အပိုင်း ( ၇၀ ) – ဂါ့ရာ လှဲလျောင်းအနိုင်ရ၊ တစ်မြီးသားရဲ ကြားကြည့်ရှုမုဒ်

"ဒါပေါ့... ဂါအာရာ၊ အမှန်တကယ်တော့ အနာဂတ်ဆိုတာ မင်းမြင်တွေ့ခဲ့ရတာထက် ပိုပြီးတော့တောင် ကြောက်စရာကောင်းပါသေးတယ်"

နာရုတိုက သူ၏ ကိုးမြီးချာကရာပုံစံကို ငြိမ်သက်စွာ ရုပ်သိမ်းလိုက်ပြီး အတည်ပြုသည့်အနေဖြင့် ခေါင်းညိတ်ပြလိုက်သည်။

"ဒါဆိုရင်... အနာဂတ်ကို ကြိုတင်သိရှိထားတဲ့ မင်းအနေနဲ့ ဒီတစ်ခေါက် ငါ့ဆီလာရောက်ရတဲ့ ရည်ရွယ်ချက်ကိုလည်း နားလည်ထားမှာပေါ့။ မင်းရဲ့ ရည်ရွယ်ချက်က ဘာလဲ။ ငါတို့ကို တားဆီးဖို့လား"

ဂါ့ရာသည် တစ်ချက်မျှ မှင်သက်သွားပြီးနောက် အနာဂတ်တွင် မိမိ၏ မိတ်ဆွေစစ်ဖြစ်လာမည့် နာရုတိုအား ရှုပ်ထွေးလှသော မျက်ဝန်းအစုံဖြင့် စိုက်ကြည့်ရင်း ရင်ထဲရှိ စိုးရိမ်ပူပန်မှုများကို မေးမြန်းလိုက်သည်။

"မင်းတို့ရဲ့ အစီအစဉ်ကို ငါမတားဆီးပါဘူး။ ရွက်ပုန်းရွာပဲဖြစ်ဖြစ်၊ သဲကပဲဖြစ်ဖြစ် လူတိုင်းဟာ မိမိတို့ရဲ့ လုပ်ရပ်အတွက် ပြန်လည်ပေးဆပ်ကြရမှာပဲ။ ဒီအဖြစ်အပျက်ကလည်း အနာဂတ်ဖြစ်ထွန်းမှုတွေအတွက် တွန်းအားတစ်ခု ဖြစ်လာလိမ့်မယ်။ မင်း ကာဇဲကာဂဲ ဖြစ်လာမယ့်ကိစ္စကတော့ သီးခြားကိစ္စတစ်ခုပေါ့။ ငါ့ရဲ့ တစ်ခုတည်းသော ရည်ရွယ်ချက်က မင်းကို ပိုပြီးအစွမ်းထက်လာစေဖို့ပဲ။ ဒါမှလည်း အနာဂတ်မှာ ရန်သူတွေ ရောက်လာတဲ့အခါ မင်းမှာ ခုခံနိုင်စွမ်း ရှိမှာ ဖြစ်တယ်။ အနာဂတ်မှာ ရန်သူတွေ တံခါးဝအထိ ရောက်လာတဲ့အချိန်ကျမှ မင်းအနေနဲ့ ဘာမှမတတ်နိုင်ဘဲ ဖြစ်နေမှာကို ငါမလိုလားဘူး။ ဘာပဲဖြစ်ဖြစ် မင်းက သူတို့ရဲ့ ပထမဆုံး ပစ်မှတ်ဖြစ်သလို ငါတို့ လူသားစွမ်းအားရှင်တွေရဲ့ ပထမဆုံး ခုခံရေးစည်းလည်း ဖြစ်တယ်။ ဖြစ်နိုင်ရင် မင်းကို ပြီးပြည့်စုံတဲ့ လူသားစွမ်းအားရှင်တစ်ယောက် ဖြစ်လာစေချင်တယ်"

နာရုတိုကိုယ်တိုင်ကလည်း ရွက်ပုန်းရွာ ပျက်စီးရေးအစီအစဉ်ကို အကောင်အထည်ဖော်ရန် ကြံစည်နေသူဖြစ်ရာ မည်သို့လျှင် တားဆီးပါမည်နည်း။ သူသည် ဂါ့ရာအား လှည့်စားရန်အတွက် အထင်ကြီးစရာကောင်းသော အကြောင်းပြချက်တစ်ခုကိုသာ ထုတ်သုံးလိုက်ခြင်း ဖြစ်သည်။ သို့သော် ဤအရာမှာလည်း နာရုတို၏ စိတ်ကူးများထဲမှ တစ်ခု ဖြစ်သည်။ အကယ်၍ သူက ဂါ့ရာအား ပြီးပြည့်စုံသော လူသားစွမ်းအားရှင်တစ်ဦး ဖြစ်လာစေရန် ကူညီပေးနိုင်ပါက ရမှတ်အမြောက်အမြားကို ရရှိမည်မှာ သေချာသည်။

အမှန်တကယ်တော့ နာရုတိုသည် ဂါ့ရာနှင့် ပူးပေါင်းကာ ရွက်ပုန်းရွာကို ဖျက်ဆီးပစ်ရန် ခေတ္တမျှ တွေးတောခဲ့မိသေးသည်။ ထိုသို့ပြုလုပ်ပါက ပိုမိုများပြားသော ရမှတ်များကို ရရှိနိုင်မည် ဖြစ်သည်။ သို့သော် နာရုတိုသည် ထိုမျှော်လင့်ချက်ကို နောက်ဆုံးတွင် စွန့်လွှတ်လိုက်သည်။ ဤကဲ့သို့သော ဘဝမျိုးမှာ ပျင်းစရာကောင်းလွန်းလှသည်။ စွမ်းအားနောက်သို့ လိုက်လံရှာဖွေခြင်းမှာ အပြစ်မရှိသော်လည်း စွမ်းအား၏ ကျွန်တစ်ယောက်တော့ အဖြစ်မခံနိုင်ပေ။

"ကာဇဲကာဂဲ ရာထူး ဟုတ်လား..."

ဤစကားကို ကြားရသောအခါ ဂါ့ရာသည် တီးတိုးရေရွတ်ရင်း အတွေးများ ရှုပ်ထွေးသွားခဲ့ရသည်။ မိမိ၏ဖခင်ဖြစ်သူ စတုတ္ထမြောက် ကာဇဲကာဂဲသည် ဤအစီအစဉ်အတွင်းမှာတင် သေဆုံးသွားခဲ့ရခြင်း ဖြစ်နိုင်မလား။ သို့မဟုတ်ပါက သူအနေဖြင့် မည်သို့ပြုလုပ်၍ ပဥ္စမမြောက် ကာဇဲကာဂဲ ဖြစ်လာနိုင်ပါမည်နည်း။

"ငါနားလည်ပါပြီ။ အူဇုမာကီ နာရုတို... ငါ မင်းဆီကို နောက်တစ်ခေါက် ပြန်လာခဲ့ပါ့မယ်"

အချက်အလက်အမြောက်အမြားကို လက်ခံရရှိထားသဖြင့် ဂါ့ရာသည် ဆက်လက်စကားပြောရန် စိတ်ကူးမရှိတော့ဘဲ ထွက်ခွာသွားခဲ့သည်။ နာရုတိုကလည်း သူ အား ဆွဲထားခြင်းမရှိဘဲ ကိုးမြီးသားရဲအား အဓိပ္ပာယ်ပါပါ တစ်ချက်ကြည့်လိုက်ရာ ဂါ့ရာ၏ စိတ်ဝိဉာဉ်မှာ ပိတ်လှောင်မှုကမ္ဘာအတွင်းမှ ပျောက်ကွယ်သွားခဲ့တော့သည်။

"နာရုတို... မင်း ဘာဖြစ်လို့ နောက်ကွယ်က ပုန်းအောင်းနေတဲ့ ရန်သူတွေအကြောင်းကို ထည့်မပြောခဲ့တာလဲ။ ဒါဆိုရင် သူတို့တွေ ပိုပြီးတော့ သတိရှိသွားကြမှာပေါ့"

ဂါ့ရာ၏ စိတ်ဝိဉာဉ် ပျောက်ကွယ်သွားပြီးနောက် ကိုးမြီးသားရဲက နာရုတိုအား ငုံ့ကြည့်ရင်း မေးမြန်းလိုက်သည်။

"ဘာဖြစ်လို့လဲဆိုတော့ သူတို့တွေ ထိတ်လန့်သွားမှာစိုးလို့ပဲ။ မင်းကိုယ်တိုင်တောင်မှ ဒီအကြောင်းကို ပထမဆုံး သိလိုက်ရတုန်းက ကြောက်ရွံ့ပြီး ဘဝကို သံသယဖြစ်ခဲ့ရတယ် မဟုတ်ဘူးလား။ ဒါ့အပြင် သူတို့တွေသာ အဖမ်းခံရမယ်ဆိုရင် ဒီသတင်းအချက်အလက်တွေက ပေါက်ကြားသွားလိမ့်မယ်"

နာရုတိုက ဂရုမစိုက်ဟန်ဖြင့် ရှင်းပြလိုက်သော်လည်း သူ၏ စိတ်ထဲတွင် ဤအပြောင်းအလဲမှတစ်ဆင့် ရမှတ်မည်မျှ ရရှိမည်ကို မျှော်လင့်နေခဲ့သည်။ သတင်းအချက်အလက် ပေါက်ကြားမည့်ကိစ္စကို သူ အနည်းငယ်မျှ စိုးရိမ်ခြင်းမရှိပေ။

ပိတ်လှောင်မှုကမ္ဘာ၏ ပြင်ပတွင်

ဂါ့ရာ၏ စိတ်ဝိဉာဉ် ပြန်လည်ရောက်ရှိလာပြီးနောက် ရှုကာကူကို ကာကွယ်ထားသော ချာကရ များသည် လျင်မြန်စွာ ပြန်လည်စုစည်းသွားခဲ့သည်။ တံခါးအပြင်ဘက်တွင် ရှိနေသော အန်ကိုနှင့် အခြားသူများသည်လည်း သက်ပြင်းအရှည်ကြီး တစ်ချက်ကို ချလိုက်နိုင်ကြတော့သည်။

ဤအချိန်တွင် ဂါ့ရာသည် အမြီးတစ်ခုတည်းရှိသော သားရဲ ရှုကာကူနှင့် ပထမဆုံးအကြိမ်အဖြစ် တရားဝင် တွေ့ဆုံဆွေးနွေးမှုကို စတင်လိုက်သည်။

"ဂါ့ရာ... အဲဒီမြေခွေး ကောင်လေးက တကယ်ပဲ အဲဒီလိုပြောခဲ့တာလား။ အနာဂတ်မှာ ပိုပြီးတော့ ကြောက်စရာကောင်းတဲ့ ရန်သူတွေ ပေါ်လာပြီး အမြီးကောင်သားရဲတွေရဲ့ စွမ်းအားကို လိုက်လံလုယူကြလိမ့်မယ် ဟုတ်လား"

ဂါ့ရာ၏ ပြောပြချက်ကို ကြားရပြီးနောက် ရှုကာကူသည် မျက်ဝန်းများကို ကျဉ်းမြောင်းလျက် အံ့ဩတကြီး ရေရွတ်လိုက်သည်။ ဤအကြောင်းကို တွေးမိသောအခါ သူသည် ဒေါသထွက်လွန်းသဖြင့် သွားများကို တကျိကျိကြိတ်မိတော့သည်။ အူချီဟာ မာဒါရာ တစ်ယောက်တည်းတင် မလုံလောက်သေးဘဲ အခုတော့ ပိုပြီးကြောက်စရာကောင်းတဲ့ ရန်သူတွေ ရှိနေသေးတယ် ဟုတ်လား။

"ရှုကာကူ... အနာဂတ်က အဖြစ်အပျက်တွေက မင်းအတွက်တင်မကဘဲ ငါ့အတွက်လည်း လက်ခံရခက်ပါတယ်။ ဒါပေမဲ့ ဒါတွေအားလုံးကို ပြောင်းလဲပစ်လို့ရတယ်။ အူဇုမာကီ နာရုတိုရဲ့ အခုလက်ရှိ အခြေအနေက ငါတို့ရဲ့ အနာဂတ် မဟုတ်ပါဘူး။ ဖြစ်နိုင်ရင် ငါ မင်းနဲ့အတူ အဲဒီလိုမျိုး တည်ရှိမှုတစ်ခု ဖြစ်လာချင်တယ်။ အခုဆိုရင် ငါတို့မှာ တူညီတဲ့ ရန်သူတစ်ယောက် ရှိနေပြီလေ"

ဂါ့ရာက ခေါင်းကိုမော့ကာ ရှုကာကူအား စိုက်ကြည့်ရင်း သူ၏ ထင်မြင်ချက်ကို ရဲရဲဝံဝံ ထုတ်ဖော်ပြောဆိုလိုက်သည်။ ဤကဲ့သို့သော အတွေးအမြင်မှာ အနာဂတ်ကို မြင်တွေ့ခဲ့ရပြီးနောက် နာရုတိုနှင့် ကိုးမြီးသားရဲတို့အကြားရှိ ဆက်ဆံရေးကို လေ့လာမိခြင်းကြောင့် ဖြစ်ပေါ်လာရခြင်း ဖြစ်သည်။ ရှုကာကူ၏ ကြောက်မက်ဖွယ်ရာ ပုံရိပ်မှာ ဂါ့ရာ၏ စိတ်ထဲတွင် မသိမသာ ပြောင်းလဲသွားခဲ့ပြီ ဖြစ်သည်။

ရှုကာကူ၏ မျက်ဝန်းအစုံမှာ ကျုံ့ဝင်သွားခဲ့ပြီး အမူအရာ လုံးဝပြောင်းလဲသွားသော ဂါ့ရာကို စိုက်ကြည့်နေမိသည်။ သူက ဤကဲ့သို့သော စကားမျိုး ပြောလိမ့်မည်ဟု သူ မထင်မှတ်ထားခဲ့ပေ။ ဒါဟာ အရင်တုန်းက မိမိကို ကြောက်ရွံ့နေခဲ့တဲ့ ကလေးလေး ဟုတ်ပါသေးရဲ့လား။

"အဲဒီမြေခွေးကောင်လေးရဲ့ အခြေအနေမျိုးပေါ့... ဂါ့ရာ၊ မင်းက တကယ့်ကို ရည်မှန်းချက်ကြီးတာပဲ။ ဒီဖြစ်စဉ်က အရမ်းကို အန္တရာယ်များပါတယ်။ တကယ်လို့ မင်းက ငါ့ရဲ့ ဝါးမြိုခြင်းကို ခံရမှာကို မကြောက်ဘူးဆိုရင်တော့ စမ်းကြည့်လိုက်လေ..."

ရှုကာကူက သူ၏ ထူးခြားလှသော ခြောက်ခြားဖွယ်ရာ လေသံဖြင့် ထပ်မံရယ်မောလိုက်ပြီး သူ၏ ဧရာမ လက်သီးကြီးကို ဆန့်ထုတ်ကာ ဂါ့ရာထံသို့ ညွှန်ပြလိုက်သည်။ ရှုကာကူနှင့် ဂါ့ရာအကြားရှိ ပိတ်လှောင်မှုမှာ နာရုတို၏ နေရာကဲ့သို့ ပြီးပြည့်စုံခြင်းမရှိပေ။ ရှုကာကူသည် ဂါ့ရာ၏ ခန္ဓာကိုယ်အတွင်း ပိတ်လှောင်ခံထားရသည်ထက် ဂါ့ရာထံတွင် တွဲကပ်နေခြင်းနှင့် ပိုတူသည်။ သဲရွာ၏ ပိတ်လှောင်မှုအတတ်မှာ အမြီးတစ်ခုတည်းရှိသော သားရဲကို မနည်းမျှသာ ထိန်းချုပ်ထားနိုင်ခြင်း ဖြစ်သည်။ ယခုအခါ ကိုးမြီးသားရဲနှင့် အပြန်အလှန် သက်ရောက်မှုများကြောင့် ဤပိတ်လှောင်မှုမှာ ပိုမိုပျက်စီးယိုယွင်းနေခဲ့ပြီ ဖြစ်သည်။

"ဝါးမြိုခံရမှာ ဟုတ်လား။ အရင်တုန်းကဆိုရင်တော့ ငါ ဒီကိစ္စကို အရမ်းစိုးရိမ်မိမှာပဲ။ ဒါပေမဲ့ အခုအချိန်မှာတော့ ငါ မင်းကို ယုံကြည်ပါတယ်။"

ဂါ့ရာသည် ရှုကာကူ၏ ဆန့်ထုတ်ထားသော လက်သီးကြီးကို ကြည့်ကာ ခဏမျှ တွေဝေသွားပြီးနောက် ရှုကာကူအား အံ့ဩသွားစေသည့် အပြုံးတစ်ခုကို ဖော်ပြလျက် သူ၏ လက်သီးလေးကို ဆန့်ထုတ်ကာ ထိကပ်လိုက်သည်။ ထိုတိုတောင်းလှသော အချိန်အတွင်းမှာပဲ ဂါ့ရာသည် ရေရေရာရာ တွေးတောနိုင်ခဲ့ပြီ ဖြစ်သည်။ အကယ်၍ မအောင်မြင်ဘဲ ရှုကာကူ၏ ဝါးမြိုခြင်းကို ခံရမည်ဆိုပါကလည်း ဒါဟာ စောစောစီးစီး သေဆုံးရရုံသာ ရှိသည်။ သူအနေဖြင့် မသေဆုံးဖူးတာမှ မဟုတ်ဘဲ။ ဘာပဲဖြစ်ဖြစ် ခန္ဓာကိုယ်ကို ရွာသို့ ပြန်လည်သယ်ဆောင်သွားပါက အဖွားအို ချီယိုက ပြန်လည်ကယ်တင်ပေးနိုင်လိမ့်မည် မဟုတ်လား။

ဂါ့ရာသည် အဖွားအို ချီယိုက သူအား ကယ်တင်ရန်အတွက် မိမိ၏ အသက်ကို စွန့်လွှတ်ခဲ့ရခြင်းဖြစ်ကြောင်း လုံးဝမသိရှိသေးပေ။ အကယ်၍ သူသာ ယခုအချိန်တွင် မဆင်မခြင် သေဆုံးသွားခဲ့ပါက အမှန်တကယ် အသက်ပျောက်သွားနိုင်ခြေ ရှိသည်။

"ဂါ့ရာ... မင်း တကယ်ပဲ ပြောင်းလဲသွားခဲ့ပြီ။ မင်းက ပိုပိုပြီးတော့ အဲဒီလူကြီး ဖန်ဖုနဲ့ တူလာပြီပဲ"

ရှုကာကူသည် မိမိထံသို့ ရောက်ရှိလာသော ဂါ့ရာ၏ လက်သီးကို ကြည့်ရင်း မှောင်မိုက်မှုအတွင်း ပုန်းကွယ်နေသော သူ၏ နှုတ်ခမ်းအစုံမှာ အနည်းငယ် ကောက်ကွေးသွားခဲ့ရသည်။ သူသည် အံ့ဩသွားခဲ့ရပြီး စိတ်ထဲတွင်လည်း တွေးတောနေမိသည်။ ဒါဟာ သူ၏ နောက်ဆုံး စမ်းသပ်မှု ဖြစ်သည်။ အမှန်အတိုင်းပြောရလျှင် ရှုကာကူကိုယ်တိုင်လည်း အနာဂတ်အတွက် စိုးရိမ်ပူပန်နေခဲ့မိသည်။ အကယ်၍ မိမိအနေဖြင့် မိမိလေးစားရသော ဂါ့ရာနှင့်အတူ ပြီးပြည့်စုံသော လူသားစွမ်းအားရှင်တစ်ဦးအဖြစ် တည်ရှိနိုင်မည်ဆိုပါက ဒါဟာ ကောင်းမွန်သော ကြိုးစားမှုတစ်ခု ဖြစ်လာလိမ့်မည်။ ဘာပဲဖြစ်ဖြစ် မြင့်မြတ်လှတဲ့ အမြီးတစ်ခုတည်းရှိတဲ့ ရှုကာကူအရှင်မြတ်က ဘာဖြစ်လို့ အဲဒီနံစော်နေတဲ့ မြေခွေးအိုကြီးထက် ညံ့ရမှာလဲ။

လက်သီးချင်း ထိတွေ့သွားသည့် အခိုက်အတန့်တွင် ဂါ့ရာနှင့် ရှုကာကူတို့သည် အချင်းချင်း စိတ်နှလုံးချင်း လုံးဝဖွင့်ဟလိုက်ကြပြီ ဖြစ်သည်။ ၎င်းတို့ မည်သို့ပင် တွေးတောနေကြပါစေ ဤအခိုက်အတန့်တွင် ၎င်းတို့သည် တစ်ဦး၏ စွမ်းအားအပေါ်တစ်ဦး ခုခံကာကွယ်ခြင်းမရှိဘဲ လက်ခံလိုက်ကြသည်။ ဂါ့ရာကို အသိအမှတ်ပြုလိုက်ပြီဖြစ်သော ရှုကာကူသည် ကိုးမြီးသားရဲ ပြုလုပ်ခဲ့သကဲ့သို့ သူ၏ အသန့်စင်ဆုံးသော အမြီးကောင်သားရဲချာကရာများကို စတင်စေလွှတ်ပေးလိုက်တော့သည်။

ဂါ့ရာသည် ထိုအမြီးကောင်သားရဲချာကရာများကြောင့် ဆိုးကျိုးတစ်စုံတစ်ရာ ခံစားရခြင်းမရှိပေ။ ပြင်ပကမ္ဘာတွင် ဂါ့ရာ၏ ခန္ဓာကိုယ်ထက်မှ သဲရောင်ချာကရာ ဝတ်ရုံတစ်ခု စတင်ထွက်ပေါ်လာခဲ့သည်။ တဖြည်းဖြည်းနှင့် ထိုချာကရာ ဝတ်ရုံကြီးမှာ ပိုမိုထင်ရှားလာခဲ့ပြီး ၎င်း၏အပေါ်တွင် ရှုကာကူ၏ ခရမ်းရောင် ကျိန်စာအမှတ်အသားများ ပေါ်ထွက်လာခဲ့သည်။ ဝတ်ရုံ၏ ကော်လံနှစ်ဖက်တွင် အမည်းရောင် ချိတ်ဆွဲရာ ခြောက်ခု ပေါ်ထွက်လာခဲ့ပြီး ဂါ့ရာ၏ ရင်ဘတ်နှင့် ကျောပြင်ထက်တွင်လည်း လမ်းစဉ်ခြောက်သွယ်ဆရာတော်၏ အမှတ်အသားအချို့ ထွက်ပေါ်လာခဲ့သည်။ ဂါ့ရာ၏ နီမြန်းသော ဆံနွယ်များသည် သဲရောင်ချာကရာ များကြောင့် အရောင်ပြောင်းလဲသွားခဲ့ပြီး ထူးခြားလှသော ပုံစံတစ်ခု ဖြစ်ပေါ်လာခဲ့သည်။ ထိုဆံနွယ်များထက်တွင်မူ သဲရောင်ချာကရာများသည် လေထုထဲတွင် ဆံချည်မျှင်များပမာ လွင့်ပျံနေခဲ့ကြသည်။

သူ၏ ကျောပြင်ထက်ရှိ သဲဗူးကြီးမှာလည်း တစ်ခဏအတွင်းမှာတင် ပျက်စီးသွားခဲ့ပြီး လေထုထဲတွင် လွင့်ပျံလျက် ဂါ့ရာ၏ ပတ်ဝန်းကျင်ကို ဝန်းရံပေးထားခဲ့သည်။ ရုတ်တရက်ဆိုသလို ဂါ့ရာသည် မျက်ဝန်း များကို ဖွင့်ဟလိုက်ရာ ထိုမျက်ဝန်းများမှာ ရှုကာကူ၏ မျက်ဝန်းများနှင့် တူညီနေခဲ့ပြီ ဖြစ်သည်။ သူ၏ ပတ်ဝန်းကျင်ရှိ အရှိန်အဝါများသည် လျင်မြန်စွာ မြင့်တက်လာခဲ့ပြီး ပိုမိုပြင်းထန်သော ဖိအားများကို ထုတ်လွှတ်နေခဲ့တော့သည်။

အပြင်ဘက်တွင် ရှိနေသော အန်ကိုနှင့် အဖွဲ့သားများသည် ထိုနေရာမှာတင် ထပ်မံ၍ တုန်လှုပ်သွားခဲ့ရပြန်သည်။ ကံကောင်းထောက်မစွာဖြင့် ဤတစ်ကြိမ်တွင် ပြင်းထန်သော ဖိအားများသာ ရှိနေခဲ့ပြီး သားရဲကြီး၏ ဆိုးယုတ်ကြောက်မက်ဖွယ်ရာ ချာကရာ အနံ့အသက်များ ပါဝင်ခြင်းမရှိပေ။ ဂါ့ရာ၏ အမြီးတစ်ခုတည်းရှိသော ရှုကာကူပုံစံမှာ တရားဝင် ရောက်ရှိလာခဲ့ပြီ ဖြစ်သည်။

(သဲ ရွာမှ ဂါ့ရာ၏ ဘဝလမ်းကြောင်းကို ပြောင်းလဲပေးနိုင်ခဲ့သဖြင့် ရမှတ် ၅၀၀ ရရှိသည်။)

(အမြီးတစ်ခုတည်းရှိသော ရှုကာကူ၏ ဘဝလမ်းကြောင်းကို ပြောင်းလဲပေးနိုင်ခဲ့သဖြင့် ရမှတ် ၅၀၀၀ ရရှိသည်။)

နာရုတိုသည် ဂါ့ရာကြောင့် ဖြစ်ပေါ်လာသော လှုပ်ရှားမှုများကြောင့် နိုးထလာခဲ့ပြီး အမူအရာ လုံးဝပြောင်းလဲသွားသော ဂါ့ရာကို မြင်တွေ့လိုက်ရသဖြင့် အလွန်အမင်း ဝမ်းမြောက်မိသွားခဲ့သည်။ ဒါဟာ မူလဇာတ်လမ်းတွင် ဖြစ်ပျက်ခဲ့ခြင်းမရှိသော အပြောင်းအလဲတစ်ခု ဖြစ်သည်။ သို့သော် သူသည် တစ်ပြိုင်နက်တည်းမှာ စိတ်တိုသွားခဲ့ရသည်။ ဂါ့ရာသည် ဤမျှလွယ်ကူစွာဖြင့် ရှုကာကူပုံစံကို ရရှိသွားခဲ့ခြင်း ဖြစ်သည်။ မိမိအနေဖြင့် သော့ချက်ကို ရှာဖွေရန်နှင့် ရင်ဘက်ခြမ်းရှိ ကိုးမြီးသားရဲကို ထိန်းချုပ်နိုင်ရန်အတွက် နာကျင်ဖွယ်ရာ ဖြစ်စဉ်များကို ဖြတ်သန်းခဲ့ရသည် မဟုတ်လား။