အခန်း (၄၆) - ဖြည့်ဆည်းရမည့်တာဝန်၏ ဆုလာဘ် : နူးညံ့သောလက်သီးသိုင်း
ကီတာဇာဝါ ခြေလှမ်းများ ရပ်တန့်သွားသည်။ အကယ်၍သာ ရိုးရိုး ဒုတိယနှစ် အတန်းတစ်တန်းသာဆိုလျှင် သူသည်တုံ့ဆိုင်းမနေဘဲ သဘောတူလိုက်မည် ဖြစ်သည်။
မည်သို့ပင်ဆိုစေ သူ၏အတန်းထဲတွင် အရည်အချင်းရှိသူများဖြင့် ပြည့်နှက်နေပြီး 'ကိုနိုဟာ ၁၂ ယောက်' အဖွဲ့ဝင်တစ်ဦးစီတိုင်းက သူတို့၏ အဆင့်ထက် ကျော်လွန်၍ တိုက်ခိုက်နိုင်စွမ်း ရှိကြသည်။ သို့သော် ဒုတိယနှစ် အခန်း (A) သည် သာမန်အတန်းတစ်ခု မဟုတ်ပေ။ ထိုအတန်းထဲတွင် ဟျူဂါ နဲဂျီ ရှိနေသည်။
မူလဇာတ်လမ်းအရဆိုလျှင် အစောပိုင်းကာလ ဟျူဂါ နဲဂျီ သည် 'ကိုနိုဟာ ၁၂ ယောက်' ထဲတွင် အသန်မာဆုံးဖြစ်သည်မှာ ယုံမှားသံသယဖြစ်ဖွယ် မရှိပေ။ ချူနင် စာမေးပွဲတွင် နာရူတို ပင်လျှင် သူ့ကို အနိုင်ယူနိုင်ရန် အမြှီးကိုးကောင်၏ စွမ်းအင်ကို အားကိုးခဲ့ရသည်။
သို့သော် လက်ရှိအချိန်တွင် နာရူတို သည် အမြှီးကိုးကောင်၏ စွမ်းအင်ကို မသုံးနိုင်သေးပေ။ ဆာစကေး သည်လည်း သူ၏ ရှာရင်းဂန်ကို နိုးကြားနိုင်ခြင်း မရှိသေးသလို ကျန်သည့်သူများထဲမှ မည်သူကမျှ နဲဂျီ၏ ပြိုင်ဘက်များ မဟုတ်ကြပေ။
သို့သော် ယှဉ်ပြိုင်ရမည့် ပုံစံကိုသာ ပြောင်းလဲလိုက်မည်ဆိုလျှင် အနိုင်ရရန် အခွင့်အရေး ရှိလာနိုင်သည်။ ဥပမာ- စွမ်းအင်ထိန်းချုပ်မှု ယှဉ်ပြိုင်ခြင်းမျိုး ဖြစ်သည်။
မည်သို့ပင်ဖြစ်စေ ကီတာဇာဝါ ရုတ်တရက် ရပ်တန့်သွားရသည့် အကြောင်းရင်းမှာ မျှော်လင့်မထားသော စနစ်၏ တာဝန်တစ်ခုကြောင့် ဖြစ်သည်။
[အခြားအတန်းတစ်ခုက သင့်အတန်းကို စိန်ခေါ်လာပါသည်။ အတန်းပိုင်ဆရာတစ်ယောက်အနေဖြင့် သင်သည် ဤစိန်ခေါ်မှုကို လက်ခံရမည်။]
[တာဝန် - ဒုတိယနှစ် အခန်း (A) အား ချစ်ကြည်ရေး ယှဉ်ပြိုင်ပွဲတွင် အနိုင်ယူပါ။]
[တာဝန် ပြီးမြောက်ပါက ရရှိမည့် ဆုလာဘ် - နူးညံ့သောလက်သီးသိုင်း - ပါကွားခြောက်ဆယ့်လေးကွက် လက်ဝါးရိုက်ချက်။]
ကီတာဇာဝါ၏ မျက်လုံးများ အရောင်လက်သွားသည်။ ဤဆုလာဘ်မှာ တကယ်ကို အံ့မခန်းပင်။
ဗျကုဂန် နှင့် နူးညံ့သောလက်သီးသိုင်း တွဲဖက်မှုသည် နင်ဂျာလောကတွင် ဟျူဂါမျိုးနွယ်စုကို နှစ်ထောင်ပေါင်းများစွာတိုင်အောင် လွှမ်းမိုးနိုင်စေခဲ့သည့် အခြေခံအုတ်မြစ် ဖြစ်သည်။
ဟျူဂါမျိုးနွယ်စုသည် အူချီဟာ မန်ဒါရာ ကဲ့သို့သော ထိပ်တန်း အစွမ်းထက်စစ်သည်တော်များကို မမွေးထုတ်နိုင်ခဲ့သော်လည်း သူတို့၏ သိုင်းပညာရပ်များက နင်ဂျာအများစုကို ရင်ဆိုင်ဖြေရှင်းရန် လုံလောက်သည်ထက်ပင် ပိုနေသေးသည်။
နူးညံ့သောလက်သီးသိုင်း သည် ယေဘုယျအခေါ်အဝေါ်တစ်ခု ဖြစ်သော်လည်း ၎င်း၏ အထင်ရှားဆုံး ပညာရပ်များမှာ ပါကွာ ခြောက်ဆယ့်လေးကွက် လက်ဝါးရိုက်ချက် နှင့် လှည့်ပတ်ကာကွယ်ခြင်း တို့ ဖြစ်ကြသည်။
အကယ်၍ လှည့်ပတ်ကာကွယ်ခြင်းကို ခက်ခဲမှုအဆင့် S အဖြစ် သတ်မှတ်မည်ဆိုလျှင် ပါကွားခြောက်ဆယ့်လေးကွက် လက်ဝါးရိုက်ချက်မှာ အဆင့် A လောက်ရှိပေမည်။
မှတ်သားဖွယ်ကောင်းသည်မှာ ဤပညာရပ်နှစ်ခုစလုံးသည် ဟျူဂါမျိုးနွယ်စု၏ ပင်မမိသားစုနှင့်သာ သက်ဆိုင်ပြီး မျိုးနွယ်ခွဲထွက်မိသားစုများကို သင်ကြားပေးလေ့ မရှိခြင်းပင် ဖြစ်သည်။
"ဘယ်လိုလဲ ကီတာဇာဝါ" အခွင့်အရေးရပြီဟု ခံစားလိုက်ရသဖြင့် မီဇူကီက ထပ်မံမေးမြန်းလိုက်သည်။ သူသည် ကီတာဇာဝါကို အမှန်တကယ် အနိုင်ယူချင်နေခြင်းဖြစ်သည်။ ဤအနိုင်ရမှုသည် မျှတမှုမရှိလျှင်တောင်မှ—နိုင်တာကတော့ နိုင်တာပဲ မဟုတ်ပါလား။
"ကောင်းပြီလေ" ကီတာဇာဝါက ဆုံးဖြတ်ချက်ချလိုက်ပြီး "ဒါပေမဲ့ ကျွန်တော့်မှာ စည်းကမ်းချက်တစ်ခုတော့ ရှိတယ်" ဟု ပြောလိုက်သည်။
"ဘာ စည်းကမ်းချက်လဲ" မီဇူကီက အမြန်မေးလိုက်သည်။
"အကယ်လို့ ပထမနှစ် အခန်း (A) သာ နိုင်ခဲ့ရင် ခင်ဗျား ကျွန်တော့်ရဲ့ တောင်းဆိုချက်တစ်ခုကို သဘောတူပေးရမယ်" ကီတာဇာဝါက ဖြည်းညင်းစွာ ပြောလိုက်သည်။ မီဇူကီကို ထောင်ချရမည့် တာဝန်ကို သူ သတိရသွားခြင်း ဖြစ်သည်။
မီဇူကီ၏ စရိုက်ကို သိထားသည့် ကီတာဇာဝါအနေဖြင့် သင့်တော်သည့် အခွင့်အရေးသာ ပေးလိုက်လျှင် မီဇူကီ တစ်ခုခုတော့ လုပ်လိမ့်မည်ဟု ယုံကြည်ထားသည်။ ဤတောင်းဆိုချက်က သူ့ကို ထိုအခွင့်အရေး ရစေမည်ဖြစ်သည်။
"ကောင်းပြီလေ" မီဇူကီက ခဏမျှ ရပ်တန့်သွားပြီးနောက် "အခန်း (A) ရှုံးသွားခဲ့ရင်ရော" ဟု မေးလိုက်သည်။
"ကျွန်တော်တို့ ရှုံးတာက ပုံမှန်ပဲ မဟုတ်ဘူးလား" ကီတာဇာဝါက အမေးကို အမေးဖြင့် ပြန်တုံ့ပြန်လိုက်သည်။
"…?" မီဇူကီ၏ နှုတ်ခမ်းများ တွန့်ချိတ်သွားသည်။ 'မျက်နှာပြောင်တိုက်လွန်းတဲ့ကောင်! ဘာပဲဖြစ်ဖြစ် မင်းကတော့ အမြတ်ထွက်အောင် လုပ်ထားတာပဲ!'
"ချစ်ကြည်ရေး ယှဉ်ပြိုင်ပွဲအတွက် ပါဝင်ရမယ့် အကြောင်းအရာတွေကို ဆုံးဖြတ်ပြီးတာနဲ့ ခင်ဗျားကို အသိပေးလိုက်မယ်" ကီတာဇာဝါက ပြုံးလိုက်ပြီး ရုံးခန်းသို့ ပြန်ရန် လှည့်ထွက်သွားသည်။
'မင်းရဲ့အတန်း အသေအလဲ ရှုံးနိမ့်သွားတဲ့အချိန်ကျရင် မင်း ပြုံးနိုင်သေးလား ကြည့်ရသေးတာပေါ့။' မီဇူကီက ကီတာဇာဝါ၏ ကျောပြင်ကို စိုက်ကြည့်ရင်း မသိမသာ လက်သီးများကို ဆုပ်ထားမိသည်။
ကီတာဇာဝါက မည်သို့သော ယှဉ်ပြိုင်မှုမျိုးကို အဆိုပြုလာမည်ကို သူ မသိသော်လည်း ၎င်းသည် ပထမနှစ် အတန်းအတွက် အခွင့်အရေးပိုသာမည့်အရာ ဖြစ်လာမည်မှာ သေချာသည်။ သို့တိုင်အောင် မီဇူကီသည် ယုံကြည်မှု ရှိနေဆဲဖြစ်သည်။
မည်သို့ပင် အကြံအစည်ကြီးမားပါစေ အကြွင်းမဲ့ အင်အားကိုတော့ လွှမ်းမိုးနိုင်မည် မဟုတ်ချေ။
ဒုတိယနှစ် အခန်း (A) တွင် တစ်နှစ်စာ အားသာချက် အပြည့်အဝ ရှိနေသည်။ အကယ်၍ သူတို့ ရှုံးနိမ့်သွားခဲ့လျှင်တော့ ရှက်လွန်း၍ ဟိုကာဂဲ ကျောက်တောင်ကြီးကိုသာ ဝင်တိုက်သေလိုက်သင့်တော့သည်။
ကီတာဇာဝါ ရုံးခန်းသို့ ပြန်ရောက်သောအခါ အူချီဟာ ဆာစကေး သူ့ကို စောင့်နေသည်ကို တွေ့လိုက်ရသည်။ အကြောင်းရင်းကို မေးနေစရာပင် မလိုတော့ချေ။
"ဆရာ့ရဲ့ အရိပ်ကိုယ်ပွားက မင်းကို လေ့ကျင့်ဖို့ ခေါ်သွားလိမ့်မယ်" ကီတာဇာဝါက လက်အမှတ်အသားများ ပြုလုပ်ကာ အရိပ်ကိုယ်ပွားတစ်ခုကို ဖန်တီးလိုက်သည်။
"ကျေးဇူးတင်ပါတယ်၊ ဆရာကီတာဇာဝါ" ဆာစကေးသည် အရိပ်ကိုယ်ပွားနောက်သို့ လိုက်ပါသွားလေသည်။
ကီတာဇာဝါက သူ၏ကျောပြင်ကို စဉ်းစားခန်းဝင်လျက် စိုက်ကြည့်နေမိသည်။ အကယ်၍ ဆာစကေးသာ ရှာရင်းဂန်ကို နိုးကြားနိုင်ခဲ့လျှင် ဟျူဂါ နဲဂျီ ကို အနိုင်ယူနိုင်မည်လား။ ယေဘုယျအားဖြင့် ပြောရလျှင် အခွင့်အရေးတော့ ရှိသည်။သို့သော် သိပ်တော့မများလှပေ။
တိုမိုတစ်စက်ပါသော ရှာရင်းဂန်သည် ဗျကုဂန်ထက် ကြီးမားသည့် အားသာချက်မျိုး မရှိပေ။
ထို့အပြင် ဆာစကေးကို ရှာရင်ဂန် နိုးကြားလာစေရန် လုပ်ဖို့ဆိုသည်မှာလည်း မလွယ်ကူလှချေ။ မူလဇာတ်လမ်းတွင် သူသည် အူချီဟာမျိုးနွယ်စု လူသတ်ပွဲအတွင်း၌ ၎င်းကို ပထမဆုံး နိုးကြားနိုင်ခဲ့ခြင်း ဖြစ်သည်။
ယခုအချိန်တွင် ထိုအရာကို လှုံ့ဆော်ပေးနိုင်မည့် လုံလောက်သော တွန်းအားမျိုးကို ကီတာဇာဝါ မစဉ်းစားတတ်တော့ပေ။ အူဇူမာကီ နာရူတို နှင့် နှီးကိုးကောင် ကိစ္စကတော့ သူ လုံးဝ မထိရဲသည့် ပြဿနာအိုးကြီး ဖြစ်နေသည်။
"ငါ နောက်ထပ် ချဉ်းကပ်မှုပုံစံတစ်မျိုး ပြောင်းဖို့ လိုလာပြီထင်တယ်" ကီတာဇာဝါက စုတ်တံကို ကောက်ကိုင်လိုက်ပြီး ခေတ္တမျှ စဉ်းစားလိုက်ကာ စာလိပ်တစ်ခုပေါ်တွင် စာနှစ်ကြောင်း ရေးချလိုက်သည်။ 'ချာကရာပုံစံ ပြောင်းလဲခြင်း' နှင့် 'ချာကရာ ထိန်းချုပ်ခြင်း'။
ချာကရာပုံစံ ပြောင်းလဲခြင်း ယှဉ်ပြိုင်မှုမှာ ရှင်းလင်းလှသည်- ဘယ်သူ့ရဲ့ နင်ဂျူစုက ပိုပြီး အစွမ်းထက်သလဲ ဆိုတာပင်။
ကီတာဇာဝါက ဆာစကေး၏ မီးပုံစံ - မီးလုံးကြီး ဂျူစု ကို သတိရလိုက်သည်။ အကယ်၍ ဆာစကေးသာ ပါဝင်ခဲ့လျှင် ပထမနေရာရဖို့က ပြဿနာမဟုတ်တော့ပေ။
ချာကရာ ထိန်းချုပ်ခြင်းမှာ ရှင်းပြနေစရာပင် မလိုချေ။သစ်ပင်တက်ခြင်းနှင့် ရေပေါ်လမ်းလျှောက်ခြင်းတို့ ဖြစ်သည်။ သို့သော် ထိုပြိုင်ပွဲနှစ်ခုတည်းသာဆိုလျှင် မီဇူကီ သဘောတူလိမ့်မည် မဟုတ်ပေ။
ထို့ကြောင့် ကီတာဇာဝါ နောက်ထပ် အပိုင်းနှစ်ပိုင်း ထပ်ထည့်လိုက်သည်။ တစ်ခုက ကိုယ်ကာယ ကြံ့ခိုင်မှုစမ်းသပ်ခြင်းဖြစ်ပြီး အခြားတစ်ခုကတော့ လက်တွေ့ တိုက်ခိုက်ရေးပွဲ ဖြစ်သည်။
ကိုယ်ကာယစမ်းသပ်မှုတွင် နာရူတို ပါဝင်လာပါက နိုင်ဖို့ရာ သေချာနေပြီဖြစ်သည်။ လက်တွေ့ တိုက်ခိုက်ရေးပွဲမှာတော့ ယုံမှားသံသယဖြစ်ဖွယ်မရှိဘဲ မီဇူကီ အလိုချင်ဆုံးအရာပင် ဖြစ်ပေလိမ့်မည်။
အကယ်၍ ကျောင်းသားများ တစ်ယောက်ချင်း တိုက်ခိုက်ရမည်ဆိုပါက ပထမနှစ် အခန်း (A) သည် ကျိန်းသေ ရှုံးနိမ့်မည်ဖြစ်သည်။ ပါရမီရှင် ကျောင်းသားများသည် မိမိတို့ထက် အဆင့်မြင့်သူများကို စိန်ခေါ်နိုင်စွမ်းရှိသည်၊ သို့သော် ပါရမီရှင်ဆိုသည်မှာ ရှားပါးလှသည်။
အခန်း (A) မှ ကျောင်းသားအများစုမှာ သာမန်ကလေးများသာ ဖြစ်ကြသည်။ တစ်နှစ်စာ လေ့ကျင့်မှု မရှိဘဲနှင့် သူတို့ အနိုင်မရနိုင်ပေ။ ထို့ကြောင့် ကီတာဇာဝါက ငါးပွဲကစား သုံးပွဲနိုင် စနစ်ကို တီထွင်လိုက်သည်။
မည်သို့ပင်ဆိုစေ ဟျူဂါ နဲဂျီ သည် တစ်ယောက်တည်းသာ ရှိသည်။ အရေအတွက်ထက် အရည်အသွေးက ပိုအရေးကြီးသည် မဟုတ်ပါလား။
"ဘယ်အချိန်မှာ လုပ်သင့်လဲဆိုတော့..." ကီတာဇာဝါက မေးစေ့ကို ပွတ်ရင်း နက်နက်နဲနဲ စဉ်းစားနေမိသည်။
အကယ်၍ ဤယှဉ်ပြိုင်မှု အမျိုးအစား လေးခုကို မီဇူကီအား ယခု ဖွင့်ပြောပြလိုက်ပါက သူ့အနေဖြင့် ရည်ရွယ်ချက်ရှိရှိ လေ့ကျင့်မှုများ စီစဉ်လာမည်မှာ သေချာသည်။ သို့သော် ကီတာဇာဝါ မကြောက်ပါ တူညီသော လေ့ကျင့်မှုအောက်တွင် ပါရမီကသာ ကွာဟချက်ကို ဖြစ်စေမည်ဖြစ်သည်။
ထို့ပြင် ကီတာဇာဝါတွင် 'ကိုနိုဟာ ၁၂ ယောက်' ထဲမှ ကိုးယောက်တိတိ ရှိနေသည်။ မီဇူကီတွင် သုံးယောက်သာ ရှိသည်။ အားသာချက်ကတော့ သိသာထင်ရှားလှသည်။
တွက်ချက်ပြီးနောက် နောက်လာမည့် လစဉ်စာမေးပွဲအပြီးတွင် ပြုလုပ်ရန် ကီတာဇာဝါ ဆုံးဖြတ်လိုက်သည်။ တစ်လဆိုသော အချိန်သည် အရမ်းလည်း မကြာသလို အရမ်းလည်း မတိုလွန်းပေ။
မီဇူကီအနေဖြင့် သူ၏ကျောင်းသားများကို အပြည့်အဝ လေ့ကျင့်ပေးရန် အချိန်ရမည် မဟုတ်သော်လည်း ဆာစကေး၊ ဟီနာတာ နှင့် အီနို တို့အတွက်ကတော့ အဆင်သင့်ဖြစ်နေပေလိမ့်မည်။ စာလိပ်ကို ရေးအပြီးတွင် ကီတာဇာဝါသည် မီဇူကီ၏ ရုံးခန်းသို့သွားကာ ၎င်းကို ကမ်းပေးလိုက်သည်။
မီဇူကီက အကြောင်းအရာများကို ဖတ်ကြည့်ပြီး အလွယ်တကူပင် သဘောတူလိုက်သည်။ သူ၏စိတ်ထဲတွင် ရလဒ်မှာ အဖြေထွက်ပြီးသား ဖြစ်နေသည်။
ပထမ ယှဉ်ပြိုင်မှု သုံးခုတွင် ဟျူဂါ နဲဂျီ က ပထမနေရာကို ယူနိုင်လိမ့်မည်။ နောက်ဆုံး လက်တွေ့တိုက်ခိုက်ရေး အချီတွင်လည်း သူ တစ်ပွဲ အနိုင်ရနိုင်သေးသည်။ အကယ်၍ အခြား ကျောင်းသားနှစ်ဦးသာ သူတို့၏ပွဲများကို အနိုင်ရခဲ့မည်ဆိုလျှင် အောင်ပွဲကို သေချာပေါက် ဆွတ်ခူးနိုင်ပြီ ဖြစ်သည်။
အတိုချုပ်ပြောရလျှင် အခွင့်အရေးများက သူ့ဘက်တွင်သာ ရှိနေသည်ဟု သူ ယုံကြည်ထားသည်။
ကီတာဇာဝါ ရုံးခန်းသို့ ပြန်မသွားခဲ့ပေ။ ထိုအစား သူသည် ကူရယ်နိုင် ယုဟိ ၏ အိမ်သို့ တိုက်ရိုက် သွားခဲ့သည်။
ဆူနာဒဲ နှင့် အဆက်အသွယ်ရရှိကာ တာဝန်ပြီးမြောက်ရန် ပို၍ နီးစပ်လာစေရန်အတွက် ကူရာမာ ယာကူမို ကို စိတ်ပိုင်းဆိုင်ရာ ဆေးဘက်ဝင်နင်ဂျာတစ်ဦး အမြန်ဆုံးဖြစ်လာအောင် သူ ကူညီပေးချင်နေသည်။
"ကီတာဇာဝါ၊ အချိန်ကိုက်ပဲ!" ကူရယ်နိုင်က သူ့ကို လက်လှမ်းပြရင်း နှုတ်ဆက်လိုက်သည်။
"ပျော်နေပုံရတယ်၊ ပတ်ဝန်းကျင်လှည့်စားခြင်း ဂျူစု အောင်မြင်သွားလို့လား" ကီတာဇာဝါက လျှောက်သွားရင်း မေးလိုက်သည်။
"ပတ်ဝန်းကျင်လှည့်စားခြင်း ဂျူစု ကြောင့် မဟုတ်ဘူး။ ယာကူမိုရဲ့ သွေးမျိုးဆက်စွမ်းအင်ကြောင့်ပဲ" ကူရယ်နိုင်က ပြုံးရင်း ပြောသည်။ "ယာကူမို၊ သူ့ကို ပြလိုက်ပါဦး"
"ဟုတ်ကဲ့" ကူရာမာ ယာကူမို က ပန်းချီကားတစ်ချပ်ကို ထုတ်ယူလာသည်။ ကီတာဇာဝါ စိုက်ကြည့်နေစဉ်မှာပင် ပန်းချီကားထဲမှ ကြောင်ဖြူလေးသည် ရုတ်တရက် အသက်ဝင်လာကာ အောက်သို့ ခုန်ဆင်းပြီး ကြမ်းပြင်ပေါ်သို့ ညင်သာစွာ ကျလာသည်။
"ညောင်" ကြောင်လေးသည် သူ့အနားသို့ လျှောက်လာပြီး ခြေထောက်ကို ပွတ်သီးပွတ်သပ် လုပ်နေသည်။ ကီတာဇာဝါ ထိုင်ချလိုက်ပြီး ၎င်း၏ခေါင်းလေးကို ဖွဖွလေး ပွတ်သပ်ပေးလိုက်သည်။
"အစစ်နဲ့ မတူဘူးလား" ကူရယ်နိုင်က ရှင်းပြသည်။ "ဒါက ယာကူမို သူ့ရဲ့ သွေးမျိုးဆက်ကနေတစ်ဆင့် နိုးကြားလာတဲ့ ဂန်ဂျူစုတစ်ခုပဲ ၊ အဲဒါကို ဂန်ဂျူစု ရှင်ဆိုင်းလို့ ခေါ်တယ်"
"အကြံဉာဏ် ပေးခဲ့တဲ့အတွက် ဆရာကီတာဇာဝါကို ကျေးဇူးတင်ရမှာပါ" ယာကူမိုက တိုးညှင်းစွာ ပြောသည်။ "ဆရာက ကျွန်မရဲ့ သွေးမျိုးဆက်အမွေစွမ်းရည်ကို ဖော်ပြဖို့အတွက် ပန်းချီကို ကြားခံအဖြစ် အသုံးပြုဖို့ ပြောခဲ့တာလေ"
ကီတာဇာဝါ အနည်းငယ် အံ့အားသင့်သွားသော်လည်း သိပ်တော့ မများလှပေ။ မူလဇာတ်လမ်းထဲတွင်လည်း ဂန်ဂျူစု ရှင်ဆိုင်း အကြောင်းကို ဖော်ပြထားပြီးဖြစ်သည်။ ရိုးရိုးရှင်းရှင်း ပြောရလျှင် သူမ ပန်းချီဆွဲထားသည့်အရာကို လက်တွေ့ဘဝထဲသို့ ခေါ်ဆောင်လာနိုင်ခြင်း ဖြစ်သည်။
ရုတ်တရက် မီဇူကီနှင့် လောင်းကြေးကို သူ ပြန်အမှတ်ရသွားသည်။ ကူရာမာ ယာကူမို ၏ သွေးမျိုးဆက်အမွေအနှစ်စွမ်းအင်သည် သံသယဖြစ်ဖွယ်မရှိဘဲ မန်ဂဲကျိုး ရှာရင်ဂန် အဆင့်တွင် ရှိနေသည်လေ။
ဖြစ်နိုင်တာက... သူမ ဟျူဂါ နဲဂျီ ကို အနိုင်ယူနိုင်လိမ့်မည်။