အခန်း (၃၈) - ဒူးထောက်ပြီး ငါ့ကို ဆက်သစမ်း

အိမ်တော်ထိန်းလောင်၏ မျက်နှာမှာ ဒေါသကြောင့် မည်းမှောင်သွားသည်။ သူသည် သူ့ကိုယ်သူ အစေခံတစ်ဦးဟု တစ်ခါမျှ မသတ်မှတ်ခဲ့ဖူးပေ။ ချူးကျန်းလန်ပင်လျှင် သူ့ကို ဤသို့ အမိန့်မပေးခဲ့ဖူးချေ။

ယခုအချိန်တွင် အသုံးမကျသော အမှိုက်တစ်စဖြစ်သည့် ချူးဖုန်းက လူပုံအလယ်၌ သူ့ကို ရဲရဲတင်းတင်း အမိန့်ပေးဝံ့နေသည်။

အထူးသဖြင့် အောက်ခြေသိမ်း အစေခံများကို ခိုင်းစေသည့် လေသံမျိုးဖြင့် ပြောဆိုနေခြင်းက သူ့အတွက် လုံးဝ သည်းမခံနိုင်စရာပင် ဖြစ်သည်။

သူ၏ ဂုဏ်သိက္ခာများ အကြီးအကျယ် နင်းခြေခံလိုက်ရသည်ဟု သူ ခံစားလိုက်ရသည်။

"ငါ့ဆီ ယူခဲ့လို့ ပြောနေတာ မကြားဘူးလား။ မင်းက နားကန်းနေတာလား၊ ဒါမှမဟုတ် ငတုံးလား" ချူးဖုန်းက လေသံကို အနည်းငယ် ထပ်မြှင့်ကာ ပြောလိုက်သည်။

အိမ်တော်ထိန်းလောင်၏ ဒေါသမီးများ ပိုမို တောက်လောင်လာပြီး သူ၏ အစစ်အမှန် သခင်ဖြစ်သူ မော့ရှန်ထံသို့ မသိစိတ်အရ လှမ်းကြည့်လိုက်မိသည်။

မော့ရှန်က သူ့ကို ခေါင်းအနည်းငယ် ညိတ်ပြလိုက်သည်ကို သူ မြင်လိုက်ရသည်။

ကြီးမားသော အကျိုးအမြတ်အတွက် ဤတစ်ကြိမ်တွင် ချူးဖုန်း၏ ရှေ့၌ အစေခံအစစ်အမှန်တစ်ဦးအဖြစ် အိမ်တော်ထိန်းလောင်က ဟန်ဆောင် သရုပ်ပြရမည်မှာ ရှင်းလင်းနေပေသည်။

အိမ်တော်ထိန်းလောင်၏ မျက်နှာမှာ နီရဲသွားပြီး အေးစက်သော အကြည့်များဖြင့် လက်ထပ်စာချုပ်ကို ကိုင်ကာ ချူးဖုန်းထံသို့ လျှောက်သွားလိုက်သည်။

"ရော့...!" အိမ်တော့ထိန်းလောင် က မလိုလားသောဟန်ဖြင့် လက်ထပ်စာချုပ်ကို လက်တစ်ဖက်တည်းဖြင့် ကိုင်ကာ ချူးဖုန်း၏ရှေ့သို့ ထိုးပေးလိုက်သည်။

သူ၏ လေသံနှင့် အမူအရာတို့တွင် မောက်မာမှုများနှင့် မကျေနပ်မှုများ အပြည့်အဝ ပါဝင်နေသည်။

"ဒါက ကိုယ့်သခင်ကို ပစ္စည်းပေးတဲ့ အမူအရာလား" ချူးဖုန်းက လက်ခံမည့်ဟန် အလျဉ်းမပြဘဲ အေးစက်စက် လှောင်ပြုံးပြုံးကာ မေးလိုက်သည်။

"မင်း... စည်းမကျော်နဲ့နော်! မင်းက တတိယသခင်လေး တစ်ယောက်မျှသာပဲ။ ဒီကိစ္စကို ဆုံးဖြတ်ဖို့ဆိုတာ မင်းနေရာ မဟုတ်ဘူး။ မင်း လက်ထပ်စာချုပ်ကို ကြည့်ရကြည့်ရ၊ မကြည့်ရကြည့်ရ ဘာမှ ကွာခြားသွားမှာ မဟုတ်ဘူး" အိမ်တော်ထိန်းလောင်မှာ ဆက်လက်၍ ဟန်မဆောင်နိုင်တော့ဘဲ ထိုနေရာတွင်ပင် ပေါက်ကွဲထွက်လာတော့သည်။

မည်သို့ပင်ဆိုစေကာမူ သူသည် ဓားသခင်အဆင့် ကျင့်ကြံမှုကို ပိုင်ဆိုင်ထားသူ ဖြစ်သည်။ ဒုတိယအဆင့် သို့မဟုတ် တတိယအဆင့် ဓားသမားတစ်ယောက်မျှသာ ဖြစ်သူကို ရင်ဆိုင်ရချိန်တွင် သူက အထက်စီးမှ နေနိုင်သည်ဟု ခံစားရသည်မှာ သဘာဝပင် ဖြစ်သည်။

ချူးဖုန်းအပေါ်တွင် သူ့အနေဖြင့် မည်သည့် ရိုသေလေးစားမှုမျှ ရှိနေမည် မဟုတ်ပေ။

"အစ်ကိုကြီး... ဒီကိစ္စကို ကျွန်တော် ဆုံးဖြတ်လို့ ရမလား" ချူးဖုန်းက မျက်နှာထား တင်းမာနေသော ချူးကျန်းလန်ကို မော့ကြည့်ကာ မေးလိုက်သည်။

သူ၏ စိတ်ထဲတွင်တော့ "အစ်ကိုကြီး... ဒီအချိန်မှတော့ ကျွန်တော့်ကို သစ္စာမဖောက်လိုက်ပါနဲ့ဗျာ" ဟု တီးတိုး ရေရွတ်နေမိသည်။

အကယ်၍ ချူးကျန်းလန်ကသာ သူ ဆုံးဖြတ်၍မရဟု ပြောလိုက်ပါက ချူးဖုန်းမှာ အကြီးအကျယ် အရှက်ကွဲမည်ဖြစ်ပြီး ဤမောက်မာလှသော ခွေးအစေခံ အိမ်တော်ထိန်းလောင်၏ အနိုင်ယူ စော်ကားခြင်းကို ခံရပေတော့မည်။

ချူးကျန်းလန်၏ အကြည့်တို့က ချူးဖုန်းနှင့် ဆုံတွေ့သွားသည်။ မိမိ ညီငယ်၏ မျက်လုံးများမှ ထွက်ပေါ်နေသော ယုံကြည်ချက်ကို သူ ခံစားမိလိုက်ပြီး အစမှအဆုံးတိုင် ချူးဖုန်း၏ တည်ငြိမ်နေမှုကို မြင်တွေ့လိုက်ရသောအခါ ချူးကျန်းလန်၏ စိတ်ထဲတွင် အလိုအလျောက် သက်တောင့်သက်သာ ဖြစ်သွားကာ သူ့အပေါ် အပြည့်အဝ ယုံကြည်သွားတော့သည်။

ဆန့်ကျင်ဘက်အနေဖြင့် မော့ရှန်က သူ၏ အကြံအစည်များကို ဖော်ထုတ်လိုက်ပြီးနောက် သူကိုယ်တိုင်မှာမူ ကသောင်းကနင်း ဖြစ်သွားခဲ့ရသည်။

ထို့အပြင် မော့ရှန်၏ အပြည့်အဝ ထိန်းချုပ်မှုအောက်သို့ ရောက်ရှိသွားခဲ့ရသည်။

ဤသည်မှာ အလွန်တရာ အခြေအနေဆိုးလှသည်။ ဤကိစ္စကို သူ၏ ညီငယ်အား ကိုင်တွယ်ဖြေရှင်းခိုင်းလိုက်ခြင်းက ပို၍ ကောင်းမွန်ပေလိမ့်မည်။ ငါ စောင့်ကြည့်ရမယ်။ အကယ်၍ ညီငယ်သာ ဒီကိစ္စကို သေချာ ကိုင်တွယ်နိုင်မယ်ဆိုရင် သူ တကယ်ပဲ အရွယ်ရောက်လာပြီဆိုတဲ့ သဘောပဲ။ နောင်တစ်ချိန်မှာ စံအိမ်တော်ရဲ့ အရေးကြီးကိစ္စတွေကို တိုင်ပင်ဆွေးနွေးလို့ရတဲ့ လူတစ်ယောက် ဖြစ်လာနိုင်တယ်။

အဆင်မပြေခဲ့ရင်တော့ အဲဒီအချိန်ကျမှ ငါ ဝင်ပါတော့မယ်။ ဆုံးဖြတ်ချက်ချပြီးနောက် ချူးကျန်းလန်က အသံကျယ်ကျယ်ဖြင့် "ဒီကိစ္စကို ငါ့ရဲ့ ညီတတိယသခင်လေး ဆုံးဖြတ်နိုင်တယ်!" ဟု ပြောလိုက်သည်။ ထိုခိုင်မာပြတ်သားသော အတည်ပြုချက်ကြောင့် အိမ်တော်ထိန်းလောင် ၊ မော့ရှန်နှင့် အခြားသူများ၏ မျက်နှာများ ပြောင်းလဲသွားကြသည်။

အထူးသဖြင့် မော့ရှန်မှာ ချူးဖုန်းကို အသေအချာ စူးစမ်းကြည့်ရှုရင်း မျက်လုံးများ မသိမသာ ကျဉ်းမြောင်းသွားသည်။ ချူးဖုန်း၏ ယခင် ဝင်ရောက်လာပုံက အထင်ကြီးလောက်စရာ ဖြစ်ခဲ့သည်ဆိုလျှင် ယခု ချူးကျန်းလန်က ဓားဘုရင်စံအိမ်တော်၏ အရေးကြီးကိစ္စများကို ချူးဖုန်းအား ဆုံးဖြတ်ခွင့်ပေးလိုက်ခြင်းမှာ အလွန်တရာ ထူးခြားလွန်းလှပေသည်။

၎င်းသည် ဓားဘုရင်စံအိမ်တော်အတွင်း ချူးဖုန်း၏ ဆုံးဖြတ်ချက်ချနိုင်စွမ်းရှိသော အဆင့်အတန်းကို သွယ်ဝိုက်သောနည်းဖြင့် အသိအမှတ်ပြုလိုက်ခြင်းပင် ဖြစ်သည်။

"သူ့ကို လက်နှစ်ဖက်နဲ့ ပေးလိုက်စမ်း!" မော့ရှန်၏ အသံတွင် ငြင်းဆန်၍မရနိုင်သော သြဇာအာဏာများ ပါဝင်နေကာ အမိန့်ပေးသည့် လေသံဖြင့် ထွက်ပေါ်လာသည်။

တကယ့်ကို ရယ်စရာကောင်းလှပေသည်!

ဓားဘုရင်စံအိမ်တော်၏ အိမ်တော်ထိန်းကို ချူးဖုန်းတို့က အမိန့်ပေး၍ မရသော်လည်း မင်းသားလျူ အိမ်တော်မှ လူများကိုမူ သူက အကြွင်းမဲ့ နာခံနေလေသည်။

ဤသည်မှာ နှစ်များတစ်လျှောက်လုံး ဓားဘုရင်စံအိမ်တော် မည်မျှအထိ အနိုင်ကျင့်ခံခဲ့ရသည်ကို ပြသနေပေသည်။

နင်းခြေခံရသည်ထက်ပင် ဆိုးရွားနေသေးသည်။ အိမ်တော်ထိန်းလောင် သည် မလိုလားသော်လည်း ယခုအချိန်တွင်မူ သူ့၌ အခြား ရွေးချယ်စရာ မရှိတော့ပေ။ သူသည် လက်ထပ်စာချုပ်ကို လက်နှစ်ဖက်ဖြင့် ရိုသေကျိုးနွံစွာ ကိုင်လျက် ချူးဖုန်းထံသို့ ဆက်သလိုက်ရသည်။

သူ၏ မျက်လုံးများမှာ ဒေါသမီးများ တောက်လောင်နေပြီး မျက်နှာအမူအရာမှာလည်း အလွန်တရာ ကြည့်ရဆိုးနေလေသည်။

ချူးဖုန်းကမူ အထက်စီးဆန်ဆန်နှင့် လှောင်ပြောင်သော အပြုံးတစ်ခုကို ဆင်မြန်းထားပြီး လက်ဖက်ရည်ကို အေးဆေးစွာ ထိုင်သောက်နေလေသည်။

"ကြည့်ရှုတော်မူပါ တတိယသခင်လေး!" အိမ်တော်ထိန်းလောင်က ခါးကိုညွှတ်၍ လက်ထပ်စာချုပ်ကို လက်နှစ်ဖက်ဖြင့် ဆက်သလိုက်သော်လည်း ချူးဖုန်းက ချက်ချင်း လက်မခံဘဲ အချိန်ဆွဲနေခဲ့သည်။ ထို့ကြောင့် လူအုပ်ကြီး၏ လှောင်ပြောင်မှုကို ခံနေရသော လူရွှင်တော်တစ်ဦးအလား ဖြစ်နေပြီး သူ၏ မျက်နှာကို ဘယ်နားသွားထားရမှန်းပင် မသိအောင် ဖြစ်နေရသည်။

"ဓားဘုရင်စံအိမ်တော်ရဲ့ အိမ်တော်ထိန်းတစ်ယောက်အနေနဲ့ နှစ်ပေါင်းများစွာ နေလာပြီး အကျိုးအမြတ်တွေ အများကြီးရကာ ဝပြောနေခဲ့တဲ့ မင်းက အခြေခံယဉ်ကျေးမှုကိုတောင် နည်းနည်းလေးမှ နားမလည်ဘူးလား" ချူးဖုန်းက လက်ထပ်စာချုပ်ကို လက်ခံမည့်ဟန် အလျဉ်းမပြသေးဘဲ အိမ်တော်ထိန်းလောင်ကို ခါးညွှတ်လျက် ဖြည်းဖြည်းချင်း ဒုက္ခခံစေရန် ထားရစ်ခဲ့သည်။

"ဘာ ယဉ်ကျေးမှုလဲ" အိမ်တော်ထိန်းလောင်၏ အသံမှာ အလွန်တရာ အေးစက်ခက်ထန်နေကြောင်း လူတိုင်း ကြားနိုင်ပေသည်။ သတ်ဖြတ်လိုစိတ်များ အပြည့်အဝ ပါဝင်နေသည်။

"အစေခံတစ်ယောက်က ကိုယ့်သခင်ကို ပစ္စည်းဆက်သတဲ့အခါ ဒူးထောက်ပြီးမှ ဆက်သရမယ်လေ!"

ချူးဖုန်း၏ မျက်နှာမှာ တည်ကြည်နေသော်လည်း သူ၏ နှုတ်ခမ်းထောင့်များရှိ လှောင်ပြောင်လိုသော အရိပ်အယောင်များက ချူးကျန်းလန်နှင့် သူ၏ မရီးဖြစ်သူတို့ကို အနည်းငယ် ပြုံးယောင်သန်းသွားစေသည်။

ဒါက တကယ့်ကို အားရကျေနပ်စရာပဲ!

သာမန်အားဖြင့် မည်သူမျှ အိမ်တော်ထိန်းလောင်ကို မကိုင်တွယ်နိုင်ပေ။ ချူးကျန်းလန်တွင်ပင် ထိုသို့သော စွမ်းဆောင်နိုင်ရည် မရှိခဲ့ချေ။ တစ်ဖက်တွင် အိမ်တော်ထိန်းလောင်၌ သွားရောက်မစသင့်သော ကြီးမားသည့် ကျောထောက်နောက်ခံများ ရှိနေသည်။ အခြားတစ်ဖက်တွင်မူ အိမ်တော်ထိန်းလောင်သည် အလွန် ကောက်ကျစ်စဉ်းလဲပြီး သူ့ကို အပြစ်ရှာနိုင်မည့် အထောက်အထားမျိုး မည်သူ့ကိုမျှ မပေးခဲ့ပေ။

"မင်း ဘာပြောလိုက်တယ်? အိမ်တော်ထိန်းတစ်ယောက်ဖြစ်တဲ့ ငါက မင်းရှေ့မှာ ဒူးထောက်ရမယ် ဟုတ်လား" ဖိနှိပ်ထားသော အိမ်တော်ထိန်းလောင်၏ ဒေါသမီးများ အပြည့်အဝ ပေါက်ကွဲထွက်လာတော့သည်။ အိမ်တော်ထိန်းလောင်၏ မသိစိတ်ထဲတွင် ချူးဖုန်းကသာ သူ၏ရှေ့၌ ဒူးထောက်သင့်သည်ဟု ထင်မြင်ထားသည်။ ချူးဖုန်းအား ဒူးထောက်ရန် တောင်းဆိုခံရခြင်း၊ ထိုအထဲတွင်မှ လူအများကြီးရှေ့၌ ဒူးထောက်ရမည်ဆိုခြင်းက ပါးရိုက်ခံရရုံမျှမကပေ။

၎င်းသည် ဂုဏ်သိက္ခာကို ဗြောင်ကျကျ နင်းခြေစော်ကားလိုက်ခြင်းပင် ဖြစ်သည်။

"လျူအိမ်တော် အုပ်ချူပ်သူမော့... ကျွန်တော်တို့ ဓားဘုရင်စံအိမ်တော်က အစေခံတွေက သိပ်ပြီး စည်းကမ်းမရှိကြတော့ ခင်ဗျားတို့ကို အမြင်မတော်ဖြစ်စေမိတဲ့အတွက် ခွင့်လွှတ်ပေးပါဗျာ။"

"လက်ထပ်စာချုပ် ဆက်သရတဲ့ သေးငယ်တဲ့ကိစ္စလေးကိုတောင် သေသေချာချာ မလုပ်တတ်ကြဘူး။ အဟင်း... ဒါ မိသားစုရဲ့ ကံဆိုးမှုပါပဲဗျာ! မိစ္ဆာအစေခံတွေက သခင်အပေါ် မောက်မာနေကြတာကို ကျွန်တော်တို့လည်း မဆုံးမနိုင်ခဲ့တော့ ဘာမှ မတတ်နိုင်ဘူးလေ! လက်ဖက်ရည် သောက်ပါဦးဗျ၊ လက်ဖက်ရည် သောက်ပါဦး!"

ချူးဖုန်းက ခေါင်းခါ၍ သက်ပြင်းချလိုက်ပြီး အိမ်တော်ထိန်းလောင်အား တန်ဖိုးမရှိသော အရာတစ်ခုအဖြစ် အရှက်ခွဲလိုက်သည်။ အိမ်တော်ထိန်းလောင်သည် လက်သီးများကို အရိုးများ မြည်လာသည်အထိ တင်းကျပ်စွာ ဆုပ်ထားလိုက်ပြီး ချူးဖုန်းကို ကြည့်နေသော သူ၏ မျက်လုံးများမှာ ချူးဖုန်းအား အရှင်လတ်လတ် အရေခွံဆုတ်ချင်နေသည့်အလား ပေါ်လွင်နေသည်။ ကံမကောင်းစွာဖြင့် ချူးဖုန်းက သူ့ကို တစ်ချက်ကလေးမျှ လှည့်မကြည့်ဘဲ လေဟာနယ်တစ်ခုလို သဘောထားနေခဲ့သည်။

တကယ်တမ်း အင်အားသုံး၍ တိုက်ခိုက်ရမည်ဆိုလျှင်လည်း ချူးဖုန်းအနေဖြင့် အိမ်တော်ထိန်းလောင် လောက်ကို အရေးလုပ်နေမည် မဟုတ်ပေ။ အင်္ကျီထဲတွင် ဝှက်ထားသော 'မီးတောက်ပေါက်ကွဲမှု ဆေးလုံး' က အမြဲတမ်း အသင့်ရှိနေသည်။ ဤမိစ္ဆာအစေခံကသာ သူ့ကို အရင် စတင်တိုက်ခိုက်ရဲပါက မော့ရှန်နှင့် အခြားသူများ၏ ရှေ့တွင်ပင် အိမ်တော်ထိန်းလောင်ကို ထိုနေရာ၌ ပြာကျသွားအောင် လုပ်ပစ်လိုက်မည်ဖြစ်သည်။

ဤကိစ္စက ဧကရာဇ်ထံသို့ ရောက်သွားလျှင်တောင်မှ ချူးဖုန်းအပေါ် မည်သည့်အပြစ်မျှ ကျရောက်နိုင်မည် မဟုတ်ပေ။

အိမ်တော်ထိန်းလောင်က သူ၏ စည်းကို ကျော်လွန်ကာ အထက်လူကြီးကို ဖီဆန်ရဲသောကြောင့် သတ်ဖြတ်ခံရခြင်းမှာ သူ၏ အပြစ်သာလျှင် ဖြစ်ပေသည်။

ချူးဖုန်းက လက်ဖက်ရည်ကို ဖြည်းဖြည်းချင်း အရသာခံ သောက်နေပြီး အလျင်လိုခြင်း မရှိပေ။ အဘယ်ကြောင့်ဆိုသော် မော့ရှန်သည် မင်းသားလျူ၏ အမိန့်ဖြင့် လာခဲ့ခြင်းဖြစ်ရာ ဤအခြေအနေကို ဖြေရှင်းလိုမည်မှာ အသေအချာပင် ဖြစ်သည်။

မော့ရှန်သည် အိမ်တော်ထိန်းလောင်အား ဖြောင်းဖျရန် နည်းလမ်း ရှာတွေ့မည်မှာ သေချာလှသည်။

ချူးဖုန်း မျှော်လင့်ထားသည့်အတိုင်းပင် အချိန်ခဏကြာ စောင့်ပြီးနောက် မော့ရှန်၏ နှုတ်ခမ်းများ အနည်းငယ် လှုပ်ရှားသွားသည်။ သို့သော် မည်သည့် အသံမျှ မထွက်ပေါ်လာချေ။ ၎င်းသည် သာလွန်ကောင်းမွန်သော အသံပို့လွှတ်ခြင်း လျှို့ဝှက်သိုင်းပညာရပ်ကို အသုံးပြုလိုက်ခြင်းဖြစ်သည်။ အသံကို မျဉ်းတစ်ကြောင်းအဖြစ် စုစည်းကာ တိကျသော ပစ်မှတ်တစ်ခု၏ နားထဲသို့ တိုက်ရိုက် ပေးပို့နိုင်စွမ်းရှိသည်။ အခြားသူများ မကြားနိုင်ပေ။

အိမ်တော်ထိန်းလောင်၏ အိုမင်းသော မျက်နှာပေါ်ရှိ ကြမ်းကြုတ်ခက်ထန်သော အမူအရာများက အဆက်မပြတ် ပြောင်းလဲနေသည်။

ဒုန်း!

မော့ရှန်က သူ့ကို ဘာတွေ ပြောလိုက်မှန်း မသိရသော်လည်း သူက သွားကို ကျိတ်ကာ ချူးဖုန်း၏ ရှေ့၌ အမှန်တကယ်ပင် ဒူးထောက်ချလိုက်လေသည်။

အိမ်တော်ထိန်းလောင် ကို ဒူးထောက်ရန် အောင်မြင်စွာ အတင်းအကျပ် ခိုင်းစေနိုင်ခဲ့သဖြင့် ချူးကျန်းလန်နှင့် သူ၏ မရီးဖြစ်သူ အပါအဝင် အခြားသူများမှာ ချူးဖုန်း၏ စွမ်းဆောင်နိုင်ရည်ကို ပိုမို အထင်ကြီးလေးစားသွားကြသည်။

"ငါ့ညီက နှစ်ပေါင်းများစွာ ငြိမ်သက်နေခဲ့ပြီး အခုမှ အံ့မခန်း လက်စွမ်းပြတော့တာပဲ!" ချူးကျန်းလန်သည် ယနေ့ကိစ္စများကို ချူးဖုန်း ကိုင်တွယ်ဖြေရှင်းနေမှုအပေါ် အစပိုင်းတွင် အနည်းငယ် စိုးရိမ်မှုများ ရှိခဲ့သော်လည်း ယခုအခါတွင်မူ အပြည့်အဝ စိတ်အေးသွားခဲ့ပြီဖြစ်သည်။

"အင်း... ဒါမှ အစေခံတစ်ယောက်ရဲ့ ရုပ်သွင်နဲ့ တူသွားတာပေါ့!"

ချူးဖုန်းက အိမ်တော်ထိန်းလောင်၏ အသေးစိတ် အချက်အလက်တိုင်းကို အကဲဖြတ်ကြည့်လိုက်ပြီး မျောက်တစ်ကောင် ကပြဖျော်ဖြေနေသည်ကို ကြည့်နေရသည့်အလား သူ၏ ဒူးထောက်နေသော ကိုယ်ဟန်အနေအထားကို သဘောကျနေလေသည်။

"ဒါက မင်းရဲ့ သခင်ရှေ့မှာ ပထမဆုံးအကြိမ် ဒူးထောက်ဖူးတာလား။ မင်းရဲ့ ကျောက မတ်မတ်ကြီး ဖြစ်နေလို့ မရဘူးလေ၊ ခါးလေး ညွှတ်ထားရမယ်။ ပြီးတော့ မျက်နှာအမူအရာကိုလည်း သဘာဝကျကျလေး ထားပါဦး၊ အလောင်းကောင်ကြီး တစ်လောင်းလို လုပ်မနေနဲ့!"

ဤကဲ့သို့ အပြစ်ရှာနေသော စကားများကို ကြားလိုက်ရသောအခါ အိမ်တော်ထိန်းလောင်မှာ သူ၏ ရင်ဘတ်အတွင်း၌ ပိတ်လှောင်နေသော သွေးများ ဆူပွက်လာပြီး လည်ချောင်းဆီသို့ အဆက်မပြတ် ဖိတက်လာသည်ကို ခံစားလိုက်ရသည်။

အချိန်မရွေး သွေးအန်ထွက်လာတော့မည့် အနေအထားပင် ဖြစ်သည်။