အခန်း (၅၂) - နျူးပေါ့ထျန်း၏ အကျပ်အတည်း

အခြားရွေးချယ်စရာမရှိတော့သဖြင့် သူသည် ဆေးကျမ်းတစ်အုပ်ပြီးတစ်အုပ်ကို ကောက်ယူကာ အရူးအမူး လှန်လှောရှာဖွေနေရတော့သည်။

မျက်လုံးများ ကျိန်းစပ်ကာ ဖောင်းအစ်နေပြီဖြစ်သော်လည်း သူ မရပ်နားရဲပေ။

အကြောင်းမူကား ဤကိစ္စသည် သူ၏ နံပါတ်တစ် ဒုတိယအဆင့် အထိုင်အဂ္ဂိရတ်ပညာရှင် နေရာကို ဆက်လက်ထိန်းသိမ်းထားနိုင်ခြင်း ရှိ၊ မရှိနှင့် သက်ဆိုင်နေသောကြောင့်ပင်။

အချိန်တွေ တရွေ့ရွေ့ ကုန်ဆုံးလာသည်နှင့်အမျှ နျူးပေါ့ထျန်း၏ ဘေးပတ်လည်ရှိ စာအုပ်များမှာ တောင်လိုပုံနေပြီဖြစ်သော်လည်း သူရှာဖွေနေသော ဆေးဖော်စပ်နည်းကိုကား ယခုထက်တိုင် မတွေ့ရသေးချေ။

မီးတိမ်တိုက်သစ်သီးနှင့် ထိုက်ယင်ရွှေမှို... ဤဆေးဘက်ဝင်အပင် နှစ်မျိုးတွင် ပထမတစ်မျိုးက မီးသဘာဝစွမ်းအင် ပါဝင်ပြီး ဒုတိယတစ်မျိုးကတော့ အေးခဲနေသော ယင်သဘာဝနှင့် ရွှေသဘာဝစွမ်းအင်တို့ ပါဝင်လေသည်။ ယင်းတို့ကို အဓိကပါဝင်ပစ္စည်းများအဖြစ် အသုံးပြုကာ မီးသဘာဝ ဓားသွေးကြောကို အားကောင်းစေမည့် ဒုတိယအဆင့် ဆေးလုံးတစ်လုံး ဖော်စပ်ရန်ဆိုသည်မှာ အလွန်တရာ ခက်ခဲလွန်းလှပေသည်။

မီးက ရွှေကို နိုင်စွမ်းရှိသည်။ ထို့အပြင် မီးတိမ်တိုက်သစ်သီးက ယန်သဘာဝဖြစ်ပြီး ထိုက်ယင်ရွှေမှိုက ယင်သဘာဝဖြစ်ရာ ၎င်းတို့နှစ်ခုမှာ မူလသဘာဝအရပင် တစ်ခုနှင့်တစ်ခု ဆန့်ကျင်ဘက် ဖြစ်နေလေသည်။

ထိုအရာနှစ်ခုကို ဆေးဖိုထဲတွင် အတူတကွ ပေါင်းစပ်ဖော်စပ်လိုက်မည်ဆိုပါက ဆေးဖိုပေါက်ကွဲနိုင်သည့် အန္တရာယ်ရှိသည့်အပြင် တန်ဖိုးကြီးမားလှသော အဆိုပါ အဓိကပါဝင်ပစ္စည်း နှစ်မျိုး၏ ဆေးဘက်ဝင် အာနိသင်များမှာလည်း အချင်းချင်း ချေဖျက်သွားနိုင်သည့် အလားအလာ ရှိနေပေသည်။

အချဉ်ဓာတ်နှင့် ဆားဓာတ်တို့ကို ရောနှောလိုက်သကဲ့သို့ အချင်းချင်း အာနိသင်ပျက်ပြယ်သွားစေမည်သာ ဖြစ်သည်။

နျူးပေါ့ထျန်းမှာ သူ၏ဆံပင်များကို ဆွဲဖွနေမိရာ ကြမ်းပြင်ပေါ်တွင် ဆံပင်အချို့ပင် ကျွတ်ကျနေလေပြီ။

"ဆေးဆရာနျူး... ခင်ဗျားကြည့်ရတာ အားလပ်ချိန်တွေ အတော်များနေပုံရတယ်နော်" လှောင်ပြောင်သရော်သည့် လေသံပါဝင်သော စူးရှရှအသံတစ်သံ ထွက်ပေါ်လာလေသည်။

ဒုတိယအဆင့် အဂ္ဂိရတ်ပညာရှင် ဝတ်ရုံကို ဝတ်ဆင်ထားသော လူလတ်ပိုင်းအရွယ် အမျိုးသားတစ်ဦးသည် နျူးပေါ့ထျန်း၏ ဆေးဖော်ခန်းအပြင်ဘက်သို့ လျှောက်လာကာ အထဲသို့ ချောင်းကြည့်လိုက်သည်။

ဤနေရာတွင် ဒုတိယအဆင့် အဂ္ဂိရတ်ပညာရှင်များအတွက် ဆေးဖော်ခန်း ခြောက်ခန်းရှိရာ ဒုတိယအဆင့် အထိုင်အဂ္ဂိရတ်ပညာရှင် ခြောက်ဦးတိတိ ရှိသည်ဟု ဆိုလိုခြင်းပင်။

နျူးပေါ့ထျန်းအား နှုတ်ဆက်လိုက်သော လူလတ်ပိုင်းအမျိုးသား၏ အမည်မှာ ကျောက်ဒူစီ ဖြစ်သည်။ သူ၏ နှာခေါင်းမှာ ချိတ်ကောက်သဏ္ဌာန်ရှိပြီး မျက်လုံးများမှာလည်း သေးငယ်ကျဉ်းမြောင်းလှရာ မြင်မြင်ချင်းမှာပင် ကောက်ကျစ်စဉ်းလဲမည့်သူဟု ထင်မှတ်ရပေသည်။

ဤသူ၏ အဆင့်အတန်းမှာ နျူးပေါ့ထျန်း၏ အောက် တစ်ဆင့်တွင်သာ ရှိပေသည်။

သူသည် အမြဲတမ်း ဒုတိယနေရာတွင်သာ ရှိနေခဲ့ပြီး ထိပ်ဆုံးနေရာဖြစ်သည့် နံပါတ်တစ် ဒုတိယအဆင့် အထိုင်အဂ္ဂိရတ်ပညာရှင်ချုပ်ကြီး ဖြစ်လာရန် အိပ်မက်မက်နေသူ ဖြစ်တန်ရာ၏။

"အော်... ဆေးဆရာကျောက်ကိုး၊ ကိစ္စများရှိလို့လား" နျူးပေါ့ထျန်းက မော့ကြည့်ကာ အလွန်အေးစက်ခက်ထန်သော လေသံဖြင့် မေးလိုက်သည်။

သူသည် စိတ်ရှုပ်နေသဖြင့် ဤသူနှင့် စကားမပြောချင်သည်မှာ အထင်းသားပင်။

"မရှိပါဘူးဗျာ၊ မရှိပါဘူး။ လွန်ခဲ့တဲ့ရက်အနည်းငယ်က ခင်ဗျား အရေးကြီးတဲ့ အရောင်းအဝယ်တစ်ခုကို လက်ခံလိုက်တယ်လို့ ကြားလိုက်လို့ပါ။ ဝန်ကြီးဝူအတွက် မီးသဘာဝ ဓားသွေးကြောကို အားကောင်းစေမယ့် ဒုတိယအဆင့် ဆေးလုံးတစ်လုံး ဖော်စပ်ပေးရမယ်ဆို။ အခြေအနေ ဘယ်လိုရှိလဲ... ခင်ဗျား ကြည့်ရတာ အေးအေးဆေးဆေး ဖြစ်နေပုံထောက်ရင် ဆေးဖော်စပ်လို့ ပြီးသွားပြီထင်တယ်နော်"

ကျောက်ဒူစီက သူတစ်ပါး ဒုက္ခရောက်သည်ကို ဝမ်းသာအားရဖြစ်နေသည့် မဲ့ပြုံးကြီးဖြင့် မေးလိုက်လေသည်။

"ထွက်သွားစမ်း... မင်းနဲ့ အာလာပသလ္လာပ ပြောနေဖို့ အချိန်မရှိဘူး"

နျူးပေါ့ထျန်းက ခပ်ကြမ်းကြမ်းပင် တုံ့ပြန်လိုက်ပြီး သူ၏လက်ထဲရှိ ဆေးကျမ်းကို ဆက်လက် လှန်လှောနေလိုက်သည်။

နျူးပေါ့ထျန်း၏ နဖူးထက်တွင် ချွေးစေးများ ပျံ့နှံ့နေပြီဖြစ်သော်လည်း သူ သုတ်ဖယ်ရန်ပင် သတိမရတော့ချေ။

"ဟက်... အရမ်းလည်း ဒေါသမကြီးပါနဲ့ဗျာ။ ပြီးခဲ့တဲ့အကြိမ်က ခင်ဗျား အရောင်းအဝယ်တစ်ခု ကျရှုံးခဲ့လို့ ကျွန်တော်တို့ ဆေးပညာရှင်ဂိုဏ်းရဲ့ ဂုဏ်သိက္ခာတောင် ကျဆင်းခဲ့ရသေးတယ်။ အခု ဒီအလုပ်သာ ထပ်ပြီးကျရှုံးသွားမယ်ဆိုရင်တော့ နံပါတ်တစ် ဒုတိယအဆင့် အထိုင်အဂ္ဂိရတ်ပညာရှင်ချုပ် ဆိုတဲ့ နေရာမှာ ထိုင်နေဖို့ ခင်ဗျား မျက်နှာပူရလိမ့်မယ် ထင်တယ်နော်"

"အဲဒီအချိန်ကျရင် ခင်ဗျား ကျွန်တော့်ရဲ့ မျက်နှာကို ကြည့်ပြီး နေရတော့မှာပါ"

ကျောက်ဒူစီ၏ ရယ်မောသံထဲတွင် အောင်နိုင်သူတစ်ဦး၏ ဟန်ပန်များ အပြည့်အဝ ပါဝင်နေလေသည်။

နျူးပေါ့ထျန်းအား မျက်နှာချင်းဆိုင် ယှဉ်ပြိုင်အနိုင်ယူရန်မှာ သူ့အတွက် အလွန်တရာ ခက်ခဲလှပေသည်။ အနည်းဆုံး နောက်ထပ် ဆယ်နှစ်ခန့်အထိတော့ နျူးပေါ့ထျန်း၏ လက်အောက်တွင် ဆက်လက်နေရဦးမည်ဟု သူ ထင်မှတ်ထားခဲ့သည်။ သို့သော် နျူးပေါ့ထျန်းမှာ ကံကြမ္မာ အလွန်ဆိုးရွားနေပြီး ခက်ခဲလှသည့် အရောင်းအဝယ် နှစ်ခုနှင့် ဆက်တိုက်ဆိုသလို ရင်ဆိုင်လိုက်ရလေသည်။

မီးတိမ်တိုက်သစ်သီးနှင့် ထိုက်ယင်ရွှေမှိုတို့ကို မည်သို့ အတူတကွ ပေါင်းစပ်ရမည်နည်း။ အနည်းဆုံးတော့ ကျောက်ဒူစီ ကိုယ်တိုင်ပင်လျှင် ထိုကိစ္စအတွက် ယုံကြည်မှုမရှိပါချေ။

ဝှစ်!

ဆေးကျမ်းတစ်အုပ်က ကျောက်ဒူစီထံသို့ ပြင်းထန်စွာ လွင့်စင်လာလေသည်။ သူ အလွန်လန့်သွားပြီး ခေါင်းကိုပုကာ ကပျာကယာ ရှောင်တိမ်းလိုက်ရသည်။

ထိုစဉ် အပြင်ဘက်မှ ကြမ်းတမ်းပြီး အာဏာပါသော အသံကြီးတစ်သံ ထွက်ပေါ်လာသည်။

"ဆေးဆရာနျူး ရှိလား။ လွန်ခဲ့တဲ့ရက်အနည်းငယ်က မီးသဘာဝ ဓားသွေးကြောကို အားကောင်းစေမယ့် ဒုတိယအဆင့် ဆေးလုံးတစ်ဖို ဖော်စပ်ပေးဖို့ အဓိက ဆေးဘက်ဝင်အပင် နှစ်မျိုး သူ့ဆီ အပ်ခဲ့တယ်။ ပြီးပြီလား" ထိုအသံပိုင်ရှင်၏ ဟန်ပန်မှာ အလွန်မာနထောင်လွှားနေပုံရ၏။

"ဝန်ကြီးဝူ... ဧည့်ခန်းဆောင်မှာ ခဏလောက် ထိုင်စောင့်ပေးပါခင်ဗျာ၊ ကျွန်တော် အခုပဲ သွားမေးပေးပါ့မယ်"

ဧည့်ကြိုကောင်တာမှ မန်နေဂျာမှာ လိပ်တစ်ကောင်ကဲ့သို့ ခါးကိုကိုင်းညွတ်ကာ ဝန်ကြီးဝူအား အလွန်အမင်း ရိုသေလေးစားစွာ ဆက်ဆံနေလေသည်။

မည်သို့ပင်ဆိုစေကာမူ ဝန်ကြီးဝူဆိုသည်မှာ စစ်ရေးဝန်ကြီးတစ်ဦးဖြစ်ကာ မြင့်မားသော အဆင့်အတန်းနှင့် ကြီးမားသော ဩဇာအာဏာကို ပိုင်ဆိုင်ထားပြီး တိုင်းပြည်တစ်ဝန်းရှိ စစ်တပ်များကို ကွပ်ကဲအုပ်ချုပ်ရသူဖြစ်သည်။ ထို့အပြင် သူကိုယ်တိုင်၏ စွမ်းရည်မှာလည်း အလွန်ထိတ်လန့်ဖွယ်ကောင်းလှပေသည်။

ကျန်းယွန်းမင်းဆက်အတွင်း၌ သူသည် မောက်မာစွာ မလျှောက်လှမ်းလျှင်တောင်မှ သူ့အား မျက်နှာချင်းဆိုင် ဆန့်ကျင်ရဲသူ အလွန်နည်းပါးလှပေသည်။ မင်းသားလျူပင်လျှင် သူ့ကို ဖယ်ပေးရမည့် အနေအထားတွင် ရှိလေသည်။

"ငါ အလုပ်ရှုပ်နေတယ်၊ ထိုင်နေဖို့ အချိန်မရှိဘူး။ ငါ့ဘာသာငါ သွားမေးလိုက်မယ်"

ထိုသို့ပြောဆိုရင်း ဝန်ကြီးဝူသည် အတွင်းဘက်ရှိ ဆေးဖော်ခန်းဆီသို့ လျှောက်သွားရာ မည်သူမျှ မတားဆီးရဲကြပေ။

ကျောက်ဒူစီ၏ မျက်နှာထက်တွင် ကောက်ကျစ်သော အပြုံးတစ်ခု ပေါ်လာသည်။ ယခုတော့ ကြည့်ကောင်းသည့် ပြဇာတ်တစ်ပုဒ်ကို မြင်ရတော့မည်သာ။

"အိုး... တစ်နေ့တခြား တာဝန်တွေ များပြားလှတဲ့ ဝန်ကြီးဝူပါလား။ ဆေးလာယူတာလားဗျ" ကျောက်ဒူစီက ပြုံးရွှင်စွာဖြင့် ယဉ်ယဉ်ကျေးကျေး နှုတ်ဆက်လိုက်သည်။

"အင်း"

ဝန်ကြီးဝူက ခေါင်းကို အနည်းငယ် ညိတ်ပြလိုက်သည်။

"ခင်ဗျားကို စိတ်ပျက်အောင် လုပ်မိမှာ စိုးရိမ်မိပါတယ်ဗျာ။ ကျွန်တော်တို့ရဲ့ ဆေးဆရာနျူးက ဒီလိုဆေးမျိုးကို အရင်က တစ်ခါမှ မဖော်စပ်ဖူးဘူး ထင်ပါရဲ့။ ပြီးခဲ့တဲ့ ရက်တွေတုန်းကလည်း သူ ဒါကိုပဲ လေ့လာနေခဲ့တာလေ"

"ဟူး... အဂ္ဂိရတ်ပညာရှင်ချုပ် တစ်ယောက်ဆိုတာ သူရဲ့ နေရာကို ထိန်းသိမ်းဖို့ အမှန်တကယ် စွမ်းရည်အစစ်အမှန်တွေ လိုအပ်တာပေါ့ဗျာ။ ဥပမာ... ဟိုတစ်နေ့ကဆိုရင် ဖောက်သည်တစ်ယောက်က ဆေးဖော်စပ်ဖို့ အလွန်ရှားပါးတဲ့ ခရမ်းရောင် မန်ဒါလာကို ယူလာခဲ့တယ်၊ ဘာဖြစ်သွားလဲ သိလား"

"ကျွန်တော်တို့ရဲ့ ဆေးဆရာနျူးက ဖောက်သည်ရဲ့ ဆေးပင်ကို ဖျက်ဆီးပစ်လိုက်ရုံတင်မကဘဲ သူကိုယ်တိုင်ပါ အဆိပ်သင့်သွားခဲ့သေးတယ်။ တကယ့်ကို မလွယ်ပါဘူးဗျာ"

ကျောက်ဒူစီသည် ကြွက်သေကို ငိုပြနေသော ကြောင်တစ်ကောင်ကဲ့သို့ အတုအယောင် ကိုယ်ချင်းစာသည့် မျက်နှာထားကို ဖန်တီးကာ ခေါင်းကိုခါယမ်းလျက် တရစပ် သက်ပြင်းချနေလေသည်။

သူတို့အားလုံးသည် ဆေးပညာရှင်ဂိုဏ်းမှ အဂ္ဂိရတ်ပညာရှင်များ ဖြစ်ကြပြီး အချင်းချင်း ကူညီရိုင်းပင်းကာ လေးစားမှုရှိသင့်ပေသည်။ သို့ရာတွင် သူကတော့ အရေးကြီးသော ဖောက်သည်တစ်ဦး၏ ရှေ့မှောက်တွင် နျူးပေါ့ထျန်း၏ အားနည်းချက်များကို ထုတ်ဖော်ပြောဆိုရန် ရွေးချယ်ခဲ့လေသည်။

သူသည် နျူးပေါ့ထျန်း၏ အသက်မွေးဝမ်းကျောင်းအလုပ်ကို ဖျက်ဆီးပစ်လိုသည်မှာ ထင်ရှားလှပေသည်။

"ဝန်ကြီးဝူ... ခင်ဗျားရဲ့ မီးတိမ်တိုက်သစ်သီးနဲ့ ထိုက်ယင်ရွှေမှိုတို့ဆိုတာ အလွန်တန်ဖိုးကြီးမားလှတဲ့ ဆေးဘက်ဝင်ပစ္စည်းတွေပါ။ တစ်ယောက်ယောက်ကများ အဲဒါတွေကို ဖျက်ဆီးပစ်လိုက်မယ်ဆိုရင် တကယ့်ကို နှမြောစရာကောင်းလှပါတယ်"

"မနေ့က ဆေးဆရာနျူး ဆေးဖိုဖွင့်တာကို ကျွန်တော် မြင်လိုက်တယ်။ ဒါပေမဲ့ သူကိုယ်တိုင် ဆေးမဖော်စပ်ဘူးဗျ။ အဲဒီအစား မသက်ဆိုင်တဲ့ ကလေးတစ်ယောက်ကို လျှောက်လုပ်ခိုင်းနေတာ..."

ဤသည်ကို ကြားလိုက်ရသောအခါ ဝန်ကြီးဝူမှာ ချက်ချင်းပင် စိုးရိမ်တကြီး ဖြစ်သွားလေတော့သည်။

ကျောက်ဒူစီ၏ အကြည့်များက အေးစက်သွားပြီး အထဲတွင် အိပ်ပျော်နေသော ချူးဖုန်းထံသို့ အကြည့်ရောက်သွားသည်။ ဤသည်မှာ နျူးပေါ့ထျန်းအား ဂုဏ်သိက္ခာကျဆင်းစေရန်အတွက် အကောင်းဆုံးသော အခွင့်အရေးပင်တည်း။

"ငါ့ရဲ့ ဆေးဘက်ဝင်အပင် နှစ်မျိုး ဘယ်မှာလဲ" ဝန်ကြီးဝူသည် ဆေးဖော်ခန်းထဲသို့ ပြေးဝင်သွားကာ ချူးဖုန်း၏ အင်္ကျီကော်လာကို ဆွဲကိုင်လိုက်သည်။ သူ၏ မျက်နှာအမူအရာမှာ လူစားမည့် သားရဲတစ်ကောင်ကဲ့သို့ ရက်စက်ကြမ်းကြုတ်နေ၏။ "အဟက်... ဓားဘုရင်စံအိမ်တော်က တတိယသခင်လေး ဖြစ်နေပါလား"

ဝန်ကြီးဝူက ချူးဖုန်းကို ချက်ချင်းပင် မှတ်မိသွားသည်။

သို့ရာတွင် သူ၏ မျက်နှာအမူအရာမှာ ပို၍ပင် ဆိုးရွားလာတော့သည်။ အဘယ်ကြောင့်ဆိုသော် ချူးဖုန်းဆိုသည်မှာ နာမည်ကြီး အသုံးမကျသူတစ်ဦးဖြစ်ကြောင်း လူတိုင်း သိထားကြသောကြောင့်ပင်။

သတင်းကောင်းကား အိမ်ပြင်မထွက်၊ သတင်းဆိုးကား အရပ်တကာ နှံ့စင်နေလေပြီ။ အဂ္ဂိရတ်ပညာရပ်ကျောင်းတော်၌ နှစ်စဉ် အတန်းထဲတွင် နောက်ဆုံးအဆင့်သာ ရရှိလေ့ရှိသော ချူးဖုန်း၏ 'ဂုဏ်ပြောင်လှသည့်' မှတ်တမ်းကို လျူဖင်နှင့် အခြားသူများ၏ မသမာသော ဖြန့်ဝေမှုများကြောင့် လူတိုင်းနီးပါး သိရှိနေကြလေသည်။

သူ၏ ဆေးဘက်ဝင်အပင် နှစ်မျိုးမှာ အလွန်တရာ အားထုတ်ကြိုးပမ်းပြီးမှ ရယူထားခဲ့ရခြင်း ဖြစ်သည်။

ကျောင်းသားတစ်ဦးဖြစ်သူ ချူးဖုန်းအား နျူးပေါ့ထျန်းက ဆေးဖော်စပ်ခိုင်းသည်ဆိုသည့် အသိတစ်ခုတည်းနှင့်ပင် ဝန်ကြီးဝူ၏ အမျက်ဒေါသများမှာ ထိန်းချုပ်မရနိုင်အောင် ပြင်းထန်လာတော့သည်။

ချူးဖုန်းမှာ နှစ်ခြိုက်စွာ အိပ်ပျော်နေစဉ် ရိုင်းစိုင်းစွာ ကော်လာဆွဲ အနှိုးခံလိုက်ရသဖြင့် အလွန် စိတ်အနှောင့်အယှက် ဖြစ်သွားရလေသည်။

"ဟေ့... လွှတ်လိုက်စမ်း။ ခင်ဗျားရဲ့ ဆေးပင်တွေ ဒီမှာ ရှိသေးတယ်၊ ဘာမှ မထိရသေးဘူး" ဝန်ကြီးဝူက ချူးဖုန်းအား ဆွဲကိုင်လိုက်သည်ကို မြင်သောအခါ နျူးပေါ့ထျန်းမှာ ချက်ချင်းပင် စိုးရိမ်ထိတ်လန့်သွားတော့သည်။

အကယ်၍ ချူးဖုန်း တစ်ခုခုဖြစ်သွားလျှင်သော်လည်းကောင်း၊ ချူးဖုန်း ဒေါသထွက်သွားလျှင်သော်လည်းကောင်း သူ၏ ကိုယ်ပိုင်အသက်အန္တရာယ်ပင် စိုးရိမ်ရသည့် အနေအထားသို့ ရောက်သွားနိုင်ပေသည်။

နျူးပေါ့ထျန်းသည် သခင်ကို ပြင်းပြင်းထန်ထန် ကာကွယ်တတ်သည့် ခွေးတစ်ကောင်အလား သူ၏လက်ထဲရှိ ဆေးကျမ်းကို ဘေးသို့လွှင့်ပစ်ကာ ဝန်ကြီးဝူအား တွန်းဖယ်လိုက်လေသည်။

ပုံမှန်အားဖြင့်ဆိုလျှင် နျူးပေါ့ထျန်းသည် ဝန်ကြီးဝူအား လုံးဝ ပြစ်မှားရဲမည် မဟုတ်ပေ။

သို့ရာတွင် ဤအခိုက်အတန့်၌ ချူးဖုန်းနှင့် ပတ်သက်လာလျှင် ဧကရာဇ်မင်းမြတ် ကိုယ်တိုင် ရှေ့တွင် လာရပ်နေလျှင်တောင်မှ သူက ရန်မူရဲမည်သာ ဖြစ်သည်။

အနီးကပ် သေချာစစ်ဆေးကြည့်လိုက်သောအခါ သူ၏ ဆေးဘက်ဝင်အပင် နှစ်မျိုးမှာ အမှန်တကယ်ပင် အခြေအနေ ကောင်းမွန်နေသေးသည်ကို တွေ့ရသဖြင့် ဝန်ကြီးဝူ သက်ပြင်းတစ်ချက် ချလိုက်မိသည်။

ချူးဖုန်းမှာ အိပ်မှုန်စုံမွှားဖြင့် ဤလူများကြားရှိ အငြင်းပွားသံများကို ကြားနေခဲ့ရသည်။ သူ သေချာကြည့်လိုက်ရာ နျူးပေါ့ထျန်း ထုတ်လာသော ဆေးသေတ္တာထဲတွင် ဆေးပင်နှစ်မျိုးမှာ ကိုယ်ပိုင်အကန့်လေးများနှင့် သီးသန့်စီ ရှိနေသည်ကို တွေ့လိုက်ရသည်။

တစ်ခုမှာ မီးတောက်ကဲ့သို့ နီရဲနေပြီး မီးတိမ်တိုက်တစ်ခုနှင့် တူလေသည်။

အခြားတစ်ခုမှာ ရှေးဟောင်းလမင်းကြီး၏ အရောင်အဆင်းရှိပြီး မှိုတစ်ပွင့်နှင့် ပုံသဏ္ဌာန်တူလေသည်။

"မီးတိမ်တိုက်သစ်သီးနဲ့ ထိုက်ယင်ရွှေမှို...။ ဒါတွေက ပစ္စည်းကောင်းတွေပဲ"

"လတ်ဆတ်နေပုံထောက်ရင် အခုလေးတင် ခူးဆွတ်လာတာများလား။ ဒါဆိုရင်တော့ ထိုက်ယင်ရွှေမှိုရှိတဲ့ နေရာကို ရှာတွေ့ရင် နေမင်းကိုးစင်းရဲ့ ထူးခြားသောမီးတောက်ကို အဆင့်မြှင့်တင်ပေးနိုင်မယ့် ကြီးမြတ်တဲ့ အရာတစ်ခုခုကို ရရှိလာနိုင်တယ်"

အဂ္ဂိရတ်ပညာရှင်အဖြစ်မှ ပြန်လည်မွေးဖွားလာသူ ချူးဖုန်းအနေဖြင့် ဆေးဘက်ဝင်အပင် အမျိုးအစားတိုင်းနှင့် အလွန်တရာ ရင်းနှီးကျွမ်းဝင်ပြီးသား ဖြစ်လေသည်။