အခန်း (၁၁၈) : နင်တို့ အူချီဟာမျိုးနွယ်စုကလည်း တော်တော်ဆင်းရဲတာပဲ

ရက်အနည်းငယ် ကြာပြီးနောက် ရှင်းသည် အူချီဟာမျိုးနွယ်စုဝင်းဆီသို့ ထွက်လာခဲ့သည်။ အူချီဟာတို့၏ နယ်မြေမှာ ကိုနိုဟာ၏ အချက်အခြာကျသော နေရာတွင် တည်ရှိနေဆဲဖြစ်ပြီး ရွာအစွန်အဖျားသို့ မောင်းထုတ်ခြင်း မခံရသေးချေ။ ရှင်းမှာ တစ်ယောက်တည်းလာခြင်းဖြစ်ပြီး ကူရှီးနားနှင့် မီကိုတိုတို့ လိုက်မလာခဲ့ကြပေ။ သူ ရောက်သွားသောအခါ ကင်းစောင့်များက သူ့ကို မတားဆီးဘဲ အလိုက်သင့် ပေးဝင်ကြသည်။ သူ့ကို ပေးဝင်ရန် ကြိုတင် ညွှန်ကြားခံထားရပုံရသည်။

ပင်မခန်းမထဲတွင် အူချီဟာမျိုးနွယ်စု၏ အကြီးအကဲဖြစ်သူက သူ့ကို စောင့်ကြိုနေသည်။ ၎င်းက အူချီဟာတို့ဘက်မှ ရှင်းကို အတော်လေး အလေးထားကြောင်း ပြသနေခြင်းပင်။

"မင်းက အူဇူမာကီး ရှင်း ထင်တယ်၊ ငါကတော့ အူချီဟာမျိုးနွယ်စုရဲ့ အကြီးအကဲ 'အူချီဟာ တာဂျီမ' ပါ" အဘိုးကြီးက ထရပ်ပြီး ရှင်းကို နှုတ်ဆက်လိုက်သည်။

"ဩော်... နာမည်ကျော် အူချီဟာ တာဂျီမ-ဆန် ပါလား။ တွေ့ရတာ ဝမ်းသာပါတယ်ဗျာ" ဟု ရှင်းက ပြုံးလျက် ပြောလိုက်သည်။

အူချီဟာ တာဂျီမ ခဏတာ ဆိုင်းငံ့သွားပြီးမှ— "မင်း ငါ့အကြောင်း ကြားဖူးလို့လား?"

"ဟင့်အင်း... မကြားဖူးဘူး" ရှင်းက ခပ်အေးအေးပင် ခေါင်းခါပြလိုက်သည်။ သူသည် လက်ရှိ မျိုးနွယ်စုခေါင်းဆောင်က ဘယ်သူလဲဆိုတာတောင် မသိရာ အကြီးအကဲကို ဆိုဖွယ်ရာမရှိပေ။ (ဒါပေမဲ့ ဒီလူ့နာမည်က တာဂျီမ တဲ့... မာဒါရာရဲ့ အဖေ နာမည်နဲ့ သွားတူနေတာပဲ)

တာဂျီမ၏ မျက်နှာ အနည်းငယ် ပျက်သွားသည်။ "အူဇူမာကီး ရှင်း... ငါ မင်းဆီ ဖိတ်စာပို့ထားတာ ရက်အတော်ကြာပြီလေ။ ဘာလို့ အခုမှ ပေါ်လာတာလဲ?" သူ၏ လေသံမှာ မကျေနပ်မှုများ ပါဝင်နေသည်။

ရှင်းက သူ့ကို တစ်ချက် ဝေ့ကြည့်လိုက်ပြီး— "အလုပ်ရှုပ်နေလို့လေ၊ အဲဒါ ပြဿနာရှိလို့လား တာဂျီမ-ဆန်?"

တာဂျီမ၏ မျက်နှာ မည်းမှောင်သွားသည်။ အလုပ်ရှုပ်နေတယ် ဟုတ်လား? မနေ့ကတင် ရှင်းတစ်ယောက် အေးအေးလူလူ ဈေးဝယ်ထွက်နေတာကို သူ သတင်းရရှိထားသည်။

"တာဂျီမ-ဆန်... လိုရင်းကိုပဲ ပြောရအောင်။ ဘာကိစ္စလဲ?" ရှင်းက စိတ်မရှည်သလို ပြောလိုက်သည်။ ဤအဖိုးကြီးနှင့် အချိန်ဖြုန်းနေရန် သူ့မှာ အားမအားချေ။

"အူဇူမာကီး ရှင်း... မင်းက အူဇူမာကီး တစ်ယောက်ဖြစ်ပြီးတော့ ဘယ်လိုလုပ် ရှာရင်ဂန်ကို ပိုင်ဆိုင်နေတာလဲ?" တာဂျီမက လှည့်ပတ်မနေဘဲ တိုက်ရိုက်ပင် မေးလိုက်သည်။ ရှင်းက သူ့ကို ရက်ပေါင်းများစွာ စောင့်ခိုင်းထားသဖြင့် သူ အတော်လေး ဒေါသထွက်နေပြီဖြစ်သည်။

"အဲဒါကို ကျွန်တော် ဖြေစရာ မလိုဘူးထင်တယ်။ ပြီးတော့ ခင်ဗျားရဲ့ လေသံကိုလည်း နည်းနည်း ဆင်ခြင်ပါဦး။ ကျွန်တော်က အူချီဟာမျိုးနွယ်စုရဲ့ ဧည့်သည်နော်" ရှင်းက သူ၏ လူသတ်ငွေ့ (Killing Intent) အချို့ကို ထုတ်လွှတ်လိုက်ရာ တာဂျီမမှာ တုန်လှုပ်သွားသည်။ အူချီဟာ ရှင်နိုဘီ အချို့ အခန်းထဲသို့ အပြေးအလွှား ဝင်လာကြသော်လည်း တာဂျီမက သူတို့ကို လက်ယမ်းကာ ပြန်လွှတ်လိုက်သည်။ သူသည် ရှင်းနှင့် အတင်းအဓမ္မ ထိပ်တိုက်တွေ့ရန် မရည်ရွယ်ပေ။

သူတို့နှစ်ဦးတည်း ကျန်ခဲ့သောအခါ တာဂျီမက အရေးကြီးဆုံးမေးခွန်းကို မေးလိုက်သည်။ "မင်း 'မန်ဂဲခရူး ရှာရင်ဂန်' ကို ဘယ်လို နိုးထစေခဲ့တာလဲ?"

ရှင်းက တခိခိ ရယ်မောလိုက်သည်။ "ခင်ဗျားကို ပြောပြလို့ရပါတယ်၊ ဒါပေမဲ့ အပြန်အလှန် တစ်ခုခုတော့ ပေးသင့်တယ် မဟုတ်လား?"

"မင်း ဘာလိုချင်လဲ?" တာဂျီမက စိတ်လှုပ်ရှားစွာဖြင့် ထရပ်လိုက်သည်။ မန်ဂဲခရူးကို နိုးထစေမည့် နည်းလမ်းသာ သိရမည်ဆိုလျှင် သူ မည်သည့်တန်ဖိုးကိုမဆို ပေးဆပ်ရန် အသင့်ပင်။ အကယ်၍ မျိုးနွယ်စုထဲမှ တစ်စုံတစ်ယောက်သာ မန်ဂဲခရူးကို ပိုင်ဆိုင်နိုင်လျှင် အူချီဟာမျိုးနွယ်စုသည် စစ်နိုင်ငံများခေတ်တုန်းကလို ပြန်လည် အစွမ်းထက်လာမည်ဖြစ်သည်။

"ကျွန်တော် လိုချင်တာ မှန်သမျှကို ခင်ဗျား ပေးနိုင်မှာမို့လို့လား?"

"အူချီဟာမျိုးနွယ်စု ပိုင်ဆိုင်တဲ့ အရာမှန်သမျှပေါ့။ အကြီးအကဲ တစ်ယောက်အနေနဲ့ ငါ့မှာ ဆုံးဖြတ်ပိုင်ခွင့် ရှိပါတယ်"

ရှင်းက သူ့ကို တစ်ချက်ကြည့်လိုက်ပြီး (ခင်ဗျားရဲ့ အာဏာက သိပ်တန်ဖိုးမရှိပါဘူး) ဟု စိတ်ထဲမှ ဆိုလိုက်သည်။ "ကျွန်တော် မီးစွမ်းအင် နင်ဂျုဆု အချို့ လိုချင်တယ်၊ ဥပမာ- 'မီးတောက်ကြီးဖြင့် ချေမှုန်းခြင်း' (Great Fire Annihilation)၊ 'မီးတောက်ကြီးဖြင့် ဖျက်ဆီးခြင်း' (Great Fire Destruction) နဲ့ 'မီးနဂါးမီးတောက်သီချင်း' (Fire Dragon Flame Song) တို့လိုမျိုးပေါ့"

တာဂျီမ၏ မျက်နှာ ပျက်သွားသည်။ သူ မပေးချင်၍ မဟုတ်ဘဲ အူချီဟာတို့တွင် ထိုပညာရပ်များ မရှိတော့၍ ဖြစ်သည်။ ထိုနင်ဂျုဆုများသည် မာဒါရာ ရွာက ထွက်သွားစဉ်ကတည်းက စက္ကူလိပ်များ ပါသွားခဲ့သဖြင့် မျိုးနွယ်စုထဲတွင် မည်သူမျှ မသိတော့ချေ။

"တခြားဟာ တောင်းလို့မရဘူးလား? ငါတို့ဆီမှာ အဲဒီ ပညာရပ်တွေ မရှိဘူး"

"တောက်... နင်တို့ အူချီဟာတွေကလည်း တော်တော် ဆင်းရဲတာပဲ" ရှင်းက စိတ်ပျက်လက်ပျက် ရေရွတ်လိုက်သည်။ "ဒါဆိုရင်တော့ ခင်ဗျားတို့ဆီမှာ ကျွန်တော် လိုချင်တာ ဘာမှ မရှိတော့ဘူး။ သွားပြီဗျာ"

ရှင်းက ထွက်သွားရန် ပြင်လိုက်သောအခါ တာဂျီမက ပျာပျာသလဲ တားရှာသည်။ "နေဦးလေ! တခြားဟာ တောင်းလို့ရပါတယ်! ငါတို့ဆီမှာ တခြား မီးစွမ်းအင် အတတ်တွေ အများကြီး ရှိပါသေးတယ်!"

"ကျွန်တော် အဲဒါတွေကို စိတ်မဝင်စားဘူး" ရှင်းက ပြတ်ပြတ်သားသား ငြင်းလိုက်သည်။

တာဂျီမ ရှင့်ကို တိုက်ခိုက်ချင်သော်လည်း ရှင်း၏ စွမ်းအားနှင့် ပတ်သက်သည့် သတင်းများကြောင့် စိတ်ကို ထိန်းလိုက်ရသည်။ မျိုးနွယ်စု၏ အမာခံ တိုက်ခိုက်ရေးသမား အများစုမှာလည်း စစ်မြေပြင်သို့ ရောက်နေကြသဖြင့် ရှင်းကို အတင်းအဓမ္မ ဖိအားပေးရန်မှာ မဖြစ်နိုင်မှန်း သူ သိလိုက်သည်။

...

ရှင်းသည် အူချီဟာဝင်းမှ ထွက်လာပြီး နောက်သို့ ပြန်လှည့်ကြည့်လိုက်သည်။ သူတို့ တိုက်ခိုက်လာလိမ့်မည်ဟု သူ ထင်ထားသော်လည်း ဘာမှ ဖြစ်မလာခဲ့ချေ။ "နှမြောစရာပဲ... ငါ့ဘာသာပဲ အသစ်ပြန်ထွင်ရတော့မှာပေါ့"

ရှင်းသည် ဆန်းဂျူးဝင်းသို့ ပြန်ရောက်သောအခါ ကူရှီးနား၊ မီကိုတိုနှင့် ကိုနန်တို့က သူ့ကို ချက်ချင်း ဝိုင်းမေးကြတော့သည်။ "အူချီဟာတွေ နင့်ကို တစ်ခုခု လုပ်ကြသေးလား?" မီကိုတိုက စိုးရိမ်တကြီး မေးသည်။

"ဟင့်အင်း... ဘာမှ မလုပ်ဘူး၊ အဲဒါကပဲ ထူးဆန်းနေတာ"

"တော်သေးတာပေါ့" မီကိုတို စိတ်သက်သာရာ ရသွားတော့သည်။