အခန်း(၁၃)- လေယင်းနှင့်ဒုဗိုလ်မှူးတို့ထိပ်တိုက်တွေဆုံမှု

ရွာနှစ်ရွာ၏ "အုပ်ထိန်းသူ" ဟု လူသိများသော်လည်း မီလာ ကို လူတိုင်းက ကြိုက်ကြသည်တော့ မဟုတ်ချေ၊၊ ရွာလူကြီး ဖာမာသည်လည်း ထိုမကြိုက်သူများထဲမှ တစ်ဦး ဖြစ်သည်၊၊ ရှေ့တွင် ဆိုခဲ့သည့်အတိုင်း မီလာသည် အငြိမ်းစား ရေတပ်ဒုတိယဗိုလ်မှူးတစ်ဦးဖြစ်ပြီး သိုင်းပညာအချို့ တတ်မြောက်ကာ တိုက်ခိုက်ရေးစွမ်းရည် အသင့်အတင့် ရှိသူ ဖြစ်သည်၊၊ သူသည် ငယ်စဉ်က ပင်လယ်ဓားပြများနှင့် တိုက်ခိုက်ခဲ့ဖူးသဖြင့် မျက်နှာပေါ်တွင် ဓားဒဏ်ရာအချို့ ရှိနေခဲ့သည်၊၊ သူသည် ထိုဒဏ်ရာများကို သူ၏ စစ်မှုထမ်းဂုဏ်ရည်ပြ ပြုလုပ်ချက်တစ်ခုကဲ့သို့ အမြဲတစေ ကြွေးကြော်လေ့ ရှိသည်၊၊

မီလာ၏ စွမ်းအားသည် ရွာသူရွာသားများကို အန်ဒါဆန် ၏ အုပ်ချုပ်မှုအောက်မှ လွတ်မြောက်အောင် မစွမ်းဆောင်နိုင်သော်လည်း၊ မီလာ ရှိနေခြင်းကြောင့်သာ ရွာကြီးတစ်ခုလုံး အသက်ဆက်နိုင်ပြီး အန်ဒါဆန်၏ အစုလိုက်အပြုံလိုက် သတ်ဖြတ်ခြင်းဘေးမှ ကင်းဝေးနေရသည်ဟု ရွာသားအများစုက ယုံကြည်နေကြသည်၊၊ အရှေ့ရွာနှင့် အနောက်ရွာတို့တွင် စွမ်းအားကြီးမားသော အမျိုးသားများရှိပါက မိမိတို့၏ သမီးပျိုများကို ထိုသူနှင့် လက်ထပ်ထိမ်းမြားပေးရန် ရွာသားများက အလွန်တရာ အားသန်ကြသော ထုံးစံတစ်ခု ရှိသည်၊၊ မီလာသည် အသက် ၄၀ နီးပါး ရှိနေပြီး အိမ်ထောင်မရှိသေးသော်လည်း သူ့တွင် ပေါ်ပေါ်ထင်ထင်ကော တိတ်တဆိတ်ပါ ပတ်သက်နေသော အမျိုးသမီးများစွာ ရှိသည်၊၊ ၎င်းအပြင် သူသည် ရွာသားများကို "ငါ ငယ်ငယ်တုန်းကတော့ဗျာ..." ဟု အမြဲတစေ လေလုံးထွားလေ့ရှိသဖြင့် ဖာမာက သူ့ကို လုံးဝ သဘောမကျခြင်း ဖြစ်သည်၊၊

ဖာမာ၏ မျက်စိထဲတွင်မူ မီလာသည် လေလုံးသာထွားပြီး ဘာမှ လက်တွေ့မလုပ်နိုင်သည့် လူစားမျိုး ဖြစ်သည်၊၊ ထိုသို့မဟုတ်ပါက သူသည် အန်ဒါဆန်ကို အနိုင်ယူခြင်း သို့မဟုတ် မောင်းထုတ်ခြင်း ပြုလုပ်ခဲ့ပြီး ဖြစ်ရမည်၊၊ သို့မှသာ ရွာသူရွာသားများအနေဖြင့် "ဝံပုလွေဆိုး ပင်လယ်ဓားပြဂိုဏ်း" ထံသို့ လစဉ်လတိုင်း အရှက်တကွဲ ဆက်ကြေး ပေးဆောင်နေရမည့် ဘေးမှ ကင်းဝေးမည် မဟုတ်ပါလား၊၊ အမှန်စင်စစ် ဖာမာသည် မီလာက ရွာသူရွာသားများအတွက် စဉ်းစားပေးသည်ဟု လုံးဝမယုံကြည်ချေ၊၊ သူသည် မိမိ၏အစွမ်းကို အသုံးချကာ နာမည်ကျော်ကြားမှုနှင့် အမျိုးသမီးများကိုသာ ရယူလိုခြင်း ဖြစ်သည်၊၊

သို့ဖြစ်၍ ဖာမာသည် တိတ်တဆိတ်ပင် အခြားကျွန်းများသို့ သွားရောက်ကာ အန်ဒါဆန်ကို ရင်ဆိုင်ရန်အတွက် စွမ်းအားရှင် စစ်သည်တော် သုံးဦးကို လိုက်လံရှာဖွေခဲ့ဖူးသည်၊၊ ထိုစစ်သည်တော် သုံးဦးအနက် တစ်ဦးမှာ ခွန်အားကြီးမားမှုကြောင့် ကျော်ကြားပြီး၊ တစ်ဦးမှာမူ အလျင်အမြန်နှုန်းကြောင့် လူသိများကာ၊ ကျန်တစ်ဦးကမူ သူနေထိုင်ရာ ကျွန်းတစ်ကျွန်းလုံးတွင် တစ်ကြိမ်မျှ မရှုံးဖူးကြောင်း ကြွေးကြော်ထားသူ ဖြစ်သည်၊၊ ဖာမာသည် ရွာကို ဘေးအန္တရာယ်မှ ကင်းဝေးစေရန်အတွက် ထိုသူများကို ငွေအမြောက်အမြား ကြိုတင်ပေးချေခဲ့သည်၊၊ အန်ဒါဆန် ဆက်ကြေးလာကောက်သည့်အခါ ၎င်းတို့ဘက်က ရွာသားများ ငှားရမ်းထားခြင်း ဖြစ်ကြောင်း အန်ဒါဆန် မရိပ်မိစေရန်နှင့် ရွာသားများ သတ်ဖြတ်မခံရစေရန်အတွက် ပရိယာယ်ဖြင့် ပြဿနာရှာ တိုက်ခိုက်ခိုင်းခဲ့သည်၊၊

သို့သော်လည်း ထိုစစ်သည်တော် သုံးဦးအနက် တစ်ဦးမှာ အန်ဒါဆန်၏ ကြောက်မက်ဖွယ်ကောင်းသော စွမ်းအားကို မြင်တွေ့လိုက်ရသည်နှင့် တပြိုင်နက် ထိတ်လန့်တုန်လှုပ်စွာ ထွက်ပြေးသွားခဲ့ပြီး၊ ကျန်ရှိသော နှစ်ဦးကိုမူ အန်ဒါဆန်က သုံးမိနစ်ပင်မပြည့်သော အချိန်အတွင်း အလွယ်တကူ သတ်ဖြတ်ပစ်လိုက်တော့သည်၊၊ ထိုအချိန်မှစ၍ အန်ဒါဆန်ကို မည်သူမျှ မပြိုင်ဝံ့ကြတော့ချေ၊၊ အမှန်စင်စစ် လူတို့၏ စိတ်ထဲတွင် အန်ဒါဆန်၏ အနှိုင်းမဲ့စွမ်းအားအောက်၌ လုံးဝ ဒူးထောက် အရှုံးပေးထားကြပြီး ဖြစ်သည်၊၊

သို့ဖြစ်၍ ပြင်ပမှ ရောက်လာသော လေယင်းက အန်ဒရင့်ကို သတ်ပစ်လိုက်သည်ဟူသော သတင်းကို ကြားလိုက်ရသည့်အခါ ရွာသူရွာသားများကြားတွင် ဂယက်အကြီးအကျယ် ရိုက်ခတ်သွားခြင်း ဖြစ်သည်၊၊ ရွာရှိ အသက်သုံးနှစ်အရွယ် ကလေးငယ်ပင်လျှင် အစ်ကိုဖြစ်သူ အန်ဒါဆန်သည် ညီဖြစ်သူထက် အဆပေါင်းများစွာ ပိုမိုသန်မာကြောင်း သိရှိကြသည်၊၊ သို့ဖြစ်ရာ အန်ဒရင့်ကို သတ်လိုက်ခြင်းသည် ဘေးအန္တရာယ်ကို ဖယ်ရှားလိုက်ခြင်းမဟုတ်ဘဲ ကပ်ဆိုးကြီးကို ဆွဲခေါ်လိုက်သကဲ့သို့ ဖြစ်နေသည်၊၊ ဤသည်ကား မိုက်မဲသော လုပ်ရပ်ကြောင့် ဘေးဆိုးကြီး ကျရောက်လာရခြင်းပင် ဖြစ်သည်၊၊

ထို့ကြောင့် ရွာသူရွာသားများသည် ရွာကို အန်ဒါဆန် သွေးချောင်းစီးအောင် မသတ်ဖြတ်စေရန်အတွက် လေယင်းကို မီလာက အနိုင်ယူပြီး အန်ဒါဆန်ထံသို့ ဖမ်းဆီးအပ်နှံပေးရန် တောင်းဆိုကြတော့သည်၊၊ တစ်ဖက်တွင်လည်း မီလာသည် အန်ဒရင့်ကို အနိုင်ယူခဲ့သော ဤကောင်လေးတွင် မည်မျှအထိ စွမ်းအားရှိသည်ကို ကိုယ်တိုင် မြင်တွေ့လိုသဖြင့် ဝမ်းမြောက်နေခဲ့သည်၊၊

ယနေ့တွင် လေယင်းသည် လေ့ကျင့်မှုများ ပြုလုပ်ရန်အတွက် ရွာနောက်ဖေးရှိ တောင်တန်းများဆီသို့ သွားရန် ပြင်ဆင်နေစဉ် လမ်းခုလတ်၌ မီလာနှင့် လူအုပ်ကြီးက တားဆီးခြင်း ခံလိုက်ရသည်၊၊

လူအများအပြားကို မြင်ရသည့်အခါ လေယင်းက "မင်းတို့ ဘာလုပ်နေကြတာလဲ... ဘာကိစ္စရှိလို့လဲ..." ဟု မေးလိုက်သည်၊၊

ခေါင်းဆောင်ဖြစ်သူ မီလာက "ကောင်လေး... မင်း တော်တော်လေး စွမ်းတယ်လို့ ငါကြားထားတယ်၊ ဒါပေမဲ့ မင်း အန်ဒရင့်ကို သတ်ပြီး လူစွမ်းကောင်းလုပ်လိုက်တာက ငါတို့ကို ဘယ်လောက်တောင် ဒုက္ခရောက်အောင် လုပ်လိုက်လဲဆိုတာ မင်းသိရဲ့လား၊၊" ဟု ဆိုသည်၊၊

"ဟုတ်တယ်၊၊ မင်း ငါတို့ကို ဘယ်လောက်တောင် ကပ်ဆိုးကြီး သယ်ဆောင်လာပေးတယ်ဆိုတာ သိရဲ့လား၊၊" ဟု နောက်ကွယ်မှ ရွာသားများကလည်း ဝိုင်းပြောကြသည်၊၊

လေယင်းကမူ အလေးမထားသော လေသံဖြင့် "ငါ အန်ဒါဆန်ကို မနှိမ်နင်းရသေးသရွေ့ ဒီနေရာကနေ လုံးဝ ထွက်မသွားဘူးလို့ ရွာလူကြီးကို ပြောထားပြီးသားပဲ၊၊" ဟု ပြန်ပြောလိုက်သည်၊၊

သူ၏စကားကို ကြားလိုက်ရသည့်အခါ ရွာသားများမှာ အံ့အားသင့်သွားကြပြီးနောက် တစ်ပြိုင်နက်တည်း တဟားဟားနှင့် ဝိုင်းဝန်း လှောင်ရယ်ကြတော့သည်၊၊

"ဒီကောင်... သူ အန်ဒါဆန်ကို အနိုင်ယူမယ်လို့ ပြောလိုက်တာလား၊၊"

"တကယ့် ရယ်စရာပဲ၊၊"

"မင်း အန်ဒရင့်ကို နိုင်ရုံနဲ့ အန်ဒါဆန်ကို နိုင်မယ်လို့ မထင်နဲ့၊ အဲဒီ ညီအစ်ကို နှစ်ယောက်က စွမ်းရည်ချင်း လုံးဝ မတူဘူး၊၊"

"ကျေးဇူးမသိတတ်တဲ့ ကောင်လေး..."

လူတိုင်းက တစ်ယောက်တစ်ပေါက်ဖြင့် အထင်သေးစော်ကားသော စကားလုံးများကို ဝိုင်းဝန်း ပြောဆိုကြသည်၊၊ လေယင်းသည် သူတို့ကို အာရုံမစိုက်လိုသဖြင့် ရှေ့သို့ ဆက်လက်လျှောက်လှမ်းရန် ပြင်သော်လည်း မီလာက ရှေ့ကပိတ်၍ တားဆီးလိုက်ပြန်သည်၊၊

လေယင်းက "မင်း ဘာလုပ်ချင်နေတာလဲ၊၊" ဟု မေးလိုက်သည်၊၊

မီလာက အေးစက်စွာ ပြုံးလျက် "မင်း အားလုံး ကြားတယ် မဟုတ်လား၊ ငါတို့က မင်းကို လုံးဝ မယုံဘူး၊ မင်းလို နို့အနံ့မစင်သေးတဲ့ ကောင်လေးက အန်ဒါဆန်ကို အနိုင်ယူဖို့ ကြိုးစားတာက စိတ်ကူးယဉ် အိပ်မက်သက်သက်ပဲ၊၊" ဟု ဆိုသည်၊၊

လေယင်းကလည်း လှောင်ပြုံးဖြင့် "သူတစ်ပါးအကြောင်းကို မင်းက လာပြီး ဝေဖန်စရာ မလိုပါဘူး၊ ပြီးတော့ ငါက ရွာလူကြီးကို ကတိပေးထားတာ၊ မင်းကို ပေးထားတာ မဟုတ်ဘူး၊ ဒါကြောင့် မင်း ယုံတာ မယုံတာက ငါနဲ့ ဘာမှမဆိုင်ဘူး၊၊" ဟု ပြန်လည် တုံ့ပြန်လိုက်သည်၊၊

"ရိုင်းလှချေလား၊၊ ကြည့်ရတာ ငါ မင်းကို သတ်ပြီး အန်ဒါဆန်ဆီပဲ လက်ဆောင်အဖြစ် ပို့ပေးရတော့မယ် ထင်တယ်၊၊" မီလာသည် ရက်စက်သော အမူအရာဖြင့် တိုက်ခိုက်မည့် အနေအထားကို ပြင်ဆင်လိုက်သည်၊၊

၎င်းတို့၏ မရိုးသားသော ရည်ရွယ်ချက်ကို မြင်ရသည့်အခါ လေယင်းကလည်း အားနာနေမည် မဟုတ်ချေ၊ "မင်းမှာ အဲဒီလို လုပ်နိုင်တဲ့ စွမ်းအားရှိတယ်လို့ ထင်ရင်လည်း ဝင်လာပြီး စမ်းကြည့်လိုက်လေ၊၊"

"တကယ့်ကို မောက်မာတဲ့ကောင်ပဲ၊ သူ့ကို ပညာပေးလိုက်စမ်း၊၊"

"ဒီကောင်ကို ဖမ်းရမယ်၊၊"

"သူ့ကို ရှင်းပစ်လိုက်၊၊"

ရွာသူရွာသားများကလည်း မီလာ၏ဘက်မှ ဝိုင်းဝန်း အော်ဟစ် အားပေးကြသည်၊၊

"သေပေတော့ ကောင်လေး၊၊"

စကားဆုံးသည်နှင့် မီလာသည် ခြေလှမ်းကျဲဖြင့် လေယင်း၏ နံဘေးဆီသို့ လွှဲကန်ပစ်လိုက်တော့သည်၊၊ လေယင်းသည် သူ၏ ချက်ကရာ များကို လက်ဝဲဘက် လက်မောင်းတွင် စုစည်းပြီး ထိုကန်ချက်ကို ခံစစ်အဖြစ် ခုခံလိုက်သည်၊၊ မည်သို့ပင်ဖြစ်စေ အုပ်စုထဲမှ ပြိုင်ဘက်သည် ဝါရင့် ရေတပ်ဒုတိယဗိုလ်မှူးဟောင်း တစ်ဦး ဖြစ်သည်၊၊ လေယင်းအနေဖြင့် မီလာသည် ရေတပ်၏ ခြေလှမ်းခြောက်သွယ် သိုင်းပညာကိုပင် တတ်မြောက်ထားသည်ဟု ကြားသိထားသဖြင့် ဤသည်မှာ သာမန်လူတစ်ယောက်၏ တိုက်ခိုက်မှု မဟုတ်ကြောင်း ရိပ်မိသည်၊၊

အမှန်စင်စစ် ဤကန်ချက်မှာ လေယင်း၏ စွမ်းအားကို စမ်းသပ်သည့် တိုက်ခိုက်မှုမျှသာ ဖြစ်သည်၊၊ သူသည် ဤကောင်လေး၏ အစွမ်းကို မြင်တွေ့လိုခြင်းဖြစ်သော်လည်း ဤမျှလောက် လွယ်ကူစွာဖြင့် ခုခံနိုင်လိမ့်မည်ဟု မမျှော်လင့်ထားခဲ့ချေ၊၊

နောက်တစ်ဆင့်အနေဖြင့် မီလာသည် သူ၏ အကောင်းဆုံးသော တိုက်ကွက်ကို ထုတ်ဖော်လိုက်တော့သည်၊၊

"ခြေလှမ်းခြောက်သွယ် သိုင်းကွက် - လက်ချောင်းသေနတ်၊၊"

မီလာသည် သူ၏ ညာလက်ညှိုးကို ဆန့်ထုတ်လိုက်ပြီး လေယင်း၏ နှလုံးသား တည့်တည့်ဆီသို့ ပြင်းထန်စွာ ထိုးစိုက်ပစ်လိုက်သည်၊၊ ထိုအသံမှာ သံချောင်းအချင်းချင်း ရိုက်ခတ်မိသကဲ့သို့ မြည်ဟီးသွားတော့သည်၊၊ မီလာ၏ လက်ညှိုးသည် လေယင်း၏ ရင်ဘတ်လက်ဝဲဘက်တွင် ထောက်မိနေသော်လည်း သူ၏လက်ချောင်းမှာ မီလီမီတာဝက်မျှပင် ရှေ့သို့ တိုးဝင်နိုင်ခြင်း မရှိချေ၊၊

အကြောင်းမှာ လေယင်းသည် သူ၏ နှလုံးသား တည်ရှိရာ နေရာတွင် ချက်ကရာများကို ချက်ချင်း စုစည်းလိုက်ပြီး တိုက်ခိုက်မှုကို ခုခံရန်အတွက် မမြင်နိုင်သော သံချပ်ကာအလွှာတစ်ခုအဖြစ် ပြုလုပ်လိုက်သောကြောင့် ဖြစ်သည်၊၊ မီလာက သူ၏ သေရေးရှင်ရေး တည်ရှိရာ အသက်သွေးကြောနေရာကို တည့်တည့်ကြီး တိုက်ခိုက်လာသည်ကို မြင်ရသည့်အခါ လေယင်းသည်လည်း ဆိတ်ဆိတ်နေ၍ မရတော့ချေ၊၊

"လျှပ်စီးစွမ်းရည် - ချီဒိုရီ..."

လေယင်းသည် မီလာကို ပြန်လည် တိုက်ခိုက်ရန် ပြင်ဆင်နေစဉ်မှာပင် မလှမ်းမကမ်းမှ အဖိုးအိုတစ်ဦး အပြေးအလွှား ရောက်ရှိလာခဲ့သည်၊၊ ၎င်းကား ရွာလူကြီး ဖာမာ ပင် ဖြစ်သည်၊၊

သူသည် နှစ်ဦးသားကြားသို့ ပြေးဝင်လာပြီး "မင်းတို့ ဘာလုပ်နေကြတာလဲ၊၊" ဟု အော်ဟစ် မေးမြန်းလိုက်သည်၊၊

မီလာက လူလိမ်က လူမိသကဲ့သို့ အမူအရာဖြင့် "ရွာလူကြီး... ဒီကောင်က အန်ဒရင့်ကို နိုင်ထားလို့ ဆိုပြီး တော်တော်လေး မောက်မာနေတာဗျ၊ ဒါကြောင့် ခင်ဗျားအတွက် ငါ သူ့ကို သင်ခန်းစာ ပေးနေတာ၊၊" ဟု လှည့်ပတ်ပြောဆိုသည်၊၊

"မင်းက ဘယ်သူ့ကို သင်ခန်းစာ ပေးချင်တာလဲ၊ သတ္တိရှိရင် နောက်တစ်ကြိမ် ထပ်ပြောစမ်း၊၊" လေယင်းသည် ထိုစကားကြောင့် အလွန်တရာ ဒေါသထွက်သွားရသည်၊၊ သူသည် ခန္ဓာကိုယ်တစ်ခုလုံးတွင် ချက်ကရာများကို ဒေါသတကြီး စီးဆင်းစေလျက် မီလာကို ပညာပေးရန် အသင့်ပြင်လိုက်သည်၊၊

မီလာက နှာခေါင်းရှုံ့လျက် "မိုက်မဲတဲ့ ကောင်လေး... ငါ ပြောတာက..."

"အားလုံး ပါးစပ်ပိတ်ထားကြစမ်း၊၊" ဖာမာသည် နှစ်ဦးသား၏ ရန်ဖြစ်သံကို အော်ဟစ်၍ ဖြတ်တောက်လိုက်တော့သည်၊၊

ဖာမာ တကယ့်ကို စိတ်ဆိုးဒေါသထွက်နေသည်ကို မြင်ရသည့်အခါ မီလာသည်လည်း ဆက်လက်၍ စကားမဆိုတော့ချေ၊၊ ပုံမှန်အားဖြင့် မီလာသည် အလွန်မောက်မာသူ ဖြစ်သော်လည်း လေးစားခြင်းခံရသော ရွာလူကြီးအပေါ်တွင်မူ မည်သို့မျှ မပြုမူဝံ့ပါချေ၊၊