အခန်း (၂၄) - အူချီဟာရဲ့ ရူးသွပ်သောရယ်မောသံ
ဟီနာတာသည် လမ်းမပေါ်တွင် ငေးမောကာ လမ်းလျှောက်နေခဲ့သည်။
အရင်က သူမ အတန်းလစ်သည့်အခါတိုင်း ကီတာဇာဝါ အမြဲရှိနေခဲ့သဖြင့် သူမအနေဖြင့် ဘာကိုမှ တွေးတောနေစရာမလိုဘဲ သူ့နောက်သို့သာ လိုက်သွားရုံပင်ဖြစ်သည်။ သို့သော် ယခုမူ သူမ တစ်ယောက်တည်းဖြစ်နေလေပြီ။
ခဏလောက် လမ်းလျှောက်ပြီးနောက် ဟီနာတာ တစ်ခုခုကို သတိရသွားကာ သစ်တောအုပ်လေးဆီသို့ ပြန်သွားခဲ့သည်။ ဤတစ်ကြိမ်တွင်တော့ သူမရင်ထဲ၌ အကြောက်တရားဆိုသည်မှာ မရှိတော့ပေ။
သူမ အသက်ပြင်းပြင်းတစ်ချက်ရှူလိုက်ပြီး သစ်ပင်တက်ခြင်း လေ့ကျင့်ခန်းကို စတင်လိုက်သည်။ သူမ၏ စိတ်နေသဘောထား ပြောင်းလဲသွားခြင်းကြောင့်လားမသိ၊ ယနေ့တွင်တော့ အရာရာတိုင်းက ထူးဆန်းစွာ ချောမွေ့နေသလို ခံစားရသည်။
မွန်းတည့်ချိန်အရောက်တွင်တော့ သူမသည် သစ်ပင်ထိပ်သို့ ပထမဆုံးအကြိမ်အဖြစ် တက်ရောက်နိုင်ခဲ့ပြီဖြစ်သည်။ ဟီနာတာ လက်သီးလေးဆုပ်ကာ လက်ကိုဝှေ့ယမ်းလိုက်ပြီး သူမ၏ မျက်နှာလေးထက်၌ အပြုံးပန်းလေး ပွင့်လန်းလာခဲ့သည်။
သူမ နေမင်းကြီးကို မော့ကြည့်လိုက်ပြီး အချိန်ကို သတိထားမိသွားကာ သစ်ပင်ပေါ်မှ အမြန်ခုန်ဆင်းပြီး နင်ဂျာကျောင်းဆီသို့ အပြေးအလွှား သွားခဲ့သည်။
"ဆရာ ကီတာဇာဝါ!" ဟီနာတာ ရုံးခန်းထဲသို့ ခပ်သုတ်သုတ် ဝင်လာခဲ့သည်။
"အချိန်ကိုက်ပါလား?" ကီတာဇာဝါက သူ၏ ထမင်းဘူးများကို တစ်ခုချင်းချထားရင်း "ငါ့ရဲ့ ထမင်းစားချင်စိတ်ဖြစ်စေတဲ့ နင်ဂျစ်စုကတော့ အထွတ်အထိပ်ကို ရောက်နေပြီထင်တယ်" ဟု နောက်ပြောင်လိုက်သည်။
"သမီး..." ဟျူဂါ ဟီနာတာ ပါးပြင်လေးများ ရဲတက်သွားပြီး မည်သို့ရှင်းပြရမှန်း မသိဖြစ်သွားသည်။ သူမ တကယ်ပဲ စားဖို့သက်သက် ပြေးလာခဲ့ခြင်း မဟုတ်ပေ။
"လာစားလှည့်။" ကီတာဇာဝါ သူမ၏ ရှက်ရွံ့နေသော မျက်နှာလေးကို ကြည့်ပြီး မနေနိုင်ဘဲ ရယ်မောလိုက်သည်။
ဟီနာတာ ပို၍ပင် ပြာယာခတ်သွားသော်လည်း သူမ၏ ခန္ဓာကိုယ်က အလိုအလျောက် လှုပ်ရှားသွားကာ သူ၏ မျက်နှာချင်းဆိုင်တွင် လိမ္မာစွာ ဝင်ထိုင်လိုက်သည်။
"မနက်က ဘယ်တွေသွားနေတာလဲ?" ကီတာဇာဝါက တူတစ်စုံ ကမ်းပေးရင်း မေးလိုက်သည်။
"သမီး သစ်ပင်တက်တဲ့ လေ့ကျင့်ခန်း ပြီးသွားပါပြီ။" ဟီနာတာက သူသတိပေးမှ သတိရသွားကာ ခေါင်းကို အမြန်မော့ပြီး သူ့ကိုကြည့်ရင်း ဖြေလိုက်သည်။
"တော်တယ်ဗျာ။ မင်းက သစ်ပင်တက်လေ့ကျင့်ခန်းကို ပထမဆုံး ပြီးမြောက်တဲ့သူပဲ။ အူချီဟာ ဆာစကေး တောင် မင်းကို မယှဉ်နိုင်သေးဘူး။" ကီတာဇာဝါ သူမ၏ မျက်လုံးများကို စိုက်ကြည့်ကာ သူမ၏ ခံစားချက်များကို နားလည်စွာဖြင့် ရိုးသားစွာ ချီးကျူးလိုက်သည်။
ဟျူဂါ ဟီနာတာ မနေနိုင်ဘဲ ပြုံးမိသွားပြီး သူမ၏ ခြေထောက်လေးများက လေထဲတွင် လွှဲယမ်းနေခဲ့သည်။
ဒါက သူမ ပထမဆုံးအကြိမ် ချီးကျူးခံရခြင်းတော့ မဟုတ်ပေ။ သို့သော် သူမကို တကယ်အသိအမှတ်ပြုသော သူတစ်ယောက်ထံမှ ချီးကျူးခံရခြင်းကတော့ ဒါပထမဆုံးအကြိမ်ဖြစ်သည်။ သူမရင်ထဲတွင်တော့ ကီတာဇာဝါ ၏ နေရာသည် ဟျူဂါ ဟီယာရှီ ပြီးလျှင် ဒုတိယနေရာ၌ ရှိနေလေပြီ။
"ချာကရာ ထိန်းချုပ်မှုကို တိုးတက်စေခြင်းက နူးညံ့သောလက်သီးကို ကျွမ်းကျင်ဖို့ အများကြီး အထောက်အကူဖြစ်စေလိမ့်မယ်။" ကီတာဇာဝါ ခဏမျှ စဉ်းစားလိုက်ပြီး "ဒါပေမယ့် သစ်ပင်တက်ရုံတစ်ခုတည်းနဲ့တော့ မလုံလောက်သေးဘူးပေါ့" ဟု ပြောလိုက်သည်။
"သမီး ကြိုးစားပါ့မယ်!" ဟီနာတာ၏ မျက်လုံးလေးများ ချက်ချင်း အရောင်လက်သွားသည်။ အကယ်၍ သူမ နူးညံ့သောလက်သီးကို မြန်မြန်ကျွမ်းကျင်နိုင်ခဲ့လျှင် သူမ၏ဖခင် ကျိန်းသေပေါက် ကျေနပ်ပေလိမ့်မည်။
ဟီနာတာ ဘာတွေးနေသည်ကို ကီတာဇာဝါ နားလည်ပါသည်။ သူမသည်လည်း အူချီဟာ ဆာစကေး နည်းတူ ဖခင်ဖြစ်သူထံမှ အသိအမှတ်ပြုမှုကို တောင့်တနေသူဖြစ်သည်။
သို့သော် သူတို့နှစ်ဦးစလုံးသည် တူညီသော ပြဿနာတစ်ခုကို ရင်ဆိုင်နေရသည်။ စကားပုံတစ်ခုရှိသည်မဟုတ်ပါလား... 'နှိုင်းယှဉ်ခြင်းက ပျော်ရွှင်မှုကို ခိုးယူသွားသော သူခိုး' ဆိုပြီးတော့လေ။
အူချီဟာ ဆာစကေး မှာ ယှဉ်ပြိုင်စရာ အူချီဟာ အီတာချီ ရှိပြီး၊ ဟျူဂါ ဟီနာတာ မှာတော့ ဟျူဂါ နေဂျီ (Hyuga Neji) ရှိနေသည်။ ပြီးတော့ ဟျူဂါ နေဂျီ က ယုံမှားသံသယဖြစ်ဖွယ်မရှိ ရှားပါးသော ပါရမီရှင်တစ်ဦးဖြစ်သည်။
မူလဇာတ်လမ်းထဲတွင် သူသည် ဟျူဂါ မျိုးနွယ်စုအတွင်းသာ လက်ဆင့်ကမ်းလေ့ရှိသော ရှစ်ကွက် ခြောက်ဆယ့်လေးချက်လက်သီး နှင့် ကောင်းကင်လှည့်ကွက်နည်းစနစ်များကို ကိုယ်ပိုင်လေ့လာမှုသက်သက်ဖြင့် နားလည်သဘောပေါက်ခဲ့သူဖြစ်သည်။
"မင်း ဗျကုဂန် ဖွင့်နိုင်ပြီလား?" ကီတာဇာဝါက ပုစွန်ကြော်တစ်ကိုက် စားပြီးနောက် မေးလိုက်သည်။
အူချီဟာ မျိုးနွယ်စုများအတွက် မျက်လုံးဖွင့်ရန်မှာ အရည်အချင်းနှင့် စိတ်ပိုင်းဆိုင်ရာ နှိုးဆွမှု အတိုင်းအတာတစ်ခုအထိ လိုအပ်သည်။ သို့သော် ဟျူဂါ မျိုးနွယ်စုအတွက်မူ ဗျကုဂန် ကို ဖွင့်ရန်မှာ အတော်လေး ရိုးရှင်းသည်—လေ့ကျင့်မှုသာ လိုအပ်သည်။
သီအိုရီအရ ဟျူဂါ နင်ဂျာတိုင်း ၎င်းကို ဖွင့်နိုင်စွမ်းရှိသည်။
ပြဿနာက ဖွင့်ပြီးသွားသည့်နောက် ဆက်လက်တိုးတက်ရန် လမ်းကြောင်းမရှိတော့ခြင်းဖြစ်သည်။ အူချီဟာများကဲ့သို့ မျက်လုံးများက အဆင့်ဆင့်ပြောင်းလဲခြင်းထိမျိုး မရှိပေ။
ဒါကြောင့်လည်း ဇာတ်လမ်း အလယ်ပိုင်းနှင့် နှောင်းပိုင်းတွင် နေဂျီသည် အူချီဟာ ဆာစကေး ထက် အများကြီး အလှမ်းကွာသွားခဲ့ရခြင်းဖြစ်သည်။ အမှန်အတိုင်းပြောရလျှင် သူသည် နှောင်းပိုင်းအဆင့်များအထိပင် မရောက်ခဲ့ချေ။
"မရသေးပါဘူး။" ဟီနာတာ ခေါင်းခါရင်း ပြန်ဖြေလိုက်သည်။
ကီတာဇာဝါ အံ့ဩမသွားပါ။ မူလဇာတ်လမ်းထဲတွင် ဟျူဂါ ဟီနာတာ သည် ချူနင် စာမေးပွဲတွင်မှ ဗျကုဂန် ကို ပထမဆုံးအကြိမ် စတင်အသုံးပြုခဲ့ခြင်းဖြစ်သည်။
မည်သည့်အချိန်တွင် စတင်ဖွင့်နိုင်ခဲ့သည်ကို အတိအကျ မဖော်ပြထားသော်လည်း အစောကြီးမဟုတ်သည်ကတော့ သေချာပါသည်။ ကီတာဇာဝါ ထမင်းတစ်ဇွန်းခပ်ပြီး ဖြည်းညှင်းစွာ ဝါးစားလိုက်သည်။
သူကိုယ်တိုင်ကလည်း ဗျကုဂန် နှင့် နူးညံ့သောလက်သီး အကြောင်းကို သိပ်မသိသောကြောင့် သဘာဝကျကျပင် ဟီနာတာကို သိပ်အကူအညီမပေးနိုင်ခဲ့ပေ။ သို့သော် ကံကောင်းထောက်မစွာဖြင့် သူ၌ မျှော်လင့်ချက် ရှိနေသည်။
သူသာ ဟီနာတာ၏ တာဝန်ကို ပြီးမြောက်အောင် လုပ်ပေးနိုင်ပါက သူကိုယ်တိုင်လည်း ဗျကုဂန် ကို ရရှိနိုင်မည်ဖြစ်သည်။
"ဧပြီလကျရင် လစဉ်စာမေးပွဲ ရှိတယ်။" ကီတာဇာဝါ ခဏမျှ စဉ်းစားလိုက်ပြီး "မင်း ပထမ ရချင်လား?" ဟု မေးလိုက်သည်။
"သမီးလား?" ဟီနာတာ အနည်းငယ် လန့်သွားပြီး သူမမျက်နှာပေါ်တွင် နားမလည်နိုင်မှုများ ဖြစ်ပေါ်သွားသည်။
"ဆရာ မင်းကို အထူးလေ့ကျင့်ခန်းတွေနဲ့ ကူညီပေးနိုင်တယ်။" ကီတာဇာဝါ သတ္တိကိုလေ့ကျင့်ပေးရန် နည်းလမ်းသစ်တစ်ခုကို စဉ်းစားမိသွားသည်။ ကျောင်းတစ်ကျောင်းလုံးရှေ့တွင် မိန့်ခွန်းပြောစေခြင်းဖြစ်သည်။
မိန့်ခွန်းပြောခြင်းက သတ္တိလိုအပ်သည်။ အထူးသဖြင့် လူအုပ်ကြီးရှေ့တွင်ဖြစ်သည်။ လစဉ်စာမေးပွဲအပြီးတွင် ထူးချွန်သော ကျောင်းသားများက မိန့်ခွန်းပြောရမည့် အစီအစဉ်တစ်ခု ပါရှိသည်။
"ကျေးဇူးတင်ပါတယ် ဆရာ ကီတာဇာဝါ။" ဟီနာတာ အပြည့်အဝ နားမလည်သော်လည်း ကီတာဇာဝါကို မငြင်းဆန်ချင်သောကြောင့် သဘောတူလိုက်သည်။
"ကိစ္စမရှိပါဘူး။" ကီတာဇာဝါ ပြုံးလိုက်သော်လည်း မိန့်ခွန်းအကြောင်းကိုတော့ ထည့်မပြောသေးပေ။
အချိန်သည် မွန်းလွဲပိုင်းသို့ ကူးပြောင်းသွားသည်။
ယနေ့၏ လက်တွေ့အတန်းသည် နင်ဂျာလက်နက်များ ပစ်ခတ်ခြင်းအကြောင်းပင် ဖြစ်သည်။ သို့သော် ဤတစ်ကြိမ်တွင် ကူနိုင်း မဟုတ်ဘဲ ရှူရီကန် ဖြစ်သည်။ နင်ဂျာလက်နက်တိုင်းတွင် ၎င်းတို့၏ ကိုယ်ပိုင်ထူးခြားချက်များ ရှိသောကြောင့် ထပ်ခါတလဲလဲ လေ့ကျင့်ရန် လိုအပ်သည်။
သို့သော် နင်ဂျာမျိုးနွယ်စုများမှ ပါရမီရှင်ကလေးများအတွက်မူ ၎င်းက သိပ်မခက်ခဲလှပေ။
နင်ဂျာကျောင်း၏ တိတ်ဆိတ်သော လေ့ကျင့်ရေးကွင်း၌
အစကတော့ ဆာစကေး တစ်ယောက်တည်းသာ အထူးလေ့ကျင့်မှု ရရှိခဲ့သော်လည်း ယခုအခါတွင်တော့ ဟီနာတာ၊ ယာမာနာကာ အီနို၊ အူဇူမာကီ နာရူတို နှင့် ကူရာမာ ယာကူမို တို့ပါ ထပ်တိုးလာခဲ့ပြီဖြစ်သည်။
"နာရူတို နဲ့ ယာကူမို၊ ကွင်းကိုပတ်ပြေးကြ။" ကီတာဇာဝါ အမိန့်ပေးလိုက်သည်။ "အီနို နဲ့ ဆာစကေး ကတော့ သစ်ပင်တက်တာကို လေ့ကျင့်။"
"ဟုတ်ကဲ့ပါ၊ ဆရာ ကီတာဇာဝါ!" နာရူတို တက်တက်ကြွကြွ ပြန်ဖြေပြီးနောက် လှည့်ကာ ပြေးလေတော့သည်။
ယာကူမိုက သူ၏ တက်ကြွနေသော ပုံစံကို အားကျစွာဖြင့် ကြည့်လိုက်ပြီးနောက် ကီတာဇာဝါ၏ ညွှန်ကြားချက်ကို တိတ်ဆိတ်စွာ လိုက်နာကာ စတင်ပြေးလွှားလိုက်သည်။
"ဆရာ ကီတာဇာဝါ" အီနိုက စပ်စုချင်စိတ်ဖြင့် မေးလိုက်သည်။ "ဟီနာတာက သစ်ပင်တက်လေ့ကျင့်ခန်း မလုပ်ရဘူးလား?"
"သူက အဲဒါကို ပြီးသွားပြီလေ" ကီတာဇာဝါက ပြုံးရင်း ပြန်ဖြေသည်။
"မိုက်လိုက်တာ!" အီနို မနေနိုင်ဘဲ အာမေဍိတ်သံ ထွက်သွားသည်။ သူမကိုယ်တိုင်လည်း သစ်ပင်တက်လေ့ကျင့်ခန်းကို အရင်က လုပ်ဖူးပြီး ဒါက ဘယ်လောက်ခက်ခဲကြောင်း သူမ သိထားသည်။
အူချီဟာ ဆာစကေး ၏ ခန္ဓာကိုယ် အနည်းငယ် တင်းမာသွားပြီး မသိစိတ်မှ လက်သီးကို ဆုပ်လိုက်မိသည်။ သူက တကယ်ပဲ ဟျူဂါ ဟီနာတာ ထက် တစ်လှမ်း နောက်ကျနေခဲ့ပြီလား?
ပါရမီရှင်ဟု အမြဲတမ်း သတ်မှတ်ခံထားရသူ တစ်ယောက်အနေဖြင့် သူ ဒေါသထွက်လာကာ ချက်ချင်းလှည့်ပြီး သစ်ပင်ပေါ် စတင်တက်တော့သည်။
"ဆာစကေး ၊ ငါ့ကိုစောင့်ဦးလေ!" အီနိုက အနောက်မှ ကပ်လျက် လိုက်သွားသည်။
"ဟီနာတာ၊ ဟိုသစ်ပင်ဆီ သွားလိုက်။" ကီတာဇာဝါ ရှင်းပြလိုက်သည်။ "ငါတို့ သစ်ပင်တက်လေ့ကျင့်ခန်းကိုပဲ ဆက်လုပ်မယ်။ ဒါပေမယ့် အခုကစပြီး သစ်ပင်တက်နေရင်းနဲ့ နင်ဂျာလက်နက်တွေကိုပါ ရှောင်တိမ်းရလိမ့်မယ်။"
သူက စကားပြောရင်း သစ်သားကူနိုင်း နှစ်လက်ကို ထုတ်ယူလိုက်သည်။
"သမီး နားလည်ပါပြီ!" ဟီနာတာ ခိုင်မာစွာ ခေါင်းညိတ်လိုက်သည်။ တိုက်ခိုက်ခံနေရစဉ်အတွင်း သစ်ပင်တက်ရခြင်းက အသေအချာကို ပို၍ခက်ခဲပေလိမ့်မည်။
သို့သော် သူမက ကြောက်တတ်သော စရိုက်ရှိလင့်ကစား ခေါင်းမာပြီး ခိုင်မာသူတစ်ယောက်လည်း ဖြစ်သည်။ စိန်ခေါ်မှုတစ်ခုမှ သူမ ဆုတ်ခွာမည်မဟုတ်ပေ။ ဟီနာတာ၏ ခြေထောက်များဆီသို့ ချက္ကရာများ စီးဆင်းသွားပြီး သူမ စတင်တက်လိုက်သည်။
"ဟီနာတာ၊ သတိထား။" ကီတာဇာဝါ ကူနိုင် တစ်လက်ကို ပစ်လိုက်သည်။ သူမ ဤအဆင့်လေ့ကျင့်ခန်းကို ယခုမှ စတင်လုပ်ဆောင်ရခြင်းဖြစ်သည့်အတွက် သူက ကြိုတင်သတိပေးလိုက်ခြင်းဖြစ်သည်။
သူမ လုံးဝအသားကျသွားသည့်အခါ သူ သတိပေးတော့မည်မဟုတ်ပေ။
သူ့အသံကို ကြားသည်နှင့် ဟီနာတာ အလျင်အမြန် ရှောင်တိမ်းလိုက်သည်။
နာရီဝက်ကြာပြီးနောက်တွင် အူချီဟာ ဆာစကေး သည် သစ်ပင်ထိပ်သို့ နောက်ဆုံး၌ ရောက်ရှိသွားခဲ့သည်။ သူ သက်ပြင်းတစ်ချက်ချလိုက်ပြီး သူ့မျက်နှာပေါ်တွင် အပြုံးတစ်ခု ပေါ်လာခဲ့သည်။
ထို့နောက် တစ်ခုခုကို သတိရသွားသကဲ့သို့ သူ အမြန်ခုန်ဆင်းလိုက်သည်။ သူ နေရာလွတ်တစ်ခုတွင် ရပ်လိုက်ပြီး လက်သင်္ကေတ များကို ပြုလုပ်ရန် စိတ်အားထက်သန်နေခဲ့သည်။
မီးပုံစံ - မီးလုံးကြီး ဂျူစု!
ချာကရာများ ပေါက်ကွဲထွက်လာပြီး မီးလုံးကြီးတစ်လုံး ဖြစ်ပေါ်လာသည်။ ဆာစကေး ဆွံ့အသွားခဲ့သည်။
အရင်က သူ၏မီးလုံးသည် လက်သီးဆုပ်ထက် အနည်းငယ်သာ ကြီးမားခဲ့သည်။ ယခုမူ ဘတ်စကက်ဘော တစ်လုံးထက် နှစ်ဆခွဲကျော်ခန့် ပိုကြီးနေလေပြီ။ အကယ်၍ ရန်သူကိုသာ ထိမှန်သွားပါက ပြင်းထန်သော ဒဏ်ရာများကို ရရှိစေနိုင်မည်ဖြစ်သည်။
ပိုအရေးကြီးသည်မှာ သူ၏မီးလုံးသည် ယခုအခါ အူချီဟာ အီတာချီ တစ်ချိန်က ပြသခဲ့ဖူးသော မီးပုံစံ - မီးလုံးကြီး ဂျူစု ၏ လေးပုံတစ်ပုံခန့် အရွယ်အစားရှိနေပြီဖြစ်သည်။
ဒါက တစ်ပတ်တာ လေ့ကျင့်မှု၏ ရလဒ်သာဆိုလျှင် တစ်လလောက်ဆိုရင်ကော သူ၏ဖခင်ထံမှ အသိအမှတ်ပြုမှုကို ရရှိဖို့ လုံလောက်နိုင်မည်လား?
"မင်းက ငါ့သားအဖြစ် ခံယူထိုက်ပါတယ်" ဟု အူချီဟာ ဖူဂါကူ က ပြောနေသည်ကို စိတ်ကူးယဉ်ရင်း ဆာစကေး သူ၏ နဖူးကို လက်တစ်ဖက်ဖြင့် ဖိကာ တုန်ယင်နေခဲ့သည်။
နောက်ဆုံးတွင် သူ မအောင့်ထားနိုင်တော့ဘဲ ရူးသွပ်စွာ ရယ်မောလိုက်လေတော့သည်။
ကီတာဇာဝါ ၏ နှုတ်ခမ်းများ တွန့်ချိုးသွားသည်။ သူ ကောင်းကင်ကို မော့ကြည့်လိုက်သည်။တကယ်ကို နေသာတဲ့ နေ့တစ်နေ့ပါပဲ။
ထိုစဉ် သူ၏ ရှေ့တွင် စာသားလေးကြောင်း ပေါ်လာခဲ့သည်။
[သင့်၏ တစ်သက်တာရန်သူ အူချီဟာ ဆာစကေးသည် ဂုဏ်ယူဝင့်ကြွားနေပြီး ရန်စမှုတစ်ခုကို ပြုလုပ်လိုက်သည်။
လက်ရှိ တာဝန် - အူချီဟာ ဆာစကေး ၏ မီးပုံစံ - မီးလုံးကြီး ဂျူစုသည် အူချီဟာ အီတာချီ ၏ ပညာရပ်ကို ကျော်လွန်သွားပြီးနောက်၊ ၎င်းကို ကျော်လွန်ရန် တူညီသော ဂျူစုကို အသုံးပြုပါ။]
[တာဝန် ဆုလာဘ် - မီးပုံစံ - မဟာမီးတောက် ဖျက်ဆီးခြင်းပညာရပ်။ ]
[လက်ခံပါသလား?]
အိုး... လာပြန်ပြီ။ ငါ့ရဲ့ စနစ်က ဘာလို့ဒီလောက်တောင် သေးသိမ်ရတာလဲ? ဒါပေမယ့် ကီတာဇာဝါ ကတော့ သဘောကျပါသည်။ ဒါ့အပြင် ဆုလာဘ်အတွက်ဆိုလျှင်တောင် သူ ဒါကို ပြီးအောင်လုပ်ရမည်ဖြစ်သည်။
မီးပုံစံ - မဟာမီးတောက် ဖျက်ဆီးခြင်းပညာရပ် သည် သင်ယူရန် အခက်အခဲရှုထောင့်မှ ကြည့်လျှင် B-အဆင့်ရှိ နည်းစနစ်တစ်ခုဖြစ်သည်။ မူလဇာတ်လမ်းထဲတွင် ၎င်း၏ စွမ်းအားသည် ဒဏ္ဍာရီလာတစ်ခုဖြစ်သည်။
စတုတ္ထအကြိမ်မြောက် နင်ဂျာကမ္ဘာစစ်ကြီးအတွင်း ဂျိုနင် အများစု ပါဝင်သော ရေပုံစံ အသုံးပြုသူ နင်ဂျာ အယောက်နှစ်ဆယ်ကျော်က အူချီဟာ မန်ဒါရာ ၏ မဟာမီးတောက် ဖျက်ဆီးခြင်းပညာရပ် ကို တားဆီးရန်အတွက် ရေပုံစံ - ရေတံတိုင်း ဂျူစု ဖြင့် ပူးပေါင်းအားထုတ်ခဲ့ရသည်။
အချုပ်အားဖြင့်ဆိုရလျှင် သင်ယူရန် ခက်ခဲခြင်းက နည်းစနစ်တစ်ခု၏ စွမ်းအားကို အဆုံးအဖြတ် မပေးနိုင်ပေ။ ဤမီးပုံစံ နင်ဂျစ်စု ၏ အလားအလာသည် အလွန်ကြီးမားလှပေသည်။