ဤကဲ့သို့ ကွက်ကျော်ရိုက်လိမ့်မည်ဟု ကျောက်ဒူစီ အိမ်မက်ပင် မမက်ခဲ့ပေ။ သူ အနောက်သို့ တရွေ့ရွေ့ ဆုတ်သွားမိပြီး သူ၏မျက်နှာထက်တွင် ကြောက်ရွံ့မှုများ အထင်းသား ပေါ်လွင်လာသည်။

သူ့ကိုယ်ပိုင် အရည်အချင်းကို သူအသိဆုံးပင် ဖြစ်သည်။ နျူးပေါ့ထျန်းပင် မဖော်စပ်နိုင်သော ဆေးကို သူက ပို၍ပင် မဖော်စပ်နိုင်ပါချေ။

"ဒါက ဘာဖြစ်တာလဲ။ ခင်ဗျားက အဲ့လောက်တောင် စွမ်းနေရင် ဘာလို့ ဆေးမဖော်တာလဲ။ အပြောပဲရှိပြီး အလုပ်မပါတာကို ဘယ်သူက မလုပ်နိုင်လို့လဲ"

ချူးဖုန်း၏ မျက်နှာထက်တွင် လှောင်ပြောင်မှုများ ပြည့်နှက်နေပြီး ဆေးသေတ္တာကို ရှေ့သို့ တစ်ချက်တိုးပေးတိုင်း ကျောက်ဒူစီက နောက်သို့ ခြေတစ်လှမ်း ဆုတ်သွားလေသည်။

ချူးဖုန်း ကိုင်ထားသော ဆေးသေတ္တာထဲတွင် ရှိနေသည်မှာ တန်ဖိုးကြီး ဆေးပင်များ မဟုတ်ဘဲ အချိန်မရွေး ပေါက်ကွဲနိုင်သော မြေမြှုပ်မိုင်းတစ်လုံးကဲ့သို့ပင် ဖြစ်နေသည်။ ဒေါသထွက်နေသော နျူးပေါ့ထျန်းမှာ ပြုံးပင် ပြုံးသွားမိသည်။

သူက ချူးဖုန်း၏ ထက်မြက်လှသော ဉာဏ်ရည်အတွက် တိတ်တဆိတ် လက်မထောင်ပေးလိုက်မိသည်။ အမှန်ပင် ဤလူငယ်လေးသည် အလွန် ဉာဏ်ပြေးလှသည်။

လှည့်ကွက်လေး အနည်းငယ်မျှဖြင့် မောက်မာဝင့်ကြွားနေသော ကျောက်ဒူစီကို အူတူတူ ဝက်ဝံတစ်ကောင်လို ဖြစ်သွားအောင် လုပ်နိုင်ခဲ့သည်။

"အဟမ်း... လူကြီးလူကောင်းဆိုတာ သူတစ်ပါး အလိုရှိတာကို မလုယူရဘူး။ ဒီအလုပ်က အဂ္ဂိရတ်ပညာရှင်နျူး ယူထားတာပဲ။ သဘာဝကျကျပြောရရင် ငါက ဒါကို ဝင်လုလို့ မဖြစ်ဘူးလေ" ကျောက်ဒူစီ၏ မျက်နှာမှာ ရှက်ရွံ့မှုကြောင့် နီရဲသွားသော်လည်း သူ၏ မာနကြောင့် အလွယ်တကူ အရှုံးမပေးနိုင်ပေ။

အနည်းဆုံးတော့ နှုတ်အားဖြင့်ပေါ့။

သူက အတင်းအကျပ် ဆင်ခြေပေးကာ ထိုကိစ္စကို ရှောင်ထွက်ရန် ကြိုးပမ်းလိုက်သည်။

အခြားအချိန်ဆိုလျှင်တော့ နျူးပေါ့ထျန်းက ဤကိစ္စကို ဆက်လက် အရေးယူချင်မှ ယူမည်ဖြစ်သည်။ သို့သော် ကျောက်ဒူစီ၏ အကြံအစည်များကြောင့် သူ၏ အသက်မွေးဝမ်းကျောင်းအလုပ်မှာ နစ်နာလုနီးပါး ဖြစ်ခဲ့ရသည်မို့ ယခုအချိန်တွင် သူက အဘယ်ကြောင့် နောက်ဆုတ်ပေးရမည်နည်း။

ချူးဖုန်းက ကျောက်ဒူစီကို နျူးပေါ့ထျန်း၏ ပစ်ကွင်းထဲသို့ ရောက်အောင် တွန်းပို့ပေးခဲ့ပြီးပြီမို့ ယခု ကျန်ရှိနေသည်မှာ နျူးပေါ့ထျန်းအနေဖြင့် ကျောက်ဒူစီ၏ မျက်နှာကို ဖြတ်ရိုက်ရန်သာ ရှိတော့သည်။

"ဒီအလုပ်ကို အဂ္ဂိရတ်ပညာရှင်ကျောက်ကို လွှဲပေးဖို့ ကျွန်တော်က လုံးဝ ကန့်ကွက်စရာ မရှိပါဘူး။ တကယ်တော့ ဝမ်းတောင် ဝမ်းသာမိသေးတယ်"

"အဂ္ဂိရတ်ပညာရှင်ကျောက်က စောစောကတင် ထိပ်တန်းအဂ္ဂိရတ်ပညာရှင်ဆိုတဲ့ ကျွန်တော့်ရဲ့ နေရာကို စိန်ခေါ်ချင်နေတာ မဟုတ်ဘူးလား။ ခင်ဗျားရဲ့ ဆေးဖော်စပ်တဲ့ စွမ်းရည်တွေ အများကြီး တိုးတက်လာပြီး ယုံကြည်မှုတွေ အပြည့်ရှိနေပုံရတယ်။ ဒါက ခင်ဗျားရဲ့ 'အကန့်အသတ်မဲ့' ဆေးဖော်စပ်နိုင်စွမ်းကို လူတိုင်းရှေ့မှာ ချပြဖို့ အကောင်းဆုံး အခွင့်အရေးပဲလေ"

အဂ္ဂိရတ်အကယ်ဒမီ၏ နည်းပြချုပ်ဖြစ်သော နျူးပေါ့ထျန်းသည် နှုတ်ရေးနှင့်ပတ်သက်လာလျှင် အလွန် ထိပ်တန်းရောက်သူဖြစ်သည်။

သူ၏ စကားများက အလွန်ပါးနပ်လှပြီး ကျောက်ဒူစီကို ထွက်ပေါက်ပိတ်သွားစေကာ နောက်ဆုတ်၍မရအောင် လုပ်ပစ်လိုက်သည်။

"ငါ... ငါက... မကြာသေးခင်က နေသိပ်မကောင်းလို့ ဆေးမဖော်စပ်နိုင်ဘူး" ကျောက်ဒူစီ၏ နဖူးမှ ချွေးသီးချွေးပေါက်များ ကျလာသည်။ မျက်လုံးပေါင်းများစွာက သူ့ကို စိုက်ကြည့်နေကြသဖြင့် ဤကဲ့သို့ အကင်ခံနေရသည့် အခြေအနေတွင် သူ အလွန်အမင်း လုံခြုံမှုကင်းမဲ့နေသည်ဟု ခံစားလိုက်ရသည်။

"နေမကောင်းဘူး... ဟုတ်လား"

"အဂ္ဂိရတ်ပညာရှင်ကျောက်က ဒီနေ့တင် ဆေးရည်တစ်ခွက် ဖော်စပ်ဖို့ ပြင်ဆင်နေတာလေ။ ကြည့်စမ်း... မီးဖိုထဲက မီးတောင် မငြိမ်းသေးဘူး"

နျူးပေါ့ထျန်းက စကားပြောရင်း မီးတောက်လောင်နေဆဲဖြစ်သော ကျောက်ဒူစီ၏ ဆေးဖော်စပ်ခန်းဘက်သို့ လှမ်းကြည့်လိုက်သည်။

"ကျောက်ဒူစီ... နောက်တစ်ခါ လိမ်မယ်ဆိုရင် ကြိုပြီး ဇာတ်တိုက်ထားဖို့ မှတ်ထားပါ။ ခင်ဗျားရဲ့ ဉာဏ်ရည်နဲ့ဆိုရင် ခင်ဗျားကိုယ်စား ကျွန်တော်တောင် စိတ်ပူလာပြီ။ မဖော်စပ်နိုင်ရင်လည်း ဟန်ဆောင်မနေပါနဲ့တော့။ မျက်နှာဖောင်းအောင် ပါးရိုက်ပြီး လူဝကြီးဟန်ဆောင်မနေပါနဲ့တော့"

ချူးဖုန်းက ထပ်မံ ဝင်ပါလာပြန်သည်။ လူတစ်ယောက်ကို ရိုက်မည်ဆိုလျှင် မျက်နှာကို တည့်တည့်ရိုက်ရမည်။ လူတစ်ယောက်ကို နင်းမည်ဆိုလျှင် ခေါင်းကိုသာ နင်းရမည်။

ချူးဖုန်းနှင့် နျူးပေါ့ထျန်းတို့သည် ကျောက်ဒူစီကို အလှည့်ကျ စော်ကားပြောဆိုကာ သူ၏ လိမ်လည်မှုများကို ဖွင့်ချလိုက်ကြသည်။ ကျောက်ဒူစီ၏ မျက်နှာသည် ရှက်ရွံ့မှုကို ဖုံးကွယ်မထားနိုင်တော့ဘဲ အပြာ၊ အနီ၊ အဖြူ စသဖြင့် အရောင်ပေါင်းစုံ ပြောင်းလဲနေသည်မှာ အလွန် ရယ်စရာကောင်းလှသည်။

ဘုရားပွဲမှ ဇာတ်မင်းသားတစ်ယောက်နှင့်ပင် တူနေတော့သည်။

ထိုအချိန်တွင် သူသည် ပွဲကြည့်ပရိသတ်များ၏ မျက်လုံးထဲ၌ လူပြက်တစ်ယောက်မျှသာ ဖြစ်သွားတော့သည်။

"ဟွန့်... မင်းတို့နဲ့ ဆက်ပြီး စကားပြောမနေချင်တော့ဘူး" ကျောက်ဒူစီက ပြန်မပြောရဲတော့ပေ။ သို့မဟုတ်ပါက အဝတ်အစားများ ချွတ်ခံရပြီး ကြိမ်ဒဏ်ပေးခံရသည်နှင့် တူသွားမည်ဖြစ်သည်။

ဝန်ကြီးဝူက အခြေအနေကို သဘောပေါက်သွားပုံရသည်။ သူသည် နယ်ရုပ်တစ်ရုပ်အဖြစ် ကစားခံလိုက်ရခြင်းပင်။

"တောက်... ခင်ဗျားကို တစ်ခုခု စွမ်းလှပြီ ထင်နေတာ။ အဂ္ဂိရတ်ပညာရှင်နျူးလောက်တောင် အသုံးမကျပါလား။ ခွေးမသား... စစ်ဦးစီးချုပ်ဖြစ်တဲ့ ငါ့ရှေ့မှာ နောက်တစ်ခါ လာပြီး ပါးစပ်ဖောင်းဟလာရဲရင် သေတဲ့အထိ ပါးချည်းပဲ ရိုက်ပစ်မယ်"

ဝန်ကြီးဝူသည် စစ်တပ်မှ လာသူဖြစ်ပြီး ကြမ်းတမ်း၍ ပွင့်လင်းဖြောင့်မတ်သူဟု နာမည်ကြီးသည်။

ကျောက်ဒူစီသည် သူ၏ ကြောက်မက်ဖွယ်ကောင်းသော အကြည့်ကို မြင်လိုက်ရသောအခါ အသံလေးပင် မထွက်ရဲတော့ဘဲ ခပ်ဝေးဝေးသို့ ဆုတ်ခွာသွားတော့သည်။ ချူးဖုန်းနှင့် နျူးပေါ့ထျန်းတို့အပေါ် ထားရှိသည့် သူ၏အကြည့်များက ပိုမို အေးစက်လာသည်။

သူ့စိတ်ထဲတွင် ကလဲ့စားချေလိုစိတ်များ အပြည့်အနှက် ဖြစ်နေသည်။

ယနေ့တွင် သူသည် ချူးဖုန်းနှင့် နျူးပေါ့ထျန်းတို့ နှစ်ယောက်စလုံး၏ လူလုံးရှေ့ အရှက်ခွဲခြင်းကို ခံလိုက်ရသဖြင့် ဤသည်မှာ အလွန် ခါးသီးလှသော အတွေ့အကြုံပင် ဖြစ်သည်။

"နျူးပေါ့ထျန်း... နဲ့ ဟို ဓားဘုရင်အိမ်တော်က အသုံးမကျတဲ့ကောင်... မင်းတို့နှစ်ယောက်လုံးက ပါးစပ်သန်တာပဲရှိတယ်။ ဆေးဖော်စပ်ကြည့်ကြစမ်းပါလား" အတန်ကြာ တိတ်ဆိတ်နေပြီးနောက် ကျောက်ဒူစီသည် ချူးဖုန်းနှင့် နျူးပေါ့ထျန်းတို့ကို ထပ်မံ၍ ပစ်မှတ်ထားလိုက်ပြန်သည်။ "ငါတို့အားလုံး မဖော်စပ်နိုင်တာချင်း အတူတူဆိုရင် ဘယ်သူက အားနည်းတယ်၊ အားသာတယ်ဆိုတာ ပြောလို့မရဘူးလေ"