အခန်း (၆၁) - ကီတာဇာဝါ၏ လက်ရှိစွမ်းအား

"မင်္ဂလာမနက်ခင်းပါ ဆရာကီတာဇာဝါ။" အီနိုက လင်းလက်သော အပြုံးလေးဖြင့် သူ့ကို နှုတ်ဆက်လိုက်သည်။

သူမဘေးတွင် ဟီနာတာ ရှိနေသည်။ ဟီနာတာက အီနို၏အနောက်တွင် ပုန်းကွယ်ကာ ရှက်ရွံ့တိတ်ဆိတ်နေဆဲဖြစ်သည်။ သူမ၏ နှုတ်ဆက်သံက တိုးလွန်းလှသဖြင့် ကီတာဇာဝါပင် မကြားလိုက်ရသလောက်ပင်။

"သမီး ထမင်းဘူး ထည့်လာတယ်" အီနိုက နေ့လယ်စာထမင်းဘူးကို ထုတ်ကာ ဂုဏ်ယူဝင့်ကြွားစွာဖြင့် ကမ်းပေးလိုက်သည်။ "ဆရာကီတာဇာဝါ၊ မြည်းကြည့်ပါဦးနော်"

"ကျေးဇူးပါပဲ။" ကီတာဇာဝါက သက်ပြင်းတိုးတိုးချကာ လက်ခံလိုက်သည်။

"ဒီအရွယ်လေးနဲ့ ထမင်းဘူးပြင်တတ်နေပြီလို့ မထင်ထားဘူး။"

"ဒါပေါ့!" အီနိုက ခါးထောက်လိုက်ပြီး "သမီးက တော်ပြီးသားပါ"

ကီတာဇာဝါက သူမကို အလိုအလျောက် လှမ်းကြည့်မိလိုက်သည်။ မူလဇာတ်လမ်းထဲက အသွင်အပြင်နဲ့မတူဘဲ၊ အီနိုသည် သူမ၏ သွယ်လျသောခါးနှင့် ဝမ်းဗိုက်ကို ဖော်ပြနေသော အဝတ်အစားများကို ဝတ်ဆင်ထားခြင်းမရှိပေ။

အတိတ်ဘဝတုန်းက သူမနှင့်ပတ်သက်ပြီး သူ့အမှတ်တရအဖြစ်ဆုံးအရာက အဲဒီ ဝမ်းဗိုက်ဗလာလေးပင် ဖြစ်သည်။

ဟီနာတာက ထိုထမင်းဘူးကို အားကျစွာဖြင့် စိုက်ကြည့်နေသည်။ သူမက ငယ်စဉ်ကတည်းက နူးညံ့သောလက်သီး လေ့ကျင့်ရေးတွင်သာ နစ်မြုပ်နေခဲ့ရသဖြင့် နေ့လယ်စာပြင်ဆင်နည်းကို သင်ယူရန် အခွင့်အရေး မရခဲ့ပေ။

"အရသာ အရမ်းကောင်းတာပဲ။" ကီတာဇာဝါက ထမင်းဆုပ်ကို တစ်ကိုက် ကိုက်စားလိုက်ပြီး ရိုးသားစွာ ချီးကျူးလိုက်သည်။

စာကြောင်းတစ်ကြောင်းက သူ၏စိတ်ထဲတွင် ရုတ်တရက် ဖြတ်ပြေးသွားသည်။ 'ညစာစားချိန် ထပ်ရောက်လာပြန်ပြီ။' ကီတာဇာဝါက ဟီနာတာကို နေ့တိုင်း အစားအသောက်များ ယူလာပေးခဲ့သော်လည်း ရယ်စရာကောင်းစွာပင် သူက ပိုက်ဆံတစ်ပြားမှ မကုန်ခဲ့ပေ။

ပိုက်ဆံအားလုံးက ဟီနာတာဆီကချည်းသာ ဖြစ်သည်။

ယခု အီနိုကပါ မနက်စာ ယူလာပေးပြန်ရာ၊ ကီတာဇာဝါက ထူးဆန်းသောအရာတစ်ခုကို သတိထားမိလိုက်သည်။ သူက မရည်ရွယ်ဘဲ အခြားသူများကို မှီခိုစားသောက်နေမိလျက်သား ဖြစ်နေသည်။

"ဆရာကီတာဇာဝါ၊ မနက်ဖြန် ရေပေါ်လမ်းလျှောက်တဲ့ လေ့ကျင့်ရေးမှာ သမီး ဆာကူရာကို နိုင်မယ်လို့ ထင်လား။" အီနိုက မျှော်လင့်ချက်အပြည့်ရှိသော မျက်လုံးများဖြင့် မေးလိုက်သည်။

"အင်း။" ကီတာဇာဝါက ခေတ္တရပ်ပြီးနောက် ခေါင်းညိတ်ပြလိုက်သည်။

ဆာကူရာက ချာကရာ ထိန်းချုပ်မှုပိုင်းမှာ အနည်းငယ် ပိုကောင်းပေမယ့် ကွာဟချက်က သိပ်မကြီးပါဘူး။ ကျောင်းမှာ သူတို့ရဲ့ အချိန်တိုလေးကို ထည့်တွက်ရင် အီနိုက အလုံးစုံစွမ်းအားမှာ အသာစီးရနေပါတယ်။

လေ့ကျင့်ရေး ရက်အနည်းငယ်အကြာမှာ သူမအနေနဲ့ ဆာကူရာကို ကျော်တက်သွားဖို့ဆိုတာ လုံးဝ ဖြစ်နိုင်တဲ့ကိစ္စပါ။

"ဝေး!" အီနို၏ ယုံကြည်မှုများ မြင့်တက်သွားသည်။

ကီတာဇာဝါက ပြုံးလိုက်ပြီး ဆက်စားနေလိုက်သည်။ မကြာမီ သူနှင့် အီနိုတို့ စားလို့ပြီးသွားသည်။ ဟီနာတာတစ်ယောက်သာ တိတ်ဆိတ်စွာ ဆက်စားနေဆဲဖြစ်သည်။ အချိန်ရခိုက်လေးတွင် သူက သူ၏ ဇာတ်ကောင်စခရင် (Character Panel) ကို ဖွင့်ကြည့်လိုက်သည်။

[အမည်: ကီတာဇာဝါ

အသက်: ၆ နှစ်

ဓာတ်သဘာဝ: လေ၊ မီး၊ ရေ

သွေးမျိုးဆက်စွမ်းအင် :ဗျကုဂန်

နင်ဂျစ်စု - အခြေခံ ဂျူစုသုံးခု: (ကိုယ်ပွား၊ အသွင်ပြောင်း၊ အစားထိုး)၊ ခန္ဓာကိုယ်ဖျောက် ဂျူစု ၊ လေပုံစံ : မုန်တိုင်းလက်ဝါး၊ လေပုံစံ: ကြီးမြတ်သော ထိုးဖောက်မှု၊ ရှူရီကန်ဂျူစု ၊ မီးပုံစံ: ကြီးမြတ်သော မီးလုံးဂျူစု၊ မီးပုံစံ: ဖီးနစ်ငှက်မီးတောက် ဂျူစု၊ ကိုနိုဟာ လေဆင်နှာမောင်း၊ ကိုနိုဟာ လေဆင်နှာမောင်းကြီး၊ ကိုနိုဟာ လေဆင်နှာမောင်းပြင်း၊ ဂန်ဂျူစု : သစ်ပင်ချည်နှောင် သေဆုံးခြင်း၊ သွေးခဲဂျူစု၊ အရိပ်ကိုယ်ပွား၊ ဆွဲဆောင်မှု ဂျူစု၊ လေပုံစံ: လေဟာနယ်စက်လုံး၊ ရေပုံစံ : ရေတံတိုင်း၊ မီးပုံစံ: ကြီးမြတ်သော မီးတောက်]

[သုံးသပ်ချက်: သင်သည် အသက် ၆ နှစ်အရွယ်တွင် ဂျိုနင် တစ်ယောက်၏ စွမ်းအားကို ပိုင်ဆိုင်ထားသည်။ သင်သည် နောက်ထပ် လမ်းစဉ်ခြောက်သွယ်ပညာရှိဖြစ်လာမည်။သင်၏ ဂုဏ်သတင်းက နင်ဂျာလောကတစ်ခုလုံးကို ပဲ့တင်ထပ်စေလိမ့်မည်။]

နောက်ဆုံးအကြိမ် သူ စစ်ဆေးခဲ့စဉ်ကနှင့် ယှဉ်ကြည့်လျှင်၊ ဤစခရင်က အလွန်ကြီးမားသော အသွင်ပြောင်းလဲမှုတစ်ခုကို ဖြတ်သန်းခဲ့ရပြီဖြစ်သည်။ အထူးသဖြင့် နင်ဂျစ်စု အရေအတွက်မှာ သာမန်နင်ဂျာများ ရရှိနိုင်သည်ထက် အဆပေါင်းများစွာ သာလွန်နေသည်။

ကြီးမြတ်သော နင်ဂျာမျိုးနွယ်စုများတွင် မွေးဖွားလာသူများ သို့မဟုတ် နာမီကာဇဲ မီနာတို ကဲ့သို့သော ထူးချွန်သည့် သာမန်ပြည်သူများသာ ဤမျှများပြားသော နည်းစနစ်များကို ကျွမ်းကျင်ပိုင်နိုင်နိုင်သည်။

မပြသထားသော အချက်အလက်တစ်ခုမှာ ချာကရာ ဖြစ်သည်။ အမြဲလိုလိုပင်၊ စနစ်က သူ့ကို အသက် ၆ နှစ်အရွယ် ကလေးတစ်ယောက်လိုသာ ခေါင်းမာစွာ သဘောထားနေဆဲဖြစ်သည်။

ကီတာဇာဝါ သက်ပြင်းကို ဖြည်းညင်းစွာ ချလိုက်သည်။ စနစ်က တုံးအချင်ယောင် ဆောင်နေသော်လည်း၊ ငြင်းမရနိုင်လောက်အောင် စွမ်းအားကြီးမားလှသည်။ နှစ်လမပြည့်တပြည့် အချိန်အတွင်းတွင်၊ သူ၏ စွမ်းအားများက ဂျိုနင်အဆင့်အထိ အရှိန်အဟုန်ဖြင့် တိုးတက်လာခဲ့သည်။

အကယ်၍ အမှန်တရားကိုသာ သိသွားကြပါက၊ သူသည် အူချီဟာ အီတာချီ ထက်ပင် ပို၍ထူးဆန်းသော စူပါပါရမီရှင်တစ်ဦးအဖြစ် ချီးကျူးခံရပေလိမ့်မည်။

ပြီးတော့ အချိန်တွေ ရှိသေးသည်။ နာရူတိုနှင့် ဆာစကေးတို့ ကျောင်းဆင်းချိန်ရောက်လျှင်၊ သူသည် အမှန်တကယ်ပင် နောက်ထပ် လမ်းစဉ်ခြောက်သွယ်ပညာရှိ ဖြစ်လာနိုင်သည်။

"သမီး စားလို့ပြီးပါပြီ၊ ဆရာကီတာဇာဝါ။" ဟီနာတာက သူမ၏ တူကို ညင်သာစွာ ချလိုက်သည်။

"ကောင်းပြီလေ။" ကီတာဇာဝါက မတ်တတ်ရပ်လိုက်သည်။ "လေ့ကျင့်ရေး သွားလုပ်ကြစို့။"

သူတို့သုံးယောက် လူလုပ်ရေကန်ဆီသို့ ရောက်ရှိသွားကြသည်။သို့သော် မဖိတ်ခေါ်ထားသော ဧည့်သည်တစ်ယောက်၏ ဆီးကြိုခြင်းကို ခံလိုက်ရသည်။

"ဆရာကီတာဇာဝါ။" ဆာစကေးက ရှေ့သို့ တက်လာသည်။ "ကျွန်တော် မီးပုံစံ နည်းစနစ်တွေ ပိုပြီး သင်ယူချင်ပါတယ်။"

မနေ့က ယှဉ်ပြိုင်ခဲ့ရသောပွဲစဉ်က သူ၏ အရေးတကြီး လိုအပ်နေမှုစိတ်ကို နှိုးဆွပေးလိုက်ပြီး၊ သူ့ကို စောစောလာရန် တွန်းအားပေးခဲ့သည်။ ဖူဂါကူ သို့မဟုတ် အီတာချီကို မေးရန် စဉ်းစားခဲ့သော်လည်း သူတို့က အလွန်အလုပ်များနေသဖြင့် သူ့အတွက် အချိန်မပေးနိုင်ကြပေ။

"ကောင်းပြီလေ။" ကီတာဇာဝါက တွေဝေမနေခဲ့ပေ။ မည်သို့ပင်ဆိုစေ၊ မနေ့ကမှ ဆာစကေးနှင့် သက်ဆိုင်သော မစ်ရှင်တစ်ခုကို သူ စတင်ခဲ့ရသည် မဟုတ်ပါလား။ သူက လက်တစ်ဖက်တည်းဖြင့် လက်သင်္ကေတ ပြုလုပ်ခြင်းကိုလည်း စိတ်ဝင်စားနေသည်။

"ဟီနာတာ၊ အီနိုငါ့ကို ခဏလောက် စောင့်နေကြဦး။" ကီတာဇာဝါက ဆာစကေးဘက်သို့ လှည့်လိုက်သည်။

"မင်းကို မီးပုံစံ: ဖီးနစ်ငှက်မီးတောက် ဂျူစု သင်ပေးမယ်။ အဲဒါက C-အဆင့် ဂျူစု တစ်ခုပဲ။"

"ကျေးဇူးတင်ပါတယ် ဆရာကီတာဇာဝါ။" ဆာစကေးက အံ့သြသွားပုံပေါ်သည်။ ကီတာဇာဝါက အူချီဟာ မျိုးနွယ်စုနှင့် အလွန်နီးကပ်စွာ ဆက်စပ်နေသော နည်းစနစ်တစ်ခုကို သူ့အား သင်ပေးမည်ဟု သူ မမျှော်လင့်ထားခဲ့ပေ။

"ငါ အရင်ဆုံး သရုပ်ပြမယ်။" ကီတာဇာဝါက လက်နှစ်ဖက်ဖြင့် လက်သင်္ကေတများ ပြုလုပ်လိုက်ပြီး၊ သူ၏ ပါးစပ်မှ မီးလုံးများကို အဆက်မပြတ် ပစ်လွှတ်လိုက်သည်။

"ကျွန်တော် ကြိုးစားကြည့်မယ်။" ဆာစကေးက လက်သင်္ကေတများကို အတုခိုးလိုက်သည်။

တစ်စက္ကန့်အကြာတွင် မီးလုံးများစွာ ရှေ့သို့ ပစ်ထွက်သွားခဲ့သည်။ သူ အံ့အားသင့်စွာ ရပ်နေမိသည်။ ပထမဆုံးအကြိမ် ကြိုးစားမှုနဲ့တင် အောင်မြင်သွားတာလား။ ၎င်းမှာ သူ၏ တိုးတက်လာသော ချာကရာ ထိန်းချုပ်မှုနှင့် ဓာတ်သဘာဝ ပြောင်းလဲမှုကို နားလည်ထားခြင်းတို့ကြောင့် ဖြစ်ရပေမည်။

"မဆိုးပါဘူး။" ကီတာဇာဝါက ခေါင်းညိတ်လိုက်သည်။

"ဒါပေမဲ့ မင်း ကျွမ်းကျင်ဖို့ အဝေးကြီး လိုသေးတယ်။" ဆာစကေးက နည်းစနစ်ကို လုပ်ပြနိုင်ရုံသာ ရှိသေးသည်။ သူက လမ်းကြောင်း၊ မီးလုံးအရွယ်အစားနှင့် တိကျမှုတို့အပေါ် ထိန်းချုပ်နိုင်စွမ်း ကင်းမဲ့နေသည်။

ဖီးနစ်ငှက်မီးတောက် ဂျူစု၏ အစစ်အမှန် စွမ်းအားမှာ ခန့်မှန်းရခက်သော ၎င်း၏ ရွေ့လျားမှုပင် ဖြစ်သည်။ ၎င်းက ရှောင်တိမ်းရန် ခက်ခဲစေသည်။ ပို၍အရေးကြီးသည်မှာ ဆာစကေး၏ မစ်ရှင်က မပြီးဆုံးသေးပေ။ ဆိုလိုသည်မှာ သူက ၎င်းကို မကျွမ်းကျင်သေးခြင်းပင် ဖြစ်သည်။

"နားလည်ပြီလား။" ကီတာဇာဝါက အရေးကြီးသော အချက်များကို ရှင်းပြလိုက်သည်။

"ဟုတ်ကဲ့။ ကျေးဇူးတင်ပါတယ် ဆရာကီတာဇာဝါ။" ဆာစကေးက လေးနက်စွာ ခေါင်းညိတ်လိုက်ပြီး သူ့ကိုယ်သူ ပြန်လည် နှိမ့်ချလိုက်သည်။ သူ၏ စောစောက မာနများ ပျောက်ကွယ်သွားခဲ့ပြီ။ သူက ဂျူစုကို အမှန်တကယ် ကျွမ်းကျင်ရန် အဝေးကြီး လိုနေသေးသည်။

သူ အောင်မြင်သွားသည့်တစ်နေ့တွင် ဖူဂါကူနှင့် အီတာချီတို့ မည်မျှ ဂုဏ်ယူကြမည်ကို သူ့ရင်ထဲတွင် စိတ်ကူးယဉ်ကြည့်မိသည်။

"ဆက်လေ့ကျင့်နေပါ။ ပြဿနာရှိရင် ငါ့ကို မေးလှည့်။" ကီတာဇာဝါက ညွှန်ကြားလိုက်သည်။

"နားလည်ပါပြီ။" ထို့နောက် ဆာစကေးက ရုတ်တရက် မေးလိုက်သည်။ "ဆရာကီတာဇာဝါ၊ ဒုတိယနှစ် အတန်း(A) နဲ့ ချစ်ကြည်ရေးပွဲမှာ ကျွန်တော်က ဟျူဂါ နဲဂျီ နဲ့ ရင်ဆိုင်ရမှာလား။"

"အဲဒါက မင်းရဲ့ စွမ်းဆောင်ရည်အပေါ်မှာ မူတည်တယ်၊" ကီတာဇာဝါက မရေမရာ ပြန်ဖြေလိုက်သည်။ တကယ်တော့ သူက ကူရာမာ ယာကူမို ကို နဲဂျီနှင့် ရင်ဆိုင်စေရန် စီစဉ်ထားခဲ့သည်။

သို့သော် ဆာစကေးကသာ နဲဂျီကို ကျော်လွန်နိုင်မည်ဆိုပါက ဒါက အကောင်းဆုံး ဖြစ်ပေလိမ့်မည်။ သို့တိုင်အောင် နဲဂျီက သူ၏ ဗျကုဂန် ကို နိုးထစေပြီးဖြစ်ရာ ခက်ခဲပေလိမ့်မည်။

"ကောင်းပြီ၊ မင်းတို့နှစ်ယောက်လည်း လေ့ကျင့်ရေး စလုပ်ကြတော့။" ကီတာဇာဝါက လှည့်ကာ ဟီနာတာနှင့် အီနိုတို့ကို ပြန်လည် လေ့ကျင့်ပေးလေသည်။

မွန်းလွဲပိုင်းရောက်သော် ကီတာဇာဝါက သူတို့ကို ကိုယ်တိုင် ဆက်လက်လေ့ကျင့်စေခဲ့ပြီး လက်တွေ့သင်ခန်းစာတစ်ခုအတွက် အတန်း ၁-Aသို့ ထွက်ခွာသွားခဲ့သည်။

"ဆရာကီတာဇာဝါ!" နာရူတိုက စိတ်လှုပ်ရှားစွာဖြင့် ပြေးလာသည်။ "ဒီနေ့လည်း ကျွန်တော်တို့ ရုပ်ပိုင်းဆိုင်ရာ လေ့ကျင့်ခန်းတွေ လုပ်ရဦးမှာလား။ နည်းနည်းတော့ ပျင်းစရာကောင်းတယ်။ အသစ်အဆန်းလေး ဘာရှိလဲ။"

"ရှိတယ်။" ကီတာဇာဝါက ပြုံးလိုက်သည်။ "မနေ့က ရွေးချယ်ခံရတဲ့ ကျောင်းသားငါးယောက်က လက်တွေ့လေ့ကျင့်ရေး စလုပ်ရလိမ့်မယ်။"

"လက်တွေ့လေ့ကျင့်ရေး" နာရူတို၏ မျက်လုံးများ လင်းလက်သွားသည်။ "နောက်ထပ် တစ်ယောက်ချင်း တိုက်ခိုက်ရမယ့် ပွဲလား။ မိုက်လိုက်တာ!"

ဟီနာတာနှင့် ဆာစကေးတို့ မရှိသောကြောင့် ကီတာဇာဝါက နာရူတို၊ ရှီနိုနှင့် ချိုဂျီတို့ကို တိုက်ခိုက်ရေးလေ့ကျင့်မှုတွင် ပါဝင်စေခဲ့သည်။ သို့သော် အတန်းမပြီးဆုံးမီတွင် ကီတာဇာဝါက စူးရှသော အကြည့်တစ်ခုကို ခံစားလိုက်ရသည်။

သူ အလိုအလျောက် မော့ကြည့်လိုက်သည်။ထိုအခါ အဝေးမှနေ၍ ချဉ်းကပ်လာသော ဆူနာဒဲကို မြင်လိုက်ရသည်။