အခန်း (၁၅) - အသွင်ပြောင်းခြင်း

နောက်တစ်နေ့တွင် အာကီအိုသည် စစ်ပွဲအတွင်း ကျဆုံးသွားခဲ့သော အူဇူမာကီ မျိုးနွယ်စုဝင်များအတွက် ပြုလုပ်သည့် ဈာပနအခမ်းအနားသို့ တက်ရောက်ခဲ့သည်။ အူဇူမာကီ မိသားစုသင်္ချိုင်းတွင် အသစ်ထပ်တိုးလာသော အုတ်ဂူများရှေ့၌ ရပ်ရင်း ချစ်ရသူများကို ဆုံးရှုံးလိုက်ရ၍ ဝမ်းနည်းပူဆွေးနေကြသော မိမိ၏ မျိုးနွယ်စုဝင်များကို သူတွေ့မြင်လိုက်ရသည်။

"ဒါ ပထမဆုံးအကြိမ် မဟုတ်ပေမဲ့ ဒီလိုဈာပနတွေကို တက်ရောက်ရတာကိုတော့ ငါ အမြဲမုန်းတယ်..." ဟု အာကီအိုက သူ့စိတ်ထဲတွင် ရေရွတ်လိုက်သည်။

ဈာပနပြီးဆုံးသွားသောအခါ အာကီအိုသည် မျိုးနွယ်စု၏ လျှို့ဝှက် 'ဖူးအင်ဂျုဆု' (တံဆိပ်ခတ်နည်းစနစ်) များကို လေ့လာခွင့်ရရန် မျိုးနွယ်စုခေါင်းဆောင်ထံသို့ တန်းတန်းမတ်မတ် သွားရောက်ခဲ့သည်။

"ကျွန်တော်တို့ အူဇူမာကီမျိုးနွယ်စုရဲ့ တံဆိပ်ခတ်နည်းစနစ်တွေ အကုန်လုံးကို ဒီစာလိပ်ထဲမှာ မှတ်တမ်းတင်ထားတယ်။ အဖိုးလေး၊ ဒါကို ဂရုတစိုက် သိမ်းဆည်းထားပါ" မျိုးနွယ်စုခေါင်းဆောင်သည် သူ၏အင်္ကျီလက်ကြားမှ စာလိပ်တစ်ခုကို ထုတ်ယူကာ အာကီအိုကို ပေးအပ်လိုက်သည်။ သူသည် အာကီအို၏ တောင်းဆိုမှုကို ကြိုတင်မျှော်လင့်ထားပုံရသည်။

အမှန်စင်စစ်မှာ ထိုနေ့နံနက်အစောပိုင်းကပင် ဒုတိယအကြီးအကဲက တိုက်ပွဲအသေးစိတ်ကို သူ့ထံ တင်ပြထားပြီးဖြစ်သည်။ အာကီအို၏ တိုက်ခိုက်ရေးစွမ်းအားများ သိသာထင်ရှားစွာ တိုးတက်လာသည်ကို မျိုးနွယ်စုခေါင်းဆောင် သိရှိနေပြီး၊ မျိုးနွယ်စုခေါင်းဆောင်အဆင့်သို့ မရောက်သေးသော်လည်း အလွန်နီးစပ်နေပြီဟု သူယူဆထားသည်။ အာကီအိုသည် တံဆိပ်ခတ်နည်းစနစ်များကို လေ့လာရန် မကြာမီ စတင်တော့မည်ဟုလည်း သူခန့်မှန်းထားခဲ့သည်။

အာကီအိုက စာလိပ်ကို ယူလိုက်ပြီး "ကျွန်တော် ဂရုတစိုက် ထိန်းသိမ်းထားပါ့မယ်။ အဖိုးလေးကို အခုထိ မယုံကြည်သေးဘူးလား?" ဟု မေးလိုက်သည်။

"အဖိုးလေးဖြစ်နေလို့ပဲ စိတ်မအေးတာပါ..." ဟု မျိုးနွယ်စုခေါင်းဆောင်က တွေးလိုက်သော်လည်း အပြင်ပန်းတွင်မူ "မယုံကြည်စရာလား၊ ယုံတာပေါ့။ သတိပေးရုံတင်ပါ" ဟုသာ ပြန်ဖြေလိုက်သည်။ သူ၏ စကားတွင် စိတ်ရင်းမပါသည်ကို သိသော်လည်း အာကီအို ဂရုမစိုက်တော့ဘဲ စာလိပ်ကိုယူကာ အိမ်သို့သာ ပြန်လာခဲ့သည်။

"တံဆိပ်ခတ်နည်းစနစ်တွေကို မလေ့လာခင် ငါ့ရဲ့ ညာဘက်လက်ဒဏ်ရာကို အရင်ကုသဖို့ လိုသေးတယ်။" အာကီအို၏ လက်ဒဏ်ရာမှာ ပြင်းထန်လွန်းရာ ပုံမှန်ဆိုလျှင် ပျောက်ကင်းရန် အနည်းဆုံး သုံးလမှ လေးလအထိ ကြာမြင့်မည်ဖြစ်သည်။ ရာဆင်ရှူရိကန်ကို သုံးနိုင်ခဲ့သော နာရူတိုနှင့် ယှဉ်လျှင် အာကီအို၏ ခန္ဓာကိုယ်မှာ ပိုမိုအားနည်းပြီး သူ့တွင် ဆာကူရာကဲ့သို့ ကုသပေးမည့် ဆေးနင်ဂျာလည်း မရှိပေ။

"ခန္ဓာကိုယ်က မလုံလောက်ရင်လည်း စွမ်းရည်အမှတ်တွေနဲ့ ဖြည့်ဆည်းရမှာပေါ့!" ဟု အာကီအိုက ညည်းညူရင်း ညာဘက်လက်မှ ပတ်တီးကို ဖြည်လိုက်ကာ 'ခန္ဓာကိုယ်' စာရင်းထဲသို့ စွမ်းရည်အမှတ် (၁၀) မှတ်ကို ပြတ်ပြတ်သားသား ထည့်လိုက်သည်။

မျှော်လင့်ထားသည့်အတိုင်းပင် လက်ထဲတွင် ပြင်းထန်သော ယားယံမှုနှင့် နာကျင်မှုများ ဖြစ်ပေါ်လာပြီးနောက် အသားအရေအသစ်များ ပြန်လည်ပေါက်ဖွားလာသည်။ သူသည် လက်ချောင်းများကို ဆန့်ထုတ်ကြည့်ရာ နာကျင်မှု အနည်းငယ် ကျန်နေသေးသဖြင့် နောက်ထပ် အမှတ် (၅) မှတ်ကို ထပ်မံဖြည့်လိုက်သည်။ ယခုတစ်ခါတွင်မူ သူ၏လက်မှာ အရှင်းပျောက်သွားတော့သည်။

"ပြန်လည်သက်သာတာ မြန်လွန်းလို့ နောက်နှစ်လလောက်အထိ ပတ်တီးစည်းထားပြီး ဒဏ်ရာမပျောက်သေးသလို ဟန်ဆောင်ထားမှဖြစ်မယ်... မဟုတ်ရင် ရှင်းပြရတာ ခက်လိမ့်မယ်" ဟု အာကီအို တွေးလိုက်သည်။

လက်ကို ပတ်တီးပြန်စည်းပြီးနောက် သူသည် တံဆိပ်ခတ်နည်းစနစ် စာလိပ်ကို ဖြန့်လိုက်သည်။ "လေးခုမြောက် သင်္ကေတ တံဆိပ်၊ ငါးခုမြောက် ဒြပ်စင် တံဆိပ်၊ ရှစ်ခုမြောက် ထရိုင်ဂရမ် တံဆိပ်၊ မကောင်းဆိုးဝါး တံဆိပ်ခတ်နည်း၊ မီးတံဆိပ်ခတ်နည်း၊ အတွင်းပိုင်း လေးခုမြောက် သင်္ကေတ တံဆိပ်..."

အာကီအိုသည် နည်းစနစ်များကို လျင်မြန်စွာ ဖတ်ရှုလိုက်သည်။ သေမင်းတံဆိပ်ခတ်နည်းမပါဘူးလား? မျိုးနွယ်စုခေါင်းဆောင်က ငါ့ကို ဝှက်ထားတာ မဟုတ်လောက်ဘူး၊ ဒါဆိုရင် ဒီနည်းစနစ်က အခုထိ မပေါ်သေးတာပဲ။ ဘယ်သူ ဖန်တီးခဲ့တာလဲတော့ မသိဘူး၊ သက်သေအမှတ်တွေ အများကြီး ရနိုင်မှာပဲ..."

"ဒီနည်းစနစ်ကို ပထမဆုံး သုံးတာ နာမိကာဇေ မီနာတို ၊ မီနာတိုရဲ့ တံဆိပ်ခတ်နည်းစနစ်တွေကို သင်ပေးတာ ကုရှီနာ ... ဒါဆိုရင် ကုရှီနာရဲ့ အကြီးအကဲတစ်ယောက်ယောက်က ဖန်တီးခဲ့တာများလား?"

"သူ့ရဲ့ အဖွားလား၊ ဒါမှမဟုတ် အဖိုးလား? ဒီခေတ်မှာ သူတို့ကို ဘယ်လိုရှာရမလဲ... ထားပါတော့။ တိုဘီရာမကိုပဲ စောင့်ကြည့်ထားမှဖြစ်မယ်။ သူက တားမြစ်နည်းစနစ်တွေ အများကြီး ဖန်တီးခဲ့တာကို။" အာကီအိုသည် ဖြစ်နိုင်ခြေများကို တွေးတောပြီးနောက် စိတ်ကို တည်ငြိမ်အောင် ထားကာ တံဆိပ်ခတ်နည်းစနစ်များကို လေ့လာရန် အာရုံစိုက်လိုက်သည်။

အာကီအိုတွင် တံဆိပ်ခတ်နည်းစနစ်များအတွက် မွေးရာပါ အရည်အချင်း ရှိသည်။ တစ်ရက်အတွင်းမှာပင် သူသည် အခြေခံသဘောတရားများကို နားလည်သွားခဲ့ပြီး သူ၏ စွမ်းရည်ပြမျက်နှာပြင်တွင် အောက်ပါအတိုင်း ပေါ်လာသည်။

တံဆိပ်ခတ်နည်းစနစ် : အဆင့်၁ (၁/၁၀၀၀၀)

သူသည် စွမ်းရည်အမှတ်များ ထပ်ထည့်လိုသည့်စိတ်ကို ထိန်းချုပ်ကာ အလေ့အကျင့်ဖြင့်သာ စတင်သင်ယူရန် ဆုံးဖြတ်လိုက်သည်။ နှစ်လအကြာတွင် အာကီအိုသည် အတော်လေး ရိုးရှင်းသော တံဆိပ်ခတ်နည်းစနစ်နှစ်ခုဖြစ်သည့် 'မီးတံဆိပ်ခတ်နည်း' နှင့် 'မကောင်းဆိုးဝါး တံဆိပ်ခတ်နည်း' ကို ကျွမ်းကျင်အောင် သင်ယူနိုင်ခဲ့သည်။ သူ၏ တံဆိပ်ခတ်နည်းစနစ်မှာလည်း အဆင့်နှစ်သို့ ရောက်ရှိသွားသည်။ 'ငါးခုမြောက် ဒြပ်စင် တံဆိပ်' ကို သင်ယူရန်အတွက် အာကီအိုသည် သူ၏ လျှပ်စီးဓာတ်နှင့် ရေဓာတ်စွမ်းအားများထဲသို့ အမှတ် တစ်မှတ်စီ ထည့်လိုက်ရသည်။ ဤကာလအတွင်း သူသည် အခြား နင်ဂျုဆုများကို မလေ့လာဘဲ တံဆိပ်ခတ်နည်းစနစ်များတွင်သာ နစ်မြုပ်နေခဲ့သဖြင့် သူ၏ 'သက်သေအမှတ်' များကိုပင် မေ့လျော့နေခဲ့သည်။

ငါးနှစ်တာ ကာလမှာ မျက်တောင်တစ်ခတ်အတွင်း ကုန်ဆုံးသွားခဲ့သည်။ ဤကာလအတွင်း အာကီအိုသည် 'ယင်တံဆိပ် မှလွဲ၍ အူဇူမာကီ တံဆိပ်ခတ်နည်းစနစ်အားလုံးကို ကျွမ်းကျင်အောင် သင်ယူနိုင်ခဲ့သည်။ သူ၏ တံဆိပ်ခတ်နည်းစနစ်မှာ အဆင့်ငါးအထိ ရောက်ရှိသွားပြီး သူအတော်ဆုံးဖြစ်သော 'လေဓာတ် စွမ်းအား' ထက်ပင် သာလွန်သွားခဲ့သည်။ ငါးနှစ်တာ ကာလ ကုန်ဆုံးသွားပြီဖြစ်ကြောင်းကို သူ ယခုမှပင် ရုတ်တရက် သတိပြုမိတော့သည်။

သက်တမ်း ၄၀ အောက်သာရှိသော စစ်ပြိုင်ခေတ် လူတို့အတွက် ငါးနှစ်ဆိုသည်မှာ အလွန်ကြာမြင့်သော ကာလဖြစ်သည်။ သို့သော် အာကီအိုအတွက် ငါးနှစ်အကြာတွင် သူသည်... အသက် ၃၁ နှစ် ရှိနေပြီဖြစ်သည်။ ယခုအချိန်အထိ သူသည် 'အသွင်ပြောင်းနည်းစနစ်' ကို သုံးကာ အသက် ၄၈ နှစ်အရွယ် ပုံစံဖြင့်သာ နေထိုင်နေဆဲဖြစ်သည်။

ပြီးခဲ့သည့် ငါးနှစ်အတွင်း အာကီအိုသည် တစ်ယောက်တည်း သီးသန့်နေထိုင်ခဲ့ပြီး နင်ဂျာလောက၏ ဖြစ်ရပ်များကို လုံးဝ ဂရုမစိုက်ခဲ့ပေ။ ယခု လေ့ကျင့်မှု ပြီးဆုံးသွားသည့်အခါ သူသည် လက်ရှိဖြစ်ရပ်များကို သိရှိရန် မျိုးနွယ်စုခေါင်းဆောင်ထံသို့ ချက်ချင်း သွားရောက်ခဲ့သည်။

"အဖိုးလေး၊ နောက်ဆုံးတော့ ထွက်လာခဲ့ပြီပဲ! အဖိုးလေးရဲ့ ခန္ဓာကိုယ်... အဆင်ပြေရဲ့လား?" မျိုးနွယ်စုခေါင်းဆောင်၏ ပထမဆုံး စကားမှာ သူမျှော်လင့်မထားသည်များ ဖြစ်နေသည်။

အာကီအိုသည် သူ့ကို စူးစိုက်ကြည့်လိုက်သည်။ "ငါ အဆင်ပြေတယ်! မင်း သေခါနီးဖြစ်နေရင်တောင် ငါကတော့ အကောင်းကြီး ရှိနေဦးမှာ!"

"အာ... တောင်းပန်ပါတယ် အဖိုးလေး။ အကြောင်းကတော့ မနှစ်က မဟာအကြီးအကဲက ကျန်းမာရေး မကောင်းတော့လို့ ရာထူးကနေ နားလိုက်ပြီ၊ အခုဆိုရင် အိမ်မှာပဲ အနားယူနေတယ်။ နောက်ဆုံးရက်ပိုင်းတွေမှာ ဒုတိယအကြီးအကဲနဲ့ တတိယအကြီးအကဲတို့ကလည်း နားဖို့ စိတ်ကူးရှိပုံရတယ်၊ ဒါပေမဲ့ မဟာအကြီးအကဲနေရာက လစ်လပ်နေသေးလို့ သူတို့က ဆက်ပြီး တာဝန်ယူထားကြတာပါ။"

"ဒါဟာ ကျွန်တော်တို့မျိုးနွယ်စုတင် မဟုတ်ဘဲ တခြားမျိုးနွယ်စုတွေရဲ့ သက်ကြီးပိုင်းတွေလည်း အနားယူစ ပြုနေကြပါပြီ။ အခုကတော့ လူငယ်မျိုးဆက်သစ်တွေရဲ့ ခေတ်ပါပဲ။ ကျွန်တော်လည်း အသက် ၄၀ နီးပါး ရှိနေပြီ၊ ရှေးခေတ်က အကြီးအကဲတွေလည်း အရမ်း အိုမင်းနေကြပြီလေ..." ဟု မျိုးနွယ်စုခေါင်းဆောင်က ရှင်းပြသည်။

"စနစ်သာ မရှိရင် ငါလည်း အခုဆို ၅၄ နှစ်ရှိနေပြီး အိုမင်းနေလောက်ပြီ" ဟု အာကီအို တွေးလိုက်သော်လည်း အပြင်တွင်မူ "စိတ်မပူပါနဲ့၊ ငါ နောက်ထပ် နှစ်အနည်းငယ်လောက်တော့ ဆက်ရှိနေဦးမှာပါ။ ဒီနှစ်တွေအတွင်း နင်ဂျာလောကမှာ ထူးခြားတဲ့ ဖြစ်ရပ်တွေ ရှိသေးလား?" ဟု မေးလိုက်သည်။

"မျိုးနွယ်စု အချင်းချင်း တိုက်ခိုက်မှုတွေကို ဖယ်လိုက်ရင်တော့ အဓိက ဖြစ်ရပ်တစ်ခု ရှိခဲ့ပါတယ်။ နှစ်နှစ်လောက်က ဆန်းဂျူနဲ့ အူချီဟာတို့ 'လေနှင့်အမှောင်တောင်ကြား'မှာ တိုက်ပွဲဖြစ်ကြတုန်းက ဆန်းဂျူ ဘူဆုမာ နဲ့ အူချီဟာ တာဂျီမာတို့ နှစ်ယောက်စလုံး သေဆုံးသွားခဲ့ကြတယ်။ အခုဆိုရင် ဟာရှီရာမနဲ့ မာဒါရာတို့က မျိုးနွယ်စုခေါင်းဆောင်တွေ ဖြစ်လာကြပြီ။"

"စစ်ဖြစ်နေတဲ့ တခြားမျိုးနွယ်စုတွေက ထိပ်တန်းနင်ဂျာနှစ်ဦး သေသွားရင် အခွင့်အရေးရမယ်လို့ ထင်ခဲ့ကြပေမဲ့ ဟာရှီရာမနဲ့ မာဒါရာတို့က သူတို့ရဲ့ ဖခင်တွေထက် ပိုမို အစွမ်းထက်လာခဲ့တယ်။ အဲဒါကတော့ အင်အားကြီး မျိုးနွယ်စုတွေရဲ့ စွမ်းအားပဲမျိုးဆက်တိုင်းမှာ ဒီလို ထူးချွန်တဲ့ ဘီလူးလို အရည်အချင်းမျိုးတွေ ပေါ်ထွက်လာတာပဲ။"

"ဒါကြောင့်မို့ ဆန်းဂျူနဲ့ ကျွန်တော်တို့ရဲ့ ဆက်ဆံရေးက ပိုမို နီးကပ်လာခဲ့တယ်။ မီတို နဲ့ ဟာရှီရာမတို့ လက်ထပ်တာဟာ မမျှတတဲ့ အရောင်းအဝယ် မဟုတ်တော့ဘူးလို့ ခံစားရတယ်။" မျိုးနွယ်စုခေါင်းဆောင်သည် ငါးနှစ်ကျော်သွားပြီဖြစ်သော်လည်း မီတို၏ လက်ထပ်မှုအပေါ် မကျေနပ်ချက်များ ရှိနေဆဲပင်။

"အများကြီး ဖြစ်ပျက်သွားခဲ့တာပဲ... ဟာရှီရာမနဲ့ မာဒါရာတို့ဟာ စစ်ပွဲ ခေတ်ရဲ့ အထွတ်အထိပ်ကို ရောက်နေကြပြီ။ သူတို့က ဒီလောက်အထိ အစွမ်းထက်လာမယ်လို့ ဘယ်သူမှ မထင်ခဲ့မိဘူး။ ခေတ်သစ်တစ်ခု ရောက်လာတော့မှာပဲ!" ဟု အာကီအို တွေးမိသည်။ "ဒါပေမဲ့ ဒီငါးနှစ်အတွင်းမှာ အသက်ပြန်ငယ်လာတဲ့ ငါလည်း အလကား မနေခဲ့ဘူး။"

သူသည် သူ၏ စွမ်းရည်ပြမျက်နှာပြင်ကို ကြည့်လိုက်ပြီး ကျေနပ်စွာ ပြုံးလိုက်သည်။

အမည်: အူဇူမာကီ အာကီအို

အသက်: ၃၁ နှစ် (-)

နင်ဂျာ : ၂၄၅ (+)

ခန္ဓာကိုယ် : ၁၁၈ (+)

နည်းစနစ် : ၁၅၇၀ (+၅.၅) (+)

သုံးမျိုးပေါင်း နည်းစနစ် : အဆင့်၁၀ (၁၀၀၀၀၀) (ပြည့်)

ရှူရိကန် ပစ်ခတ်ခြင်း : အဆင့်၁၀ (၁၀၀၀၀၀) (အဆင့်မြင့်ဆုံး)

မြေဓာတ် စွမ်းအား : အဆင့်၃ (၃၀၄၅၈/၁၀၀၀၀၀) (+)

လေဓာတ် စွမ်းအား : အဆင့်၄ (၁၁၆၇၆၄/၂၀၀၀၀၀) (+)

မီးဓာတ် စွမ်းအား : အဆင့်(၂၉၉၈၅/၁၀၀၀၀၀) (+)

ရေဓာတ် စွမ်းအား : အဆင့်၂ (၁၀၀၀၀/၂၀၀၀၀) (+)

လျှပ်စီးဓာတ် စွမ်းအား : အဆင့်၂ (၁၀၀၀၀/၂၀၀၀၀) (+)

တံဆိပ်ခတ်နည်းစနစ် : အဆင့်၅ (၂၀၀၀၀၀/၄၀၀၀၀၀) (+)

ထူးခြားသော အရည်အချင်း : အာရုံခံနိုင်စွမ်း

အလုံးစုံ အကဲဖြတ်ချက် : ထိပ်တန်း အဆင့်

သက်သေအမှတ် : ၃၄