အခန်း (၇)- အစွယ်ဖြူ

ထိုအချိန်ပြေးဝင်လာကြသော ပင်လယ်ဓားပြများအားလုံး လျှပ်စစ်ဓာတ်လိုက်ကာ သတိလစ်လဲကျကုန်ကြသည်၊၊ သူတို့၏ သာမန်လူသား ခန္ဓာကိုယ်အသားစိုင်များဖြင့် လေယင်း ကို မည်သို့လျှင် ယှဉ်ပြိုင်နိုင်ပါမည်နည်း၊၊ ကျန်ရှိနေသော ပင်လယ်ဓားပြများမှာမူ ဆွံ့အမှင်တက်ကုန်ကြသည်၊၊ မိုဂျီ နှင့် သူ၏ခြင်္သေ့ကြီး ရီချီ ကဲ့သို့သော သူအချို့ဆိုလျှင် လူအုပ်ကြီး၏ နောက်ကွယ်သို့ တန်း၍ ပုန်းအောင်းလိုက်ကြသည်၊၊ ဤလေယင်းသည် သင်္ဘောပေါ်တွင် အားအနည်းဆုံးနှင့် အသုံးမဝင်ဆုံးသူ မဟုတ်ပါလော၊၊ ဤမျှ ပြင်းထန်သောအစွမ်းကို သူမည်သို့ ရရှိသွားသနည်း၊၊ ဒီကောင်က ဘယ်သူလဲ၊၊

အားလုံး ဝေခွဲမရဖြစ်နေစဉ်မှာပင် လေယင်းက နှုတ်ဟ၍ ပြောလိုက်သည်၊၊

"မကျေနပ်သေးတဲ့သူ ရှိသေးလား၊ ရှိရင် ငါကိုယ်တိုင် ကျေနပ်အောင်လုပ်ပေးမယ်လေ၊၊"

ဤစကားကို ကြားပြီးနောက် မည်သူမျှ ရှေ့သို့ တစ်လှမ်းပင် မတိုးဝံ့ကြချေ၊၊ သင်္ဘောပေါ်တွင် အသန်မာဆုံးလူနှစ်ဦးဖြစ်သော ဘတ်ဂီနှင့် ကာဘာဂျီတို့ပင် အရေးနိမ့်သွားခဲ့ပြီဖြစ်ရာ ကျန်ရှိသောအဖွဲ့သားများမှာ စွန့်စားခြင်းမပြုဝံ့ကြတော့ပေ၊၊

သူတို့သည် အမှန်စင်စစ် အားနည်းသူကိုသာ နှိပ်စက်တတ်ပြီး အားသန်သူကို ကြောက်ရွံ့ကြသော လူမိုက်များသာ ဖြစ်ကြသဖြင့် အရပ်သားများကိုသာ အနိုင်ကျင့်နိုင်ကြခြင်း ဖြစ်သည်၊၊ သို့သော်လည်း လေယင်း၏ခန္ဓာကိုယ်ပေါ်တွင် ဖြာထွက်နေသော လျှပ်စီးများကို ကြည့်လိုက်သည့်အခါ ဤစွမ်းအားသည် သူတို့ရင်ဆိုင်နိုင်သောအရာ မဟုတ်မှန်း သိလိုက်ကြသည်၊၊ သူတို့သည် သင်္ဘောပေါ်တွင် ဝမ်းရေးအတွက်သာ လုပ်ကိုင်နေကြသူများဖြစ်ရာ ဤကဲ့သို့သော ကြောင်တောင်တောင် ကပ္ပတိန်တစ်ယောက်အတွက်နှင့်မူ အသက်အသေမခံနိုင်ကြချေ၊၊ သူတို့သည် ရှေ့သို့မတိုးဝံ့ကြရုံမျှမက အလိုအလျောက် နောက်သို့ဆုတ်ကာ လမ်းဖယ်ပေးလိုက်ကြသည်၊၊

နွမ်းပါးချို့တဲ့သော ကလေးငယ်ကို အထင်မသေးပါနှင့်၊ သူသည် တစ်နေ့တွင် ကျားတစ်ကောင် ဖြစ်လာနိုင်သည်၊၊ ထို့အတူ ဆင်းရဲနွမ်းပါးသော လူငယ်တို့ကိုလည်း မလှောင်ပြောင်ပါနှင့်၊၊ အိပ်ပျော်နေသော ကျားတစ်ကောင်ကို သင်သည် ဘာကြောင့် သွားရောက်နှိုးဆွချင်ရပါသနည်း၊၊

မည်သူမျှ တော်လှန်ပုန်ကန်ခြင်း မပြုဝံ့တော့သည်ကို မြင်သောအခါ လေယင်းသည် သင်္ဘောဆီသို့ တဖြည်းဖြည်း လျှောက်လှမ်းသွားသည်၊၊ သူသည် ဘတ်ဂီ၏သင်္ဘောပေါ်သို့ တက်ကာ ရွက်တိုက်ပြီး ပင်လယ်ပြင်ကျယ်ကြီးထဲသို့ တစ်ဦးတည်း ရွက်လွှင့်ထွက်ခွာသွားတော့သည်၊၊ အားလုံးကမူ မည်သည့်စကားမျှ မဟဝံ့ကြဘဲ လေယင်း ရွက်လွှင့်ထွက်ခွာသွားသည်ကိုသာ ငေးကြည့်နေကြရသည်၊၊

လေယင်းသည် သင်္ဘောပေါ်တွင် အဖမ်းခံခဲ့ရခြင်းဖြစ်ပြီး သင်္ဘောပေါ်၌ ဖြစ်ပျက်ခဲ့သမျှ အခြင်းအရာများကြောင့် ဘတ်ဂီပင်လယ်ဓားပြဂိုဏ်းအပေါ် သံယောဇဉ်ဟူ၍ အစအနမျှ မရှိချေ၊၊ တစ်ချက်ရှိသည်မှာ လေယင်းအနေဖြင့် ဘတ်ဂီပင်လယ်ဓားပြများကို မသတ်ချင်၍ မဟုတ်ဘဲ သူ၏ခန္ဓာကိုယ်ထဲတွင် ချက်ကရာပမာဏ များများစားစား မကျန်တော့ခြင်းကြောင့်သာ ဖြစ်သည်၊၊

ပထမဆုံးအကြိမ် လက်သီးတွင် ချက်ကရာထည့်၍ ကာဘာဂျီကို ထိုးစဉ်က ချက်ကရာ ၁၀ ပွိုင့် ကုန်ဆုံးခဲ့သည်၊၊ [ချီဒိုရီ နာဂါရှီ] တိုက်ကွက်ကို အသုံးပြုပြီးနောက်တွင်မူ နောက်ထပ် ၈၀ ပွိုင့် ကုန်ဆုံးသွားခဲ့သည်၊၊ ယခုအခါ လေယင်း၏ ချက်ကရာပမာဏသည် ၁၀/၁၀၀ သာ ရှိတော့သည်၊၊ တစ်နည်းအားဖြင့် ပြောရလျှင် ပင်လယ်ဓားပြများသာ စုပြုံ၍ ဝိုင်းအုံတိုက်ခိုက်ခဲ့ကြပါက လေယင်း အသက်ပျောက်သွားလောက်ပြီ ဖြစ်သည်၊၊ လေယင်း၏ သတ္တိဗျတ္တိကသာ ထိုအနိုင်ကျင့်တတ်သော ပင်လယ်ဓားပြအုပ်စုကို ခြောက်လှန့်ပြီး သူ၏အသက်ကို ကယ်တင်နိုင်ခဲ့ခြင်း ဖြစ်သည်၊၊

သူသည် ပိုမိုသန်မာလာရမည် ဖြစ်သည်၊၊ သို့ဖြင့် လေယင်း၏ စွန့်စားခန်းသည် စတင်ခဲ့တော့သည်၊၊ သူသည် ပြာလဲ့နေသော ပင်လယ်ပြင်ကြီးကို ကြည့်ရင်း ရင်ထဲတွင် စိတ်လှုပ်ရှားမှုများ တရိပ်ရိပ် တက်လာသည်ကို မခံစားဘဲ မနေနိုင်တော့ပေ၊၊ သူသည် ဤပင်လယ်ပြင်တွင် အသန်မာဆုံးနှင့် အလွတ်လပ်ဆုံးလူသား ဖြစ်လာစေရမည်ဟု စိတ်ပိုင်းဖြတ်လိုက်သည်၊၊

သူ သင်္ဘောပေါ်တွင် ပထမဆုံးလုပ်ဆောင်သည့်အရာမှာ ဤကြောင်တောင်တောင် လူပြက်ပင်လယ်ဓားပြအလံကို အရင်ဆုံး ဖြုတ်ချပစ်ခြင်း ဖြစ်သည်၊၊ သူသည် ဘတ်ဂီပင်လယ်ဓားပြအဖွဲ့ဝင် မဟုတ်တော့ရုံမျှမက၊ ပင်လယ်ဓားပြတစ်ယောက်ပင် မဟုတ်တော့ချေ၊၊

ဘယ်လိုလူမျိုး ဖြစ်မလဲဆိုသည်ကို လေယင်း ချက်ချင်း ရွေးချယ်လိုက်သည်၊၊ သူသည် ဆုကြေးငွေရှာသူ တစ်ဦး ဖြစ်လာမည် ဖြစ်သည်၊၊ ဤအဆင့်တွင် သူ ပိုမိုသန်မာလာလိုပါက ကတ်နှိုက်ခြင်းဖြင့် နင်ဂျုစုများ ရရှိရန်နှင့် ချက်ကရာပမာဏ တိုးမြင့်ရန်အတွက် ငွေအမြောက်အမြား လိုအပ်သည်၊၊ သူ၏ လက်ရှိစွမ်းအားဖြင့် ဆုကြေးငွေရရန် ပင်လယ်ဓားပြများကို လိုက်လံဖမ်းဆီးခြင်းသည် အကောင်းဆုံးနည်းလမ်းဖြစ်ကြောင်း သံသယဖြစ်စရာ မလိုချေ၊၊

လေယင်း ဤသို့ တွေးတောနေစဉ်မှာပင် စနစ်ထံမှ အသိပေးချက်တစ်ခု ထွက်ပေါ်လာသည်၊၊

[မိတ်ဆွေသို့ အကြံပြုချက် - သင်သည် လေ့ကျင့်မှုပြုလုပ်ခြင်းဖြင့် သင်၏ချက်ကရာ အကန့်အသတ်ကို မြှင့်တင်နိုင်ပြီး မိမိကိုယ်ပိုင် နင်ဂျုစုကိုလည်း ဖန်တီးနိုင်ပါသည်၊၊]

ဤမျှ ရိုးရှင်းသော စာကြောင်းတစ်ကြောင်းက လေယင်းကို ရုတ်တရက် သတိဝင်လာစေသည်၊၊ သူသည် မိမိခေါင်းကို ရိုက်လိုက်ရင်း စိတ်ထဲမှ တွေးလိုက်မိသည်၊၊ 'ဟုတ်သားပဲ၊ ငါ့ခန္ဓာကိုယ်ထဲမှာ ချက်ကရာရှိနေမှတော့ အတိုင်းအတာတစ်ခုအထိ ငါ့ကို နင်ဂျာတစ်ယောက်လို့ သတ်မှတ်လို့ရတာပဲ၊၊ ပြီးတော့ ငါ့မှာ ချက်ကရာ ရှိနေတာဆိုတော့ နာရူတိုထဲက နင်ဂျာတွေလိုမျိုး လေ့ကျင့်လို့ ရတာပဲ၊၊'

လေယင်းသည် ချက်ကရာ၏ ရှင်းလင်းချက်ကို ပြန်လည်တွေးတောလိုက်သည်၊၊ မူရင်း နာရူတိုဇာတ်လမ်းထဲတွင် ချက်ကရာဆိုသည်မှာ လူသားခန္ဓာကိုယ်ရှိ ဆဲလ်တစ်ခုချင်းစီမှ ထွက်ပေါ်လာသော ရုပ်ပိုင်းဆိုင်ရာစွမ်းအင်နှင့် စိတ်ဝိညာဉ်သိစိတ်မှလာသော စိတ်ပိုင်းဆိုင်ရာစွမ်းအင်တို့ကို ပေါင်းစပ်ထားခြင်းဖြစ်ပြီး၊ လေ့လာခြင်း၊ တရားမှတ်ခြင်းနှင့် အတွေ့အကြုံများမှတစ်ဆင့် တိုးမြင့်လာနိုင်သည်၊၊ ၎င်းအပြင် သဘာဝစွမ်းအင်နှင့် ပေါင်းစပ်ထားသော ချက်ကရာကိုမူ ဆေ့ခ်ျမုဒ် အတွက် အသုံးပြုသည်၊၊

ယခုအချိန်တွင် လေယင်း၏ကိုယ်ပေါ်၌ ဘီလီတစ်ပြားမျှ မရှိသဖြင့် နင်ဂျုစုကတ်များကို လုံးဝ မနှိုက်နိုင်သေးချေ၊၊ သို့ဖြစ်ရာ မိမိဘာသာ ကျင့်ကြံအားထုတ်ခြင်းသည် အကောင်းဆုံးနည်းလမ်းဖြစ်ကြောင်း သံသယဖြစ်စရာ မလိုတော့ပေ၊၊ ကာဘာဂျီကို တိုက်ခိုက်စဉ်က သူ၏လက်သီးတွင် ချက်ကရာထည့်သွင်း တိုက်ခိုက်ခဲ့ခြင်းကဲ့သို့ပင် ဤသည်ကား အလွယ်ကူဆုံးသော တိုက်ခိုက်မှုနည်းလမ်း ဖြစ်သည်၊၊

လေယင်း ပထမဆုံး တွေးမိသည်မှာ နင်ဂျာအဖွဲ့ချုပ်၏ ခေါင်းဆောင်ဖြစ်သော ဟာတာကီ စာကူမို ၏ အဆင့် - S နင်ဂျုစု ဖြစ်သည့် "ဖြူစင်သောအလင်း ချက်ကရာဓား" ပင် ဖြစ်သည်၊၊ သူသည် "ကိုနိုဟ၏ အစွယ်ဖြူ ဟု လူသိများသော ဟာတာကီ ကာကာရှီ၏ ဖခင်ဖြစ်ပြီး၊ ဒဏ္ဍာရီလာ ဆန်နင် သုံးဦးပင်လျှင် သူ့ကို လေးစားကြရသည်၊၊

ဟာတာကီ စာကူမို ထုတ်လွှတ်လိုက်သော [ဖြူစင်သောအလင်း ချက်ကရာဓား] သည် သူ၏ဓားတို [အစွယ်ဖြူ] နှင့် ပေါင်းစပ်လိုက်သည့်အခါ လေထုထဲတွင် မိုးကြိုးလျှပ်စီးများ ဖြတ်ပြေးသွားသကဲ့သို့ ဖြစ်ပေါ်စေပြီး၊ ရန်သူကို [ပျံသန်းသော မိုးကြိုးနတ်ဘုရားအတတ်] ၏ အရှိန်နှုန်းနီးပါးဖြင့် တိုက်ခိုက်နိုင်သည်၊၊ ဤအတတ်ပညာကြောင့်ပင် ဟာတာကီ စာကူမိုသည် "ကုန်းဟိုအာ၏ အစွယ်ဖြူ" ဟူသော အမည်ကို ရရှိခဲ့ခြင်း ဖြစ်သည်၊၊

သူသည် ဤတိုက်ကွက်ကို ဘာကြောင့် တွေးမိသနည်း၊၊ အကြောင်းမှာ လေယင်းသည် ၎င်းကို အခြေခံ၍ မိမိကိုယ်ပိုင် နင်ဂျုစုကို ဖန်တီးလိုသောကြောင့် ဖြစ်သည်၊၊

သူသည် သစ်သားပြားတစ်ခုကို ရှာတွေ့သောအခါ လေယင်းသည် သူ၏ညာလက်ခလယ်နှင့် လက်ညှိုးတို့တွင် ချက်ကရာများကို စုစည်းလိုက်ပြီး သစ်သားပြားကို ထိုးစိုက်လိုက်သည်၊၊ ထိုအခါ သစ်သားပြားပေါ်တွင် ဓားဖြင့် မွှန်းထားသကဲ့သို့ အမှတ်အသားတစ်ခု ပေါ်လာသည်၊၊ ဤတိုက်ကွက်မှာ အတုခိုးရုံမျှသာ ဖြစ်သဖြင့် ဟာတာကီ စာကူမို၏ အဆင့် - S ရှိ [ဖြူစင်သောအလင်း ချက်ကရာဓား] ကိုမူ မမီနိုင်သေးချေ၊၊

"မထက်မြက်သေးဘူးပဲ၊ ငါသာ ဒါကို ဓားတိုတစ်ချောင်းနဲ့ ပေါင်းစပ်လိုက်ရင် ဤတိုက်ကွက်က ပိုပြီးတော့ ထိရောက်မှု ရှိမှာ မဟုတ်လား၊၊" လေယင်းသည် ခေါင်းကိုကုတ်ရင်း မိမိဘာသာ ရေရွတ်လိုက်သည်၊၊

ယင်းနောက်တွင် သူသည် ခုနကအတိုင်းပင် "ဖြူစင်သောအလင်း ချက်ကရာဓား" ၏ အတုခိုးဗားရှင်းကို အကြိမ်ကြိမ် အထပ်ထပ် ဆက်လက်လေ့ကျင့်နေခဲ့သည်၊၊

နာရီအနည်းငယ် ကြာပြီးနောက်တွင် လေယင်းသည် ချွေးတလုံးလုံး ဖြစ်နေရသည်၊၊ သူ၏ခန္ဓာကိုယ် စွမ်းအင်များအားလုံး ကုန်ခမ်းလုနီးပါး ဖြစ်သွားပြီး သူ၏ချက်ကရာပမာဏသည်လည်း ၂/၁၀၀ သို့ ရောက်ရှိသွားကာ အောက်ခြေသို့ ကပ်သွားခဲ့ပြီ ဖြစ်သည်၊၊ သူသည် သင်္ဘောပေါ်တွင် စားစရာများကို ချက်ချင်း ရှာဖွေတော့သည်၊၊

သူသည် သင်္ဘော၏ အအေးခန်းထဲသို့ သွားရောက်ရှာဖွေရာ ထိုနေရာတွင် ပင်လယ်သတ္တဝါအသားအချို့၊ သစ်သီးဝလံများနှင့် ဟင်းသီးဟင်းရွက်အချို့ ကျန်ရှိနေသည်ကို တွေ့ရသဖြင့် ၎င်းတို့ကို ချက်ပြုတ်စားသောက်လိုက်သည်၊၊ ယခင်က သင်္ဘောလုပ်သားအောက်ခြေအဆင့် ဖြစ်ခဲ့စဉ်ကမူ ဤကဲ့သို့ စားသောက်ရရန် အိပ်မက်ပင် မမက်ဝံ့ခဲ့ချေ၊၊ နေ့စဉ် ဝမ်းရေးအတွက်ပင် အနိုင်နိုင် ရှာဖွေခဲ့ရသည် မဟုတ်ပါလော၊၊ ယခုမူ အခြေအနေက ကွဲပြားသွားပြီ ဖြစ်သည်၊၊ သူသည် သင်္ဘောကပ္ပတိန်ဖြစ်လာပြီး သင်္ဘောပေါ်တွင် မိမိစိတ်ကြိုက် လုပ်ဆောင်နိုင်ပြီ ဖြစ်သည်၊၊

ဤအရာအားလုံးသည် သူ၏အစွမ်းအစဖြင့် ရယူခဲ့ခြင်း ဖြစ်သည်၊၊

သို့ဖြစ်၍ သူသည် သင်္ဘောပေါ်တွင် စားလိုက်၊ အိပ်လိုက်၊ ကျင့်ကြံလိုက်ဖြင့် အချိန်ကုန်လွန်စေခဲ့သည်၊၊ နှစ်ရက်ကြာပြီးနောက် သင်္ဘောသည် ကျွန်းတစ်ကျွန်းသို့ တဖြည်းဖြည်း ချဉ်းကပ်လာခဲ့သည်၊၊ ၎င်းသည် လူသူမနေထိုင်သော ကျွန်းပျက်တစ်ကျွန်း ဖြစ်သည်၊၊ လေယင်းသည် သင်္ဘောပေါ်မှ ဆင်းလိုက်သည့်အခါ ကျွန်းပေါ်ရှိ သစ်ပင်ဝါးပင်များမှာ စိမ်းလန်းစိုပြည်နေပြီး တောအုပ်လေးတစ်ခုကဲ့သို့ ဖြစ်နေသည်ကို တွေ့ရသည်၊၊ One Piece ကမ္ဘာတွင် ဤကဲ့သို့သော ကျွန်းများစွာ ရှိတတ်ကြပြီး ပုံမှန်အားဖြင့် စွန့်စားသူများသည် ကျွန်းတစ်ခုချင်းစီတွင် ခေတ္တအနားယူလေ့ ရှိကြသည်၊၊

လေယင်း တွေးမိသည်မှာ သင်္ဘောပေါ်တွင်မူ လေ့ကျင့်ရန် နေရာအကန့်အသတ်သာ ရှိသည်၊၊ ဤနေရာ၏ လတ်ဆတ်သော လေထုသည် လေ့ကျင့်ရန်အတွက် အလွန်ကောင်းမွန်သော နေရာတစ်ခု ဖြစ်လာနိုင်ပြီး၊ ကျွန်းပေါ်တွင် သူတစ်ခါမျှ မမြင်ဖူးသော အရာများနှင့်လည်း ကြုံတွေ့ရနိုင်သည်ဟူ၍ ဖြစ်သည်၊၊

အချိန်မဖြုန်းချင်တော့သဖြင့် လေယင်းသည် သစ်ပင်ကြီးတစ်ပင်အောက်တွင် သူ၏လေ့ကျင့်မှုကို ဆက်လက်လုပ်ဆောင်သည်၊၊ "ဖြူစင်သောအလင်း ချက်ကရာဓား" ကို နှစ်ရက်တိုင်တိုင် အတုခိုးလေ့ကျင့်ပြီးနောက် လေယင်းသည် ဤတိုက်ကွက်အတွက် သူ၏လက်ရှိ အကန့်အသတ်သို့ ရောက်ရှိသွားပြီဟု ခန့်မှန်းလိုက်သည်၊၊ မည်သို့ပင်ဖြစ်စေ သူ၏ချက်ကရာသည် အလွန်အကန့်အသတ် ရှိနေသေးသည် မဟုတ်ပါလော၊၊

သို့ဖြစ်၍ လေယင်းသည် နင်ဂျုစုအသစ်တစ်ခုကို လေ့ကျင့်ရန် ဆုံးဖြတ်လိုက်သည်...

၎င်းကား ရာဆင်းဂန်း ပင် ဖြစ်သည်၊၊