အခန်း (၁) - ယာဉ်ကြောပိတ်ဆို့မှုလား။
သာမန်အိုတာကု(အန်နမီ နှင့် မန်ဂါ ဝါသနာရှင်) တစ်ယောက်အနေနဲ့ ဇန်လန်က သူ့ရဲ့လက်ရှိဘဝလေးကို ကျေနပ်နေပါတယ်။ အနည်းဆုံးတော့ သူက ညည်းတွားလေ့သိပ်မရှိဘူးလေ။
နေ့လည်ဘက် အလုပ်သွားရတာလည်း ပျော်စရာကောင်းသလို၊ ညဘက်အလုပ်ဆင်းချိန်မှာတော့ အွန်လိုင်းစာရေးဆရာတစ်ယောက်အဖြစ် ပြောင်းလဲသွားပြီး သူ့ရဲ့စာဖတ်သူတွေအတွက် ဇာတ်လမ်းတွေမှန်မှန်ရေးကာ စာမူတွေ စုဆောင်းထားတတ်တယ်။
အခုလောလောဆယ် သူက နာမည်မကြီးသေးပေမယ့် အနာဂတ်မှာတော့ အောင်မြင်ရမယ်လို့ အခိုင်အမာ ယုံကြည်ထားတယ်။
ဒါပေမဲ့ အခုတော့ သူနည်းနည်း စိတ်အနှောင့်အယှက် ဖြစ်နေတယ်။
ဖုန်းစခရင်ပေါ်မှာ စာမျက်နှာတစ်ခု ပေါ်လာပြီး အပြာနဲ့ အနီရောင် အရောင်တွေ တဖျပ်ဖျပ်လင်းနေကာ စာအုပ်ခေါင်းစဉ်က "နာရူတိုကမ္ဘာဆီသို့ ခရီးစဉ်" တဲ့။
ဒါက အဓိကမဟုတ်သေးဘူး။ အဓိကက အဲ့ဒီစာမျက်နှာပေါ်က [YES] ဆိုတဲ့ ခလုတ်ကြီးက ရူးသွပ်နေတဲ့အလား တဖျပ်ဖျပ်လင်းနေပြီး၊ "နှိပ်လိုက်တာနဲ့ သင့်ကို ခေါ်ဆောင်သွားမယ်" ဆိုတဲ့အထူးပြုလုပ်ချက် စာတန်းတွေကလည်း မရပ်မနား ပျံဝဲနေတာပဲ။
သွားသေလိုက်ပါလား!
ဒီပရိုဂရမ်မာတွေက တနေ့တခြား အရည်အချင်း ပိုပိုကျလာတာပဲ!
စိတ်ထဲမှာတော့ အော့နှလုံးနာနေပြီး [NO] ခလုတ်ကို နှိပ်ချင်ပေမယ့်၊ လက်ချောင်းတွေက လေထဲမှာ တန့်နေပြီး အောက်ကို ကျမလာခဲ့ဘူး။
ဘာတေဖြစ်နေတာလဲ၊ [NO] ခလုတ်ကို ပရိုဂရမ်မာတွေ စားပစ်လိုက်ပြီလား။
တောက်... ဒါက အတင်းအဓမ္မ ဖိအားပေးနေတာပဲ မဟုတ်လား!
ငါ လက်မခံနိုင်ဘူး!
မျက်လုံးကိုပွတ်ကာ ဖုန်းစခရင်နားကို မျက်နှာကပ်ပြီး သေသေချာချာ စိုက်ကြည့်လိုက်တယ်။
နောက်ဆုံးတော့ ညာဘက်အောက်ထောင့်နားမှာ အရမ်းသေးငယ်တဲ့ ကြက်ခြေခတ် ခလုတ်လေးတစ်ခုကို သူရှာတွေ့သွားတယ်။ အပြာရောင်ဘောင်၊ အနီရောင်နောက်ခံနဲ့ အဲ့ဒီပုံရိပ်လေးက မှေးမှိန်နေပြီး နောက်ခံအရောင်နဲ့ တစ်သားတည်းကျနေအောင် ဖုံးကွယ်ထားတာ။
ငါ့ကိုများ လာပြီး ကလေးကွက်တွေ နင်းနေသေးတယ်။
လွန်စွာကျေနပ်အားရသွားတဲ့ စိတ်နဲ့အတူ၊ သူက စာမျက်နှာကိုပိတ်ဖို့ ကြက်ခြေခတ်ခလုတ်ကို မဆိုင်းမတွ နှိပ်လိုက်တယ်။
ဖုန်းစခရင်က တဖျပ်ဖျပ်လင်းကာ မည်းမှောင်သွားပြီး၊ အကြောင်းပြချက်မရှိဘဲ ခဏတုန်ခါသွားတယ်။ ပြီးတာနဲ့ ပြန်ပွင့်လာပြီး အဖြူရောင်နောက်ခံပေါ်မှာ အမည်းရောင် စာကြောင်းတစ်ကြောင်း ပေါ်လာတယ်။
ဘဝရဲ့ အဓိပ္ပါယ်ကို နားလည်ချင်ပါသလား။ ပိုပြီး စိတ်လှုပ်ရှားစရာကောင်းတဲ့ ဘဝမျိုးကို ဖြတ်သန်းချင်ပါသလား။
YES/YES
ဒီကောင်တွေ တော်တော် ကောက်ကျစ်တာပဲ!
ဂိမ်းပရိုဂရမ်မာတွေအပေါ် ဒေါသထွက်နေတဲ့ ဇန်လန်က [YES] နှစ်ခုထဲက တစ်ခုကို လက်မနဲ့ အားကုန်သုံးပြီး ဖိနှိပ်ပစ်လိုက်တယ်။
အင်မတန် ကြောက်မက်ဖွယ်ကောင်းတဲ့ ကိစ္စတစ်ခု ဖြစ်ပေါ်လာတော့တယ်။
သူ့... သူ့ရဲ့ မိုဘိုင်းဖုန်း အင်တာဖေ့စ်က... တဖျပ်ဖျပ်လင်းနေတဲ့ ဘက်ထရီအားသွင်းပုံစံအဖြစ်... ပြောင်းလဲသွားတယ်။
ဒါက ဖုန်းအားသွင်းတဲ့ အင်တာဖေ့စ်ကြီးလေ။
"ပျင်းစရာကြီး၊ ဒီလိုလှည့်ကွက်မျိုးကို သုံးနေတုန်းပဲလား။"
ပါးစပ်ကနေ ညည်းတွားလိုက်ပေမယ့်၊ လက်ထဲက ဖုန်းရဲ့ ဘက်ထရီက 0% ကနေ 100% ကို ချက်ချင်းတက်သွားတာကိုတော့ သူ သတိမထားမိလိုက်ဘူး။ အားသွင်းတဲ့ ပရိုဂရမ်ကလည်း ရပ်တန့်မယ့် အရိပ်အယောင် မပြတဲ့အတွက် နောက်ဆက်တွဲရလဒ်ကတော့...
"ဘုန်း!"
ဖုန်းက ပေါက်ကွဲသွားခဲ့ပြီး၊ အနီးကပ်ဆုံးဖြစ်နေတဲ့ ဇန်လန်ကတော့ ပထမဆုံး သားကောင်ဖြစ်သွားတာ သဘာဝပါပဲ။ သူ သတိလစ်မသွားခင် နောက်ဆုံးဝင်လာတဲ့ အတွေးကတော့ တစ်ခုတည်းသာ။
"ဆန်ရှင်းက ဗုံးထုတ်လုပ်တဲ့ စစ်လက်နက်စက်ရုံများ ဖွင့်ထားလို့လား။"
နောက်နေ့မှာတော့ ဇန်လန်ရဲ့ နာမည်ဟာ သတင်းစာကြီးတွေရဲ့ ခေါင်းကြီးပိုင်းတွေမှာ နေရာယူလာခဲ့တယ်။ အကြောင်းအရာကတော့ အောက်ပါအတိုင်း ဖြစ်ပါတယ်။
[XMမြို့မှ အမျိုးသားတစ်ဦး ဆန်ရှင်းဖုန်း အားသွင်းရာမှ ပေါက်ကွဲမှုဖြစ်ပွား]
[ဆန်ရှင်းဖုန်း၏ ပေါက်ကွဲမှုစွမ်းအား စံချိန်သစ်တင်]
[ဆန်ရှင်းမိုဘိုင်းဖုန်း၊ မိုဘိုင်းဖုန်းလောကထဲက "တိုက်လေယာဉ်"]
သေချာတာပေါ့၊ ဇန်လန်တစ်ယောက် ဒီသတင်းတွေကို မြင်တွေ့ခွင့်မရခဲ့သလို၊ အခုအချိန်မှာ ဒါတွေကို ဂရုစိုက်နေဖို့လည်း သူ့မှာ အချိန်မရှိဘူးလေ။
သူ့ဆီမှာ အသိစိတ် နည်းနည်းကျန်နေသေးတာကို သူသတိထားမိတယ်။ ဒါပေမဲ့ ဦးနှောက်ထိခိုက်မှု ကြောင့်လည်း ဖြစ်နိုင်တယ်။ ဘာလို့လဲဆိုတော့ သူ့ခေါင်းထဲမှာ စကားသံတစ်ခု ထွက်ပေါ်နေတယ်လို့ ခံစားနေရလို့ပဲ။
"တီ၊ ပိုင်ရှင်ကို တွေ့ရှိပါပြီ၊ သတ်မှတ်ချက်များနှင့် ကိုက်ညီပါသည်။ စနစ် အသိအမှတ်ပြုခြင်း... စနစ် အသိအမှတ်ပြုခြင်း ပြီးဆုံးပါပြီ။"
"တီ၊ တစ်ကြိမ်သုံး ကူးပြောင်းခြင်း စနစ်ကို စတင်နေပါပြီ၊ ပစ်မှတ် - နာရူတို ကမ္ဘာ"
"တီ၊ အမည်မသိ အတားအဆီးတစ်ခုနှင့် ကြုံတွေ့ရပါသည်။ လမ်းကြောင်းသစ်ကို စီစဉ်နေပါသည်... လမ်းကြောင်းသစ် စီစဉ်ပြီးပါပြီ..."
"တီ၊ အမည်မသိ အတားအဆီးတစ်ခုနှင့် ကြုံတွေ့ရပါသည်။ လမ်းကြောင်းသစ်ကို စီစဉ်နေပါသည်... လမ်းကြောင်းသစ် စီစဉ်ပြီးပါပြီ..."
"တီ၊ အမည်မသိ အတားအဆီးတစ်ခုနှင့် ကြုံတွေ့ရပါသည်။ လမ်းကြောင်းသစ်ကို စီစဉ်နေပါသည်... "နာရူတို" ကမ္ဘာသို့ ဆင်းသက်ရန် စနစ်တွင် စွမ်းအင် မလုံလောက်ပါ။"
"တီ၊ အရေးပေါ် စနစ်ယန္တရားကို ဖွင့်လိုက်ပါပြီ၊ ပစ်မှတ်ကမ္ဘာကို ကျပန်းရွေးချယ်နေပါသည်..."
"တီ၊ ပစ်မှတ်ကို အတည်ပြုပြီးပါပြီ - "မာဗယ်""
"တီ၊ မာဗယ်သို့ ရောက်ရှိပါပြီ၊ တစ်ကြိမ်သုံး ကူးပြောင်းခြင်းစနစ် ကိုယ်တိုင်ဖျက်ဆီးခြင်း... ကိုယ်တိုင်ဖျက်ဆီးခြင်း ပြီးဆုံးပါပြီ၊ ပိုင်ရှင်မှ ညွှန်ကြားချက်အသစ်များ ပေးပါရန်။"
သူ့မှာ ဦးနှောက်ထိခိုက်မှု ဖြစ်နေတယ်လို့ သူစတင်တွေးမိလာတယ်။ သူကြားနေရတာတွေက ပုံမှန်မဟုတ်ဘူးလေ။ ဦးနှောက်ထိခိုက်မှု ဖြစ်ရင် "ဝှီ" ဆိုတဲ့ အသံတွေကိုပဲ ကြားရတတ်ပြီး၊ အခုလို စနစ်တကျ အသံတွေ ကြားနေဖို့ဆိုတာ မဖြစ်နိုင်ဘူးလို့ သူကြားဖူးတယ်။ ဒီအချိန်မှာပဲ ပြဿနာတစ်ခုကို သူသဘောပေါက်သွားတယ်။
ဒါက... တစ်ခုခုလွဲနေပြီ မဟုတ်လား။
သူ့ခေါင်းထဲတွင် "ယာဉ်ကြောပိတ်ဆို့မှု" ကဲ့သို့ ရှည်လျားသော အချိန်ကာလတစ်ခု ကုန်ဆုံးသွားပြီးနောက်၊ ခန္ဓာကိုယ်က အရမ်းပင်ပန်းနေတယ်လို့ ခံစားလာရတာကြောင့် သူအိပ်ပျော်သွားခဲ့တယ်။ အေးစက်စက် လေပြေတစ်ချက် တိုက်ခတ်လာပြီး၊ သူ့ခန္ဓာကိုယ်ကြီး တုန်ယင်လာကာ မှိုတက်နေတဲ့ အနံ့ဆိုးကြီး နှာခေါင်းထဲ တိုးဝင်လာချိန်မှသာ သူသတိပြန်ရလာတော့တယ်။
အိပ်ချင်မူးတူးစိတ်တွေက ချက်ချင်းဆိုသလို လွင့်ပြယ်သွားတယ်။
"အေးလိုက်တာ၊ ပြီးတော့ နံစော်နေတာပဲ။"
ပင်ပန်းနွမ်းနယ်စွာ မျက်လုံးဖွင့်လိုက်ပြီး ထရပ်ဖို့ ကြိုးစားလိုက်ပေမယ့်၊ ခန္ဓာကိုယ်က သူ့အမိန့်ကို မနာခံဘူးဆိုတာ သူတွေ့လိုက်ရတယ်။ ပိုတိတိကျကျ ပြောရရင်၊ ဦးနှောက်က ပေးတဲ့ ညွှန်ကြားချက်တွေကို သူ့ခန္ဓာကိုယ်က အဆုံးသတ် မလုပ်ဆောင်နိုင်တာပါ။
မျက်တောင်တဖျပ်ဖျပ်ခတ်ကာ သူ့ခန္ဓာကိုယ်ကို သူငုံ့ကြည့်လိုက်တယ်။ ဒါက အရမ်းရိုးရှင်းတဲ့ လှုပ်ရှားမှုတစ်ခု ဖြစ်ပေမယ့်၊ အခုအချိန်မှာတော့ ခွန်အားတွေ အကုန်ထုတ်သုံးလိုက်ရသလိုမျိုး အင်မတန် ခက်ခဲပင်ပန်းလွန်းလှတယ်။
ဇန်လန် မြင်လိုက်ရတာက ကိုယ်လုံးတီးဖြစ်နေတဲ့ သူ့ခန္ဓာကိုယ်၊ နုနယ်လွန်းတဲ့ ခြေလက်တွေနဲ့ ဖွံ့ဖြိုးမှုမရှိသေးတဲ့ ဇန်လန်အသေးစားလေးပါပဲ။
"ဘာတွေဖြစ်ကုန်တာလဲ။ ငါက ဘယ်လိုလုပ် အဝတ်မပါတဲ့ကိုယ်တုံးလုံး ကလေးလေးဖြစ်သွားရတာလဲ" ဒီအခိုက်အတန့်မှာတော့ သူ့ရင်ထဲမှာ အတော်လေး ဆွံ့အသွားခဲ့တယ်။
ဒီအဖြစ်အပျက်ကို နားလည်နိုင်ဖို့ အချိန်အတော်ကြာ ယူလိုက်ရပြီးနောက်၊ ဒီအမှန်တရားကို တဖြည်းဖြည်း လက်ခံနိုင်သွားတယ်။ သူဘေးဘီဝဲယာကို ကြည့်လိုက်တော့ နှာခေါင်းထဲ ဝင်လာတဲ့ အနံ့ဆိုးရဲ့ ဇာစ်မြစ်ကိုသိလိုက်ရတယ်။
အမှိုက်ပုံးရဲ့ အနံ့က ဒီလောက်တောင် ဆိုးဝါးနေလိမ့်မယ်လို့ မထင်ထားခဲ့ဘူး။
"ဒါက ဘာတစ္ဆေခြောက်တာလဲ။ ခုနက ငါကြားလိုက်ရတဲ့ "စနစ်" ဆိုတဲ့ တစ္ဆေများလား။" ဟု သူက လျှောက်တွေးပြီး ခန့်မှန်းလိုက်တယ်။
"တီ၊ ပိုင်ရှင်၏ လက်ရှိအခြေအနေမှာ စနစ်၏ လုပ်ဆောင်မှုကြောင့် ဖြစ်ပါသည်။" ခံစားချက်ကင်းမဲ့တဲ့ ပြတ်တောင်းတောင်း အသံတစ်ခု သူ့ခေါင်းထဲကနေ ထွက်ပေါ်လာတယ်။
"ဘယ်သူလဲ။ ဘယ်သူ စကားပြောနေတာလဲ။ ဘာစနစ်လဲ။" ဇန်လန် အလွန်အံ့သြသွားတယ်။
"တီ၊ မင်္ဂလာပါ ပိုင်ရှင်၊ စနစ်မှ သင့်မေးခွန်းကို ဖြေကြားပေးနေခြင်း ဖြစ်ပါသည်။"
"စနစ် ဟုတ်လား။ ဘာစနစ်လဲ။ ဘယ်ကနေ ရောက်လာတာလဲ။ ဘယ်ကိုသွားမှာလဲ။ မင်းမိသားစုမှာ လူဘယ်နှယောက်ရှိလဲ။ အိမ်မှာ နေရာဘယ်လောက်ရှိလဲ။ အာ... အင်း?"
"တီ၊ စနစ်၏ အမည်အပြည့်အစုံမှာ "နာရူတိုကမ္ဘာ ကူးပြောင်းရေးစနစ်" ဖြစ်ပြီး၊ စနစ်ဟု အတိုကောက်ခေါ်ဆိုပါသည်။ စနစ်များကို ဖန်တီးရာ နေရာမှ ထွက်ခွာလာခြင်းဖြစ်ကာ၊ မူလပစ်မှတ်မှာ "နာရူတို" ကမ္ဘာသို့ သွားရောက်ရန်ဖြစ်သော်လည်း၊ စွမ်းအင်မလုံလောက်မှုကြောင့် "မာဗယ်" တွင် ကျန်ရစ်ခဲ့ရခြင်း ဖြစ်ပါသည်။ စနစ်တွင် အိမ်မရှိပါသဖြင့် မိသားစုနှင့် လယ်ယာမြေများလည်း မရှိပါ။"
"နာရူတိုကမ္ဘာ ကူးပြောင်းရေးစနစ် ဟုတ်လား။ တကယ်ကြီးလား။ သောက်ကျိုးနည်း... စနစ်၊ ငါ ကူးပြောင်းလာတာလား။ ဒါမှမဟုတ် မာဗယ်ကို သွားမှာလား။" ဒီအချိန်မှပဲ ဇန်လန်တစ်ယောက် အသိဝင်လာတော့တယ်။
"တီ၊ မှန်ကန်ပါသည်။ ပိုင်ရှင်သည် လက်ရှိတွင် မာဗယ် ကမ္ဘာသို့ ရောက်ရှိနေပါသည်။"
"ငါ နည်းနည်းလောက် စဉ်းစားပါရစေဦး..." ဇန်လန်ရဲ့ စိတ်တွေ နည်းနည်း ရှုပ်ထွေးနေပြီး၊ သူ တိတ်တိတ်ဆိတ်ဆိတ် နေဖို့ လိုအပ်နေတယ်။
အချိန်အတော်ကြာတဲ့အထိ သူ့စိတ်တွေ မတည်ငြိမ်သေးပေမယ့်၊ အရိုးကွဲမတတ် တိုက်ခတ်လာတဲ့ လေစိမ်းတွေက အခုချိန်မှာ ပိုအရေးကြီးတဲ့ ကိစ္စတွေ ရှိနေသေးတယ်ဆိုတာကို သူ့ကို သတိပေးနေတယ်။
"စနစ်၊ ငါက ဘာလို့ ကိုယ်တုံးလုံး ကလေးဘဝကို ရောက်သွားပြီး အမှိုက်ပုံးထဲ ရောက်နေရတာလဲ။" ဇန်လန် သူ့ရဲ့အခြေအနေကို နားလည်ဖို့ လိုအပ်နေတယ်။
"တီ၊ စနစ်သည် ကူးပြောင်းခြင်း ပြုလုပ်စဉ်အတွင်း အမည်မသိ အတားအဆီး အများအပြားနှင့် ကြုံတွေ့ခဲ့ရပါသည်။ အကြိမ်ကြိမ် လမ်းကြောင်းပြောင်းပြီးနောက် သိုလှောင်ထားသော စွမ်းအင်မှာ "နာရူတို" ကမ္ဘာသို့ ရောက်ရှိရန် မလုံလောက်တော့ပါ။ မာဗယ် ကမ္ဘာကို ကျပန်းရွေးချယ်ခဲ့ပြီးနောက်၊ ယခုအခါ စွမ်းအင် (၁) မှတ်သာ ကျန်ရှိတော့ပါသည်။"
"အတားအဆီးတွေနဲ့ အကြိမ်ကြိမ် ကြုံရတယ် ဟုတ်လား။ လမ်းကြောင်းတွေ အကြိမ်ကြိမ် ပြောင်းခဲ့တယ် ဟုတ်လား။ သိုလှောင်ထားတဲ့ စွမ်းအင် မလုံလောက်ဘူး ဟုတ်လား။ မင်း ယာဉ်ကြောပိတ်ဆို့နေလို့ လမ်းကြောင်းပြောင်းခဲ့ရတာလား။ ဓာတ်ဆီကုန်သွားတာလား။ စွမ်းအင်မရှိရင်လည်း အားပြန်သွင်းလေ! ဓာတ်ဆီထည့်ရမလား။" ဇန်လန်တစ်ယောက် နည်းနည်း ရူးချင်ချင် ဖြစ်သွားတယ်။
"တီ၊ သတိပေးချက်၊ စွမ်းအင်မလုံလောက်သည့်အခါ စနစ်ကို ပိတ်ပစ်မည် ဖြစ်ပါသည်။ အရေးပေါ် အစီအမံများကို လုပ်ဆောင်ပါ။"
"တီ၊ ပိုင်ရှင်မှာ အလွန်အားနည်းနေသည့်အတွက်၊ အထူး လူသစ်အတွက်လက်ဆောင်များ ပေးပို့နေပါသည်။ ပေးပို့နေစဉ်... လက်ဆောင်များ ပေးပို့ပြီးပါပြီ။"
"တီ၊ လူသစ်အတွက် မစ်ရှင်များ ထုတ်ပြန်ခြင်း။"
အရွယ်မရောက်မီ ကြိုးစားအားထုတ်မှု - ပိုင်ရှင်၏ အသက်သည် တရားဝင် အရွယ်ရောက်သူအဖြစ် စနစ်စတင်ရန် သတ်မှတ်ချက်များ မပြည့်မီခင် စနစ်အတွက် စွမ်းအင်ဖြည့်တင်းပေးပါ။
လက်ရှိ ပြီးမြောက်မှု - 0/100
မစ်ရှင်ဆုကြေး - အရွယ်ရောက်သူ လက်ဆောင်ထုပ် × ၁
"တီ၊ စနစ်၏ စွမ်းအင်သုံးစွဲမှု ပြီးဆုံးသွားပါပြီ၊ စနစ်အား ပိတ်ပါမည်... ပိုင်ရှင် ကံကောင်းစေရန်နှင့် ပျော်ရွှင်သောဘဝကို ပိုင်ဆိုင်နိုင်စေရန် ဆုတောင်းပေးပါသည်။"
"တီ၊ စနစ်ကို ပိတ်လိုက်ပါပြီ။"
ဘာကြီးလည်းကွာဒါက!
စနစ်က... ဒီအတိုင်း လမ်းဘေးမှာ အသက်ငင်သွားတာလား။
ညည်းတွားဖို့ အချိန်မရလိုက်ခင်မှာပဲ၊ နင်ဂျူဆု ရဲ့ အခြေခံလက်သင်္ကေတတွေ၊ ချာကရာ အသုံးပြုပုံတွေ၊ ကိုယ်သုံးကိုယ်ပွားနည်းစနစ် ရဲ့ အဆင့်ဆင့် လုပ်ဆောင်ပုံတွေနဲ့ အခြားအချက်အလက်တွေ အများကြီးက သူ့ခေါင်းထဲကို အလုံးအရင်းနဲ့ ဝင်ရောက်လာခဲ့တယ်။
ကလေးလေးရဲ့ ခန္ဓာကိုယ်က နုနယ်လွန်းပြီး၊ လေအေးတွေထဲမှာ အချိန်အကြာကြီး တုန်ယင်နေခဲ့ရတဲ့အတွက် သူအရမ်းကို ပင်ပန်းနွမ်းနယ်နေပြီ။ အချက်အလက်တွေ တစ်ပုံတစ်ခေါင်းကြီး သူ့ဦးနှောက်ထဲ အတင်းထိုးထည့်ခံလိုက်ရချိန်မှာတော့ သူ့ရဲ့ စိတ်ဓာတ်ခွန်အားတွေ ပိုလို့တောင် ကုန်ခမ်းသွားခဲ့ရတယ်။ မလှုပ်ရှားနိုင်တော့တဲ့ ခန္ဓာကိုယ်ထဲမှာ ရုတ်တရက် ကြီးမားတဲ့ နာကျင်မှုတစ်ခု ပေါ်ပေါက်လာခဲ့တယ်။ ဒီအခြေအနေမှာတော့ ဇန်လန်တစ်ယောက် ဘာမှပြန်မခုခံနိုင်တော့ဘဲ သတိလစ်သွားခဲ့တော့တယ်။
သူ ပြန်နိုးလာချိန်မှာတော့ အချိန်ဘယ်လောက်ကြာသွားပြီလဲဆိုတာ သူ မသိတော့ဘူး။ ကံကောင်းတာတစ်ခုက သူ အမှိုက်ပုံးထဲမှာ မရှိတော့ဘဲ ကလေးပုခက်လေးတစ်ခုထဲကို ရောက်နေခဲ့ပြီ။
ဘေးပတ်ဝန်းကျင်မှာ ဘယ်သူမှ မရှိတာကို မြင်လိုက်ရတော့ ဇန်လန် စိတ်အေးသွားတယ်။ စနစ်ကို တိတ်တဆိတ် အကြိမ်အနည်းငယ် ခေါ်ကြည့်ပြီးတဲ့နောက်၊ သူလုပ်နိုင်တာဆိုလို့ စောစောက လူသစ်အတွက်လက်ဆောင် ဆိုတာကို စတင်လေ့လာဖို့ပဲ ရှိတော့တယ်။
လက်ဆောင်တွင် ပါဝင်သည်မှာ -
ချာကရာ ထုတ်ယူခြင်းနည်းပညာ × ၁
ကိုယ်ပွားဖန်တီးခြင်း × ၁
အသွင်ပြောင်းခြင်း × ၁
ကိုယ်ပွားဂျူဆု × ၁
ခန္ဓာကိုယ်ဖွဲ့စည်းပုံ တိုးတက်မှု × ၁
ရိုးရိုးရှင်းရှင်း ပြောရရင်၊ ဒါက ချာကရာ ထုတ်ယူခြင်းနည်းပညာ၊ ကိုယ်သုံးကိုယ်ပွားနည်းစနစ် နဲ့ ဘာမှန်းမသိတဲ့ ခန္ဓာကိုယ်ဖွဲ့စည်းပုံ တိုးတက်မှု တစ်ခုပါပဲ။ သူသတိမလစ်ခင် ခန္ဓာကိုယ်ကြီး နာကျင်သွားရတဲ့ အကြောင်းရင်းက ဒါဖြစ်နိုင်တယ်လို့ သူတွေးမိလိုက်တယ်။ သူ့ကိုယ်သူ စမ်းသပ်ခံ ကြွက်ဖြူလေးတစ်ကောင်လို အလောတကြီး အသုံးပြုခံလိုက်ရတာပဲ။
ဘာမှန်းမသိတဲ့ ဒီခန္ဓာကိုယ်ဖွဲ့စည်းပုံ တိုးတက်မှု ကလွဲရင်၊ ကျန်တဲ့ လက်ဆောင်တွေနဲ့ ပတ်သက်ပြီး ဇန်လန်ရဲ့ မှတ်ချက်ကတော့ စကားတစ်ခွန်းတည်းပါပဲ။
တော်တော် သောက်သုံးမကျတာပဲ!!!
တခြားဝတ္ထုတွေထဲက ဇာတ်လိုက်တွေကျတော့ ရှာရင်ဂန် တွေ၊ စိန့် ဆေးယာ ရဲ့စွမ်းအားတွေနဲ့ နတ်ဆိုးသီးတွေ ရကြတယ်။ ဘာလို့ သူ့ကျမှ ဒီလောက်အခြေခံကျတဲ့ အရာတွေပဲ ရနေရတာလဲ။
"ငါက သမိုင်းတစ်လျှောက် အဆင်းရဲဆုံး ကူးပြောင်းသူများ ဖြစ်နေမလား။" ဇန်လန် တိတ်တဆိတ် တွေးလိုက်မိတယ်။
ရုတ်တရက် ဇန်လန်ရဲ့ မျက်နှာ ရှုံ့မဲ့သွားပြီး၊ သူ ငြိမ်ငြိမ်မနေနိုင်တော့ဘဲ အသံကုန်ဟစ်ကာ ငိုချလိုက်တော့တယ်။ "ဝါး... အားးး... အားးး!"
ကမန်းကတန်း လျှောက်လာတဲ့ ခြေသံတွေနဲ့အတူ လူဖြူအမျိုးသမီးငယ် တစ်ယောက်က ဇန်လန်ရဲ့ မျက်လုံးလေးတွေကို နမ်းလိုက်တယ်။ သူမက ပါးစပ်ကနေ အင်္ဂလိပ်လို ပြောရင်း ဇန်လန်ကို နှစ်သိမ့်ပေးကာ၊ ဇန်လန်လေးကို အယောင်ယောင်အမှားမှားနဲ့ ပွေ့ချီလိုက်တယ်။ ဒါပေမဲ့ ဇန်လန်ကတော့ စိုးရိမ်တကြီး မျက်နှာနဲ့ "အားးးးးးး!" လို့ အော်ရင်း ထိုလူဖြူအမျိုးသမီးကို လှမ်းရိုက်နေခဲ့တယ်။
ဘာဖြစ်မှန်း သေချာမသိသေးတဲ့ အဲ့ဒီလူဖြူအမျိုးသမီးဟာ သူမရဲ့ ရင်ဘတ်မှာ ရုတ်တရက် ပူနွေးသွားတာကို ခံစားလိုက်ရပြီး၊ တစ်ချိန်တည်းမှာပဲ သူမလက်ထဲက ဇန်လန်လေးကလည်း လှုပ်ရှားမှုတွေ အကုန်ရပ်တန့်သွားတော့တယ်။
သူမ မြင်လိုက်ရတာ မှားများနေသလားဆိုတာ သူမ မသေချာဘူး။ ဘာပဲဖြစ်ဖြစ် အခုမှ မွေးကာစ ကလေးလေး တစ်ယောက်က ရှက်ရွံ့ခြင်းဆိုတာကို ဘယ်လိုလုပ် သိနိုင်မှာလဲ။
သာမန် ကလေးလေးတွေဆိုရင်တော့ သိမှာမဟုတ်ပါဘူး။ ဒါပေမဲ့ အခုချိန်မှာ ဇန်လန်ကတော့ သိနေပါတယ်။ ဘာလို့လဲဆိုတော့... သူ ခုလေးတင် သေးပေါက်ချလိုက်မိလို့ပါပဲ!
တော်တော်ရှက်ဖို့ကောင်းတာပဲ။ နို့ဖြတ်ပြီး ဘောင်းဘီထဲ သေးမပေါက်တော့တာ ဘယ်နှနှစ်တောင် ရှိပြီလဲ မသိဘူး၊ အခုတော့ ဘောင်းဘီထဲ သေးပေါက်ချမိတဲ့ ခံစားချက်ကို သူ ပြန်ခံစားနေရပြီလေ...
သူ့ဘဝသူ ရှက်ရွံ့ပြီး ဝမ်းနည်းပက်လက် ဖြစ်နေတုန်းမှာပဲ၊ ဇန်လန် ရုတ်တရက် ထပ်ပြီး ပြိုလဲသွားရပြန်တယ်။ ဘာလို့လဲဆိုတော့ သေးပေါက်ချတာထက် ပိုဆိုးတဲ့ ပြဿနာတစ်ခုကို သူ ခံစားသွားရလို့ပဲ။
သူ ခံစားလိုက်ရတာက သူ... အညစ်အကြေးစွန့်တော့မယ်ဆိုတာဘဲ!