အခန်း (၄၈) : ဟီနာ နှင့် အိန်း
လေယင်း စားသောက်ပြီးသောအခါ အိန်းမှာ ထွက်မသွားသေးဘဲ နှစ်ယောက်တည်း ကြားနိုင်ရုံမျှ အသံဖြင့် လေယင်းကို မေးလိုက်သည်။
"ဟေ့... လွန်ခဲ့တဲ့ နှစ်ရက်က မင်းသုံးလိုက်တဲ့ နည်းစနစ်ကို ဘယ်လိုလုပ်တာလဲ"
"ဘာကိုလဲ"
"မင်း ရုတ်တရက် ပျောက်သွားတာလေ။ ပြန်ပေါ်လာတော့ ဗယ်ရီဂုဒ်ကို ဖြုတ်ချထားပြီးသား ဖြစ်နေတယ်။ မင်းက [ရေတပ်စွမ်းအား ခြောက်မျိုး - ဆိုရူ] ကို ကျွမ်းကျင်နေပြီလား" ဟု အိန်းက မေးသည်။ ထိုစကားကို ကြားသောအခါ လေယင်းက ခေါင်းကို ကုတ်လိုက်သည်။ "အဲဒါက..."
"ဟေ့ မင်းတို့ နှစ်ယောက်၊ ငါ့မျက်စိရှေ့ကနေ ထွက်သွားကြစမ်း! ချောင်းပြီး စကားမပြောကြနဲ့!"
လေယင်း ဘာမျှ မပြောရသေးခင်မှာပင် ဗယ်ရီဂုဒ်က အကျဉ်းခန်း၏ သံတိုင်များကို လက်နှစ်ဖက်ဖြင့် ကိုင်ကာ လေယင်းနှင့် အိန်းတို့ဘက်ကို လှမ်းအော်လိုက်သည်။ သူတို့နှစ်ယောက် အလွန်နီးကပ်နေသည်ကို မြင်ရသည်မှာ ဗယ်ရီဂုဒ်အတွက် အလွန်ပင် စိတ်မသက်မသာ ဖြစ်စရာကောင်းနေသည်။ အိန်း၏ မေးခွန်းနှင့် ပတ်သက်၍ လေယင်းကလည်း မရေမရာသာ ပြန်ဖြေလိုက်သည်။ သူပြောပြလိုက်လျှင်လည်း [လျှပ်စီးမြန်နှုန်း ဓားချက်] နှင့် [ခြင်္သေ့အကွက်] ဆိုသည်မှာ ဘာလဲဆိုသည်ကို အိန်း နားလည်မည် မဟုတ်ပေ။ ဟူး... ဒါက လူပျိုပေါက်အရွယ်၊ ဟော်မုန်းတွေ တက်ကြွနေတဲ့ အချိန်အခါပေပဲ...။
....
တတိယနေ့တွင် သူတို့နှစ်ယောက်စလုံး ပြန်လွတ်လာကြသည်။ ယခုအခါတွင် ဗယ်ရီဂုဒ်က လေယင်းကို ကြည့်လျှင် မျက်လုံးထဲတွင် မနာလိုမှုများ ပိုမိုပါဝင်နေသည်။ လေယင်းနှင့် ဗယ်ရီဂုဒ်တို့ အကျဉ်းခန်းအတွင်း ရန်ဖြစ်ခဲ့ကြသည်ဟူသော သတင်းမှာလည်း မကြာခင်မှာပင် ပျံ့နှံ့သွားသည်။
"မင်းပြောတာ ဒီကောင်လေးက ဗယ်ရီဂုဒ်ကို တစ်ချက်တည်းနဲ့ ဖြုတ်ချလိုက်တာလား"
"အဓိပ္ပာယ်မရှိတာ၊ ဟုတ်ရဲ့လား"
"ဘယ်လိုလုပ် ဖြစ်နိုင်မှာလဲ"
ဟီနာက "ဟုတ်တယ်၊ သူက အရာခံဗိုလ်ပဲ ရှိသေးတာ။ သူ အဲလောက်ထိ စွမ်းနိုင်မယ်လို့ ငါ မယုံဘူး" ဟု ပြောသည်။
"ဘယ်လိုပဲဖြစ်ဖြစ် ဗယ်ရီဂုဒ်မှာလည်း နတ်ဆိုးသီးစွမ်းအား ရှိသေးတာပဲလေ"
....
ဤရက်ပိုင်းများတွင် လေယင်းနှင့် အိန်းတို့မှာ အိပ်ခြင်းနှင့် လေ့ကျင့်ခြင်းမှလွဲ၍ တစ်နေကုန်နီးပါး အတူတူပင် ရှိနေကြရာ ရေတပ်သားများနှင့် ကျောင်းသားအများစုမှာ စိတ်အနှောင့်အယှက် ဖြစ်နေကြသည်။ အိန်းမှာ ရေတပ်အကယ်ဒမီ၏ နတ်သမီးဖြစ်ရာ လူအများစုမှာ သူမကို တိတ်တဆိတ် ချစ်နေကြပြီး ပွင့်ပွင့်လင်းလင်းလည်း လိုက်လံ ပိုးပန်းနေကြသည်။ သူမက သူတို့ကို တစ်ချက်မျှပင် လှည့်မကြည့်သော်လည်း အရာခံဗိုလ်ကလေး ဖြစ်သူနှင့် သွားရောက် ကပ်တွယ်နေသည်ကို မြင်ရသောအခါ...။
တစ်နေ့တွင် ရေတပ်အကယ်ဒမီ စားသောက်ခန်း၌ လေယင်းနှင့် အိန်းတို့ တစ်ယောက်နှင့်တစ်ယောက် မျက်နှာချင်းဆိုင် ထိုင်ကာ နေ့လယ်စာ စားနေကြသည်။ အနီးရှိ စားပွဲတစ်ခုတွင် ဟီနာနှင့် သူမ၏ သူငယ်ချင်းမလေး အချို့လည်း စားသောက်နေကြသည်။ ဆိုရိုးစကားအတိုင်းပင် မိန်းကလေးများမှာ ကောလာဟလ ပြောရန် ဖန်တီးခံထားရသူများ ဖြစ်ကြသည်။ မိန်းကလေးအချို့ စားပွဲတွင် ထိုင်လိုက်သည်နှင့် တစ်ယောက်နား တစ်ယောက် ကပ်ကာ တီးတိုး စကားပြောကြတော့သည်။
ဟီနာ၏ သူငယ်ချင်းတစ်ဦးက "ဟိုမှာ ကြည့်လိုက်စမ်း၊ သူတို့ ချစ်ကြိုက်နေကြပြီလို့ မင်းတို့ မထင်ဘူးလား" ဟု ပြောသည်။
နောက်တစ်ယောက်က "ဒီကောင်က ရာထူးနည်းပေမဲ့ ဘာမဆို လုပ်နိုင်လိမ့်မယ်လို့ မထင်ထားခဲ့မိဘူး" ဟု ဆိုသည်။
နောက်တစ်ယောက်ကလည်း "ရေတပ်အကယ်ဒမီမှာ အခက်ခဲဆုံး နတ်သမီးလေးက အရာခံဗိုလ်တစ်ယောက်ကို...." ဟု ယုံနိုင်ဖွယ်မရှိစွာ ပြောသည်။
ဟီနာကမူ လေယင်းရှိရာဘက်ကို မထီမဲ့မြင် မျက်စောင်းထိုးလိုက်ပြီး "ဟွန်း၊ အိန်းက သူ့ကို သဘောကျနေတယ်ဆိုတာ ငါ မယုံနိုင်ဘူး" ဟု ပြောသည်။
သူမ၏ သူငယ်ချင်းတစ်ယောက်က "အို၊ ဟုတ်ပါပြီ။ ရေတပ်အကယ်ဒမီရဲ့ နံပါတ် (၁) နတ်သမီးက မင်း ဖြစ်သင့်တာပါ၊ ဟီနာရယ်" ဟု ပြန်ဖြေသည်။
နောက်တစ်ယောက်က "ဟုတ်တယ်၊ သူတို့က အိန်းကိုပဲ နတ်သမီးလို့ ခေါ်နေကြတာ၊ ဟီနာကို စိတ်အနှောင့်အယှက် ဖြစ်အောင် လုပ်နေတာပဲ" ဟု ထောက်ခံသည်။
အလှတရား၊ မနာလိုမှုနှင့် နှိုင်းယှဉ်ခြင်းတို့မှာ မိန်းကလေးများအတွက် သဘာဝပင် ဖြစ်သည်။ အရွယ်တူ မိန်းကလေးနှစ်ယောက် ဘေးချင်းယှဉ်ရပ်လျှင် မလှပသူမှာ အမြဲတမ်း ယုံကြည်မှု လျော့နည်းနေတတ်သည်။ ထို့ကြောင့် ရေတပ်အကယ်ဒမီတွင် အထူးသဖြင့် ကျောင်းသူများကြား၌ ဤအကြောင်းအရာများကို ကောလာဟလ ပြောဆိုရန် နှစ်သက်ကြသည်။ ရေတပ်အကယ်ဒမီ၏ အလှပဆုံး အမျိုးသမီးနှစ်ဦးမှာ အိန်းနှင့် ဟီနာတို့ ဖြစ်သည်။ သို့သော်လည်း ဘယ်သူက ပိုလှသလဲ ဆိုသည့်အချက်မှာ အမြဲတမ်း အငြင်းပွားစရာ ဖြစ်နေသည်။ သို့သော်လည်း ထိုငြင်းခုံမှုကို ရပ်တန့်စေမည့် နောက်ထပ် လှပသည့် မိန်းကလေးတစ်ဦး မရောက်လာမီအထိသာ ဖြစ်သည်။ (ဒါက နောက်မှ ပြောပြရမယ့် ဇာတ်လမ်းတစ်ပုဒ်ပါ)။
ယခုအချိန်တွင် သူငယ်ချင်းမလေး၏ စကားကို ကြားသောအခါ ဟီနာမှာ အထင်သေးစွာ ကြည့်လိုက်ပြီး "ဟွန်း၊ ငါက အဲဒီလိုကိစ္စမျိုးတွေကို ဂရုမစိုက်ဘူး။ ဒီကမ္ဘာမှာ စွမ်းအားကသာ အရေးအကြီးဆုံးပဲ..." ဟု ဆိုသည်။
ဟီနာက ထိုသို့ပြောသော်လည်း သူမကိုယ်သူမ အလှအပကို အလွန်နှစ်သက်သည်။ နေ့တိုင်း အပြင်မထွက်ခင် လှပအောင် အမြဲတမ်း ပြင်ဆင်လေ့ရှိသည်။ သူမသည် အမြဲတမ်း အိန်းကို လှမ်းကြည့်နေတတ်ပြီး သူမ၏ ပုံပန်းသဏ္ဌာန်က အိန်းထက် ညံ့သွားမည်ကို စိုးရိမ်နေခြင်း ဖြစ်သည်။
လေယင်းနှင့် အိန်းတို့မှာ တစ်ယောက်နှင့်တစ်ယောက် ရယ်မောပြောဆိုရင်း စားသောက်နေကြရာ လူတိုင်းအား မနာလိုဖြစ်စေသည်။ ရုတ်တရက် စားပွဲကို အားပါးတရ ခေါက်လိုက်သံက သူတို့နှစ်ယောက်၏ စကားဝိုင်းကို ဖြတ်တောက်လိုက်သည်။ အမျိုးသားတစ်ဦးသည် ကျောင်းသား ၄-၅ ဦးကို နောက်ကခေါ်ကာ လေယင်းကို ဆိုးရွားသော အကြည့်ဖြင့် စိုက်ကြည့်နေသည်။ ထိုသူမှာလည်း ရေတပ်အကယ်ဒမီမှ ကျောင်းသားတစ်ဦးဖြစ်သူ ဘရန်းနူး ဖြစ်သည်။ သူ၏ ဆံပင်မှာ ကောက်ရိုးရောင် ဖြစ်ပြီး နဖူးပြင်က မြင့်လွန်း၍ သူ၏ အမှန်တကယ် အသက်ကို ဖုံးကွယ်ထားသည်။ (သူက အရွယ်ရောက်ချင်လွန်း၍ စိတ်လှုပ်ရှားနေပုံရသည်)။ သူသည် အရပ်အမောင်း ကောင်းပြီး ခန္ဓာကိုယ်ကြံ့ခိုင်ကာ ကြွက်သားများမှာလည်း ကြောက်စရာကောင်းလောက်အောင် ကြီးမားသည်။
ဘရန်းနူးက လေယင်းကို "ဟေ့ကောင်၊ အပြင်ကို ထွက်ခဲ့စမ်း၊ ငါတို့ စကားပြောဖို့ လိုတယ်" ဟု ပြောသည်။
လေယင်းက ပင်လယ်သားရဲအသားကို ခက်ရင်းဖြင့် ထိုးယူစားလိုက်ရင်း "ငါ စားနေတယ်၊ အလုပ်ရှုပ်နေတယ်" ဟု ပြောသည်။
ဘရန်းနူးဘေးရှိ ကျောင်းသားတစ်ဦးက "သောက်ရမ်း၊ မရှက်တတ်လိုက်တာ။ ငါတို့ ဘော့စ် က ထွက်လာဖို့ ပြောနေတာကို မင်းက ဘယ်လိုလုပ် ငြင်းရဲတာလဲ!" ဟု ဆိုသည်။
ဘရန်းနူးက လက်သီးကို တင်းတင်းဆုပ်လိုက်ပြီး "ဘာမှန်းမသိတဲ့ သောက်ရမ်း အရာခံဗိုလ်ကောင်။ မင်းကိုယ်မင်း အရင်ကြည့်လိုက်ဦး၊ အိန်းညီမလေးနဲ့ အတူတူ ထိုင်စားနေသေးတယ်။ ငါသာ မင်းလို အရာခံဗိုလ်ဆိုရင် ဘယ်သူ့ကိုမှ မျက်နှာပြရမှာ ရှက်နေမှာ" ဟု ပြောသည်။
အိန်းက စိုးရိမ်တကြီးဖြင့် "ဟေ့ ဘရန်းနူး! မင်း လွန်သွားပြီနော်! ထွက်သွားစမ်း! မဟုတ်ရင် ငါ မင်းကို ရိုင်းပြမိလိမ့်မယ်!" ဟု အော်လိုက်သည်။
လေယင်းက "အိန်း၊ မင်း ဝင်မပါနဲ့။ သူ ဘာလုပ်နိုင်လဲဆိုတာ ငါ ကြည့်ချင်တယ်" ဟု ပြောသည်။
"သောက်ရမ်း၊ ဒီနေရာမှာ အော်ရဲသေးတယ်ပေါ့! အိန်းညီမလေးသာ မရှိရင် မင်းကို အသေရိုက်နှက်ပစ်လိုက်မှာ။ ပြောစမ်း၊ မင်းကို [ရေတပ်စွမ်းအား ခြောက်မျိုး] နဲ့ ရိုက်နှက်ပေးရမလား?"
ဘရန်းနူးက သူ့လက်ချောင်းကို ဖိလိုက်ပြီး "ဂါရာ" ဟု အသံပြုလိုက်သည်။ အိန်းက နတ်ဆိုးသီးစွမ်းအားကို အသုံးပြု၍ တားဆီးရန် ပြင်လိုက်သော်လည်း လေယင်းက သူမ၏ ပခုံးကို ဖိထားလိုက်သည်။ ထိုအချိန်တွင် ဘရန်းနူးဘေးရှိ ကျောင်းသားက "ရေတပ်စွမ်းအား ခြောက်မျိုး ဟုတ်လား? ဘော့စ်, ဒီကောင်လေးကို ရေတပ်စွမ်းအား ခြောက်မျိုး သုံးဖို့ဆိုတာ အရမ်း ရက်စက်လွန်းနေမလား? ဒီ သောက်ရူး အရာခံဗိုလ်ကောင်က [ရေတပ်စွမ်းအား ခြောက်မျိုး] ဆိုတာ ဘာလဲတောင် သိမှာမဟုတ်ဘူး၊ ဟားဟား..." ဟု ပြောသည်။
သူ ပြောပြီးသည်နှင့် လူအများက ရယ်မောကာ လေယင်းကို လှောင်ပြောင်ကြသည်။
"ရေတပ်စွမ်းအား ခြောက်မျိုး - သံကိုယ်ထည်!"
ဘန်း!
လက်သီးချက်မှာ ပြင်းထန်စွာ ပေါက်ကွဲသွားပြီး ဘရန်းနူးမှာ လူများ အစားအသောက်ယူနေသည့် ကောင်တာပေါ်သို့ လွင့်စင်သွားကာ ကြီးမားသော အပေါက်ကြီး ဖြစ်သွားသည်။ လက်သီးဖြင့် ထိုးလိုက်သူမှာ လေယင်းဖြစ်ပြီး လွင့်စင်သွားသူမှာ ဘရန်းနူးဖြစ်သည်။ ကောင်တာကို အပေါက်ကြီးဖြစ်သွားစေသည့်အပြင် ဘရန်းနူးမှာ သွေးများအန်ထုတ်လိုက်ပြီး ရှေ့သွားနှစ်ချောင်း ကျွတ်ထွက်ကာ မေးရိုးလည်း ပြုတ်ထွက်သွားသည်။ ထိုမြင်ကွင်းကို မြင်လိုက်ရသောအခါ ဘရန်းနူး၏ လက်ပါးစေများမှာ ငှက်များသဖွယ် တကွဲတပြား ထွက်ပြေးကြတော့သည်။
'ခန္ဓာကိုယ်ကြီးမားပြီး [ရေတပ်စွမ်းအား ခြောက်မျိုး] ကို သိတဲ့ ဘရန်းနူးတောင် ဒီလောက်ထိ အရိုက်ခံလိုက်ရတာ။ ငါတို့တော့ ဒီအရာခံဗိုလ်ကို ဘယ်လိုမှ မနိုင်တော့ဘူး'
ဘရန်းနူးကို အသေအလဲ ရိုက်နှက်ပြီးနောက် လေယင်းမှာ ဘာမှမဖြစ်ခဲ့သလိုပင် ဆက်လက် စားသောက်နေသည်။ ဤအချိန်တွင် လေယင်း၏ ဆန့်ကျင်ဘက်တွင် ထိုင်နေသည့် အိန်းနှင့် မလှမ်းမကမ်းရှိ ဟီနာတို့မှာ အလွန်ပင် တုန်လှုပ်သွားကြသည်။
သူမ၏ သူငယ်ချင်းတစ်ဦးက "ဟေ့... သူသုံးလိုက်တာ [ရေတပ်စွမ်းအား ခြောက်မျိုး - သံကိုယ်ထည်] မဟုတ်လား" ဟု တအံ့တဩ ပြောလိုက်သည်။