အခန်း (၅၁) - စွမ်းအားကြီးမားသော ဗျကုဂန်

ကီတာဇာဝါသည် စက္ကန့်အနည်းငယ်မျှ ကြက်သေ သေသွားခဲ့ပြီး စနစ်က သတင်းအချက်အလက်အသစ်များကို ထည့်သွင်းပေးပြီးနောက်မှ သတိပြန်ဝင်လာခဲ့သည်။

အိုဆွတ်ဆုကီများထံမှ ဆင်းသက်လာသည့် ဂန္ထဝင် မျက်လုံးစွမ်းရည်ပီပီ၊ ဗျကုဂန်သည် သာမန်နင်ဂျာတစ်ဦးအတွက် အလွန်ကြီးမားသော တိုးတက်မှုကို ဆောင်ကြဉ်းပေးလေသည်။

ယခင်က သူ၏စွမ်းအားသည် ဂျိုနင်တစ်ယောက်နှင့် နီးစပ်ခဲ့သည်ဆိုလျှင် ယခုတော့ သူ့ကို ဂျိုနင်တစ်ဦးအဖြစ် သတ်မှတ်၍ ရနေပြီဖြစ်သည်။ နူးညံ့သောလက်သီးသိုင်း နှင့်ပေါင်းစပ်လိုက်လျှင်မူ သူ့ကို အစစ်အမှန် ဂျိုနင်တစ်ဦးဟု ခေါ်ဆိုနိုင်ပြီဖြစ်သည်။

ကီတာဇာဝါသည် ကွန်နိုဟာရွာ အစွန်ရှိ လေ့ကျင့်ရေးကွင်းသို့ အမြန်သွားလိုက်သည်။ အလုပ်ချိန် ပြီးဆုံးသွားပြီဖြစ်၍ လေ့ကျင့်ရေးကွင်းထဲတွင် မည်သူမျှ မရှိတော့ချေ။

သူသည် မှန်တစ်ချပ်ကို ထုတ်ယူကာ ကြည့်လိုက်သည်။ သူ၏မျက်လုံးများက အနက်ရောင်ဖြစ်နေဆဲပင်။

"ဒီတစ်ခါတော့ စနစ်က တော်တော်လေး အလုပ်ဖြစ်သွားတာပဲ" ဟု ဆိုကာ ကီတာဇာဝါက ကျေနပ်စွာ ခေါင်းညိတ်လိုက်သည်။

ရှာရင်းဂန်ကို ဖွင့်လိုက်သောအခါ မာဂါတာမာဟုခေါ်သော တိုမိုအစက်အပြောက်ပုံစံများ ပေါ်လာတတ်သည်။ သို့သော် ပိတ်ထားချိန်တွင်မူ ပုံမှန်မျက်လုံးနှင့် တူနေသည်။ သေချာသည်ကတော့ အူချီဟာ မျိုးနွယ်စုဝင်များသာလျှင် ရှာရင်းဂန်ကို ပြန်ပိတ်နိုင်စွမ်း ရှိကြသည်။

ဟာတာကဲ ကာကာရှီ အားနည်းရခြင်း၏ အဓိကအကြောင်းရင်းများထဲမှ တစ်ခုမှာ သူက ထိုရှာရင်းဂန်ကို ပြန်မပိတ်နိုင်ခြင်းကြောင့်ပင် ဖြစ်သည်။

သို့သော် ဗျကုဂန်သည် ရှာရင်းဂန်နှင့် မတူပေ။ ဖွင့်ထားသည်ဖြစ်စေ၊ ပိတ်ထားသည်ဖြစ်စေ ဗျကုဂန်က ဖြူနေတတ်သဖြင့် တစ်ချက်ကြည့်ရုံဖြင့် သိသာပေါ်လွင်နေသည်။

ကံကောင်းစွာဖြင့် ကီတာဇာဝါတွင် စနစ်၏ အထောက်အပံ့ ရှိနေသည်။ သူ၏ဗျကုဂန်က သူအလိုရှိချိန်မှသာ ပွင့်လာမည်ဖြစ်သည်။ ပိတ်ထားချိန်တွင်တော့ သူ၏ပုံမှန်မျက်လုံးများအဖြစ်သို့ ပြန်လည်ရောက်ရှိသွားသည်။

ကီတာဇာဝါက ၎င်းကိုဖွင့်ရန် တိတ်ဆိတ်စွာ လုပ်ဆောင်လိုက်သည်။ သူ၏ မျက်လုံးတစ်ဝိုက်ရှိ သွေးကြောများက ရုတ်တရက် ဖောင်းကြွလာသည်။ နောက်တစ်စက္ကန့်တွင်တော့ သူ့ပတ်ဝန်းကျင်ရှိ ကမ္ဘာကြီးတစ်ခုလုံး သိသိသာသာ ပြောင်းလဲသွားသည်ကို ခံစားလိုက်ရသည်။

မှုန်ဝါးဝါး 360P ရုပ်ထွက်မှနေ၍ အလွန်ကြည်လင်ပြတ်သားသော 4K အဆင့်သို့ ပြောင်းလဲသွားသကဲ့သို့ပင်။ ၃၆၀ ဒီဂရီ ရှုထောင့်ပေါင်းစုံမှ မြင်ကွင်းအပြည့်ကိုပါ မြင်တွေ့နိုင်စွမ်းရှိသည်။ သူ၏နောက်စေ့တွင် မျက်လုံးတစ်စုံ ရှိနေသလိုပင် ခံစားရသည်။

"အံ့ဩစရာပဲ" ကီတာဇာဝါက သူ့ပတ်ဝန်းကျင်ရှိ အရာအားလုံးကို အကဲခတ်ကြည့်ရင်း ဗျကုဂန်ကို ပို၍ပင် သဘောကျလာတော့သည်။

ပါရမီပါသော ဟျူဂါ မျိုးနွယ်စုဝင်များက ဂျိုနင်အဆင့်သို့ လွယ်လွယ်ကူကူ ရောက်ရှိသွားနိုင်သည်မှာလည်း မဆန်းတော့ပေ။

သူက မလှမ်းမကမ်းရှိ သစ်ပင်တစ်ပင်ကို လှည့်ကြည့်လိုက်သည်။ သူအာရုံစူးစိုက်လိုက်သည့်အခါ သစ်ပင်မှာ သူ့အမြင်အာရုံထဲမှ ပျောက်ကွယ်သွားပြီး နောက်ကွယ်ရှိ မြင်ကွင်းက နေရာယူလာသည်။

ထို့နောက် သူ၏အကြည့်ကို သူ့လက်ဆီသို့ ပြောင်းကာ မြှောက်ကြည့်လိုက်သည်။ ကိုယ်တွင်းရှိ သွေးကြောများ၊ အကြောစုံချက်များ၊ အရိုးများနှင့် ချာကရာစီးဆင်းမှုများကိုပါ ရှင်းလင်းစွာ မြင်တွေ့နေရသည်။

ဗျကုဂန်တွင် အဓိကလုပ်ဆောင်ချက် သုံးခုရှိသည်။ ထိုးထွင်းသိမြင်နိုင်စွမ်း၊ ဖောက်ထွင်းမြင်နိုင်စွမ်း နှင့် အဝေးကြည့်မြင်နိုင်စွမ်းတို့ ဖြစ်ကြသည်။ သူက ထိုးထွင်းသိမြင်ခြင်းနှင့် ဖောက်ထွင်းမြင်နိုင်ခြင်းတို့ကို စမ်းသပ်ပြီးပြီမို့ ယခု အဝေးကြည့်မြင်နိုင်စွမ်း တစ်ခုသာ ကျန်တော့သည်။

သူက ခေါင်းမော့ကာ ခပ်လှမ်းလှမ်းဆီသို့ လှမ်းကြည့်လိုက်သည်။ သူ၏အမြင်အာရုံက အပြင်ဘက်သို့ ဆန့်ထွက်သွားပြီး လမ်းတစ်လျှောက်ရှိ မြင်ကွင်းတိုင်းကို ဖမ်းယူလိုက်သည်။ နောက်ဆုံးတွင် တစ်ကီလိုမီတာ အကွာအဝေးသို့ ရောက်သောအခါ သူ၏အမြင်အာရုံက ရပ်တန့်သွားသည်။

တစ်ကီလိုမီတာ(မီတာတစ်ထောင်) မှတ်သားထားရမည်မှာ ဗျကုဂန်၏ ထိရောက်သော အကွာအဝေးမှာ မျဉ်းဖြောင့်တစ်ခုတည်းမဟုတ်ဘဲ တစ်ကီလိုမီတာ ပတ်လည်အထိ ဖြစ်သည်။

ထို့ထက်မက ၎င်းသည် အကန့်အသတ်တစ်ခု မဟုတ်သေးပေ။ လေ့ကျင့်မှုများစွာဖြင့် ဤအကွာအဝေးကို ထပ်မံတိုးချဲ့နိုင်သေးသည်။ ကီတာဇာဝါက ဗျကုဂန်ကို ပိတ်လိုက်ပြီး သက်ပြင်းတစ်ချက် ဖြည်းညင်းစွာ ချလိုက်သည်။

စမ်းသပ်ချက်အရ သူ၏ဗျကုဂန်သည် သာမန် ဟျူဂါ ဂျိုနင်တစ်ယောက်၏ အဆင့်၌ပင် ရှိနေပြီဖြစ်သည်။

သို့သော်လည်း စနစ်က ဗျကုဂန်နှင့်ပတ်သက်သော အခြေခံအသိပညာအားလုံးကို ပံ့ပိုးပေးထားပြီးဖြစ်သည်။ လေ့ကျင့်မှုများဖြင့် သူသည် ၎င်းကို ပိုမိုတိုးတက်လာအောင် လုပ်နိုင်သေးသည်။

သို့ပေမဲ့ ရင်းနီဂန် အဆင့်သို့ တက်လှမ်းရန်မှာတော့ လုံးဝ မဖြစ်နိုင်သေးပေ။ သို့တိုင်အောင် ပုံမှန် ဗျကုဂန်ကပင် အလွန်အမင်း အသုံးဝင်နေပြီဖြစ်သည်။

သူ၏စွမ်းအားများ သိသိသာသာ တိုးတက်လာသည်ကို ကီတာဇာဝါ ရှင်းလင်းစွာ ခံစားသိရှိနေသည်။ သူ စိတ်ကိုတည်ငြိမ်အောင်ထားကာ အိမ်ဆီသို့ စတင်ဦးတည်လိုက်သည်။

လမ်းခရီးတစ်လျှောက်တွင် သူသည် ဗျကုဂန်ကို ဖွင့်ကြည့်ရန် အကြိမ်ကြိမ် စိတ်ဆန္ဒပြင်းပြနေခဲ့သော်လည်း အောင့်အည်း သည်းခံခဲ့သည်။ ဤမျက်လုံးကို မည်သို့ရရှိလာခဲ့သနည်းဆိုသည်ကို အကြောင်းပြစရာမရှိသလို၊ တစ်စုံတစ်ယောက် သိသွားပါကလည်း ပြဿနာများ တက်လာနိုင်သည်။

ထို့ပြင် ဂျိုနင်ကဲ့သို့သော စွမ်းအားကြီး နင်ဂျာများသည် ဗျကုဂန်ဖြင့် သူတို့ကို စောင့်ကြည့်နေပါက အာရုံခံသိရှိနိုင်စွမ်း ရှိကြသည်။

---

နောက်တစ်နေ့။

ကီတာဇာဝါသည် မနက်စာ သွားဝယ်ချိန်တွင် နေကာမျက်မှန် တစ်လက်ကိုပါ ဝယ်ယူခဲ့သည်။

"ဆရာ ကီတာဇာဝါ!" ဟီနာတာက လင်းလက်သော အပြုံးလေးဖြင့် သူ့ကို နှုတ်ဆက်လာသည်။

"မင်းရဲ့ စားသောက်နိုင်စွမ်းအကြောင်း အဖေကို ပြောပြလိုက်ပြီလား" ကီတာဇာဝါက သူမ၏တာဝန်ကို ပြန်အမှတ်ရသွားသည်။

စည်းကမ်းချက် နှစ်ခုရှိသည်။ တစ်ခုက သူမ ဗိုက်ဝနေရမည်ဖြစ်ပြီး၊ နောက်တစ်ခုက သူမကိုယ်တိုင် ထိုလျှို့ဝှက်ချက်ကို ထုတ်ပြောရမည်ဖြစ်သည်။ သူတတ်နိုင်သမျှ လုပ်ပေးခဲ့သည်မှာ သူမကို ကောင်းကောင်းမွန်မွန် စားသောက်နိုင်ရန် သေချာအောင် လုပ်ပေးခဲ့ခြင်းသာ ဖြစ်သည်။

ဒုတိယ လိုအပ်ချက်ကတော့ ဟျူဂါ ဟီယာရှီနှင့် သက်ဆိုင်လိမ့်မည်ဖြစ်သည်။

"ဆရာက ဘယ်လိုလုပ် သိနေတာလဲ" ဟီနာတာက အံ့ဩတကြီးဖြင့် မျက်တောင်လေး ပုတ်ခတ်ပုတ်ခတ် လုပ်လိုက်သည်။

"ခန့်မှန်းကြည့်တာလေ" ကီတာဇာဝါက လက်လှမ်းကာ သူမ၏ နဖူးလေးကို ခပ်ဖွဖွလေးပုတ်လိုက်ပြီး ပြုံးပြလိုက်သည်။ "ဂုဏ်ယူပါတယ်ကွာ"

"ကျေးဇူးတင်ပါတယ်..." ဟီနာတာက ရှက်သွေးဖြာစွာဖြင့် ခေါင်းငုံ့သွားပြီး "ဆရာ ကီတာဇာဝါကြောင့် သမီး သတ္တိတွေ ရလာခဲ့တာပါ" ဟု တိုးတိုးလေး ဆိုလိုက်သည်။

သူမ၏အသံလေးက နူးညံ့ပြီး တိုးညင်းနေသည်။

"ဆရာ ဘာမှမလုပ်ပေးခဲ့ရပါဘူး" ကီတာဇာဝါက ခေါင်းခါပြလိုက်ပြီး "ဟီနာတာ၊ ဒါက မင်းကိုယ်တိုင် ရဲရင့်ခဲ့လို့ပါ" ဟု ပြောလိုက်သည်။

ဟီနာတာက သူ့ကိုကြည့်ရင်း ခဏမျှ ကြက်သေ သေသွားသည်။

"မင်းရဲ့ ရေပေါ်လမ်းလျှောက်တဲ့ လေ့ကျင့်ခန်းရော ဘယ်လိုနေလဲ" ကီတာဇာဝါက စကားလမ်းကြောင်း လွှဲကာ မေးလိုက်သည်။

"အခုတော့ ရေထဲမကျဘဲ ရေကန်ရဲ့ တစ်ဖက်ကမ်းကို လျှောက်သွားနိုင်နေပါပြီ" ဟီနာတာက ဂုဏ်ယူဝင့်ကြွားစွာဖြင့် ပြန်ဖြေလိုက်သည်။

"ကောင်းတာပေါ့၊ ဒါဆို မင်းက ရေပေါ်လမ်းလျှောက်တဲ့ လေ့ကျင့်ခန်းရဲ့ အခြေခံအဆင့်ကို အောင်မြင်သွားပြီပဲ" ကီတာဇာဝါက ပြုံးလိုက်သည်။ "နောက်ထပ် ဘယ်လိုလေ့ကျင့်ခန်းမျိုး လုပ်ချင်သေးလဲ"

"ဟင်" ဟီနာတာက သူ့ကိုကြည့်ကာ ခဏမျှ ကြောင်သွားပြီး "ဆရာ ကီတာဇာဝါ စီစဉ်ပေးတဲ့အတိုင်းပဲ လုပ်ပါ့မယ်" ဟု ပြန်ဖြေသည်။

"ဒါဆို ဆရာ့ကို ပြောပြပါဦး။ မင်းရဲ့ အခုလောလောဆယ် ဆန္ဒက ဘာလဲ" ကီတာဇာဝါက မေးခွန်းကို ပြောင်းမေးလိုက်သည်။ ဤမျှ ဂရုတစိုက် စစ်ဆေးမေးမြန်းနေရခြင်းမှာ စနစ်ထံမှ တာဝန်အသစ်တစ်ခု ပေါ်လာစေရန်ဖြစ်သည်။

"သမီးလား" ဟီနာတာက ခေါင်းလေးစောင်းကာ ခဏမျှစဉ်းစားပြီးနောက် "သမီးရဲ့ ဗျကုဂန်ကို အမြန်ဆုံး နိုးထလာစေချင်တယ်" ဟု ပြောလိုက်သည်။

သူမက ဆန္ဒကိုဖွင့်ဟလိုက်သည်နှင့်တစ်ပြိုင်နက် ကီတာဇာဝါ၏ ရှေ့တွင် စာသားလေးကြောင်း ရုတ်တရက် ပေါ်လာသဖြင့် သူ အံ့ဩသွားသည်။

ထို့နောက် သူ၏မျက်နှာပေါ်ရှိ အပြုံးက ပိုမိုနက်ရှိုင်းသွားသည်။ စနစ်က တာဝန်များကို မည်သို့ ဖန်တီးပေးသည်ဆိုသည်ကို သူ စတင်နားလည်လာပြီဖြစ်သည်။

[သင့်တပည့် ဟျူဂါ ဟီနာတာသည် သင့်အကူအညီကို တောင်းခံနေပါသည်။

[တာဝန် - ဟျူဂါ ဟီနာတာ၏ ဗျကုဂန်ကို နိုးထလာစေရန် ကူညီပေးပါ။]

[တာဝန်အောင်မြင်မှု ဆုလာဘ် - ရှစ်ထောင့်စက်ဝန်း - တောင်ဖြိုရိုက်ချက်]

[သင် လက်ခံပါသလား]

ကီတာဇာဝါက တုံ့ဆိုင်းနေခြင်းမရှိဘဲ လက်ခံလိုက်သည်။

ရှစ်ထောင့်စက်ဝန်း - တောင်ဖြိုရိုက်ချက်ဆိုသည်မှာ တောင်များကိုပင် ရိုက်ချိုးဖြိုခွင်းနိုင်လောက်အောင် အင်အားပြင်းထန်သော ချာကရာများ အားဖြည့်ထားသည့် နူးညံ့သော လက်သီးသိုင်းကွက်တစ်ခု ဖြစ်သည်။

"ကောင်းပြီလေ" ကီတာဇာဝါက ပြုံးလိုက်သည်။ "ဒီနေ့မွန်းလွဲပိုင်း လက်တွေ့သင်ခန်းစာမှာ မင်းရဲ့ လေ့ကျင့်ခန်းတွေ ပြောင်းလဲသွားလိမ့်မယ်"

"ဘယ်လို လေ့ကျင့်ခန်းမျိုးလဲဟင်" ဟီနာတာက သိချင်စိတ်ဖြင့် မေးလိုက်သည်။

"ဒါက လျှို့ဝှက်ချက်ပဲ" ကီတာဇာဝါက သူ့လက်ညှိုးလေးကို သူမ၏နှုတ်ခမ်းပေါ် တင်လိုက်သည်။ "ဆရာ့ကို ကတိပေး၊ မင်းအဖေကိုတောင် မပြောပြရဘူးနော်"

"ဟုတ်ကဲ့" ဟီနာတာက ပါးပြင်လေးများ ရဲတက်သွားပြီး ခေါင်းညိတ်လိုက်သည်။

---

မွန်းလွဲပိုင်း – လက်တွေ့သင်ခန်းစာ အချိန်။

အတန်း (A) မှ ကျောင်းသားများအားလုံး မနေ့က အချိန်ဇယားအတိုင်း သူတို့၏ အထူးလေ့ကျင့်ရေးများကို စတင်ကြသည်။

"ဆရာ ကီတာဇာဝါ" ဟာရူနို ဆာကူရာက လက်ထောင်လိုက်သည်။ "ဘာလို့ ဟီနာတာ တစ်ယောက်တည်းကပဲ လေ့ကျင့်ခန်းအသစ် ရတာလဲ"

သူမက ချာကရာ ထိန်းချုပ်မှုတွင် ပါရမီပါသူဖြစ်သည်။ အစပိုင်းတွင် အနည်းငယ် နောက်ကျခဲ့သော်လည်း ယခုတော့ သူမက အမီလိုက်နိုင်ခဲ့ပြီဖြစ်ကာ ဟီနာတာ၊ ယာမာနာကာ အီနိုတို့နှင့်အတူ ရေပေါ်လမ်းလျှောက်နေပြီဖြစ်သည်။

သူမအမြင်အရ သူတို့သုံးယောက်လုံးက တူညီသော အဆင့်တစ်ခုတည်းတွင် ရှိနေကြသည်။

"ဆရာတို့က ဒုတိယနှစ် အတန်း (A) နဲ့ နယ်ပယ်လေးခုမှာ ယှဉ်ပြိုင်ရလိမ့်မယ်" ကီတာဇာဝါက ရှင်းပြလိုက်သည်။ "အဲဒီအထဲက ချာကရာ ထိန်းချုပ်မှု အပိုင်းအတွက်ဆို ဆရာက မင်းနဲ့ အီနိုကို အားအထားဆုံးပဲ"

"တကယ်လား" ဆာကူရာက အံ့ဩတကြီး မေးလိုက်သည်။

"တကယ်ပေါ့" ကီတာဇာဝါက ခေါင်းညိတ်ပြလိုက်သည်။ "ဒါကြောင့် ဆရာက မင်းရဲ့ ရေပေါ်လမ်းလျှောက်တဲ့ လေ့ကျင့်ခန်းကိုပါ ပြောင်းလဲပေးမလို့"

"ဘယ်လို ပြောင်းလဲမှာလဲဟင်" သူမက နားမလည်စွာဖြင့် မေးလိုက်သည်။

"ရေပေါ် လမ်းလျှောက်တဲ့အချိန်မှာ၊ အီနိုက သစ်သား ကူနိုင်း တစ်ချောင်းသုံးပြီး မင်းကို နှောင့်ယှက်လိမ့်မယ်" ကီတာဇာဝါက ပြုံးလိုက်သည်။ "မင်းကလည်း သူမကို အဲဒီအတိုင်း ပြန်လုပ်ရမယ်"

"ဆရာ ကီတာဇာဝါ၊ ဆရာက နတ်ဆိုးများလား" ဆာကူရာက မျက်လုံးပြူးသွားသည်။

"မင်းတို့နှစ်ယောက်လုံး ပေါ့ပေါ့ဆဆ မလုပ်အောင် ဆရာက စည်းကမ်းချက်တစ်ခု ထပ်ထည့်မယ်" ကီတာဇာဝါက ဆက်ပြောသည်။ "ကူနိုင်းနဲ့ အများဆုံး အထိခံရတဲ့သူက... အိမ်စာ နှစ်ဆ ပိုလုပ်ရမယ်"

"ဆရာက တကယ့် နတ်ဆိုးပဲ!" ဆာကူရာက မျက်နှာသေလေးဖြင့် ပြောလိုက်သည်။

"ဆာကူရာရေ၊ ဆောရီးပဲဟေ့!" အီနိုက သူမ၏ လက်မောင်းဖြူဖြူလေးများ ပေါ်လာစေရန် အင်္ကျီလက်ကို ခေါက်တင်လိုက်သည်။ "နင် ငါတို့နှစ်ယောက်စာအတွက် အိမ်စာတွေ လုပ်ရတော့မှာပဲ!"

ကီတာဇာဝါက တိုးတိုးလေး ရယ်မောလိုက်သည်။ စကားသုံးခွန်းတည်းဖြင့်... သူသည် မိန်းကလေးနှစ်ယောက်ကို အချင်းချင်း ရန်တိုက်ပေးလိုက်နိုင်ခဲ့လေပြီ။