“မင်းပဲ... ငါ့ကို ဘီဂျူးတွေထဲမှာ အားအနည်းဆုံးလို့ ခေါ်တဲ့ကောင်!”
ရှုကူကုက ရှင်းကို စိုက်ကြည့်ရင်း ဒေါသတကြီး ဟိန်းဟောက်လိုက်သည်။ ဤကလေးမှာ ထိုကျိန်စာသင့်မြေခွေးကဲ့သို့ပင် စိတ်အနှောင့်အယှက်ပေးရာ၌ တစ်ဖက်ကမ်းခတ်လှသည်။ ထို ‘ကျိန်စာသင့်မြေခွေး’ ဆိုသည်မှာ အခြားသူမဟုတ်၊ အမြီးအရေအတွက်ပေါ်မူတည်၍ အင်အားကို တိုင်းတာကာ ရှုကူကုကို အမြဲအထင်သေးတတ်သည့် ‘ကူရာမ’ ပင် ဖြစ်သည်။ ထို့ကြောင့်လည်း ရှုကူကုနှင့် ကူရာမတို့မှာ မည်သို့မျှ အဆင်မပြေကြခြင်းဖြစ်သည်။
“ဟုတ်တယ်လေ။ ကူရာမကိုယ်တိုင် ပြောတာ။ တစ်မြီးရှင်က အားအနည်းဆုံးပဲတဲ့။ အမြီးရှိသားရဲကလပ်ကနေတောင် ထုတ်ပစ်သင့်တယ်တဲ့” ဟု ရှင်းက ခပ်ပြုံးပြုံးဖြင့် ဆွပေးလိုက်သည်။
“အဲဒီမြေခွေးစုတ်! တစ်နေ့ကျရင် သူ့အမွေးတွေကို ငါ အကုန်ဆွဲနှုတ်ပစ်မယ်! မင်းလည်း သေဖို့သာ ပြင်ထားတော့!”
ရှုကူကုက ရှင်းရှိရာသို့ လက်သည်းကြီးများဖြင့် ရိုက်ချလိုက်သည်။ ရှင်းက ကူရှီးနားနှင့် မီကိုတိုကို ဆွဲကာ ကိုယ်ယောင်ဖျောက် လှုပ်ရှားမှုကို သုံး၍ လျင်မြန်စွာ ရှောင်တိမ်းလိုက်သည်။ ရှုကူကု၏ တိုက်ခိုက်မှုမှာ လွဲချော်သွားသော်လည်း မြေပြင်ကို အက်ကွဲစေခဲ့ပြီး ကိုနိုဟာစခန်းတစ်ခုလုံး တုန်ခါသွားစေသည်။ ဘီဂျူးများမှာ အလွန်စွမ်းအားကြီးမားလှသည်။ တစ်ဦးချင်း တိုက်ခိုက်မှုတွင် အလွန်တော်သော ကာဂဲအဆင့်တစ်ဦးက အနိုင်ယူနိုင်ကောင်း ယူနိုင်လိမ့်မည် ဖြစ်သော်လည်း စစ်မြေပြင်တွင်မူ သူတို့၏ ဖျက်ဆီးအားမှာ ဆယ်ဆမက ပိုမိုပြင်းထန်လှသည်။
“ဘာတွေဖြစ်နေတာလဲ။ တစ်မြီးရှင်က ဘာလို့ ဒီရောက်နေရတာလဲ”
ဆူနာဒဲ ရောက်ရှိလာပြီး ရှုကူကုကို စိုက်ကြည့်ကာ မေးလိုက်သည်။ ဒန်ဇိုးသည် ကိုနိုဟာစစ်သည် အများအပြားကို ခေါ်ဆောင်၍ သဲရွာကို တိုက်ခိုက်နေသော်လည်း ဆူနာဒဲမှာမူ ဒဏ်ရာရသူများကို ကုသပေးရန်နှင့် ချီယို၏ အဆိပ်များအတွက် ဖြေဆေးဖော်ရန် ကျန်ရစ်ခဲ့ခြင်း ဖြစ်သည်။ သို့သော် ရှုကူကု၏ ဆူညံသံများကို သူမ လျစ်လျူမရှုနိုင်ခဲ့ပေ။
“အဲဒါကတော့ ဆူနာဂါကူရီကိုပဲ မေးကြည့်ရမှာပေါ့” ဟု ရှင်းက ပုခုံးတွန့်ရင်း ပြောလိုက်သည်။
“အသေခံလိုက်စမ်း ကလေးစုတ်! မင်းကို ငါသတ်မယ်! လေဓာတ် - လေဖောက်ခွဲချက် (Drilling Air Bullet)!”
ရှုကူကုက ပါးစပ်ကို ဟကာ ကြီးမားသော လေလုံးကြီးတစ်ခုကို မှုတ်ထုတ်လိုက်သည်။ ဆူနာဒဲက ထိုတိုက်ခိုက်မှုကို တားဆီးရန် ရှေ့သို့ တက်လိုက်သော်လည်း ရှင်းက သူမကို တားလိုက်သည်။
“ဒါကို ကျွန်တော်ပဲ ကိုင်တွယ်လိုက်ပါ့မယ်”
ဆူနာဒဲအနေဖြင့် ၎င်းကို တားဆီးနိုင်မည်ဖြစ်သော်လည်း ခက်ခက်ခဲခဲ ရုန်းကန်ရမည်ကို ရှင်း သိသည်။ ရှုကူကုမှာ မည်သို့ပင်ဆိုစေ အားနည်းသူ မဟုတ်ပေ။
“ရေခဲစွမ်းအား - သုံးထပ်ရေခဲတံတိုင်း!”
ကြီးမားသော ရေခဲတံတိုင်း သုံးထပ် ပေါ်ထွက်လာသည်။ ရှုကူကု၏ တိုက်ခိုက်မှုကြောင့် ပထမနှစ်ထပ်မှာ ကြေမွသွားသော်လည်း တတိယမြောက် တံတိုင်းကမူ ကြံ့ကြံ့ခံနိုင်ခဲ့သည်။
“ရှုကူကုက မင်းကို တော်တော် ရန်ငြိုးထားနေပုံပဲ။ မင်း ဘာလုပ်လိုက်တာလဲ” ဟု ဆူနာဒဲက ရှင်းဘက်သို့ လှည့်မေးလိုက်သည်။
“ဘာမှမလုပ်ပါဘူး။ ရှုကူကုက ဘီဂျူးတွေထဲမှာ အားအနည်းဆုံးလို့ပဲ သူက ပြောလိုက်တာပါ” ဟု ကူရှီးနားက ကြားဖြတ်ဖြေလိုက်သည်။
ဆူနာဒဲက ရှင်းကို စိတ်ပျက်သလို ကြည့်လိုက်သည်။ ရှုကူကု စိတ်တိုနေသည်မှာ မဆန်းတော့ပေ။ ရှင်းက သူ့ကို စော်ကားလိုက်ခြင်း မဟုတ်ပါလား။
“ဒီကိစ္စကို ခင်ဗျားတို့ ကိုင်တွယ်လို့ မရဘူး။ ကျွန်တော်ပဲ ရှင်းလိုက်မယ်။ ခင်ဗျားတို့က ဟိုဘက်က ဆူနာနင်ဂျာတွေကို သွားရှင်းလိုက်ပါ” ဟု ရှင်းက ဆူနာဒဲနှင့် မိန်းကလေးများကို ပြောလိုက်သည်။ ထို့နောက် သူသည် လျှပ်တပြက်အတွင်း ပျောက်ကွယ်သွားသည်။
ဘုန်း!
ရှုကူကုမှာ တစ်ဟုန်ထိုး လွင့်ထွက်သွားပြီး မြေပြင်ပေါ်သို့ ပြင်းထန်စွာ ကျဆင်းသွားသည်။
“သူ တစ်မြီးရှင်ကို ကိုင်တွယ်နိုင်ပါတယ်။ ကျုပ်တို့ ဟိုဆူနာကောင်တွေကို သွားရှင်းကြစို့”
ရှင်းက တစ်မြီးရှင်ကို ကန်ချက်တစ်ချက်တည်းဖြင့် လွင့်ထွက်အောင် လုပ်နိုင်သည်ကို ဆူနာဒဲ အံ့အားသင့်စွာ ကြည့်နေမိသည်။ လူသားတစ်ယောက်က ဘီဂျူးကို ကန်ထုတ်လိုက်သည်လား။ သူတို့နှစ်ယောက်၏ အခန်းကဏ္ဍများ ပြောင်းပြန် ဖြစ်နေသလားပင် ထင်ရသည်။
“ငါလည်း အဲဒီကောင်ကြီးနဲ့ တိုက်ချင်သေးတယ်!” ကူရှီးနားက တိုက်ချင်ခိုက်ချင်စိတ်များ ပြင်းပြနေသည်။
မီကိုတိုက သူမကို ဆွဲထားလိုက်ပြီး “ကူရှီးနား၊ မဆင်မခြင် မလုပ်ပါနဲ့” ဟု တားလိုက်သည်။
ရှင်းကမူ သူတို့၏စကားများကို မကြားနိုင်တော့ပေ။ သူသည် ရှုကူကုကို သဲအိတ်တစ်ခုကဲ့သို့ သဘောထားကာ စိတ်ကြိုက် ပညာပြနေသည်။ နှစ်ရှည်လများ လေ့ကျင့်ထားသည့် ကန်ချက်၊ ထိုးချက်နှင့် ပစ်ပေါက်မှုစသည့် တိုင်ဂျူစု တိုက်ကွက်များကို သူ ထုတ်သုံးနေသည်။ ထို့ပြင် သူသည် ‘ရာဂဏန်းခွန်အားတံဆိပ်’ (Strength of a Hundred Seal) ကိုလည်း အသုံးပြုထားသဖြင့် လက်သီးတစ်ချက်ချင်းစီတိုင်းမှာ ပြင်းထန်သော အင်အားများ ပါဝင်နေသည်။ ရိုက်ချက်တိုင်းကြောင့် ရှုကူကုမှာ လွင့်ထွက်နေရပြီး ရှင်းက ဘီဂျူးကြီးကို ဘော်လီဘောရိုက်သလို ဆော့ကစားနေသကဲ့သို့ ဖြစ်နေသည်။
“မင်းလို ပိုးမွှားကောင်! မင်းကို ငါသတ်မယ်!”
ရှုကူကုက ဒေါသတကြီး ဟိန်းဟောက်လိုက်သည်။ ရှင်းက ရှုကူကု၏ မေးရိုးကို လက်သီးဖြင့် အရှိန်အဟုန်ပြင်းစွာ ထိုးချလိုက်ရာ သူ၏အသံမှာ တိတ်သွားရသည်။ ထို့နောက် ပြင်းထန်သော အပေါ်ပင့်လက်သီးဖြင့် ရှုကူကုကို ဝေဟင်ထက်သို့ မြှောက်တက်သွားစေသည်။
“ရှုကူကု... မင်း ငါ့ကို ကျေးဇူးတင်သင့်တယ်။ မင်းရဲ့ ပျံသန်းချင်တဲ့ အိပ်မက်ကို ငါက ကူညီပေးနေတာလေ”
ရှုကူကု ကောင်းကင်မှ ပြန်အကျတွင် ရှင်းက အပေါ်သို့ ခုန်တက်ကာ ကန်ချက်တစ်ချက် ထပ်မံကျွေးလိုက်ရာ ရှုကူကုမှာ ပိုမိုမြင့်သော နေရာသို့ လွင့်တက်သွားပြန်သည်။
“ရာဆန်ရှုရီကန်!”
သူသည် ကြီးမားသော ရာဆန်ရှုရီကန်ကို အရှိန်ဖြင့် ပြုတ်ကျလာသော ရှုကူကုဆီသို့ ပစ်လွှတ်လိုက်သည်။ ရှုကူကုမှာ နာကျင်စွာဖြင့် အော်ဟစ်လိုက်ရသည်။ သူသည် ချက္ကရာဖြင့် တည်ဆောက်ထားသည့် သက်ရှိဖြစ်သော်လည်း နာကျင်မှုကို ခံစားနိုင်စွမ်း ရှိသည်။
“နာလိုက်တာ! မင်းကို သတ်ပစ်မယ်!”
ရှုကူကုသည် မြေပြင်ပေါ်သို့ ပြင်းထန်စွာ ကျဆင်းသွားပြီး ချိုင့်ခွက်ကြီးတစ်ခု ဖြစ်ပေါ်သွားသည်။ ရာဆန်ရှုရီကန်ကြောင့် သူ၏လက်မောင်းတစ်ဖက်မှာ ပြတ်ထွက်သွားခဲ့ရပြီ။ ရှင်ကမူ လက်မောင်းတစ်ဖက် ပြတ်သွားသော်လည်း အာမာန်မပျက်သေးသည့် ရှုကူကုကို ကြည့်ကာ အထင်ကြီးသွားမိသည်။ ရှုကူကု၏ လက်မောင်းမှာ ချက်ချင်းပင် ပြန်လည် ထွက်ပေါ်လာသောကြောင့်ပင်။
လက်မောင်း ပြန်ထွက်လာသော်လည်း ရှုကူကု၏ ခန္ဓာကိုယ်မှာ အနည်းငယ် သေးငယ်သွားသည်ကို ရှင်း သတိပြုမိလိုက်သည်။ ၎င်းမှာ ဆယ်မြီး၏ ချက္ကရာမှတစ်ဆင့် ယင်-ယန် ထုတ်လွှတ်မှု (Yin-Yang Release) ဖြင့် ဖန်တီးထားသည့် သက်ရှိပုံစံ ဖြစ်သဖြင့် လက်မောင်းတစ်ဖက် ဆုံးရှုံးသွားလျှင်ပင် အခြားကိုယ်အင်္ဂါ အစိတ်အပိုင်းများမှ ချက္ကရာကို ယူ၍ ပြန်လည် တည်ဆောက်နိုင်သည်။ သို့သော် အလုံးစုံအားဖြင့်မူ သူ၏ ချက္ကရာပမာဏ လျော့နည်းသွားခြင်းကြောင့် ခန္ဓာကိုယ်မှာ သေးငယ်သွားရခြင်း ဖြစ်သည်။
“အံ့သြသွားလား။ ငါ့ကို ဒီလောက်နဲ့ အနိုင်ယူလို့ရမယ် ထင်နေတာလား။ သေစမ်း ပိုးမွှားကောင်!” ရှုကူကုက လေဖောက်ခွဲချက်များကို မရပ်မနား ပစ်လွှတ်လိုက်သည်။
“မင်းက အသံသာကျယ်တာ၊ တကယ်တမ်း ဘာမှမဟုတ်ပါဘူး” ဟု ရှင်းက လှောင်ပြောင်လိုက်သည်။ သူသည် ရှုကူကု၏ လေလုံးများကို လက်သီးဖြင့်ပင် အလွယ်တကူ ရိုက်ထုတ်လိုက်သည်။ ထိုတိုက်ခိုက်မှုမျိုးမှာ ကာဂဲအဆင့်ရှိသူများအတွက်မူ အလွယ်တကူ ရှောင်တိမ်းနိုင်သော အရာများသာ ဖြစ်ပေသည်။